Araṇya Kāṇḍa — The book of the forest

मूलं धर्मतरोर्विवेकजलधेः पूर्णेन्दुमानन्ददं

mūlaṃ dharmatarorvivekajaladheḥ pūrṇendumānandadaṃ

वैराग्याम्बुजभास्करं ह्यघघनध्वान्तापहं तापहम्।

vairāgyāmbujabhāskaraṃ hyaghaghanadhvāntāpahaṃ tāpaham।

मोहाम्भोधरपूगपाटनविधौ स्वःसम्भवं शङ्करं

mohāmbhodharapūgapāṭanavidhau svaḥsambhavaṃ śaṅkaraṃ

वन्दे ब्रह्मकुलं कलंकशमनं श्रीरामभूपप्रियम्।।1।।

vande brahmakulaṃ kalaṃkaśamanaṃ śrīrāmabhūpapriyam॥1॥

सान्द्रानन्दपयोदसौभगतनुं पीताम्बरं सुन्दरं

sāndrānandapayodasaubhagatanuṃ pītāmbaraṃ sundaraṃ

पाणौ बाणशरासनं कटिलसत्तूणीरभारं वरम्

pāṇau bāṇaśarāsanaṃ kaṭilasattūṇīrabhāraṃ varam

राजीवायतलोचनं धृतजटाजूटेन संशोभितं

rājīvāyatalocanaṃ dhṛtajaṭājūṭena saṃśobhitaṃ

सीतालक्ष्मणसंयुतं पथिगतं रामाभिरामं भजे।।2।।

sītālakṣmaṇasaṃyutaṃ pathigataṃ rāmābhirāmaṃ bhaje॥2॥

उमा राम गुन गूढ़ पंडित मुनि पावहिं बिरति।

umā rāma guna gūr̤ha paṃḍita muni pāvahiṃ birati।

पावहिं मोह बिमूढ़ जे हरि बिमुख न धर्म रति।।

pāvahiṃ moha bimūr̤ha je hari bimukha na dharma rati॥

पुर नर भरत प्रीति मैं गाई। मति अनुरूप अनूप सुहाई।।

pura nara bharata prīti maiṃ gāī। mati anurūpa anūpa suhāī॥

अब प्रभु चरित सुनहु अति पावन। करत जे बन सुर नर मुनि भावन।।

aba prabhu carita sunahu ati pāvana। karata je bana sura nara muni bhāvana॥

एक बार चुनि कुसुम सुहाए। निज कर भूषन राम बनाए।।

eka bāra cuni kusuma suhāe। nija kara bhūṣana rāma banāe॥

सीतहि पहिराए प्रभु सादर। बैठे फटिक सिला पर सुंदर।।

sītahi pahirāe prabhu sādara। baiṭhe phaṭika silā para suṃdara॥

सुरपति सुत धरि बायस बेषा। सठ चाहत रघुपति बल देखा।।

surapati suta dhari bāyasa beṣā। saṭha cāhata raghupati bala dekhā॥

जिमि पिपीलिका सागर थाहा। महा मंदमति पावन चाहा।।

jimi pipīlikā sāgara thāhā। mahā maṃdamati pāvana cāhā॥

सीता चरन चौंच हति भागा। मूढ़ मंदमति कारन कागा।।

sītā carana cauṃca hati bhāgā। mūr̤ha maṃdamati kārana kāgā॥

चला रुधिर रघुनायक जाना। सींक धनुष सायक संधाना।।

calā rudhira raghunāyaka jānā। sīṃka dhanuṣa sāyaka saṃdhānā॥

अति कृपाल रघुनायक सदा दीन पर नेह।

ati kṛpāla raghunāyaka sadā dīna para neha।

ता सन आइ कीन्ह छलु मूरख अवगुन गेह।।1।।

tā sana āi kīnha chalu mūrakha avaguna geha॥1॥

प्रेरित मंत्र ब्रह्मसर धावा। चला भाजि बायस भय पावा।।

prerita maṃtra brahmasara dhāvā। calā bhāji bāyasa bhaya pāvā॥

धरि निज रुप गयउ पितु पाहीं। राम बिमुख राखा तेहि नाहीं।।

dhari nija rupa gayau pitu pāhīṃ। rāma bimukha rākhā tehi nāhīṃ॥

भा निरास उपजी मन त्रासा। जथा चक्र भय रिषि दुर्बासा।।

bhā nirāsa upajī mana trāsā। jathā cakra bhaya riṣi durbāsā॥

ब्रह्मधाम सिवपुर सब लोका। फिरा श्रमित ब्याकुल भय सोका।।

brahmadhāma sivapura saba lokā। phirā śramita byākula bhaya sokā॥

काहूँ बैठन कहा न ओही। राखि को सकइ राम कर द्रोही।।

kāhū~ baiṭhana kahā na ohī। rākhi ko sakai rāma kara drohī॥

मातु मृत्यु पितु समन समाना। सुधा होइ बिष सुनु हरिजाना।।

mātu mṛtyu pitu samana samānā। sudhā hoi biṣa sunu harijānā॥

मित्र करइ सत रिपु कै करनी। ता कहँ बिबुधनदी बैतरनी।।

mitra karai sata ripu kai karanī। tā kaha~ bibudhanadī baitaranī॥

सब जगु ताहि अनलहु ते ताता। जो रघुबीर बिमुख सुनु भ्राता।।

saba jagu tāhi analahu te tātā। jo raghubīra bimukha sunu bhrātā॥

नारद देखा बिकल जयंता। लागि दया कोमल चित संता।।

nārada dekhā bikala jayaṃtā। lāgi dayā komala cita saṃtā॥

पठवा तुरत राम पहिं ताही। कहेसि पुकारि प्रनत हित पाही।।

paṭhavā turata rāma pahiṃ tāhī। kahesi pukāri pranata hita pāhī॥

आतुर सभय गहेसि पद जाई। त्राहि त्राहि दयाल रघुराई।।

ātura sabhaya gahesi pada jāī। trāhi trāhi dayāla raghurāī॥

अतुलित बल अतुलित प्रभुताई। मैं मतिमंद जानि नहिं पाई।।

atulita bala atulita prabhutāī। maiṃ matimaṃda jāni nahiṃ pāī॥

निज कृत कर्म जनित फल पायउँ। अब प्रभु पाहि सरन तकि आयउँ।।

nija kṛta karma janita phala pāyau~। aba prabhu pāhi sarana taki āyau~॥

सुनि कृपाल अति आरत बानी। एकनयन करि तजा भवानी।।

suni kṛpāla ati ārata bānī। ekanayana kari tajā bhavānī॥

कीन्ह मोह बस द्रोह जद्यपि तेहि कर बध उचित।

kīnha moha basa droha jadyapi tehi kara badha ucita।

प्रभु छाड़ेउ करि छोह को कृपाल रघुबीर सम।।2।।

prabhu chār̤eu kari choha ko kṛpāla raghubīra sama॥2॥

रघुपति चित्रकूट बसि नाना। चरित किए श्रुति सुधा समाना।।

raghupati citrakūṭa basi nānā। carita kie śruti sudhā samānā॥

बहुरि राम अस मन अनुमाना। होइहि भीर सबहिं मोहि जाना।।

bahuri rāma asa mana anumānā। hoihi bhīra sabahiṃ mohi jānā॥

सकल मुनिन्ह सन बिदा कराई। सीता सहित चले द्वौ भाई।।

sakala muninha sana bidā karāī। sītā sahita cale dvau bhāī॥

अत्रि के आश्रम जब प्रभु गयऊ। सुनत महामुनि हरषित भयऊ।।

atri ke āśrama jaba prabhu gayaū। sunata mahāmuni haraṣita bhayaū॥

पुलकित गात अत्रि उठि धाए। देखि रामु आतुर चलि आए।।

pulakita gāta atri uṭhi dhāe। dekhi rāmu ātura cali āe॥

करत दंडवत मुनि उर लाए। प्रेम बारि द्वौ जन अन्हवाए।।

karata daṃḍavata muni ura lāe। prema bāri dvau jana anhavāe॥

देखि राम छबि नयन जुड़ाने। सादर निज आश्रम तब आने।।

dekhi rāma chabi nayana jur̤āne। sādara nija āśrama taba āne॥

करि पूजा कहि बचन सुहाए। दिए मूल फल प्रभु मन भाए।।

kari pūjā kahi bacana suhāe। die mūla phala prabhu mana bhāe॥

प्रभु आसन आसीन भरि लोचन सोभा निरखि।

prabhu āsana āsīna bhari locana sobhā nirakhi।

मुनिबर परम प्रबीन जोरि पानि अस्तुति करत।।3।।

munibara parama prabīna jori pāni astuti karata॥3॥

नमामि भक्त वत्सलं। कृपालु शील कोमलं।।

namāmi bhakta vatsalaṃ। kṛpālu śīla komalaṃ॥

भजामि ते पदांबुजं। अकामिनां स्वधामदं।।

bhajāmi te padāṃbujaṃ। akāmināṃ svadhāmadaṃ॥

निकाम श्याम सुंदरं। भवाम्बुनाथ मंदरं।।

nikāma śyāma suṃdaraṃ। bhavāmbunātha maṃdaraṃ॥

प्रफुल्ल कंज लोचनं। मदादि दोष मोचनं।।

praphulla kaṃja locanaṃ। madādi doṣa mocanaṃ॥

प्रलंब बाहु विक्रमं। प्रभोऽप्रमेय वैभवं।।

pralaṃba bāhu vikramaṃ। prabho'prameya vaibhavaṃ॥

निषंग चाप सायकं। धरं त्रिलोक नायकं।।

niṣaṃga cāpa sāyakaṃ। dharaṃ triloka nāyakaṃ॥

दिनेश वंश मंडनं। महेश चाप खंडनं।।

dineśa vaṃśa maṃḍanaṃ। maheśa cāpa khaṃḍanaṃ॥

मुनींद्र संत रंजनं। सुरारि वृंद भंजनं।।

munīṃdra saṃta raṃjanaṃ। surāri vṛṃda bhaṃjanaṃ॥

मनोज वैरि वंदितं। अजादि देव सेवितं।।

manoja vairi vaṃditaṃ। ajādi deva sevitaṃ॥

विशुद्ध बोध विग्रहं। समस्त दूषणापहं।।

viśuddha bodha vigrahaṃ। samasta dūṣaṇāpahaṃ॥

नमामि इंदिरा पतिं। सुखाकरं सतां गतिं।।

namāmi iṃdirā patiṃ। sukhākaraṃ satāṃ gatiṃ॥

भजे सशक्ति सानुजं। शची पतिं प्रियानुजं।।

bhaje saśakti sānujaṃ। śacī patiṃ priyānujaṃ॥

त्वदंघ्रि मूल ये नराः। भजंति हीन मत्सरा।।

tvadaṃghri mūla ye narāḥ। bhajaṃti hīna matsarā॥

पतंति नो भवार्णवे। वितर्क वीचि संकुले।।

pataṃti no bhavārṇave। vitarka vīci saṃkule॥

विविक्त वासिनः सदा। भजंति मुक्तये मुदा।।

vivikta vāsinaḥ sadā। bhajaṃti muktaye mudā॥

निरस्य इंद्रियादिकं। प्रयांति ते गतिं स्वकं।।

nirasya iṃdriyādikaṃ। prayāṃti te gatiṃ svakaṃ॥

तमेकमभ्दुतं प्रभुं। निरीहमीश्वरं विभुं।।

tamekamabhdutaṃ prabhuṃ। nirīhamīśvaraṃ vibhuṃ॥

जगद्गुरुं च शाश्वतं। तुरीयमेव केवलं।।

jagadguruṃ ca śāśvataṃ। turīyameva kevalaṃ॥

भजामि भाव वल्लभं। कुयोगिनां सुदुर्लभं।।

bhajāmi bhāva vallabhaṃ। kuyogināṃ sudurlabhaṃ॥

स्वभक्त कल्प पादपं। समं सुसेव्यमन्वहं।।

svabhakta kalpa pādapaṃ। samaṃ susevyamanvahaṃ॥

अनूप रूप भूपतिं। नतोऽहमुर्विजा पतिं।।

anūpa rūpa bhūpatiṃ। nato'hamurvijā patiṃ॥

प्रसीद मे नमामि ते। पदाब्ज भक्ति देहि मे।।

prasīda me namāmi te। padābja bhakti dehi me॥

पठंति ये स्तवं इदं। नरादरेण ते पदं।।

paṭhaṃti ye stavaṃ idaṃ। narādareṇa te padaṃ॥

व्रजंति नात्र संशयं। त्वदीय भक्ति संयुता।।

vrajaṃti nātra saṃśayaṃ। tvadīya bhakti saṃyutā॥

बिनती करि मुनि नाइ सिरु कह कर जोरि बहोरि।

binatī kari muni nāi siru kaha kara jori bahori।

चरन सरोरुह नाथ जनि कबहुँ तजै मति मोरि।।4।।

carana saroruha nātha jani kabahu~ tajai mati mori॥4॥

अनुसुइया के पद गहि सीता। मिली बहोरि सुसील बिनीता।।

anusuiyā ke pada gahi sītā। milī bahori susīla binītā॥

रिषिपतिनी मन सुख अधिकाई। आसिष देइ निकट बैठाई।।

riṣipatinī mana sukha adhikāī। āsiṣa dei nikaṭa baiṭhāī॥

दिब्य बसन भूषन पहिराए। जे नित नूतन अमल सुहाए।।

dibya basana bhūṣana pahirāe। je nita nūtana amala suhāe॥

कह रिषिबधू सरस मृदु बानी। नारिधर्म कछु ब्याज बखानी।।

kaha riṣibadhū sarasa mṛdu bānī। nāridharma kachu byāja bakhānī॥

मातु पिता भ्राता हितकारी। मितप्रद सब सुनु राजकुमारी।।

mātu pitā bhrātā hitakārī। mitaprada saba sunu rājakumārī॥

अमित दानि भर्ता बयदेही। अधम सो नारि जो सेव न तेही।।

amita dāni bhartā bayadehī। adhama so nāri jo seva na tehī॥

धीरज धर्म मित्र अरु नारी। आपद काल परिखिअहिं चारी।।

dhīraja dharma mitra aru nārī। āpada kāla parikhiahiṃ cārī॥

बृद्ध रोगबस जड़ धनहीना। अधं बधिर क्रोधी अति दीना।।

bṛddha rogabasa jar̤a dhanahīnā। adhaṃ badhira krodhī ati dīnā॥

ऐसेहु पति कर किएँ अपमाना। नारि पाव जमपुर दुख नाना।।

aisehu pati kara kie~ apamānā। nāri pāva jamapura dukha nānā॥

एकइ धर्म एक ब्रत नेमा। कायँ बचन मन पति पद प्रेमा।।

ekai dharma eka brata nemā। kāya~ bacana mana pati pada premā॥

जग पति ब्रता चारि बिधि अहहिं। बेद पुरान संत सब कहहिं।।

jaga pati bratā cāri bidhi ahahiṃ। beda purāna saṃta saba kahahiṃ॥

उत्तम के अस बस मन माहीं। सपनेहुँ आन पुरुष जग नाहीं।।

uttama ke asa basa mana māhīṃ। sapanehu~ āna puruṣa jaga nāhīṃ॥

मध्यम परपति देखइ कैसें। भ्राता पिता पुत्र निज जैंसें।।

madhyama parapati dekhai kaiseṃ। bhrātā pitā putra nija jaiṃseṃ॥

धर्म बिचारि समुझि कुल रहई। सो निकिष्ट त्रिय श्रुति अस कहई।।

dharma bicāri samujhi kula rahaī। so nikiṣṭa triya śruti asa kahaī॥

बिनु अवसर भय तें रह जोई। जानेहु अधम नारि जग सोई।।

binu avasara bhaya teṃ raha joī। jānehu adhama nāri jaga soī॥

पति बंचक परपति रति करई। रौरव नरक कल्प सत परई।।

pati baṃcaka parapati rati karaī। raurava naraka kalpa sata paraī॥

छन सुख लागि जनम सत कोटि। दुख न समुझ तेहि सम को खोटी।।

chana sukha lāgi janama sata koṭi। dukha na samujha tehi sama ko khoṭī॥

बिनु श्रम नारि परम गति लहई। पतिब्रत धर्म छाड़ि छल गहई।।

binu śrama nāri parama gati lahaī। patibrata dharma chār̤i chala gahaī॥

पति प्रतिकुल जनम जहँ जाई। बिधवा होई पाई तरुनाई।।

pati pratikula janama jaha~ jāī। bidhavā hoī pāī tarunāī॥

सहज अपावनि नारि पति सेवत सुभ गति लहइ।

sahaja apāvani nāri pati sevata subha gati lahai।

जसु गावत श्रुति चारि अजहु तुलसिका हरिहि प्रिय।।5(क)।।

jasu gāvata śruti cāri ajahu tulasikā harihi priya॥5(ka)॥

सुनु सीता तव नाम सुमिर नारि पतिब्रत करहि।

sunu sītā tava nāma sumira nāri patibrata karahi।

तोहि प्रानप्रिय राम कहिउँ कथा संसार हित।।5(ख)।।

tohi prānapriya rāma kahiu~ kathā saṃsāra hita॥5(kha)॥

सुनि जानकीं परम सुखु पावा। सादर तासु चरन सिरु नावा।।

suni jānakīṃ parama sukhu pāvā। sādara tāsu carana siru nāvā॥

तब मुनि सन कह कृपानिधाना। आयसु होइ जाउँ बन आना।।

taba muni sana kaha kṛpānidhānā। āyasu hoi jāu~ bana ānā॥

संतत मो पर कृपा करेहू। सेवक जानि तजेहु जनि नेहू।।

saṃtata mo para kṛpā karehū। sevaka jāni tajehu jani nehū॥

धर्म धुरंधर प्रभु कै बानी। सुनि सप्रेम बोले मुनि ग्यानी।।

dharma dhuraṃdhara prabhu kai bānī। suni saprema bole muni gyānī॥

जासु कृपा अज सिव सनकादी। चहत सकल परमारथ बादी।।

jāsu kṛpā aja siva sanakādī। cahata sakala paramāratha bādī॥

ते तुम्ह राम अकाम पिआरे। दीन बंधु मृदु बचन उचारे।।

te tumha rāma akāma piāre। dīna baṃdhu mṛdu bacana ucāre॥

अब जानी मैं श्री चतुराई। भजी तुम्हहि सब देव बिहाई।।

aba jānī maiṃ śrī caturāī। bhajī tumhahi saba deva bihāī॥

जेहि समान अतिसय नहिं कोई। ता कर सील कस न अस होई।।

jehi samāna atisaya nahiṃ koī। tā kara sīla kasa na asa hoī॥

केहि बिधि कहौं जाहु अब स्वामी। कहहु नाथ तुम्ह अंतरजामी।।

kehi bidhi kahauṃ jāhu aba svāmī। kahahu nātha tumha aṃtarajāmī॥

अस कहि प्रभु बिलोकि मुनि धीरा। लोचन जल बह पुलक सरीरा।।

asa kahi prabhu biloki muni dhīrā। locana jala baha pulaka sarīrā॥

तन पुलक निर्भर प्रेम पुरन नयन मुख पंकज दिए।

tana pulaka nirbhara prema purana nayana mukha paṃkaja die।

मन ग्यान गुन गोतीत प्रभु मैं दीख जप तप का किए।।

mana gyāna guna gotīta prabhu maiṃ dīkha japa tapa kā kie॥

जप जोग धर्म समूह तें नर भगति अनुपम पावई।

japa joga dharma samūha teṃ nara bhagati anupama pāvaī।

रधुबीर चरित पुनीत निसि दिन दास तुलसी गावई।।

radhubīra carita punīta nisi dina dāsa tulasī gāvaī॥

कलिमल समन दमन मन राम सुजस सुखमूल।

kalimala samana damana mana rāma sujasa sukhamūla।

सादर सुनहि जे तिन्ह पर राम रहहिं अनुकूल।।6(क)।।

sādara sunahi je tinha para rāma rahahiṃ anukūla॥6(ka)॥

कठिन काल मल कोस धर्म न ग्यान न जोग जप।

kaṭhina kāla mala kosa dharma na gyāna na joga japa।

परिहरि सकल भरोस रामहि भजहिं ते चतुर नर।।6(ख)।।

parihari sakala bharosa rāmahi bhajahiṃ te catura nara॥6(kha)॥

मुनि पद कमल नाइ करि सीसा। चले बनहि सुर नर मुनि ईसा।।

muni pada kamala nāi kari sīsā। cale banahi sura nara muni īsā॥

आगे राम अनुज पुनि पाछें। मुनि बर बेष बने अति काछें।।

āge rāma anuja puni pācheṃ। muni bara beṣa bane ati kācheṃ॥

उमय बीच श्री सोहइ कैसी। ब्रह्म जीव बिच माया जैसी।।

umaya bīca śrī sohai kaisī। brahma jīva bica māyā jaisī॥

सरिता बन गिरि अवघट घाटा। पति पहिचानी देहिं बर बाटा।।

saritā bana giri avaghaṭa ghāṭā। pati pahicānī dehiṃ bara bāṭā॥

जहँ जहँ जाहि देव रघुराया। करहिं मेध तहँ तहँ नभ छाया।।

jaha~ jaha~ jāhi deva raghurāyā। karahiṃ medha taha~ taha~ nabha chāyā॥

मिला असुर बिराध मग जाता। आवतहीं रघुवीर निपाता।।

milā asura birādha maga jātā। āvatahīṃ raghuvīra nipātā॥

तुरतहिं रुचिर रूप तेहिं पावा। देखि दुखी निज धाम पठावा।।

turatahiṃ rucira rūpa tehiṃ pāvā। dekhi dukhī nija dhāma paṭhāvā॥

पुनि आए जहँ मुनि सरभंगा। सुंदर अनुज जानकी संगा।।

puni āe jaha~ muni sarabhaṃgā। suṃdara anuja jānakī saṃgā॥

देखी राम मुख पंकज मुनिबर लोचन भृंग।

dekhī rāma mukha paṃkaja munibara locana bhṛṃga।

सादर पान करत अति धन्य जन्म सरभंग।।7।।

sādara pāna karata ati dhanya janma sarabhaṃga॥7॥

कह मुनि सुनु रघुबीर कृपाला। संकर मानस राजमराला।।

kaha muni sunu raghubīra kṛpālā। saṃkara mānasa rājamarālā॥

जात रहेउँ बिरंचि के धामा। सुनेउँ श्रवन बन ऐहहिं रामा।।

jāta raheu~ biraṃci ke dhāmā। suneu~ śravana bana aihahiṃ rāmā॥

चितवत पंथ रहेउँ दिन राती। अब प्रभु देखि जुड़ानी छाती।।

citavata paṃtha raheu~ dina rātī। aba prabhu dekhi jur̤ānī chātī॥

नाथ सकल साधन मैं हीना। कीन्ही कृपा जानि जन दीना।।

nātha sakala sādhana maiṃ hīnā। kīnhī kṛpā jāni jana dīnā॥

सो कछु देव न मोहि निहोरा। निज पन राखेउ जन मन चोरा।।

so kachu deva na mohi nihorā। nija pana rākheu jana mana corā॥

तब लगि रहहु दीन हित लागी। जब लगि मिलौं तुम्हहि तनु त्यागी।।

taba lagi rahahu dīna hita lāgī। jaba lagi milauṃ tumhahi tanu tyāgī॥

जोग जग्य जप तप ब्रत कीन्हा। प्रभु कहँ देइ भगति बर लीन्हा।।

joga jagya japa tapa brata kīnhā। prabhu kaha~ dei bhagati bara līnhā॥

एहि बिधि सर रचि मुनि सरभंगा। बैठे हृदयँ छाड़ि सब संगा।।

ehi bidhi sara raci muni sarabhaṃgā। baiṭhe hṛdaya~ chār̤i saba saṃgā॥

सीता अनुज समेत प्रभु नील जलद तनु स्याम।

sītā anuja sameta prabhu nīla jalada tanu syāma।

मम हियँ बसहु निरंतर सगुनरुप श्रीराम।।8।।

mama hiya~ basahu niraṃtara sagunarupa śrīrāma॥8॥

अस कहि जोग अगिनि तनु जारा। राम कृपाँ बैकुंठ सिधारा।।

asa kahi joga agini tanu jārā। rāma kṛpā~ baikuṃṭha sidhārā॥

ताते मुनि हरि लीन न भयऊ। प्रथमहिं भेद भगति बर लयऊ।।

tāte muni hari līna na bhayaū। prathamahiṃ bheda bhagati bara layaū॥

रिषि निकाय मुनिबर गति देखि। सुखी भए निज हृदयँ बिसेषी।।

riṣi nikāya munibara gati dekhi। sukhī bhae nija hṛdaya~ biseṣī॥

अस्तुति करहिं सकल मुनि बृंदा। जयति प्रनत हित करुना कंदा।।

astuti karahiṃ sakala muni bṛṃdā। jayati pranata hita karunā kaṃdā॥

पुनि रघुनाथ चले बन आगे। मुनिबर बृंद बिपुल सँग लागे।।

puni raghunātha cale bana āge। munibara bṛṃda bipula sa~ga lāge॥

अस्थि समूह देखि रघुराया। पूछी मुनिन्ह लागि अति दाया।।

asthi samūha dekhi raghurāyā। pūchī muninha lāgi ati dāyā॥

जानतहुँ पूछिअ कस स्वामी। सबदरसी तुम्ह अंतरजामी।।

jānatahu~ pūchia kasa svāmī। sabadarasī tumha aṃtarajāmī॥

निसिचर निकर सकल मुनि खाए। सुनि रघुबीर नयन जल छाए।।

nisicara nikara sakala muni khāe। suni raghubīra nayana jala chāe॥

निसिचर हीन करउँ महि भुज उठाइ पन कीन्ह।

nisicara hīna karau~ mahi bhuja uṭhāi pana kīnha।

सकल मुनिन्ह के आश्रमन्हि जाइ जाइ सुख दीन्ह।।9।।

sakala muninha ke āśramanhi jāi jāi sukha dīnha॥9॥

मुनि अगस्ति कर सिष्य सुजाना। नाम सुतीछन रति भगवाना।।

muni agasti kara siṣya sujānā। nāma sutīchana rati bhagavānā॥

मन क्रम बचन राम पद सेवक। सपनेहुँ आन भरोस न देवक।।

mana krama bacana rāma pada sevaka। sapanehu~ āna bharosa na devaka॥

प्रभु आगवनु श्रवन सुनि पावा। करत मनोरथ आतुर धावा।।

prabhu āgavanu śravana suni pāvā। karata manoratha ātura dhāvā॥

हे बिधि दीनबंधु रघुराया। मो से सठ पर करिहहिं दाया।।

he bidhi dīnabaṃdhu raghurāyā। mo se saṭha para karihahiṃ dāyā॥

सहित अनुज मोहि राम गोसाई। मिलिहहिं निज सेवक की नाई।।

sahita anuja mohi rāma gosāī। milihahiṃ nija sevaka kī nāī॥

मोरे जियँ भरोस दृढ़ नाहीं। भगति बिरति न ग्यान मन माहीं।।

more jiya~ bharosa dṛr̤ha nāhīṃ। bhagati birati na gyāna mana māhīṃ॥

नहिं सतसंग जोग जप जागा। नहिं दृढ़ चरन कमल अनुरागा।।

nahiṃ satasaṃga joga japa jāgā। nahiṃ dṛr̤ha carana kamala anurāgā॥

एक बानि करुनानिधान की। सो प्रिय जाकें गति न आन की।।

eka bāni karunānidhāna kī। so priya jākeṃ gati na āna kī॥

होइहैं सुफल आजु मम लोचन। देखि बदन पंकज भव मोचन।।

hoihaiṃ suphala āju mama locana। dekhi badana paṃkaja bhava mocana॥

निर्भर प्रेम मगन मुनि ग्यानी। कहि न जाइ सो दसा भवानी।।

nirbhara prema magana muni gyānī। kahi na jāi so dasā bhavānī॥

दिसि अरु बिदिसि पंथ नहिं सूझा। को मैं चलेउँ कहाँ नहिं बूझा।।

disi aru bidisi paṃtha nahiṃ sūjhā। ko maiṃ caleu~ kahā~ nahiṃ būjhā॥

कबहुँक फिरि पाछें पुनि जाई। कबहुँक नृत्य करइ गुन गाई।।

kabahu~ka phiri pācheṃ puni jāī। kabahu~ka nṛtya karai guna gāī॥

अबिरल प्रेम भगति मुनि पाई। प्रभु देखैं तरु ओट लुकाई।।

abirala prema bhagati muni pāī। prabhu dekhaiṃ taru oṭa lukāī॥

अतिसय प्रीति देखि रघुबीरा। प्रगटे हृदयँ हरन भव भीरा।।

atisaya prīti dekhi raghubīrā। pragaṭe hṛdaya~ harana bhava bhīrā॥

मुनि मग माझ अचल होइ बैसा। पुलक सरीर पनस फल जैसा।।

muni maga mājha acala hoi baisā। pulaka sarīra panasa phala jaisā॥

तब रघुनाथ निकट चलि आए। देखि दसा निज जन मन भाए।।

taba raghunātha nikaṭa cali āe। dekhi dasā nija jana mana bhāe॥

मुनिहि राम बहु भाँति जगावा। जाग न ध्यानजनित सुख पावा।।

munihi rāma bahu bhā~ti jagāvā। jāga na dhyānajanita sukha pāvā॥

भूप रूप तब राम दुरावा। हृदयँ चतुर्भुज रूप देखावा।।

bhūpa rūpa taba rāma durāvā। hṛdaya~ caturbhuja rūpa dekhāvā॥

मुनि अकुलाइ उठा तब कैसें। बिकल हीन मनि फनि बर जैसें।।

muni akulāi uṭhā taba kaiseṃ। bikala hīna mani phani bara jaiseṃ॥

आगें देखि राम तन स्यामा। सीता अनुज सहित सुख धामा।।

āgeṃ dekhi rāma tana syāmā। sītā anuja sahita sukha dhāmā॥

परेउ लकुट इव चरनन्हि लागी। प्रेम मगन मुनिबर बड़भागी।।

pareu lakuṭa iva carananhi lāgī। prema magana munibara bar̤abhāgī॥

भुज बिसाल गहि लिए उठाई। परम प्रीति राखे उर लाई।।

bhuja bisāla gahi lie uṭhāī। parama prīti rākhe ura lāī॥

मुनिहि मिलत अस सोह कृपाला। कनक तरुहि जनु भेंट तमाला।।

munihi milata asa soha kṛpālā। kanaka taruhi janu bheṃṭa tamālā॥

राम बदनु बिलोक मुनि ठाढ़ा। मानहुँ चित्र माझ लिखि काढ़ा।।

rāma badanu biloka muni ṭhār̤hā। mānahu~ citra mājha likhi kār̤hā॥

तब मुनि हृदयँ धीर धीर गहि पद बारहिं बार।

taba muni hṛdaya~ dhīra dhīra gahi pada bārahiṃ bāra।

निज आश्रम प्रभु आनि करि पूजा बिबिध प्रकार।।10।।

nija āśrama prabhu āni kari pūjā bibidha prakāra॥10॥

कह मुनि प्रभु सुनु बिनती मोरी। अस्तुति करौं कवन बिधि तोरी।।

kaha muni prabhu sunu binatī morī। astuti karauṃ kavana bidhi torī॥

महिमा अमित मोरि मति थोरी। रबि सन्मुख खद्योत अँजोरी।।

mahimā amita mori mati thorī। rabi sanmukha khadyota a~jorī॥

श्याम तामरस दाम शरीरं। जटा मुकुट परिधन मुनिचीरं।।

śyāma tāmarasa dāma śarīraṃ। jaṭā mukuṭa paridhana municīraṃ॥

पाणि चाप शर कटि तूणीरं। नौमि निरंतर श्रीरघुवीरं।।

pāṇi cāpa śara kaṭi tūṇīraṃ। naumi niraṃtara śrīraghuvīraṃ॥

मोह विपिन घन दहन कृशानुः। संत सरोरुह कानन भानुः।।

moha vipina ghana dahana kṛśānuḥ। saṃta saroruha kānana bhānuḥ॥

निशिचर करि वरूथ मृगराजः। त्रातु सदा नो भव खग बाजः।।

niśicara kari varūtha mṛgarājaḥ। trātu sadā no bhava khaga bājaḥ॥

अरुण नयन राजीव सुवेशं। सीता नयन चकोर निशेशं।।

aruṇa nayana rājīva suveśaṃ। sītā nayana cakora niśeśaṃ॥

हर ह्रदि मानस बाल मरालं। नौमि राम उर बाहु विशालं।।

hara hradi mānasa bāla marālaṃ। naumi rāma ura bāhu viśālaṃ॥

संशय सर्प ग्रसन उरगादः। शमन सुकर्कश तर्क विषादः।।

saṃśaya sarpa grasana uragādaḥ। śamana sukarkaśa tarka viṣādaḥ॥

भव भंजन रंजन सुर यूथः। त्रातु सदा नो कृपा वरूथः।।

bhava bhaṃjana raṃjana sura yūthaḥ। trātu sadā no kṛpā varūthaḥ॥

निर्गुण सगुण विषम सम रूपं। ज्ञान गिरा गोतीतमनूपं।।

nirguṇa saguṇa viṣama sama rūpaṃ। jñāna girā gotītamanūpaṃ॥

अमलमखिलमनवद्यमपारं। नौमि राम भंजन महि भारं।।

amalamakhilamanavadyamapāraṃ। naumi rāma bhaṃjana mahi bhāraṃ॥

भक्त कल्पपादप आरामः। तर्जन क्रोध लोभ मद कामः।।

bhakta kalpapādapa ārāmaḥ। tarjana krodha lobha mada kāmaḥ॥

अति नागर भव सागर सेतुः। त्रातु सदा दिनकर कुल केतुः।।

ati nāgara bhava sāgara setuḥ। trātu sadā dinakara kula ketuḥ॥

अतुलित भुज प्रताप बल धामः। कलि मल विपुल विभंजन नामः।।

atulita bhuja pratāpa bala dhāmaḥ। kali mala vipula vibhaṃjana nāmaḥ॥

धर्म वर्म नर्मद गुण ग्रामः। संतत शं तनोतु मम रामः।।

dharma varma narmada guṇa grāmaḥ। saṃtata śaṃ tanotu mama rāmaḥ॥

जदपि बिरज ब्यापक अबिनासी। सब के हृदयँ निरंतर बासी।।

jadapi biraja byāpaka abināsī। saba ke hṛdaya~ niraṃtara bāsī॥

तदपि अनुज श्री सहित खरारी। बसतु मनसि मम काननचारी।।

tadapi anuja śrī sahita kharārī। basatu manasi mama kānanacārī॥

जे जानहिं ते जानहुँ स्वामी। सगुन अगुन उर अंतरजामी।।

je jānahiṃ te jānahu~ svāmī। saguna aguna ura aṃtarajāmī॥

जो कोसल पति राजिव नयना। करउ सो राम हृदय मम अयना।

jo kosala pati rājiva nayanā। karau so rāma hṛdaya mama ayanā।

अस अभिमान जाइ जनि भोरे। मैं सेवक रघुपति पति मोरे।।

asa abhimāna jāi jani bhore। maiṃ sevaka raghupati pati more॥

सुनि मुनि बचन राम मन भाए। बहुरि हरषि मुनिबर उर लाए।।

suni muni bacana rāma mana bhāe। bahuri haraṣi munibara ura lāe॥

परम प्रसन्न जानु मुनि मोही। जो बर मागहु देउ सो तोही।।

parama prasanna jānu muni mohī। jo bara māgahu deu so tohī॥

मुनि कह मै बर कबहुँ न जाचा। समुझि न परइ झूठ का साचा।।

muni kaha mai bara kabahu~ na jācā। samujhi na parai jhūṭha kā sācā॥

तुम्हहि नीक लागै रघुराई। सो मोहि देहु दास सुखदाई।।

tumhahi nīka lāgai raghurāī। so mohi dehu dāsa sukhadāī॥

अबिरल भगति बिरति बिग्याना। होहु सकल गुन ग्यान निधाना।।

abirala bhagati birati bigyānā। hohu sakala guna gyāna nidhānā॥

प्रभु जो दीन्ह सो बरु मैं पावा। अब सो देहु मोहि जो भावा।।

prabhu jo dīnha so baru maiṃ pāvā। aba so dehu mohi jo bhāvā॥

अनुज जानकी सहित प्रभु चाप बान धर राम।

anuja jānakī sahita prabhu cāpa bāna dhara rāma।

मम हिय गगन इंदु इव बसहु सदा निहकाम।।11।।

mama hiya gagana iṃdu iva basahu sadā nihakāma॥11॥

एवमस्तु करि रमानिवासा। हरषि चले कुभंज रिषि पासा।।

evamastu kari ramānivāsā। haraṣi cale kubhaṃja riṣi pāsā॥

बहुत दिवस गुर दरसन पाएँ। भए मोहि एहिं आश्रम आएँ।।

bahuta divasa gura darasana pāe~। bhae mohi ehiṃ āśrama āe~॥

अब प्रभु संग जाउँ गुर पाहीं। तुम्ह कहँ नाथ निहोरा नाहीं।।

aba prabhu saṃga jāu~ gura pāhīṃ। tumha kaha~ nātha nihorā nāhīṃ॥

देखि कृपानिधि मुनि चतुराई। लिए संग बिहसै द्वौ भाई।।

dekhi kṛpānidhi muni caturāī। lie saṃga bihasai dvau bhāī॥

पंथ कहत निज भगति अनूपा। मुनि आश्रम पहुँचे सुरभूपा।।

paṃtha kahata nija bhagati anūpā। muni āśrama pahu~ce surabhūpā॥

तुरत सुतीछन गुर पहिं गयऊ। करि दंडवत कहत अस भयऊ।।

turata sutīchana gura pahiṃ gayaū। kari daṃḍavata kahata asa bhayaū॥

नाथ कौसलाधीस कुमारा। आए मिलन जगत आधारा।।

nātha kausalādhīsa kumārā। āe milana jagata ādhārā॥

राम अनुज समेत बैदेही। निसि दिनु देव जपत हहु जेही।।

rāma anuja sameta baidehī। nisi dinu deva japata hahu jehī॥

सुनत अगस्ति तुरत उठि धाए। हरि बिलोकि लोचन जल छाए।।

sunata agasti turata uṭhi dhāe। hari biloki locana jala chāe॥

मुनि पद कमल परे द्वौ भाई। रिषि अति प्रीति लिए उर लाई।।

muni pada kamala pare dvau bhāī। riṣi ati prīti lie ura lāī॥

सादर कुसल पूछि मुनि ग्यानी। आसन बर बैठारे आनी।।

sādara kusala pūchi muni gyānī। āsana bara baiṭhāre ānī॥

पुनि करि बहु प्रकार प्रभु पूजा। मोहि सम भाग्यवंत नहिं दूजा।।

puni kari bahu prakāra prabhu pūjā। mohi sama bhāgyavaṃta nahiṃ dūjā॥

जहँ लगि रहे अपर मुनि बृंदा। हरषे सब बिलोकि सुखकंदा।।

jaha~ lagi rahe apara muni bṛṃdā। haraṣe saba biloki sukhakaṃdā॥

मुनि समूह महँ बैठे सन्मुख सब की ओर।

muni samūha maha~ baiṭhe sanmukha saba kī ora।

सरद इंदु तन चितवत मानहुँ निकर चकोर।।12।।

sarada iṃdu tana citavata mānahu~ nikara cakora॥12॥

तब रघुबीर कहा मुनि पाहीं। तुम्ह सन प्रभु दुराव कछु नाही।।

taba raghubīra kahā muni pāhīṃ। tumha sana prabhu durāva kachu nāhī॥

तुम्ह जानहु जेहि कारन आयउँ। ताते तात न कहि समुझायउँ।।

tumha jānahu jehi kārana āyau~। tāte tāta na kahi samujhāyau~॥

अब सो मंत्र देहु प्रभु मोही। जेहि प्रकार मारौं मुनिद्रोही।।

aba so maṃtra dehu prabhu mohī। jehi prakāra mārauṃ munidrohī॥

मुनि मुसकाने सुनि प्रभु बानी। पूछेहु नाथ मोहि का जानी।।

muni musakāne suni prabhu bānī। pūchehu nātha mohi kā jānī॥

तुम्हरेइँ भजन प्रभाव अघारी। जानउँ महिमा कछुक तुम्हारी।।

tumharei~ bhajana prabhāva aghārī। jānau~ mahimā kachuka tumhārī॥

ऊमरि तरु बिसाल तव माया। फल ब्रह्मांड अनेक निकाया।।

ūmari taru bisāla tava māyā। phala brahmāṃḍa aneka nikāyā॥

जीव चराचर जंतु समाना। भीतर बसहि न जानहिं आना।।

jīva carācara jaṃtu samānā। bhītara basahi na jānahiṃ ānā॥

ते फल भच्छक कठिन कराला। तव भयँ डरत सदा सोउ काला।।

te phala bhacchaka kaṭhina karālā। tava bhaya~ ḍarata sadā sou kālā॥

ते तुम्ह सकल लोकपति साईं। पूँछेहु मोहि मनुज की नाईं।।

te tumha sakala lokapati sāīṃ। pū~chehu mohi manuja kī nāīṃ॥

यह बर मागउँ कृपानिकेता। बसहु हृदयँ श्री अनुज समेता।।

yaha bara māgau~ kṛpāniketā। basahu hṛdaya~ śrī anuja sametā॥

अबिरल भगति बिरति सतसंगा। चरन सरोरुह प्रीति अभंगा।।

abirala bhagati birati satasaṃgā। carana saroruha prīti abhaṃgā॥

जद्यपि ब्रह्म अखंड अनंता। अनुभव गम्य भजहिं जेहि संता।।

jadyapi brahma akhaṃḍa anaṃtā। anubhava gamya bhajahiṃ jehi saṃtā॥

अस तव रूप बखानउँ जानउँ। फिरि फिरि सगुन ब्रह्म रति मानउँ।।

asa tava rūpa bakhānau~ jānau~। phiri phiri saguna brahma rati mānau~॥

संतत दासन्ह देहु बड़ाई। तातें मोहि पूँछेहु रघुराई।।

saṃtata dāsanha dehu bar̤āī। tāteṃ mohi pū~chehu raghurāī॥

है प्रभु परम मनोहर ठाऊँ। पावन पंचबटी तेहि नाऊँ।।

hai prabhu parama manohara ṭhāū~। pāvana paṃcabaṭī tehi nāū~॥

दंडक बन पुनीत प्रभु करहू। उग्र साप मुनिबर कर हरहू।।

daṃḍaka bana punīta prabhu karahū। ugra sāpa munibara kara harahū॥

बास करहु तहँ रघुकुल राया। कीजे सकल मुनिन्ह पर दाया।।

bāsa karahu taha~ raghukula rāyā। kīje sakala muninha para dāyā॥

चले राम मुनि आयसु पाई। तुरतहिं पंचबटी निअराई।।

cale rāma muni āyasu pāī। turatahiṃ paṃcabaṭī niarāī॥

गीधराज सैं भैंट भइ बहु बिधि प्रीति बढ़ाइ।।

gīdharāja saiṃ bhaiṃṭa bhai bahu bidhi prīti bar̤hāi॥

गोदावरी निकट प्रभु रहे परन गृह छाइ।।13।।

godāvarī nikaṭa prabhu rahe parana gṛha chāi॥13॥

जब ते राम कीन्ह तहँ बासा। सुखी भए मुनि बीती त्रासा।।

jaba te rāma kīnha taha~ bāsā। sukhī bhae muni bītī trāsā॥

गिरि बन नदीं ताल छबि छाए। दिन दिन प्रति अति हौहिं सुहाए।।

giri bana nadīṃ tāla chabi chāe। dina dina prati ati hauhiṃ suhāe॥

खग मृग बृंद अनंदित रहहीं। मधुप मधुर गंजत छबि लहहीं।।

khaga mṛga bṛṃda anaṃdita rahahīṃ। madhupa madhura gaṃjata chabi lahahīṃ॥

सो बन बरनि न सक अहिराजा। जहाँ प्रगट रघुबीर बिराजा।।

so bana barani na saka ahirājā। jahā~ pragaṭa raghubīra birājā॥

एक बार प्रभु सुख आसीना। लछिमन बचन कहे छलहीना।।

eka bāra prabhu sukha āsīnā। lachimana bacana kahe chalahīnā॥

सुर नर मुनि सचराचर साईं। मैं पूछउँ निज प्रभु की नाई।।

sura nara muni sacarācara sāīṃ। maiṃ pūchau~ nija prabhu kī nāī॥

मोहि समुझाइ कहहु सोइ देवा। सब तजि करौं चरन रज सेवा।।

mohi samujhāi kahahu soi devā। saba taji karauṃ carana raja sevā॥

कहहु ग्यान बिराग अरु माया। कहहु सो भगति करहु जेहिं दाया।।

kahahu gyāna birāga aru māyā। kahahu so bhagati karahu jehiṃ dāyā॥

ईस्वर जीव भेद प्रभु सकल कहौ समुझाइ।।

īsvara jīva bheda prabhu sakala kahau samujhāi॥

जातें होइ चरन रति सोक मोह भ्रम जाइ।।14।।

jāteṃ hoi carana rati soka moha bhrama jāi॥14॥

थोरेहि महँ सब कहउँ बुझाई। सुनहु तात मति मन चित लाई।।

thorehi maha~ saba kahau~ bujhāī। sunahu tāta mati mana cita lāī॥

मैं अरु मोर तोर तैं माया। जेहिं बस कीन्हे जीव निकाया।।

maiṃ aru mora tora taiṃ māyā। jehiṃ basa kīnhe jīva nikāyā॥

गो गोचर जहँ लगि मन जाई। सो सब माया जानेहु भाई।।

go gocara jaha~ lagi mana jāī। so saba māyā jānehu bhāī॥

तेहि कर भेद सुनहु तुम्ह सोऊ। बिद्या अपर अबिद्या दोऊ।।

tehi kara bheda sunahu tumha soū। bidyā apara abidyā doū॥

एक दुष्ट अतिसय दुखरूपा। जा बस जीव परा भवकूपा।।

eka duṣṭa atisaya dukharūpā। jā basa jīva parā bhavakūpā॥

एक रचइ जग गुन बस जाकें। प्रभु प्रेरित नहिं निज बल ताकें।।

eka racai jaga guna basa jākeṃ। prabhu prerita nahiṃ nija bala tākeṃ॥

ग्यान मान जहँ एकउ नाहीं। देख ब्रह्म समान सब माही।।

gyāna māna jaha~ ekau nāhīṃ। dekha brahma samāna saba māhī॥

कहिअ तात सो परम बिरागी। तृन सम सिद्धि तीनि गुन त्यागी।।

kahia tāta so parama birāgī। tṛna sama siddhi tīni guna tyāgī॥

माया ईस न आपु कहुँ जान कहिअ सो जीव।

māyā īsa na āpu kahu~ jāna kahia so jīva।

बंध मोच्छ प्रद सर्बपर माया प्रेरक सीव।।15।।

baṃdha moccha prada sarbapara māyā preraka sīva॥15॥

धर्म तें बिरति जोग तें ग्याना। ग्यान मोच्छप्रद बेद बखाना।।

dharma teṃ birati joga teṃ gyānā। gyāna mocchaprada beda bakhānā॥

जातें बेगि द्रवउँ मैं भाई। सो मम भगति भगत सुखदाई।।

jāteṃ begi dravau~ maiṃ bhāī। so mama bhagati bhagata sukhadāī॥

सो सुतंत्र अवलंब न आना। तेहि आधीन ग्यान बिग्याना।।

so sutaṃtra avalaṃba na ānā। tehi ādhīna gyāna bigyānā॥

भगति तात अनुपम सुखमूला। मिलइ जो संत होइँ अनुकूला।।

bhagati tāta anupama sukhamūlā। milai jo saṃta hoi~ anukūlā॥

भगति कि साधन कहउँ बखानी। सुगम पंथ मोहि पावहिं प्रानी।।

bhagati ki sādhana kahau~ bakhānī। sugama paṃtha mohi pāvahiṃ prānī॥

प्रथमहिं बिप्र चरन अति प्रीती। निज निज कर्म निरत श्रुति रीती।।

prathamahiṃ bipra carana ati prītī। nija nija karma nirata śruti rītī॥

एहि कर फल पुनि बिषय बिरागा। तब मम धर्म उपज अनुरागा।।

ehi kara phala puni biṣaya birāgā। taba mama dharma upaja anurāgā॥

श्रवनादिक नव भक्ति दृढ़ाहीं। मम लीला रति अति मन माहीं।।

śravanādika nava bhakti dṛr̤hāhīṃ। mama līlā rati ati mana māhīṃ॥

संत चरन पंकज अति प्रेमा। मन क्रम बचन भजन दृढ़ नेमा।।

saṃta carana paṃkaja ati premā। mana krama bacana bhajana dṛr̤ha nemā॥

गुरु पितु मातु बंधु पति देवा। सब मोहि कहँ जाने दृढ़ सेवा।।

guru pitu mātu baṃdhu pati devā। saba mohi kaha~ jāne dṛr̤ha sevā॥

मम गुन गावत पुलक सरीरा। गदगद गिरा नयन बह नीरा।।

mama guna gāvata pulaka sarīrā। gadagada girā nayana baha nīrā॥

काम आदि मद दंभ न जाकें। तात निरंतर बस मैं ताकें।।

kāma ādi mada daṃbha na jākeṃ। tāta niraṃtara basa maiṃ tākeṃ॥

बचन कर्म मन मोरि गति भजनु करहिं निःकाम।।

bacana karma mana mori gati bhajanu karahiṃ niḥkāma॥

तिन्ह के हृदय कमल महुँ करउँ सदा बिश्राम।।16।।

tinha ke hṛdaya kamala mahu~ karau~ sadā biśrāma॥16॥

भगति जोग सुनि अति सुख पावा। लछिमन प्रभु चरनन्हि सिरु नावा।।

bhagati joga suni ati sukha pāvā। lachimana prabhu carananhi siru nāvā॥

एहि बिधि गए कछुक दिन बीती। कहत बिराग ग्यान गुन नीती।।

ehi bidhi gae kachuka dina bītī। kahata birāga gyāna guna nītī॥

सूपनखा रावन कै बहिनी। दुष्ट हृदय दारुन जस अहिनी।।

sūpanakhā rāvana kai bahinī। duṣṭa hṛdaya dāruna jasa ahinī॥

पंचबटी सो गइ एक बारा। देखि बिकल भइ जुगल कुमारा।।

paṃcabaṭī so gai eka bārā। dekhi bikala bhai jugala kumārā॥

भ्राता पिता पुत्र उरगारी। पुरुष मनोहर निरखत नारी।।

bhrātā pitā putra uragārī। puruṣa manohara nirakhata nārī॥

होइ बिकल सक मनहि न रोकी। जिमि रबिमनि द्रव रबिहि बिलोकी।।

hoi bikala saka manahi na rokī। jimi rabimani drava rabihi bilokī॥

रुचिर रुप धरि प्रभु पहिं जाई। बोली बचन बहुत मुसुकाई।।

rucira rupa dhari prabhu pahiṃ jāī। bolī bacana bahuta musukāī॥

तुम्ह सम पुरुष न मो सम नारी। यह सँजोग बिधि रचा बिचारी।।

tumha sama puruṣa na mo sama nārī। yaha sa~joga bidhi racā bicārī॥

मम अनुरूप पुरुष जग माहीं। देखेउँ खोजि लोक तिहु नाहीं।।

mama anurūpa puruṣa jaga māhīṃ। dekheu~ khoji loka tihu nāhīṃ॥

ताते अब लगि रहिउँ कुमारी। मनु माना कछु तुम्हहि निहारी।।

tāte aba lagi rahiu~ kumārī। manu mānā kachu tumhahi nihārī॥

सीतहि चितइ कही प्रभु बाता। अहइ कुआर मोर लघु भ्राता।।

sītahi citai kahī prabhu bātā। ahai kuāra mora laghu bhrātā॥

गइ लछिमन रिपु भगिनी जानी। प्रभु बिलोकि बोले मृदु बानी।।

gai lachimana ripu bhaginī jānī। prabhu biloki bole mṛdu bānī॥

सुंदरि सुनु मैं उन्ह कर दासा। पराधीन नहिं तोर सुपासा।।

suṃdari sunu maiṃ unha kara dāsā। parādhīna nahiṃ tora supāsā॥

प्रभु समर्थ कोसलपुर राजा। जो कछु करहिं उनहि सब छाजा।।

prabhu samartha kosalapura rājā। jo kachu karahiṃ unahi saba chājā॥

सेवक सुख चह मान भिखारी। ब्यसनी धन सुभ गति बिभिचारी।।

sevaka sukha caha māna bhikhārī। byasanī dhana subha gati bibhicārī॥

लोभी जसु चह चार गुमानी। नभ दुहि दूध चहत ए प्रानी।।

lobhī jasu caha cāra gumānī। nabha duhi dūdha cahata e prānī॥

पुनि फिरि राम निकट सो आई। प्रभु लछिमन पहिं बहुरि पठाई।।

puni phiri rāma nikaṭa so āī। prabhu lachimana pahiṃ bahuri paṭhāī॥

लछिमन कहा तोहि सो बरई। जो तृन तोरि लाज परिहरई।।

lachimana kahā tohi so baraī। jo tṛna tori lāja pariharaī॥

तब खिसिआनि राम पहिं गई। रूप भयंकर प्रगटत भई।।

taba khisiāni rāma pahiṃ gaī। rūpa bhayaṃkara pragaṭata bhaī॥

सीतहि सभय देखि रघुराई। कहा अनुज सन सयन बुझाई।।

sītahi sabhaya dekhi raghurāī। kahā anuja sana sayana bujhāī॥

लछिमन अति लाघवँ सो नाक कान बिनु कीन्हि।

lachimana ati lāghava~ so nāka kāna binu kīnhi।

ताके कर रावन कहँ मनौ चुनौती दीन्हि।।17।।

tāke kara rāvana kaha~ manau cunautī dīnhi॥17॥

नाक कान बिनु भइ बिकरारा। जनु स्त्रव सैल गैरु कै धारा।।

nāka kāna binu bhai bikarārā। janu strava saila gairu kai dhārā॥

खर दूषन पहिं गइ बिलपाता। धिग धिग तव पौरुष बल भ्राता।।

khara dūṣana pahiṃ gai bilapātā। dhiga dhiga tava pauruṣa bala bhrātā॥

तेहि पूछा सब कहेसि बुझाई। जातुधान सुनि सेन बनाई।।

tehi pūchā saba kahesi bujhāī। jātudhāna suni sena banāī॥

धाए निसिचर निकर बरूथा। जनु सपच्छ कज्जल गिरि जूथा।।

dhāe nisicara nikara barūthā। janu sapaccha kajjala giri jūthā॥

नाना बाहन नानाकारा। नानायुध धर घोर अपारा।।

nānā bāhana nānākārā। nānāyudha dhara ghora apārā॥

सुपनखा आगें करि लीनी। असुभ रूप श्रुति नासा हीनी।।

supanakhā āgeṃ kari līnī। asubha rūpa śruti nāsā hīnī॥

असगुन अमित होहिं भयकारी। गनहिं न मृत्यु बिबस सब झारी।।

asaguna amita hohiṃ bhayakārī। ganahiṃ na mṛtyu bibasa saba jhārī॥

गर्जहि तर्जहिं गगन उड़ाहीं। देखि कटकु भट अति हरषाहीं।।

garjahi tarjahiṃ gagana ur̤āhīṃ। dekhi kaṭaku bhaṭa ati haraṣāhīṃ॥

कोउ कह जिअत धरहु द्वौ भाई। धरि मारहु तिय लेहु छड़ाई।।

kou kaha jiata dharahu dvau bhāī। dhari mārahu tiya lehu char̤āī॥

धूरि पूरि नभ मंडल रहा। राम बोलाइ अनुज सन कहा।।

dhūri pūri nabha maṃḍala rahā। rāma bolāi anuja sana kahā॥

लै जानकिहि जाहु गिरि कंदर। आवा निसिचर कटकु भयंकर।।

lai jānakihi jāhu giri kaṃdara। āvā nisicara kaṭaku bhayaṃkara॥

रहेहु सजग सुनि प्रभु कै बानी। चले सहित श्री सर धनु पानी।।

rahehu sajaga suni prabhu kai bānī। cale sahita śrī sara dhanu pānī॥

देखि राम रिपुदल चलि आवा। बिहसि कठिन कोदंड चढ़ावा।।

dekhi rāma ripudala cali āvā। bihasi kaṭhina kodaṃḍa car̤hāvā॥

कोदंड कठिन चढ़ाइ सिर जट जूट बाँधत सोह क्यों।

kodaṃḍa kaṭhina car̤hāi sira jaṭa jūṭa bā~dhata soha kyoṃ।

मरकत सयल पर लरत दामिनि कोटि सों जुग भुजग ज्यों।।

marakata sayala para larata dāmini koṭi soṃ juga bhujaga jyoṃ॥

कटि कसि निषंग बिसाल भुज गहि चाप बिसिख सुधारि कै।।

kaṭi kasi niṣaṃga bisāla bhuja gahi cāpa bisikha sudhāri kai॥

चितवत मनहुँ मृगराज प्रभु गजराज घटा निहारि कै।।

citavata manahu~ mṛgarāja prabhu gajarāja ghaṭā nihāri kai॥

आइ गए बगमेल धरहु धरहु धावत सुभट।

āi gae bagamela dharahu dharahu dhāvata subhaṭa।

जथा बिलोकि अकेल बाल रबिहि घेरत दनुज।।18।।

jathā biloki akela bāla rabihi gherata danuja॥18॥

प्रभु बिलोकि सर सकहिं न डारी। थकित भई रजनीचर धारी।।

prabhu biloki sara sakahiṃ na ḍārī। thakita bhaī rajanīcara dhārī॥

सचिव बोलि बोले खर दूषन। यह कोउ नृपबालक नर भूषन।।

saciva boli bole khara dūṣana। yaha kou nṛpabālaka nara bhūṣana॥

नाग असुर सुर नर मुनि जेते। देखे जिते हते हम केते।।

nāga asura sura nara muni jete। dekhe jite hate hama kete॥

हम भरि जन्म सुनहु सब भाई। देखी नहिं असि सुंदरताई।।

hama bhari janma sunahu saba bhāī। dekhī nahiṃ asi suṃdaratāī॥

जद्यपि भगिनी कीन्ह कुरूपा। बध लायक नहिं पुरुष अनूपा।।

jadyapi bhaginī kīnha kurūpā। badha lāyaka nahiṃ puruṣa anūpā॥

देहु तुरत निज नारि दुराई। जीअत भवन जाहु द्वौ भाई।।

dehu turata nija nāri durāī। jīata bhavana jāhu dvau bhāī॥

मोर कहा तुम्ह ताहि सुनावहु। तासु बचन सुनि आतुर आवहु।।

mora kahā tumha tāhi sunāvahu। tāsu bacana suni ātura āvahu॥

दूतन्ह कहा राम सन जाई। सुनत राम बोले मुसकाई।।

dūtanha kahā rāma sana jāī। sunata rāma bole musakāī॥

हम छत्री मृगया बन करहीं। तुम्ह से खल मृग खौजत फिरहीं।।

hama chatrī mṛgayā bana karahīṃ। tumha se khala mṛga khaujata phirahīṃ॥

रिपु बलवंत देखि नहिं डरहीं। एक बार कालहु सन लरहीं।।

ripu balavaṃta dekhi nahiṃ ḍarahīṃ। eka bāra kālahu sana larahīṃ॥

जद्यपि मनुज दनुज कुल घालक। मुनि पालक खल सालक बालक।।

jadyapi manuja danuja kula ghālaka। muni pālaka khala sālaka bālaka॥

जौं न होइ बल घर फिरि जाहू। समर बिमुख मैं हतउँ न काहू।।

jauṃ na hoi bala ghara phiri jāhū। samara bimukha maiṃ hatau~ na kāhū॥

रन चढ़ि करिअ कपट चतुराई। रिपु पर कृपा परम कदराई।।

rana car̤hi karia kapaṭa caturāī। ripu para kṛpā parama kadarāī॥

दूतन्ह जाइ तुरत सब कहेऊ। सुनि खर दूषन उर अति दहेऊ।।

dūtanha jāi turata saba kaheū। suni khara dūṣana ura ati daheū॥

उर दहेउ कहेउ कि धरहु धाए बिकट भट रजनीचरा।

ura daheu kaheu ki dharahu dhāe bikaṭa bhaṭa rajanīcarā।

सर चाप तोमर सक्ति सूल कृपान परिघ परसु धरा।।

sara cāpa tomara sakti sūla kṛpāna parigha parasu dharā॥

प्रभु कीन्ह धनुष टकोर प्रथम कठोर घोर भयावहा।

prabhu kīnha dhanuṣa ṭakora prathama kaṭhora ghora bhayāvahā।

भए बधिर ब्याकुल जातुधान न ग्यान तेहि अवसर रहा।।

bhae badhira byākula jātudhāna na gyāna tehi avasara rahā॥

सावधान होइ धाए जानि सबल आराति।

sāvadhāna hoi dhāe jāni sabala ārāti।

लागे बरषन राम पर अस्त्र सस्त्र बहु भाँति।।19(क)।।

lāge baraṣana rāma para astra sastra bahu bhā~ti॥19(ka)॥

तिन्ह के आयुध तिल सम करि काटे रघुबीर।

tinha ke āyudha tila sama kari kāṭe raghubīra।

तानि सरासन श्रवन लगि पुनि छाँड़े निज तीर।।19(ख)।।

tāni sarāsana śravana lagi puni chā~r̤e nija tīra॥19(kha)॥

तब चले जान बबान कराल। फुंकरत जनु बहु ब्याल।।

taba cale jāna babāna karāla। phuṃkarata janu bahu byāla॥

कोपेउ समर श्रीराम। चले बिसिख निसित निकाम।।

kopeu samara śrīrāma। cale bisikha nisita nikāma॥

अवलोकि खरतर तीर। मुरि चले निसिचर बीर।।

avaloki kharatara tīra। muri cale nisicara bīra॥

भए क्रुद्ध तीनिउ भाइ। जो भागि रन ते जाइ।।

bhae kruddha tīniu bhāi। jo bhāgi rana te jāi॥

तेहि बधब हम निज पानि। फिरे मरन मन महुँ ठानि।।

tehi badhaba hama nija pāni। phire marana mana mahu~ ṭhāni॥

आयुध अनेक प्रकार। सनमुख ते करहिं प्रहार।।

āyudha aneka prakāra। sanamukha te karahiṃ prahāra॥

रिपु परम कोपे जानि। प्रभु धनुष सर संधानि।।

ripu parama kope jāni। prabhu dhanuṣa sara saṃdhāni॥

छाँड़े बिपुल नाराच। लगे कटन बिकट पिसाच।।

chā~r̤e bipula nārāca। lage kaṭana bikaṭa pisāca॥

उर सीस भुज कर चरन। जहँ तहँ लगे महि परन।।

ura sīsa bhuja kara carana। jaha~ taha~ lage mahi parana॥

चिक्करत लागत बान। धर परत कुधर समान।।

cikkarata lāgata bāna। dhara parata kudhara samāna॥

भट कटत तन सत खंड। पुनि उठत करि पाषंड।।

bhaṭa kaṭata tana sata khaṃḍa। puni uṭhata kari pāṣaṃḍa॥

नभ उड़त बहु भुज मुंड। बिनु मौलि धावत रुंड।।

nabha ur̤ata bahu bhuja muṃḍa। binu mauli dhāvata ruṃḍa॥

खग कंक काक सृगाल। कटकटहिं कठिन कराल।।

khaga kaṃka kāka sṛgāla। kaṭakaṭahiṃ kaṭhina karāla॥

कटकटहिं ज़ंबुक भूत प्रेत पिसाच खर्पर संचहीं।

kaṭakaṭahiṃ zaṃbuka bhūta preta pisāca kharpara saṃcahīṃ।

बेताल बीर कपाल ताल बजाइ जोगिनि नंचहीं।।

betāla bīra kapāla tāla bajāi jogini naṃcahīṃ॥

रघुबीर बान प्रचंड खंडहिं भटन्ह के उर भुज सिरा।

raghubīra bāna pracaṃḍa khaṃḍahiṃ bhaṭanha ke ura bhuja sirā।

जहँ तहँ परहिं उठि लरहिं धर धरु धरु करहिं भयकर गिरा।।

jaha~ taha~ parahiṃ uṭhi larahiṃ dhara dharu dharu karahiṃ bhayakara girā॥

अंतावरीं गहि उड़त गीध पिसाच कर गहि धावहीं।।

aṃtāvarīṃ gahi ur̤ata gīdha pisāca kara gahi dhāvahīṃ॥

संग्राम पुर बासी मनहुँ बहु बाल गुड़ी उड़ावहीं।।

saṃgrāma pura bāsī manahu~ bahu bāla gur̤ī ur̤āvahīṃ॥

मारे पछारे उर बिदारे बिपुल भट कहँरत परे।

māre pachāre ura bidāre bipula bhaṭa kaha~rata pare।

अवलोकि निज दल बिकल भट तिसिरादि खर दूषन फिरे।।

avaloki nija dala bikala bhaṭa tisirādi khara dūṣana phire॥

सर सक्ति तोमर परसु सूल कृपान एकहि बारहीं।

sara sakti tomara parasu sūla kṛpāna ekahi bārahīṃ।

करि कोप श्रीरघुबीर पर अगनित निसाचर डारहीं।।

kari kopa śrīraghubīra para aganita nisācara ḍārahīṃ॥

प्रभु निमिष महुँ रिपु सर निवारि पचारि डारे सायका।

prabhu nimiṣa mahu~ ripu sara nivāri pacāri ḍāre sāyakā।

दस दस बिसिख उर माझ मारे सकल निसिचर नायका।।

dasa dasa bisikha ura mājha māre sakala nisicara nāyakā॥

महि परत उठि भट भिरत मरत न करत माया अति घनी।

mahi parata uṭhi bhaṭa bhirata marata na karata māyā ati ghanī।

सुर डरत चौदह सहस प्रेत बिलोकि एक अवध धनी।।

sura ḍarata caudaha sahasa preta biloki eka avadha dhanī॥

सुर मुनि सभय प्रभु देखि मायानाथ अति कौतुक कर् यो।

sura muni sabhaya prabhu dekhi māyānātha ati kautuka kar yo।

देखहि परसपर राम करि संग्राम रिपुदल लरि मर् यो।।

dekhahi parasapara rāma kari saṃgrāma ripudala lari mar yo॥

राम राम कहि तनु तजहिं पावहिं पद निर्बान।

rāma rāma kahi tanu tajahiṃ pāvahiṃ pada nirbāna।

करि उपाय रिपु मारे छन महुँ कृपानिधान।।20(क)।।

kari upāya ripu māre chana mahu~ kṛpānidhāna॥20(ka)॥

हरषित बरषहिं सुमन सुर बाजहिं गगन निसान।

haraṣita baraṣahiṃ sumana sura bājahiṃ gagana nisāna।

अस्तुति करि करि सब चले सोभित बिबिध बिमान।।20(ख)।।

astuti kari kari saba cale sobhita bibidha bimāna॥20(kha)॥

जब रघुनाथ समर रिपु जीते। सुर नर मुनि सब के भय बीते।।

jaba raghunātha samara ripu jīte। sura nara muni saba ke bhaya bīte॥

तब लछिमन सीतहि लै आए। प्रभु पद परत हरषि उर लाए।

taba lachimana sītahi lai āe। prabhu pada parata haraṣi ura lāe।

सीता चितव स्याम मृदु गाता। परम प्रेम लोचन न अघाता।।

sītā citava syāma mṛdu gātā। parama prema locana na aghātā॥

पंचवटीं बसि श्रीरघुनायक। करत चरित सुर मुनि सुखदायक।।

paṃcavaṭīṃ basi śrīraghunāyaka। karata carita sura muni sukhadāyaka॥

धुआँ देखि खरदूषन केरा। जाइ सुपनखाँ रावन प्रेरा।।

dhuā~ dekhi kharadūṣana kerā। jāi supanakhā~ rāvana prerā॥

बोलि बचन क्रोध करि भारी। देस कोस कै सुरति बिसारी।।

boli bacana krodha kari bhārī। desa kosa kai surati bisārī॥

करसि पान सोवसि दिनु राती। सुधि नहिं तव सिर पर आराती।।

karasi pāna sovasi dinu rātī। sudhi nahiṃ tava sira para ārātī॥

राज नीति बिनु धन बिनु धर्मा। हरिहि समर्पे बिनु सतकर्मा।।

rāja nīti binu dhana binu dharmā। harihi samarpe binu satakarmā॥

बिद्या बिनु बिबेक उपजाएँ। श्रम फल पढ़े किएँ अरु पाएँ।।

bidyā binu bibeka upajāe~। śrama phala par̤he kie~ aru pāe~॥

संग ते जती कुमंत्र ते राजा। मान ते ग्यान पान तें लाजा।।

saṃga te jatī kumaṃtra te rājā। māna te gyāna pāna teṃ lājā॥

प्रीति प्रनय बिनु मद ते गुनी। नासहि बेगि नीति अस सुनी।।

prīti pranaya binu mada te gunī। nāsahi begi nīti asa sunī॥

रिपु रुज पावक पाप प्रभु अहि गनिअ न छोट करि।

ripu ruja pāvaka pāpa prabhu ahi gania na choṭa kari।

अस कहि बिबिध बिलाप करि लागी रोदन करन।।21(क)।।

asa kahi bibidha bilāpa kari lāgī rodana karana॥21(ka)॥

सभा माझ परि ब्याकुल बहु प्रकार कह रोइ।

sabhā mājha pari byākula bahu prakāra kaha roi।

तोहि जिअत दसकंधर मोरि कि असि गति होइ।।21(ख)।।

tohi jiata dasakaṃdhara mori ki asi gati hoi॥21(kha)॥

सुनत सभासद उठे अकुलाई। समुझाई गहि बाहँ उठाई।।

sunata sabhāsada uṭhe akulāī। samujhāī gahi bāha~ uṭhāī॥

कह लंकेस कहसि निज बाता। केंइँ तव नासा कान निपाता।।

kaha laṃkesa kahasi nija bātā। keṃi~ tava nāsā kāna nipātā॥

अवध नृपति दसरथ के जाए। पुरुष सिंघ बन खेलन आए।।

avadha nṛpati dasaratha ke jāe। puruṣa siṃgha bana khelana āe॥

समुझि परी मोहि उन्ह कै करनी। रहित निसाचर करिहहिं धरनी।।

samujhi parī mohi unha kai karanī। rahita nisācara karihahiṃ dharanī॥

जिन्ह कर भुजबल पाइ दसानन। अभय भए बिचरत मुनि कानन।।

jinha kara bhujabala pāi dasānana। abhaya bhae bicarata muni kānana॥

देखत बालक काल समाना। परम धीर धन्वी गुन नाना।।

dekhata bālaka kāla samānā। parama dhīra dhanvī guna nānā॥

अतुलित बल प्रताप द्वौ भ्राता। खल बध रत सुर मुनि सुखदाता।।

atulita bala pratāpa dvau bhrātā। khala badha rata sura muni sukhadātā॥

सोभाधाम राम अस नामा। तिन्ह के संग नारि एक स्यामा।।

sobhādhāma rāma asa nāmā। tinha ke saṃga nāri eka syāmā॥

रुप रासि बिधि नारि सँवारी। रति सत कोटि तासु बलिहारी।।

rupa rāsi bidhi nāri sa~vārī। rati sata koṭi tāsu balihārī॥

तासु अनुज काटे श्रुति नासा। सुनि तव भगिनि करहिं परिहासा।।

tāsu anuja kāṭe śruti nāsā। suni tava bhagini karahiṃ parihāsā॥

खर दूषन सुनि लगे पुकारा। छन महुँ सकल कटक उन्ह मारा।।

khara dūṣana suni lage pukārā। chana mahu~ sakala kaṭaka unha mārā॥

खर दूषन तिसिरा कर घाता। सुनि दससीस जरे सब गाता।।

khara dūṣana tisirā kara ghātā। suni dasasīsa jare saba gātā॥

सुपनखहि समुझाइ करि बल बोलेसि बहु भाँति।

supanakhahi samujhāi kari bala bolesi bahu bhā~ti।

गयउ भवन अति सोचबस नीद परइ नहिं राति।।22।।

gayau bhavana ati socabasa nīda parai nahiṃ rāti॥22॥

सुर नर असुर नाग खग माहीं। मोरे अनुचर कहँ कोउ नाहीं।।

sura nara asura nāga khaga māhīṃ। more anucara kaha~ kou nāhīṃ॥

खर दूषन मोहि सम बलवंता। तिन्हहि को मारइ बिनु भगवंता।।

khara dūṣana mohi sama balavaṃtā। tinhahi ko mārai binu bhagavaṃtā॥

सुर रंजन भंजन महि भारा। जौं भगवंत लीन्ह अवतारा।।

sura raṃjana bhaṃjana mahi bhārā। jauṃ bhagavaṃta līnha avatārā॥

तौ मै जाइ बैरु हठि करऊँ। प्रभु सर प्रान तजें भव तरऊँ।।

tau mai jāi bairu haṭhi karaū~। prabhu sara prāna tajeṃ bhava taraū~॥

होइहि भजनु न तामस देहा। मन क्रम बचन मंत्र दृढ़ एहा।।

hoihi bhajanu na tāmasa dehā। mana krama bacana maṃtra dṛr̤ha ehā॥

जौं नररुप भूपसुत कोऊ। हरिहउँ नारि जीति रन दोऊ।।

jauṃ nararupa bhūpasuta koū। harihau~ nāri jīti rana doū॥

चला अकेल जान चढि तहवाँ। बस मारीच सिंधु तट जहवाँ।।

calā akela jāna caḍhi tahavā~। basa mārīca siṃdhu taṭa jahavā~॥

इहाँ राम जसि जुगुति बनाई। सुनहु उमा सो कथा सुहाई।।

ihā~ rāma jasi juguti banāī। sunahu umā so kathā suhāī॥

लछिमन गए बनहिं जब लेन मूल फल कंद।

lachimana gae banahiṃ jaba lena mūla phala kaṃda।

जनकसुता सन बोले बिहसि कृपा सुख बृंद।। 23।।

janakasutā sana bole bihasi kṛpā sukha bṛṃda॥ 23॥

सुनहु प्रिया ब्रत रुचिर सुसीला। मैं कछु करबि ललित नरलीला।।

sunahu priyā brata rucira susīlā। maiṃ kachu karabi lalita naralīlā॥

तुम्ह पावक महुँ करहु निवासा। जौ लगि करौं निसाचर नासा।।

tumha pāvaka mahu~ karahu nivāsā। jau lagi karauṃ nisācara nāsā॥

जबहिं राम सब कहा बखानी। प्रभु पद धरि हियँ अनल समानी।।

jabahiṃ rāma saba kahā bakhānī। prabhu pada dhari hiya~ anala samānī॥

निज प्रतिबिंब राखि तहँ सीता। तैसइ सील रुप सुबिनीता।।

nija pratibiṃba rākhi taha~ sītā। taisai sīla rupa subinītā॥

लछिमनहूँ यह मरमु न जाना। जो कछु चरित रचा भगवाना।।

lachimanahū~ yaha maramu na jānā। jo kachu carita racā bhagavānā॥

दसमुख गयउ जहाँ मारीचा। नाइ माथ स्वारथ रत नीचा।।

dasamukha gayau jahā~ mārīcā। nāi mātha svāratha rata nīcā॥

नवनि नीच कै अति दुखदाई। जिमि अंकुस धनु उरग बिलाई।।

navani nīca kai ati dukhadāī। jimi aṃkusa dhanu uraga bilāī॥

भयदायक खल कै प्रिय बानी। जिमि अकाल के कुसुम भवानी।।

bhayadāyaka khala kai priya bānī। jimi akāla ke kusuma bhavānī॥

करि पूजा मारीच तब सादर पूछी बात।

kari pūjā mārīca taba sādara pūchī bāta।

कवन हेतु मन ब्यग्र अति अकसर आयहु तात।।24।।

kavana hetu mana byagra ati akasara āyahu tāta॥24॥

दसमुख सकल कथा तेहि आगें। कही सहित अभिमान अभागें।।

dasamukha sakala kathā tehi āgeṃ। kahī sahita abhimāna abhāgeṃ॥

होहु कपट मृग तुम्ह छलकारी। जेहि बिधि हरि आनौ नृपनारी।।

hohu kapaṭa mṛga tumha chalakārī। jehi bidhi hari ānau nṛpanārī॥

तेहिं पुनि कहा सुनहु दससीसा। ते नररुप चराचर ईसा।।

tehiṃ puni kahā sunahu dasasīsā। te nararupa carācara īsā॥

तासों तात बयरु नहिं कीजे। मारें मरिअ जिआएँ जीजै।।

tāsoṃ tāta bayaru nahiṃ kīje। māreṃ maria jiāe~ jījai॥

मुनि मख राखन गयउ कुमारा। बिनु फर सर रघुपति मोहि मारा।।

muni makha rākhana gayau kumārā। binu phara sara raghupati mohi mārā॥

सत जोजन आयउँ छन माहीं। तिन्ह सन बयरु किएँ भल नाहीं।।

sata jojana āyau~ chana māhīṃ। tinha sana bayaru kie~ bhala nāhīṃ॥

भइ मम कीट भृंग की नाई। जहँ तहँ मैं देखउँ दोउ भाई।।

bhai mama kīṭa bhṛṃga kī nāī। jaha~ taha~ maiṃ dekhau~ dou bhāī॥

जौं नर तात तदपि अति सूरा। तिन्हहि बिरोधि न आइहि पूरा।।

jauṃ nara tāta tadapi ati sūrā। tinhahi birodhi na āihi pūrā॥

जेहिं ताड़का सुबाहु हति खंडेउ हर कोदंड।।

jehiṃ tār̤akā subāhu hati khaṃḍeu hara kodaṃḍa॥

खर दूषन तिसिरा बधेउ मनुज कि अस बरिबंड।।25।।

khara dūṣana tisirā badheu manuja ki asa baribaṃḍa॥25॥

जाहु भवन कुल कुसल बिचारी। सुनत जरा दीन्हिसि बहु गारी।।

jāhu bhavana kula kusala bicārī। sunata jarā dīnhisi bahu gārī॥

गुरु जिमि मूढ़ करसि मम बोधा। कहु जग मोहि समान को जोधा।।

guru jimi mūr̤ha karasi mama bodhā। kahu jaga mohi samāna ko jodhā॥

तब मारीच हृदयँ अनुमाना। नवहि बिरोधें नहिं कल्याना।।

taba mārīca hṛdaya~ anumānā। navahi birodheṃ nahiṃ kalyānā॥

सस्त्री मर्मी प्रभु सठ धनी। बैद बंदि कबि भानस गुनी।।

sastrī marmī prabhu saṭha dhanī। baida baṃdi kabi bhānasa gunī॥

उभय भाँति देखा निज मरना। तब ताकिसि रघुनायक सरना।।

ubhaya bhā~ti dekhā nija maranā। taba tākisi raghunāyaka saranā॥

उतरु देत मोहि बधब अभागें। कस न मरौं रघुपति सर लागें।।

utaru deta mohi badhaba abhāgeṃ। kasa na marauṃ raghupati sara lāgeṃ॥

अस जियँ जानि दसानन संगा। चला राम पद प्रेम अभंगा।।

asa jiya~ jāni dasānana saṃgā। calā rāma pada prema abhaṃgā॥

मन अति हरष जनाव न तेही। आजु देखिहउँ परम सनेही।।

mana ati haraṣa janāva na tehī। āju dekhihau~ parama sanehī॥

निज परम प्रीतम देखि लोचन सुफल करि सुख पाइहौं।

nija parama prītama dekhi locana suphala kari sukha pāihauṃ।

श्री सहित अनुज समेत कृपानिकेत पद मन लाइहौं।।

śrī sahita anuja sameta kṛpāniketa pada mana lāihauṃ॥

निर्बान दायक क्रोध जा कर भगति अबसहि बसकरी।

nirbāna dāyaka krodha jā kara bhagati abasahi basakarī।

निज पानि सर संधानि सो मोहि बधिहि सुखसागर हरी।।

nija pāni sara saṃdhāni so mohi badhihi sukhasāgara harī॥

मम पाछें धर धावत धरें सरासन बान।

mama pācheṃ dhara dhāvata dhareṃ sarāsana bāna।

फिरि फिरि प्रभुहि बिलोकिहउँ धन्य न मो सम आन।।26।।

phiri phiri prabhuhi bilokihau~ dhanya na mo sama āna॥26॥

तेहि बन निकट दसानन गयऊ। तब मारीच कपटमृग भयऊ।।

tehi bana nikaṭa dasānana gayaū। taba mārīca kapaṭamṛga bhayaū॥

अति बिचित्र कछु बरनि न जाई। कनक देह मनि रचित बनाई।।

ati bicitra kachu barani na jāī। kanaka deha mani racita banāī॥

सीता परम रुचिर मृग देखा। अंग अंग सुमनोहर बेषा।।

sītā parama rucira mṛga dekhā। aṃga aṃga sumanohara beṣā॥

सुनहु देव रघुबीर कृपाला। एहि मृग कर अति सुंदर छाला।।

sunahu deva raghubīra kṛpālā। ehi mṛga kara ati suṃdara chālā॥

सत्यसंध प्रभु बधि करि एही। आनहु चर्म कहति बैदेही।।

satyasaṃdha prabhu badhi kari ehī। ānahu carma kahati baidehī॥

तब रघुपति जानत सब कारन। उठे हरषि सुर काजु सँवारन।।

taba raghupati jānata saba kārana। uṭhe haraṣi sura kāju sa~vārana॥

मृग बिलोकि कटि परिकर बाँधा। करतल चाप रुचिर सर साँधा।।

mṛga biloki kaṭi parikara bā~dhā। karatala cāpa rucira sara sā~dhā॥

प्रभु लछिमनिहि कहा समुझाई। फिरत बिपिन निसिचर बहु भाई।।

prabhu lachimanihi kahā samujhāī। phirata bipina nisicara bahu bhāī॥

सीता केरि करेहु रखवारी। बुधि बिबेक बल समय बिचारी।।

sītā keri karehu rakhavārī। budhi bibeka bala samaya bicārī॥

प्रभुहि बिलोकि चला मृग भाजी। धाए रामु सरासन साजी।।

prabhuhi biloki calā mṛga bhājī। dhāe rāmu sarāsana sājī॥

निगम नेति सिव ध्यान न पावा। मायामृग पाछें सो धावा।।

nigama neti siva dhyāna na pāvā। māyāmṛga pācheṃ so dhāvā॥

कबहुँ निकट पुनि दूरि पराई। कबहुँक प्रगटइ कबहुँ छपाई।।

kabahu~ nikaṭa puni dūri parāī। kabahu~ka pragaṭai kabahu~ chapāī॥

प्रगटत दुरत करत छल भूरी। एहि बिधि प्रभुहि गयउ लै दूरी।।

pragaṭata durata karata chala bhūrī। ehi bidhi prabhuhi gayau lai dūrī॥

तब तकि राम कठिन सर मारा। धरनि परेउ करि घोर पुकारा।।

taba taki rāma kaṭhina sara mārā। dharani pareu kari ghora pukārā॥

लछिमन कर प्रथमहिं लै नामा। पाछें सुमिरेसि मन महुँ रामा।।

lachimana kara prathamahiṃ lai nāmā। pācheṃ sumiresi mana mahu~ rāmā॥

प्रान तजत प्रगटेसि निज देहा। सुमिरेसि रामु समेत सनेहा।।

prāna tajata pragaṭesi nija dehā। sumiresi rāmu sameta sanehā॥

अंतर प्रेम तासु पहिचाना। मुनि दुर्लभ गति दीन्हि सुजाना।।

aṃtara prema tāsu pahicānā। muni durlabha gati dīnhi sujānā॥

बिपुल सुमन सुर बरषहिं गावहिं प्रभु गुन गाथ।

bipula sumana sura baraṣahiṃ gāvahiṃ prabhu guna gātha।

निज पद दीन्ह असुर कहुँ दीनबंधु रघुनाथ।।27।।

nija pada dīnha asura kahu~ dīnabaṃdhu raghunātha॥27॥

खल बधि तुरत फिरे रघुबीरा। सोह चाप कर कटि तूनीरा।।

khala badhi turata phire raghubīrā। soha cāpa kara kaṭi tūnīrā॥

आरत गिरा सुनी जब सीता। कह लछिमन सन परम सभीता।।

ārata girā sunī jaba sītā। kaha lachimana sana parama sabhītā॥

जाहु बेगि संकट अति भ्राता। लछिमन बिहसि कहा सुनु माता।।

jāhu begi saṃkaṭa ati bhrātā। lachimana bihasi kahā sunu mātā॥

भृकुटि बिलास सृष्टि लय होई। सपनेहुँ संकट परइ कि सोई।।

bhṛkuṭi bilāsa sṛṣṭi laya hoī। sapanehu~ saṃkaṭa parai ki soī॥

मरम बचन जब सीता बोला। हरि प्रेरित लछिमन मन डोला।।

marama bacana jaba sītā bolā। hari prerita lachimana mana ḍolā॥

बन दिसि देव सौंपि सब काहू। चले जहाँ रावन ससि राहू।।

bana disi deva sauṃpi saba kāhū। cale jahā~ rāvana sasi rāhū॥

सून बीच दसकंधर देखा। आवा निकट जती कें बेषा।।

sūna bīca dasakaṃdhara dekhā। āvā nikaṭa jatī keṃ beṣā॥

जाकें डर सुर असुर डेराहीं। निसि न नीद दिन अन्न न खाहीं।।

jākeṃ ḍara sura asura ḍerāhīṃ। nisi na nīda dina anna na khāhīṃ॥

सो दससीस स्वान की नाई। इत उत चितइ चला भड़िहाई।।

so dasasīsa svāna kī nāī। ita uta citai calā bhar̤ihāī॥

इमि कुपंथ पग देत खगेसा। रह न तेज बुधि बल लेसा।।

imi kupaṃtha paga deta khagesā। raha na teja budhi bala lesā॥

नाना बिधि करि कथा सुहाई। राजनीति भय प्रीति देखाई।।

nānā bidhi kari kathā suhāī। rājanīti bhaya prīti dekhāī॥

कह सीता सुनु जती गोसाईं। बोलेहु बचन दुष्ट की नाईं।।

kaha sītā sunu jatī gosāīṃ। bolehu bacana duṣṭa kī nāīṃ॥

तब रावन निज रूप देखावा। भई सभय जब नाम सुनावा।।

taba rāvana nija rūpa dekhāvā। bhaī sabhaya jaba nāma sunāvā॥

कह सीता धरि धीरजु गाढ़ा। आइ गयउ प्रभु रहु खल ठाढ़ा।।

kaha sītā dhari dhīraju gār̤hā। āi gayau prabhu rahu khala ṭhār̤hā॥

जिमि हरिबधुहि छुद्र सस चाहा। भएसि कालबस निसिचर नाहा।।

jimi haribadhuhi chudra sasa cāhā। bhaesi kālabasa nisicara nāhā॥

सुनत बचन दससीस रिसाना। मन महुँ चरन बंदि सुख माना।।

sunata bacana dasasīsa risānā। mana mahu~ carana baṃdi sukha mānā॥

क्रोधवंत तब रावन लीन्हिसि रथ बैठाइ।

krodhavaṃta taba rāvana līnhisi ratha baiṭhāi।

चला गगनपथ आतुर भयँ रथ हाँकि न जाइ।।28।।

calā gaganapatha ātura bhaya~ ratha hā~ki na jāi॥28॥

हा जग एक बीर रघुराया। केहिं अपराध बिसारेहु दाया।।

hā jaga eka bīra raghurāyā। kehiṃ aparādha bisārehu dāyā॥

आरति हरन सरन सुखदायक। हा रघुकुल सरोज दिननायक।।

ārati harana sarana sukhadāyaka। hā raghukula saroja dinanāyaka॥

हा लछिमन तुम्हार नहिं दोसा। सो फलु पायउँ कीन्हेउँ रोसा।।

hā lachimana tumhāra nahiṃ dosā। so phalu pāyau~ kīnheu~ rosā॥

बिबिध बिलाप करति बैदेही। भूरि कृपा प्रभु दूरि सनेही।।

bibidha bilāpa karati baidehī। bhūri kṛpā prabhu dūri sanehī॥

बिपति मोरि को प्रभुहि सुनावा। पुरोडास चह रासभ खावा।।

bipati mori ko prabhuhi sunāvā। puroḍāsa caha rāsabha khāvā॥

सीता कै बिलाप सुनि भारी। भए चराचर जीव दुखारी।।

sītā kai bilāpa suni bhārī। bhae carācara jīva dukhārī॥

गीधराज सुनि आरत बानी। रघुकुलतिलक नारि पहिचानी।।

gīdharāja suni ārata bānī। raghukulatilaka nāri pahicānī॥

अधम निसाचर लीन्हे जाई। जिमि मलेछ बस कपिला गाई।।

adhama nisācara līnhe jāī। jimi malecha basa kapilā gāī॥

सीते पुत्रि करसि जनि त्रासा। करिहउँ जातुधान कर नासा।।

sīte putri karasi jani trāsā। karihau~ jātudhāna kara nāsā॥

धावा क्रोधवंत खग कैसें। छूटइ पबि परबत कहुँ जैसे।।

dhāvā krodhavaṃta khaga kaiseṃ। chūṭai pabi parabata kahu~ jaise॥

रे रे दुष्ट ठाढ़ किन होही। निर्भय चलेसि न जानेहि मोही।।

re re duṣṭa ṭhār̤ha kina hohī। nirbhaya calesi na jānehi mohī॥

आवत देखि कृतांत समाना। फिरि दसकंधर कर अनुमाना।।

āvata dekhi kṛtāṃta samānā। phiri dasakaṃdhara kara anumānā॥

की मैनाक कि खगपति होई। मम बल जान सहित पति सोई।।

kī maināka ki khagapati hoī। mama bala jāna sahita pati soī॥

जाना जरठ जटायू एहा। मम कर तीरथ छाँड़िहि देहा।।

jānā jaraṭha jaṭāyū ehā। mama kara tīratha chā~r̤ihi dehā॥

सुनत गीध क्रोधातुर धावा। कह सुनु रावन मोर सिखावा।।

sunata gīdha krodhātura dhāvā। kaha sunu rāvana mora sikhāvā॥

तजि जानकिहि कुसल गृह जाहू। नाहिं त अस होइहि बहुबाहू।।

taji jānakihi kusala gṛha jāhū। nāhiṃ ta asa hoihi bahubāhū॥

राम रोष पावक अति घोरा। होइहि सकल सलभ कुल तोरा।।

rāma roṣa pāvaka ati ghorā। hoihi sakala salabha kula torā॥

उतरु न देत दसानन जोधा। तबहिं गीध धावा करि क्रोधा।।

utaru na deta dasānana jodhā। tabahiṃ gīdha dhāvā kari krodhā॥

धरि कच बिरथ कीन्ह महि गिरा। सीतहि राखि गीध पुनि फिरा।।

dhari kaca biratha kīnha mahi girā। sītahi rākhi gīdha puni phirā॥

चौचन्ह मारि बिदारेसि देही। दंड एक भइ मुरुछा तेही।।

caucanha māri bidāresi dehī। daṃḍa eka bhai muruchā tehī॥

तब सक्रोध निसिचर खिसिआना। काढ़ेसि परम कराल कृपाना।।

taba sakrodha nisicara khisiānā। kār̤hesi parama karāla kṛpānā॥

काटेसि पंख परा खग धरनी। सुमिरि राम करि अदभुत करनी।।

kāṭesi paṃkha parā khaga dharanī। sumiri rāma kari adabhuta karanī॥

सीतहि जानि चढ़ाइ बहोरी। चला उताइल त्रास न थोरी।।

sītahi jāni car̤hāi bahorī। calā utāila trāsa na thorī॥

करति बिलाप जाति नभ सीता। ब्याध बिबस जनु मृगी सभीता।।

karati bilāpa jāti nabha sītā। byādha bibasa janu mṛgī sabhītā॥

गिरि पर बैठे कपिन्ह निहारी। कहि हरि नाम दीन्ह पट डारी।।

giri para baiṭhe kapinha nihārī। kahi hari nāma dīnha paṭa ḍārī॥

एहि बिधि सीतहि सो लै गयऊ। बन असोक महँ राखत भयऊ।।

ehi bidhi sītahi so lai gayaū। bana asoka maha~ rākhata bhayaū॥

हारि परा खल बहु बिधि भय अरु प्रीति देखाइ।

hāri parā khala bahu bidhi bhaya aru prīti dekhāi।

तब असोक पादप तर राखिसि जतन कराइ।।29(क)।।

taba asoka pādapa tara rākhisi jatana karāi॥29(ka)॥

जेहि बिधि कपट कुरंग सँग धाइ चले श्रीराम।

jehi bidhi kapaṭa kuraṃga sa~ga dhāi cale śrīrāma।

सो छबि सीता राखि उर रटति रहति हरिनाम।।29(ख)।।

so chabi sītā rākhi ura raṭati rahati harināma॥29(kha)॥

रघुपति अनुजहि आवत देखी। बाहिज चिंता कीन्हि बिसेषी।।

raghupati anujahi āvata dekhī। bāhija ciṃtā kīnhi biseṣī॥

जनकसुता परिहरिहु अकेली। आयहु तात बचन मम पेली।।

janakasutā pariharihu akelī। āyahu tāta bacana mama pelī॥

निसिचर निकर फिरहिं बन माहीं। मम मन सीता आश्रम नाहीं।।

nisicara nikara phirahiṃ bana māhīṃ। mama mana sītā āśrama nāhīṃ॥

गहि पद कमल अनुज कर जोरी। कहेउ नाथ कछु मोहि न खोरी।।

gahi pada kamala anuja kara jorī। kaheu nātha kachu mohi na khorī॥

अनुज समेत गए प्रभु तहवाँ। गोदावरि तट आश्रम जहवाँ।।

anuja sameta gae prabhu tahavā~। godāvari taṭa āśrama jahavā~॥

आश्रम देखि जानकी हीना। भए बिकल जस प्राकृत दीना।।

āśrama dekhi jānakī hīnā। bhae bikala jasa prākṛta dīnā॥

हा गुन खानि जानकी सीता। रूप सील ब्रत नेम पुनीता।।

hā guna khāni jānakī sītā। rūpa sīla brata nema punītā॥

लछिमन समुझाए बहु भाँती। पूछत चले लता तरु पाँती।।

lachimana samujhāe bahu bhā~tī। pūchata cale latā taru pā~tī॥

हे खग मृग हे मधुकर श्रेनी। तुम्ह देखी सीता मृगनैनी।।

he khaga mṛga he madhukara śrenī। tumha dekhī sītā mṛganainī॥

खंजन सुक कपोत मृग मीना। मधुप निकर कोकिला प्रबीना।।

khaṃjana suka kapota mṛga mīnā। madhupa nikara kokilā prabīnā॥

कुंद कली दाड़िम दामिनी। कमल सरद ससि अहिभामिनी।।

kuṃda kalī dār̤ima dāminī। kamala sarada sasi ahibhāminī॥

बरुन पास मनोज धनु हंसा। गज केहरि निज सुनत प्रसंसा।।

baruna pāsa manoja dhanu haṃsā। gaja kehari nija sunata prasaṃsā॥

श्रीफल कनक कदलि हरषाहीं। नेकु न संक सकुच मन माहीं।।

śrīphala kanaka kadali haraṣāhīṃ। neku na saṃka sakuca mana māhīṃ॥

सुनु जानकी तोहि बिनु आजू। हरषे सकल पाइ जनु राजू।।

sunu jānakī tohi binu ājū। haraṣe sakala pāi janu rājū॥

किमि सहि जात अनख तोहि पाहीं । प्रिया बेगि प्रगटसि कस नाहीं।।

kimi sahi jāta anakha tohi pāhīṃ । priyā begi pragaṭasi kasa nāhīṃ॥

एहि बिधि खौजत बिलपत स्वामी। मनहुँ महा बिरही अति कामी।।

ehi bidhi khaujata bilapata svāmī। manahu~ mahā birahī ati kāmī॥

पूरनकाम राम सुख रासी। मनुज चरित कर अज अबिनासी।।

pūranakāma rāma sukha rāsī। manuja carita kara aja abināsī॥

आगे परा गीधपति देखा। सुमिरत राम चरन जिन्ह रेखा।।

āge parā gīdhapati dekhā। sumirata rāma carana jinha rekhā॥

कर सरोज सिर परसेउ कृपासिंधु रधुबीर।।

kara saroja sira paraseu kṛpāsiṃdhu radhubīra॥

निरखि राम छबि धाम मुख बिगत भई सब पीर।।30।।

nirakhi rāma chabi dhāma mukha bigata bhaī saba pīra॥30॥

तब कह गीध बचन धरि धीरा । सुनहु राम भंजन भव भीरा।।

taba kaha gīdha bacana dhari dhīrā । sunahu rāma bhaṃjana bhava bhīrā॥

नाथ दसानन यह गति कीन्ही। तेहि खल जनकसुता हरि लीन्ही।।

nātha dasānana yaha gati kīnhī। tehi khala janakasutā hari līnhī॥

लै दच्छिन दिसि गयउ गोसाई। बिलपति अति कुररी की नाई।।

lai dacchina disi gayau gosāī। bilapati ati kurarī kī nāī॥

दरस लागी प्रभु राखेंउँ प्राना। चलन चहत अब कृपानिधाना।।

darasa lāgī prabhu rākheṃu~ prānā। calana cahata aba kṛpānidhānā॥

राम कहा तनु राखहु ताता। मुख मुसकाइ कही तेहिं बाता।।

rāma kahā tanu rākhahu tātā। mukha musakāi kahī tehiṃ bātā॥

जा कर नाम मरत मुख आवा। अधमउ मुकुत होई श्रुति गावा।।

jā kara nāma marata mukha āvā। adhamau mukuta hoī śruti gāvā॥

सो मम लोचन गोचर आगें। राखौं देह नाथ केहि खाँगें।।

so mama locana gocara āgeṃ। rākhauṃ deha nātha kehi khā~geṃ॥

जल भरि नयन कहहिं रघुराई। तात कर्म निज ते गतिं पाई।।

jala bhari nayana kahahiṃ raghurāī। tāta karma nija te gatiṃ pāī॥

परहित बस जिन्ह के मन माहीं। तिन्ह कहुँ जग दुर्लभ कछु नाहीं।।

parahita basa jinha ke mana māhīṃ। tinha kahu~ jaga durlabha kachu nāhīṃ॥

तनु तजि तात जाहु मम धामा। देउँ काह तुम्ह पूरनकामा।।

tanu taji tāta jāhu mama dhāmā। deu~ kāha tumha pūranakāmā॥

सीता हरन तात जनि कहहु पिता सन जाइ।।

sītā harana tāta jani kahahu pitā sana jāi॥

जौं मैं राम त कुल सहित कहिहि दसानन आइ।।31।।

jauṃ maiṃ rāma ta kula sahita kahihi dasānana āi॥31॥

गीध देह तजि धरि हरि रुपा। भूषन बहु पट पीत अनूपा।।

gīdha deha taji dhari hari rupā। bhūṣana bahu paṭa pīta anūpā॥

स्याम गात बिसाल भुज चारी। अस्तुति करत नयन भरि बारी।।

syāma gāta bisāla bhuja cārī। astuti karata nayana bhari bārī॥

जय राम रूप अनूप निर्गुन सगुन गुन प्रेरक सही।

jaya rāma rūpa anūpa nirguna saguna guna preraka sahī।

दससीस बाहु प्रचंड खंडन चंड सर मंडन मही।।

dasasīsa bāhu pracaṃḍa khaṃḍana caṃḍa sara maṃḍana mahī॥

पाथोद गात सरोज मुख राजीव आयत लोचनं।

pāthoda gāta saroja mukha rājīva āyata locanaṃ।

नित नौमि रामु कृपाल बाहु बिसाल भव भय मोचनं।।1।।

nita naumi rāmu kṛpāla bāhu bisāla bhava bhaya mocanaṃ॥1॥

बलमप्रमेयमनादिमजमब्यक्तमेकमगोचरं।

balamaprameyamanādimajamabyaktamekamagocaraṃ।

गोबिंद गोपर द्वंद्वहर बिग्यानघन धरनीधरं।।

gobiṃda gopara dvaṃdvahara bigyānaghana dharanīdharaṃ॥

जे राम मंत्र जपंत संत अनंत जन मन रंजनं।

je rāma maṃtra japaṃta saṃta anaṃta jana mana raṃjanaṃ।

नित नौमि राम अकाम प्रिय कामादि खल दल गंजनं।।2।

nita naumi rāma akāma priya kāmādi khala dala gaṃjanaṃ॥2।

जेहि श्रुति निरंजन ब्रह्म ब्यापक बिरज अज कहि गावहीं।।

jehi śruti niraṃjana brahma byāpaka biraja aja kahi gāvahīṃ॥

करि ध्यान ग्यान बिराग जोग अनेक मुनि जेहि पावहीं।।

kari dhyāna gyāna birāga joga aneka muni jehi pāvahīṃ॥

सो प्रगट करुना कंद सोभा बृंद अग जग मोहई।

so pragaṭa karunā kaṃda sobhā bṛṃda aga jaga mohaī।

मम हृदय पंकज भृंग अंग अनंग बहु छबि सोहई।।3।।

mama hṛdaya paṃkaja bhṛṃga aṃga anaṃga bahu chabi sohaī॥3॥

जो अगम सुगम सुभाव निर्मल असम सम सीतल सदा।

jo agama sugama subhāva nirmala asama sama sītala sadā।

पस्यंति जं जोगी जतन करि करत मन गो बस सदा।।

pasyaṃti jaṃ jogī jatana kari karata mana go basa sadā॥

सो राम रमा निवास संतत दास बस त्रिभुवन धनी।

so rāma ramā nivāsa saṃtata dāsa basa tribhuvana dhanī।

मम उर बसउ सो समन संसृति जासु कीरति पावनी।।4।।

mama ura basau so samana saṃsṛti jāsu kīrati pāvanī॥4॥

अबिरल भगति मागि बर गीध गयउ हरिधाम।

abirala bhagati māgi bara gīdha gayau haridhāma।

तेहि की क्रिया जथोचित निज कर कीन्ही राम।।32।।

tehi kī kriyā jathocita nija kara kīnhī rāma॥32॥

कोमल चित अति दीनदयाला। कारन बिनु रघुनाथ कृपाला।।

komala cita ati dīnadayālā। kārana binu raghunātha kṛpālā॥

गीध अधम खग आमिष भोगी। गति दीन्हि जो जाचत जोगी।।

gīdha adhama khaga āmiṣa bhogī। gati dīnhi jo jācata jogī॥

सुनहु उमा ते लोग अभागी। हरि तजि होहिं बिषय अनुरागी।।

sunahu umā te loga abhāgī। hari taji hohiṃ biṣaya anurāgī॥

पुनि सीतहि खोजत द्वौ भाई। चले बिलोकत बन बहुताई।।

puni sītahi khojata dvau bhāī। cale bilokata bana bahutāī॥

संकुल लता बिटप घन कानन। बहु खग मृग तहँ गज पंचानन।।

saṃkula latā biṭapa ghana kānana। bahu khaga mṛga taha~ gaja paṃcānana॥

आवत पंथ कबंध निपाता। तेहिं सब कही साप कै बाता।।

āvata paṃtha kabaṃdha nipātā। tehiṃ saba kahī sāpa kai bātā॥

दुरबासा मोहि दीन्ही सापा। प्रभु पद पेखि मिटा सो पापा।।

durabāsā mohi dīnhī sāpā। prabhu pada pekhi miṭā so pāpā॥

सुनु गंधर्ब कहउँ मै तोही। मोहि न सोहाइ ब्रह्मकुल द्रोही।।

sunu gaṃdharba kahau~ mai tohī। mohi na sohāi brahmakula drohī॥

मन क्रम बचन कपट तजि जो कर भूसुर सेव।

mana krama bacana kapaṭa taji jo kara bhūsura seva।

मोहि समेत बिरंचि सिव बस ताकें सब देव।।33।।

mohi sameta biraṃci siva basa tākeṃ saba deva॥33॥

सापत ताड़त परुष कहंता। बिप्र पूज्य अस गावहिं संता।।

sāpata tār̤ata paruṣa kahaṃtā। bipra pūjya asa gāvahiṃ saṃtā॥

पूजिअ बिप्र सील गुन हीना। सूद्र न गुन गन ग्यान प्रबीना।।

pūjia bipra sīla guna hīnā। sūdra na guna gana gyāna prabīnā॥

कहि निज धर्म ताहि समुझावा। निज पद प्रीति देखि मन भावा।।

kahi nija dharma tāhi samujhāvā। nija pada prīti dekhi mana bhāvā॥

रघुपति चरन कमल सिरु नाई। गयउ गगन आपनि गति पाई।।

raghupati carana kamala siru nāī। gayau gagana āpani gati pāī॥

ताहि देइ गति राम उदारा। सबरी कें आश्रम पगु धारा।।

tāhi dei gati rāma udārā। sabarī keṃ āśrama pagu dhārā॥

सबरी देखि राम गृहँ आए। मुनि के बचन समुझि जियँ भाए।।

sabarī dekhi rāma gṛha~ āe। muni ke bacana samujhi jiya~ bhāe॥

सरसिज लोचन बाहु बिसाला। जटा मुकुट सिर उर बनमाला।।

sarasija locana bāhu bisālā। jaṭā mukuṭa sira ura banamālā॥

स्याम गौर सुंदर दोउ भाई। सबरी परी चरन लपटाई।।

syāma gaura suṃdara dou bhāī। sabarī parī carana lapaṭāī॥

प्रेम मगन मुख बचन न आवा। पुनि पुनि पद सरोज सिर नावा।।

prema magana mukha bacana na āvā। puni puni pada saroja sira nāvā॥

सादर जल लै चरन पखारे। पुनि सुंदर आसन बैठारे।।

sādara jala lai carana pakhāre। puni suṃdara āsana baiṭhāre॥

कंद मूल फल सुरस अति दिए राम कहुँ आनि।

kaṃda mūla phala surasa ati die rāma kahu~ āni।

प्रेम सहित प्रभु खाए बारंबार बखानि।।34।।

prema sahita prabhu khāe bāraṃbāra bakhāni॥34॥

पानि जोरि आगें भइ ठाढ़ी। प्रभुहि बिलोकि प्रीति अति बाढ़ी।।

pāni jori āgeṃ bhai ṭhār̤hī। prabhuhi biloki prīti ati bār̤hī॥

केहि बिधि अस्तुति करौ तुम्हारी। अधम जाति मैं जड़मति भारी।।

kehi bidhi astuti karau tumhārī। adhama jāti maiṃ jar̤amati bhārī॥

अधम ते अधम अधम अति नारी। तिन्ह महँ मैं मतिमंद अघारी।।

adhama te adhama adhama ati nārī। tinha maha~ maiṃ matimaṃda aghārī॥

कह रघुपति सुनु भामिनि बाता। मानउँ एक भगति कर नाता।।

kaha raghupati sunu bhāmini bātā। mānau~ eka bhagati kara nātā॥

जाति पाँति कुल धर्म बड़ाई। धन बल परिजन गुन चतुराई।।

jāti pā~ti kula dharma bar̤āī। dhana bala parijana guna caturāī॥

भगति हीन नर सोहइ कैसा। बिनु जल बारिद देखिअ जैसा।।

bhagati hīna nara sohai kaisā। binu jala bārida dekhia jaisā॥

नवधा भगति कहउँ तोहि पाहीं। सावधान सुनु धरु मन माहीं।।

navadhā bhagati kahau~ tohi pāhīṃ। sāvadhāna sunu dharu mana māhīṃ॥

प्रथम भगति संतन्ह कर संगा। दूसरि रति मम कथा प्रसंगा।।

prathama bhagati saṃtanha kara saṃgā। dūsari rati mama kathā prasaṃgā॥

गुर पद पंकज सेवा तीसरि भगति अमान।

gura pada paṃkaja sevā tīsari bhagati amāna।

चौथि भगति मम गुन गन करइ कपट तजि गान।।35।।

cauthi bhagati mama guna gana karai kapaṭa taji gāna॥35॥

मंत्र जाप मम दृढ़ बिस्वासा। पंचम भजन सो बेद प्रकासा।।

maṃtra jāpa mama dṛr̤ha bisvāsā। paṃcama bhajana so beda prakāsā॥

छठ दम सील बिरति बहु करमा। निरत निरंतर सज्जन धरमा।।

chaṭha dama sīla birati bahu karamā। nirata niraṃtara sajjana dharamā॥

सातवँ सम मोहि मय जग देखा। मोतें संत अधिक करि लेखा।।

sātava~ sama mohi maya jaga dekhā। moteṃ saṃta adhika kari lekhā॥

आठवँ जथालाभ संतोषा। सपनेहुँ नहिं देखइ परदोषा।।

āṭhava~ jathālābha saṃtoṣā। sapanehu~ nahiṃ dekhai paradoṣā॥

नवम सरल सब सन छलहीना। मम भरोस हियँ हरष न दीना।।

navama sarala saba sana chalahīnā। mama bharosa hiya~ haraṣa na dīnā॥

नव महुँ एकउ जिन्ह के होई। नारि पुरुष सचराचर कोई।।

nava mahu~ ekau jinha ke hoī। nāri puruṣa sacarācara koī॥

सोइ अतिसय प्रिय भामिनि मोरे। सकल प्रकार भगति दृढ़ तोरें।।

soi atisaya priya bhāmini more। sakala prakāra bhagati dṛr̤ha toreṃ॥

जोगि बृंद दुरलभ गति जोई। तो कहुँ आजु सुलभ भइ सोई।।

jogi bṛṃda duralabha gati joī। to kahu~ āju sulabha bhai soī॥

मम दरसन फल परम अनूपा। जीव पाव निज सहज सरूपा।।

mama darasana phala parama anūpā। jīva pāva nija sahaja sarūpā॥

जनकसुता कइ सुधि भामिनी। जानहि कहु करिबरगामिनी।।

janakasutā kai sudhi bhāminī। jānahi kahu karibaragāminī॥

पंपा सरहि जाहु रघुराई। तहँ होइहि सुग्रीव मिताई।।

paṃpā sarahi jāhu raghurāī। taha~ hoihi sugrīva mitāī॥

सो सब कहिहि देव रघुबीरा। जानतहूँ पूछहु मतिधीरा।।

so saba kahihi deva raghubīrā। jānatahū~ pūchahu matidhīrā॥

बार बार प्रभु पद सिरु नाई। प्रेम सहित सब कथा सुनाई।।

bāra bāra prabhu pada siru nāī। prema sahita saba kathā sunāī॥

कहि कथा सकल बिलोकि हरि मुख हृदयँ पद पंकज धरे।

kahi kathā sakala biloki hari mukha hṛdaya~ pada paṃkaja dhare।

तजि जोग पावक देह हरि पद लीन भइ जहँ नहिं फिरे।।

taji joga pāvaka deha hari pada līna bhai jaha~ nahiṃ phire॥

नर बिबिध कर्म अधर्म बहु मत सोकप्रद सब त्यागहू।

nara bibidha karma adharma bahu mata sokaprada saba tyāgahū।

बिस्वास करि कह दास तुलसी राम पद अनुरागहू।।

bisvāsa kari kaha dāsa tulasī rāma pada anurāgahū॥

जाति हीन अघ जन्म महि मुक्त कीन्हि असि नारि।

jāti hīna agha janma mahi mukta kīnhi asi nāri।

महामंद मन सुख चहसि ऐसे प्रभुहि बिसारि।।36।।

mahāmaṃda mana sukha cahasi aise prabhuhi bisāri॥36॥

चले राम त्यागा बन सोऊ। अतुलित बल नर केहरि दोऊ।।

cale rāma tyāgā bana soū। atulita bala nara kehari doū॥

बिरही इव प्रभु करत बिषादा। कहत कथा अनेक संबादा।।

birahī iva prabhu karata biṣādā। kahata kathā aneka saṃbādā॥

लछिमन देखु बिपिन कइ सोभा। देखत केहि कर मन नहिं छोभा।।

lachimana dekhu bipina kai sobhā। dekhata kehi kara mana nahiṃ chobhā॥

नारि सहित सब खग मृग बृंदा। मानहुँ मोरि करत हहिं निंदा।।

nāri sahita saba khaga mṛga bṛṃdā। mānahu~ mori karata hahiṃ niṃdā॥

हमहि देखि मृग निकर पराहीं। मृगीं कहहिं तुम्ह कहँ भय नाहीं।।

hamahi dekhi mṛga nikara parāhīṃ। mṛgīṃ kahahiṃ tumha kaha~ bhaya nāhīṃ॥

तुम्ह आनंद करहु मृग जाए। कंचन मृग खोजन ए आए।।

tumha ānaṃda karahu mṛga jāe। kaṃcana mṛga khojana e āe॥

संग लाइ करिनीं करि लेहीं। मानहुँ मोहि सिखावनु देहीं।।

saṃga lāi karinīṃ kari lehīṃ। mānahu~ mohi sikhāvanu dehīṃ॥

सास्त्र सुचिंतित पुनि पुनि देखिअ। भूप सुसेवित बस नहिं लेखिअ।।

sāstra suciṃtita puni puni dekhia। bhūpa susevita basa nahiṃ lekhia॥

राखिअ नारि जदपि उर माहीं। जुबती सास्त्र नृपति बस नाहीं।।

rākhia nāri jadapi ura māhīṃ। jubatī sāstra nṛpati basa nāhīṃ॥

देखहु तात बसंत सुहावा। प्रिया हीन मोहि भय उपजावा।।

dekhahu tāta basaṃta suhāvā। priyā hīna mohi bhaya upajāvā॥

बिरह बिकल बलहीन मोहि जानेसि निपट अकेल।

biraha bikala balahīna mohi jānesi nipaṭa akela।

सहित बिपिन मधुकर खग मदन कीन्ह बगमेल।।37(क)।।

sahita bipina madhukara khaga madana kīnha bagamela॥37(ka)॥

देखि गयउ भ्राता सहित तासु दूत सुनि बात।

dekhi gayau bhrātā sahita tāsu dūta suni bāta।

डेरा कीन्हेउ मनहुँ तब कटकु हटकि मनजात।।37(ख)।।

ḍerā kīnheu manahu~ taba kaṭaku haṭaki manajāta॥37(kha)॥

बिटप बिसाल लता अरुझानी। बिबिध बितान दिए जनु तानी।।

biṭapa bisāla latā arujhānī। bibidha bitāna die janu tānī॥

कदलि ताल बर धुजा पताका। दैखि न मोह धीर मन जाका।।

kadali tāla bara dhujā patākā। daikhi na moha dhīra mana jākā॥

बिबिध भाँति फूले तरु नाना। जनु बानैत बने बहु बाना।।

bibidha bhā~ti phūle taru nānā। janu bānaita bane bahu bānā॥

कहुँ कहुँ सुन्दर बिटप सुहाए। जनु भट बिलग बिलग होइ छाए।।

kahu~ kahu~ sundara biṭapa suhāe। janu bhaṭa bilaga bilaga hoi chāe॥

कूजत पिक मानहुँ गज माते। ढेक महोख ऊँट बिसराते।।

kūjata pika mānahu~ gaja māte। ḍheka mahokha ū~ṭa bisarāte॥

मोर चकोर कीर बर बाजी। पारावत मराल सब ताजी।।

mora cakora kīra bara bājī। pārāvata marāla saba tājī॥

तीतिर लावक पदचर जूथा। बरनि न जाइ मनोज बरुथा।।

tītira lāvaka padacara jūthā। barani na jāi manoja baruthā॥

रथ गिरि सिला दुंदुभी झरना। चातक बंदी गुन गन बरना।।

ratha giri silā duṃdubhī jharanā। cātaka baṃdī guna gana baranā॥

मधुकर मुखर भेरि सहनाई। त्रिबिध बयारि बसीठीं आई।।

madhukara mukhara bheri sahanāī। tribidha bayāri basīṭhīṃ āī॥

चतुरंगिनी सेन सँग लीन्हें। बिचरत सबहि चुनौती दीन्हें।।

caturaṃginī sena sa~ga līnheṃ। bicarata sabahi cunautī dīnheṃ॥

लछिमन देखत काम अनीका। रहहिं धीर तिन्ह कै जग लीका।।

lachimana dekhata kāma anīkā। rahahiṃ dhīra tinha kai jaga līkā॥

एहि कें एक परम बल नारी। तेहि तें उबर सुभट सोइ भारी।।

ehi keṃ eka parama bala nārī। tehi teṃ ubara subhaṭa soi bhārī॥

तात तीनि अति प्रबल खल काम क्रोध अरु लोभ।

tāta tīni ati prabala khala kāma krodha aru lobha।

मुनि बिग्यान धाम मन करहिं निमिष महुँ छोभ।।38(क)।।

muni bigyāna dhāma mana karahiṃ nimiṣa mahu~ chobha॥38(ka)॥

लोभ कें इच्छा दंभ बल काम कें केवल नारि।

lobha keṃ icchā daṃbha bala kāma keṃ kevala nāri।

क्रोध के परुष बचन बल मुनिबर कहहिं बिचारि।।38(ख)।।

krodha ke paruṣa bacana bala munibara kahahiṃ bicāri॥38(kha)॥

गुनातीत सचराचर स्वामी। राम उमा सब अंतरजामी।।

gunātīta sacarācara svāmī। rāma umā saba aṃtarajāmī॥

कामिन्ह कै दीनता देखाई। धीरन्ह कें मन बिरति दृढ़ाई।।

kāminha kai dīnatā dekhāī। dhīranha keṃ mana birati dṛr̤hāī॥

क्रोध मनोज लोभ मद माया। छूटहिं सकल राम कीं दाया।।

krodha manoja lobha mada māyā। chūṭahiṃ sakala rāma kīṃ dāyā॥

सो नर इंद्रजाल नहिं भूला। जा पर होइ सो नट अनुकूला।।

so nara iṃdrajāla nahiṃ bhūlā। jā para hoi so naṭa anukūlā॥

उमा कहउँ मैं अनुभव अपना। सत हरि भजनु जगत सब सपना।।

umā kahau~ maiṃ anubhava apanā। sata hari bhajanu jagata saba sapanā॥

पुनि प्रभु गए सरोबर तीरा। पंपा नाम सुभग गंभीरा।।

puni prabhu gae sarobara tīrā। paṃpā nāma subhaga gaṃbhīrā॥

संत हृदय जस निर्मल बारी। बाँधे घाट मनोहर चारी।।

saṃta hṛdaya jasa nirmala bārī। bā~dhe ghāṭa manohara cārī॥

जहँ तहँ पिअहिं बिबिध मृग नीरा। जनु उदार गृह जाचक भीरा।।

jaha~ taha~ piahiṃ bibidha mṛga nīrā। janu udāra gṛha jācaka bhīrā॥

पुरइनि सबन ओट जल बेगि न पाइअ मर्म।

puraini sabana oṭa jala begi na pāia marma।

मायाछन्न न देखिऐ जैसे निर्गुन ब्रह्म।।39(क)।।

māyāchanna na dekhiai jaise nirguna brahma॥39(ka)॥

सुखि मीन सब एकरस अति अगाध जल माहिं।

sukhi mīna saba ekarasa ati agādha jala māhiṃ।

जथा धर्मसीलन्ह के दिन सुख संजुत जाहिं।।39(ख)।।

jathā dharmasīlanha ke dina sukha saṃjuta jāhiṃ॥39(kha)॥

बिकसे सरसिज नाना रंगा। मधुर मुखर गुंजत बहु भृंगा।।

bikase sarasija nānā raṃgā। madhura mukhara guṃjata bahu bhṛṃgā॥

बोलत जलकुक्कुट कलहंसा। प्रभु बिलोकि जनु करत प्रसंसा।।

bolata jalakukkuṭa kalahaṃsā। prabhu biloki janu karata prasaṃsā॥

चक्रवाक बक खग समुदाई। देखत बनइ बरनि नहिं जाई।।

cakravāka baka khaga samudāī। dekhata banai barani nahiṃ jāī॥

सुन्दर खग गन गिरा सुहाई। जात पथिक जनु लेत बोलाई।।

sundara khaga gana girā suhāī। jāta pathika janu leta bolāī॥

ताल समीप मुनिन्ह गृह छाए। चहु दिसि कानन बिटप सुहाए।।

tāla samīpa muninha gṛha chāe। cahu disi kānana biṭapa suhāe॥

चंपक बकुल कदंब तमाला। पाटल पनस परास रसाला।।

caṃpaka bakula kadaṃba tamālā। pāṭala panasa parāsa rasālā॥

नव पल्लव कुसुमित तरु नाना। चंचरीक पटली कर गाना।।

nava pallava kusumita taru nānā। caṃcarīka paṭalī kara gānā॥

सीतल मंद सुगंध सुभाऊ। संतत बहइ मनोहर बाऊ।।

sītala maṃda sugaṃdha subhāū। saṃtata bahai manohara bāū॥

कुहू कुहू कोकिल धुनि करहीं। सुनि रव सरस ध्यान मुनि टरहीं।।

kuhū kuhū kokila dhuni karahīṃ। suni rava sarasa dhyāna muni ṭarahīṃ॥

फल भारन नमि बिटप सब रहे भूमि निअराइ।

phala bhārana nami biṭapa saba rahe bhūmi niarāi।

पर उपकारी पुरुष जिमि नवहिं सुसंपति पाइ।।40।।

para upakārī puruṣa jimi navahiṃ susaṃpati pāi॥40॥

देखि राम अति रुचिर तलावा। मज्जनु कीन्ह परम सुख पावा।।

dekhi rāma ati rucira talāvā। majjanu kīnha parama sukha pāvā॥

देखी सुंदर तरुबर छाया। बैठे अनुज सहित रघुराया।।

dekhī suṃdara tarubara chāyā। baiṭhe anuja sahita raghurāyā॥

तहँ पुनि सकल देव मुनि आए। अस्तुति करि निज धाम सिधाए।।

taha~ puni sakala deva muni āe। astuti kari nija dhāma sidhāe॥

बैठे परम प्रसन्न कृपाला। कहत अनुज सन कथा रसाला।।

baiṭhe parama prasanna kṛpālā। kahata anuja sana kathā rasālā॥

बिरहवंत भगवंतहि देखी। नारद मन भा सोच बिसेषी।।

birahavaṃta bhagavaṃtahi dekhī। nārada mana bhā soca biseṣī॥

मोर साप करि अंगीकारा। सहत राम नाना दुख भारा।।

mora sāpa kari aṃgīkārā। sahata rāma nānā dukha bhārā॥

ऐसे प्रभुहि बिलोकउँ जाई। पुनि न बनिहि अस अवसरु आई।।

aise prabhuhi bilokau~ jāī। puni na banihi asa avasaru āī॥

यह बिचारि नारद कर बीना। गए जहाँ प्रभु सुख आसीना।।

yaha bicāri nārada kara bīnā। gae jahā~ prabhu sukha āsīnā॥

गावत राम चरित मृदु बानी। प्रेम सहित बहु भाँति बखानी।।

gāvata rāma carita mṛdu bānī। prema sahita bahu bhā~ti bakhānī॥

करत दंडवत लिए उठाई। राखे बहुत बार उर लाई।।

karata daṃḍavata lie uṭhāī। rākhe bahuta bāra ura lāī॥

स्वागत पूँछि निकट बैठारे। लछिमन सादर चरन पखारे।।

svāgata pū~chi nikaṭa baiṭhāre। lachimana sādara carana pakhāre॥

नाना बिधि बिनती करि प्रभु प्रसन्न जियँ जानि।

nānā bidhi binatī kari prabhu prasanna jiya~ jāni।

नारद बोले बचन तब जोरि सरोरुह पानि।।41।।

nārada bole bacana taba jori saroruha pāni॥41॥

सुनहु उदार सहज रघुनायक। सुंदर अगम सुगम बर दायक।।

sunahu udāra sahaja raghunāyaka। suṃdara agama sugama bara dāyaka॥

देहु एक बर मागउँ स्वामी। जद्यपि जानत अंतरजामी।।

dehu eka bara māgau~ svāmī। jadyapi jānata aṃtarajāmī॥

जानहु मुनि तुम्ह मोर सुभाऊ। जन सन कबहुँ कि करउँ दुराऊ।।

jānahu muni tumha mora subhāū। jana sana kabahu~ ki karau~ durāū॥

कवन बस्तु असि प्रिय मोहि लागी। जो मुनिबर न सकहु तुम्ह मागी।।

kavana bastu asi priya mohi lāgī। jo munibara na sakahu tumha māgī॥

जन कहुँ कछु अदेय नहिं मोरें। अस बिस्वास तजहु जनि भोरें।।

jana kahu~ kachu adeya nahiṃ moreṃ। asa bisvāsa tajahu jani bhoreṃ॥

तब नारद बोले हरषाई । अस बर मागउँ करउँ ढिठाई।।

taba nārada bole haraṣāī । asa bara māgau~ karau~ ḍhiṭhāī॥

जद्यपि प्रभु के नाम अनेका। श्रुति कह अधिक एक तें एका।।

jadyapi prabhu ke nāma anekā। śruti kaha adhika eka teṃ ekā॥

राम सकल नामन्ह ते अधिका। होउ नाथ अघ खग गन बधिका।।

rāma sakala nāmanha te adhikā। hou nātha agha khaga gana badhikā॥

राका रजनी भगति तव राम नाम सोइ सोम।

rākā rajanī bhagati tava rāma nāma soi soma।

अपर नाम उडगन बिमल बसुहुँ भगत उर ब्योम।।42(क)।।

apara nāma uḍagana bimala basuhu~ bhagata ura byoma॥42(ka)॥

एवमस्तु मुनि सन कहेउ कृपासिंधु रघुनाथ।

evamastu muni sana kaheu kṛpāsiṃdhu raghunātha।

तब नारद मन हरष अति प्रभु पद नायउ माथ।।42(ख)।।

taba nārada mana haraṣa ati prabhu pada nāyau mātha॥42(kha)॥

अति प्रसन्न रघुनाथहि जानी। पुनि नारद बोले मृदु बानी।।

ati prasanna raghunāthahi jānī। puni nārada bole mṛdu bānī॥

राम जबहिं प्रेरेउ निज माया। मोहेहु मोहि सुनहु रघुराया।।

rāma jabahiṃ prereu nija māyā। mohehu mohi sunahu raghurāyā॥

तब बिबाह मैं चाहउँ कीन्हा। प्रभु केहि कारन करै न दीन्हा।।

taba bibāha maiṃ cāhau~ kīnhā। prabhu kehi kārana karai na dīnhā॥

सुनु मुनि तोहि कहउँ सहरोसा। भजहिं जे मोहि तजि सकल भरोसा।।

sunu muni tohi kahau~ saharosā। bhajahiṃ je mohi taji sakala bharosā॥

करउँ सदा तिन्ह कै रखवारी। जिमि बालक राखइ महतारी।।

karau~ sadā tinha kai rakhavārī। jimi bālaka rākhai mahatārī॥

गह सिसु बच्छ अनल अहि धाई। तहँ राखइ जननी अरगाई।।

gaha sisu baccha anala ahi dhāī। taha~ rākhai jananī aragāī॥

प्रौढ़ भएँ तेहि सुत पर माता। प्रीति करइ नहिं पाछिलि बाता।।

praur̤ha bhae~ tehi suta para mātā। prīti karai nahiṃ pāchili bātā॥

मोरे प्रौढ़ तनय सम ग्यानी। बालक सुत सम दास अमानी।।

more praur̤ha tanaya sama gyānī। bālaka suta sama dāsa amānī॥

जनहि मोर बल निज बल ताही। दुहु कहँ काम क्रोध रिपु आही।।

janahi mora bala nija bala tāhī। duhu kaha~ kāma krodha ripu āhī॥

यह बिचारि पंडित मोहि भजहीं। पाएहुँ ग्यान भगति नहिं तजहीं।।

yaha bicāri paṃḍita mohi bhajahīṃ। pāehu~ gyāna bhagati nahiṃ tajahīṃ॥

काम क्रोध लोभादि मद प्रबल मोह कै धारि।

kāma krodha lobhādi mada prabala moha kai dhāri।

तिन्ह महँ अति दारुन दुखद मायारूपी नारि।।43।।

tinha maha~ ati dāruna dukhada māyārūpī nāri॥43॥

सुनि मुनि कह पुरान श्रुति संता। मोह बिपिन कहुँ नारि बसंता।।

suni muni kaha purāna śruti saṃtā। moha bipina kahu~ nāri basaṃtā॥

जप तप नेम जलाश्रय झारी। होइ ग्रीषम सोषइ सब नारी।।

japa tapa nema jalāśraya jhārī। hoi grīṣama soṣai saba nārī॥

काम क्रोध मद मत्सर भेका। इन्हहि हरषप्रद बरषा एका।।

kāma krodha mada matsara bhekā। inhahi haraṣaprada baraṣā ekā॥

दुर्बासना कुमुद समुदाई। तिन्ह कहँ सरद सदा सुखदाई।।

durbāsanā kumuda samudāī। tinha kaha~ sarada sadā sukhadāī॥

धर्म सकल सरसीरुह बृंदा। होइ हिम तिन्हहि दहइ सुख मंदा।।

dharma sakala sarasīruha bṛṃdā। hoi hima tinhahi dahai sukha maṃdā॥

पुनि ममता जवास बहुताई। पलुहइ नारि सिसिर रितु पाई।।

puni mamatā javāsa bahutāī। paluhai nāri sisira ritu pāī॥

पाप उलूक निकर सुखकारी। नारि निबिड़ रजनी अँधिआरी।।

pāpa ulūka nikara sukhakārī। nāri nibir̤a rajanī a~dhiārī॥

बुधि बल सील सत्य सब मीना। बनसी सम त्रिय कहहिं प्रबीना।।

budhi bala sīla satya saba mīnā। banasī sama triya kahahiṃ prabīnā॥

अवगुन मूल सूलप्रद प्रमदा सब दुख खानि।

avaguna mūla sūlaprada pramadā saba dukha khāni।

ताते कीन्ह निवारन मुनि मैं यह जियँ जानि।।44।।

tāte kīnha nivārana muni maiṃ yaha jiya~ jāni॥44॥

सुनि रघुपति के बचन सुहाए। मुनि तन पुलक नयन भरि आए।।

suni raghupati ke bacana suhāe। muni tana pulaka nayana bhari āe॥

कहहु कवन प्रभु कै असि रीती। सेवक पर ममता अरु प्रीती।।

kahahu kavana prabhu kai asi rītī। sevaka para mamatā aru prītī॥

जे न भजहिं अस प्रभु भ्रम त्यागी। ग्यान रंक नर मंद अभागी।।

je na bhajahiṃ asa prabhu bhrama tyāgī। gyāna raṃka nara maṃda abhāgī॥

पुनि सादर बोले मुनि नारद। सुनहु राम बिग्यान बिसारद।।

puni sādara bole muni nārada। sunahu rāma bigyāna bisārada॥

संतन्ह के लच्छन रघुबीरा। कहहु नाथ भव भंजन भीरा।।

saṃtanha ke lacchana raghubīrā। kahahu nātha bhava bhaṃjana bhīrā॥

सुनु मुनि संतन्ह के गुन कहऊँ। जिन्ह ते मैं उन्ह कें बस रहऊँ।।

sunu muni saṃtanha ke guna kahaū~। jinha te maiṃ unha keṃ basa rahaū~॥

षट बिकार जित अनघ अकामा। अचल अकिंचन सुचि सुखधामा।।

ṣaṭa bikāra jita anagha akāmā। acala akiṃcana suci sukhadhāmā॥

अमितबोध अनीह मितभोगी। सत्यसार कबि कोबिद जोगी।।

amitabodha anīha mitabhogī। satyasāra kabi kobida jogī॥

सावधान मानद मदहीना। धीर धर्म गति परम प्रबीना।।

sāvadhāna mānada madahīnā। dhīra dharma gati parama prabīnā॥

गुनागार संसार दुख रहित बिगत संदेह।।

gunāgāra saṃsāra dukha rahita bigata saṃdeha॥

तजि मम चरन सरोज प्रिय तिन्ह कहुँ देह न गेह।।45।।

taji mama carana saroja priya tinha kahu~ deha na geha॥45॥