Bāla Kāṇḍa — The book of childhood

वर्णानामर्थसंघानां रसानां छन्दसामपि।

varṇānāmarthasaṃghānāṃ rasānāṃ chandasāmapi।

मङ्गलानां च कर्त्तारौ वन्दे वाणीविनायकौ।।1।।

maṅgalānāṃ ca karttārau vande vāṇīvināyakau॥1॥

भवानीशङ्करौ वन्दे श्रद्धाविश्वासरूपिणौ।

bhavānīśaṅkarau vande śraddhāviśvāsarūpiṇau।

याभ्यां विना न पश्यन्ति सिद्धाःस्वान्तःस्थमीश्वरम्।।2।।

yābhyāṃ vinā na paśyanti siddhāḥsvāntaḥsthamīśvaram॥2॥

वन्दे बोधमयं नित्यं गुरुं शङ्कररूपिणम्।

vande bodhamayaṃ nityaṃ guruṃ śaṅkararūpiṇam।

यमाश्रितो हि वक्रोऽपि चन्द्रः सर्वत्र वन्द्यते।।3।।

yamāśrito hi vakro'pi candraḥ sarvatra vandyate॥3॥

सीतारामगुणग्रामपुण्यारण्यविहारिणौ।

sītārāmaguṇagrāmapuṇyāraṇyavihāriṇau।

वन्दे विशुद्धविज्ञानौ कबीश्वरकपीश्वरौ।।4।।

vande viśuddhavijñānau kabīśvarakapīśvarau॥4॥

उद्भवस्थितिसंहारकारिणीं क्लेशहारिणीम्।

udbhavasthitisaṃhārakāriṇīṃ kleśahāriṇīm।

सर्वश्रेयस्करीं सीतां नतोऽहं रामवल्लभाम्।।5।।

sarvaśreyaskarīṃ sītāṃ nato'haṃ rāmavallabhām॥5॥

यन्मायावशवर्तिं विश्वमखिलं ब्रह्मादिदेवासुरा

yanmāyāvaśavartiṃ viśvamakhilaṃ brahmādidevāsurā

यत्सत्वादमृषैव भाति सकलं रज्जौ यथाहेर्भ्रमः।

yatsatvādamṛṣaiva bhāti sakalaṃ rajjau yathāherbhramaḥ।

यत्पादप्लवमेकमेव हि भवाम्भोधेस्तितीर्षावतां

yatpādaplavamekameva hi bhavāmbhodhestitīrṣāvatāṃ

वन्देऽहं तमशेषकारणपरं रामाख्यमीशं हरिम्।।6।।

vande'haṃ tamaśeṣakāraṇaparaṃ rāmākhyamīśaṃ harim॥6॥

नानापुराणनिगमागमसम्मतं यद्

nānāpurāṇanigamāgamasammataṃ yad

रामायणे निगदितं क्वचिदन्यतोऽपि।

rāmāyaṇe nigaditaṃ kvacidanyato'pi।

स्वान्तःसुखाय तुलसी रघुनाथगाथा-

svāntaḥsukhāya tulasī raghunāthagāthā-

भाषानिबन्धमतिमञ्जुलमातनोति।।7।।

bhāṣānibandhamatimañjulamātanoti॥7॥

जो सुमिरत सिधि होइ गन नायक करिबर बदन।

jo sumirata sidhi hoi gana nāyaka karibara badana।

करउ अनुग्रह सोइ बुद्धि रासि सुभ गुन सदन।।1।।

karau anugraha soi buddhi rāsi subha guna sadana॥1॥

मूक होइ बाचाल पंगु चढइ गिरिबर गहन।

mūka hoi bācāla paṃgu caḍhai giribara gahana।

जासु कृपाँ सो दयाल द्रवउ सकल कलि मल दहन।।2।।

jāsu kṛpā~ so dayāla dravau sakala kali mala dahana॥2॥

नील सरोरुह स्याम तरुन अरुन बारिज नयन।

nīla saroruha syāma taruna aruna bārija nayana।

करउ सो मम उर धाम सदा छीरसागर सयन।।3।।

karau so mama ura dhāma sadā chīrasāgara sayana॥3॥

कुंद इंदु सम देह उमा रमन करुना अयन।

kuṃda iṃdu sama deha umā ramana karunā ayana।

जाहि दीन पर नेह करउ कृपा मर्दन मयन।।4।।

jāhi dīna para neha karau kṛpā mardana mayana॥4॥

बंदउ गुरु पद कंज कृपा सिंधु नररूप हरि।

baṃdau guru pada kaṃja kṛpā siṃdhu nararūpa hari।

महामोह तम पुंज जासु बचन रबि कर निकर।।5।।

mahāmoha tama puṃja jāsu bacana rabi kara nikara॥5॥

बंदउ गुरु पद पदुम परागा। सुरुचि सुबास सरस अनुरागा।।

baṃdau guru pada paduma parāgā। suruci subāsa sarasa anurāgā॥

अमिय मूरिमय चूरन चारू। समन सकल भव रुज परिवारू।।

amiya mūrimaya cūrana cārū। samana sakala bhava ruja parivārū॥

सुकृति संभु तन बिमल बिभूती। मंजुल मंगल मोद प्रसूती।।

sukṛti saṃbhu tana bimala bibhūtī। maṃjula maṃgala moda prasūtī॥

जन मन मंजु मुकुर मल हरनी। किएँ तिलक गुन गन बस करनी।।

jana mana maṃju mukura mala haranī। kie~ tilaka guna gana basa karanī॥

श्रीगुर पद नख मनि गन जोती। सुमिरत दिब्य द्रृष्टि हियँ होती।।

śrīgura pada nakha mani gana jotī। sumirata dibya drṛṣṭi hiya~ hotī॥

दलन मोह तम सो सप्रकासू। बड़े भाग उर आवइ जासू।।

dalana moha tama so saprakāsū। bar̤e bhāga ura āvai jāsū॥

उघरहिं बिमल बिलोचन ही के। मिटहिं दोष दुख भव रजनी के।।

ugharahiṃ bimala bilocana hī ke। miṭahiṃ doṣa dukha bhava rajanī ke॥

सूझहिं राम चरित मनि मानिक। गुपुत प्रगट जहँ जो जेहि खानिक।।

sūjhahiṃ rāma carita mani mānika। guputa pragaṭa jaha~ jo jehi khānika॥

जथा सुअंजन अंजि दृग साधक सिद्ध सुजान।

jathā suaṃjana aṃji dṛga sādhaka siddha sujāna।

कौतुक देखत सैल बन भूतल भूरि निधान।।1।।

kautuka dekhata saila bana bhūtala bhūri nidhāna॥1॥

गुरु पद रज मृदु मंजुल अंजन। नयन अमिअ दृग दोष बिभंजन।।

guru pada raja mṛdu maṃjula aṃjana। nayana amia dṛga doṣa bibhaṃjana॥

तेहिं करि बिमल बिबेक बिलोचन। बरनउँ राम चरित भव मोचन।।

tehiṃ kari bimala bibeka bilocana। baranau~ rāma carita bhava mocana॥

बंदउँ प्रथम महीसुर चरना। मोह जनित संसय सब हरना।।

baṃdau~ prathama mahīsura caranā। moha janita saṃsaya saba haranā॥

सुजन समाज सकल गुन खानी। करउँ प्रनाम सप्रेम सुबानी।।

sujana samāja sakala guna khānī। karau~ pranāma saprema subānī॥

साधु चरित सुभ चरित कपासू। निरस बिसद गुनमय फल जासू।।

sādhu carita subha carita kapāsū। nirasa bisada gunamaya phala jāsū॥

जो सहि दुख परछिद्र दुरावा। बंदनीय जेहिं जग जस पावा।।

jo sahi dukha parachidra durāvā। baṃdanīya jehiṃ jaga jasa pāvā॥

मुद मंगलमय संत समाजू। जो जग जंगम तीरथराजू।।

muda maṃgalamaya saṃta samājū। jo jaga jaṃgama tīratharājū॥

राम भक्ति जहँ सुरसरि धारा। सरसइ ब्रह्म बिचार प्रचारा।।

rāma bhakti jaha~ surasari dhārā। sarasai brahma bicāra pracārā॥

बिधि निषेधमय कलि मल हरनी। करम कथा रबिनंदनि बरनी।।

bidhi niṣedhamaya kali mala haranī। karama kathā rabinaṃdani baranī॥

हरि हर कथा बिराजति बेनी। सुनत सकल मुद मंगल देनी।।

hari hara kathā birājati benī। sunata sakala muda maṃgala denī॥

बटु बिस्वास अचल निज धरमा। तीरथराज समाज सुकरमा।।

baṭu bisvāsa acala nija dharamā। tīratharāja samāja sukaramā॥

सबहिं सुलभ सब दिन सब देसा। सेवत सादर समन कलेसा।।

sabahiṃ sulabha saba dina saba desā। sevata sādara samana kalesā॥

अकथ अलौकिक तीरथराऊ। देइ सद्य फल प्रगट प्रभाऊ।।

akatha alaukika tīratharāū। dei sadya phala pragaṭa prabhāū॥

सुनि समुझहिं जन मुदित मन मज्जहिं अति अनुराग।

suni samujhahiṃ jana mudita mana majjahiṃ ati anurāga।

लहहिं चारि फल अछत तनु साधु समाज प्रयाग।।2।।

lahahiṃ cāri phala achata tanu sādhu samāja prayāga॥2॥

मज्जन फल पेखिअ ततकाला। काक होहिं पिक बकउ मराला।।

majjana phala pekhia tatakālā। kāka hohiṃ pika bakau marālā॥

सुनि आचरज करै जनि कोई। सतसंगति महिमा नहिं गोई।।

suni ācaraja karai jani koī। satasaṃgati mahimā nahiṃ goī॥

बालमीक नारद घटजोनी। निज निज मुखनि कही निज होनी।।

bālamīka nārada ghaṭajonī। nija nija mukhani kahī nija honī॥

जलचर थलचर नभचर नाना। जे जड़ चेतन जीव जहाना।।

jalacara thalacara nabhacara nānā। je jar̤a cetana jīva jahānā॥

मति कीरति गति भूति भलाई। जब जेहिं जतन जहाँ जेहिं पाई।।

mati kīrati gati bhūti bhalāī। jaba jehiṃ jatana jahā~ jehiṃ pāī॥

सो जानब सतसंग प्रभाऊ। लोकहुँ बेद न आन उपाऊ।।

so jānaba satasaṃga prabhāū। lokahu~ beda na āna upāū॥

बिनु सतसंग बिबेक न होई। राम कृपा बिनु सुलभ न सोई।।

binu satasaṃga bibeka na hoī। rāma kṛpā binu sulabha na soī॥

सतसंगत मुद मंगल मूला। सोइ फल सिधि सब साधन फूला।।

satasaṃgata muda maṃgala mūlā। soi phala sidhi saba sādhana phūlā॥

सठ सुधरहिं सतसंगति पाई। पारस परस कुधात सुहाई।।

saṭha sudharahiṃ satasaṃgati pāī। pārasa parasa kudhāta suhāī॥

बिधि बस सुजन कुसंगत परहीं। फनि मनि सम निज गुन अनुसरहीं।।

bidhi basa sujana kusaṃgata parahīṃ। phani mani sama nija guna anusarahīṃ॥

बिधि हरि हर कबि कोबिद बानी। कहत साधु महिमा सकुचानी।।

bidhi hari hara kabi kobida bānī। kahata sādhu mahimā sakucānī॥

सो मो सन कहि जात न कैसें। साक बनिक मनि गुन गन जैसें।।

so mo sana kahi jāta na kaiseṃ। sāka banika mani guna gana jaiseṃ॥

बंदउँ संत समान चित हित अनहित नहिं कोइ।

baṃdau~ saṃta samāna cita hita anahita nahiṃ koi।

अंजलि गत सुभ सुमन जिमि सम सुगंध कर दोइ।।3(क)।।

aṃjali gata subha sumana jimi sama sugaṃdha kara doi॥3(ka)॥

संत सरल चित जगत हित जानि सुभाउ सनेहु।

saṃta sarala cita jagata hita jāni subhāu sanehu।

बालबिनय सुनि करि कृपा राम चरन रति देहु।।3(ख)।।

bālabinaya suni kari kṛpā rāma carana rati dehu॥3(kha)॥

बहुरि बंदि खल गन सतिभाएँ। जे बिनु काज दाहिनेहु बाएँ।।

bahuri baṃdi khala gana satibhāe~। je binu kāja dāhinehu bāe~॥

पर हित हानि लाभ जिन्ह केरें। उजरें हरष बिषाद बसेरें।।

para hita hāni lābha jinha kereṃ। ujareṃ haraṣa biṣāda basereṃ॥

हरि हर जस राकेस राहु से। पर अकाज भट सहसबाहु से।।

hari hara jasa rākesa rāhu se। para akāja bhaṭa sahasabāhu se॥

जे पर दोष लखहिं सहसाखी। पर हित घृत जिन्ह के मन माखी।।

je para doṣa lakhahiṃ sahasākhī। para hita ghṛta jinha ke mana mākhī॥

तेज कृसानु रोष महिषेसा। अघ अवगुन धन धनी धनेसा।।

teja kṛsānu roṣa mahiṣesā। agha avaguna dhana dhanī dhanesā॥

उदय केत सम हित सबही के। कुंभकरन सम सोवत नीके।।

udaya keta sama hita sabahī ke। kuṃbhakarana sama sovata nīke॥

पर अकाजु लगि तनु परिहरहीं। जिमि हिम उपल कृषी दलि गरहीं।।

para akāju lagi tanu pariharahīṃ। jimi hima upala kṛṣī dali garahīṃ॥

बंदउँ खल जस सेष सरोषा। सहस बदन बरनइ पर दोषा।।

baṃdau~ khala jasa seṣa saroṣā। sahasa badana baranai para doṣā॥

पुनि प्रनवउँ पृथुराज समाना। पर अघ सुनइ सहस दस काना।।

puni pranavau~ pṛthurāja samānā। para agha sunai sahasa dasa kānā॥

बहुरि सक्र सम बिनवउँ तेही। संतत सुरानीक हित जेही।।

bahuri sakra sama binavau~ tehī। saṃtata surānīka hita jehī॥

बचन बज्र जेहि सदा पिआरा। सहस नयन पर दोष निहारा।।

bacana bajra jehi sadā piārā। sahasa nayana para doṣa nihārā॥

उदासीन अरि मीत हित सुनत जरहिं खल रीति।

udāsīna ari mīta hita sunata jarahiṃ khala rīti।

जानि पानि जुग जोरि जन बिनती करइ सप्रीति।।4।।

jāni pāni juga jori jana binatī karai saprīti॥4॥

मैं अपनी दिसि कीन्ह निहोरा। तिन्ह निज ओर न लाउब भोरा।।

maiṃ apanī disi kīnha nihorā। tinha nija ora na lāuba bhorā॥

बायस पलिअहिं अति अनुरागा। होहिं निरामिष कबहुँ कि कागा।।

bāyasa paliahiṃ ati anurāgā। hohiṃ nirāmiṣa kabahu~ ki kāgā॥

बंदउँ संत असज्जन चरना। दुखप्रद उभय बीच कछु बरना।।

baṃdau~ saṃta asajjana caranā। dukhaprada ubhaya bīca kachu baranā॥

बिछुरत एक प्रान हरि लेहीं। मिलत एक दुख दारुन देहीं।।

bichurata eka prāna hari lehīṃ। milata eka dukha dāruna dehīṃ॥

उपजहिं एक संग जग माहीं। जलज जोंक जिमि गुन बिलगाहीं।।

upajahiṃ eka saṃga jaga māhīṃ। jalaja joṃka jimi guna bilagāhīṃ॥

सुधा सुरा सम साधू असाधू। जनक एक जग जलधि अगाधू।।

sudhā surā sama sādhū asādhū। janaka eka jaga jaladhi agādhū॥

भल अनभल निज निज करतूती। लहत सुजस अपलोक बिभूती।।

bhala anabhala nija nija karatūtī। lahata sujasa apaloka bibhūtī॥

सुधा सुधाकर सुरसरि साधू। गरल अनल कलिमल सरि ब्याधू।।

sudhā sudhākara surasari sādhū। garala anala kalimala sari byādhū॥

गुन अवगुन जानत सब कोई। जो जेहि भाव नीक तेहि सोई।।

guna avaguna jānata saba koī। jo jehi bhāva nīka tehi soī॥

भलो भलाइहि पै लहइ लहइ निचाइहि नीचु।

bhalo bhalāihi pai lahai lahai nicāihi nīcu।

सुधा सराहिअ अमरताँ गरल सराहिअ मीचु।।5।।

sudhā sarāhia amaratā~ garala sarāhia mīcu॥5॥

खल अघ अगुन साधू गुन गाहा। उभय अपार उदधि अवगाहा।।

khala agha aguna sādhū guna gāhā। ubhaya apāra udadhi avagāhā॥

तेहि तें कछु गुन दोष बखाने। संग्रह त्याग न बिनु पहिचाने।।

tehi teṃ kachu guna doṣa bakhāne। saṃgraha tyāga na binu pahicāne॥

भलेउ पोच सब बिधि उपजाए। गनि गुन दोष बेद बिलगाए।।

bhaleu poca saba bidhi upajāe। gani guna doṣa beda bilagāe॥

कहहिं बेद इतिहास पुराना। बिधि प्रपंचु गुन अवगुन साना।।

kahahiṃ beda itihāsa purānā। bidhi prapaṃcu guna avaguna sānā॥

दुख सुख पाप पुन्य दिन राती। साधु असाधु सुजाति कुजाती।।

dukha sukha pāpa punya dina rātī। sādhu asādhu sujāti kujātī॥

दानव देव ऊँच अरु नीचू। अमिअ सुजीवनु माहुरु मीचू।।

dānava deva ū~ca aru nīcū। amia sujīvanu māhuru mīcū॥

माया ब्रह्म जीव जगदीसा। लच्छि अलच्छि रंक अवनीसा।।

māyā brahma jīva jagadīsā। lacchi alacchi raṃka avanīsā॥

कासी मग सुरसरि क्रमनासा। मरु मारव महिदेव गवासा।।

kāsī maga surasari kramanāsā। maru mārava mahideva gavāsā॥

सरग नरक अनुराग बिरागा। निगमागम गुन दोष बिभागा।।

saraga naraka anurāga birāgā। nigamāgama guna doṣa bibhāgā॥

जड़ चेतन गुन दोषमय बिस्व कीन्ह करतार।

jar̤a cetana guna doṣamaya bisva kīnha karatāra।

संत हंस गुन गहहिं पय परिहरि बारि बिकार।।6।।

saṃta haṃsa guna gahahiṃ paya parihari bāri bikāra॥6॥

अस बिबेक जब देइ बिधाता। तब तजि दोष गुनहिं मनु राता।।

asa bibeka jaba dei bidhātā। taba taji doṣa gunahiṃ manu rātā॥

काल सुभाउ करम बरिआई। भलेउ प्रकृति बस चुकइ भलाई।।

kāla subhāu karama bariāī। bhaleu prakṛti basa cukai bhalāī॥

सो सुधारि हरिजन जिमि लेहीं। दलि दुख दोष बिमल जसु देहीं।।

so sudhāri harijana jimi lehīṃ। dali dukha doṣa bimala jasu dehīṃ॥

खलउ करहिं भल पाइ सुसंगू। मिटइ न मलिन सुभाउ अभंगू।।

khalau karahiṃ bhala pāi susaṃgū। miṭai na malina subhāu abhaṃgū॥

लखि सुबेष जग बंचक जेऊ। बेष प्रताप पूजिअहिं तेऊ।।

lakhi subeṣa jaga baṃcaka jeū। beṣa pratāpa pūjiahiṃ teū॥

उधरहिं अंत न होइ निबाहू। कालनेमि जिमि रावन राहू।।

udharahiṃ aṃta na hoi nibāhū। kālanemi jimi rāvana rāhū॥

किएहुँ कुबेष साधु सनमानू। जिमि जग जामवंत हनुमानू।।

kiehu~ kubeṣa sādhu sanamānū। jimi jaga jāmavaṃta hanumānū॥

हानि कुसंग सुसंगति लाहू। लोकहुँ बेद बिदित सब काहू।।

hāni kusaṃga susaṃgati lāhū। lokahu~ beda bidita saba kāhū॥

गगन चढ़इ रज पवन प्रसंगा। कीचहिं मिलइ नीच जल संगा।।

gagana car̤hai raja pavana prasaṃgā। kīcahiṃ milai nīca jala saṃgā॥

साधु असाधु सदन सुक सारीं। सुमिरहिं राम देहिं गनि गारी।।

sādhu asādhu sadana suka sārīṃ। sumirahiṃ rāma dehiṃ gani gārī॥

धूम कुसंगति कारिख होई। लिखिअ पुरान मंजु मसि सोई।।

dhūma kusaṃgati kārikha hoī। likhia purāna maṃju masi soī॥

सोइ जल अनल अनिल संघाता। होइ जलद जग जीवन दाता।।

soi jala anala anila saṃghātā। hoi jalada jaga jīvana dātā॥

ग्रह भेषज जल पवन पट पाइ कुजोग सुजोग।

graha bheṣaja jala pavana paṭa pāi kujoga sujoga।

होहि कुबस्तु सुबस्तु जग लखहिं सुलच्छन लोग।।7(क)।।

hohi kubastu subastu jaga lakhahiṃ sulacchana loga॥7(ka)॥

सम प्रकास तम पाख दुहुँ नाम भेद बिधि कीन्ह।

sama prakāsa tama pākha duhu~ nāma bheda bidhi kīnha।

ससि सोषक पोषक समुझि जग जस अपजस दीन्ह।।7(ख)।।

sasi soṣaka poṣaka samujhi jaga jasa apajasa dīnha॥7(kha)॥

जड़ चेतन जग जीव जत सकल राममय जानि।

jar̤a cetana jaga jīva jata sakala rāmamaya jāni।

बंदउँ सब के पद कमल सदा जोरि जुग पानि।।7(ग)।।

baṃdau~ saba ke pada kamala sadā jori juga pāni॥7(ga)॥

देव दनुज नर नाग खग प्रेत पितर गंधर्ब।

deva danuja nara nāga khaga preta pitara gaṃdharba।

बंदउँ किंनर रजनिचर कृपा करहु अब सर्ब।।7(घ)।।

baṃdau~ kiṃnara rajanicara kṛpā karahu aba sarba॥7(gha)॥

आकर चारि लाख चौरासी। जाति जीव जल थल नभ बासी।।

ākara cāri lākha caurāsī। jāti jīva jala thala nabha bāsī॥

सीय राममय सब जग जानी। करउँ प्रनाम जोरि जुग पानी।।

sīya rāmamaya saba jaga jānī। karau~ pranāma jori juga pānī॥

जानि कृपाकर किंकर मोहू। सब मिलि करहु छाड़ि छल छोहू।।

jāni kṛpākara kiṃkara mohū। saba mili karahu chār̤i chala chohū॥

निज बुधि बल भरोस मोहि नाहीं। तातें बिनय करउँ सब पाही।।

nija budhi bala bharosa mohi nāhīṃ। tāteṃ binaya karau~ saba pāhī॥

करन चहउँ रघुपति गुन गाहा। लघु मति मोरि चरित अवगाहा।।

karana cahau~ raghupati guna gāhā। laghu mati mori carita avagāhā॥

सूझ न एकउ अंग उपाऊ। मन मति रंक मनोरथ राऊ।।

sūjha na ekau aṃga upāū। mana mati raṃka manoratha rāū॥

मति अति नीच ऊँचि रुचि आछी। चहिअ अमिअ जग जुरइ न छाछी।।

mati ati nīca ū~ci ruci āchī। cahia amia jaga jurai na chāchī॥

छमिहहिं सज्जन मोरि ढिठाई। सुनिहहिं बालबचन मन लाई।।

chamihahiṃ sajjana mori ḍhiṭhāī। sunihahiṃ bālabacana mana lāī॥

जौ बालक कह तोतरि बाता। सुनहिं मुदित मन पितु अरु माता।।

jau bālaka kaha totari bātā। sunahiṃ mudita mana pitu aru mātā॥

हँसिहहि कूर कुटिल कुबिचारी। जे पर दूषन भूषनधारी।।

ha~sihahi kūra kuṭila kubicārī। je para dūṣana bhūṣanadhārī॥

निज कवित केहि लाग न नीका। सरस होउ अथवा अति फीका।।

nija kavita kehi lāga na nīkā। sarasa hou athavā ati phīkā॥

जे पर भनिति सुनत हरषाही। ते बर पुरुष बहुत जग नाहीं।।

je para bhaniti sunata haraṣāhī। te bara puruṣa bahuta jaga nāhīṃ॥

जग बहु नर सर सरि सम भाई। जे निज बाढ़ि बढ़हिं जल पाई।।

jaga bahu nara sara sari sama bhāī। je nija bār̤hi bar̤hahiṃ jala pāī॥

सज्जन सकृत सिंधु सम कोई। देखि पूर बिधु बाढ़इ जोई।।

sajjana sakṛta siṃdhu sama koī। dekhi pūra bidhu bār̤hai joī॥

भाग छोट अभिलाषु बड़ करउँ एक बिस्वास।

bhāga choṭa abhilāṣu bar̤a karau~ eka bisvāsa।

पैहहिं सुख सुनि सुजन सब खल करहहिं उपहास।।8।।

paihahiṃ sukha suni sujana saba khala karahahiṃ upahāsa॥8॥

खल परिहास होइ हित मोरा। काक कहहिं कलकंठ कठोरा।।

khala parihāsa hoi hita morā। kāka kahahiṃ kalakaṃṭha kaṭhorā॥

हंसहि बक दादुर चातकही। हँसहिं मलिन खल बिमल बतकही।।

haṃsahi baka dādura cātakahī। ha~sahiṃ malina khala bimala batakahī॥

कबित रसिक न राम पद नेहू। तिन्ह कहँ सुखद हास रस एहू।।

kabita rasika na rāma pada nehū। tinha kaha~ sukhada hāsa rasa ehū॥

भाषा भनिति भोरि मति मोरी। हँसिबे जोग हँसें नहिं खोरी।।

bhāṣā bhaniti bhori mati morī। ha~sibe joga ha~seṃ nahiṃ khorī॥

प्रभु पद प्रीति न सामुझि नीकी। तिन्हहि कथा सुनि लागहि फीकी।।

prabhu pada prīti na sāmujhi nīkī। tinhahi kathā suni lāgahi phīkī॥

हरि हर पद रति मति न कुतरकी। तिन्ह कहुँ मधुर कथा रघुवर की।।

hari hara pada rati mati na kutarakī। tinha kahu~ madhura kathā raghuvara kī॥

राम भगति भूषित जियँ जानी। सुनिहहिं सुजन सराहि सुबानी।।

rāma bhagati bhūṣita jiya~ jānī। sunihahiṃ sujana sarāhi subānī॥

कबि न होउँ नहिं बचन प्रबीनू। सकल कला सब बिद्या हीनू।।

kabi na hou~ nahiṃ bacana prabīnū। sakala kalā saba bidyā hīnū॥

आखर अरथ अलंकृति नाना। छंद प्रबंध अनेक बिधाना।।

ākhara aratha alaṃkṛti nānā। chaṃda prabaṃdha aneka bidhānā॥

भाव भेद रस भेद अपारा। कबित दोष गुन बिबिध प्रकारा।।

bhāva bheda rasa bheda apārā। kabita doṣa guna bibidha prakārā॥

कबित बिबेक एक नहिं मोरें। सत्य कहउँ लिखि कागद कोरे।।

kabita bibeka eka nahiṃ moreṃ। satya kahau~ likhi kāgada kore॥

भनिति मोरि सब गुन रहित बिस्व बिदित गुन एक।

bhaniti mori saba guna rahita bisva bidita guna eka।

सो बिचारि सुनिहहिं सुमति जिन्ह कें बिमल बिवेक।।9।।

so bicāri sunihahiṃ sumati jinha keṃ bimala biveka॥9॥

एहि महँ रघुपति नाम उदारा। अति पावन पुरान श्रुति सारा।।

ehi maha~ raghupati nāma udārā। ati pāvana purāna śruti sārā॥

मंगल भवन अमंगल हारी। उमा सहित जेहि जपत पुरारी।।

maṃgala bhavana amaṃgala hārī। umā sahita jehi japata purārī॥

भनिति बिचित्र सुकबि कृत जोऊ। राम नाम बिनु सोह न सोऊ।।

bhaniti bicitra sukabi kṛta joū। rāma nāma binu soha na soū॥

बिधुबदनी सब भाँति सँवारी। सोन न बसन बिना बर नारी।।

bidhubadanī saba bhā~ti sa~vārī। sona na basana binā bara nārī॥

सब गुन रहित कुकबि कृत बानी। राम नाम जस अंकित जानी।।

saba guna rahita kukabi kṛta bānī। rāma nāma jasa aṃkita jānī॥

सादर कहहिं सुनहिं बुध ताही। मधुकर सरिस संत गुनग्राही।।

sādara kahahiṃ sunahiṃ budha tāhī। madhukara sarisa saṃta gunagrāhī॥

जदपि कबित रस एकउ नाही। राम प्रताप प्रकट एहि माहीं।।

jadapi kabita rasa ekau nāhī। rāma pratāpa prakaṭa ehi māhīṃ॥

सोइ भरोस मोरें मन आवा। केहिं न सुसंग बडप्पनु पावा।।

soi bharosa moreṃ mana āvā। kehiṃ na susaṃga baḍappanu pāvā॥

धूमउ तजइ सहज करुआई। अगरु प्रसंग सुगंध बसाई।।

dhūmau tajai sahaja karuāī। agaru prasaṃga sugaṃdha basāī॥

भनिति भदेस बस्तु भलि बरनी। राम कथा जग मंगल करनी।।

bhaniti bhadesa bastu bhali baranī। rāma kathā jaga maṃgala karanī॥

मंगल करनि कलि मल हरनि तुलसी कथा रघुनाथ की।।

maṃgala karani kali mala harani tulasī kathā raghunātha kī॥

गति कूर कबिता सरित की ज्यों सरित पावन पाथ की।।

gati kūra kabitā sarita kī jyoṃ sarita pāvana pātha kī॥

प्रभु सुजस संगति भनिति भलि होइहि सुजन मन भावनी।।

prabhu sujasa saṃgati bhaniti bhali hoihi sujana mana bhāvanī॥

भव अंग भूति मसान की सुमिरत सुहावनि पावनी।।

bhava aṃga bhūti masāna kī sumirata suhāvani pāvanī॥

प्रिय लागिहि अति सबहि मम भनिति राम जस संग।

priya lāgihi ati sabahi mama bhaniti rāma jasa saṃga।

दारु बिचारु कि करइ कोउ बंदिअ मलय प्रसंग।।10(क)।।

dāru bicāru ki karai kou baṃdia malaya prasaṃga॥10(ka)॥

स्याम सुरभि पय बिसद अति गुनद करहिं सब पान।

syāma surabhi paya bisada ati gunada karahiṃ saba pāna।

गिरा ग्राम्य सिय राम जस गावहिं सुनहिं सुजान।।10(ख)।।

girā grāmya siya rāma jasa gāvahiṃ sunahiṃ sujāna॥10(kha)॥

मनि मानिक मुकुता छबि जैसी। अहि गिरि गज सिर सोह न तैसी।।

mani mānika mukutā chabi jaisī। ahi giri gaja sira soha na taisī॥

नृप किरीट तरुनी तनु पाई। लहहिं सकल सोभा अधिकाई।।

nṛpa kirīṭa tarunī tanu pāī। lahahiṃ sakala sobhā adhikāī॥

तैसेहिं सुकबि कबित बुध कहहीं। उपजहिं अनत अनत छबि लहहीं।।

taisehiṃ sukabi kabita budha kahahīṃ। upajahiṃ anata anata chabi lahahīṃ॥

भगति हेतु बिधि भवन बिहाई। सुमिरत सारद आवति धाई।।

bhagati hetu bidhi bhavana bihāī। sumirata sārada āvati dhāī॥

राम चरित सर बिनु अन्हवाएँ। सो श्रम जाइ न कोटि उपाएँ।।

rāma carita sara binu anhavāe~। so śrama jāi na koṭi upāe~॥

कबि कोबिद अस हृदयँ बिचारी। गावहिं हरि जस कलि मल हारी।।

kabi kobida asa hṛdaya~ bicārī। gāvahiṃ hari jasa kali mala hārī॥

कीन्हें प्राकृत जन गुन गाना। सिर धुनि गिरा लगत पछिताना।।

kīnheṃ prākṛta jana guna gānā। sira dhuni girā lagata pachitānā॥

हृदय सिंधु मति सीप समाना। स्वाति सारदा कहहिं सुजाना।।

hṛdaya siṃdhu mati sīpa samānā। svāti sāradā kahahiṃ sujānā॥

जौं बरषइ बर बारि बिचारू। होहिं कबित मुकुतामनि चारू।।

jauṃ baraṣai bara bāri bicārū। hohiṃ kabita mukutāmani cārū॥

जुगुति बेधि पुनि पोहिअहिं रामचरित बर ताग।

juguti bedhi puni pohiahiṃ rāmacarita bara tāga।

पहिरहिं सज्जन बिमल उर सोभा अति अनुराग।।11।।

pahirahiṃ sajjana bimala ura sobhā ati anurāga॥11॥

जे जनमे कलिकाल कराला। करतब बायस बेष मराला।।

je janame kalikāla karālā। karataba bāyasa beṣa marālā॥

चलत कुपंथ बेद मग छाँड़े। कपट कलेवर कलि मल भाँड़ें।।

calata kupaṃtha beda maga chā~r̤e। kapaṭa kalevara kali mala bhā~r̤eṃ॥

बंचक भगत कहाइ राम के। किंकर कंचन कोह काम के।।

baṃcaka bhagata kahāi rāma ke। kiṃkara kaṃcana koha kāma ke॥

तिन्ह महँ प्रथम रेख जग मोरी। धींग धरमध्वज धंधक धोरी।।

tinha maha~ prathama rekha jaga morī। dhīṃga dharamadhvaja dhaṃdhaka dhorī॥

जौं अपने अवगुन सब कहऊँ। बाढ़इ कथा पार नहिं लहऊँ।।

jauṃ apane avaguna saba kahaū~। bār̤hai kathā pāra nahiṃ lahaū~॥

ताते मैं अति अलप बखाने। थोरे महुँ जानिहहिं सयाने।।

tāte maiṃ ati alapa bakhāne। thore mahu~ jānihahiṃ sayāne॥

समुझि बिबिधि बिधि बिनती मोरी। कोउ न कथा सुनि देइहि खोरी।।

samujhi bibidhi bidhi binatī morī। kou na kathā suni deihi khorī॥

एतेहु पर करिहहिं जे असंका। मोहि ते अधिक ते जड़ मति रंका।।

etehu para karihahiṃ je asaṃkā। mohi te adhika te jar̤a mati raṃkā॥

कबि न होउँ नहिं चतुर कहावउँ। मति अनुरूप राम गुन गावउँ।।

kabi na hou~ nahiṃ catura kahāvau~। mati anurūpa rāma guna gāvau~॥

कहँ रघुपति के चरित अपारा। कहँ मति मोरि निरत संसारा।।

kaha~ raghupati ke carita apārā। kaha~ mati mori nirata saṃsārā॥

जेहिं मारुत गिरि मेरु उड़ाहीं। कहहु तूल केहि लेखे माहीं।।

jehiṃ māruta giri meru ur̤āhīṃ। kahahu tūla kehi lekhe māhīṃ॥

समुझत अमित राम प्रभुताई। करत कथा मन अति कदराई।।

samujhata amita rāma prabhutāī। karata kathā mana ati kadarāī॥

सारद सेस महेस बिधि आगम निगम पुरान।

sārada sesa mahesa bidhi āgama nigama purāna।

नेति नेति कहि जासु गुन करहिं निरंतर गान।।12।।

neti neti kahi jāsu guna karahiṃ niraṃtara gāna॥12॥

सब जानत प्रभु प्रभुता सोई। तदपि कहें बिनु रहा न कोई।।

saba jānata prabhu prabhutā soī। tadapi kaheṃ binu rahā na koī॥

तहाँ बेद अस कारन राखा। भजन प्रभाउ भाँति बहु भाषा।।

tahā~ beda asa kārana rākhā। bhajana prabhāu bhā~ti bahu bhāṣā॥

एक अनीह अरूप अनामा। अज सच्चिदानंद पर धामा।।

eka anīha arūpa anāmā। aja saccidānaṃda para dhāmā॥

ब्यापक बिस्वरूप भगवाना। तेहिं धरि देह चरित कृत नाना।।

byāpaka bisvarūpa bhagavānā। tehiṃ dhari deha carita kṛta nānā॥

सो केवल भगतन हित लागी। परम कृपाल प्रनत अनुरागी।।

so kevala bhagatana hita lāgī। parama kṛpāla pranata anurāgī॥

जेहि जन पर ममता अति छोहू। जेहिं करुना करि कीन्ह न कोहू।।

jehi jana para mamatā ati chohū। jehiṃ karunā kari kīnha na kohū॥

गई बहोर गरीब नेवाजू। सरल सबल साहिब रघुराजू।।

gaī bahora garība nevājū। sarala sabala sāhiba raghurājū॥

बुध बरनहिं हरि जस अस जानी। करहि पुनीत सुफल निज बानी।।

budha baranahiṃ hari jasa asa jānī। karahi punīta suphala nija bānī॥

तेहिं बल मैं रघुपति गुन गाथा। कहिहउँ नाइ राम पद माथा।।

tehiṃ bala maiṃ raghupati guna gāthā। kahihau~ nāi rāma pada māthā॥

मुनिन्ह प्रथम हरि कीरति गाई। तेहिं मग चलत सुगम मोहि भाई।।

muninha prathama hari kīrati gāī। tehiṃ maga calata sugama mohi bhāī॥

अति अपार जे सरित बर जौं नृप सेतु कराहिं।

ati apāra je sarita bara jauṃ nṛpa setu karāhiṃ।

चढि पिपीलिकउ परम लघु बिनु श्रम पारहि जाहिं।।13।।

caḍhi pipīlikau parama laghu binu śrama pārahi jāhiṃ॥13॥

एहि प्रकार बल मनहि देखाई। करिहउँ रघुपति कथा सुहाई।।

ehi prakāra bala manahi dekhāī। karihau~ raghupati kathā suhāī॥

ब्यास आदि कबि पुंगव नाना। जिन्ह सादर हरि सुजस बखाना।।

byāsa ādi kabi puṃgava nānā। jinha sādara hari sujasa bakhānā॥

चरन कमल बंदउँ तिन्ह केरे। पुरवहुँ सकल मनोरथ मेरे।।

carana kamala baṃdau~ tinha kere। puravahu~ sakala manoratha mere॥

कलि के कबिन्ह करउँ परनामा। जिन्ह बरने रघुपति गुन ग्रामा।।

kali ke kabinha karau~ paranāmā। jinha barane raghupati guna grāmā॥

जे प्राकृत कबि परम सयाने। भाषाँ जिन्ह हरि चरित बखाने।।

je prākṛta kabi parama sayāne। bhāṣā~ jinha hari carita bakhāne॥

भए जे अहहिं जे होइहहिं आगें। प्रनवउँ सबहिं कपट सब त्यागें।।

bhae je ahahiṃ je hoihahiṃ āgeṃ। pranavau~ sabahiṃ kapaṭa saba tyāgeṃ॥

होहु प्रसन्न देहु बरदानू। साधु समाज भनिति सनमानू।।

hohu prasanna dehu baradānū। sādhu samāja bhaniti sanamānū॥

जो प्रबंध बुध नहिं आदरहीं। सो श्रम बादि बाल कबि करहीं।।

jo prabaṃdha budha nahiṃ ādarahīṃ। so śrama bādi bāla kabi karahīṃ॥

कीरति भनिति भूति भलि सोई। सुरसरि सम सब कहँ हित होई।।

kīrati bhaniti bhūti bhali soī। surasari sama saba kaha~ hita hoī॥

राम सुकीरति भनिति भदेसा। असमंजस अस मोहि अँदेसा।।

rāma sukīrati bhaniti bhadesā। asamaṃjasa asa mohi a~desā॥

तुम्हरी कृपा सुलभ सोउ मोरे। सिअनि सुहावनि टाट पटोरे।।

tumharī kṛpā sulabha sou more। siani suhāvani ṭāṭa paṭore॥

सरल कबित कीरति बिमल सोइ आदरहिं सुजान।

sarala kabita kīrati bimala soi ādarahiṃ sujāna।

सहज बयर बिसराइ रिपु जो सुनि करहिं बखान।।14(क)।।

sahaja bayara bisarāi ripu jo suni karahiṃ bakhāna॥14(ka)॥

सो न होइ बिनु बिमल मति मोहि मति बल अति थोर।

so na hoi binu bimala mati mohi mati bala ati thora।

करहु कृपा हरि जस कहउँ पुनि पुनि करउँ निहोर।।14(ख)।।

karahu kṛpā hari jasa kahau~ puni puni karau~ nihora॥14(kha)॥

कबि कोबिद रघुबर चरित मानस मंजु मराल।

kabi kobida raghubara carita mānasa maṃju marāla।

बाल बिनय सुनि सुरुचि लखि मोपर होहु कृपाल।।14(ग)।।

bāla binaya suni suruci lakhi mopara hohu kṛpāla॥14(ga)॥

बंदउँ मुनि पद कंजु रामायन जेहिं निरमयउ।

baṃdau~ muni pada kaṃju rāmāyana jehiṃ niramayau।

सखर सुकोमल मंजु दोष रहित दूषन सहित।।14(घ)।।

sakhara sukomala maṃju doṣa rahita dūṣana sahita॥14(gha)॥

बंदउँ चारिउ बेद भव बारिधि बोहित सरिस।

baṃdau~ cāriu beda bhava bāridhi bohita sarisa।

जिन्हहि न सपनेहुँ खेद बरनत रघुबर बिसद जसु।।14(ङ)।।

jinhahi na sapanehu~ kheda baranata raghubara bisada jasu॥14(ṅa)॥

बंदउँ बिधि पद रेनु भव सागर जेहि कीन्ह जहँ।

baṃdau~ bidhi pada renu bhava sāgara jehi kīnha jaha~।

संत सुधा ससि धेनु प्रगटे खल बिष बारुनी।।14(च)।।

saṃta sudhā sasi dhenu pragaṭe khala biṣa bārunī॥14(ca)॥

बिबुध बिप्र बुध ग्रह चरन बंदि कहउँ कर जोरि।

bibudha bipra budha graha carana baṃdi kahau~ kara jori।

होइ प्रसन्न पुरवहु सकल मंजु मनोरथ मोरि।।14(छ)।।

hoi prasanna puravahu sakala maṃju manoratha mori॥14(cha)॥

पुनि बंदउँ सारद सुरसरिता। जुगल पुनीत मनोहर चरिता।।

puni baṃdau~ sārada surasaritā। jugala punīta manohara caritā॥

मज्जन पान पाप हर एका। कहत सुनत एक हर अबिबेका।।

majjana pāna pāpa hara ekā। kahata sunata eka hara abibekā॥

गुर पितु मातु महेस भवानी। प्रनवउँ दीनबंधु दिन दानी।।

gura pitu mātu mahesa bhavānī। pranavau~ dīnabaṃdhu dina dānī॥

सेवक स्वामि सखा सिय पी के। हित निरुपधि सब बिधि तुलसीके।।

sevaka svāmi sakhā siya pī ke। hita nirupadhi saba bidhi tulasīke॥

कलि बिलोकि जग हित हर गिरिजा। साबर मंत्र जाल जिन्ह सिरिजा।।

kali biloki jaga hita hara girijā। sābara maṃtra jāla jinha sirijā॥

अनमिल आखर अरथ न जापू। प्रगट प्रभाउ महेस प्रतापू।।

anamila ākhara aratha na jāpū। pragaṭa prabhāu mahesa pratāpū॥

सो उमेस मोहि पर अनुकूला। करिहिं कथा मुद मंगल मूला।।

so umesa mohi para anukūlā। karihiṃ kathā muda maṃgala mūlā॥

सुमिरि सिवा सिव पाइ पसाऊ। बरनउँ रामचरित चित चाऊ।।

sumiri sivā siva pāi pasāū। baranau~ rāmacarita cita cāū॥

भनिति मोरि सिव कृपाँ बिभाती। ससि समाज मिलि मनहुँ सुराती।।

bhaniti mori siva kṛpā~ bibhātī। sasi samāja mili manahu~ surātī॥

जे एहि कथहि सनेह समेता। कहिहहिं सुनिहहिं समुझि सचेता।।

je ehi kathahi saneha sametā। kahihahiṃ sunihahiṃ samujhi sacetā॥

होइहहिं राम चरन अनुरागी। कलि मल रहित सुमंगल भागी।।

hoihahiṃ rāma carana anurāgī। kali mala rahita sumaṃgala bhāgī॥

सपनेहुँ साचेहुँ मोहि पर जौं हर गौरि पसाउ।

sapanehu~ sācehu~ mohi para jauṃ hara gauri pasāu।

तौ फुर होउ जो कहेउँ सब भाषा भनिति प्रभाउ।।15।।

tau phura hou jo kaheu~ saba bhāṣā bhaniti prabhāu॥15॥

बंदउँ अवध पुरी अति पावनि। सरजू सरि कलि कलुष नसावनि।।

baṃdau~ avadha purī ati pāvani। sarajū sari kali kaluṣa nasāvani॥

प्रनवउँ पुर नर नारि बहोरी। ममता जिन्ह पर प्रभुहि न थोरी।।

pranavau~ pura nara nāri bahorī। mamatā jinha para prabhuhi na thorī॥

सिय निंदक अघ ओघ नसाए। लोक बिसोक बनाइ बसाए।।

siya niṃdaka agha ogha nasāe। loka bisoka banāi basāe॥

बंदउँ कौसल्या दिसि प्राची। कीरति जासु सकल जग माची।।

baṃdau~ kausalyā disi prācī। kīrati jāsu sakala jaga mācī॥

प्रगटेउ जहँ रघुपति ससि चारू। बिस्व सुखद खल कमल तुसारू।।

pragaṭeu jaha~ raghupati sasi cārū। bisva sukhada khala kamala tusārū॥

दसरथ राउ सहित सब रानी। सुकृत सुमंगल मूरति मानी।।

dasaratha rāu sahita saba rānī। sukṛta sumaṃgala mūrati mānī॥

करउँ प्रनाम करम मन बानी। करहु कृपा सुत सेवक जानी।।

karau~ pranāma karama mana bānī। karahu kṛpā suta sevaka jānī॥

जिन्हहि बिरचि बड़ भयउ बिधाता। महिमा अवधि राम पितु माता।।

jinhahi biraci bar̤a bhayau bidhātā। mahimā avadhi rāma pitu mātā॥

बंदउँ अवध भुआल सत्य प्रेम जेहि राम पद।

baṃdau~ avadha bhuāla satya prema jehi rāma pada।

बिछुरत दीनदयाल प्रिय तनु तृन इव परिहरेउ।।16।।

bichurata dīnadayāla priya tanu tṛna iva parihareu॥16॥

प्रनवउँ परिजन सहित बिदेहू। जाहि राम पद गूढ़ सनेहू।।

pranavau~ parijana sahita bidehū। jāhi rāma pada gūr̤ha sanehū॥

जोग भोग महँ राखेउ गोई। राम बिलोकत प्रगटेउ सोई।।

joga bhoga maha~ rākheu goī। rāma bilokata pragaṭeu soī॥

प्रनवउँ प्रथम भरत के चरना। जासु नेम ब्रत जाइ न बरना।।

pranavau~ prathama bharata ke caranā। jāsu nema brata jāi na baranā॥

राम चरन पंकज मन जासू। लुबुध मधुप इव तजइ न पासू।।

rāma carana paṃkaja mana jāsū। lubudha madhupa iva tajai na pāsū॥

बंदउँ लछिमन पद जलजाता। सीतल सुभग भगत सुख दाता।।

baṃdau~ lachimana pada jalajātā। sītala subhaga bhagata sukha dātā॥

रघुपति कीरति बिमल पताका। दंड समान भयउ जस जाका।।

raghupati kīrati bimala patākā। daṃḍa samāna bhayau jasa jākā॥

सेष सहस्त्रसीस जग कारन। जो अवतरेउ भूमि भय टारन।।

seṣa sahastrasīsa jaga kārana। jo avatareu bhūmi bhaya ṭārana॥

सदा सो सानुकूल रह मो पर। कृपासिंधु सौमित्रि गुनाकर।।

sadā so sānukūla raha mo para। kṛpāsiṃdhu saumitri gunākara॥

रिपुसूदन पद कमल नमामी। सूर सुसील भरत अनुगामी।।

ripusūdana pada kamala namāmī। sūra susīla bharata anugāmī॥

महावीर बिनवउँ हनुमाना। राम जासु जस आप बखाना।।

mahāvīra binavau~ hanumānā। rāma jāsu jasa āpa bakhānā॥

प्रनवउँ पवनकुमार खल बन पावक ग्यानधन।

pranavau~ pavanakumāra khala bana pāvaka gyānadhana।

जासु हृदय आगार बसहिं राम सर चाप धर।।17।।

jāsu hṛdaya āgāra basahiṃ rāma sara cāpa dhara॥17॥

कपिपति रीछ निसाचर राजा। अंगदादि जे कीस समाजा।।

kapipati rīcha nisācara rājā। aṃgadādi je kīsa samājā॥

बंदउँ सब के चरन सुहाए। अधम सरीर राम जिन्ह पाए।।

baṃdau~ saba ke carana suhāe। adhama sarīra rāma jinha pāe॥

रघुपति चरन उपासक जेते। खग मृग सुर नर असुर समेते।।

raghupati carana upāsaka jete। khaga mṛga sura nara asura samete॥

बंदउँ पद सरोज सब केरे। जे बिनु काम राम के चेरे।।

baṃdau~ pada saroja saba kere। je binu kāma rāma ke cere॥

सुक सनकादि भगत मुनि नारद। जे मुनिबर बिग्यान बिसारद।।

suka sanakādi bhagata muni nārada। je munibara bigyāna bisārada॥

प्रनवउँ सबहिं धरनि धरि सीसा। करहु कृपा जन जानि मुनीसा।।

pranavau~ sabahiṃ dharani dhari sīsā। karahu kṛpā jana jāni munīsā॥

जनकसुता जग जननि जानकी। अतिसय प्रिय करुना निधान की।।

janakasutā jaga janani jānakī। atisaya priya karunā nidhāna kī॥

ताके जुग पद कमल मनावउँ। जासु कृपाँ निरमल मति पावउँ।।

tāke juga pada kamala manāvau~। jāsu kṛpā~ niramala mati pāvau~॥

पुनि मन बचन कर्म रघुनायक। चरन कमल बंदउँ सब लायक।।

puni mana bacana karma raghunāyaka। carana kamala baṃdau~ saba lāyaka॥

राजिवनयन धरें धनु सायक। भगत बिपति भंजन सुख दायक।।

rājivanayana dhareṃ dhanu sāyaka। bhagata bipati bhaṃjana sukha dāyaka॥

गिरा अरथ जल बीचि सम कहिअत भिन्न न भिन्न।

girā aratha jala bīci sama kahiata bhinna na bhinna।

बदउँ सीता राम पद जिन्हहि परम प्रिय खिन्न।।18।।

badau~ sītā rāma pada jinhahi parama priya khinna॥18॥

बंदउँ नाम राम रघुवर को। हेतु कृसानु भानु हिमकर को।।

baṃdau~ nāma rāma raghuvara ko। hetu kṛsānu bhānu himakara ko॥

बिधि हरि हरमय बेद प्रान सो। अगुन अनूपम गुन निधान सो।।

bidhi hari haramaya beda prāna so। aguna anūpama guna nidhāna so॥

महामंत्र जोइ जपत महेसू। कासीं मुकुति हेतु उपदेसू।।

mahāmaṃtra joi japata mahesū। kāsīṃ mukuti hetu upadesū॥

महिमा जासु जान गनराउ। प्रथम पूजिअत नाम प्रभाऊ।।

mahimā jāsu jāna ganarāu। prathama pūjiata nāma prabhāū॥

जान आदिकबि नाम प्रतापू। भयउ सुद्ध करि उलटा जापू।।

jāna ādikabi nāma pratāpū। bhayau suddha kari ulaṭā jāpū॥

सहस नाम सम सुनि सिव बानी। जपि जेई पिय संग भवानी।।

sahasa nāma sama suni siva bānī। japi jeī piya saṃga bhavānī॥

हरषे हेतु हेरि हर ही को। किय भूषन तिय भूषन ती को।।

haraṣe hetu heri hara hī ko। kiya bhūṣana tiya bhūṣana tī ko॥

नाम प्रभाउ जान सिव नीको। कालकूट फलु दीन्ह अमी को।।

nāma prabhāu jāna siva nīko। kālakūṭa phalu dīnha amī ko॥

बरषा रितु रघुपति भगति तुलसी सालि सुदास।।

baraṣā ritu raghupati bhagati tulasī sāli sudāsa॥

राम नाम बर बरन जुग सावन भादव मास।।19।।

rāma nāma bara barana juga sāvana bhādava māsa॥19॥

आखर मधुर मनोहर दोऊ। बरन बिलोचन जन जिय जोऊ।।

ākhara madhura manohara doū। barana bilocana jana jiya joū॥

सुमिरत सुलभ सुखद सब काहू। लोक लाहु परलोक निबाहू।।

sumirata sulabha sukhada saba kāhū। loka lāhu paraloka nibāhū॥

कहत सुनत सुमिरत सुठि नीके। राम लखन सम प्रिय तुलसी के।।

kahata sunata sumirata suṭhi nīke। rāma lakhana sama priya tulasī ke॥

बरनत बरन प्रीति बिलगाती। ब्रह्म जीव सम सहज सँघाती।।

baranata barana prīti bilagātī। brahma jīva sama sahaja sa~ghātī॥

नर नारायन सरिस सुभ्राता। जग पालक बिसेषि जन त्राता।।

nara nārāyana sarisa subhrātā। jaga pālaka biseṣi jana trātā॥

भगति सुतिय कल करन बिभूषन। जग हित हेतु बिमल बिधु पूषन ।

bhagati sutiya kala karana bibhūṣana। jaga hita hetu bimala bidhu pūṣana ।

स्वाद तोष सम सुगति सुधा के। कमठ सेष सम धर बसुधा के।।

svāda toṣa sama sugati sudhā ke। kamaṭha seṣa sama dhara basudhā ke॥

जन मन मंजु कंज मधुकर से। जीह जसोमति हरि हलधर से।।

jana mana maṃju kaṃja madhukara se। jīha jasomati hari haladhara se॥

एकु छत्रु एकु मुकुटमनि सब बरननि पर जोउ।

eku chatru eku mukuṭamani saba baranani para jou।

तुलसी रघुबर नाम के बरन बिराजत दोउ।।20।।

tulasī raghubara nāma ke barana birājata dou॥20॥

समुझत सरिस नाम अरु नामी। प्रीति परसपर प्रभु अनुगामी।।

samujhata sarisa nāma aru nāmī। prīti parasapara prabhu anugāmī॥

नाम रूप दुइ ईस उपाधी। अकथ अनादि सुसामुझि साधी।।

nāma rūpa dui īsa upādhī। akatha anādi susāmujhi sādhī॥

को बड़ छोट कहत अपराधू। सुनि गुन भेद समुझिहहिं साधू।।

ko bar̤a choṭa kahata aparādhū। suni guna bheda samujhihahiṃ sādhū॥

देखिअहिं रूप नाम आधीना। रूप ग्यान नहिं नाम बिहीना।।

dekhiahiṃ rūpa nāma ādhīnā। rūpa gyāna nahiṃ nāma bihīnā॥

रूप बिसेष नाम बिनु जानें। करतल गत न परहिं पहिचानें।।

rūpa biseṣa nāma binu jāneṃ। karatala gata na parahiṃ pahicāneṃ॥

सुमिरिअ नाम रूप बिनु देखें। आवत हृदयँ सनेह बिसेषें।।

sumiria nāma rūpa binu dekheṃ। āvata hṛdaya~ saneha biseṣeṃ॥

नाम रूप गति अकथ कहानी। समुझत सुखद न परति बखानी।।

nāma rūpa gati akatha kahānī। samujhata sukhada na parati bakhānī॥

अगुन सगुन बिच नाम सुसाखी। उभय प्रबोधक चतुर दुभाषी।।

aguna saguna bica nāma susākhī। ubhaya prabodhaka catura dubhāṣī॥

राम नाम मनिदीप धरु जीह देहरी द्वार।

rāma nāma manidīpa dharu jīha deharī dvāra।

तुलसी भीतर बाहेरहुँ जौं चाहसि उजिआर।।21।।

tulasī bhītara bāherahu~ jauṃ cāhasi ujiāra॥21॥

नाम जीहँ जपि जागहिं जोगी। बिरति बिरंचि प्रपंच बियोगी।।

nāma jīha~ japi jāgahiṃ jogī। birati biraṃci prapaṃca biyogī॥

ब्रह्मसुखहि अनुभवहिं अनूपा। अकथ अनामय नाम न रूपा।।

brahmasukhahi anubhavahiṃ anūpā। akatha anāmaya nāma na rūpā॥

जाना चहहिं गूढ़ गति जेऊ। नाम जीहँ जपि जानहिं तेऊ।।

jānā cahahiṃ gūr̤ha gati jeū। nāma jīha~ japi jānahiṃ teū॥

साधक नाम जपहिं लय लाएँ। होहिं सिद्ध अनिमादिक पाएँ।।

sādhaka nāma japahiṃ laya lāe~। hohiṃ siddha animādika pāe~॥

जपहिं नामु जन आरत भारी। मिटहिं कुसंकट होहिं सुखारी।।

japahiṃ nāmu jana ārata bhārī। miṭahiṃ kusaṃkaṭa hohiṃ sukhārī॥

राम भगत जग चारि प्रकारा। सुकृती चारिउ अनघ उदारा।।

rāma bhagata jaga cāri prakārā। sukṛtī cāriu anagha udārā॥

चहू चतुर कहुँ नाम अधारा। ग्यानी प्रभुहि बिसेषि पिआरा।।

cahū catura kahu~ nāma adhārā। gyānī prabhuhi biseṣi piārā॥

चहुँ जुग चहुँ श्रुति ना प्रभाऊ। कलि बिसेषि नहिं आन उपाऊ।।

cahu~ juga cahu~ śruti nā prabhāū। kali biseṣi nahiṃ āna upāū॥

सकल कामना हीन जे राम भगति रस लीन।

sakala kāmanā hīna je rāma bhagati rasa līna।

नाम सुप्रेम पियूष हद तिन्हहुँ किए मन मीन।।22।।

nāma suprema piyūṣa hada tinhahu~ kie mana mīna॥22॥

अगुन सगुन दुइ ब्रह्म सरूपा। अकथ अगाध अनादि अनूपा।।

aguna saguna dui brahma sarūpā। akatha agādha anādi anūpā॥

मोरें मत बड़ नामु दुहू तें। किए जेहिं जुग निज बस निज बूतें।।

moreṃ mata bar̤a nāmu duhū teṃ। kie jehiṃ juga nija basa nija būteṃ॥

प्रोढ़ि सुजन जनि जानहिं जन की। कहउँ प्रतीति प्रीति रुचि मन की।।

pror̤hi sujana jani jānahiṃ jana kī। kahau~ pratīti prīti ruci mana kī॥

एकु दारुगत देखिअ एकू। पावक सम जुग ब्रह्म बिबेकू।।

eku dārugata dekhia ekū। pāvaka sama juga brahma bibekū॥

उभय अगम जुग सुगम नाम तें। कहेउँ नामु बड़ ब्रह्म राम तें।।

ubhaya agama juga sugama nāma teṃ। kaheu~ nāmu bar̤a brahma rāma teṃ॥

ब्यापकु एकु ब्रह्म अबिनासी। सत चेतन धन आनँद रासी।।

byāpaku eku brahma abināsī। sata cetana dhana āna~da rāsī॥

अस प्रभु हृदयँ अछत अबिकारी। सकल जीव जग दीन दुखारी।।

asa prabhu hṛdaya~ achata abikārī। sakala jīva jaga dīna dukhārī॥

नाम निरूपन नाम जतन तें। सोउ प्रगटत जिमि मोल रतन तें।।

nāma nirūpana nāma jatana teṃ। sou pragaṭata jimi mola ratana teṃ॥

निरगुन तें एहि भाँति बड़ नाम प्रभाउ अपार।

niraguna teṃ ehi bhā~ti bar̤a nāma prabhāu apāra।

कहउँ नामु बड़ राम तें निज बिचार अनुसार।।23।।

kahau~ nāmu bar̤a rāma teṃ nija bicāra anusāra॥23॥

राम भगत हित नर तनु धारी। सहि संकट किए साधु सुखारी।।

rāma bhagata hita nara tanu dhārī। sahi saṃkaṭa kie sādhu sukhārī॥

नामु सप्रेम जपत अनयासा। भगत होहिं मुद मंगल बासा।।

nāmu saprema japata anayāsā। bhagata hohiṃ muda maṃgala bāsā॥

राम एक तापस तिय तारी। नाम कोटि खल कुमति सुधारी।।

rāma eka tāpasa tiya tārī। nāma koṭi khala kumati sudhārī॥

रिषि हित राम सुकेतुसुता की। सहित सेन सुत कीन्ह बिबाकी।।

riṣi hita rāma suketusutā kī। sahita sena suta kīnha bibākī॥

सहित दोष दुख दास दुरासा। दलइ नामु जिमि रबि निसि नासा।।

sahita doṣa dukha dāsa durāsā। dalai nāmu jimi rabi nisi nāsā॥

भंजेउ राम आपु भव चापू। भव भय भंजन नाम प्रतापू।।

bhaṃjeu rāma āpu bhava cāpū। bhava bhaya bhaṃjana nāma pratāpū॥

दंडक बनु प्रभु कीन्ह सुहावन। जन मन अमित नाम किए पावन।।।

daṃḍaka banu prabhu kīnha suhāvana। jana mana amita nāma kie pāvana॥।

निसिचर निकर दले रघुनंदन। नामु सकल कलि कलुष निकंदन।।

nisicara nikara dale raghunaṃdana। nāmu sakala kali kaluṣa nikaṃdana॥

सबरी गीध सुसेवकनि सुगति दीन्हि रघुनाथ।

sabarī gīdha susevakani sugati dīnhi raghunātha।

नाम उधारे अमित खल बेद बिदित गुन गाथ।।24।।

nāma udhāre amita khala beda bidita guna gātha॥24॥

राम सुकंठ बिभीषन दोऊ। राखे सरन जान सबु कोऊ।।

rāma sukaṃṭha bibhīṣana doū। rākhe sarana jāna sabu koū॥

नाम गरीब अनेक नेवाजे। लोक बेद बर बिरिद बिराजे।।

nāma garība aneka nevāje। loka beda bara birida birāje॥

राम भालु कपि कटकु बटोरा। सेतु हेतु श्रमु कीन्ह न थोरा।।

rāma bhālu kapi kaṭaku baṭorā। setu hetu śramu kīnha na thorā॥

नामु लेत भवसिंधु सुखाहीं। करहु बिचारु सुजन मन माहीं।।

nāmu leta bhavasiṃdhu sukhāhīṃ। karahu bicāru sujana mana māhīṃ॥

राम सकुल रन रावनु मारा। सीय सहित निज पुर पगु धारा।।

rāma sakula rana rāvanu mārā। sīya sahita nija pura pagu dhārā॥

राजा रामु अवध रजधानी। गावत गुन सुर मुनि बर बानी।।

rājā rāmu avadha rajadhānī। gāvata guna sura muni bara bānī॥

सेवक सुमिरत नामु सप्रीती। बिनु श्रम प्रबल मोह दलु जीती।।

sevaka sumirata nāmu saprītī। binu śrama prabala moha dalu jītī॥

फिरत सनेहँ मगन सुख अपनें। नाम प्रसाद सोच नहिं सपनें।।

phirata saneha~ magana sukha apaneṃ। nāma prasāda soca nahiṃ sapaneṃ॥

ब्रह्म राम तें नामु बड़ बर दायक बर दानि।

brahma rāma teṃ nāmu bar̤a bara dāyaka bara dāni।

रामचरित सत कोटि महँ लिय महेस जियँ जानि।।25।।

rāmacarita sata koṭi maha~ liya mahesa jiya~ jāni॥25॥

नाम प्रसाद संभु अबिनासी। साजु अमंगल मंगल रासी।।

nāma prasāda saṃbhu abināsī। sāju amaṃgala maṃgala rāsī॥

सुक सनकादि सिद्ध मुनि जोगी। नाम प्रसाद ब्रह्मसुख भोगी।।

suka sanakādi siddha muni jogī। nāma prasāda brahmasukha bhogī॥

नारद जानेउ नाम प्रतापू। जग प्रिय हरि हरि हर प्रिय आपू।।

nārada jāneu nāma pratāpū। jaga priya hari hari hara priya āpū॥

नामु जपत प्रभु कीन्ह प्रसादू। भगत सिरोमनि भे प्रहलादू।।

nāmu japata prabhu kīnha prasādū। bhagata siromani bhe prahalādū॥

ध्रुवँ सगलानि जपेउ हरि नाऊँ। पायउ अचल अनूपम ठाऊँ।।

dhruva~ sagalāni japeu hari nāū~। pāyau acala anūpama ṭhāū~॥

सुमिरि पवनसुत पावन नामू। अपने बस करि राखे रामू।।

sumiri pavanasuta pāvana nāmū। apane basa kari rākhe rāmū॥

अपतु अजामिलु गजु गनिकाऊ। भए मुकुत हरि नाम प्रभाऊ।।

apatu ajāmilu gaju ganikāū। bhae mukuta hari nāma prabhāū॥

कहौं कहाँ लगि नाम बड़ाई। रामु न सकहिं नाम गुन गाई।।

kahauṃ kahā~ lagi nāma bar̤āī। rāmu na sakahiṃ nāma guna gāī॥

नामु राम को कलपतरु कलि कल्यान निवासु।

nāmu rāma ko kalapataru kali kalyāna nivāsu।

जो सुमिरत भयो भाँग तें तुलसी तुलसीदासु।।26।।

jo sumirata bhayo bhā~ga teṃ tulasī tulasīdāsu॥26॥

चहुँ जुग तीनि काल तिहुँ लोका। भए नाम जपि जीव बिसोका।।

cahu~ juga tīni kāla tihu~ lokā। bhae nāma japi jīva bisokā॥

बेद पुरान संत मत एहू। सकल सुकृत फल राम सनेहू।।

beda purāna saṃta mata ehū। sakala sukṛta phala rāma sanehū॥

ध्यानु प्रथम जुग मखबिधि दूजें। द्वापर परितोषत प्रभु पूजें।।

dhyānu prathama juga makhabidhi dūjeṃ। dvāpara paritoṣata prabhu pūjeṃ॥

कलि केवल मल मूल मलीना। पाप पयोनिधि जन मन मीना।।

kali kevala mala mūla malīnā। pāpa payonidhi jana mana mīnā॥

नाम कामतरु काल कराला। सुमिरत समन सकल जग जाला।।

nāma kāmataru kāla karālā। sumirata samana sakala jaga jālā॥

राम नाम कलि अभिमत दाता। हित परलोक लोक पितु माता।।

rāma nāma kali abhimata dātā। hita paraloka loka pitu mātā॥

नहिं कलि करम न भगति बिबेकू। राम नाम अवलंबन एकू।।

nahiṃ kali karama na bhagati bibekū। rāma nāma avalaṃbana ekū॥

कालनेमि कलि कपट निधानू। नाम सुमति समरथ हनुमानू।।

kālanemi kali kapaṭa nidhānū। nāma sumati samaratha hanumānū॥

राम नाम नरकेसरी कनककसिपु कलिकाल।

rāma nāma narakesarī kanakakasipu kalikāla।

जापक जन प्रहलाद जिमि पालिहि दलि सुरसाल।।27।।

jāpaka jana prahalāda jimi pālihi dali surasāla॥27॥

भायँ कुभायँ अनख आलसहूँ। नाम जपत मंगल दिसि दसहूँ।।

bhāya~ kubhāya~ anakha ālasahū~। nāma japata maṃgala disi dasahū~॥

सुमिरि सो नाम राम गुन गाथा। करउँ नाइ रघुनाथहि माथा।।

sumiri so nāma rāma guna gāthā। karau~ nāi raghunāthahi māthā॥

मोरि सुधारिहि सो सब भाँती। जासु कृपा नहिं कृपाँ अघाती।।

mori sudhārihi so saba bhā~tī। jāsu kṛpā nahiṃ kṛpā~ aghātī॥

राम सुस्वामि कुसेवकु मोसो। निज दिसि दैखि दयानिधि पोसो।।

rāma susvāmi kusevaku moso। nija disi daikhi dayānidhi poso॥

लोकहुँ बेद सुसाहिब रीतीं। बिनय सुनत पहिचानत प्रीती।।

lokahu~ beda susāhiba rītīṃ। binaya sunata pahicānata prītī॥

गनी गरीब ग्रामनर नागर। पंडित मूढ़ मलीन उजागर।।

ganī garība grāmanara nāgara। paṃḍita mūr̤ha malīna ujāgara॥

सुकबि कुकबि निज मति अनुहारी। नृपहि सराहत सब नर नारी।।

sukabi kukabi nija mati anuhārī। nṛpahi sarāhata saba nara nārī॥

साधु सुजान सुसील नृपाला। ईस अंस भव परम कृपाला।।

sādhu sujāna susīla nṛpālā। īsa aṃsa bhava parama kṛpālā॥

सुनि सनमानहिं सबहि सुबानी। भनिति भगति नति गति पहिचानी।।

suni sanamānahiṃ sabahi subānī। bhaniti bhagati nati gati pahicānī॥

यह प्राकृत महिपाल सुभाऊ। जान सिरोमनि कोसलराऊ।।

yaha prākṛta mahipāla subhāū। jāna siromani kosalarāū॥

रीझत राम सनेह निसोतें। को जग मंद मलिनमति मोतें।।

rījhata rāma saneha nisoteṃ। ko jaga maṃda malinamati moteṃ॥

सठ सेवक की प्रीति रुचि रखिहहिं राम कृपालु।

saṭha sevaka kī prīti ruci rakhihahiṃ rāma kṛpālu।

उपल किए जलजान जेहिं सचिव सुमति कपि भालु।।28(क)।।

upala kie jalajāna jehiṃ saciva sumati kapi bhālu॥28(ka)॥

हौहु कहावत सबु कहत राम सहत उपहास।

hauhu kahāvata sabu kahata rāma sahata upahāsa।

साहिब सीतानाथ सो सेवक तुलसीदास।।28(ख)।।

sāhiba sītānātha so sevaka tulasīdāsa॥28(kha)॥

अति बड़ि मोरि ढिठाई खोरी। सुनि अघ नरकहुँ नाक सकोरी।।

ati bar̤i mori ḍhiṭhāī khorī। suni agha narakahu~ nāka sakorī॥

समुझि सहम मोहि अपडर अपनें। सो सुधि राम कीन्हि नहिं सपनें।।

samujhi sahama mohi apaḍara apaneṃ। so sudhi rāma kīnhi nahiṃ sapaneṃ॥

सुनि अवलोकि सुचित चख चाही। भगति मोरि मति स्वामि सराही।।

suni avaloki sucita cakha cāhī। bhagati mori mati svāmi sarāhī॥

कहत नसाइ होइ हियँ नीकी। रीझत राम जानि जन जी की।।

kahata nasāi hoi hiya~ nīkī। rījhata rāma jāni jana jī kī॥

रहति न प्रभु चित चूक किए की। करत सुरति सय बार हिए की।।

rahati na prabhu cita cūka kie kī। karata surati saya bāra hie kī॥

जेहिं अघ बधेउ ब्याध जिमि बाली। फिरि सुकंठ सोइ कीन्ह कुचाली।।

jehiṃ agha badheu byādha jimi bālī। phiri sukaṃṭha soi kīnha kucālī॥

सोइ करतूति बिभीषन केरी। सपनेहुँ सो न राम हियँ हेरी।।

soi karatūti bibhīṣana kerī। sapanehu~ so na rāma hiya~ herī॥

ते भरतहि भेंटत सनमाने। राजसभाँ रघुबीर बखाने।।

te bharatahi bheṃṭata sanamāne। rājasabhā~ raghubīra bakhāne॥

प्रभु तरु तर कपि डार पर ते किए आपु समान।।

prabhu taru tara kapi ḍāra para te kie āpu samāna॥

तुलसी कहूँ न राम से साहिब सीलनिधान।।29(क)।।

tulasī kahū~ na rāma se sāhiba sīlanidhāna॥29(ka)॥

राम निकाईं रावरी है सबही को नीक।

rāma nikāīṃ rāvarī hai sabahī ko nīka।

जों यह साँची है सदा तौ नीको तुलसीक।।29(ख)।।

joṃ yaha sā~cī hai sadā tau nīko tulasīka॥29(kha)॥

एहि बिधि निज गुन दोष कहि सबहि बहुरि सिरु नाइ।

ehi bidhi nija guna doṣa kahi sabahi bahuri siru nāi।

बरनउँ रघुबर बिसद जसु सुनि कलि कलुष नसाइ।।29(ग)।।

baranau~ raghubara bisada jasu suni kali kaluṣa nasāi॥29(ga)॥

जागबलिक जो कथा सुहाई। भरद्वाज मुनिबरहि सुनाई।।

jāgabalika jo kathā suhāī। bharadvāja munibarahi sunāī॥

कहिहउँ सोइ संबाद बखानी। सुनहुँ सकल सज्जन सुखु मानी।।

kahihau~ soi saṃbāda bakhānī। sunahu~ sakala sajjana sukhu mānī॥

संभु कीन्ह यह चरित सुहावा। बहुरि कृपा करि उमहि सुनावा।।

saṃbhu kīnha yaha carita suhāvā। bahuri kṛpā kari umahi sunāvā॥

सोइ सिव कागभुसुंडिहि दीन्हा। राम भगत अधिकारी चीन्हा।।

soi siva kāgabhusuṃḍihi dīnhā। rāma bhagata adhikārī cīnhā॥

तेहि सन जागबलिक पुनि पावा। तिन्ह पुनि भरद्वाज प्रति गावा।।

tehi sana jāgabalika puni pāvā। tinha puni bharadvāja prati gāvā॥

ते श्रोता बकता समसीला। सवँदरसी जानहिं हरिलीला।।

te śrotā bakatā samasīlā। sava~darasī jānahiṃ harilīlā॥

जानहिं तीनि काल निज ग्याना। करतल गत आमलक समाना।।

jānahiṃ tīni kāla nija gyānā। karatala gata āmalaka samānā॥

औरउ जे हरिभगत सुजाना। कहहिं सुनहिं समुझहिं बिधि नाना।।

aurau je haribhagata sujānā। kahahiṃ sunahiṃ samujhahiṃ bidhi nānā॥

मै पुनि निज गुर सन सुनी कथा सो सूकरखेत।

mai puni nija gura sana sunī kathā so sūkarakheta।

समुझी नहि तसि बालपन तब अति रहेउँ अचेत।।30(क)।।

samujhī nahi tasi bālapana taba ati raheu~ aceta॥30(ka)॥

श्रोता बकता ग्याननिधि कथा राम कै गूढ़।

śrotā bakatā gyānanidhi kathā rāma kai gūr̤ha।

किमि समुझौं मै जीव जड़ कलि मल ग्रसित बिमूढ़।।30(ख)।।

kimi samujhauṃ mai jīva jar̤a kali mala grasita bimūr̤ha॥30(kha)॥

तदपि कही गुर बारहिं बारा। समुझि परी कछु मति अनुसारा।।

tadapi kahī gura bārahiṃ bārā। samujhi parī kachu mati anusārā॥

भाषाबद्ध करबि मैं सोई। मोरें मन प्रबोध जेहिं होई।।

bhāṣābaddha karabi maiṃ soī। moreṃ mana prabodha jehiṃ hoī॥

जस कछु बुधि बिबेक बल मेरें। तस कहिहउँ हियँ हरि के प्रेरें।।

jasa kachu budhi bibeka bala mereṃ। tasa kahihau~ hiya~ hari ke prereṃ॥

निज संदेह मोह भ्रम हरनी। करउँ कथा भव सरिता तरनी।।

nija saṃdeha moha bhrama haranī। karau~ kathā bhava saritā taranī॥

बुध बिश्राम सकल जन रंजनि। रामकथा कलि कलुष बिभंजनि।।

budha biśrāma sakala jana raṃjani। rāmakathā kali kaluṣa bibhaṃjani॥

रामकथा कलि पंनग भरनी। पुनि बिबेक पावक कहुँ अरनी।।

rāmakathā kali paṃnaga bharanī। puni bibeka pāvaka kahu~ aranī॥

रामकथा कलि कामद गाई। सुजन सजीवनि मूरि सुहाई।।

rāmakathā kali kāmada gāī। sujana sajīvani mūri suhāī॥

सोइ बसुधातल सुधा तरंगिनि। भय भंजनि भ्रम भेक भुअंगिनि।।

soi basudhātala sudhā taraṃgini। bhaya bhaṃjani bhrama bheka bhuaṃgini॥

असुर सेन सम नरक निकंदिनि। साधु बिबुध कुल हित गिरिनंदिनि।।

asura sena sama naraka nikaṃdini। sādhu bibudha kula hita girinaṃdini॥

संत समाज पयोधि रमा सी। बिस्व भार भर अचल छमा सी।।

saṃta samāja payodhi ramā sī। bisva bhāra bhara acala chamā sī॥

जम गन मुहँ मसि जग जमुना सी। जीवन मुकुति हेतु जनु कासी।।

jama gana muha~ masi jaga jamunā sī। jīvana mukuti hetu janu kāsī॥

रामहि प्रिय पावनि तुलसी सी। तुलसिदास हित हियँ हुलसी सी।।

rāmahi priya pāvani tulasī sī। tulasidāsa hita hiya~ hulasī sī॥

सिवप्रय मेकल सैल सुता सी। सकल सिद्धि सुख संपति रासी।।

sivapraya mekala saila sutā sī। sakala siddhi sukha saṃpati rāsī॥

सदगुन सुरगन अंब अदिति सी। रघुबर भगति प्रेम परमिति सी।।

sadaguna suragana aṃba aditi sī। raghubara bhagati prema paramiti sī॥

राम कथा मंदाकिनी चित्रकूट चित चारु।

rāma kathā maṃdākinī citrakūṭa cita cāru।

तुलसी सुभग सनेह बन सिय रघुबीर बिहारु।।31।।

tulasī subhaga saneha bana siya raghubīra bihāru॥31॥

राम चरित चिंतामनि चारू। संत सुमति तिय सुभग सिंगारू।।

rāma carita ciṃtāmani cārū। saṃta sumati tiya subhaga siṃgārū॥

जग मंगल गुन ग्राम राम के। दानि मुकुति धन धरम धाम के।।

jaga maṃgala guna grāma rāma ke। dāni mukuti dhana dharama dhāma ke॥

सदगुर ग्यान बिराग जोग के। बिबुध बैद भव भीम रोग के।।

sadagura gyāna birāga joga ke। bibudha baida bhava bhīma roga ke॥

जननि जनक सिय राम प्रेम के। बीज सकल ब्रत धरम नेम के।।

janani janaka siya rāma prema ke। bīja sakala brata dharama nema ke॥

समन पाप संताप सोक के। प्रिय पालक परलोक लोक के।।

samana pāpa saṃtāpa soka ke। priya pālaka paraloka loka ke॥

सचिव सुभट भूपति बिचार के। कुंभज लोभ उदधि अपार के।।

saciva subhaṭa bhūpati bicāra ke। kuṃbhaja lobha udadhi apāra ke॥

काम कोह कलिमल करिगन के। केहरि सावक जन मन बन के।।

kāma koha kalimala karigana ke। kehari sāvaka jana mana bana ke॥

अतिथि पूज्य प्रियतम पुरारि के। कामद घन दारिद दवारि के।।

atithi pūjya priyatama purāri ke। kāmada ghana dārida davāri ke॥

मंत्र महामनि बिषय ब्याल के। मेटत कठिन कुअंक भाल के।।

maṃtra mahāmani biṣaya byāla ke। meṭata kaṭhina kuaṃka bhāla ke॥

हरन मोह तम दिनकर कर से। सेवक सालि पाल जलधर से।।

harana moha tama dinakara kara se। sevaka sāli pāla jaladhara se॥

अभिमत दानि देवतरु बर से। सेवत सुलभ सुखद हरि हर से।।

abhimata dāni devataru bara se। sevata sulabha sukhada hari hara se॥

सुकबि सरद नभ मन उडगन से। रामभगत जन जीवन धन से।।

sukabi sarada nabha mana uḍagana se। rāmabhagata jana jīvana dhana se॥

सकल सुकृत फल भूरि भोग से। जग हित निरुपधि साधु लोग से।।

sakala sukṛta phala bhūri bhoga se। jaga hita nirupadhi sādhu loga se॥

सेवक मन मानस मराल से। पावक गंग तंरग माल से।।

sevaka mana mānasa marāla se। pāvaka gaṃga taṃraga māla se॥

कुपथ कुतरक कुचालि कलि कपट दंभ पाषंड।

kupatha kutaraka kucāli kali kapaṭa daṃbha pāṣaṃḍa।

दहन राम गुन ग्राम जिमि इंधन अनल प्रचंड।।32(क)।।

dahana rāma guna grāma jimi iṃdhana anala pracaṃḍa॥32(ka)॥

रामचरित राकेस कर सरिस सुखद सब काहु।

rāmacarita rākesa kara sarisa sukhada saba kāhu।

सज्जन कुमुद चकोर चित हित बिसेषि बड़ लाहु।।32(ख)।।

sajjana kumuda cakora cita hita biseṣi bar̤a lāhu॥32(kha)॥

कीन्हि प्रस्न जेहि भाँति भवानी। जेहि बिधि संकर कहा बखानी।।

kīnhi prasna jehi bhā~ti bhavānī। jehi bidhi saṃkara kahā bakhānī॥

सो सब हेतु कहब मैं गाई। कथाप्रबंध बिचित्र बनाई।।

so saba hetu kahaba maiṃ gāī। kathāprabaṃdha bicitra banāī॥

जेहि यह कथा सुनी नहिं होई। जनि आचरजु करैं सुनि सोई।।

jehi yaha kathā sunī nahiṃ hoī। jani ācaraju karaiṃ suni soī॥

कथा अलौकिक सुनहिं जे ग्यानी। नहिं आचरजु करहिं अस जानी।।

kathā alaukika sunahiṃ je gyānī। nahiṃ ācaraju karahiṃ asa jānī॥

रामकथा कै मिति जग नाहीं। असि प्रतीति तिन्ह के मन माहीं।।

rāmakathā kai miti jaga nāhīṃ। asi pratīti tinha ke mana māhīṃ॥

नाना भाँति राम अवतारा। रामायन सत कोटि अपारा।।

nānā bhā~ti rāma avatārā। rāmāyana sata koṭi apārā॥

कलपभेद हरिचरित सुहाए। भाँति अनेक मुनीसन्ह गाए।।

kalapabheda haricarita suhāe। bhā~ti aneka munīsanha gāe॥

करिअ न संसय अस उर आनी। सुनिअ कथा सारद रति मानी।।

karia na saṃsaya asa ura ānī। sunia kathā sārada rati mānī॥

राम अनंत अनंत गुन अमित कथा बिस्तार।

rāma anaṃta anaṃta guna amita kathā bistāra।

सुनि आचरजु न मानिहहिं जिन्ह कें बिमल बिचार।।33।।

suni ācaraju na mānihahiṃ jinha keṃ bimala bicāra॥33॥

एहि बिधि सब संसय करि दूरी। सिर धरि गुर पद पंकज धूरी।।

ehi bidhi saba saṃsaya kari dūrī। sira dhari gura pada paṃkaja dhūrī॥

पुनि सबही बिनवउँ कर जोरी। करत कथा जेहिं लाग न खोरी।।

puni sabahī binavau~ kara jorī। karata kathā jehiṃ lāga na khorī॥

सादर सिवहि नाइ अब माथा। बरनउँ बिसद राम गुन गाथा।।

sādara sivahi nāi aba māthā। baranau~ bisada rāma guna gāthā॥

संबत सोरह सै एकतीसा। करउँ कथा हरि पद धरि सीसा।।

saṃbata soraha sai ekatīsā। karau~ kathā hari pada dhari sīsā॥

नौमी भौम बार मधु मासा। अवधपुरीं यह चरित प्रकासा।।

naumī bhauma bāra madhu māsā। avadhapurīṃ yaha carita prakāsā॥

जेहि दिन राम जनम श्रुति गावहिं। तीरथ सकल तहाँ चलि आवहिं।।

jehi dina rāma janama śruti gāvahiṃ। tīratha sakala tahā~ cali āvahiṃ॥

असुर नाग खग नर मुनि देवा। आइ करहिं रघुनायक सेवा।।

asura nāga khaga nara muni devā। āi karahiṃ raghunāyaka sevā॥

जन्म महोत्सव रचहिं सुजाना। करहिं राम कल कीरति गाना।।

janma mahotsava racahiṃ sujānā। karahiṃ rāma kala kīrati gānā॥

मज्जहि सज्जन बृंद बहु पावन सरजू नीर।

majjahi sajjana bṛṃda bahu pāvana sarajū nīra।

जपहिं राम धरि ध्यान उर सुंदर स्याम सरीर।।34।।

japahiṃ rāma dhari dhyāna ura suṃdara syāma sarīra॥34॥

दरस परस मज्जन अरु पाना। हरइ पाप कह बेद पुराना।।

darasa parasa majjana aru pānā। harai pāpa kaha beda purānā॥

नदी पुनीत अमित महिमा अति। कहि न सकइ सारद बिमलमति।।

nadī punīta amita mahimā ati। kahi na sakai sārada bimalamati॥

राम धामदा पुरी सुहावनि। लोक समस्त बिदित अति पावनि।।

rāma dhāmadā purī suhāvani। loka samasta bidita ati pāvani॥

चारि खानि जग जीव अपारा। अवध तजे तनु नहि संसारा।।

cāri khāni jaga jīva apārā। avadha taje tanu nahi saṃsārā॥

सब बिधि पुरी मनोहर जानी। सकल सिद्धिप्रद मंगल खानी।।

saba bidhi purī manohara jānī। sakala siddhiprada maṃgala khānī॥

बिमल कथा कर कीन्ह अरंभा। सुनत नसाहिं काम मद दंभा।।

bimala kathā kara kīnha araṃbhā। sunata nasāhiṃ kāma mada daṃbhā॥

रामचरितमानस एहि नामा। सुनत श्रवन पाइअ बिश्रामा।।

rāmacaritamānasa ehi nāmā। sunata śravana pāia biśrāmā॥

मन करि विषय अनल बन जरई। होइ सुखी जौ एहिं सर परई।।

mana kari viṣaya anala bana jaraī। hoi sukhī jau ehiṃ sara paraī॥

रामचरितमानस मुनि भावन। बिरचेउ संभु सुहावन पावन।।

rāmacaritamānasa muni bhāvana। biraceu saṃbhu suhāvana pāvana॥

त्रिबिध दोष दुख दारिद दावन। कलि कुचालि कुलि कलुष नसावन।।

tribidha doṣa dukha dārida dāvana। kali kucāli kuli kaluṣa nasāvana॥

रचि महेस निज मानस राखा। पाइ सुसमउ सिवा सन भाषा।।

raci mahesa nija mānasa rākhā। pāi susamau sivā sana bhāṣā॥

तातें रामचरितमानस बर। धरेउ नाम हियँ हेरि हरषि हर।।

tāteṃ rāmacaritamānasa bara। dhareu nāma hiya~ heri haraṣi hara॥

कहउँ कथा सोइ सुखद सुहाई। सादर सुनहु सुजन मन लाई।।

kahau~ kathā soi sukhada suhāī। sādara sunahu sujana mana lāī॥

जस मानस जेहि बिधि भयउ जग प्रचार जेहि हेतु।

jasa mānasa jehi bidhi bhayau jaga pracāra jehi hetu।

अब सोइ कहउँ प्रसंग सब सुमिरि उमा बृषकेतु।।35।।

aba soi kahau~ prasaṃga saba sumiri umā bṛṣaketu॥35॥

संभु प्रसाद सुमति हियँ हुलसी। रामचरितमानस कबि तुलसी।।

saṃbhu prasāda sumati hiya~ hulasī। rāmacaritamānasa kabi tulasī॥

करइ मनोहर मति अनुहारी। सुजन सुचित सुनि लेहु सुधारी।।

karai manohara mati anuhārī। sujana sucita suni lehu sudhārī॥

सुमति भूमि थल हृदय अगाधू। बेद पुरान उदधि घन साधू।।

sumati bhūmi thala hṛdaya agādhū। beda purāna udadhi ghana sādhū॥

बरषहिं राम सुजस बर बारी। मधुर मनोहर मंगलकारी।।

baraṣahiṃ rāma sujasa bara bārī। madhura manohara maṃgalakārī॥

लीला सगुन जो कहहिं बखानी। सोइ स्वच्छता करइ मल हानी।।

līlā saguna jo kahahiṃ bakhānī। soi svacchatā karai mala hānī॥

प्रेम भगति जो बरनि न जाई। सोइ मधुरता सुसीतलताई।।

prema bhagati jo barani na jāī। soi madhuratā susītalatāī॥

सो जल सुकृत सालि हित होई। राम भगत जन जीवन सोई।।

so jala sukṛta sāli hita hoī। rāma bhagata jana jīvana soī॥

मेधा महि गत सो जल पावन। सकिलि श्रवन मग चलेउ सुहावन।।

medhā mahi gata so jala pāvana। sakili śravana maga caleu suhāvana॥

भरेउ सुमानस सुथल थिराना। सुखद सीत रुचि चारु चिराना।।

bhareu sumānasa suthala thirānā। sukhada sīta ruci cāru cirānā॥

सुठि सुंदर संबाद बर बिरचे बुद्धि बिचारि।

suṭhi suṃdara saṃbāda bara birace buddhi bicāri।

तेइ एहि पावन सुभग सर घाट मनोहर चारि।।36।।

tei ehi pāvana subhaga sara ghāṭa manohara cāri॥36॥

सप्त प्रबन्ध सुभग सोपाना। ग्यान नयन निरखत मन माना।।

sapta prabandha subhaga sopānā। gyāna nayana nirakhata mana mānā॥

रघुपति महिमा अगुन अबाधा। बरनब सोइ बर बारि अगाधा।।

raghupati mahimā aguna abādhā। baranaba soi bara bāri agādhā॥

राम सीय जस सलिल सुधासम। उपमा बीचि बिलास मनोरम।।

rāma sīya jasa salila sudhāsama। upamā bīci bilāsa manorama॥

पुरइनि सघन चारु चौपाई। जुगुति मंजु मनि सीप सुहाई।।

puraini saghana cāru caupāī। juguti maṃju mani sīpa suhāī॥

छंद सोरठा सुंदर दोहा। सोइ बहुरंग कमल कुल सोहा।।

chaṃda soraṭhā suṃdara dohā। soi bahuraṃga kamala kula sohā॥

अरथ अनूप सुमाव सुभासा। सोइ पराग मकरंद सुबासा।।

aratha anūpa sumāva subhāsā। soi parāga makaraṃda subāsā॥

सुकृत पुंज मंजुल अलि माला। ग्यान बिराग बिचार मराला।।

sukṛta puṃja maṃjula ali mālā। gyāna birāga bicāra marālā॥

धुनि अवरेब कबित गुन जाती। मीन मनोहर ते बहुभाँती।।

dhuni avareba kabita guna jātī। mīna manohara te bahubhā~tī॥

अरथ धरम कामादिक चारी। कहब ग्यान बिग्यान बिचारी।।

aratha dharama kāmādika cārī। kahaba gyāna bigyāna bicārī॥

नव रस जप तप जोग बिरागा। ते सब जलचर चारु तड़ागा।।

nava rasa japa tapa joga birāgā। te saba jalacara cāru tar̤āgā॥

सुकृती साधु नाम गुन गाना। ते बिचित्र जल बिहग समाना।।

sukṛtī sādhu nāma guna gānā। te bicitra jala bihaga samānā॥

संतसभा चहुँ दिसि अवँराई। श्रद्धा रितु बसंत सम गाई।।

saṃtasabhā cahu~ disi ava~rāī। śraddhā ritu basaṃta sama gāī॥

भगति निरुपन बिबिध बिधाना। छमा दया दम लता बिताना।।

bhagati nirupana bibidha bidhānā। chamā dayā dama latā bitānā॥

सम जम नियम फूल फल ग्याना। हरि पत रति रस बेद बखाना।।

sama jama niyama phūla phala gyānā। hari pata rati rasa beda bakhānā॥

औरउ कथा अनेक प्रसंगा। तेइ सुक पिक बहुबरन बिहंगा।।

aurau kathā aneka prasaṃgā। tei suka pika bahubarana bihaṃgā॥

पुलक बाटिका बाग बन सुख सुबिहंग बिहारु।

pulaka bāṭikā bāga bana sukha subihaṃga bihāru।

माली सुमन सनेह जल सींचत लोचन चारु।।37।।

mālī sumana saneha jala sīṃcata locana cāru॥37॥

जे गावहिं यह चरित सँभारे। तेइ एहि ताल चतुर रखवारे।।

je gāvahiṃ yaha carita sa~bhāre। tei ehi tāla catura rakhavāre॥

सदा सुनहिं सादर नर नारी। तेइ सुरबर मानस अधिकारी।।

sadā sunahiṃ sādara nara nārī। tei surabara mānasa adhikārī॥

अति खल जे बिषई बग कागा। एहिं सर निकट न जाहिं अभागा।।

ati khala je biṣaī baga kāgā। ehiṃ sara nikaṭa na jāhiṃ abhāgā॥

संबुक भेक सेवार समाना। इहाँ न बिषय कथा रस नाना।।

saṃbuka bheka sevāra samānā। ihā~ na biṣaya kathā rasa nānā॥

तेहि कारन आवत हियँ हारे। कामी काक बलाक बिचारे।।

tehi kārana āvata hiya~ hāre। kāmī kāka balāka bicāre॥

आवत एहिं सर अति कठिनाई। राम कृपा बिनु आइ न जाई।।

āvata ehiṃ sara ati kaṭhināī। rāma kṛpā binu āi na jāī॥

कठिन कुसंग कुपंथ कराला। तिन्ह के बचन बाघ हरि ब्याला।।

kaṭhina kusaṃga kupaṃtha karālā। tinha ke bacana bāgha hari byālā॥

गृह कारज नाना जंजाला। ते अति दुर्गम सैल बिसाला।।

gṛha kāraja nānā jaṃjālā। te ati durgama saila bisālā॥

बन बहु बिषम मोह मद माना। नदीं कुतर्क भयंकर नाना।।

bana bahu biṣama moha mada mānā। nadīṃ kutarka bhayaṃkara nānā॥

जे श्रद्धा संबल रहित नहि संतन्ह कर साथ।

je śraddhā saṃbala rahita nahi saṃtanha kara sātha।

तिन्ह कहुँ मानस अगम अति जिन्हहि न प्रिय रघुनाथ।।38।।

tinha kahu~ mānasa agama ati jinhahi na priya raghunātha॥38॥

जौं करि कष्ट जाइ पुनि कोई। जातहिं नींद जुड़ाई होई।।

jauṃ kari kaṣṭa jāi puni koī। jātahiṃ nīṃda jur̤āī hoī॥

जड़ता जाड़ बिषम उर लागा। गएहुँ न मज्जन पाव अभागा।।

jar̤atā jār̤a biṣama ura lāgā। gaehu~ na majjana pāva abhāgā॥

करि न जाइ सर मज्जन पाना। फिरि आवइ समेत अभिमाना।।

kari na jāi sara majjana pānā। phiri āvai sameta abhimānā॥

जौं बहोरि कोउ पूछन आवा। सर निंदा करि ताहि बुझावा।।

jauṃ bahori kou pūchana āvā। sara niṃdā kari tāhi bujhāvā॥

सकल बिघ्न ब्यापहि नहिं तेही। राम सुकृपाँ बिलोकहिं जेही।।

sakala bighna byāpahi nahiṃ tehī। rāma sukṛpā~ bilokahiṃ jehī॥

सोइ सादर सर मज्जनु करई। महा घोर त्रयताप न जरई।।

soi sādara sara majjanu karaī। mahā ghora trayatāpa na jaraī॥

ते नर यह सर तजहिं न काऊ। जिन्ह के राम चरन भल भाऊ।।

te nara yaha sara tajahiṃ na kāū। jinha ke rāma carana bhala bhāū॥

जो नहाइ चह एहिं सर भाई। सो सतसंग करउ मन लाई।।

jo nahāi caha ehiṃ sara bhāī। so satasaṃga karau mana lāī॥

अस मानस मानस चख चाही। भइ कबि बुद्धि बिमल अवगाही।।

asa mānasa mānasa cakha cāhī। bhai kabi buddhi bimala avagāhī॥

भयउ हृदयँ आनंद उछाहू। उमगेउ प्रेम प्रमोद प्रबाहू।।

bhayau hṛdaya~ ānaṃda uchāhū। umageu prema pramoda prabāhū॥

चली सुभग कबिता सरिता सो। राम बिमल जस जल भरिता सो।।

calī subhaga kabitā saritā so। rāma bimala jasa jala bharitā so॥

सरजू नाम सुमंगल मूला। लोक बेद मत मंजुल कूला।।

sarajū nāma sumaṃgala mūlā। loka beda mata maṃjula kūlā॥

नदी पुनीत सुमानस नंदिनि। कलिमल तृन तरु मूल निकंदिनि।।

nadī punīta sumānasa naṃdini। kalimala tṛna taru mūla nikaṃdini॥

श्रोता त्रिबिध समाज पुर ग्राम नगर दुहुँ कूल।

śrotā tribidha samāja pura grāma nagara duhu~ kūla।

संतसभा अनुपम अवध सकल सुमंगल मूल।।39।।

saṃtasabhā anupama avadha sakala sumaṃgala mūla॥39॥

रामभगति सुरसरितहि जाई। मिली सुकीरति सरजु सुहाई।।

rāmabhagati surasaritahi jāī। milī sukīrati saraju suhāī॥

सानुज राम समर जसु पावन। मिलेउ महानदु सोन सुहावन।।

sānuja rāma samara jasu pāvana। mileu mahānadu sona suhāvana॥

जुग बिच भगति देवधुनि धारा। सोहति सहित सुबिरति बिचारा।।

juga bica bhagati devadhuni dhārā। sohati sahita subirati bicārā॥

त्रिबिध ताप त्रासक तिमुहानी। राम सरुप सिंधु समुहानी।।

tribidha tāpa trāsaka timuhānī। rāma sarupa siṃdhu samuhānī॥

मानस मूल मिली सुरसरिही। सुनत सुजन मन पावन करिही।।

mānasa mūla milī surasarihī। sunata sujana mana pāvana karihī॥

बिच बिच कथा बिचित्र बिभागा। जनु सरि तीर तीर बन बागा।।

bica bica kathā bicitra bibhāgā। janu sari tīra tīra bana bāgā॥

उमा महेस बिबाह बराती। ते जलचर अगनित बहुभाँती।।

umā mahesa bibāha barātī। te jalacara aganita bahubhā~tī॥

रघुबर जनम अनंद बधाई। भवँर तरंग मनोहरताई।।

raghubara janama anaṃda badhāī। bhava~ra taraṃga manoharatāī॥

बालचरित चहु बंधु के बनज बिपुल बहुरंग।

bālacarita cahu baṃdhu ke banaja bipula bahuraṃga।

नृप रानी परिजन सुकृत मधुकर बारिबिहंग।।40।।

nṛpa rānī parijana sukṛta madhukara bāribihaṃga॥40॥

सीय स्वयंबर कथा सुहाई। सरित सुहावनि सो छबि छाई।।

sīya svayaṃbara kathā suhāī। sarita suhāvani so chabi chāī॥

नदी नाव पटु प्रस्न अनेका। केवट कुसल उतर सबिबेका।।

nadī nāva paṭu prasna anekā। kevaṭa kusala utara sabibekā॥

सुनि अनुकथन परस्पर होई। पथिक समाज सोह सरि सोई।।

suni anukathana paraspara hoī। pathika samāja soha sari soī॥

घोर धार भृगुनाथ रिसानी। घाट सुबद्ध राम बर बानी।।

ghora dhāra bhṛgunātha risānī। ghāṭa subaddha rāma bara bānī॥

सानुज राम बिबाह उछाहू। सो सुभ उमग सुखद सब काहू।।

sānuja rāma bibāha uchāhū। so subha umaga sukhada saba kāhū॥

कहत सुनत हरषहिं पुलकाहीं। ते सुकृती मन मुदित नहाहीं।।

kahata sunata haraṣahiṃ pulakāhīṃ। te sukṛtī mana mudita nahāhīṃ॥

राम तिलक हित मंगल साजा। परब जोग जनु जुरे समाजा।।

rāma tilaka hita maṃgala sājā। paraba joga janu jure samājā॥

काई कुमति केकई केरी। परी जासु फल बिपति घनेरी।।

kāī kumati kekaī kerī। parī jāsu phala bipati ghanerī॥

समन अमित उतपात सब भरतचरित जपजाग।

samana amita utapāta saba bharatacarita japajāga।

कलि अघ खल अवगुन कथन ते जलमल बग काग।।41।।

kali agha khala avaguna kathana te jalamala baga kāga॥41॥

कीरति सरित छहूँ रितु रूरी। समय सुहावनि पावनि भूरी।।

kīrati sarita chahū~ ritu rūrī। samaya suhāvani pāvani bhūrī॥

हिम हिमसैलसुता सिव ब्याहू। सिसिर सुखद प्रभु जनम उछाहू।।

hima himasailasutā siva byāhū। sisira sukhada prabhu janama uchāhū॥

बरनब राम बिबाह समाजू। सो मुद मंगलमय रितुराजू।।

baranaba rāma bibāha samājū। so muda maṃgalamaya riturājū॥

ग्रीषम दुसह राम बनगवनू। पंथकथा खर आतप पवनू।।

grīṣama dusaha rāma banagavanū। paṃthakathā khara ātapa pavanū॥

बरषा घोर निसाचर रारी। सुरकुल सालि सुमंगलकारी।।

baraṣā ghora nisācara rārī। surakula sāli sumaṃgalakārī॥

राम राज सुख बिनय बड़ाई। बिसद सुखद सोइ सरद सुहाई।।

rāma rāja sukha binaya bar̤āī। bisada sukhada soi sarada suhāī॥

सती सिरोमनि सिय गुनगाथा। सोइ गुन अमल अनूपम पाथा।।

satī siromani siya gunagāthā। soi guna amala anūpama pāthā॥

भरत सुभाउ सुसीतलताई। सदा एकरस बरनि न जाई।।

bharata subhāu susītalatāī। sadā ekarasa barani na jāī॥

अवलोकनि बोलनि मिलनि प्रीति परसपर हास।

avalokani bolani milani prīti parasapara hāsa।

भायप भलि चहु बंधु की जल माधुरी सुबास।।42।।

bhāyapa bhali cahu baṃdhu kī jala mādhurī subāsa॥42॥

आरति बिनय दीनता मोरी। लघुता ललित सुबारि न थोरी।।

ārati binaya dīnatā morī। laghutā lalita subāri na thorī॥

अदभुत सलिल सुनत गुनकारी। आस पिआस मनोमल हारी।।

adabhuta salila sunata gunakārī। āsa piāsa manomala hārī॥

राम सुप्रेमहि पोषत पानी। हरत सकल कलि कलुष गलानी।।

rāma supremahi poṣata pānī। harata sakala kali kaluṣa galānī॥

भव श्रम सोषक तोषक तोषा। समन दुरित दुख दारिद दोषा।।

bhava śrama soṣaka toṣaka toṣā। samana durita dukha dārida doṣā॥

काम कोह मद मोह नसावन। बिमल बिबेक बिराग बढ़ावन।।

kāma koha mada moha nasāvana। bimala bibeka birāga bar̤hāvana॥

सादर मज्जन पान किए तें। मिटहिं पाप परिताप हिए तें।।

sādara majjana pāna kie teṃ। miṭahiṃ pāpa paritāpa hie teṃ॥

जिन्ह एहि बारि न मानस धोए। ते कायर कलिकाल बिगोए।।

jinha ehi bāri na mānasa dhoe। te kāyara kalikāla bigoe॥

तृषित निरखि रबि कर भव बारी। फिरिहहि मृग जिमि जीव दुखारी।।

tṛṣita nirakhi rabi kara bhava bārī। phirihahi mṛga jimi jīva dukhārī॥

मति अनुहारि सुबारि गुन गनि मन अन्हवाइ।

mati anuhāri subāri guna gani mana anhavāi।

सुमिरि भवानी संकरहि कह कबि कथा सुहाइ।।43(क)।।

sumiri bhavānī saṃkarahi kaha kabi kathā suhāi॥43(ka)॥

अब रघुपति पद पंकरुह हियँ धरि पाइ प्रसाद ।

aba raghupati pada paṃkaruha hiya~ dhari pāi prasāda ।

कहउँ जुगल मुनिबर्ज कर मिलन सुभग संबाद।।43(ख)।।

kahau~ jugala munibarja kara milana subhaga saṃbāda॥43(kha)॥

भरद्वाज मुनि बसहिं प्रयागा। तिन्हहि राम पद अति अनुरागा।।

bharadvāja muni basahiṃ prayāgā। tinhahi rāma pada ati anurāgā॥

तापस सम दम दया निधाना। परमारथ पथ परम सुजाना।।

tāpasa sama dama dayā nidhānā। paramāratha patha parama sujānā॥

माघ मकरगत रबि जब होई। तीरथपतिहिं आव सब कोई।।

māgha makaragata rabi jaba hoī। tīrathapatihiṃ āva saba koī॥

देव दनुज किंनर नर श्रेनी। सादर मज्जहिं सकल त्रिबेनीं।।

deva danuja kiṃnara nara śrenī। sādara majjahiṃ sakala tribenīṃ॥

पूजहि माधव पद जलजाता। परसि अखय बटु हरषहिं गाता।।

pūjahi mādhava pada jalajātā। parasi akhaya baṭu haraṣahiṃ gātā॥

भरद्वाज आश्रम अति पावन। परम रम्य मुनिबर मन भावन।।

bharadvāja āśrama ati pāvana। parama ramya munibara mana bhāvana॥

तहाँ होइ मुनि रिषय समाजा। जाहिं जे मज्जन तीरथराजा।।

tahā~ hoi muni riṣaya samājā। jāhiṃ je majjana tīratharājā॥

मज्जहिं प्रात समेत उछाहा। कहहिं परसपर हरि गुन गाहा।।

majjahiṃ prāta sameta uchāhā। kahahiṃ parasapara hari guna gāhā॥

ब्रह्म निरूपम धरम बिधि बरनहिं तत्त्व बिभाग।

brahma nirūpama dharama bidhi baranahiṃ tattva bibhāga।

कहहिं भगति भगवंत कै संजुत ग्यान बिराग।।44।।

kahahiṃ bhagati bhagavaṃta kai saṃjuta gyāna birāga॥44॥

एहि प्रकार भरि माघ नहाहीं। पुनि सब निज निज आश्रम जाहीं।।

ehi prakāra bhari māgha nahāhīṃ। puni saba nija nija āśrama jāhīṃ॥

प्रति संबत अति होइ अनंदा। मकर मज्जि गवनहिं मुनिबृंदा।।

prati saṃbata ati hoi anaṃdā। makara majji gavanahiṃ munibṛṃdā॥

एक बार भरि मकर नहाए। सब मुनीस आश्रमन्ह सिधाए।।

eka bāra bhari makara nahāe। saba munīsa āśramanha sidhāe॥

जगबालिक मुनि परम बिबेकी। भरव्दाज राखे पद टेकी।।

jagabālika muni parama bibekī। bharavdāja rākhe pada ṭekī॥

सादर चरन सरोज पखारे। अति पुनीत आसन बैठारे।।

sādara carana saroja pakhāre। ati punīta āsana baiṭhāre॥

करि पूजा मुनि सुजस बखानी। बोले अति पुनीत मृदु बानी।।

kari pūjā muni sujasa bakhānī। bole ati punīta mṛdu bānī॥

नाथ एक संसउ बड़ मोरें। करगत बेदतत्व सबु तोरें।।

nātha eka saṃsau bar̤a moreṃ। karagata bedatatva sabu toreṃ॥

कहत सो मोहि लागत भय लाजा। जौ न कहउँ बड़ होइ अकाजा।।

kahata so mohi lāgata bhaya lājā। jau na kahau~ bar̤a hoi akājā॥

संत कहहि असि नीति प्रभु श्रुति पुरान मुनि गाव।

saṃta kahahi asi nīti prabhu śruti purāna muni gāva।

होइ न बिमल बिबेक उर गुर सन किएँ दुराव।।45।।

hoi na bimala bibeka ura gura sana kie~ durāva॥45॥

अस बिचारि प्रगटउँ निज मोहू। हरहु नाथ करि जन पर छोहू।।

asa bicāri pragaṭau~ nija mohū। harahu nātha kari jana para chohū॥

राम नाम कर अमित प्रभावा। संत पुरान उपनिषद गावा।।

rāma nāma kara amita prabhāvā। saṃta purāna upaniṣada gāvā॥

संतत जपत संभु अबिनासी। सिव भगवान ग्यान गुन रासी।।

saṃtata japata saṃbhu abināsī। siva bhagavāna gyāna guna rāsī॥

आकर चारि जीव जग अहहीं। कासीं मरत परम पद लहहीं।।

ākara cāri jīva jaga ahahīṃ। kāsīṃ marata parama pada lahahīṃ॥

सोपि राम महिमा मुनिराया। सिव उपदेसु करत करि दाया।।

sopi rāma mahimā munirāyā। siva upadesu karata kari dāyā॥

रामु कवन प्रभु पूछउँ तोही। कहिअ बुझाइ कृपानिधि मोही।।

rāmu kavana prabhu pūchau~ tohī। kahia bujhāi kṛpānidhi mohī॥

एक राम अवधेस कुमारा। तिन्ह कर चरित बिदित संसारा।।

eka rāma avadhesa kumārā। tinha kara carita bidita saṃsārā॥

नारि बिरहँ दुखु लहेउ अपारा। भयहु रोषु रन रावनु मारा।।

nāri biraha~ dukhu laheu apārā। bhayahu roṣu rana rāvanu mārā॥

प्रभु सोइ राम कि अपर कोउ जाहि जपत त्रिपुरारि।

prabhu soi rāma ki apara kou jāhi japata tripurāri।

सत्यधाम सर्बग्य तुम्ह कहहु बिबेकु बिचारि।।46।।

satyadhāma sarbagya tumha kahahu bibeku bicāri॥46॥

जैसे मिटै मोर भ्रम भारी। कहहु सो कथा नाथ बिस्तारी।।

jaise miṭai mora bhrama bhārī। kahahu so kathā nātha bistārī॥

जागबलिक बोले मुसुकाई। तुम्हहि बिदित रघुपति प्रभुताई।।

jāgabalika bole musukāī। tumhahi bidita raghupati prabhutāī॥

राममगत तुम्ह मन क्रम बानी। चतुराई तुम्हारी मैं जानी।।

rāmamagata tumha mana krama bānī। caturāī tumhārī maiṃ jānī॥

चाहहु सुनै राम गुन गूढ़ा। कीन्हिहु प्रस्न मनहुँ अति मूढ़ा।।

cāhahu sunai rāma guna gūr̤hā। kīnhihu prasna manahu~ ati mūr̤hā॥

तात सुनहु सादर मनु लाई। कहउँ राम कै कथा सुहाई।।

tāta sunahu sādara manu lāī। kahau~ rāma kai kathā suhāī॥

महामोहु महिषेसु बिसाला। रामकथा कालिका कराला।।

mahāmohu mahiṣesu bisālā। rāmakathā kālikā karālā॥

रामकथा ससि किरन समाना। संत चकोर करहिं जेहि पाना।।

rāmakathā sasi kirana samānā। saṃta cakora karahiṃ jehi pānā॥

ऐसेइ संसय कीन्ह भवानी। महादेव तब कहा बखानी।।

aisei saṃsaya kīnha bhavānī। mahādeva taba kahā bakhānī॥

कहउँ सो मति अनुहारि अब उमा संभु संबाद।

kahau~ so mati anuhāri aba umā saṃbhu saṃbāda।

भयउ समय जेहि हेतु जेहि सुनु मुनि मिटिहि बिषाद।।47।।

bhayau samaya jehi hetu jehi sunu muni miṭihi biṣāda॥47॥

एक बार त्रेता जुग माहीं। संभु गए कुंभज रिषि पाहीं।।

eka bāra tretā juga māhīṃ। saṃbhu gae kuṃbhaja riṣi pāhīṃ॥

संग सती जगजननि भवानी। पूजे रिषि अखिलेस्वर जानी।।

saṃga satī jagajanani bhavānī। pūje riṣi akhilesvara jānī॥

रामकथा मुनीबर्ज बखानी। सुनी महेस परम सुखु मानी।।

rāmakathā munībarja bakhānī। sunī mahesa parama sukhu mānī॥

रिषि पूछी हरिभगति सुहाई। कही संभु अधिकारी पाई।।

riṣi pūchī haribhagati suhāī। kahī saṃbhu adhikārī pāī॥

कहत सुनत रघुपति गुन गाथा। कछु दिन तहाँ रहे गिरिनाथा।।

kahata sunata raghupati guna gāthā। kachu dina tahā~ rahe girināthā॥

मुनि सन बिदा मागि त्रिपुरारी। चले भवन सँग दच्छकुमारी।।

muni sana bidā māgi tripurārī। cale bhavana sa~ga dacchakumārī॥

तेहि अवसर भंजन महिभारा। हरि रघुबंस लीन्ह अवतारा।।

tehi avasara bhaṃjana mahibhārā। hari raghubaṃsa līnha avatārā॥

पिता बचन तजि राजु उदासी। दंडक बन बिचरत अबिनासी।।

pitā bacana taji rāju udāsī। daṃḍaka bana bicarata abināsī॥

ह्दयँ बिचारत जात हर केहि बिधि दरसनु होइ।

hdaya~ bicārata jāta hara kehi bidhi darasanu hoi।

गुप्त रुप अवतरेउ प्रभु गएँ जान सबु कोइ।।48(क)।।

gupta rupa avatareu prabhu gae~ jāna sabu koi॥48(ka)॥

संकर उर अति छोभु सती न जानहिं मरमु सोइ।।

saṃkara ura ati chobhu satī na jānahiṃ maramu soi॥

तुलसी दरसन लोभु मन डरु लोचन लालची।।48(ख)।।

tulasī darasana lobhu mana ḍaru locana lālacī॥48(kha)॥

रावन मरन मनुज कर जाचा। प्रभु बिधि बचनु कीन्ह चह साचा।।

rāvana marana manuja kara jācā। prabhu bidhi bacanu kīnha caha sācā॥

जौं नहिं जाउँ रहइ पछितावा। करत बिचारु न बनत बनावा।।

jauṃ nahiṃ jāu~ rahai pachitāvā। karata bicāru na banata banāvā॥

एहि बिधि भए सोचबस ईसा। तेहि समय जाइ दससीसा।।

ehi bidhi bhae socabasa īsā। tehi samaya jāi dasasīsā॥

लीन्ह नीच मारीचहि संगा। भयउ तुरत सोइ कपट कुरंगा।।

līnha nīca mārīcahi saṃgā। bhayau turata soi kapaṭa kuraṃgā॥

करि छलु मूढ़ हरी बैदेही। प्रभु प्रभाउ तस बिदित न तेही।।

kari chalu mūr̤ha harī baidehī। prabhu prabhāu tasa bidita na tehī॥

मृग बधि बन्धु सहित हरि आए। आश्रमु देखि नयन जल छाए।।

mṛga badhi bandhu sahita hari āe। āśramu dekhi nayana jala chāe॥

बिरह बिकल नर इव रघुराई। खोजत बिपिन फिरत दोउ भाई।।

biraha bikala nara iva raghurāī। khojata bipina phirata dou bhāī॥

कबहूँ जोग बियोग न जाकें। देखा प्रगट बिरह दुख ताकें।।

kabahū~ joga biyoga na jākeṃ। dekhā pragaṭa biraha dukha tākeṃ॥

अति विचित्र रघुपति चरित जानहिं परम सुजान।

ati vicitra raghupati carita jānahiṃ parama sujāna।

जे मतिमंद बिमोह बस हृदयँ धरहिं कछु आन।।49।।

je matimaṃda bimoha basa hṛdaya~ dharahiṃ kachu āna॥49॥

संभु समय तेहि रामहि देखा। उपजा हियँ अति हरपु बिसेषा।।

saṃbhu samaya tehi rāmahi dekhā। upajā hiya~ ati harapu biseṣā॥

भरि लोचन छबिसिंधु निहारी। कुसमय जानिन कीन्हि चिन्हारी।।

bhari locana chabisiṃdhu nihārī। kusamaya jānina kīnhi cinhārī॥

जय सच्चिदानंद जग पावन। अस कहि चलेउ मनोज नसावन।।

jaya saccidānaṃda jaga pāvana। asa kahi caleu manoja nasāvana॥

चले जात सिव सती समेता। पुनि पुनि पुलकत कृपानिकेता।।

cale jāta siva satī sametā। puni puni pulakata kṛpāniketā॥

सतीं सो दसा संभु कै देखी। उर उपजा संदेहु बिसेषी।।

satīṃ so dasā saṃbhu kai dekhī। ura upajā saṃdehu biseṣī॥

संकरु जगतबंद्य जगदीसा। सुर नर मुनि सब नावत सीसा।।

saṃkaru jagatabaṃdya jagadīsā। sura nara muni saba nāvata sīsā॥

तिन्ह नृपसुतहि नह परनामा। कहि सच्चिदानंद परधमा।।

tinha nṛpasutahi naha paranāmā। kahi saccidānaṃda paradhamā॥

भए मगन छबि तासु बिलोकी। अजहुँ प्रीति उर रहति न रोकी।।

bhae magana chabi tāsu bilokī। ajahu~ prīti ura rahati na rokī॥

ब्रह्म जो व्यापक बिरज अज अकल अनीह अभेद।

brahma jo vyāpaka biraja aja akala anīha abheda।

सो कि देह धरि होइ नर जाहि न जानत वेद।। 50।।

so ki deha dhari hoi nara jāhi na jānata veda॥ 50॥

बिष्नु जो सुर हित नरतनु धारी। सोउ सर्बग्य जथा त्रिपुरारी।।

biṣnu jo sura hita naratanu dhārī। sou sarbagya jathā tripurārī॥

खोजइ सो कि अग्य इव नारी। ग्यानधाम श्रीपति असुरारी।।

khojai so ki agya iva nārī। gyānadhāma śrīpati asurārī॥

संभुगिरा पुनि मृषा न होई। सिव सर्बग्य जान सबु कोई।।

saṃbhugirā puni mṛṣā na hoī। siva sarbagya jāna sabu koī॥

अस संसय मन भयउ अपारा। होई न हृदयँ प्रबोध प्रचारा।।

asa saṃsaya mana bhayau apārā। hoī na hṛdaya~ prabodha pracārā॥

जद्यपि प्रगट न कहेउ भवानी। हर अंतरजामी सब जानी।।

jadyapi pragaṭa na kaheu bhavānī। hara aṃtarajāmī saba jānī॥

सुनहि सती तव नारि सुभाऊ। संसय अस न धरिअ उर काऊ।।

sunahi satī tava nāri subhāū। saṃsaya asa na dharia ura kāū॥

जासु कथा कुभंज रिषि गाई। भगति जासु मैं मुनिहि सुनाई।।

jāsu kathā kubhaṃja riṣi gāī। bhagati jāsu maiṃ munihi sunāī॥

सोउ मम इष्टदेव रघुबीरा। सेवत जाहि सदा मुनि धीरा।।

sou mama iṣṭadeva raghubīrā। sevata jāhi sadā muni dhīrā॥

मुनि धीर जोगी सिद्ध संतत बिमल मन जेहि ध्यावहीं।

muni dhīra jogī siddha saṃtata bimala mana jehi dhyāvahīṃ।

कहि नेति निगम पुरान आगम जासु कीरति गावहीं।।

kahi neti nigama purāna āgama jāsu kīrati gāvahīṃ॥

सोइ रामु ब्यापक ब्रह्म भुवन निकाय पति माया धनी।

soi rāmu byāpaka brahma bhuvana nikāya pati māyā dhanī।

अवतरेउ अपने भगत हित निजतंत्र नित रघुकुलमनि।।

avatareu apane bhagata hita nijataṃtra nita raghukulamani॥

लाग न उर उपदेसु जदपि कहेउ सिवँ बार बहु।

lāga na ura upadesu jadapi kaheu siva~ bāra bahu।

बोले बिहसि महेसु हरिमाया बलु जानि जियँ।।51।।

bole bihasi mahesu harimāyā balu jāni jiya~॥51॥

जौं तुम्हरें मन अति संदेहू। तौ किन जाइ परीछा लेहू।।

jauṃ tumhareṃ mana ati saṃdehū। tau kina jāi parīchā lehū॥

तब लगि बैठ अहउँ बटछाहिं। जब लगि तुम्ह ऐहहु मोहि पाही।।

taba lagi baiṭha ahau~ baṭachāhiṃ। jaba lagi tumha aihahu mohi pāhī॥

जैसें जाइ मोह भ्रम भारी। करेहु सो जतनु बिबेक बिचारी।।

jaiseṃ jāi moha bhrama bhārī। karehu so jatanu bibeka bicārī॥

चलीं सती सिव आयसु पाई। करहिं बिचारु करौं का भाई।।

calīṃ satī siva āyasu pāī। karahiṃ bicāru karauṃ kā bhāī॥

इहाँ संभु अस मन अनुमाना। दच्छसुता कहुँ नहिं कल्याना।।

ihā~ saṃbhu asa mana anumānā। dacchasutā kahu~ nahiṃ kalyānā॥

मोरेहु कहें न संसय जाहीं। बिधी बिपरीत भलाई नाहीं।।

morehu kaheṃ na saṃsaya jāhīṃ। bidhī biparīta bhalāī nāhīṃ॥

होइहि सोइ जो राम रचि राखा। को करि तर्क बढ़ावै साखा।।

hoihi soi jo rāma raci rākhā। ko kari tarka bar̤hāvai sākhā॥

अस कहि लगे जपन हरिनामा। गई सती जहँ प्रभु सुखधामा।।

asa kahi lage japana harināmā। gaī satī jaha~ prabhu sukhadhāmā॥

पुनि पुनि हृदयँ विचारु करि धरि सीता कर रुप।

puni puni hṛdaya~ vicāru kari dhari sītā kara rupa।

आगें होइ चलि पंथ तेहि जेहिं आवत नरभूप।।52।।

āgeṃ hoi cali paṃtha tehi jehiṃ āvata narabhūpa॥52॥

लछिमन दीख उमाकृत बेषा चकित भए भ्रम हृदयँ बिसेषा।।

lachimana dīkha umākṛta beṣā cakita bhae bhrama hṛdaya~ biseṣā॥

कहि न सकत कछु अति गंभीरा। प्रभु प्रभाउ जानत मतिधीरा।।

kahi na sakata kachu ati gaṃbhīrā। prabhu prabhāu jānata matidhīrā॥

सती कपटु जानेउ सुरस्वामी। सबदरसी सब अंतरजामी।।

satī kapaṭu jāneu surasvāmī। sabadarasī saba aṃtarajāmī॥

सुमिरत जाहि मिटइ अग्याना। सोइ सरबग्य रामु भगवाना।।

sumirata jāhi miṭai agyānā। soi sarabagya rāmu bhagavānā॥

सती कीन्ह चह तहँहुँ दुराऊ। देखहु नारि सुभाव प्रभाऊ।।

satī kīnha caha taha~hu~ durāū। dekhahu nāri subhāva prabhāū॥

निज माया बलु हृदयँ बखानी। बोले बिहसि रामु मृदु बानी।।

nija māyā balu hṛdaya~ bakhānī। bole bihasi rāmu mṛdu bānī॥

जोरि पानि प्रभु कीन्ह प्रनामू। पिता समेत लीन्ह निज नामू।।

jori pāni prabhu kīnha pranāmū। pitā sameta līnha nija nāmū॥

कहेउ बहोरि कहाँ बृषकेतू। बिपिन अकेलि फिरहु केहि हेतू।।

kaheu bahori kahā~ bṛṣaketū। bipina akeli phirahu kehi hetū॥

राम बचन मृदु गूढ़ सुनि उपजा अति संकोचु।

rāma bacana mṛdu gūr̤ha suni upajā ati saṃkocu।

सती सभीत महेस पहिं चलीं हृदयँ बड़ सोचु।।53।।

satī sabhīta mahesa pahiṃ calīṃ hṛdaya~ bar̤a socu॥53॥

मैं संकर कर कहा न माना। निज अग्यानु राम पर आना।।

maiṃ saṃkara kara kahā na mānā। nija agyānu rāma para ānā॥

जाइ उतरु अब देहउँ काहा। उर उपजा अति दारुन दाहा।।

jāi utaru aba dehau~ kāhā। ura upajā ati dāruna dāhā॥

जाना राम सतीं दुखु पावा। निज प्रभाउ कछु प्रगटि जनावा।।

jānā rāma satīṃ dukhu pāvā। nija prabhāu kachu pragaṭi janāvā॥

सतीं दीख कौतुकु मग जाता। आगें रामु सहित श्री भ्राता।।

satīṃ dīkha kautuku maga jātā। āgeṃ rāmu sahita śrī bhrātā॥

फिरि चितवा पाछें प्रभु देखा। सहित बंधु सिय सुंदर वेषा।।

phiri citavā pācheṃ prabhu dekhā। sahita baṃdhu siya suṃdara veṣā॥

जहँ चितवहिं तहँ प्रभु आसीना। सेवहिं सिद्ध मुनीस प्रबीना।।

jaha~ citavahiṃ taha~ prabhu āsīnā। sevahiṃ siddha munīsa prabīnā॥

देखे सिव बिधि बिष्नु अनेका। अमित प्रभाउ एक तें एका।।

dekhe siva bidhi biṣnu anekā। amita prabhāu eka teṃ ekā॥

बंदत चरन करत प्रभु सेवा। बिबिध बेष देखे सब देवा।।

baṃdata carana karata prabhu sevā। bibidha beṣa dekhe saba devā॥

सती बिधात्री इंदिरा देखीं अमित अनूप।

satī bidhātrī iṃdirā dekhīṃ amita anūpa।

जेहिं जेहिं बेष अजादि सुर तेहि तेहि तन अनुरूप।।54।।

jehiṃ jehiṃ beṣa ajādi sura tehi tehi tana anurūpa॥54॥

देखे जहँ तहँ रघुपति जेते। सक्तिन्ह सहित सकल सुर तेते।।

dekhe jaha~ taha~ raghupati jete। saktinha sahita sakala sura tete॥

जीव चराचर जो संसारा। देखे सकल अनेक प्रकारा।।

jīva carācara jo saṃsārā। dekhe sakala aneka prakārā॥

पूजहिं प्रभुहि देव बहु बेषा। राम रूप दूसर नहिं देखा।।

pūjahiṃ prabhuhi deva bahu beṣā। rāma rūpa dūsara nahiṃ dekhā॥

अवलोके रघुपति बहुतेरे। सीता सहित न बेष घनेरे।।

avaloke raghupati bahutere। sītā sahita na beṣa ghanere॥

सोइ रघुबर सोइ लछिमनु सीता। देखि सती अति भई सभीता।।

soi raghubara soi lachimanu sītā। dekhi satī ati bhaī sabhītā॥

हृदय कंप तन सुधि कछु नाहीं। नयन मूदि बैठीं मग माहीं।।

hṛdaya kaṃpa tana sudhi kachu nāhīṃ। nayana mūdi baiṭhīṃ maga māhīṃ॥

बहुरि बिलोकेउ नयन उघारी। कछु न दीख तहँ दच्छकुमारी।।

bahuri bilokeu nayana ughārī। kachu na dīkha taha~ dacchakumārī॥

पुनि पुनि नाइ राम पद सीसा। चलीं तहाँ जहँ रहे गिरीसा।।

puni puni nāi rāma pada sīsā। calīṃ tahā~ jaha~ rahe girīsā॥

गई समीप महेस तब हँसि पूछी कुसलात।

gaī samīpa mahesa taba ha~si pūchī kusalāta।

लीन्ही परीछा कवन बिधि कहहु सत्य सब बात।।55।।

līnhī parīchā kavana bidhi kahahu satya saba bāta॥55॥

सतीं समुझि रघुबीर प्रभाऊ। भय बस सिव सन कीन्ह दुराऊ।।

satīṃ samujhi raghubīra prabhāū। bhaya basa siva sana kīnha durāū॥

कछु न परीछा लीन्हि गोसाई। कीन्ह प्रनामु तुम्हारिहि नाई।।

kachu na parīchā līnhi gosāī। kīnha pranāmu tumhārihi nāī॥

जो तुम्ह कहा सो मृषा न होई। मोरें मन प्रतीति अति सोई।।

jo tumha kahā so mṛṣā na hoī। moreṃ mana pratīti ati soī॥

तब संकर देखेउ धरि ध्याना। सतीं जो कीन्ह चरित सब जाना।।

taba saṃkara dekheu dhari dhyānā। satīṃ jo kīnha carita saba jānā॥

बहुरि राममायहि सिरु नावा। प्रेरि सतिहि जेहिं झूँठ कहावा।।

bahuri rāmamāyahi siru nāvā। preri satihi jehiṃ jhū~ṭha kahāvā॥

हरि इच्छा भावी बलवाना। हृदयँ बिचारत संभु सुजाना।।

hari icchā bhāvī balavānā। hṛdaya~ bicārata saṃbhu sujānā॥

सतीं कीन्ह सीता कर बेषा। सिव उर भयउ बिषाद बिसेषा।।

satīṃ kīnha sītā kara beṣā। siva ura bhayau biṣāda biseṣā॥

जौं अब करउँ सती सन प्रीती। मिटइ भगति पथु होइ अनीती।।

jauṃ aba karau~ satī sana prītī। miṭai bhagati pathu hoi anītī॥

परम पुनीत न जाइ तजि किएँ प्रेम बड़ पापु।

parama punīta na jāi taji kie~ prema bar̤a pāpu।

प्रगटि न कहत महेसु कछु हृदयँ अधिक संतापु।।56।।

pragaṭi na kahata mahesu kachu hṛdaya~ adhika saṃtāpu॥56॥

तब संकर प्रभु पद सिरु नावा। सुमिरत रामु हृदयँ अस आवा।।

taba saṃkara prabhu pada siru nāvā। sumirata rāmu hṛdaya~ asa āvā॥

एहिं तन सतिहि भेट मोहि नाहीं। सिव संकल्पु कीन्ह मन माहीं।।

ehiṃ tana satihi bheṭa mohi nāhīṃ। siva saṃkalpu kīnha mana māhīṃ॥

अस बिचारि संकरु मतिधीरा। चले भवन सुमिरत रघुबीरा।।

asa bicāri saṃkaru matidhīrā। cale bhavana sumirata raghubīrā॥

चलत गगन भै गिरा सुहाई। जय महेस भलि भगति दृढ़ाई।।

calata gagana bhai girā suhāī। jaya mahesa bhali bhagati dṛr̤hāī॥

अस पन तुम्ह बिनु करइ को आना। रामभगत समरथ भगवाना।।

asa pana tumha binu karai ko ānā। rāmabhagata samaratha bhagavānā॥

सुनि नभगिरा सती उर सोचा। पूछा सिवहि समेत सकोचा।।

suni nabhagirā satī ura socā। pūchā sivahi sameta sakocā॥

कीन्ह कवन पन कहहु कृपाला। सत्यधाम प्रभु दीनदयाला।।

kīnha kavana pana kahahu kṛpālā। satyadhāma prabhu dīnadayālā॥

जदपि सतीं पूछा बहु भाँती। तदपि न कहेउ त्रिपुर आराती।।

jadapi satīṃ pūchā bahu bhā~tī। tadapi na kaheu tripura ārātī॥

सतीं हृदय अनुमान किय सबु जानेउ सर्बग्य।

satīṃ hṛdaya anumāna kiya sabu jāneu sarbagya।

कीन्ह कपटु मैं संभु सन नारि सहज जड़ अग्य।।57क।।

kīnha kapaṭu maiṃ saṃbhu sana nāri sahaja jar̤a agya॥57ka॥

जलु पय सरिस बिकाइ देखहु प्रीति कि रीति भलि।

jalu paya sarisa bikāi dekhahu prīti ki rīti bhali।

बिलग होइ रसु जाइ कपट खटाई परत पुनि।।57ख।।

bilaga hoi rasu jāi kapaṭa khaṭāī parata puni॥57kha॥

हृदयँ सोचु समुझत निज करनी। चिंता अमित जाइ नहि बरनी।।

hṛdaya~ socu samujhata nija karanī। ciṃtā amita jāi nahi baranī॥

कृपासिंधु सिव परम अगाधा। प्रगट न कहेउ मोर अपराधा।।

kṛpāsiṃdhu siva parama agādhā। pragaṭa na kaheu mora aparādhā॥

संकर रुख अवलोकि भवानी। प्रभु मोहि तजेउ हृदयँ अकुलानी।।

saṃkara rukha avaloki bhavānī। prabhu mohi tajeu hṛdaya~ akulānī॥

निज अघ समुझि न कछु कहि जाई। तपइ अवाँ इव उर अधिकाई।।

nija agha samujhi na kachu kahi jāī। tapai avā~ iva ura adhikāī॥

सतिहि ससोच जानि बृषकेतू। कहीं कथा सुंदर सुख हेतू।।

satihi sasoca jāni bṛṣaketū। kahīṃ kathā suṃdara sukha hetū॥

बरनत पंथ बिबिध इतिहासा। बिस्वनाथ पहुँचे कैलासा।।

baranata paṃtha bibidha itihāsā। bisvanātha pahu~ce kailāsā॥

तहँ पुनि संभु समुझि पन आपन। बैठे बट तर करि कमलासन।।

taha~ puni saṃbhu samujhi pana āpana। baiṭhe baṭa tara kari kamalāsana॥

संकर सहज सरुप सम्हारा। लागि समाधि अखंड अपारा।।

saṃkara sahaja sarupa samhārā। lāgi samādhi akhaṃḍa apārā॥

सती बसहि कैलास तब अधिक सोचु मन माहिं।

satī basahi kailāsa taba adhika socu mana māhiṃ।

मरमु न कोऊ जान कछु जुग सम दिवस सिराहिं।।58।।

maramu na koū jāna kachu juga sama divasa sirāhiṃ॥58॥

नित नव सोचु सतीं उर भारा। कब जैहउँ दुख सागर पारा।।

nita nava socu satīṃ ura bhārā। kaba jaihau~ dukha sāgara pārā॥

मैं जो कीन्ह रघुपति अपमाना। पुनिपति बचनु मृषा करि जाना।।

maiṃ jo kīnha raghupati apamānā। punipati bacanu mṛṣā kari jānā॥

सो फलु मोहि बिधाताँ दीन्हा। जो कछु उचित रहा सोइ कीन्हा।।

so phalu mohi bidhātā~ dīnhā। jo kachu ucita rahā soi kīnhā॥

अब बिधि अस बूझिअ नहि तोही। संकर बिमुख जिआवसि मोही।।

aba bidhi asa būjhia nahi tohī। saṃkara bimukha jiāvasi mohī॥

कहि न जाई कछु हृदय गलानी। मन महुँ रामाहि सुमिर सयानी।।

kahi na jāī kachu hṛdaya galānī। mana mahu~ rāmāhi sumira sayānī॥

जौ प्रभु दीनदयालु कहावा। आरती हरन बेद जसु गावा।।

jau prabhu dīnadayālu kahāvā। āratī harana beda jasu gāvā॥

तौ मैं बिनय करउँ कर जोरी। छूटउ बेगि देह यह मोरी।।

tau maiṃ binaya karau~ kara jorī। chūṭau begi deha yaha morī॥

जौं मोरे सिव चरन सनेहू। मन क्रम बचन सत्य ब्रतु एहू।।

jauṃ more siva carana sanehū। mana krama bacana satya bratu ehū॥

तौ सबदरसी सुनिअ प्रभु करउ सो बेगि उपाइ।

tau sabadarasī sunia prabhu karau so begi upāi।

होइ मरनु जेही बिनहिं श्रम दुसह बिपत्ति बिहाइ।।59।।

hoi maranu jehī binahiṃ śrama dusaha bipatti bihāi॥59॥

एहि बिधि दुखित प्रजेसकुमारी। अकथनीय दारुन दुखु भारी।।

ehi bidhi dukhita prajesakumārī। akathanīya dāruna dukhu bhārī॥

बीतें संबत सहस सतासी। तजी समाधि संभु अबिनासी।।

bīteṃ saṃbata sahasa satāsī। tajī samādhi saṃbhu abināsī॥

राम नाम सिव सुमिरन लागे। जानेउ सतीं जगतपति जागे।।

rāma nāma siva sumirana lāge। jāneu satīṃ jagatapati jāge॥

जाइ संभु पद बंदनु कीन्ही। सनमुख संकर आसनु दीन्हा।।

jāi saṃbhu pada baṃdanu kīnhī। sanamukha saṃkara āsanu dīnhā॥

लगे कहन हरिकथा रसाला। दच्छ प्रजेस भए तेहि काला।।

lage kahana harikathā rasālā। daccha prajesa bhae tehi kālā॥

देखा बिधि बिचारि सब लायक। दच्छहि कीन्ह प्रजापति नायक।।

dekhā bidhi bicāri saba lāyaka। dacchahi kīnha prajāpati nāyaka॥

बड़ अधिकार दच्छ जब पावा। अति अभिमानु हृदयँ तब आवा।।

bar̤a adhikāra daccha jaba pāvā। ati abhimānu hṛdaya~ taba āvā॥

नहिं कोउ अस जनमा जग माहीं। प्रभुता पाइ जाहि मद नाहीं।।

nahiṃ kou asa janamā jaga māhīṃ। prabhutā pāi jāhi mada nāhīṃ॥

दच्छ लिए मुनि बोलि सब करन लगे बड़ जाग।

daccha lie muni boli saba karana lage bar̤a jāga।

नेवते सादर सकल सुर जे पावत मख भाग।।60।।

nevate sādara sakala sura je pāvata makha bhāga॥60॥

किंनर नाग सिद्ध गंधर्बा। बधुन्ह समेत चले सुर सर्बा।।

kiṃnara nāga siddha gaṃdharbā। badhunha sameta cale sura sarbā॥

बिष्नु बिरंचि महेसु बिहाई। चले सकल सुर जान बनाई।।

biṣnu biraṃci mahesu bihāī। cale sakala sura jāna banāī॥

सतीं बिलोके ब्योम बिमाना। जात चले सुंदर बिधि नाना।।

satīṃ biloke byoma bimānā। jāta cale suṃdara bidhi nānā॥

सुर सुंदरी करहिं कल गाना। सुनत श्रवन छूटहिं मुनि ध्याना।।

sura suṃdarī karahiṃ kala gānā। sunata śravana chūṭahiṃ muni dhyānā॥

पूछेउ तब सिवँ कहेउ बखानी। पिता जग्य सुनि कछु हरषानी।।

pūcheu taba siva~ kaheu bakhānī। pitā jagya suni kachu haraṣānī॥

जौं महेसु मोहि आयसु देहीं। कुछ दिन जाइ रहौं मिस एहीं।।

jauṃ mahesu mohi āyasu dehīṃ। kucha dina jāi rahauṃ misa ehīṃ॥

पति परित्याग हृदय दुखु भारी। कहइ न निज अपराध बिचारी।।

pati parityāga hṛdaya dukhu bhārī। kahai na nija aparādha bicārī॥

बोली सती मनोहर बानी। भय संकोच प्रेम रस सानी।।

bolī satī manohara bānī। bhaya saṃkoca prema rasa sānī॥

पिता भवन उत्सव परम जौं प्रभु आयसु होइ।

pitā bhavana utsava parama jauṃ prabhu āyasu hoi।

तौ मै जाउँ कृपायतन सादर देखन सोइ।।61।।

tau mai jāu~ kṛpāyatana sādara dekhana soi॥61॥

कहेहु नीक मोरेहुँ मन भावा। यह अनुचित नहिं नेवत पठावा।।

kahehu nīka morehu~ mana bhāvā। yaha anucita nahiṃ nevata paṭhāvā॥

दच्छ सकल निज सुता बोलाई। हमरें बयर तुम्हउ बिसराई।।

daccha sakala nija sutā bolāī। hamareṃ bayara tumhau bisarāī॥

ब्रह्मसभाँ हम सन दुखु माना। तेहि तें अजहुँ करहिं अपमाना।।

brahmasabhā~ hama sana dukhu mānā। tehi teṃ ajahu~ karahiṃ apamānā॥

जौं बिनु बोलें जाहु भवानी। रहइ न सीलु सनेहु न कानी।।

jauṃ binu boleṃ jāhu bhavānī। rahai na sīlu sanehu na kānī॥

जदपि मित्र प्रभु पितु गुर गेहा। जाइअ बिनु बोलेहुँ न सँदेहा।।

jadapi mitra prabhu pitu gura gehā। jāia binu bolehu~ na sa~dehā॥

तदपि बिरोध मान जहँ कोई। तहाँ गएँ कल्यानु न होई।।

tadapi birodha māna jaha~ koī। tahā~ gae~ kalyānu na hoī॥

भाँति अनेक संभु समुझावा। भावी बस न ग्यानु उर आवा।।

bhā~ti aneka saṃbhu samujhāvā। bhāvī basa na gyānu ura āvā॥

कह प्रभु जाहु जो बिनहिं बोलाएँ। नहिं भलि बात हमारे भाएँ।।

kaha prabhu jāhu jo binahiṃ bolāe~। nahiṃ bhali bāta hamāre bhāe~॥

कहि देखा हर जतन बहु रहइ न दच्छकुमारि।

kahi dekhā hara jatana bahu rahai na dacchakumāri।

दिए मुख्य गन संग तब बिदा कीन्ह त्रिपुरारि।।62।।

die mukhya gana saṃga taba bidā kīnha tripurāri॥62॥

पिता भवन जब गई भवानी। दच्छ त्रास काहुँ न सनमानी।।

pitā bhavana jaba gaī bhavānī। daccha trāsa kāhu~ na sanamānī॥

सादर भलेहिं मिली एक माता। भगिनीं मिलीं बहुत मुसुकाता।।

sādara bhalehiṃ milī eka mātā। bhaginīṃ milīṃ bahuta musukātā॥

दच्छ न कछु पूछी कुसलाता। सतिहि बिलोकि जरे सब गाता।।

daccha na kachu pūchī kusalātā। satihi biloki jare saba gātā॥

सतीं जाइ देखेउ तब जागा। कतहुँ न दीख संभु कर भागा।।

satīṃ jāi dekheu taba jāgā। katahu~ na dīkha saṃbhu kara bhāgā॥

तब चित चढ़ेउ जो संकर कहेऊ। प्रभु अपमानु समुझि उर दहेऊ।।

taba cita car̤heu jo saṃkara kaheū। prabhu apamānu samujhi ura daheū॥

पाछिल दुखु न हृदयँ अस ब्यापा। जस यह भयउ महा परितापा।।

pāchila dukhu na hṛdaya~ asa byāpā। jasa yaha bhayau mahā paritāpā॥

जद्यपि जग दारुन दुख नाना। सब तें कठिन जाति अवमाना।।

jadyapi jaga dāruna dukha nānā। saba teṃ kaṭhina jāti avamānā॥

समुझि सो सतिहि भयउ अति क्रोधा। बहु बिधि जननीं कीन्ह प्रबोधा।।

samujhi so satihi bhayau ati krodhā। bahu bidhi jananīṃ kīnha prabodhā॥

सिव अपमानु न जाइ सहि हृदयँ न होइ प्रबोध।

siva apamānu na jāi sahi hṛdaya~ na hoi prabodha।

सकल सभहि हठि हटकि तब बोलीं बचन सक्रोध।।63।।

sakala sabhahi haṭhi haṭaki taba bolīṃ bacana sakrodha॥63॥

सुनहु सभासद सकल मुनिंदा। कही सुनी जिन्ह संकर निंदा।।

sunahu sabhāsada sakala muniṃdā। kahī sunī jinha saṃkara niṃdā॥

सो फलु तुरत लहब सब काहूँ। भली भाँति पछिताब पिताहूँ।।

so phalu turata lahaba saba kāhū~। bhalī bhā~ti pachitāba pitāhū~॥

संत संभु श्रीपति अपबादा। सुनिअ जहाँ तहँ असि मरजादा।।

saṃta saṃbhu śrīpati apabādā। sunia jahā~ taha~ asi marajādā॥

काटिअ तासु जीभ जो बसाई। श्रवन मूदि न त चलिअ पराई।।

kāṭia tāsu jībha jo basāī। śravana mūdi na ta calia parāī॥

जगदातमा महेसु पुरारी। जगत जनक सब के हितकारी।।

jagadātamā mahesu purārī। jagata janaka saba ke hitakārī॥

पिता मंदमति निंदत तेही। दच्छ सुक्र संभव यह देही।।

pitā maṃdamati niṃdata tehī। daccha sukra saṃbhava yaha dehī॥

तजिहउँ तुरत देह तेहि हेतू। उर धरि चंद्रमौलि बृषकेतू।।

tajihau~ turata deha tehi hetū। ura dhari caṃdramauli bṛṣaketū॥

अस कहि जोग अगिनि तनु जारा। भयउ सकल मख हाहाकारा।।

asa kahi joga agini tanu jārā। bhayau sakala makha hāhākārā॥

सती मरनु सुनि संभु गन लगे करन मख खीस।

satī maranu suni saṃbhu gana lage karana makha khīsa।

जग्य बिधंस बिलोकि भृगु रच्छा कीन्हि मुनीस।।64।।

jagya bidhaṃsa biloki bhṛgu racchā kīnhi munīsa॥64॥

समाचार सब संकर पाए। बीरभद्रु करि कोप पठाए।।

samācāra saba saṃkara pāe। bīrabhadru kari kopa paṭhāe॥

जग्य बिधंस जाइ तिन्ह कीन्हा। सकल सुरन्ह बिधिवत फलु दीन्हा।।

jagya bidhaṃsa jāi tinha kīnhā। sakala suranha bidhivata phalu dīnhā॥

भे जगबिदित दच्छ गति सोई। जसि कछु संभु बिमुख कै होई।।

bhe jagabidita daccha gati soī। jasi kachu saṃbhu bimukha kai hoī॥

यह इतिहास सकल जग जानी। ताते मैं संछेप बखानी।।

yaha itihāsa sakala jaga jānī। tāte maiṃ saṃchepa bakhānī॥

सतीं मरत हरि सन बरु मागा। जनम जनम सिव पद अनुरागा।।

satīṃ marata hari sana baru māgā। janama janama siva pada anurāgā॥

तेहि कारन हिमगिरि गृह जाई। जनमीं पारबती तनु पाई।।

tehi kārana himagiri gṛha jāī। janamīṃ pārabatī tanu pāī॥

जब तें उमा सैल गृह जाईं। सकल सिद्धि संपति तहँ छाई।।

jaba teṃ umā saila gṛha jāīṃ। sakala siddhi saṃpati taha~ chāī॥

जहँ तहँ मुनिन्ह सुआश्रम कीन्हे। उचित बास हिम भूधर दीन्हे।।

jaha~ taha~ muninha suāśrama kīnhe। ucita bāsa hima bhūdhara dīnhe॥

सदा सुमन फल सहित सब द्रुम नव नाना जाति।

sadā sumana phala sahita saba druma nava nānā jāti।

प्रगटीं सुंदर सैल पर मनि आकर बहु भाँति।।65।।

pragaṭīṃ suṃdara saila para mani ākara bahu bhā~ti॥65॥

सरिता सब पुनित जलु बहहीं। खग मृग मधुप सुखी सब रहहीं।।

saritā saba punita jalu bahahīṃ। khaga mṛga madhupa sukhī saba rahahīṃ॥

सहज बयरु सब जीवन्ह त्यागा। गिरि पर सकल करहिं अनुरागा।।

sahaja bayaru saba jīvanha tyāgā। giri para sakala karahiṃ anurāgā॥

सोह सैल गिरिजा गृह आएँ। जिमि जनु रामभगति के पाएँ।।

soha saila girijā gṛha āe~। jimi janu rāmabhagati ke pāe~॥

नित नूतन मंगल गृह तासू। ब्रह्मादिक गावहिं जसु जासू।।

nita nūtana maṃgala gṛha tāsū। brahmādika gāvahiṃ jasu jāsū॥

नारद समाचार सब पाए। कौतुकहीं गिरि गेह सिधाए।।

nārada samācāra saba pāe। kautukahīṃ giri geha sidhāe॥

सैलराज बड़ आदर कीन्हा। पद पखारि बर आसनु दीन्हा।।

sailarāja bar̤a ādara kīnhā। pada pakhāri bara āsanu dīnhā॥

नारि सहित मुनि पद सिरु नावा। चरन सलिल सबु भवनु सिंचावा।।

nāri sahita muni pada siru nāvā। carana salila sabu bhavanu siṃcāvā॥

निज सौभाग्य बहुत गिरि बरना। सुता बोलि मेली मुनि चरना।।

nija saubhāgya bahuta giri baranā। sutā boli melī muni caranā॥

त्रिकालग्य सर्बग्य तुम्ह गति सर्बत्र तुम्हारि।।

trikālagya sarbagya tumha gati sarbatra tumhāri॥

कहहु सुता के दोष गुन मुनिबर हृदयँ बिचारि।।66।।

kahahu sutā ke doṣa guna munibara hṛdaya~ bicāri॥66॥

कह मुनि बिहसि गूढ़ मृदु बानी। सुता तुम्हारि सकल गुन खानी।।

kaha muni bihasi gūr̤ha mṛdu bānī। sutā tumhāri sakala guna khānī॥

सुंदर सहज सुसील सयानी। नाम उमा अंबिका भवानी।।

suṃdara sahaja susīla sayānī। nāma umā aṃbikā bhavānī॥

सब लच्छन संपन्न कुमारी। होइहि संतत पियहि पिआरी।।

saba lacchana saṃpanna kumārī। hoihi saṃtata piyahi piārī॥

सदा अचल एहि कर अहिवाता। एहि तें जसु पैहहिं पितु माता।।

sadā acala ehi kara ahivātā। ehi teṃ jasu paihahiṃ pitu mātā॥

होइहि पूज्य सकल जग माहीं। एहि सेवत कछु दुर्लभ नाहीं।।

hoihi pūjya sakala jaga māhīṃ। ehi sevata kachu durlabha nāhīṃ॥

एहि कर नामु सुमिरि संसारा। त्रिय चढ़हहिं पतिब्रत असिधारा।।

ehi kara nāmu sumiri saṃsārā। triya car̤hahahiṃ patibrata asidhārā॥

सैल सुलच्छन सुता तुम्हारी। सुनहु जे अब अवगुन दुइ चारी।।

saila sulacchana sutā tumhārī। sunahu je aba avaguna dui cārī॥

अगुन अमान मातु पितु हीना। उदासीन सब संसय छीना।।

aguna amāna mātu pitu hīnā। udāsīna saba saṃsaya chīnā॥

जोगी जटिल अकाम मन नगन अमंगल बेष।।

jogī jaṭila akāma mana nagana amaṃgala beṣa॥

अस स्वामी एहि कहँ मिलिहि परी हस्त असि रेख।।67।।

asa svāmī ehi kaha~ milihi parī hasta asi rekha॥67॥

सुनि मुनि गिरा सत्य जियँ जानी। दुख दंपतिहि उमा हरषानी।।

suni muni girā satya jiya~ jānī। dukha daṃpatihi umā haraṣānī॥

नारदहुँ यह भेदु न जाना। दसा एक समुझब बिलगाना।।

nāradahu~ yaha bhedu na jānā। dasā eka samujhaba bilagānā॥

सकल सखीं गिरिजा गिरि मैना। पुलक सरीर भरे जल नैना।।

sakala sakhīṃ girijā giri mainā। pulaka sarīra bhare jala nainā॥

होइ न मृषा देवरिषि भाषा। उमा सो बचनु हृदयँ धरि राखा।।

hoi na mṛṣā devariṣi bhāṣā। umā so bacanu hṛdaya~ dhari rākhā॥

उपजेउ सिव पद कमल सनेहू। मिलन कठिन मन भा संदेहू।।

upajeu siva pada kamala sanehū। milana kaṭhina mana bhā saṃdehū॥

जानि कुअवसरु प्रीति दुराई। सखी उछँग बैठी पुनि जाई।।

jāni kuavasaru prīti durāī। sakhī ucha~ga baiṭhī puni jāī॥

झूठि न होइ देवरिषि बानी। सोचहि दंपति सखीं सयानी।।

jhūṭhi na hoi devariṣi bānī। socahi daṃpati sakhīṃ sayānī॥

उर धरि धीर कहइ गिरिराऊ। कहहु नाथ का करिअ उपाऊ।।

ura dhari dhīra kahai girirāū। kahahu nātha kā karia upāū॥

कह मुनीस हिमवंत सुनु जो बिधि लिखा लिलार।

kaha munīsa himavaṃta sunu jo bidhi likhā lilāra।

देव दनुज नर नाग मुनि कोउ न मेटनिहार।।68।।

deva danuja nara nāga muni kou na meṭanihāra॥68॥

तदपि एक मैं कहउँ उपाई। होइ करै जौं दैउ सहाई।।

tadapi eka maiṃ kahau~ upāī। hoi karai jauṃ daiu sahāī॥

जस बरु मैं बरनेउँ तुम्ह पाहीं। मिलहि उमहि तस संसय नाहीं।।

jasa baru maiṃ baraneu~ tumha pāhīṃ। milahi umahi tasa saṃsaya nāhīṃ॥

जे जे बर के दोष बखाने। ते सब सिव पहि मैं अनुमाने।।

je je bara ke doṣa bakhāne। te saba siva pahi maiṃ anumāne॥

जौं बिबाहु संकर सन होई। दोषउ गुन सम कह सबु कोई।।

jauṃ bibāhu saṃkara sana hoī। doṣau guna sama kaha sabu koī॥

जौं अहि सेज सयन हरि करहीं। बुध कछु तिन्ह कर दोषु न धरहीं।।

jauṃ ahi seja sayana hari karahīṃ। budha kachu tinha kara doṣu na dharahīṃ॥

भानु कृसानु सर्ब रस खाहीं। तिन्ह कहँ मंद कहत कोउ नाहीं।।

bhānu kṛsānu sarba rasa khāhīṃ। tinha kaha~ maṃda kahata kou nāhīṃ॥

सुभ अरु असुभ सलिल सब बहई। सुरसरि कोउ अपुनीत न कहई।।

subha aru asubha salila saba bahaī। surasari kou apunīta na kahaī॥

समरथ कहुँ नहिं दोषु गोसाई। रबि पावक सुरसरि की नाई।।

samaratha kahu~ nahiṃ doṣu gosāī। rabi pāvaka surasari kī nāī॥

जौं अस हिसिषा करहिं नर जड़ि बिबेक अभिमान।

jauṃ asa hisiṣā karahiṃ nara jar̤i bibeka abhimāna।

परहिं कलप भरि नरक महुँ जीव कि ईस समान।।69।।

parahiṃ kalapa bhari naraka mahu~ jīva ki īsa samāna॥69॥

सुरसरि जल कृत बारुनि जाना। कबहुँ न संत करहिं तेहि पाना।।

surasari jala kṛta bāruni jānā। kabahu~ na saṃta karahiṃ tehi pānā॥

सुरसरि मिलें सो पावन जैसें। ईस अनीसहि अंतरु तैसें।।

surasari mileṃ so pāvana jaiseṃ। īsa anīsahi aṃtaru taiseṃ॥

संभु सहज समरथ भगवाना। एहि बिबाहँ सब बिधि कल्याना।।

saṃbhu sahaja samaratha bhagavānā। ehi bibāha~ saba bidhi kalyānā॥

दुराराध्य पै अहहिं महेसू। आसुतोष पुनि किएँ कलेसू।।

durārādhya pai ahahiṃ mahesū। āsutoṣa puni kie~ kalesū॥

जौं तपु करै कुमारि तुम्हारी। भाविउ मेटि सकहिं त्रिपुरारी।।

jauṃ tapu karai kumāri tumhārī। bhāviu meṭi sakahiṃ tripurārī॥

जद्यपि बर अनेक जग माहीं। एहि कहँ सिव तजि दूसर नाहीं।।

jadyapi bara aneka jaga māhīṃ। ehi kaha~ siva taji dūsara nāhīṃ॥

बर दायक प्रनतारति भंजन। कृपासिंधु सेवक मन रंजन।।

bara dāyaka pranatārati bhaṃjana। kṛpāsiṃdhu sevaka mana raṃjana॥

इच्छित फल बिनु सिव अवराधे। लहिअ न कोटि जोग जप साधें।।

icchita phala binu siva avarādhe। lahia na koṭi joga japa sādheṃ॥

अस कहि नारद सुमिरि हरि गिरिजहि दीन्हि असीस।

asa kahi nārada sumiri hari girijahi dīnhi asīsa।

होइहि यह कल्यान अब संसय तजहु गिरीस।।70।।

hoihi yaha kalyāna aba saṃsaya tajahu girīsa॥70॥

कहि अस ब्रह्मभवन मुनि गयऊ। आगिल चरित सुनहु जस भयऊ।।

kahi asa brahmabhavana muni gayaū। āgila carita sunahu jasa bhayaū॥

पतिहि एकांत पाइ कह मैना। नाथ न मैं समुझे मुनि बैना।।

patihi ekāṃta pāi kaha mainā। nātha na maiṃ samujhe muni bainā॥

जौं घरु बरु कुलु होइ अनूपा। करिअ बिबाहु सुता अनुरुपा।।

jauṃ gharu baru kulu hoi anūpā। karia bibāhu sutā anurupā॥

न त कन्या बरु रहउ कुआरी। कंत उमा मम प्रानपिआरी।।

na ta kanyā baru rahau kuārī। kaṃta umā mama prānapiārī॥

जौं न मिलहि बरु गिरिजहि जोगू। गिरि जड़ सहज कहिहि सबु लोगू।।

jauṃ na milahi baru girijahi jogū। giri jar̤a sahaja kahihi sabu logū॥

सोइ बिचारि पति करेहु बिबाहू। जेहिं न बहोरि होइ उर दाहू।।

soi bicāri pati karehu bibāhū। jehiṃ na bahori hoi ura dāhū॥

अस कहि परि चरन धरि सीसा। बोले सहित सनेह गिरीसा।।

asa kahi pari carana dhari sīsā। bole sahita saneha girīsā॥

बरु पावक प्रगटै ससि माहीं। नारद बचनु अन्यथा नाहीं।।

baru pāvaka pragaṭai sasi māhīṃ। nārada bacanu anyathā nāhīṃ॥

प्रिया सोचु परिहरहु सबु सुमिरहु श्रीभगवान।

priyā socu pariharahu sabu sumirahu śrībhagavāna।

पारबतिहि निरमयउ जेहिं सोइ करिहि कल्यान।।71।।

pārabatihi niramayau jehiṃ soi karihi kalyāna॥71॥

अब जौ तुम्हहि सुता पर नेहू। तौ अस जाइ सिखावन देहू।।

aba jau tumhahi sutā para nehū। tau asa jāi sikhāvana dehū॥

करै सो तपु जेहिं मिलहिं महेसू। आन उपायँ न मिटहि कलेसू।।

karai so tapu jehiṃ milahiṃ mahesū। āna upāya~ na miṭahi kalesū॥

नारद बचन सगर्भ सहेतू। सुंदर सब गुन निधि बृषकेतू।।

nārada bacana sagarbha sahetū। suṃdara saba guna nidhi bṛṣaketū॥

अस बिचारि तुम्ह तजहु असंका। सबहि भाँति संकरु अकलंका।।

asa bicāri tumha tajahu asaṃkā। sabahi bhā~ti saṃkaru akalaṃkā॥

सुनि पति बचन हरषि मन माहीं। गई तुरत उठि गिरिजा पाहीं।।

suni pati bacana haraṣi mana māhīṃ। gaī turata uṭhi girijā pāhīṃ॥

उमहि बिलोकि नयन भरे बारी। सहित सनेह गोद बैठारी।।

umahi biloki nayana bhare bārī। sahita saneha goda baiṭhārī॥

बारहिं बार लेति उर लाई। गदगद कंठ न कछु कहि जाई।।

bārahiṃ bāra leti ura lāī। gadagada kaṃṭha na kachu kahi jāī॥

जगत मातु सर्बग्य भवानी। मातु सुखद बोलीं मृदु बानी।।

jagata mātu sarbagya bhavānī। mātu sukhada bolīṃ mṛdu bānī॥

सुनहि मातु मैं दीख अस सपन सुनावउँ तोहि।

sunahi mātu maiṃ dīkha asa sapana sunāvau~ tohi।

सुंदर गौर सुबिप्रबर अस उपदेसेउ मोहि।।72।।

suṃdara gaura subiprabara asa upadeseu mohi॥72॥

करहि जाइ तपु सैलकुमारी। नारद कहा सो सत्य बिचारी।।

karahi jāi tapu sailakumārī। nārada kahā so satya bicārī॥

मातु पितहि पुनि यह मत भावा। तपु सुखप्रद दुख दोष नसावा।।

mātu pitahi puni yaha mata bhāvā। tapu sukhaprada dukha doṣa nasāvā॥

तपबल रचइ प्रपंच बिधाता। तपबल बिष्नु सकल जग त्राता।।

tapabala racai prapaṃca bidhātā। tapabala biṣnu sakala jaga trātā॥

तपबल संभु करहिं संघारा। तपबल सेषु धरइ महिभारा।।

tapabala saṃbhu karahiṃ saṃghārā। tapabala seṣu dharai mahibhārā॥

तप अधार सब सृष्टि भवानी। करहि जाइ तपु अस जियँ जानी।।

tapa adhāra saba sṛṣṭi bhavānī। karahi jāi tapu asa jiya~ jānī॥

सुनत बचन बिसमित महतारी। सपन सुनायउ गिरिहि हँकारी।।

sunata bacana bisamita mahatārī। sapana sunāyau girihi ha~kārī॥

मातु पितुहि बहुबिधि समुझाई। चलीं उमा तप हित हरषाई।।

mātu pituhi bahubidhi samujhāī। calīṃ umā tapa hita haraṣāī॥

प्रिय परिवार पिता अरु माता। भए बिकल मुख आव न बाता।।

priya parivāra pitā aru mātā। bhae bikala mukha āva na bātā॥

बेदसिरा मुनि आइ तब सबहि कहा समुझाइ।।

bedasirā muni āi taba sabahi kahā samujhāi॥

पारबती महिमा सुनत रहे प्रबोधहि पाइ।।73।।

pārabatī mahimā sunata rahe prabodhahi pāi॥73॥

उर धरि उमा प्रानपति चरना। जाइ बिपिन लागीं तपु करना।।

ura dhari umā prānapati caranā। jāi bipina lāgīṃ tapu karanā॥

अति सुकुमार न तनु तप जोगू। पति पद सुमिरि तजेउ सबु भोगू।।

ati sukumāra na tanu tapa jogū। pati pada sumiri tajeu sabu bhogū॥

नित नव चरन उपज अनुरागा। बिसरी देह तपहिं मनु लागा।।

nita nava carana upaja anurāgā। bisarī deha tapahiṃ manu lāgā॥

संबत सहस मूल फल खाए। सागु खाइ सत बरष गवाँए।।

saṃbata sahasa mūla phala khāe। sāgu khāi sata baraṣa gavā~e॥

कछु दिन भोजनु बारि बतासा। किए कठिन कछु दिन उपबासा।।

kachu dina bhojanu bāri batāsā। kie kaṭhina kachu dina upabāsā॥

बेल पाती महि परइ सुखाई। तीनि सहस संबत सोई खाई।।

bela pātī mahi parai sukhāī। tīni sahasa saṃbata soī khāī॥

पुनि परिहरे सुखानेउ परना। उमहि नाम तब भयउ अपरना।।

puni parihare sukhāneu paranā। umahi nāma taba bhayau aparanā॥

देखि उमहि तप खीन सरीरा। ब्रह्मगिरा भै गगन गभीरा।।

dekhi umahi tapa khīna sarīrā। brahmagirā bhai gagana gabhīrā॥

भयउ मनोरथ सुफल तव सुनु गिरिजाकुमारि।

bhayau manoratha suphala tava sunu girijākumāri।

परिहरु दुसह कलेस सब अब मिलिहहिं त्रिपुरारि।।74।।

pariharu dusaha kalesa saba aba milihahiṃ tripurāri॥74॥

अस तपु काहुँ न कीन्ह भवानी। भउ अनेक धीर मुनि ग्यानी।।

asa tapu kāhu~ na kīnha bhavānī। bhau aneka dhīra muni gyānī॥

अब उर धरहु ब्रह्म बर बानी। सत्य सदा संतत सुचि जानी।।

aba ura dharahu brahma bara bānī। satya sadā saṃtata suci jānī॥

आवै पिता बोलावन जबहीं। हठ परिहरि घर जाएहु तबहीं।।

āvai pitā bolāvana jabahīṃ। haṭha parihari ghara jāehu tabahīṃ॥

मिलहिं तुम्हहि जब सप्त रिषीसा। जानेहु तब प्रमान बागीसा।।

milahiṃ tumhahi jaba sapta riṣīsā। jānehu taba pramāna bāgīsā॥

सुनत गिरा बिधि गगन बखानी। पुलक गात गिरिजा हरषानी।।

sunata girā bidhi gagana bakhānī। pulaka gāta girijā haraṣānī॥

उमा चरित सुंदर मैं गावा। सुनहु संभु कर चरित सुहावा।।

umā carita suṃdara maiṃ gāvā। sunahu saṃbhu kara carita suhāvā॥

जब तें सती जाइ तनु त्यागा। तब सें सिव मन भयउ बिरागा।।

jaba teṃ satī jāi tanu tyāgā। taba seṃ siva mana bhayau birāgā॥

जपहिं सदा रघुनायक नामा। जहँ तहँ सुनहिं राम गुन ग्रामा।।

japahiṃ sadā raghunāyaka nāmā। jaha~ taha~ sunahiṃ rāma guna grāmā॥

चिदानन्द सुखधाम सिव बिगत मोह मद काम।

cidānanda sukhadhāma siva bigata moha mada kāma।

बिचरहिं महि धरि हृदयँ हरि सकल लोक अभिराम।।75।।

bicarahiṃ mahi dhari hṛdaya~ hari sakala loka abhirāma॥75॥

कतहुँ मुनिन्ह उपदेसहिं ग्याना। कतहुँ राम गुन करहिं बखाना।।

katahu~ muninha upadesahiṃ gyānā। katahu~ rāma guna karahiṃ bakhānā॥

जदपि अकाम तदपि भगवाना। भगत बिरह दुख दुखित सुजाना।।

jadapi akāma tadapi bhagavānā। bhagata biraha dukha dukhita sujānā॥

एहि बिधि गयउ कालु बहु बीती। नित नै होइ राम पद प्रीती।।

ehi bidhi gayau kālu bahu bītī। nita nai hoi rāma pada prītī॥

नैमु प्रेमु संकर कर देखा। अबिचल हृदयँ भगति कै रेखा।।

naimu premu saṃkara kara dekhā। abicala hṛdaya~ bhagati kai rekhā॥

प्रगटै रामु कृतग्य कृपाला। रूप सील निधि तेज बिसाला।।

pragaṭai rāmu kṛtagya kṛpālā। rūpa sīla nidhi teja bisālā॥

बहु प्रकार संकरहि सराहा। तुम्ह बिनु अस ब्रतु को निरबाहा।।

bahu prakāra saṃkarahi sarāhā। tumha binu asa bratu ko nirabāhā॥

बहुबिधि राम सिवहि समुझावा। पारबती कर जन्मु सुनावा।।

bahubidhi rāma sivahi samujhāvā। pārabatī kara janmu sunāvā॥

अति पुनीत गिरिजा कै करनी। बिस्तर सहित कृपानिधि बरनी।।

ati punīta girijā kai karanī। bistara sahita kṛpānidhi baranī॥

अब बिनती मम सुनेहु सिव जौं मो पर निज नेहु।

aba binatī mama sunehu siva jauṃ mo para nija nehu।

जाइ बिबाहहु सैलजहि यह मोहि मागें देहु।।76।।

jāi bibāhahu sailajahi yaha mohi māgeṃ dehu॥76॥

कह सिव जदपि उचित अस नाहीं। नाथ बचन पुनि मेटि न जाहीं।।

kaha siva jadapi ucita asa nāhīṃ। nātha bacana puni meṭi na jāhīṃ॥

सिर धरि आयसु करिअ तुम्हारा। परम धरमु यह नाथ हमारा।।

sira dhari āyasu karia tumhārā। parama dharamu yaha nātha hamārā॥

मातु पिता गुर प्रभु कै बानी। बिनहिं बिचार करिअ सुभ जानी।।

mātu pitā gura prabhu kai bānī। binahiṃ bicāra karia subha jānī॥

तुम्ह सब भाँति परम हितकारी। अग्या सिर पर नाथ तुम्हारी।।

tumha saba bhā~ti parama hitakārī। agyā sira para nātha tumhārī॥

प्रभु तोषेउ सुनि संकर बचना। भक्ति बिबेक धर्म जुत रचना।।

prabhu toṣeu suni saṃkara bacanā। bhakti bibeka dharma juta racanā॥

कह प्रभु हर तुम्हार पन रहेऊ। अब उर राखेहु जो हम कहेऊ।।

kaha prabhu hara tumhāra pana raheū। aba ura rākhehu jo hama kaheū॥

अंतरधान भए अस भाषी। संकर सोइ मूरति उर राखी।।

aṃtaradhāna bhae asa bhāṣī। saṃkara soi mūrati ura rākhī॥

तबहिं सप्तरिषि सिव पहिं आए। बोले प्रभु अति बचन सुहाए।।

tabahiṃ saptariṣi siva pahiṃ āe। bole prabhu ati bacana suhāe॥

पारबती पहिं जाइ तुम्ह प्रेम परिच्छा लेहु।

pārabatī pahiṃ jāi tumha prema paricchā lehu।

गिरिहि प्रेरि पठएहु भवन दूरि करेहु संदेहु।।77।।

girihi preri paṭhaehu bhavana dūri karehu saṃdehu॥77॥

रिषिन्ह गौरि देखी तहँ कैसी। मूरतिमंत तपस्या जैसी।।

riṣinha gauri dekhī taha~ kaisī। mūratimaṃta tapasyā jaisī॥

बोले मुनि सुनु सैलकुमारी। करहु कवन कारन तपु भारी।।

bole muni sunu sailakumārī। karahu kavana kārana tapu bhārī॥

केहि अवराधहु का तुम्ह चहहू। हम सन सत्य मरमु किन कहहू।।

kehi avarādhahu kā tumha cahahū। hama sana satya maramu kina kahahū॥

कहत बचत मनु अति सकुचाई। हँसिहहु सुनि हमारि जड़ताई।।

kahata bacata manu ati sakucāī। ha~sihahu suni hamāri jar̤atāī॥

मनु हठ परा न सुनइ सिखावा। चहत बारि पर भीति उठावा।।

manu haṭha parā na sunai sikhāvā। cahata bāri para bhīti uṭhāvā॥

नारद कहा सत्य सोइ जाना। बिनु पंखन्ह हम चहहिं उड़ाना।।

nārada kahā satya soi jānā। binu paṃkhanha hama cahahiṃ ur̤ānā॥

देखहु मुनि अबिबेकु हमारा। चाहिअ सदा सिवहि भरतारा।।

dekhahu muni abibeku hamārā। cāhia sadā sivahi bharatārā॥

सुनत बचन बिहसे रिषय गिरिसंभव तब देह।

sunata bacana bihase riṣaya girisaṃbhava taba deha।

नारद कर उपदेसु सुनि कहहु बसेउ किसु गेह।।78।।

nārada kara upadesu suni kahahu baseu kisu geha॥78॥

दच्छसुतन्ह उपदेसेन्हि जाई। तिन्ह फिरि भवनु न देखा आई।।

dacchasutanha upadesenhi jāī। tinha phiri bhavanu na dekhā āī॥

चित्रकेतु कर घरु उन घाला। कनककसिपु कर पुनि अस हाला।।

citraketu kara gharu una ghālā। kanakakasipu kara puni asa hālā॥

नारद सिख जे सुनहिं नर नारी। अवसि होहिं तजि भवनु भिखारी।।

nārada sikha je sunahiṃ nara nārī। avasi hohiṃ taji bhavanu bhikhārī॥

मन कपटी तन सज्जन चीन्हा। आपु सरिस सबही चह कीन्हा।।

mana kapaṭī tana sajjana cīnhā। āpu sarisa sabahī caha kīnhā॥

तेहि कें बचन मानि बिस्वासा। तुम्ह चाहहु पति सहज उदासा।।

tehi keṃ bacana māni bisvāsā। tumha cāhahu pati sahaja udāsā॥

निर्गुन निलज कुबेष कपाली। अकुल अगेह दिगंबर ब्याली।।

nirguna nilaja kubeṣa kapālī। akula ageha digaṃbara byālī॥

कहहु कवन सुखु अस बरु पाएँ। भल भूलिहु ठग के बौराएँ।।

kahahu kavana sukhu asa baru pāe~। bhala bhūlihu ṭhaga ke baurāe~॥

पंच कहें सिवँ सती बिबाही। पुनि अवडेरि मराएन्हि ताही।।

paṃca kaheṃ siva~ satī bibāhī। puni avaḍeri marāenhi tāhī॥

अब सुख सोवत सोचु नहि भीख मागि भव खाहिं।

aba sukha sovata socu nahi bhīkha māgi bhava khāhiṃ।

सहज एकाकिन्ह के भवन कबहुँ कि नारि खटाहिं।।79।।

sahaja ekākinha ke bhavana kabahu~ ki nāri khaṭāhiṃ॥79॥

अजहूँ मानहु कहा हमारा। हम तुम्ह कहुँ बरु नीक बिचारा।।

ajahū~ mānahu kahā hamārā। hama tumha kahu~ baru nīka bicārā॥

अति सुंदर सुचि सुखद सुसीला। गावहिं बेद जासु जस लीला।।

ati suṃdara suci sukhada susīlā। gāvahiṃ beda jāsu jasa līlā॥

दूषन रहित सकल गुन रासी। श्रीपति पुर बैकुंठ निवासी।।

dūṣana rahita sakala guna rāsī। śrīpati pura baikuṃṭha nivāsī॥

अस बरु तुम्हहि मिलाउब आनी। सुनत बिहसि कह बचन भवानी।।

asa baru tumhahi milāuba ānī। sunata bihasi kaha bacana bhavānī॥

सत्य कहेहु गिरिभव तनु एहा। हठ न छूट छूटै बरु देहा।।

satya kahehu giribhava tanu ehā। haṭha na chūṭa chūṭai baru dehā॥

कनकउ पुनि पषान तें होई। जारेहुँ सहजु न परिहर सोई।।

kanakau puni paṣāna teṃ hoī। jārehu~ sahaju na parihara soī॥

नारद बचन न मैं परिहरऊँ। बसउ भवनु उजरउ नहिं डरऊँ।।

nārada bacana na maiṃ pariharaū~। basau bhavanu ujarau nahiṃ ḍaraū~॥

गुर कें बचन प्रतीति न जेही। सपनेहुँ सुगम न सुख सिधि तेही।।

gura keṃ bacana pratīti na jehī। sapanehu~ sugama na sukha sidhi tehī॥

महादेव अवगुन भवन बिष्नु सकल गुन धाम।

mahādeva avaguna bhavana biṣnu sakala guna dhāma।

जेहि कर मनु रम जाहि सन तेहि तेही सन काम।।80।।

jehi kara manu rama jāhi sana tehi tehī sana kāma॥80॥

जौं तुम्ह मिलतेहु प्रथम मुनीसा। सुनतिउँ सिख तुम्हारि धरि सीसा।।

jauṃ tumha milatehu prathama munīsā। sunatiu~ sikha tumhāri dhari sīsā॥

अब मैं जन्मु संभु हित हारा। को गुन दूषन करै बिचारा।।

aba maiṃ janmu saṃbhu hita hārā। ko guna dūṣana karai bicārā॥

जौं तुम्हरे हठ हृदयँ बिसेषी। रहि न जाइ बिनु किएँ बरेषी।।

jauṃ tumhare haṭha hṛdaya~ biseṣī। rahi na jāi binu kie~ bareṣī॥

तौ कौतुकिअन्ह आलसु नाहीं। बर कन्या अनेक जग माहीं।।

tau kautukianha ālasu nāhīṃ। bara kanyā aneka jaga māhīṃ॥

जन्म कोटि लगि रगर हमारी। बरउँ संभु न त रहउँ कुआरी।।

janma koṭi lagi ragara hamārī। barau~ saṃbhu na ta rahau~ kuārī॥

तजउँ न नारद कर उपदेसू। आपु कहहि सत बार महेसू।।

tajau~ na nārada kara upadesū। āpu kahahi sata bāra mahesū॥

मैं पा परउँ कहइ जगदंबा। तुम्ह गृह गवनहु भयउ बिलंबा।।

maiṃ pā parau~ kahai jagadaṃbā। tumha gṛha gavanahu bhayau bilaṃbā॥

देखि प्रेमु बोले मुनि ग्यानी। जय जय जगदंबिके भवानी।।

dekhi premu bole muni gyānī। jaya jaya jagadaṃbike bhavānī॥

तुम्ह माया भगवान सिव सकल जगत पितु मातु।

tumha māyā bhagavāna siva sakala jagata pitu mātu।

नाइ चरन सिर मुनि चले पुनि पुनि हरषत गातु।।81।।

nāi carana sira muni cale puni puni haraṣata gātu॥81॥

जाइ मुनिन्ह हिमवंतु पठाए। करि बिनती गिरजहिं गृह ल्याए।।

jāi muninha himavaṃtu paṭhāe। kari binatī girajahiṃ gṛha lyāe॥

बहुरि सप्तरिषि सिव पहिं जाई। कथा उमा कै सकल सुनाई।।

bahuri saptariṣi siva pahiṃ jāī। kathā umā kai sakala sunāī॥

भए मगन सिव सुनत सनेहा। हरषि सप्तरिषि गवने गेहा।।

bhae magana siva sunata sanehā। haraṣi saptariṣi gavane gehā॥

मनु थिर करि तब संभु सुजाना। लगे करन रघुनायक ध्याना।।

manu thira kari taba saṃbhu sujānā। lage karana raghunāyaka dhyānā॥

तारकु असुर भयउ तेहि काला। भुज प्रताप बल तेज बिसाला।।

tāraku asura bhayau tehi kālā। bhuja pratāpa bala teja bisālā॥

तेंहि सब लोक लोकपति जीते। भए देव सुख संपति रीते।।

teṃhi saba loka lokapati jīte। bhae deva sukha saṃpati rīte॥

अजर अमर सो जीति न जाई। हारे सुर करि बिबिध लराई।।

ajara amara so jīti na jāī। hāre sura kari bibidha larāī॥

तब बिरंचि सन जाइ पुकारे। देखे बिधि सब देव दुखारे।।

taba biraṃci sana jāi pukāre। dekhe bidhi saba deva dukhāre॥

सब सन कहा बुझाइ बिधि दनुज निधन तब होइ।

saba sana kahā bujhāi bidhi danuja nidhana taba hoi।

संभु सुक्र संभूत सुत एहि जीतइ रन सोइ।।82।।

saṃbhu sukra saṃbhūta suta ehi jītai rana soi॥82॥

मोर कहा सुनि करहु उपाई। होइहि ईस्वर करिहि सहाई।।

mora kahā suni karahu upāī। hoihi īsvara karihi sahāī॥

सतीं जो तजी दच्छ मख देहा। जनमी जाइ हिमाचल गेहा।।

satīṃ jo tajī daccha makha dehā। janamī jāi himācala gehā॥

तेहिं तपु कीन्ह संभु पति लागी। सिव समाधि बैठे सबु त्यागी।।

tehiṃ tapu kīnha saṃbhu pati lāgī। siva samādhi baiṭhe sabu tyāgī॥

जदपि अहइ असमंजस भारी। तदपि बात एक सुनहु हमारी।।

jadapi ahai asamaṃjasa bhārī। tadapi bāta eka sunahu hamārī॥

पठवहु कामु जाइ सिव पाहीं। करै छोभु संकर मन माहीं।।

paṭhavahu kāmu jāi siva pāhīṃ। karai chobhu saṃkara mana māhīṃ॥

तब हम जाइ सिवहि सिर नाई। करवाउब बिबाहु बरिआई।।

taba hama jāi sivahi sira nāī। karavāuba bibāhu bariāī॥

एहि बिधि भलेहि देवहित होई। मर अति नीक कहइ सबु कोई।।

ehi bidhi bhalehi devahita hoī। mara ati nīka kahai sabu koī॥

अस्तुति सुरन्ह कीन्हि अति हेतू। प्रगटेउ बिषमबान झषकेतू।।

astuti suranha kīnhi ati hetū। pragaṭeu biṣamabāna jhaṣaketū॥

सुरन्ह कहीं निज बिपति सब सुनि मन कीन्ह बिचार।

suranha kahīṃ nija bipati saba suni mana kīnha bicāra।

संभु बिरोध न कुसल मोहि बिहसि कहेउ अस मार।।83।।

saṃbhu birodha na kusala mohi bihasi kaheu asa māra॥83॥

तदपि करब मैं काजु तुम्हारा। श्रुति कह परम धरम उपकारा।।

tadapi karaba maiṃ kāju tumhārā। śruti kaha parama dharama upakārā॥

पर हित लागि तजइ जो देही। संतत संत प्रसंसहिं तेही।।

para hita lāgi tajai jo dehī। saṃtata saṃta prasaṃsahiṃ tehī॥

अस कहि चलेउ सबहि सिरु नाई। सुमन धनुष कर सहित सहाई।।

asa kahi caleu sabahi siru nāī। sumana dhanuṣa kara sahita sahāī॥

चलत मार अस हृदयँ बिचारा। सिव बिरोध ध्रुव मरनु हमारा।।

calata māra asa hṛdaya~ bicārā। siva birodha dhruva maranu hamārā॥

तब आपन प्रभाउ बिस्तारा। निज बस कीन्ह सकल संसारा।।

taba āpana prabhāu bistārā। nija basa kīnha sakala saṃsārā॥

कोपेउ जबहि बारिचरकेतू। छन महुँ मिटे सकल श्रुति सेतू।।

kopeu jabahi bāricaraketū। chana mahu~ miṭe sakala śruti setū॥

ब्रह्मचर्ज ब्रत संजम नाना। धीरज धरम ग्यान बिग्याना।।

brahmacarja brata saṃjama nānā। dhīraja dharama gyāna bigyānā॥

सदाचार जप जोग बिरागा। सभय बिबेक कटकु सब भागा।।

sadācāra japa joga birāgā। sabhaya bibeka kaṭaku saba bhāgā॥

भागेउ बिबेक सहाय सहित सो सुभट संजुग महि मुरे।

bhāgeu bibeka sahāya sahita so subhaṭa saṃjuga mahi mure।

सदग्रंथ पर्बत कंदरन्हि महुँ जाइ तेहि अवसर दुरे।।

sadagraṃtha parbata kaṃdaranhi mahu~ jāi tehi avasara dure॥

होनिहार का करतार को रखवार जग खरभरु परा।

honihāra kā karatāra ko rakhavāra jaga kharabharu parā।

दुइ माथ केहि रतिनाथ जेहि कहुँ कोपि कर धनु सरु धरा।।

dui mātha kehi ratinātha jehi kahu~ kopi kara dhanu saru dharā॥

जे सजीव जग अचर चर नारि पुरुष अस नाम।

je sajīva jaga acara cara nāri puruṣa asa nāma।

ते निज निज मरजाद तजि भए सकल बस काम।।84।।

te nija nija marajāda taji bhae sakala basa kāma॥84॥

सब के हृदयँ मदन अभिलाषा। लता निहारि नवहिं तरु साखा।।

saba ke hṛdaya~ madana abhilāṣā। latā nihāri navahiṃ taru sākhā॥

नदीं उमगि अंबुधि कहुँ धाई। संगम करहिं तलाव तलाई।।

nadīṃ umagi aṃbudhi kahu~ dhāī। saṃgama karahiṃ talāva talāī॥

जहँ असि दसा जड़न्ह कै बरनी। को कहि सकइ सचेतन करनी।।

jaha~ asi dasā jar̤anha kai baranī। ko kahi sakai sacetana karanī॥

पसु पच्छी नभ जल थलचारी। भए कामबस समय बिसारी।।

pasu pacchī nabha jala thalacārī। bhae kāmabasa samaya bisārī॥

मदन अंध ब्याकुल सब लोका। निसि दिनु नहिं अवलोकहिं कोका।।

madana aṃdha byākula saba lokā। nisi dinu nahiṃ avalokahiṃ kokā॥

देव दनुज नर किंनर ब्याला। प्रेत पिसाच भूत बेताला।।

deva danuja nara kiṃnara byālā। preta pisāca bhūta betālā॥

इन्ह कै दसा न कहेउँ बखानी। सदा काम के चेरे जानी।।

inha kai dasā na kaheu~ bakhānī। sadā kāma ke cere jānī॥

सिद्ध बिरक्त महामुनि जोगी। तेपि कामबस भए बियोगी।।

siddha birakta mahāmuni jogī। tepi kāmabasa bhae biyogī॥

भए कामबस जोगीस तापस पावँरन्हि की को कहै।

bhae kāmabasa jogīsa tāpasa pāva~ranhi kī ko kahai।

देखहिं चराचर नारिमय जे ब्रह्ममय देखत रहे।।

dekhahiṃ carācara nārimaya je brahmamaya dekhata rahe॥

अबला बिलोकहिं पुरुषमय जगु पुरुष सब अबलामयं।

abalā bilokahiṃ puruṣamaya jagu puruṣa saba abalāmayaṃ।

दुइ दंड भरि ब्रह्मांड भीतर कामकृत कौतुक अयं।।

dui daṃḍa bhari brahmāṃḍa bhītara kāmakṛta kautuka ayaṃ॥

धरी न काहूँ धिर सबके मन मनसिज हरे।

dharī na kāhū~ dhira sabake mana manasija hare।

जे राखे रघुबीर ते उबरे तेहि काल महुँ।।85।।

je rākhe raghubīra te ubare tehi kāla mahu~॥85॥

उभय घरी अस कौतुक भयऊ। जौ लगि कामु संभु पहिं गयऊ।।

ubhaya gharī asa kautuka bhayaū। jau lagi kāmu saṃbhu pahiṃ gayaū॥

सिवहि बिलोकि ससंकेउ मारू। भयउ जथाथिति सबु संसारू।।

sivahi biloki sasaṃkeu mārū। bhayau jathāthiti sabu saṃsārū॥

भए तुरत सब जीव सुखारे। जिमि मद उतरि गएँ मतवारे।।

bhae turata saba jīva sukhāre। jimi mada utari gae~ matavāre॥

रुद्रहि देखि मदन भय माना। दुराधरष दुर्गम भगवाना।।

rudrahi dekhi madana bhaya mānā। durādharaṣa durgama bhagavānā॥

फिरत लाज कछु करि नहिं जाई। मरनु ठानि मन रचेसि उपाई।।

phirata lāja kachu kari nahiṃ jāī। maranu ṭhāni mana racesi upāī॥

प्रगटेसि तुरत रुचिर रितुराजा। कुसुमित नव तरु राजि बिराजा।।

pragaṭesi turata rucira riturājā। kusumita nava taru rāji birājā॥

बन उपबन बापिका तड़ागा। परम सुभग सब दिसा बिभागा।।

bana upabana bāpikā tar̤āgā। parama subhaga saba disā bibhāgā॥

जहँ तहँ जनु उमगत अनुरागा। देखि मुएहुँ मन मनसिज जागा।।

jaha~ taha~ janu umagata anurāgā। dekhi muehu~ mana manasija jāgā॥

जागइ मनोभव मुएहुँ मन बन सुभगता न परै कही।

jāgai manobhava muehu~ mana bana subhagatā na parai kahī।

सीतल सुगंध सुमंद मारुत मदन अनल सखा सही।।

sītala sugaṃdha sumaṃda māruta madana anala sakhā sahī॥

बिकसे सरन्हि बहु कंज गुंजत पुंज मंजुल मधुकरा।

bikase saranhi bahu kaṃja guṃjata puṃja maṃjula madhukarā।

कलहंस पिक सुक सरस रव करि गान नाचहिं अपछरा।।

kalahaṃsa pika suka sarasa rava kari gāna nācahiṃ apacharā॥

सकल कला करि कोटि बिधि हारेउ सेन समेत।

sakala kalā kari koṭi bidhi hāreu sena sameta।

चली न अचल समाधि सिव कोपेउ हृदयनिकेत।।86।।

calī na acala samādhi siva kopeu hṛdayaniketa॥86॥

देखि रसाल बिटप बर साखा। तेहि पर चढ़ेउ मदनु मन माखा।।

dekhi rasāla biṭapa bara sākhā। tehi para car̤heu madanu mana mākhā॥

सुमन चाप निज सर संधाने। अति रिस ताकि श्रवन लगि ताने।।

sumana cāpa nija sara saṃdhāne। ati risa tāki śravana lagi tāne॥

छाड़े बिषम बिसिख उर लागे। छुटि समाधि संभु तब जागे।।

chār̤e biṣama bisikha ura lāge। chuṭi samādhi saṃbhu taba jāge॥

भयउ ईस मन छोभु बिसेषी। नयन उघारि सकल दिसि देखी।।

bhayau īsa mana chobhu biseṣī। nayana ughāri sakala disi dekhī॥

सौरभ पल्लव मदनु बिलोका। भयउ कोपु कंपेउ त्रैलोका।।

saurabha pallava madanu bilokā। bhayau kopu kaṃpeu trailokā॥

तब सिवँ तीसर नयन उघारा। चितवत कामु भयउ जरि छारा।।

taba siva~ tīsara nayana ughārā। citavata kāmu bhayau jari chārā॥

हाहाकार भयउ जग भारी। डरपे सुर भए असुर सुखारी।।

hāhākāra bhayau jaga bhārī। ḍarape sura bhae asura sukhārī॥

समुझि कामसुखु सोचहिं भोगी। भए अकंटक साधक जोगी।।

samujhi kāmasukhu socahiṃ bhogī। bhae akaṃṭaka sādhaka jogī॥

जोगि अकंटक भए पति गति सुनत रति मुरुछित भई।

jogi akaṃṭaka bhae pati gati sunata rati muruchita bhaī।

रोदति बदति बहु भाँति करुना करति संकर पहिं गई।

rodati badati bahu bhā~ti karunā karati saṃkara pahiṃ gaī।

अति प्रेम करि बिनती बिबिध बिधि जोरि कर सन्मुख रही।

ati prema kari binatī bibidha bidhi jori kara sanmukha rahī।

प्रभु आसुतोष कृपाल सिव अबला निरखि बोले सही।।

prabhu āsutoṣa kṛpāla siva abalā nirakhi bole sahī॥

अब तें रति तव नाथ कर होइहि नामु अनंगु।

aba teṃ rati tava nātha kara hoihi nāmu anaṃgu।

बिनु बपु ब्यापिहि सबहि पुनि सुनु निज मिलन प्रसंगु।।87।।

binu bapu byāpihi sabahi puni sunu nija milana prasaṃgu॥87॥

जब जदुबंस कृष्न अवतारा। होइहि हरन महा महिभारा।।

jaba jadubaṃsa kṛṣna avatārā। hoihi harana mahā mahibhārā॥

कृष्न तनय होइहि पति तोरा। बचनु अन्यथा होइ न मोरा।।

kṛṣna tanaya hoihi pati torā। bacanu anyathā hoi na morā॥

रति गवनी सुनि संकर बानी। कथा अपर अब कहउँ बखानी।।

rati gavanī suni saṃkara bānī। kathā apara aba kahau~ bakhānī॥

देवन्ह समाचार सब पाए। ब्रह्मादिक बैकुंठ सिधाए।।

devanha samācāra saba pāe। brahmādika baikuṃṭha sidhāe॥

सब सुर बिष्नु बिरंचि समेता। गए जहाँ सिव कृपानिकेता।।

saba sura biṣnu biraṃci sametā। gae jahā~ siva kṛpāniketā॥

पृथक पृथक तिन्ह कीन्हि प्रसंसा। भए प्रसन्न चंद्र अवतंसा।।

pṛthaka pṛthaka tinha kīnhi prasaṃsā। bhae prasanna caṃdra avataṃsā॥

बोले कृपासिंधु बृषकेतू। कहहु अमर आए केहि हेतू।।

bole kṛpāsiṃdhu bṛṣaketū। kahahu amara āe kehi hetū॥

कह बिधि तुम्ह प्रभु अंतरजामी। तदपि भगति बस बिनवउँ स्वामी।।

kaha bidhi tumha prabhu aṃtarajāmī। tadapi bhagati basa binavau~ svāmī॥

सकल सुरन्ह के हृदयँ अस संकर परम उछाहु।

sakala suranha ke hṛdaya~ asa saṃkara parama uchāhu।

निज नयनन्हि देखा चहहिं नाथ तुम्हार बिबाहु।।88।।

nija nayananhi dekhā cahahiṃ nātha tumhāra bibāhu॥88॥

यह उत्सव देखिअ भरि लोचन। सोइ कछु करहु मदन मद मोचन।

yaha utsava dekhia bhari locana। soi kachu karahu madana mada mocana।

कामु जारि रति कहुँ बरु दीन्हा। कृपासिंधु यह अति भल कीन्हा।।

kāmu jāri rati kahu~ baru dīnhā। kṛpāsiṃdhu yaha ati bhala kīnhā॥

सासति करि पुनि करहिं पसाऊ। नाथ प्रभुन्ह कर सहज सुभाऊ।।

sāsati kari puni karahiṃ pasāū। nātha prabhunha kara sahaja subhāū॥

पारबतीं तपु कीन्ह अपारा। करहु तासु अब अंगीकारा।।

pārabatīṃ tapu kīnha apārā। karahu tāsu aba aṃgīkārā॥

सुनि बिधि बिनय समुझि प्रभु बानी। ऐसेइ होउ कहा सुखु मानी।।

suni bidhi binaya samujhi prabhu bānī। aisei hou kahā sukhu mānī॥

तब देवन्ह दुंदुभीं बजाईं। बरषि सुमन जय जय सुर साई।।

taba devanha duṃdubhīṃ bajāīṃ। baraṣi sumana jaya jaya sura sāī॥

अवसरु जानि सप्तरिषि आए। तुरतहिं बिधि गिरिभवन पठाए।।

avasaru jāni saptariṣi āe। turatahiṃ bidhi giribhavana paṭhāe॥

प्रथम गए जहँ रही भवानी। बोले मधुर बचन छल सानी।।

prathama gae jaha~ rahī bhavānī। bole madhura bacana chala sānī॥

कहा हमार न सुनेहु तब नारद कें उपदेस।

kahā hamāra na sunehu taba nārada keṃ upadesa।

अब भा झूठ तुम्हार पन जारेउ कामु महेस।।89।।

aba bhā jhūṭha tumhāra pana jāreu kāmu mahesa॥89॥

सुनि बोलीं मुसकाइ भवानी। उचित कहेहु मुनिबर बिग्यानी।।

suni bolīṃ musakāi bhavānī। ucita kahehu munibara bigyānī॥

तुम्हरें जान कामु अब जारा। अब लगि संभु रहे सबिकारा।।

tumhareṃ jāna kāmu aba jārā। aba lagi saṃbhu rahe sabikārā॥

हमरें जान सदा सिव जोगी। अज अनवद्य अकाम अभोगी।।

hamareṃ jāna sadā siva jogī। aja anavadya akāma abhogī॥

जौं मैं सिव सेये अस जानी। प्रीति समेत कर्म मन बानी।।

jauṃ maiṃ siva seye asa jānī। prīti sameta karma mana bānī॥

तौ हमार पन सुनहु मुनीसा। करिहहिं सत्य कृपानिधि ईसा।।

tau hamāra pana sunahu munīsā। karihahiṃ satya kṛpānidhi īsā॥

तुम्ह जो कहा हर जारेउ मारा। सोइ अति बड़ अबिबेकु तुम्हारा।।

tumha jo kahā hara jāreu mārā। soi ati bar̤a abibeku tumhārā॥

तात अनल कर सहज सुभाऊ। हिम तेहि निकट जाइ नहिं काऊ।।

tāta anala kara sahaja subhāū। hima tehi nikaṭa jāi nahiṃ kāū॥

गएँ समीप सो अवसि नसाई। असि मन्मथ महेस की नाई।।

gae~ samīpa so avasi nasāī। asi manmatha mahesa kī nāī॥

हियँ हरषे मुनि बचन सुनि देखि प्रीति बिस्वास।।

hiya~ haraṣe muni bacana suni dekhi prīti bisvāsa॥

चले भवानिहि नाइ सिर गए हिमाचल पास।।90।।

cale bhavānihi nāi sira gae himācala pāsa॥90॥

सबु प्रसंगु गिरिपतिहि सुनावा। मदन दहन सुनि अति दुखु पावा।।

sabu prasaṃgu giripatihi sunāvā। madana dahana suni ati dukhu pāvā॥

बहुरि कहेउ रति कर बरदाना। सुनि हिमवंत बहुत सुखु माना।।

bahuri kaheu rati kara baradānā। suni himavaṃta bahuta sukhu mānā॥

हृदयँ बिचारि संभु प्रभुताई। सादर मुनिबर लिए बोलाई।।

hṛdaya~ bicāri saṃbhu prabhutāī। sādara munibara lie bolāī॥

सुदिनु सुनखतु सुघरी सोचाई। बेगि बेदबिधि लगन धराई।।

sudinu sunakhatu sugharī socāī। begi bedabidhi lagana dharāī॥

पत्री सप्तरिषिन्ह सोइ दीन्ही। गहि पद बिनय हिमाचल कीन्ही।।

patrī saptariṣinha soi dīnhī। gahi pada binaya himācala kīnhī॥

जाइ बिधिहि दीन्हि सो पाती। बाचत प्रीति न हृदयँ समाती।।

jāi bidhihi dīnhi so pātī। bācata prīti na hṛdaya~ samātī॥

लगन बाचि अज सबहि सुनाई। हरषे मुनि सब सुर समुदाई।।

lagana bāci aja sabahi sunāī। haraṣe muni saba sura samudāī॥

सुमन बृष्टि नभ बाजन बाजे। मंगल कलस दसहुँ दिसि साजे।।

sumana bṛṣṭi nabha bājana bāje। maṃgala kalasa dasahu~ disi sāje॥

लगे सँवारन सकल सुर बाहन बिबिध बिमान।

lage sa~vārana sakala sura bāhana bibidha bimāna।

होहि सगुन मंगल सुभद करहिं अपछरा गान।।91।।

hohi saguna maṃgala subhada karahiṃ apacharā gāna॥91॥

सिवहि संभु गन करहिं सिंगारा। जटा मुकुट अहि मौरु सँवारा।।

sivahi saṃbhu gana karahiṃ siṃgārā। jaṭā mukuṭa ahi mauru sa~vārā॥

कुंडल कंकन पहिरे ब्याला। तन बिभूति पट केहरि छाला।।

kuṃḍala kaṃkana pahire byālā। tana bibhūti paṭa kehari chālā॥

ससि ललाट सुंदर सिर गंगा। नयन तीनि उपबीत भुजंगा।।

sasi lalāṭa suṃdara sira gaṃgā। nayana tīni upabīta bhujaṃgā॥

गरल कंठ उर नर सिर माला। असिव बेष सिवधाम कृपाला।।

garala kaṃṭha ura nara sira mālā। asiva beṣa sivadhāma kṛpālā॥

कर त्रिसूल अरु डमरु बिराजा। चले बसहँ चढ़ि बाजहिं बाजा।।

kara trisūla aru ḍamaru birājā। cale basaha~ car̤hi bājahiṃ bājā॥

देखि सिवहि सुरत्रिय मुसुकाहीं। बर लायक दुलहिनि जग नाहीं।।

dekhi sivahi suratriya musukāhīṃ। bara lāyaka dulahini jaga nāhīṃ॥

बिष्नु बिरंचि आदि सुरब्राता। चढ़ि चढ़ि बाहन चले बराता।।

biṣnu biraṃci ādi surabrātā। car̤hi car̤hi bāhana cale barātā॥

सुर समाज सब भाँति अनूपा। नहिं बरात दूलह अनुरूपा।।

sura samāja saba bhā~ti anūpā। nahiṃ barāta dūlaha anurūpā॥

बिष्नु कहा अस बिहसि तब बोलि सकल दिसिराज।

biṣnu kahā asa bihasi taba boli sakala disirāja।

बिलग बिलग होइ चलहु सब निज निज सहित समाज।।92।।

bilaga bilaga hoi calahu saba nija nija sahita samāja॥92॥

बर अनुहारि बरात न भाई। हँसी करैहहु पर पुर जाई।।

bara anuhāri barāta na bhāī। ha~sī karaihahu para pura jāī॥

बिष्नु बचन सुनि सुर मुसकाने। निज निज सेन सहित बिलगाने।।

biṣnu bacana suni sura musakāne। nija nija sena sahita bilagāne॥

मनहीं मन महेसु मुसुकाहीं। हरि के बिंग्य बचन नहिं जाहीं।।

manahīṃ mana mahesu musukāhīṃ। hari ke biṃgya bacana nahiṃ jāhīṃ॥

अति प्रिय बचन सुनत प्रिय केरे। भृंगिहि प्रेरि सकल गन टेरे।।

ati priya bacana sunata priya kere। bhṛṃgihi preri sakala gana ṭere॥

सिव अनुसासन सुनि सब आए। प्रभु पद जलज सीस तिन्ह नाए।।

siva anusāsana suni saba āe। prabhu pada jalaja sīsa tinha nāe॥

नाना बाहन नाना बेषा। बिहसे सिव समाज निज देखा।।

nānā bāhana nānā beṣā। bihase siva samāja nija dekhā॥

कोउ मुखहीन बिपुल मुख काहू। बिनु पद कर कोउ बहु पद बाहू।।

kou mukhahīna bipula mukha kāhū। binu pada kara kou bahu pada bāhū॥

बिपुल नयन कोउ नयन बिहीना। रिष्टपुष्ट कोउ अति तनखीना।।

bipula nayana kou nayana bihīnā। riṣṭapuṣṭa kou ati tanakhīnā॥

तन खीन कोउ अति पीन पावन कोउ अपावन गति धरें।

tana khīna kou ati pīna pāvana kou apāvana gati dhareṃ।

भूषन कराल कपाल कर सब सद्य सोनित तन भरें।।

bhūṣana karāla kapāla kara saba sadya sonita tana bhareṃ॥

खर स्वान सुअर सृकाल मुख गन बेष अगनित को गनै।

khara svāna suara sṛkāla mukha gana beṣa aganita ko ganai।

बहु जिनस प्रेत पिसाच जोगि जमात बरनत नहिं बनै।।

bahu jinasa preta pisāca jogi jamāta baranata nahiṃ banai॥

नाचहिं गावहिं गीत परम तरंगी भूत सब।

nācahiṃ gāvahiṃ gīta parama taraṃgī bhūta saba।

देखत अति बिपरीत बोलहिं बचन बिचित्र बिधि।।93।।

dekhata ati biparīta bolahiṃ bacana bicitra bidhi॥93॥

जस दूलहु तसि बनी बराता। कौतुक बिबिध होहिं मग जाता।।

jasa dūlahu tasi banī barātā। kautuka bibidha hohiṃ maga jātā॥

इहाँ हिमाचल रचेउ बिताना। अति बिचित्र नहिं जाइ बखाना।।

ihā~ himācala raceu bitānā। ati bicitra nahiṃ jāi bakhānā॥

सैल सकल जहँ लगि जग माहीं। लघु बिसाल नहिं बरनि सिराहीं।।

saila sakala jaha~ lagi jaga māhīṃ। laghu bisāla nahiṃ barani sirāhīṃ॥

बन सागर सब नदीं तलावा। हिमगिरि सब कहुँ नेवत पठावा।।

bana sāgara saba nadīṃ talāvā। himagiri saba kahu~ nevata paṭhāvā॥

कामरूप सुंदर तन धारी। सहित समाज सहित बर नारी।।

kāmarūpa suṃdara tana dhārī। sahita samāja sahita bara nārī॥

गए सकल तुहिनाचल गेहा। गावहिं मंगल सहित सनेहा।।

gae sakala tuhinācala gehā। gāvahiṃ maṃgala sahita sanehā॥

प्रथमहिं गिरि बहु गृह सँवराए। जथाजोगु तहँ तहँ सब छाए।।

prathamahiṃ giri bahu gṛha sa~varāe। jathājogu taha~ taha~ saba chāe॥

पुर सोभा अवलोकि सुहाई। लागइ लघु बिरंचि निपुनाई।।

pura sobhā avaloki suhāī। lāgai laghu biraṃci nipunāī॥

लघु लाग बिधि की निपुनता अवलोकि पुर सोभा सही।

laghu lāga bidhi kī nipunatā avaloki pura sobhā sahī।

बन बाग कूप तड़ाग सरिता सुभग सब सक को कही।।

bana bāga kūpa tar̤āga saritā subhaga saba saka ko kahī॥

मंगल बिपुल तोरन पताका केतु गृह गृह सोहहीं।।

maṃgala bipula torana patākā ketu gṛha gṛha sohahīṃ॥

बनिता पुरुष सुंदर चतुर छबि देखि मुनि मन मोहहीं।।

banitā puruṣa suṃdara catura chabi dekhi muni mana mohahīṃ॥

जगदंबा जहँ अवतरी सो पुरु बरनि कि जाइ।

jagadaṃbā jaha~ avatarī so puru barani ki jāi।

रिद्धि सिद्धि संपत्ति सुख नित नूतन अधिकाइ।।94।।

riddhi siddhi saṃpatti sukha nita nūtana adhikāi॥94॥

नगर निकट बरात सुनि आई। पुर खरभरु सोभा अधिकाई।।

nagara nikaṭa barāta suni āī। pura kharabharu sobhā adhikāī॥

करि बनाव सजि बाहन नाना। चले लेन सादर अगवाना।।

kari banāva saji bāhana nānā। cale lena sādara agavānā॥

हियँ हरषे सुर सेन निहारी। हरिहि देखि अति भए सुखारी।।

hiya~ haraṣe sura sena nihārī। harihi dekhi ati bhae sukhārī॥

सिव समाज जब देखन लागे। बिडरि चले बाहन सब भागे।।

siva samāja jaba dekhana lāge। biḍari cale bāhana saba bhāge॥

धरि धीरजु तहँ रहे सयाने। बालक सब लै जीव पराने।।

dhari dhīraju taha~ rahe sayāne। bālaka saba lai jīva parāne॥

गएँ भवन पूछहिं पितु माता। कहहिं बचन भय कंपित गाता।।

gae~ bhavana pūchahiṃ pitu mātā। kahahiṃ bacana bhaya kaṃpita gātā॥

कहिअ काह कहि जाइ न बाता। जम कर धार किधौं बरिआता।।

kahia kāha kahi jāi na bātā। jama kara dhāra kidhauṃ bariātā॥

बरु बौराह बसहँ असवारा। ब्याल कपाल बिभूषन छारा।।

baru baurāha basaha~ asavārā। byāla kapāla bibhūṣana chārā॥

तन छार ब्याल कपाल भूषन नगन जटिल भयंकरा।

tana chāra byāla kapāla bhūṣana nagana jaṭila bhayaṃkarā।

सँग भूत प्रेत पिसाच जोगिनि बिकट मुख रजनीचरा।।

sa~ga bhūta preta pisāca jogini bikaṭa mukha rajanīcarā॥

जो जिअत रहिहि बरात देखत पुन्य बड़ तेहि कर सही।

jo jiata rahihi barāta dekhata punya bar̤a tehi kara sahī।

देखिहि सो उमा बिबाहु घर घर बात असि लरिकन्ह कही।।

dekhihi so umā bibāhu ghara ghara bāta asi larikanha kahī॥

समुझि महेस समाज सब जननि जनक मुसुकाहिं।

samujhi mahesa samāja saba janani janaka musukāhiṃ।

बाल बुझाए बिबिध बिधि निडर होहु डरु नाहिं।।95।।

bāla bujhāe bibidha bidhi niḍara hohu ḍaru nāhiṃ॥95॥

लै अगवान बरातहि आए। दिए सबहि जनवास सुहाए।।

lai agavāna barātahi āe। die sabahi janavāsa suhāe॥

मैनाँ सुभ आरती सँवारी। संग सुमंगल गावहिं नारी।।

mainā~ subha āratī sa~vārī। saṃga sumaṃgala gāvahiṃ nārī॥

कंचन थार सोह बर पानी। परिछन चली हरहि हरषानी।।

kaṃcana thāra soha bara pānī। parichana calī harahi haraṣānī॥

बिकट बेष रुद्रहि जब देखा। अबलन्ह उर भय भयउ बिसेषा।।

bikaṭa beṣa rudrahi jaba dekhā। abalanha ura bhaya bhayau biseṣā॥

भागि भवन पैठीं अति त्रासा। गए महेसु जहाँ जनवासा।।

bhāgi bhavana paiṭhīṃ ati trāsā। gae mahesu jahā~ janavāsā॥

मैना हृदयँ भयउ दुखु भारी। लीन्ही बोलि गिरीसकुमारी।।

mainā hṛdaya~ bhayau dukhu bhārī। līnhī boli girīsakumārī॥

अधिक सनेहँ गोद बैठारी। स्याम सरोज नयन भरे बारी।।

adhika saneha~ goda baiṭhārī। syāma saroja nayana bhare bārī॥

जेहिं बिधि तुम्हहि रूपु अस दीन्हा। तेहिं जड़ बरु बाउर कस कीन्हा।।

jehiṃ bidhi tumhahi rūpu asa dīnhā। tehiṃ jar̤a baru bāura kasa kīnhā॥

कस कीन्ह बरु बौराह बिधि जेहिं तुम्हहि सुंदरता दई।

kasa kīnha baru baurāha bidhi jehiṃ tumhahi suṃdaratā daī।

जो फलु चहिअ सुरतरुहिं सो बरबस बबूरहिं लागई।।

jo phalu cahia surataruhiṃ so barabasa babūrahiṃ lāgaī॥

तुम्ह सहित गिरि तें गिरौं पावक जरौं जलनिधि महुँ परौं।।

tumha sahita giri teṃ girauṃ pāvaka jarauṃ jalanidhi mahu~ parauṃ॥

घरु जाउ अपजसु होउ जग जीवत बिबाहु न हौं करौं।।

gharu jāu apajasu hou jaga jīvata bibāhu na hauṃ karauṃ॥

भई बिकल अबला सकल दुखित देखि गिरिनारि।

bhaī bikala abalā sakala dukhita dekhi girināri।

करि बिलापु रोदति बदति सुता सनेहु सँभारि।।96।।

kari bilāpu rodati badati sutā sanehu sa~bhāri॥96॥

नारद कर मैं काह बिगारा। भवनु मोर जिन्ह बसत उजारा।।

nārada kara maiṃ kāha bigārā। bhavanu mora jinha basata ujārā॥

अस उपदेसु उमहि जिन्ह दीन्हा। बौरे बरहि लगि तपु कीन्हा।।

asa upadesu umahi jinha dīnhā। baure barahi lagi tapu kīnhā॥

साचेहुँ उन्ह के मोह न माया। उदासीन धनु धामु न जाया।।

sācehu~ unha ke moha na māyā। udāsīna dhanu dhāmu na jāyā॥

पर घर घालक लाज न भीरा। बाझँ कि जान प्रसव कैं पीरा।।

para ghara ghālaka lāja na bhīrā। bājha~ ki jāna prasava kaiṃ pīrā॥

जननिहि बिकल बिलोकि भवानी। बोली जुत बिबेक मृदु बानी।।

jananihi bikala biloki bhavānī। bolī juta bibeka mṛdu bānī॥

अस बिचारि सोचहि मति माता। सो न टरइ जो रचइ बिधाता।।

asa bicāri socahi mati mātā। so na ṭarai jo racai bidhātā॥

करम लिखा जौ बाउर नाहू। तौ कत दोसु लगाइअ काहू।।

karama likhā jau bāura nāhū। tau kata dosu lagāia kāhū॥

तुम्ह सन मिटहिं कि बिधि के अंका। मातु ब्यर्थ जनि लेहु कलंका।।

tumha sana miṭahiṃ ki bidhi ke aṃkā। mātu byartha jani lehu kalaṃkā॥

जनि लेहु मातु कलंकु करुना परिहरहु अवसर नहीं।

jani lehu mātu kalaṃku karunā pariharahu avasara nahīṃ।

दुखु सुखु जो लिखा लिलार हमरें जाब जहँ पाउब तहीं।।

dukhu sukhu jo likhā lilāra hamareṃ jāba jaha~ pāuba tahīṃ॥

सुनि उमा बचन बिनीत कोमल सकल अबला सोचहीं।।

suni umā bacana binīta komala sakala abalā socahīṃ॥

बहु भाँति बिधिहि लगाइ दूषन नयन बारि बिमोचहीं।।

bahu bhā~ti bidhihi lagāi dūṣana nayana bāri bimocahīṃ॥

तेहि अवसर नारद सहित अरु रिषि सप्त समेत।

tehi avasara nārada sahita aru riṣi sapta sameta।

समाचार सुनि तुहिनगिरि गवने तुरत निकेत।।97।।

samācāra suni tuhinagiri gavane turata niketa॥97॥

तब नारद सबहि समुझावा। पूरुब कथाप्रसंगु सुनावा।।

taba nārada sabahi samujhāvā। pūruba kathāprasaṃgu sunāvā॥

मयना सत्य सुनहु मम बानी। जगदंबा तव सुता भवानी।।

mayanā satya sunahu mama bānī। jagadaṃbā tava sutā bhavānī॥

अजा अनादि सक्ति अबिनासिनि। सदा संभु अरधंग निवासिनि।।

ajā anādi sakti abināsini। sadā saṃbhu aradhaṃga nivāsini॥

जग संभव पालन लय कारिनि। निज इच्छा लीला बपु धारिनि।।

jaga saṃbhava pālana laya kārini। nija icchā līlā bapu dhārini॥

जनमीं प्रथम दच्छ गृह जाई। नामु सती सुंदर तनु पाई।।

janamīṃ prathama daccha gṛha jāī। nāmu satī suṃdara tanu pāī॥

तहँहुँ सती संकरहि बिबाहीं। कथा प्रसिद्ध सकल जग माहीं।।

taha~hu~ satī saṃkarahi bibāhīṃ। kathā prasiddha sakala jaga māhīṃ॥

एक बार आवत सिव संगा। देखेउ रघुकुल कमल पतंगा।।

eka bāra āvata siva saṃgā। dekheu raghukula kamala pataṃgā॥

भयउ मोहु सिव कहा न कीन्हा। भ्रम बस बेषु सीय कर लीन्हा।।

bhayau mohu siva kahā na kīnhā। bhrama basa beṣu sīya kara līnhā॥

सिय बेषु सती जो कीन्ह तेहि अपराध संकर परिहरीं।

siya beṣu satī jo kīnha tehi aparādha saṃkara pariharīṃ।

हर बिरहँ जाइ बहोरि पितु कें जग्य जोगानल जरीं।।

hara biraha~ jāi bahori pitu keṃ jagya jogānala jarīṃ॥

अब जनमि तुम्हरे भवन निज पति लागि दारुन तपु किया।

aba janami tumhare bhavana nija pati lāgi dāruna tapu kiyā।

अस जानि संसय तजहु गिरिजा सर्बदा संकर प्रिया।।

asa jāni saṃsaya tajahu girijā sarbadā saṃkara priyā॥

सुनि नारद के बचन तब सब कर मिटा बिषाद।

suni nārada ke bacana taba saba kara miṭā biṣāda।

छन महुँ ब्यापेउ सकल पुर घर घर यह संबाद।।98।।

chana mahu~ byāpeu sakala pura ghara ghara yaha saṃbāda॥98॥

तब मयना हिमवंतु अनंदे। पुनि पुनि पारबती पद बंदे।।

taba mayanā himavaṃtu anaṃde। puni puni pārabatī pada baṃde॥

नारि पुरुष सिसु जुबा सयाने। नगर लोग सब अति हरषाने।।

nāri puruṣa sisu jubā sayāne। nagara loga saba ati haraṣāne॥

लगे होन पुर मंगलगाना। सजे सबहि हाटक घट नाना।।

lage hona pura maṃgalagānā। saje sabahi hāṭaka ghaṭa nānā॥

भाँति अनेक भई जेवराना। सूपसास्त्र जस कछु ब्यवहारा।।

bhā~ti aneka bhaī jevarānā। sūpasāstra jasa kachu byavahārā॥

सो जेवनार कि जाइ बखानी। बसहिं भवन जेहिं मातु भवानी।।

so jevanāra ki jāi bakhānī। basahiṃ bhavana jehiṃ mātu bhavānī॥

सादर बोले सकल बराती। बिष्नु बिरंचि देव सब जाती।।

sādara bole sakala barātī। biṣnu biraṃci deva saba jātī॥

बिबिधि पाँति बैठी जेवनारा। लागे परुसन निपुन सुआरा।।

bibidhi pā~ti baiṭhī jevanārā। lāge parusana nipuna suārā॥

नारिबृंद सुर जेवँत जानी। लगीं देन गारीं मृदु बानी।।

nāribṛṃda sura jeva~ta jānī। lagīṃ dena gārīṃ mṛdu bānī॥

गारीं मधुर स्वर देहिं सुंदरि बिंग्य बचन सुनावहीं।

gārīṃ madhura svara dehiṃ suṃdari biṃgya bacana sunāvahīṃ।

भोजनु करहिं सुर अति बिलंबु बिनोदु सुनि सचु पावहीं।।

bhojanu karahiṃ sura ati bilaṃbu binodu suni sacu pāvahīṃ॥

जेवँत जो बढ्यो अनंदु सो मुख कोटिहूँ न परै कह्यो।

jeva~ta jo baḍhyo anaṃdu so mukha koṭihū~ na parai kahyo।

अचवाँइ दीन्हे पान गवने बास जहँ जाको रह्यो।।

acavā~i dīnhe pāna gavane bāsa jaha~ jāko rahyo॥

बहुरि मुनिन्ह हिमवंत कहुँ लगन सुनाई आइ।

bahuri muninha himavaṃta kahu~ lagana sunāī āi।

समय बिलोकि बिबाह कर पठए देव बोलाइ।।99।।

samaya biloki bibāha kara paṭhae deva bolāi॥99॥

बोलि सकल सुर सादर लीन्हे। सबहि जथोचित आसन दीन्हे।।

boli sakala sura sādara līnhe। sabahi jathocita āsana dīnhe॥

बेदी बेद बिधान सँवारी। सुभग सुमंगल गावहिं नारी।।

bedī beda bidhāna sa~vārī। subhaga sumaṃgala gāvahiṃ nārī॥

सिंघासनु अति दिब्य सुहावा। जाइ न बरनि बिरंचि बनावा।।

siṃghāsanu ati dibya suhāvā। jāi na barani biraṃci banāvā॥

बैठे सिव बिप्रन्ह सिरु नाई। हृदयँ सुमिरि निज प्रभु रघुराई।।

baiṭhe siva bipranha siru nāī। hṛdaya~ sumiri nija prabhu raghurāī॥

बहुरि मुनीसन्ह उमा बोलाई। करि सिंगारु सखीं लै आई।।

bahuri munīsanha umā bolāī। kari siṃgāru sakhīṃ lai āī॥

देखत रूपु सकल सुर मोहे। बरनै छबि अस जग कबि को है।।

dekhata rūpu sakala sura mohe। baranai chabi asa jaga kabi ko hai॥

जगदंबिका जानि भव भामा। सुरन्ह मनहिं मन कीन्ह प्रनामा।।

jagadaṃbikā jāni bhava bhāmā। suranha manahiṃ mana kīnha pranāmā॥

सुंदरता मरजाद भवानी। जाइ न कोटिहुँ बदन बखानी।।

suṃdaratā marajāda bhavānī। jāi na koṭihu~ badana bakhānī॥

कोटिहुँ बदन नहिं बनै बरनत जग जननि सोभा महा।

koṭihu~ badana nahiṃ banai baranata jaga janani sobhā mahā।

सकुचहिं कहत श्रुति सेष सारद मंदमति तुलसी कहा।।

sakucahiṃ kahata śruti seṣa sārada maṃdamati tulasī kahā॥

छबिखानि मातु भवानि गवनी मध्य मंडप सिव जहाँ।।

chabikhāni mātu bhavāni gavanī madhya maṃḍapa siva jahā~॥

अवलोकि सकहिं न सकुच पति पद कमल मनु मधुकरु तहाँ।।

avaloki sakahiṃ na sakuca pati pada kamala manu madhukaru tahā~॥

मुनि अनुसासन गनपतिहि पूजेउ संभु भवानि।

muni anusāsana ganapatihi pūjeu saṃbhu bhavāni।

कोउ सुनि संसय करै जनि सुर अनादि जियँ जानि।।100।।

kou suni saṃsaya karai jani sura anādi jiya~ jāni॥100॥

जसि बिबाह कै बिधि श्रुति गाई। महामुनिन्ह सो सब करवाई।।

jasi bibāha kai bidhi śruti gāī। mahāmuninha so saba karavāī॥

गहि गिरीस कुस कन्या पानी। भवहि समरपीं जानि भवानी।।

gahi girīsa kusa kanyā pānī। bhavahi samarapīṃ jāni bhavānī॥

पानिग्रहन जब कीन्ह महेसा। हिंयँ हरषे तब सकल सुरेसा।।

pānigrahana jaba kīnha mahesā। hiṃya~ haraṣe taba sakala suresā॥

बेद मंत्र मुनिबर उच्चरहीं। जय जय जय संकर सुर करहीं।।

beda maṃtra munibara uccarahīṃ। jaya jaya jaya saṃkara sura karahīṃ॥

बाजहिं बाजन बिबिध बिधाना। सुमनबृष्टि नभ भै बिधि नाना।।

bājahiṃ bājana bibidha bidhānā। sumanabṛṣṭi nabha bhai bidhi nānā॥

हर गिरिजा कर भयउ बिबाहू। सकल भुवन भरि रहा उछाहू।।

hara girijā kara bhayau bibāhū। sakala bhuvana bhari rahā uchāhū॥

दासीं दास तुरग रथ नागा। धेनु बसन मनि बस्तु बिभागा।।

dāsīṃ dāsa turaga ratha nāgā। dhenu basana mani bastu bibhāgā॥

अन्न कनकभाजन भरि जाना। दाइज दीन्ह न जाइ बखाना।।

anna kanakabhājana bhari jānā। dāija dīnha na jāi bakhānā॥

दाइज दियो बहु भाँति पुनि कर जोरि हिमभूधर कह्यो।

dāija diyo bahu bhā~ti puni kara jori himabhūdhara kahyo।

का देउँ पूरनकाम संकर चरन पंकज गहि रह्यो।।

kā deu~ pūranakāma saṃkara carana paṃkaja gahi rahyo॥

सिवँ कृपासागर ससुर कर संतोषु सब भाँतिहिं कियो।

siva~ kṛpāsāgara sasura kara saṃtoṣu saba bhā~tihiṃ kiyo।

पुनि गहे पद पाथोज मयनाँ प्रेम परिपूरन हियो।।

puni gahe pada pāthoja mayanā~ prema paripūrana hiyo॥

नाथ उमा मन प्रान सम गृहकिंकरी करेहु।

nātha umā mana prāna sama gṛhakiṃkarī karehu।

छमेहु सकल अपराध अब होइ प्रसन्न बरु देहु।।101।।

chamehu sakala aparādha aba hoi prasanna baru dehu॥101॥

बहु बिधि संभु सास समुझाई। गवनी भवन चरन सिरु नाई।।

bahu bidhi saṃbhu sāsa samujhāī। gavanī bhavana carana siru nāī॥

जननीं उमा बोलि तब लीन्ही। लै उछंग सुंदर सिख दीन्ही।।

jananīṃ umā boli taba līnhī। lai uchaṃga suṃdara sikha dīnhī॥

करेहु सदा संकर पद पूजा। नारिधरमु पति देउ न दूजा।।

karehu sadā saṃkara pada pūjā। nāridharamu pati deu na dūjā॥

बचन कहत भरे लोचन बारी। बहुरि लाइ उर लीन्हि कुमारी।।

bacana kahata bhare locana bārī। bahuri lāi ura līnhi kumārī॥

कत बिधि सृजीं नारि जग माहीं। पराधीन सपनेहुँ सुखु नाहीं।।

kata bidhi sṛjīṃ nāri jaga māhīṃ। parādhīna sapanehu~ sukhu nāhīṃ॥

भै अति प्रेम बिकल महतारी। धीरजु कीन्ह कुसमय बिचारी।।

bhai ati prema bikala mahatārī। dhīraju kīnha kusamaya bicārī॥

पुनि पुनि मिलति परति गहि चरना। परम प्रेम कछु जाइ न बरना।।

puni puni milati parati gahi caranā। parama prema kachu jāi na baranā॥

सब नारिन्ह मिलि भेटि भवानी। जाइ जननि उर पुनि लपटानी।।

saba nārinha mili bheṭi bhavānī। jāi janani ura puni lapaṭānī॥

जननिहि बहुरि मिलि चली उचित असीस सब काहूँ दईं।

jananihi bahuri mili calī ucita asīsa saba kāhū~ daīṃ।

फिरि फिरि बिलोकति मातु तन तब सखीं लै सिव पहिं गई।।

phiri phiri bilokati mātu tana taba sakhīṃ lai siva pahiṃ gaī॥

जाचक सकल संतोषि संकरु उमा सहित भवन चले।

jācaka sakala saṃtoṣi saṃkaru umā sahita bhavana cale।

सब अमर हरषे सुमन बरषि निसान नभ बाजे भले।।

saba amara haraṣe sumana baraṣi nisāna nabha bāje bhale॥

चले संग हिमवंतु तब पहुँचावन अति हेतु।

cale saṃga himavaṃtu taba pahu~cāvana ati hetu।

बिबिध भाँति परितोषु करि बिदा कीन्ह बृषकेतु।।102।।

bibidha bhā~ti paritoṣu kari bidā kīnha bṛṣaketu॥102॥

तुरत भवन आए गिरिराई। सकल सैल सर लिए बोलाई।।

turata bhavana āe girirāī। sakala saila sara lie bolāī॥

आदर दान बिनय बहुमाना। सब कर बिदा कीन्ह हिमवाना।।

ādara dāna binaya bahumānā। saba kara bidā kīnha himavānā॥

जबहिं संभु कैलासहिं आए। सुर सब निज निज लोक सिधाए।।

jabahiṃ saṃbhu kailāsahiṃ āe। sura saba nija nija loka sidhāe॥

जगत मातु पितु संभु भवानी। तेही सिंगारु न कहउँ बखानी।।

jagata mātu pitu saṃbhu bhavānī। tehī siṃgāru na kahau~ bakhānī॥

करहिं बिबिध बिधि भोग बिलासा। गनन्ह समेत बसहिं कैलासा।।

karahiṃ bibidha bidhi bhoga bilāsā। gananha sameta basahiṃ kailāsā॥

हर गिरिजा बिहार नित नयऊ। एहि बिधि बिपुल काल चलि गयऊ।।

hara girijā bihāra nita nayaū। ehi bidhi bipula kāla cali gayaū॥

तब जनमेउ षटबदन कुमारा। तारकु असुर समर जेहिं मारा।।

taba janameu ṣaṭabadana kumārā। tāraku asura samara jehiṃ mārā॥

आगम निगम प्रसिद्ध पुराना। षन्मुख जन्मु सकल जग जाना।।

āgama nigama prasiddha purānā। ṣanmukha janmu sakala jaga jānā॥

जगु जान षन्मुख जन्मु कर्मु प्रतापु पुरुषारथु महा।

jagu jāna ṣanmukha janmu karmu pratāpu puruṣārathu mahā।

तेहि हेतु मैं बृषकेतु सुत कर चरित संछेपहिं कहा।।

tehi hetu maiṃ bṛṣaketu suta kara carita saṃchepahiṃ kahā॥

यह उमा संगु बिबाहु जे नर नारि कहहिं जे गावहीं।

yaha umā saṃgu bibāhu je nara nāri kahahiṃ je gāvahīṃ।

कल्यान काज बिबाह मंगल सर्बदा सुखु पावहीं।।

kalyāna kāja bibāha maṃgala sarbadā sukhu pāvahīṃ॥

चरित सिंधु गिरिजा रमन बेद न पावहिं पारु।

carita siṃdhu girijā ramana beda na pāvahiṃ pāru।

बरनै तुलसीदासु किमि अति मतिमंद गवाँरु।।103।।

baranai tulasīdāsu kimi ati matimaṃda gavā~ru॥103॥

संभु चरित सुनि सरस सुहावा। भरद्वाज मुनि अति सुख पावा।।

saṃbhu carita suni sarasa suhāvā। bharadvāja muni ati sukha pāvā॥

बहु लालसा कथा पर बाढ़ी। नयनन्हि नीरु रोमावलि ठाढ़ी।।

bahu lālasā kathā para bār̤hī। nayananhi nīru romāvali ṭhār̤hī॥

प्रेम बिबस मुख आव न बानी। दसा देखि हरषे मुनि ग्यानी।।

prema bibasa mukha āva na bānī। dasā dekhi haraṣe muni gyānī॥

अहो धन्य तव जन्मु मुनीसा। तुम्हहि प्रान सम प्रिय गौरीसा।।

aho dhanya tava janmu munīsā। tumhahi prāna sama priya gaurīsā॥

सिव पद कमल जिन्हहि रति नाहीं। रामहि ते सपनेहुँ न सोहाहीं।।

siva pada kamala jinhahi rati nāhīṃ। rāmahi te sapanehu~ na sohāhīṃ॥

बिनु छल बिस्वनाथ पद नेहू। राम भगत कर लच्छन एहू।।

binu chala bisvanātha pada nehū। rāma bhagata kara lacchana ehū॥

सिव सम को रघुपति ब्रतधारी। बिनु अघ तजी सती असि नारी।।

siva sama ko raghupati bratadhārī। binu agha tajī satī asi nārī॥

पनु करि रघुपति भगति देखाई। को सिव सम रामहि प्रिय भाई।।

panu kari raghupati bhagati dekhāī। ko siva sama rāmahi priya bhāī॥

प्रथमहिं मै कहि सिव चरित बूझा मरमु तुम्हार।

prathamahiṃ mai kahi siva carita būjhā maramu tumhāra।

सुचि सेवक तुम्ह राम के रहित समस्त बिकार।।104।।

suci sevaka tumha rāma ke rahita samasta bikāra॥104॥

मैं जाना तुम्हार गुन सीला। कहउँ सुनहु अब रघुपति लीला।।

maiṃ jānā tumhāra guna sīlā। kahau~ sunahu aba raghupati līlā॥

सुनु मुनि आजु समागम तोरें। कहि न जाइ जस सुखु मन मोरें।।

sunu muni āju samāgama toreṃ। kahi na jāi jasa sukhu mana moreṃ॥

राम चरित अति अमित मुनिसा। कहि न सकहिं सत कोटि अहीसा।।

rāma carita ati amita munisā। kahi na sakahiṃ sata koṭi ahīsā॥

तदपि जथाश्रुत कहउँ बखानी। सुमिरि गिरापति प्रभु धनुपानी।।

tadapi jathāśruta kahau~ bakhānī। sumiri girāpati prabhu dhanupānī॥

सारद दारुनारि सम स्वामी। रामु सूत्रधर अंतरजामी।।

sārada dārunāri sama svāmī। rāmu sūtradhara aṃtarajāmī॥

जेहि पर कृपा करहिं जनु जानी। कबि उर अजिर नचावहिं बानी।।

jehi para kṛpā karahiṃ janu jānī। kabi ura ajira nacāvahiṃ bānī॥

प्रनवउँ सोइ कृपाल रघुनाथा। बरनउँ बिसद तासु गुन गाथा।।

pranavau~ soi kṛpāla raghunāthā। baranau~ bisada tāsu guna gāthā॥

परम रम्य गिरिबरु कैलासू। सदा जहाँ सिव उमा निवासू।।

parama ramya giribaru kailāsū। sadā jahā~ siva umā nivāsū॥

सिद्ध तपोधन जोगिजन सूर किंनर मुनिबृंद।

siddha tapodhana jogijana sūra kiṃnara munibṛṃda।

बसहिं तहाँ सुकृती सकल सेवहिं सिब सुखकंद।।105।।

basahiṃ tahā~ sukṛtī sakala sevahiṃ siba sukhakaṃda॥105॥

हरि हर बिमुख धर्म रति नाहीं। ते नर तहँ सपनेहुँ नहिं जाहीं।।

hari hara bimukha dharma rati nāhīṃ। te nara taha~ sapanehu~ nahiṃ jāhīṃ॥

तेहि गिरि पर बट बिटप बिसाला। नित नूतन सुंदर सब काला।।

tehi giri para baṭa biṭapa bisālā। nita nūtana suṃdara saba kālā॥

त्रिबिध समीर सुसीतलि छाया। सिव बिश्राम बिटप श्रुति गाया।।

tribidha samīra susītali chāyā। siva biśrāma biṭapa śruti gāyā॥

एक बार तेहि तर प्रभु गयऊ। तरु बिलोकि उर अति सुखु भयऊ।।

eka bāra tehi tara prabhu gayaū। taru biloki ura ati sukhu bhayaū॥

निज कर डासि नागरिपु छाला। बैठै सहजहिं संभु कृपाला।।

nija kara ḍāsi nāgaripu chālā। baiṭhai sahajahiṃ saṃbhu kṛpālā॥

कुंद इंदु दर गौर सरीरा। भुज प्रलंब परिधन मुनिचीरा।।

kuṃda iṃdu dara gaura sarīrā। bhuja pralaṃba paridhana municīrā॥

तरुन अरुन अंबुज सम चरना। नख दुति भगत हृदय तम हरना।।

taruna aruna aṃbuja sama caranā। nakha duti bhagata hṛdaya tama haranā॥

भुजग भूति भूषन त्रिपुरारी। आननु सरद चंद छबि हारी।।

bhujaga bhūti bhūṣana tripurārī। ānanu sarada caṃda chabi hārī॥

जटा मुकुट सुरसरित सिर लोचन नलिन बिसाल।

jaṭā mukuṭa surasarita sira locana nalina bisāla।

नीलकंठ लावन्यनिधि सोह बालबिधु भाल।।106।।

nīlakaṃṭha lāvanyanidhi soha bālabidhu bhāla॥106॥

बैठे सोह कामरिपु कैसें। धरें सरीरु सांतरसु जैसें।।

baiṭhe soha kāmaripu kaiseṃ। dhareṃ sarīru sāṃtarasu jaiseṃ॥

पारबती भल अवसरु जानी। गई संभु पहिं मातु भवानी।।

pārabatī bhala avasaru jānī। gaī saṃbhu pahiṃ mātu bhavānī॥

जानि प्रिया आदरु अति कीन्हा। बाम भाग आसनु हर दीन्हा।।

jāni priyā ādaru ati kīnhā। bāma bhāga āsanu hara dīnhā॥

बैठीं सिव समीप हरषाई। पूरुब जन्म कथा चित आई।।

baiṭhīṃ siva samīpa haraṣāī। pūruba janma kathā cita āī॥

पति हियँ हेतु अधिक अनुमानी। बिहसि उमा बोलीं प्रिय बानी।।

pati hiya~ hetu adhika anumānī। bihasi umā bolīṃ priya bānī॥

कथा जो सकल लोक हितकारी। सोइ पूछन चह सैलकुमारी।।

kathā jo sakala loka hitakārī। soi pūchana caha sailakumārī॥

बिस्वनाथ मम नाथ पुरारी। त्रिभुवन महिमा बिदित तुम्हारी।।

bisvanātha mama nātha purārī। tribhuvana mahimā bidita tumhārī॥

चर अरु अचर नाग नर देवा। सकल करहिं पद पंकज सेवा।।

cara aru acara nāga nara devā। sakala karahiṃ pada paṃkaja sevā॥

प्रभु समरथ सर्बग्य सिव सकल कला गुन धाम।।

prabhu samaratha sarbagya siva sakala kalā guna dhāma॥

जोग ग्यान बैराग्य निधि प्रनत कलपतरु नाम।।107।।

joga gyāna bairāgya nidhi pranata kalapataru nāma॥107॥

जौं मो पर प्रसन्न सुखरासी। जानिअ सत्य मोहि निज दासी।।

jauṃ mo para prasanna sukharāsī। jānia satya mohi nija dāsī॥

तौं प्रभु हरहु मोर अग्याना। कहि रघुनाथ कथा बिधि नाना।।

tauṃ prabhu harahu mora agyānā। kahi raghunātha kathā bidhi nānā॥

जासु भवनु सुरतरु तर होई। सहि कि दरिद्र जनित दुखु सोई।।

jāsu bhavanu surataru tara hoī। sahi ki daridra janita dukhu soī॥

ससिभूषन अस हृदयँ बिचारी। हरहु नाथ मम मति भ्रम भारी।।

sasibhūṣana asa hṛdaya~ bicārī। harahu nātha mama mati bhrama bhārī॥

प्रभु जे मुनि परमारथबादी। कहहिं राम कहुँ ब्रह्म अनादी।।

prabhu je muni paramārathabādī। kahahiṃ rāma kahu~ brahma anādī॥

सेस सारदा बेद पुराना। सकल करहिं रघुपति गुन गाना।।

sesa sāradā beda purānā। sakala karahiṃ raghupati guna gānā॥

तुम्ह पुनि राम राम दिन राती। सादर जपहु अनँग आराती।।

tumha puni rāma rāma dina rātī। sādara japahu ana~ga ārātī॥

रामु सो अवध नृपति सुत सोई। की अज अगुन अलखगति कोई।।

rāmu so avadha nṛpati suta soī। kī aja aguna alakhagati koī॥

जौं नृप तनय त ब्रह्म किमि नारि बिरहँ मति भोरि।

jauṃ nṛpa tanaya ta brahma kimi nāri biraha~ mati bhori।

देख चरित महिमा सुनत भ्रमति बुद्धि अति मोरि।।108।।

dekha carita mahimā sunata bhramati buddhi ati mori॥108॥

जौं अनीह ब्यापक बिभु कोऊ। कबहु बुझाइ नाथ मोहि सोऊ।।

jauṃ anīha byāpaka bibhu koū। kabahu bujhāi nātha mohi soū॥

अग्य जानि रिस उर जनि धरहू। जेहि बिधि मोह मिटै सोइ करहू।।

agya jāni risa ura jani dharahū। jehi bidhi moha miṭai soi karahū॥

मै बन दीखि राम प्रभुताई। अति भय बिकल न तुम्हहि सुनाई।।

mai bana dīkhi rāma prabhutāī। ati bhaya bikala na tumhahi sunāī॥

तदपि मलिन मन बोधु न आवा। सो फलु भली भाँति हम पावा।।

tadapi malina mana bodhu na āvā। so phalu bhalī bhā~ti hama pāvā॥

अजहूँ कछु संसउ मन मोरे। करहु कृपा बिनवउँ कर जोरें।।

ajahū~ kachu saṃsau mana more। karahu kṛpā binavau~ kara joreṃ॥

प्रभु तब मोहि बहु भाँति प्रबोधा। नाथ सो समुझि करहु जनि क्रोधा।।

prabhu taba mohi bahu bhā~ti prabodhā। nātha so samujhi karahu jani krodhā॥

तब कर अस बिमोह अब नाहीं। रामकथा पर रुचि मन माहीं।।

taba kara asa bimoha aba nāhīṃ। rāmakathā para ruci mana māhīṃ॥

कहहु पुनीत राम गुन गाथा। भुजगराज भूषन सुरनाथा।।

kahahu punīta rāma guna gāthā। bhujagarāja bhūṣana suranāthā॥

बंदउ पद धरि धरनि सिरु बिनय करउँ कर जोरि।

baṃdau pada dhari dharani siru binaya karau~ kara jori।

बरनहु रघुबर बिसद जसु श्रुति सिद्धांत निचोरि।।109।।

baranahu raghubara bisada jasu śruti siddhāṃta nicori॥109॥

जदपि जोषिता नहिं अधिकारी। दासी मन क्रम बचन तुम्हारी।।

jadapi joṣitā nahiṃ adhikārī। dāsī mana krama bacana tumhārī॥

गूढ़उ तत्व न साधु दुरावहिं। आरत अधिकारी जहँ पावहिं।।

gūr̤hau tatva na sādhu durāvahiṃ। ārata adhikārī jaha~ pāvahiṃ॥

अति आरति पूछउँ सुरराया। रघुपति कथा कहहु करि दाया।।

ati ārati pūchau~ surarāyā। raghupati kathā kahahu kari dāyā॥

प्रथम सो कारन कहहु बिचारी। निर्गुन ब्रह्म सगुन बपु धारी।।

prathama so kārana kahahu bicārī। nirguna brahma saguna bapu dhārī॥

पुनि प्रभु कहहु राम अवतारा। बालचरित पुनि कहहु उदारा।।

puni prabhu kahahu rāma avatārā। bālacarita puni kahahu udārā॥

कहहु जथा जानकी बिबाहीं। राज तजा सो दूषन काहीं।।

kahahu jathā jānakī bibāhīṃ। rāja tajā so dūṣana kāhīṃ॥

बन बसि कीन्हे चरित अपारा। कहहु नाथ जिमि रावन मारा।।

bana basi kīnhe carita apārā। kahahu nātha jimi rāvana mārā॥

राज बैठि कीन्हीं बहु लीला। सकल कहहु संकर सुखलीला।।

rāja baiṭhi kīnhīṃ bahu līlā। sakala kahahu saṃkara sukhalīlā॥

बहुरि कहहु करुनायतन कीन्ह जो अचरज राम।

bahuri kahahu karunāyatana kīnha jo acaraja rāma।

प्रजा सहित रघुबंसमनि किमि गवने निज धाम।।110।।

prajā sahita raghubaṃsamani kimi gavane nija dhāma॥110॥

पुनि प्रभु कहहु सो तत्व बखानी। जेहिं बिग्यान मगन मुनि ग्यानी।।

puni prabhu kahahu so tatva bakhānī। jehiṃ bigyāna magana muni gyānī॥

भगति ग्यान बिग्यान बिरागा। पुनि सब बरनहु सहित बिभागा।।

bhagati gyāna bigyāna birāgā। puni saba baranahu sahita bibhāgā॥

औरउ राम रहस्य अनेका। कहहु नाथ अति बिमल बिबेका।।

aurau rāma rahasya anekā। kahahu nātha ati bimala bibekā॥

जो प्रभु मैं पूछा नहि होई। सोउ दयाल राखहु जनि गोई।।

jo prabhu maiṃ pūchā nahi hoī। sou dayāla rākhahu jani goī॥

तुम्ह त्रिभुवन गुर बेद बखाना। आन जीव पाँवर का जाना।।

tumha tribhuvana gura beda bakhānā। āna jīva pā~vara kā jānā॥

प्रस्न उमा कै सहज सुहाई। छल बिहीन सुनि सिव मन भाई।।

prasna umā kai sahaja suhāī। chala bihīna suni siva mana bhāī॥

हर हियँ रामचरित सब आए। प्रेम पुलक लोचन जल छाए।।

hara hiya~ rāmacarita saba āe। prema pulaka locana jala chāe॥

श्रीरघुनाथ रूप उर आवा। परमानंद अमित सुख पावा।।

śrīraghunātha rūpa ura āvā। paramānaṃda amita sukha pāvā॥

मगन ध्यानरस दंड जुग पुनि मन बाहेर कीन्ह।

magana dhyānarasa daṃḍa juga puni mana bāhera kīnha।

रघुपति चरित महेस तब हरषित बरनै लीन्ह।।111।।

raghupati carita mahesa taba haraṣita baranai līnha॥111॥

झूठेउ सत्य जाहि बिनु जानें। जिमि भुजंग बिनु रजु पहिचानें।।

jhūṭheu satya jāhi binu jāneṃ। jimi bhujaṃga binu raju pahicāneṃ॥

जेहि जानें जग जाइ हेराई। जागें जथा सपन भ्रम जाई।।

jehi jāneṃ jaga jāi herāī। jāgeṃ jathā sapana bhrama jāī॥

बंदउँ बालरूप सोई रामू। सब सिधि सुलभ जपत जिसु नामू।।

baṃdau~ bālarūpa soī rāmū। saba sidhi sulabha japata jisu nāmū॥

मंगल भवन अमंगल हारी। द्रवउ सो दसरथ अजिर बिहारी।।

maṃgala bhavana amaṃgala hārī। dravau so dasaratha ajira bihārī॥

करि प्रनाम रामहि त्रिपुरारी। हरषि सुधा सम गिरा उचारी।।

kari pranāma rāmahi tripurārī। haraṣi sudhā sama girā ucārī॥

धन्य धन्य गिरिराजकुमारी। तुम्ह समान नहिं कोउ उपकारी।।

dhanya dhanya girirājakumārī। tumha samāna nahiṃ kou upakārī॥

पूँछेहु रघुपति कथा प्रसंगा। सकल लोक जग पावनि गंगा।।

pū~chehu raghupati kathā prasaṃgā। sakala loka jaga pāvani gaṃgā॥

तुम्ह रघुबीर चरन अनुरागी। कीन्हहु प्रस्न जगत हित लागी।।

tumha raghubīra carana anurāgī। kīnhahu prasna jagata hita lāgī॥

रामकृपा तें पारबति सपनेहुँ तव मन माहिं।

rāmakṛpā teṃ pārabati sapanehu~ tava mana māhiṃ।

सोक मोह संदेह भ्रम मम बिचार कछु नाहिं।।112।।

soka moha saṃdeha bhrama mama bicāra kachu nāhiṃ॥112॥

तदपि असंका कीन्हिहु सोई। कहत सुनत सब कर हित होई।।

tadapi asaṃkā kīnhihu soī। kahata sunata saba kara hita hoī॥

जिन्ह हरि कथा सुनी नहिं काना। श्रवन रंध्र अहिभवन समाना।।

jinha hari kathā sunī nahiṃ kānā। śravana raṃdhra ahibhavana samānā॥

नयनन्हि संत दरस नहिं देखा। लोचन मोरपंख कर लेखा।।

nayananhi saṃta darasa nahiṃ dekhā। locana morapaṃkha kara lekhā॥

ते सिर कटु तुंबरि समतूला। जे न नमत हरि गुर पद मूला।।

te sira kaṭu tuṃbari samatūlā। je na namata hari gura pada mūlā॥

जिन्ह हरिभगति हृदयँ नहिं आनी। जीवत सव समान तेइ प्रानी।।

jinha haribhagati hṛdaya~ nahiṃ ānī। jīvata sava samāna tei prānī॥

जो नहिं करइ राम गुन गाना। जीह सो दादुर जीह समाना।।

jo nahiṃ karai rāma guna gānā। jīha so dādura jīha samānā॥

कुलिस कठोर निठुर सोइ छाती। सुनि हरिचरित न जो हरषाती।।

kulisa kaṭhora niṭhura soi chātī। suni haricarita na jo haraṣātī॥

गिरिजा सुनहु राम कै लीला। सुर हित दनुज बिमोहनसीला।।

girijā sunahu rāma kai līlā। sura hita danuja bimohanasīlā॥

रामकथा सुरधेनु सम सेवत सब सुख दानि।

rāmakathā suradhenu sama sevata saba sukha dāni।

सतसमाज सुरलोक सब को न सुनै अस जानि।।113।।

satasamāja suraloka saba ko na sunai asa jāni॥113॥

रामकथा सुंदर कर तारी। संसय बिहग उडावनिहारी।।

rāmakathā suṃdara kara tārī। saṃsaya bihaga uḍāvanihārī॥

रामकथा कलि बिटप कुठारी। सादर सुनु गिरिराजकुमारी।।

rāmakathā kali biṭapa kuṭhārī। sādara sunu girirājakumārī॥

राम नाम गुन चरित सुहाए। जनम करम अगनित श्रुति गाए।।

rāma nāma guna carita suhāe। janama karama aganita śruti gāe॥

जथा अनंत राम भगवाना। तथा कथा कीरति गुन नाना।।

jathā anaṃta rāma bhagavānā। tathā kathā kīrati guna nānā॥

तदपि जथा श्रुत जसि मति मोरी। कहिहउँ देखि प्रीति अति तोरी।।

tadapi jathā śruta jasi mati morī। kahihau~ dekhi prīti ati torī॥

उमा प्रस्न तव सहज सुहाई। सुखद संतसंमत मोहि भाई।।

umā prasna tava sahaja suhāī। sukhada saṃtasaṃmata mohi bhāī॥

एक बात नहि मोहि सोहानी। जदपि मोह बस कहेहु भवानी।।

eka bāta nahi mohi sohānī। jadapi moha basa kahehu bhavānī॥

तुम जो कहा राम कोउ आना। जेहि श्रुति गाव धरहिं मुनि ध्याना।।

tuma jo kahā rāma kou ānā। jehi śruti gāva dharahiṃ muni dhyānā॥

कहहि सुनहि अस अधम नर ग्रसे जे मोह पिसाच।

kahahi sunahi asa adhama nara grase je moha pisāca।

पाषंडी हरि पद बिमुख जानहिं झूठ न साच।।114।।

pāṣaṃḍī hari pada bimukha jānahiṃ jhūṭha na sāca॥114॥

अग्य अकोबिद अंध अभागी। काई बिषय मुकर मन लागी।।

agya akobida aṃdha abhāgī। kāī biṣaya mukara mana lāgī॥

लंपट कपटी कुटिल बिसेषी। सपनेहुँ संतसभा नहिं देखी।।

laṃpaṭa kapaṭī kuṭila biseṣī। sapanehu~ saṃtasabhā nahiṃ dekhī॥

कहहिं ते बेद असंमत बानी। जिन्ह कें सूझ लाभु नहिं हानी।।

kahahiṃ te beda asaṃmata bānī। jinha keṃ sūjha lābhu nahiṃ hānī॥

मुकर मलिन अरु नयन बिहीना। राम रूप देखहिं किमि दीना।।

mukara malina aru nayana bihīnā। rāma rūpa dekhahiṃ kimi dīnā॥

जिन्ह कें अगुन न सगुन बिबेका। जल्पहिं कल्पित बचन अनेका।।

jinha keṃ aguna na saguna bibekā। jalpahiṃ kalpita bacana anekā॥

हरिमाया बस जगत भ्रमाहीं। तिन्हहि कहत कछु अघटित नाहीं।।

harimāyā basa jagata bhramāhīṃ। tinhahi kahata kachu aghaṭita nāhīṃ॥

बातुल भूत बिबस मतवारे। ते नहिं बोलहिं बचन बिचारे।।

bātula bhūta bibasa matavāre। te nahiṃ bolahiṃ bacana bicāre॥

जिन्ह कृत महामोह मद पाना। तिन् कर कहा करिअ नहिं काना।।

jinha kṛta mahāmoha mada pānā। tin kara kahā karia nahiṃ kānā॥

अस निज हृदयँ बिचारि तजु संसय भजु राम पद।

asa nija hṛdaya~ bicāri taju saṃsaya bhaju rāma pada।

सुनु गिरिराज कुमारि भ्रम तम रबि कर बचन मम।।115।।

sunu girirāja kumāri bhrama tama rabi kara bacana mama॥115॥

सगुनहि अगुनहि नहिं कछु भेदा। गावहिं मुनि पुरान बुध बेदा।।

sagunahi agunahi nahiṃ kachu bhedā। gāvahiṃ muni purāna budha bedā॥

अगुन अरुप अलख अज जोई। भगत प्रेम बस सगुन सो होई।।

aguna arupa alakha aja joī। bhagata prema basa saguna so hoī॥

जो गुन रहित सगुन सोइ कैसें। जलु हिम उपल बिलग नहिं जैसें।।

jo guna rahita saguna soi kaiseṃ। jalu hima upala bilaga nahiṃ jaiseṃ॥

जासु नाम भ्रम तिमिर पतंगा। तेहि किमि कहिअ बिमोह प्रसंगा।।

jāsu nāma bhrama timira pataṃgā। tehi kimi kahia bimoha prasaṃgā॥

राम सच्चिदानंद दिनेसा। नहिं तहँ मोह निसा लवलेसा।।

rāma saccidānaṃda dinesā। nahiṃ taha~ moha nisā lavalesā॥

सहज प्रकासरुप भगवाना। नहिं तहँ पुनि बिग्यान बिहाना।।

sahaja prakāsarupa bhagavānā। nahiṃ taha~ puni bigyāna bihānā॥

हरष बिषाद ग्यान अग्याना। जीव धर्म अहमिति अभिमाना।।

haraṣa biṣāda gyāna agyānā। jīva dharma ahamiti abhimānā॥

राम ब्रह्म ब्यापक जग जाना। परमानन्द परेस पुराना।।

rāma brahma byāpaka jaga jānā। paramānanda paresa purānā॥

पुरुष प्रसिद्ध प्रकास निधि प्रगट परावर नाथ।।

puruṣa prasiddha prakāsa nidhi pragaṭa parāvara nātha॥

रघुकुलमनि मम स्वामि सोइ कहि सिवँ नायउ माथ।।116।।

raghukulamani mama svāmi soi kahi siva~ nāyau mātha॥116॥

निज भ्रम नहिं समुझहिं अग्यानी। प्रभु पर मोह धरहिं जड़ प्रानी।।

nija bhrama nahiṃ samujhahiṃ agyānī। prabhu para moha dharahiṃ jar̤a prānī॥

जथा गगन घन पटल निहारी। झाँपेउ मानु कहहिं कुबिचारी।।

jathā gagana ghana paṭala nihārī। jhā~peu mānu kahahiṃ kubicārī॥

चितव जो लोचन अंगुलि लाएँ। प्रगट जुगल ससि तेहि के भाएँ।।

citava jo locana aṃguli lāe~। pragaṭa jugala sasi tehi ke bhāe~॥

उमा राम बिषइक अस मोहा। नभ तम धूम धूरि जिमि सोहा।।

umā rāma biṣaika asa mohā। nabha tama dhūma dhūri jimi sohā॥

बिषय करन सुर जीव समेता। सकल एक तें एक सचेता।।

biṣaya karana sura jīva sametā। sakala eka teṃ eka sacetā॥

सब कर परम प्रकासक जोई। राम अनादि अवधपति सोई।।

saba kara parama prakāsaka joī। rāma anādi avadhapati soī॥

जगत प्रकास्य प्रकासक रामू। मायाधीस ग्यान गुन धामू।।

jagata prakāsya prakāsaka rāmū। māyādhīsa gyāna guna dhāmū॥

जासु सत्यता तें जड माया। भास सत्य इव मोह सहाया।।

jāsu satyatā teṃ jaḍa māyā। bhāsa satya iva moha sahāyā॥

रजत सीप महुँ मास जिमि जथा भानु कर बारि।

rajata sīpa mahu~ māsa jimi jathā bhānu kara bāri।

जदपि मृषा तिहुँ काल सोइ भ्रम न सकइ कोउ टारि।।117।।

jadapi mṛṣā tihu~ kāla soi bhrama na sakai kou ṭāri॥117॥

एहि बिधि जग हरि आश्रित रहई। जदपि असत्य देत दुख अहई।।

ehi bidhi jaga hari āśrita rahaī। jadapi asatya deta dukha ahaī॥

जौं सपनें सिर काटै कोई। बिनु जागें न दूरि दुख होई।।

jauṃ sapaneṃ sira kāṭai koī। binu jāgeṃ na dūri dukha hoī॥

जासु कृपाँ अस भ्रम मिटि जाई। गिरिजा सोइ कृपाल रघुराई।।

jāsu kṛpā~ asa bhrama miṭi jāī। girijā soi kṛpāla raghurāī॥

आदि अंत कोउ जासु न पावा। मति अनुमानि निगम अस गावा।।

ādi aṃta kou jāsu na pāvā। mati anumāni nigama asa gāvā॥

बिनु पद चलइ सुनइ बिनु काना। कर बिनु करम करइ बिधि नाना।।

binu pada calai sunai binu kānā। kara binu karama karai bidhi nānā॥

आनन रहित सकल रस भोगी। बिनु बानी बकता बड़ जोगी।।

ānana rahita sakala rasa bhogī। binu bānī bakatā bar̤a jogī॥

तनु बिनु परस नयन बिनु देखा। ग्रहइ घ्रान बिनु बास असेषा।।

tanu binu parasa nayana binu dekhā। grahai ghrāna binu bāsa aseṣā॥

असि सब भाँति अलौकिक करनी। महिमा जासु जाइ नहिं बरनी।।

asi saba bhā~ti alaukika karanī। mahimā jāsu jāi nahiṃ baranī॥

जेहि इमि गावहि बेद बुध जाहि धरहिं मुनि ध्यान।।

jehi imi gāvahi beda budha jāhi dharahiṃ muni dhyāna॥

सोइ दसरथ सुत भगत हित कोसलपति भगवान।।118।।

soi dasaratha suta bhagata hita kosalapati bhagavāna॥118॥

कासीं मरत जंतु अवलोकी। जासु नाम बल करउँ बिसोकी।।

kāsīṃ marata jaṃtu avalokī। jāsu nāma bala karau~ bisokī॥

सोइ प्रभु मोर चराचर स्वामी। रघुबर सब उर अंतरजामी।।

soi prabhu mora carācara svāmī। raghubara saba ura aṃtarajāmī॥

बिबसहुँ जासु नाम नर कहहीं। जनम अनेक रचित अघ दहहीं।।

bibasahu~ jāsu nāma nara kahahīṃ। janama aneka racita agha dahahīṃ॥

सादर सुमिरन जे नर करहीं। भव बारिधि गोपद इव तरहीं।।

sādara sumirana je nara karahīṃ। bhava bāridhi gopada iva tarahīṃ॥

राम सो परमातमा भवानी। तहँ भ्रम अति अबिहित तव बानी।।

rāma so paramātamā bhavānī। taha~ bhrama ati abihita tava bānī॥

अस संसय आनत उर माहीं। ग्यान बिराग सकल गुन जाहीं।।

asa saṃsaya ānata ura māhīṃ। gyāna birāga sakala guna jāhīṃ॥

सुनि सिव के भ्रम भंजन बचना। मिटि गै सब कुतरक कै रचना।।

suni siva ke bhrama bhaṃjana bacanā। miṭi gai saba kutaraka kai racanā॥

भइ रघुपति पद प्रीति प्रतीती। दारुन असंभावना बीती।।

bhai raghupati pada prīti pratītī। dāruna asaṃbhāvanā bītī॥

पुनि पुनि प्रभु पद कमल गहि जोरि पंकरुह पानि।

puni puni prabhu pada kamala gahi jori paṃkaruha pāni।

बोली गिरिजा बचन बर मनहुँ प्रेम रस सानि।।119।।

bolī girijā bacana bara manahu~ prema rasa sāni॥119॥

ससि कर सम सुनि गिरा तुम्हारी। मिटा मोह सरदातप भारी।।

sasi kara sama suni girā tumhārī। miṭā moha saradātapa bhārī॥

तुम्ह कृपाल सबु संसउ हरेऊ। राम स्वरुप जानि मोहि परेऊ।।

tumha kṛpāla sabu saṃsau hareū। rāma svarupa jāni mohi pareū॥

नाथ कृपाँ अब गयउ बिषादा। सुखी भयउँ प्रभु चरन प्रसादा।।

nātha kṛpā~ aba gayau biṣādā। sukhī bhayau~ prabhu carana prasādā॥

अब मोहि आपनि किंकरि जानी। जदपि सहज जड नारि अयानी।।

aba mohi āpani kiṃkari jānī। jadapi sahaja jaḍa nāri ayānī॥

प्रथम जो मैं पूछा सोइ कहहू। जौं मो पर प्रसन्न प्रभु अहहू।।

prathama jo maiṃ pūchā soi kahahū। jauṃ mo para prasanna prabhu ahahū॥

राम ब्रह्म चिनमय अबिनासी। सर्ब रहित सब उर पुर बासी।।

rāma brahma cinamaya abināsī। sarba rahita saba ura pura bāsī॥

नाथ धरेउ नरतनु केहि हेतू। मोहि समुझाइ कहहु बृषकेतू।।

nātha dhareu naratanu kehi hetū। mohi samujhāi kahahu bṛṣaketū॥

उमा बचन सुनि परम बिनीता। रामकथा पर प्रीति पुनीता।।

umā bacana suni parama binītā। rāmakathā para prīti punītā॥

हिंयँ हरषे कामारि तब संकर सहज सुजान

hiṃya~ haraṣe kāmāri taba saṃkara sahaja sujāna

बहु बिधि उमहि प्रसंसि पुनि बोले कृपानिधान।।120(क)।।

bahu bidhi umahi prasaṃsi puni bole kṛpānidhāna॥120(ka)॥

सुनु सुभ कथा भवानि रामचरितमानस बिमल।

sunu subha kathā bhavāni rāmacaritamānasa bimala।

कहा भुसुंडि बखानि सुना बिहग नायक गरुड।।120(ख)।।

kahā bhusuṃḍi bakhāni sunā bihaga nāyaka garuḍa॥120(kha)॥

सो संबाद उदार जेहि बिधि भा आगें कहब।

so saṃbāda udāra jehi bidhi bhā āgeṃ kahaba।

सुनहु राम अवतार चरित परम सुंदर अनघ।।120(ग)।।

sunahu rāma avatāra carita parama suṃdara anagha॥120(ga)॥

हरि गुन नाम अपार कथा रूप अगनित अमित।

hari guna nāma apāra kathā rūpa aganita amita।

मैं निज मति अनुसार कहउँ उमा सादर सुनहु।।120(घ।।

maiṃ nija mati anusāra kahau~ umā sādara sunahu॥120(gha॥

सुनु गिरिजा हरिचरित सुहाए। बिपुल बिसद निगमागम गाए।।

sunu girijā haricarita suhāe। bipula bisada nigamāgama gāe॥

हरि अवतार हेतु जेहि होई। इदमित्थं कहि जाइ न सोई।।

hari avatāra hetu jehi hoī। idamitthaṃ kahi jāi na soī॥

राम अर्तक्य बुद्धि मन बानी। मत हमार अस सुनहि सयानी।।

rāma artakya buddhi mana bānī। mata hamāra asa sunahi sayānī॥

तदपि संत मुनि बेद पुराना। जस कछु कहहिं स्वमति अनुमाना।।

tadapi saṃta muni beda purānā। jasa kachu kahahiṃ svamati anumānā॥

तस मैं सुमुखि सुनावउँ तोही। समुझि परइ जस कारन मोही।।

tasa maiṃ sumukhi sunāvau~ tohī। samujhi parai jasa kārana mohī॥

जब जब होइ धरम कै हानी। बाढहिं असुर अधम अभिमानी।।

jaba jaba hoi dharama kai hānī। bāḍhahiṃ asura adhama abhimānī॥

करहिं अनीति जाइ नहिं बरनी। सीदहिं बिप्र धेनु सुर धरनी।।

karahiṃ anīti jāi nahiṃ baranī। sīdahiṃ bipra dhenu sura dharanī॥

तब तब प्रभु धरि बिबिध सरीरा। हरहि कृपानिधि सज्जन पीरा।।

taba taba prabhu dhari bibidha sarīrā। harahi kṛpānidhi sajjana pīrā॥

असुर मारि थापहिं सुरन्ह राखहिं निज श्रुति सेतु।

asura māri thāpahiṃ suranha rākhahiṃ nija śruti setu।

जग बिस्तारहिं बिसद जस राम जन्म कर हेतु।।121।।

jaga bistārahiṃ bisada jasa rāma janma kara hetu॥121॥

सोइ जस गाइ भगत भव तरहीं। कृपासिंधु जन हित तनु धरहीं।।

soi jasa gāi bhagata bhava tarahīṃ। kṛpāsiṃdhu jana hita tanu dharahīṃ॥

राम जनम के हेतु अनेका। परम बिचित्र एक तें एका।।

rāma janama ke hetu anekā। parama bicitra eka teṃ ekā॥

जनम एक दुइ कहउँ बखानी। सावधान सुनु सुमति भवानी।।

janama eka dui kahau~ bakhānī। sāvadhāna sunu sumati bhavānī॥

द्वारपाल हरि के प्रिय दोऊ। जय अरु बिजय जान सब कोऊ।।

dvārapāla hari ke priya doū। jaya aru bijaya jāna saba koū॥

बिप्र श्राप तें दूनउ भाई। तामस असुर देह तिन्ह पाई।।

bipra śrāpa teṃ dūnau bhāī। tāmasa asura deha tinha pāī॥

कनककसिपु अरु हाटक लोचन। जगत बिदित सुरपति मद मोचन।।

kanakakasipu aru hāṭaka locana। jagata bidita surapati mada mocana॥

बिजई समर बीर बिख्याता। धरि बराह बपु एक निपाता।।

bijaī samara bīra bikhyātā। dhari barāha bapu eka nipātā॥

होइ नरहरि दूसर पुनि मारा। जन प्रहलाद सुजस बिस्तारा।।

hoi narahari dūsara puni mārā। jana prahalāda sujasa bistārā॥

भए निसाचर जाइ तेइ महाबीर बलवान।

bhae nisācara jāi tei mahābīra balavāna।

कुंभकरन रावण सुभट सुर बिजई जग जान।।122 ।

kuṃbhakarana rāvaṇa subhaṭa sura bijaī jaga jāna॥122 ।

मुकुत न भए हते भगवाना। तीनि जनम द्विज बचन प्रवाना।।

mukuta na bhae hate bhagavānā। tīni janama dvija bacana pravānā॥

एक बार तिन्ह के हित लागी। धरेउ सरीर भगत अनुरागी।।

eka bāra tinha ke hita lāgī। dhareu sarīra bhagata anurāgī॥

कस्यप अदिति तहाँ पितु माता। दसरथ कौसल्या बिख्याता।।

kasyapa aditi tahā~ pitu mātā। dasaratha kausalyā bikhyātā॥

एक कलप एहि बिधि अवतारा। चरित्र पवित्र किए संसारा।।

eka kalapa ehi bidhi avatārā। caritra pavitra kie saṃsārā॥

एक कलप सुर देखि दुखारे। समर जलंधर सन सब हारे।।

eka kalapa sura dekhi dukhāre। samara jalaṃdhara sana saba hāre॥

संभु कीन्ह संग्राम अपारा। दनुज महाबल मरइ न मारा।।

saṃbhu kīnha saṃgrāma apārā। danuja mahābala marai na mārā॥

परम सती असुराधिप नारी। तेहि बल ताहि न जितहिं पुरारी।।

parama satī asurādhipa nārī। tehi bala tāhi na jitahiṃ purārī॥

छल करि टारेउ तासु ब्रत प्रभु सुर कारज कीन्ह।।

chala kari ṭāreu tāsu brata prabhu sura kāraja kīnha॥

जब तेहि जानेउ मरम तब श्राप कोप करि दीन्ह।।123।।

jaba tehi jāneu marama taba śrāpa kopa kari dīnha॥123॥

तासु श्राप हरि दीन्ह प्रमाना। कौतुकनिधि कृपाल भगवाना।।

tāsu śrāpa hari dīnha pramānā। kautukanidhi kṛpāla bhagavānā॥

तहाँ जलंधर रावन भयऊ। रन हति राम परम पद दयऊ।।

tahā~ jalaṃdhara rāvana bhayaū। rana hati rāma parama pada dayaū॥

एक जनम कर कारन एहा। जेहि लागि राम धरी नरदेहा।।

eka janama kara kārana ehā। jehi lāgi rāma dharī naradehā॥

प्रति अवतार कथा प्रभु केरी। सुनु मुनि बरनी कबिन्ह घनेरी।।

prati avatāra kathā prabhu kerī। sunu muni baranī kabinha ghanerī॥

नारद श्राप दीन्ह एक बारा। कलप एक तेहि लगि अवतारा।।

nārada śrāpa dīnha eka bārā। kalapa eka tehi lagi avatārā॥

गिरिजा चकित भई सुनि बानी। नारद बिष्नुभगत पुनि ग्यानि।।

girijā cakita bhaī suni bānī। nārada biṣnubhagata puni gyāni॥

कारन कवन श्राप मुनि दीन्हा। का अपराध रमापति कीन्हा।।

kārana kavana śrāpa muni dīnhā। kā aparādha ramāpati kīnhā॥

यह प्रसंग मोहि कहहु पुरारी। मुनि मन मोह आचरज भारी।।

yaha prasaṃga mohi kahahu purārī। muni mana moha ācaraja bhārī॥

बोले बिहसि महेस तब ग्यानी मूढ़ न कोइ।

bole bihasi mahesa taba gyānī mūr̤ha na koi।

जेहि जस रघुपति करहिं जब सो तस तेहि छन होइ।।124(क)।।

jehi jasa raghupati karahiṃ jaba so tasa tehi chana hoi॥124(ka)॥

कहउँ राम गुन गाथ भरद्वाज सादर सुनहु।

kahau~ rāma guna gātha bharadvāja sādara sunahu।

भव भंजन रघुनाथ भजु तुलसी तजि मान मद।।124(ख)।।

bhava bhaṃjana raghunātha bhaju tulasī taji māna mada॥124(kha)॥

हिमगिरि गुहा एक अति पावनि। बह समीप सुरसरी सुहावनि।।

himagiri guhā eka ati pāvani। baha samīpa surasarī suhāvani॥

आश्रम परम पुनीत सुहावा। देखि देवरिषि मन अति भावा।।

āśrama parama punīta suhāvā। dekhi devariṣi mana ati bhāvā॥

निरखि सैल सरि बिपिन बिभागा। भयउ रमापति पद अनुरागा।।

nirakhi saila sari bipina bibhāgā। bhayau ramāpati pada anurāgā॥

सुमिरत हरिहि श्राप गति बाधी। सहज बिमल मन लागि समाधी।।

sumirata harihi śrāpa gati bādhī। sahaja bimala mana lāgi samādhī॥

मुनि गति देखि सुरेस डेराना। कामहि बोलि कीन्ह सनमाना।।

muni gati dekhi suresa ḍerānā। kāmahi boli kīnha sanamānā॥

सहित सहाय जाहु मम हेतू। चकेउ हरषि हियँ जलचरकेतू।।

sahita sahāya jāhu mama hetū। cakeu haraṣi hiya~ jalacaraketū॥

सुनासीर मन महुँ असि त्रासा। चहत देवरिषि मम पुर बासा।।

sunāsīra mana mahu~ asi trāsā। cahata devariṣi mama pura bāsā॥

जे कामी लोलुप जग माहीं। कुटिल काक इव सबहि डेराहीं।।

je kāmī lolupa jaga māhīṃ। kuṭila kāka iva sabahi ḍerāhīṃ॥

सुख हाड़ लै भाग सठ स्वान निरखि मृगराज।

sukha hār̤a lai bhāga saṭha svāna nirakhi mṛgarāja।

छीनि लेइ जनि जान जड़ तिमि सुरपतिहि न लाज।।125।।

chīni lei jani jāna jar̤a timi surapatihi na lāja॥125॥

तेहि आश्रमहिं मदन जब गयऊ। निज मायाँ बसंत निरमयऊ।।

tehi āśramahiṃ madana jaba gayaū। nija māyā~ basaṃta niramayaū॥

कुसुमित बिबिध बिटप बहुरंगा। कूजहिं कोकिल गुंजहि भृंगा।।

kusumita bibidha biṭapa bahuraṃgā। kūjahiṃ kokila guṃjahi bhṛṃgā॥

चली सुहावनि त्रिबिध बयारी। काम कृसानु बढ़ावनिहारी।।

calī suhāvani tribidha bayārī। kāma kṛsānu bar̤hāvanihārī॥

रंभादिक सुरनारि नबीना । सकल असमसर कला प्रबीना।।

raṃbhādika suranāri nabīnā । sakala asamasara kalā prabīnā॥

करहिं गान बहु तान तरंगा। बहुबिधि क्रीड़हि पानि पतंगा।।

karahiṃ gāna bahu tāna taraṃgā। bahubidhi krīr̤ahi pāni pataṃgā॥

देखि सहाय मदन हरषाना। कीन्हेसि पुनि प्रपंच बिधि नाना।।

dekhi sahāya madana haraṣānā। kīnhesi puni prapaṃca bidhi nānā॥

काम कला कछु मुनिहि न ब्यापी। निज भयँ डरेउ मनोभव पापी।।

kāma kalā kachu munihi na byāpī। nija bhaya~ ḍareu manobhava pāpī॥

सीम कि चाँपि सकइ कोउ तासु। बड़ रखवार रमापति जासू।।

sīma ki cā~pi sakai kou tāsu। bar̤a rakhavāra ramāpati jāsū॥

सहित सहाय सभीत अति मानि हारि मन मैन।

sahita sahāya sabhīta ati māni hāri mana maina।

गहेसि जाइ मुनि चरन तब कहि सुठि आरत बैन।।126।।

gahesi jāi muni carana taba kahi suṭhi ārata baina॥126॥

भयउ न नारद मन कछु रोषा। कहि प्रिय बचन काम परितोषा।।

bhayau na nārada mana kachu roṣā। kahi priya bacana kāma paritoṣā॥

नाइ चरन सिरु आयसु पाई। गयउ मदन तब सहित सहाई।।

nāi carana siru āyasu pāī। gayau madana taba sahita sahāī॥

मुनि सुसीलता आपनि करनी। सुरपति सभाँ जाइ सब बरनी।।

muni susīlatā āpani karanī। surapati sabhā~ jāi saba baranī॥

सुनि सब कें मन अचरजु आवा। मुनिहि प्रसंसि हरिहि सिरु नावा।।

suni saba keṃ mana acaraju āvā। munihi prasaṃsi harihi siru nāvā॥

तब नारद गवने सिव पाहीं। जिता काम अहमिति मन माहीं।।

taba nārada gavane siva pāhīṃ। jitā kāma ahamiti mana māhīṃ॥

मार चरित संकरहिं सुनाए। अतिप्रिय जानि महेस सिखाए।।

māra carita saṃkarahiṃ sunāe। atipriya jāni mahesa sikhāe॥

बार बार बिनवउँ मुनि तोहीं। जिमि यह कथा सुनायहु मोहीं।।

bāra bāra binavau~ muni tohīṃ। jimi yaha kathā sunāyahu mohīṃ॥

तिमि जनि हरिहि सुनावहु कबहूँ। चलेहुँ प्रसंग दुराएडु तबहूँ।।

timi jani harihi sunāvahu kabahū~। calehu~ prasaṃga durāeḍu tabahū~॥

संभु दीन्ह उपदेस हित नहिं नारदहि सोहान।

saṃbhu dīnha upadesa hita nahiṃ nāradahi sohāna।

भारद्वाज कौतुक सुनहु हरि इच्छा बलवान।।127।।

bhāradvāja kautuka sunahu hari icchā balavāna॥127॥

राम कीन्ह चाहहिं सोइ होई। करै अन्यथा अस नहिं कोई।।

rāma kīnha cāhahiṃ soi hoī। karai anyathā asa nahiṃ koī॥

संभु बचन मुनि मन नहिं भाए। तब बिरंचि के लोक सिधाए।।

saṃbhu bacana muni mana nahiṃ bhāe। taba biraṃci ke loka sidhāe॥

एक बार करतल बर बीना। गावत हरि गुन गान प्रबीना।।

eka bāra karatala bara bīnā। gāvata hari guna gāna prabīnā॥

छीरसिंधु गवने मुनिनाथा। जहँ बस श्रीनिवास श्रुतिमाथा।।

chīrasiṃdhu gavane munināthā। jaha~ basa śrīnivāsa śrutimāthā॥

हरषि मिले उठि रमानिकेता। बैठे आसन रिषिहि समेता।।

haraṣi mile uṭhi ramāniketā। baiṭhe āsana riṣihi sametā॥

बोले बिहसि चराचर राया। बहुते दिनन कीन्हि मुनि दाया।।

bole bihasi carācara rāyā। bahute dinana kīnhi muni dāyā॥

काम चरित नारद सब भाषे। जद्यपि प्रथम बरजि सिवँ राखे।।

kāma carita nārada saba bhāṣe। jadyapi prathama baraji siva~ rākhe॥

अति प्रचंड रघुपति कै माया। जेहि न मोह अस को जग जाया।।

ati pracaṃḍa raghupati kai māyā। jehi na moha asa ko jaga jāyā॥

रूख बदन करि बचन मृदु बोले श्रीभगवान ।

rūkha badana kari bacana mṛdu bole śrībhagavāna ।

तुम्हरे सुमिरन तें मिटहिं मोह मार मद मान।।128।।

tumhare sumirana teṃ miṭahiṃ moha māra mada māna॥128॥

सुनु मुनि मोह होइ मन ताकें। ग्यान बिराग हृदय नहिं जाके।।

sunu muni moha hoi mana tākeṃ। gyāna birāga hṛdaya nahiṃ jāke॥

ब्रह्मचरज ब्रत रत मतिधीरा। तुम्हहि कि करइ मनोभव पीरा।।

brahmacaraja brata rata matidhīrā। tumhahi ki karai manobhava pīrā॥

नारद कहेउ सहित अभिमाना। कृपा तुम्हारि सकल भगवाना।।

nārada kaheu sahita abhimānā। kṛpā tumhāri sakala bhagavānā॥

करुनानिधि मन दीख बिचारी। उर अंकुरेउ गरब तरु भारी।।

karunānidhi mana dīkha bicārī। ura aṃkureu garaba taru bhārī॥

बेगि सो मै डारिहउँ उखारी। पन हमार सेवक हितकारी।।

begi so mai ḍārihau~ ukhārī। pana hamāra sevaka hitakārī॥

मुनि कर हित मम कौतुक होई। अवसि उपाय करबि मै सोई।।

muni kara hita mama kautuka hoī। avasi upāya karabi mai soī॥

तब नारद हरि पद सिर नाई। चले हृदयँ अहमिति अधिकाई।।

taba nārada hari pada sira nāī। cale hṛdaya~ ahamiti adhikāī॥

श्रीपति निज माया तब प्रेरी। सुनहु कठिन करनी तेहि केरी।।

śrīpati nija māyā taba prerī। sunahu kaṭhina karanī tehi kerī॥

बिरचेउ मग महुँ नगर तेहिं सत जोजन बिस्तार।

biraceu maga mahu~ nagara tehiṃ sata jojana bistāra।

श्रीनिवासपुर तें अधिक रचना बिबिध प्रकार।।129।।

śrīnivāsapura teṃ adhika racanā bibidha prakāra॥129॥

बसहिं नगर सुंदर नर नारी। जनु बहु मनसिज रति तनुधारी।।

basahiṃ nagara suṃdara nara nārī। janu bahu manasija rati tanudhārī॥

तेहिं पुर बसइ सीलनिधि राजा। अगनित हय गय सेन समाजा।।

tehiṃ pura basai sīlanidhi rājā। aganita haya gaya sena samājā॥

सत सुरेस सम बिभव बिलासा। रूप तेज बल नीति निवासा।।

sata suresa sama bibhava bilāsā। rūpa teja bala nīti nivāsā॥

बिस्वमोहनी तासु कुमारी। श्री बिमोह जिसु रूपु निहारी।।

bisvamohanī tāsu kumārī। śrī bimoha jisu rūpu nihārī॥

सोइ हरिमाया सब गुन खानी। सोभा तासु कि जाइ बखानी।।

soi harimāyā saba guna khānī। sobhā tāsu ki jāi bakhānī॥

करइ स्वयंबर सो नृपबाला। आए तहँ अगनित महिपाला।।

karai svayaṃbara so nṛpabālā। āe taha~ aganita mahipālā॥

मुनि कौतुकी नगर तेहिं गयऊ। पुरबासिन्ह सब पूछत भयऊ।।

muni kautukī nagara tehiṃ gayaū। purabāsinha saba pūchata bhayaū॥

सुनि सब चरित भूपगृहँ आए। करि पूजा नृप मुनि बैठाए।।

suni saba carita bhūpagṛha~ āe। kari pūjā nṛpa muni baiṭhāe॥

आनि देखाई नारदहि भूपति राजकुमारि।

āni dekhāī nāradahi bhūpati rājakumāri।

कहहु नाथ गुन दोष सब एहि के हृदयँ बिचारि।।130।।

kahahu nātha guna doṣa saba ehi ke hṛdaya~ bicāri॥130॥

देखि रूप मुनि बिरति बिसारी। बड़ी बार लगि रहे निहारी।।

dekhi rūpa muni birati bisārī। bar̤ī bāra lagi rahe nihārī॥

लच्छन तासु बिलोकि भुलाने। हृदयँ हरष नहिं प्रगट बखाने।।

lacchana tāsu biloki bhulāne। hṛdaya~ haraṣa nahiṃ pragaṭa bakhāne॥

जो एहि बरइ अमर सोइ होई। समरभूमि तेहि जीत न कोई।।

jo ehi barai amara soi hoī। samarabhūmi tehi jīta na koī॥

सेवहिं सकल चराचर ताही। बरइ सीलनिधि कन्या जाही।।

sevahiṃ sakala carācara tāhī। barai sīlanidhi kanyā jāhī॥

लच्छन सब बिचारि उर राखे। कछुक बनाइ भूप सन भाषे।।

lacchana saba bicāri ura rākhe। kachuka banāi bhūpa sana bhāṣe॥

सुता सुलच्छन कहि नृप पाहीं। नारद चले सोच मन माहीं।।

sutā sulacchana kahi nṛpa pāhīṃ। nārada cale soca mana māhīṃ॥

करौं जाइ सोइ जतन बिचारी। जेहि प्रकार मोहि बरै कुमारी।।

karauṃ jāi soi jatana bicārī। jehi prakāra mohi barai kumārī॥

जप तप कछु न होइ तेहि काला। हे बिधि मिलइ कवन बिधि बाला।।

japa tapa kachu na hoi tehi kālā। he bidhi milai kavana bidhi bālā॥

एहि अवसर चाहिअ परम सोभा रूप बिसाल।

ehi avasara cāhia parama sobhā rūpa bisāla।

जो बिलोकि रीझै कुअँरि तब मेलै जयमाल।।131।।

jo biloki rījhai kua~ri taba melai jayamāla॥131॥

हरि सन मागौं सुंदरताई। होइहि जात गहरु अति भाई।।

hari sana māgauṃ suṃdaratāī। hoihi jāta gaharu ati bhāī॥

मोरें हित हरि सम नहिं कोऊ। एहि अवसर सहाय सोइ होऊ।।

moreṃ hita hari sama nahiṃ koū। ehi avasara sahāya soi hoū॥

बहुबिधि बिनय कीन्हि तेहि काला। प्रगटेउ प्रभु कौतुकी कृपाला।।

bahubidhi binaya kīnhi tehi kālā। pragaṭeu prabhu kautukī kṛpālā॥

प्रभु बिलोकि मुनि नयन जुड़ाने। होइहि काजु हिएँ हरषाने।।

prabhu biloki muni nayana jur̤āne। hoihi kāju hie~ haraṣāne॥

अति आरति कहि कथा सुनाई। करहु कृपा करि होहु सहाई।।

ati ārati kahi kathā sunāī। karahu kṛpā kari hohu sahāī॥

आपन रूप देहु प्रभु मोही। आन भाँति नहिं पावौं ओही।।

āpana rūpa dehu prabhu mohī। āna bhā~ti nahiṃ pāvauṃ ohī॥

जेहि बिधि नाथ होइ हित मोरा। करहु सो बेगि दास मैं तोरा।।

jehi bidhi nātha hoi hita morā। karahu so begi dāsa maiṃ torā॥

निज माया बल देखि बिसाला। हियँ हँसि बोले दीनदयाला।।

nija māyā bala dekhi bisālā। hiya~ ha~si bole dīnadayālā॥

जेहि बिधि होइहि परम हित नारद सुनहु तुम्हार।

jehi bidhi hoihi parama hita nārada sunahu tumhāra।

सोइ हम करब न आन कछु बचन न मृषा हमार।।132।।

soi hama karaba na āna kachu bacana na mṛṣā hamāra॥132॥

कुपथ माग रुज ब्याकुल रोगी। बैद न देइ सुनहु मुनि जोगी।।

kupatha māga ruja byākula rogī। baida na dei sunahu muni jogī॥

एहि बिधि हित तुम्हार मैं ठयऊ। कहि अस अंतरहित प्रभु भयऊ।।

ehi bidhi hita tumhāra maiṃ ṭhayaū। kahi asa aṃtarahita prabhu bhayaū॥

माया बिबस भए मुनि मूढ़ा। समुझी नहिं हरि गिरा निगूढ़ा।।

māyā bibasa bhae muni mūr̤hā। samujhī nahiṃ hari girā nigūr̤hā॥

गवने तुरत तहाँ रिषिराई। जहाँ स्वयंबर भूमि बनाई।।

gavane turata tahā~ riṣirāī। jahā~ svayaṃbara bhūmi banāī॥

निज निज आसन बैठे राजा। बहु बनाव करि सहित समाजा।।

nija nija āsana baiṭhe rājā। bahu banāva kari sahita samājā॥

मुनि मन हरष रूप अति मोरें। मोहि तजि आनहि बारिहि न भोरें।।

muni mana haraṣa rūpa ati moreṃ। mohi taji ānahi bārihi na bhoreṃ॥

मुनि हित कारन कृपानिधाना। दीन्ह कुरूप न जाइ बखाना।।

muni hita kārana kṛpānidhānā। dīnha kurūpa na jāi bakhānā॥

सो चरित्र लखि काहुँ न पावा। नारद जानि सबहिं सिर नावा।।

so caritra lakhi kāhu~ na pāvā। nārada jāni sabahiṃ sira nāvā॥

रहे तहाँ दुइ रुद्र गन ते जानहिं सब भेउ।

rahe tahā~ dui rudra gana te jānahiṃ saba bheu।

बिप्रबेष देखत फिरहिं परम कौतुकी तेउ।।133।।

biprabeṣa dekhata phirahiṃ parama kautukī teu॥133॥

जेंहि समाज बैंठे मुनि जाई। हृदयँ रूप अहमिति अधिकाई।।

jeṃhi samāja baiṃṭhe muni jāī। hṛdaya~ rūpa ahamiti adhikāī॥

तहँ बैठ महेस गन दोऊ। बिप्रबेष गति लखइ न कोऊ।।

taha~ baiṭha mahesa gana doū। biprabeṣa gati lakhai na koū॥

करहिं कूटि नारदहि सुनाई। नीकि दीन्हि हरि सुंदरताई।।

karahiṃ kūṭi nāradahi sunāī। nīki dīnhi hari suṃdaratāī॥

रीझहि राजकुअँरि छबि देखी। इन्हहि बरिहि हरि जानि बिसेषी।।

rījhahi rājakua~ri chabi dekhī। inhahi barihi hari jāni biseṣī॥

मुनिहि मोह मन हाथ पराएँ। हँसहिं संभु गन अति सचु पाएँ।।

munihi moha mana hātha parāe~। ha~sahiṃ saṃbhu gana ati sacu pāe~॥

जदपि सुनहिं मुनि अटपटि बानी। समुझि न परइ बुद्धि भ्रम सानी।।

jadapi sunahiṃ muni aṭapaṭi bānī। samujhi na parai buddhi bhrama sānī॥

काहुँ न लखा सो चरित बिसेषा। सो सरूप नृपकन्याँ देखा।।

kāhu~ na lakhā so carita biseṣā। so sarūpa nṛpakanyā~ dekhā॥

मर्कट बदन भयंकर देही। देखत हृदयँ क्रोध भा तेही।।

markaṭa badana bhayaṃkara dehī। dekhata hṛdaya~ krodha bhā tehī॥

सखीं संग लै कुअँरि तब चलि जनु राजमराल।

sakhīṃ saṃga lai kua~ri taba cali janu rājamarāla।

देखत फिरइ महीप सब कर सरोज जयमाल।।134।।

dekhata phirai mahīpa saba kara saroja jayamāla॥134॥

जेहि दिसि बैठे नारद फूली। सो दिसि देहि न बिलोकी भूली।।

jehi disi baiṭhe nārada phūlī। so disi dehi na bilokī bhūlī॥

पुनि पुनि मुनि उकसहिं अकुलाहीं। देखि दसा हर गन मुसकाहीं।।

puni puni muni ukasahiṃ akulāhīṃ। dekhi dasā hara gana musakāhīṃ॥

धरि नृपतनु तहँ गयउ कृपाला। कुअँरि हरषि मेलेउ जयमाला।।

dhari nṛpatanu taha~ gayau kṛpālā। kua~ri haraṣi meleu jayamālā॥

दुलहिनि लै गे लच्छिनिवासा। नृपसमाज सब भयउ निरासा।।

dulahini lai ge lacchinivāsā। nṛpasamāja saba bhayau nirāsā॥

मुनि अति बिकल मोंहँ मति नाठी। मनि गिरि गई छूटि जनु गाँठी।।

muni ati bikala moṃha~ mati nāṭhī। mani giri gaī chūṭi janu gā~ṭhī॥

तब हर गन बोले मुसुकाई। निज मुख मुकुर बिलोकहु जाई।।

taba hara gana bole musukāī। nija mukha mukura bilokahu jāī॥

अस कहि दोउ भागे भयँ भारी। बदन दीख मुनि बारि निहारी।।

asa kahi dou bhāge bhaya~ bhārī। badana dīkha muni bāri nihārī॥

बेषु बिलोकि क्रोध अति बाढ़ा। तिन्हहि सराप दीन्ह अति गाढ़ा।।

beṣu biloki krodha ati bār̤hā। tinhahi sarāpa dīnha ati gār̤hā॥

होहु निसाचर जाइ तुम्ह कपटी पापी दोउ।

hohu nisācara jāi tumha kapaṭī pāpī dou।

हँसेहु हमहि सो लेहु फल बहुरि हँसेहु मुनि कोउ।।135।।

ha~sehu hamahi so lehu phala bahuri ha~sehu muni kou॥135॥

पुनि जल दीख रूप निज पावा। तदपि हृदयँ संतोष न आवा।।

puni jala dīkha rūpa nija pāvā। tadapi hṛdaya~ saṃtoṣa na āvā॥

फरकत अधर कोप मन माहीं। सपदी चले कमलापति पाहीं।।

pharakata adhara kopa mana māhīṃ। sapadī cale kamalāpati pāhīṃ॥

देहउँ श्राप कि मरिहउँ जाई। जगत मोर उपहास कराई।।

dehau~ śrāpa ki marihau~ jāī। jagata mora upahāsa karāī॥

बीचहिं पंथ मिले दनुजारी। संग रमा सोइ राजकुमारी।।

bīcahiṃ paṃtha mile danujārī। saṃga ramā soi rājakumārī॥

बोले मधुर बचन सुरसाईं। मुनि कहँ चले बिकल की नाईं।।

bole madhura bacana surasāīṃ। muni kaha~ cale bikala kī nāīṃ॥

सुनत बचन उपजा अति क्रोधा। माया बस न रहा मन बोधा।।

sunata bacana upajā ati krodhā। māyā basa na rahā mana bodhā॥

पर संपदा सकहु नहिं देखी। तुम्हरें इरिषा कपट बिसेषी।।

para saṃpadā sakahu nahiṃ dekhī। tumhareṃ iriṣā kapaṭa biseṣī॥

मथत सिंधु रुद्रहि बौरायहु। सुरन्ह प्रेरी बिष पान करायहु।।

mathata siṃdhu rudrahi baurāyahu। suranha prerī biṣa pāna karāyahu॥

असुर सुरा बिष संकरहि आपु रमा मनि चारु।

asura surā biṣa saṃkarahi āpu ramā mani cāru।

स्वारथ साधक कुटिल तुम्ह सदा कपट ब्यवहारु।।136।।

svāratha sādhaka kuṭila tumha sadā kapaṭa byavahāru॥136॥

परम स्वतंत्र न सिर पर कोई। भावइ मनहि करहु तुम्ह सोई।।

parama svataṃtra na sira para koī। bhāvai manahi karahu tumha soī॥

भलेहि मंद मंदेहि भल करहू। बिसमय हरष न हियँ कछु धरहू।।

bhalehi maṃda maṃdehi bhala karahū। bisamaya haraṣa na hiya~ kachu dharahū॥

डहकि डहकि परिचेहु सब काहू। अति असंक मन सदा उछाहू।।

ḍahaki ḍahaki paricehu saba kāhū। ati asaṃka mana sadā uchāhū॥

करम सुभासुभ तुम्हहि न बाधा। अब लगि तुम्हहि न काहूँ साधा।।

karama subhāsubha tumhahi na bādhā। aba lagi tumhahi na kāhū~ sādhā॥

भले भवन अब बायन दीन्हा। पावहुगे फल आपन कीन्हा।।

bhale bhavana aba bāyana dīnhā। pāvahuge phala āpana kīnhā॥

बंचेहु मोहि जवनि धरि देहा। सोइ तनु धरहु श्राप मम एहा।।

baṃcehu mohi javani dhari dehā। soi tanu dharahu śrāpa mama ehā॥

कपि आकृति तुम्ह कीन्हि हमारी। करिहहिं कीस सहाय तुम्हारी।।

kapi ākṛti tumha kīnhi hamārī। karihahiṃ kīsa sahāya tumhārī॥

मम अपकार कीन्ही तुम्ह भारी। नारी बिरहँ तुम्ह होब दुखारी।।

mama apakāra kīnhī tumha bhārī। nārī biraha~ tumha hoba dukhārī॥

श्राप सीस धरी हरषि हियँ प्रभु बहु बिनती कीन्हि।

śrāpa sīsa dharī haraṣi hiya~ prabhu bahu binatī kīnhi।

निज माया कै प्रबलता करषि कृपानिधि लीन्हि।।137।।

nija māyā kai prabalatā karaṣi kṛpānidhi līnhi॥137॥

जब हरि माया दूरि निवारी। नहिं तहँ रमा न राजकुमारी।।

jaba hari māyā dūri nivārī। nahiṃ taha~ ramā na rājakumārī॥

तब मुनि अति सभीत हरि चरना। गहे पाहि प्रनतारति हरना।।

taba muni ati sabhīta hari caranā। gahe pāhi pranatārati haranā॥

मृषा होउ मम श्राप कृपाला। मम इच्छा कह दीनदयाला।।

mṛṣā hou mama śrāpa kṛpālā। mama icchā kaha dīnadayālā॥

मैं दुर्बचन कहे बहुतेरे। कह मुनि पाप मिटिहिं किमि मेरे।।

maiṃ durbacana kahe bahutere। kaha muni pāpa miṭihiṃ kimi mere॥

जपहु जाइ संकर सत नामा। होइहि हृदयँ तुरंत बिश्रामा।।

japahu jāi saṃkara sata nāmā। hoihi hṛdaya~ turaṃta biśrāmā॥

कोउ नहिं सिव समान प्रिय मोरें। असि परतीति तजहु जनि भोरें।।

kou nahiṃ siva samāna priya moreṃ। asi paratīti tajahu jani bhoreṃ॥

जेहि पर कृपा न करहिं पुरारी। सो न पाव मुनि भगति हमारी।।

jehi para kṛpā na karahiṃ purārī। so na pāva muni bhagati hamārī॥

अस उर धरि महि बिचरहु जाई। अब न तुम्हहि माया निअराई।।

asa ura dhari mahi bicarahu jāī। aba na tumhahi māyā niarāī॥

बहुबिधि मुनिहि प्रबोधि प्रभु तब भए अंतरधान।।

bahubidhi munihi prabodhi prabhu taba bhae aṃtaradhāna॥

सत्यलोक नारद चले करत राम गुन गान।।138।।

satyaloka nārada cale karata rāma guna gāna॥138॥

हर गन मुनिहि जात पथ देखी। बिगतमोह मन हरष बिसेषी।।

hara gana munihi jāta patha dekhī। bigatamoha mana haraṣa biseṣī॥

अति सभीत नारद पहिं आए। गहि पद आरत बचन सुनाए।।

ati sabhīta nārada pahiṃ āe। gahi pada ārata bacana sunāe॥

हर गन हम न बिप्र मुनिराया। बड़ अपराध कीन्ह फल पाया।।

hara gana hama na bipra munirāyā। bar̤a aparādha kīnha phala pāyā॥

श्राप अनुग्रह करहु कृपाला। बोले नारद दीनदयाला।।

śrāpa anugraha karahu kṛpālā। bole nārada dīnadayālā॥

निसिचर जाइ होहु तुम्ह दोऊ। बैभव बिपुल तेज बल होऊ।।

nisicara jāi hohu tumha doū। baibhava bipula teja bala hoū॥

भुजबल बिस्व जितब तुम्ह जहिआ। धरिहहिं बिष्नु मनुज तनु तहिआ।

bhujabala bisva jitaba tumha jahiā। dharihahiṃ biṣnu manuja tanu tahiā।

समर मरन हरि हाथ तुम्हारा। होइहहु मुकुत न पुनि संसारा।।

samara marana hari hātha tumhārā। hoihahu mukuta na puni saṃsārā॥

चले जुगल मुनि पद सिर नाई। भए निसाचर कालहि पाई।।

cale jugala muni pada sira nāī। bhae nisācara kālahi pāī॥

एक कलप एहि हेतु प्रभु लीन्ह मनुज अवतार।

eka kalapa ehi hetu prabhu līnha manuja avatāra।

सुर रंजन सज्जन सुखद हरि भंजन भुबि भार।।139।।

sura raṃjana sajjana sukhada hari bhaṃjana bhubi bhāra॥139॥

एहि बिधि जनम करम हरि केरे। सुंदर सुखद बिचित्र घनेरे।।

ehi bidhi janama karama hari kere। suṃdara sukhada bicitra ghanere॥

कलप कलप प्रति प्रभु अवतरहीं। चारु चरित नानाबिधि करहीं।।

kalapa kalapa prati prabhu avatarahīṃ। cāru carita nānābidhi karahīṃ॥

तब तब कथा मुनीसन्ह गाई। परम पुनीत प्रबंध बनाई।।

taba taba kathā munīsanha gāī। parama punīta prabaṃdha banāī॥

बिबिध प्रसंग अनूप बखाने। करहिं न सुनि आचरजु सयाने।।

bibidha prasaṃga anūpa bakhāne। karahiṃ na suni ācaraju sayāne॥

हरि अनंत हरिकथा अनंता। कहहिं सुनहिं बहुबिधि सब संता।।

hari anaṃta harikathā anaṃtā। kahahiṃ sunahiṃ bahubidhi saba saṃtā॥

रामचंद्र के चरित सुहाए। कलप कोटि लगि जाहिं न गाए।।

rāmacaṃdra ke carita suhāe। kalapa koṭi lagi jāhiṃ na gāe॥

यह प्रसंग मैं कहा भवानी। हरिमायाँ मोहहिं मुनि ग्यानी।।

yaha prasaṃga maiṃ kahā bhavānī। harimāyā~ mohahiṃ muni gyānī॥

प्रभु कौतुकी प्रनत हितकारी।।सेवत सुलभ सकल दुख हारी।।

prabhu kautukī pranata hitakārī॥sevata sulabha sakala dukha hārī॥

सुर नर मुनि कोउ नाहिं जेहि न मोह माया प्रबल।।

sura nara muni kou nāhiṃ jehi na moha māyā prabala॥

अस बिचारि मन माहिं भजिअ महामाया पतिहि।।140।।

asa bicāri mana māhiṃ bhajia mahāmāyā patihi॥140॥

अपर हेतु सुनु सैलकुमारी। कहउँ बिचित्र कथा बिस्तारी।।

apara hetu sunu sailakumārī। kahau~ bicitra kathā bistārī॥

जेहि कारन अज अगुन अरूपा। ब्रह्म भयउ कोसलपुर भूपा।।

jehi kārana aja aguna arūpā। brahma bhayau kosalapura bhūpā॥

जो प्रभु बिपिन फिरत तुम्ह देखा। बंधु समेत धरें मुनिबेषा।।

jo prabhu bipina phirata tumha dekhā। baṃdhu sameta dhareṃ munibeṣā॥

जासु चरित अवलोकि भवानी। सती सरीर रहिहु बौरानी।।

jāsu carita avaloki bhavānī। satī sarīra rahihu baurānī॥

अजहुँ न छाया मिटति तुम्हारी। तासु चरित सुनु भ्रम रुज हारी।।

ajahu~ na chāyā miṭati tumhārī। tāsu carita sunu bhrama ruja hārī॥

लीला कीन्हि जो तेहिं अवतारा। सो सब कहिहउँ मति अनुसारा।।

līlā kīnhi jo tehiṃ avatārā। so saba kahihau~ mati anusārā॥

भरद्वाज सुनि संकर बानी। सकुचि सप्रेम उमा मुसकानी।।

bharadvāja suni saṃkara bānī। sakuci saprema umā musakānī॥

लगे बहुरि बरने बृषकेतू। सो अवतार भयउ जेहि हेतू।।

lage bahuri barane bṛṣaketū। so avatāra bhayau jehi hetū॥

सो मैं तुम्ह सन कहउँ सबु सुनु मुनीस मन लाई।।

so maiṃ tumha sana kahau~ sabu sunu munīsa mana lāī॥

राम कथा कलि मल हरनि मंगल करनि सुहाइ।।141।।

rāma kathā kali mala harani maṃgala karani suhāi॥141॥

स्वायंभू मनु अरु सतरूपा। जिन्ह तें भै नरसृष्टि अनूपा।।

svāyaṃbhū manu aru satarūpā। jinha teṃ bhai narasṛṣṭi anūpā॥

दंपति धरम आचरन नीका। अजहुँ गाव श्रुति जिन्ह कै लीका।।

daṃpati dharama ācarana nīkā। ajahu~ gāva śruti jinha kai līkā॥

नृप उत्तानपाद सुत तासू। ध्रुव हरि भगत भयउ सुत जासू।।

nṛpa uttānapāda suta tāsū। dhruva hari bhagata bhayau suta jāsū॥

लघु सुत नाम प्रिय्रब्रत ताही। बेद पुरान प्रसंसहि जाही।।

laghu suta nāma priyrabrata tāhī। beda purāna prasaṃsahi jāhī॥

देवहूति पुनि तासु कुमारी। जो मुनि कर्दम कै प्रिय नारी।।

devahūti puni tāsu kumārī। jo muni kardama kai priya nārī॥

आदिदेव प्रभु दीनदयाला। जठर धरेउ जेहिं कपिल कृपाला।।

ādideva prabhu dīnadayālā। jaṭhara dhareu jehiṃ kapila kṛpālā॥

सांख्य सास्त्र जिन्ह प्रगट बखाना। तत्व बिचार निपुन भगवाना।।

sāṃkhya sāstra jinha pragaṭa bakhānā। tatva bicāra nipuna bhagavānā॥

तेहिं मनु राज कीन्ह बहु काला। प्रभु आयसु सब बिधि प्रतिपाला।।

tehiṃ manu rāja kīnha bahu kālā। prabhu āyasu saba bidhi pratipālā॥

होइ न बिषय बिराग भवन बसत भा चौथपन।

hoi na biṣaya birāga bhavana basata bhā cauthapana।

हृदयँ बहुत दुख लाग जनम गयउ हरिभगति बिनु।।142।।

hṛdaya~ bahuta dukha lāga janama gayau haribhagati binu॥142॥

बरबस राज सुतहि तब दीन्हा। नारि समेत गवन बन कीन्हा।।

barabasa rāja sutahi taba dīnhā। nāri sameta gavana bana kīnhā॥

तीरथ बर नैमिष बिख्याता। अति पुनीत साधक सिधि दाता।।

tīratha bara naimiṣa bikhyātā। ati punīta sādhaka sidhi dātā॥

बसहिं तहाँ मुनि सिद्ध समाजा। तहँ हियँ हरषि चलेउ मनु राजा।।

basahiṃ tahā~ muni siddha samājā। taha~ hiya~ haraṣi caleu manu rājā॥

पंथ जात सोहहिं मतिधीरा। ग्यान भगति जनु धरें सरीरा।।

paṃtha jāta sohahiṃ matidhīrā। gyāna bhagati janu dhareṃ sarīrā॥

पहुँचे जाइ धेनुमति तीरा। हरषि नहाने निरमल नीरा।।

pahu~ce jāi dhenumati tīrā। haraṣi nahāne niramala nīrā॥

आए मिलन सिद्ध मुनि ग्यानी। धरम धुरंधर नृपरिषि जानी।।

āe milana siddha muni gyānī। dharama dhuraṃdhara nṛpariṣi jānī॥

जहँ जँह तीरथ रहे सुहाए। मुनिन्ह सकल सादर करवाए।।

jaha~ ja~ha tīratha rahe suhāe। muninha sakala sādara karavāe॥

कृस सरीर मुनिपट परिधाना। सत समाज नित सुनहिं पुराना ।

kṛsa sarīra munipaṭa paridhānā। sata samāja nita sunahiṃ purānā ।

द्वादस अच्छर मंत्र पुनि जपहिं सहित अनुराग।

dvādasa acchara maṃtra puni japahiṃ sahita anurāga।

बासुदेव पद पंकरुह दंपति मन अति लाग।।143।।

bāsudeva pada paṃkaruha daṃpati mana ati lāga॥143॥

करहिं अहार साक फल कंदा। सुमिरहिं ब्रह्म सच्चिदानंदा।।

karahiṃ ahāra sāka phala kaṃdā। sumirahiṃ brahma saccidānaṃdā॥

पुनि हरि हेतु करन तप लागे। बारि अधार मूल फल त्यागे।।

puni hari hetu karana tapa lāge। bāri adhāra mūla phala tyāge॥

उर अभिलाष निंरंतर होई। देखअ नयन परम प्रभु सोई।।

ura abhilāṣa niṃraṃtara hoī। dekhaa nayana parama prabhu soī॥

अगुन अखंड अनंत अनादी। जेहि चिंतहिं परमारथबादी।।

aguna akhaṃḍa anaṃta anādī। jehi ciṃtahiṃ paramārathabādī॥

नेति नेति जेहि बेद निरूपा। निजानंद निरुपाधि अनूपा।।

neti neti jehi beda nirūpā। nijānaṃda nirupādhi anūpā॥

संभु बिरंचि बिष्नु भगवाना। उपजहिं जासु अंस तें नाना।।

saṃbhu biraṃci biṣnu bhagavānā। upajahiṃ jāsu aṃsa teṃ nānā॥

ऐसेउ प्रभु सेवक बस अहई। भगत हेतु लीलातनु गहई।।

aiseu prabhu sevaka basa ahaī। bhagata hetu līlātanu gahaī॥

जौं यह बचन सत्य श्रुति भाषा। तौ हमार पूजहि अभिलाषा।।

jauṃ yaha bacana satya śruti bhāṣā। tau hamāra pūjahi abhilāṣā॥

एहि बिधि बीतें बरष षट सहस बारि आहार।

ehi bidhi bīteṃ baraṣa ṣaṭa sahasa bāri āhāra।

संबत सप्त सहस्त्र पुनि रहे समीर अधार।।144।।

saṃbata sapta sahastra puni rahe samīra adhāra॥144॥

बरष सहस दस त्यागेउ सोऊ। ठाढ़े रहे एक पद दोऊ।।

baraṣa sahasa dasa tyāgeu soū। ṭhār̤he rahe eka pada doū॥

बिधि हरि तप देखि अपारा। मनु समीप आए बहु बारा।।

bidhi hari tapa dekhi apārā। manu samīpa āe bahu bārā॥

मागहु बर बहु भाँति लोभाए। परम धीर नहिं चलहिं चलाए।।

māgahu bara bahu bhā~ti lobhāe। parama dhīra nahiṃ calahiṃ calāe॥

अस्थिमात्र होइ रहे सरीरा। तदपि मनाग मनहिं नहिं पीरा।।

asthimātra hoi rahe sarīrā। tadapi manāga manahiṃ nahiṃ pīrā॥

प्रभु सर्बग्य दास निज जानी। गति अनन्य तापस नृप रानी।।

prabhu sarbagya dāsa nija jānī। gati ananya tāpasa nṛpa rānī॥

मागु मागु बरु भै नभ बानी। परम गभीर कृपामृत सानी।।

māgu māgu baru bhai nabha bānī। parama gabhīra kṛpāmṛta sānī॥

मृतक जिआवनि गिरा सुहाई। श्रबन रंध्र होइ उर जब आई।।

mṛtaka jiāvani girā suhāī। śrabana raṃdhra hoi ura jaba āī॥

ह्रष्टपुष्ट तन भए सुहाए। मानहुँ अबहिं भवन ते आए।।

hraṣṭapuṣṭa tana bhae suhāe। mānahu~ abahiṃ bhavana te āe॥

श्रवन सुधा सम बचन सुनि पुलक प्रफुल्लित गात।

śravana sudhā sama bacana suni pulaka praphullita gāta।

बोले मनु करि दंडवत प्रेम न हृदयँ समात।।145।।

bole manu kari daṃḍavata prema na hṛdaya~ samāta॥145॥

सुनु सेवक सुरतरु सुरधेनु। बिधि हरि हर बंदित पद रेनू।।

sunu sevaka surataru suradhenu। bidhi hari hara baṃdita pada renū॥

सेवत सुलभ सकल सुख दायक। प्रनतपाल सचराचर नायक।।

sevata sulabha sakala sukha dāyaka। pranatapāla sacarācara nāyaka॥

जौं अनाथ हित हम पर नेहू। तौ प्रसन्न होइ यह बर देहू।।

jauṃ anātha hita hama para nehū। tau prasanna hoi yaha bara dehū॥

जो सरूप बस सिव मन माहीं। जेहि कारन मुनि जतन कराहीं।।

jo sarūpa basa siva mana māhīṃ। jehi kārana muni jatana karāhīṃ॥

जो भुसुंडि मन मानस हंसा। सगुन अगुन जेहि निगम प्रसंसा।।

jo bhusuṃḍi mana mānasa haṃsā। saguna aguna jehi nigama prasaṃsā॥

देखहिं हम सो रूप भरि लोचन। कृपा करहु प्रनतारति मोचन।।

dekhahiṃ hama so rūpa bhari locana। kṛpā karahu pranatārati mocana॥

दंपति बचन परम प्रिय लागे। मुदुल बिनीत प्रेम रस पागे।।

daṃpati bacana parama priya lāge। mudula binīta prema rasa pāge॥

भगत बछल प्रभु कृपानिधाना। बिस्वबास प्रगटे भगवाना।।

bhagata bachala prabhu kṛpānidhānā। bisvabāsa pragaṭe bhagavānā॥

नील सरोरुह नील मनि नील नीरधर स्याम।

nīla saroruha nīla mani nīla nīradhara syāma।

लाजहिं तन सोभा निरखि कोटि कोटि सत काम।।146।।

lājahiṃ tana sobhā nirakhi koṭi koṭi sata kāma॥146॥

सरद मयंक बदन छबि सींवा। चारु कपोल चिबुक दर ग्रीवा।।

sarada mayaṃka badana chabi sīṃvā। cāru kapola cibuka dara grīvā॥

अधर अरुन रद सुंदर नासा। बिधु कर निकर बिनिंदक हासा।।

adhara aruna rada suṃdara nāsā। bidhu kara nikara biniṃdaka hāsā॥

नव अबुंज अंबक छबि नीकी। चितवनि ललित भावँती जी की।।

nava abuṃja aṃbaka chabi nīkī। citavani lalita bhāva~tī jī kī॥

भुकुटि मनोज चाप छबि हारी। तिलक ललाट पटल दुतिकारी।।

bhukuṭi manoja cāpa chabi hārī। tilaka lalāṭa paṭala dutikārī॥

कुंडल मकर मुकुट सिर भ्राजा। कुटिल केस जनु मधुप समाजा।।

kuṃḍala makara mukuṭa sira bhrājā। kuṭila kesa janu madhupa samājā॥

उर श्रीबत्स रुचिर बनमाला। पदिक हार भूषन मनिजाला।।

ura śrībatsa rucira banamālā। padika hāra bhūṣana manijālā॥

केहरि कंधर चारु जनेउ। बाहु बिभूषन सुंदर तेऊ।।

kehari kaṃdhara cāru janeu। bāhu bibhūṣana suṃdara teū॥

करि कर सरि सुभग भुजदंडा। कटि निषंग कर सर कोदंडा।।

kari kara sari subhaga bhujadaṃḍā। kaṭi niṣaṃga kara sara kodaṃḍā॥

तडित बिनिंदक पीत पट उदर रेख बर तीनि।।

taḍita biniṃdaka pīta paṭa udara rekha bara tīni॥

नाभि मनोहर लेति जनु जमुन भवँर छबि छीनि।।147।।

nābhi manohara leti janu jamuna bhava~ra chabi chīni॥147॥

पद राजीव बरनि नहि जाहीं। मुनि मन मधुप बसहिं जेन्ह माहीं।।

pada rājīva barani nahi jāhīṃ। muni mana madhupa basahiṃ jenha māhīṃ॥

बाम भाग सोभति अनुकूला। आदिसक्ति छबिनिधि जगमूला।।

bāma bhāga sobhati anukūlā। ādisakti chabinidhi jagamūlā॥

जासु अंस उपजहिं गुनखानी। अगनित लच्छि उमा ब्रह्मानी।।

jāsu aṃsa upajahiṃ gunakhānī। aganita lacchi umā brahmānī॥

भृकुटि बिलास जासु जग होई। राम बाम दिसि सीता सोई।।

bhṛkuṭi bilāsa jāsu jaga hoī। rāma bāma disi sītā soī॥

छबिसमुद्र हरि रूप बिलोकी। एकटक रहे नयन पट रोकी।।

chabisamudra hari rūpa bilokī। ekaṭaka rahe nayana paṭa rokī॥

चितवहिं सादर रूप अनूपा। तृप्ति न मानहिं मनु सतरूपा।।

citavahiṃ sādara rūpa anūpā। tṛpti na mānahiṃ manu satarūpā॥

हरष बिबस तन दसा भुलानी। परे दंड इव गहि पद पानी।।

haraṣa bibasa tana dasā bhulānī। pare daṃḍa iva gahi pada pānī॥

सिर परसे प्रभु निज कर कंजा। तुरत उठाए करुनापुंजा।।

sira parase prabhu nija kara kaṃjā। turata uṭhāe karunāpuṃjā॥

बोले कृपानिधान पुनि अति प्रसन्न मोहि जानि।

bole kṛpānidhāna puni ati prasanna mohi jāni।

मागहु बर जोइ भाव मन महादानि अनुमानि।।148।।

māgahu bara joi bhāva mana mahādāni anumāni॥148॥

सुनि प्रभु बचन जोरि जुग पानी। धरि धीरजु बोली मृदु बानी।।

suni prabhu bacana jori juga pānī। dhari dhīraju bolī mṛdu bānī॥

नाथ देखि पद कमल तुम्हारे। अब पूरे सब काम हमारे।।

nātha dekhi pada kamala tumhāre। aba pūre saba kāma hamāre॥

एक लालसा बड़ि उर माही। सुगम अगम कहि जात सो नाहीं।।

eka lālasā bar̤i ura māhī। sugama agama kahi jāta so nāhīṃ॥

तुम्हहि देत अति सुगम गोसाईं। अगम लाग मोहि निज कृपनाईं।।

tumhahi deta ati sugama gosāīṃ। agama lāga mohi nija kṛpanāīṃ॥

जथा दरिद्र बिबुधतरु पाई। बहु संपति मागत सकुचाई।।

jathā daridra bibudhataru pāī। bahu saṃpati māgata sakucāī॥

तासु प्रभा जान नहिं सोई। तथा हृदयँ मम संसय होई।।

tāsu prabhā jāna nahiṃ soī। tathā hṛdaya~ mama saṃsaya hoī॥

सो तुम्ह जानहु अंतरजामी। पुरवहु मोर मनोरथ स्वामी।।

so tumha jānahu aṃtarajāmī। puravahu mora manoratha svāmī॥

सकुच बिहाइ मागु नृप मोहि। मोरें नहिं अदेय कछु तोही।।

sakuca bihāi māgu nṛpa mohi। moreṃ nahiṃ adeya kachu tohī॥

दानि सिरोमनि कृपानिधि नाथ कहउँ सतिभाउ।।

dāni siromani kṛpānidhi nātha kahau~ satibhāu॥

चाहउँ तुम्हहि समान सुत प्रभु सन कवन दुराउ।।149।।

cāhau~ tumhahi samāna suta prabhu sana kavana durāu॥149॥

देखि प्रीति सुनि बचन अमोले। एवमस्तु करुनानिधि बोले।।

dekhi prīti suni bacana amole। evamastu karunānidhi bole॥

आपु सरिस खोजौं कहँ जाई। नृप तव तनय होब मैं आई।।

āpu sarisa khojauṃ kaha~ jāī। nṛpa tava tanaya hoba maiṃ āī॥

सतरूपहि बिलोकि कर जोरें। देबि मागु बरु जो रुचि तोरे।।

satarūpahi biloki kara joreṃ। debi māgu baru jo ruci tore॥

जो बरु नाथ चतुर नृप मागा। सोइ कृपाल मोहि अति प्रिय लागा।।

jo baru nātha catura nṛpa māgā। soi kṛpāla mohi ati priya lāgā॥

प्रभु परंतु सुठि होति ढिठाई। जदपि भगत हित तुम्हहि सोहाई।।

prabhu paraṃtu suṭhi hoti ḍhiṭhāī। jadapi bhagata hita tumhahi sohāī॥

तुम्ह ब्रह्मादि जनक जग स्वामी। ब्रह्म सकल उर अंतरजामी।।

tumha brahmādi janaka jaga svāmī। brahma sakala ura aṃtarajāmī॥

अस समुझत मन संसय होई। कहा जो प्रभु प्रवान पुनि सोई।।

asa samujhata mana saṃsaya hoī। kahā jo prabhu pravāna puni soī॥

जे निज भगत नाथ तव अहहीं। जो सुख पावहिं जो गति लहहीं।।

je nija bhagata nātha tava ahahīṃ। jo sukha pāvahiṃ jo gati lahahīṃ॥

सोइ सुख सोइ गति सोइ भगति सोइ निज चरन सनेहु।।

soi sukha soi gati soi bhagati soi nija carana sanehu॥

सोइ बिबेक सोइ रहनि प्रभु हमहि कृपा करि देहु।।150।।

soi bibeka soi rahani prabhu hamahi kṛpā kari dehu॥150॥

सुनु मृदु गूढ़ रुचिर बर रचना। कृपासिंधु बोले मृदु बचना।।

sunu mṛdu gūr̤ha rucira bara racanā। kṛpāsiṃdhu bole mṛdu bacanā॥

जो कछु रुचि तुम्हेर मन माहीं। मैं सो दीन्ह सब संसय नाहीं।।

jo kachu ruci tumhera mana māhīṃ। maiṃ so dīnha saba saṃsaya nāhīṃ॥

मातु बिबेक अलोकिक तोरें। कबहुँ न मिटिहि अनुग्रह मोरें ।

mātu bibeka alokika toreṃ। kabahu~ na miṭihi anugraha moreṃ ।

बंदि चरन मनु कहेउ बहोरी। अवर एक बिनति प्रभु मोरी।।

baṃdi carana manu kaheu bahorī। avara eka binati prabhu morī॥

सुत बिषइक तव पद रति होऊ। मोहि बड़ मूढ़ कहै किन कोऊ।।

suta biṣaika tava pada rati hoū। mohi bar̤a mūr̤ha kahai kina koū॥

मनि बिनु फनि जिमि जल बिनु मीना। मम जीवन तिमि तुम्हहि अधीना।।

mani binu phani jimi jala binu mīnā। mama jīvana timi tumhahi adhīnā॥

अस बरु मागि चरन गहि रहेऊ। एवमस्तु करुनानिधि कहेऊ।।

asa baru māgi carana gahi raheū। evamastu karunānidhi kaheū॥

अब तुम्ह मम अनुसासन मानी। बसहु जाइ सुरपति रजधानी।।

aba tumha mama anusāsana mānī। basahu jāi surapati rajadhānī॥

तहँ करि भोग बिसाल तात गउँ कछु काल पुनि।

taha~ kari bhoga bisāla tāta gau~ kachu kāla puni।

होइहहु अवध भुआल तब मैं होब तुम्हार सुत।।151।।

hoihahu avadha bhuāla taba maiṃ hoba tumhāra suta॥151॥

इच्छामय नरबेष सँवारें। होइहउँ प्रगट निकेत तुम्हारे।।

icchāmaya narabeṣa sa~vāreṃ। hoihau~ pragaṭa niketa tumhāre॥

अंसन्ह सहित देह धरि ताता। करिहउँ चरित भगत सुखदाता।।

aṃsanha sahita deha dhari tātā। karihau~ carita bhagata sukhadātā॥

जे सुनि सादर नर बड़भागी। भव तरिहहिं ममता मद त्यागी।।

je suni sādara nara bar̤abhāgī। bhava tarihahiṃ mamatā mada tyāgī॥

आदिसक्ति जेहिं जग उपजाया। सोउ अवतरिहि मोरि यह माया।।

ādisakti jehiṃ jaga upajāyā। sou avatarihi mori yaha māyā॥

पुरउब मैं अभिलाष तुम्हारा। सत्य सत्य पन सत्य हमारा।।

purauba maiṃ abhilāṣa tumhārā। satya satya pana satya hamārā॥

पुनि पुनि अस कहि कृपानिधाना। अंतरधान भए भगवाना।।

puni puni asa kahi kṛpānidhānā। aṃtaradhāna bhae bhagavānā॥

दंपति उर धरि भगत कृपाला। तेहिं आश्रम निवसे कछु काला।।

daṃpati ura dhari bhagata kṛpālā। tehiṃ āśrama nivase kachu kālā॥

समय पाइ तनु तजि अनयासा। जाइ कीन्ह अमरावति बासा।।

samaya pāi tanu taji anayāsā। jāi kīnha amarāvati bāsā॥

यह इतिहास पुनीत अति उमहि कही बृषकेतु।

yaha itihāsa punīta ati umahi kahī bṛṣaketu।

भरद्वाज सुनु अपर पुनि राम जनम कर हेतु।।152।।

bharadvāja sunu apara puni rāma janama kara hetu॥152॥

सुनु मुनि कथा पुनीत पुरानी। जो गिरिजा प्रति संभु बखानी।।

sunu muni kathā punīta purānī। jo girijā prati saṃbhu bakhānī॥

बिस्व बिदित एक कैकय देसू। सत्यकेतु तहँ बसइ नरेसू।।

bisva bidita eka kaikaya desū। satyaketu taha~ basai naresū॥

धरम धुरंधर नीति निधाना। तेज प्रताप सील बलवाना।।

dharama dhuraṃdhara nīti nidhānā। teja pratāpa sīla balavānā॥

तेहि कें भए जुगल सुत बीरा। सब गुन धाम महा रनधीरा।।

tehi keṃ bhae jugala suta bīrā। saba guna dhāma mahā ranadhīrā॥

राज धनी जो जेठ सुत आही। नाम प्रतापभानु अस ताही।।

rāja dhanī jo jeṭha suta āhī। nāma pratāpabhānu asa tāhī॥

अपर सुतहि अरिमर्दन नामा। भुजबल अतुल अचल संग्रामा।।

apara sutahi arimardana nāmā। bhujabala atula acala saṃgrāmā॥

भाइहि भाइहि परम समीती। सकल दोष छल बरजित प्रीती।।

bhāihi bhāihi parama samītī। sakala doṣa chala barajita prītī॥

जेठे सुतहि राज नृप दीन्हा। हरि हित आपु गवन बन कीन्हा।।

jeṭhe sutahi rāja nṛpa dīnhā। hari hita āpu gavana bana kīnhā॥

जब प्रतापरबि भयउ नृप फिरी दोहाई देस।

jaba pratāparabi bhayau nṛpa phirī dohāī desa।

प्रजा पाल अति बेदबिधि कतहुँ नहीं अघ लेस।।153।।

prajā pāla ati bedabidhi katahu~ nahīṃ agha lesa॥153॥

नृप हितकारक सचिव सयाना। नाम धरमरुचि सुक्र समाना।।

nṛpa hitakāraka saciva sayānā। nāma dharamaruci sukra samānā॥

सचिव सयान बंधु बलबीरा। आपु प्रतापपुंज रनधीरा।।

saciva sayāna baṃdhu balabīrā। āpu pratāpapuṃja ranadhīrā॥

सेन संग चतुरंग अपारा। अमित सुभट सब समर जुझारा।।

sena saṃga caturaṃga apārā। amita subhaṭa saba samara jujhārā॥

सेन बिलोकि राउ हरषाना। अरु बाजे गहगहे निसाना।।

sena biloki rāu haraṣānā। aru bāje gahagahe nisānā॥

बिजय हेतु कटकई बनाई। सुदिन साधि नृप चलेउ बजाई।।

bijaya hetu kaṭakaī banāī। sudina sādhi nṛpa caleu bajāī॥

जँह तहँ परीं अनेक लराईं। जीते सकल भूप बरिआई।।

ja~ha taha~ parīṃ aneka larāīṃ। jīte sakala bhūpa bariāī॥

सप्त दीप भुजबल बस कीन्हे। लै लै दंड छाड़ि नृप दीन्हें।।

sapta dīpa bhujabala basa kīnhe। lai lai daṃḍa chār̤i nṛpa dīnheṃ॥

सकल अवनि मंडल तेहि काला। एक प्रतापभानु महिपाला।।

sakala avani maṃḍala tehi kālā। eka pratāpabhānu mahipālā॥

स्वबस बिस्व करि बाहुबल निज पुर कीन्ह प्रबेसु।

svabasa bisva kari bāhubala nija pura kīnha prabesu।

अरथ धरम कामादि सुख सेवइ समयँ नरेसु।।154।।

aratha dharama kāmādi sukha sevai samaya~ naresu॥154॥

भूप प्रतापभानु बल पाई। कामधेनु भै भूमि सुहाई।।

bhūpa pratāpabhānu bala pāī। kāmadhenu bhai bhūmi suhāī॥

सब दुख बरजित प्रजा सुखारी। धरमसील सुंदर नर नारी।।

saba dukha barajita prajā sukhārī। dharamasīla suṃdara nara nārī॥

सचिव धरमरुचि हरि पद प्रीती। नृप हित हेतु सिखव नित नीती।।

saciva dharamaruci hari pada prītī। nṛpa hita hetu sikhava nita nītī॥

गुर सुर संत पितर महिदेवा। करइ सदा नृप सब कै सेवा।।

gura sura saṃta pitara mahidevā। karai sadā nṛpa saba kai sevā॥

भूप धरम जे बेद बखाने। सकल करइ सादर सुख माने।।

bhūpa dharama je beda bakhāne। sakala karai sādara sukha māne॥

दिन प्रति देह बिबिध बिधि दाना। सुनहु सास्त्र बर बेद पुराना।।

dina prati deha bibidha bidhi dānā। sunahu sāstra bara beda purānā॥

नाना बापीं कूप तड़ागा। सुमन बाटिका सुंदर बागा।।

nānā bāpīṃ kūpa tar̤āgā। sumana bāṭikā suṃdara bāgā॥

बिप्रभवन सुरभवन सुहाए। सब तीरथन्ह बिचित्र बनाए।।

biprabhavana surabhavana suhāe। saba tīrathanha bicitra banāe॥

जँह लगि कहे पुरान श्रुति एक एक सब जाग।

ja~ha lagi kahe purāna śruti eka eka saba jāga।

बार सहस्त्र सहस्त्र नृप किए सहित अनुराग।।155।।

bāra sahastra sahastra nṛpa kie sahita anurāga॥155॥

हृदयँ न कछु फल अनुसंधाना। भूप बिबेकी परम सुजाना।।

hṛdaya~ na kachu phala anusaṃdhānā। bhūpa bibekī parama sujānā॥

करइ जे धरम करम मन बानी। बासुदेव अर्पित नृप ग्यानी।।

karai je dharama karama mana bānī। bāsudeva arpita nṛpa gyānī॥

चढ़ि बर बाजि बार एक राजा। मृगया कर सब साजि समाजा।।

car̤hi bara bāji bāra eka rājā। mṛgayā kara saba sāji samājā॥

बिंध्याचल गभीर बन गयऊ। मृग पुनीत बहु मारत भयऊ।।

biṃdhyācala gabhīra bana gayaū। mṛga punīta bahu mārata bhayaū॥

फिरत बिपिन नृप दीख बराहू। जनु बन दुरेउ ससिहि ग्रसि राहू।।

phirata bipina nṛpa dīkha barāhū। janu bana dureu sasihi grasi rāhū॥

बड़ बिधु नहि समात मुख माहीं। मनहुँ क्रोधबस उगिलत नाहीं।।

bar̤a bidhu nahi samāta mukha māhīṃ। manahu~ krodhabasa ugilata nāhīṃ॥

कोल कराल दसन छबि गाई। तनु बिसाल पीवर अधिकाई।।

kola karāla dasana chabi gāī। tanu bisāla pīvara adhikāī॥

घुरुघुरात हय आरौ पाएँ। चकित बिलोकत कान उठाएँ।।

ghurughurāta haya ārau pāe~। cakita bilokata kāna uṭhāe~॥

नील महीधर सिखर सम देखि बिसाल बराहु।

nīla mahīdhara sikhara sama dekhi bisāla barāhu।

चपरि चलेउ हय सुटुकि नृप हाँकि न होइ निबाहु।।156।।

capari caleu haya suṭuki nṛpa hā~ki na hoi nibāhu॥156॥

आवत देखि अधिक रव बाजी। चलेउ बराह मरुत गति भाजी।।

āvata dekhi adhika rava bājī। caleu barāha maruta gati bhājī॥

तुरत कीन्ह नृप सर संधाना। महि मिलि गयउ बिलोकत बाना।।

turata kīnha nṛpa sara saṃdhānā। mahi mili gayau bilokata bānā॥

तकि तकि तीर महीस चलावा। करि छल सुअर सरीर बचावा।।

taki taki tīra mahīsa calāvā। kari chala suara sarīra bacāvā॥

प्रगटत दुरत जाइ मृग भागा। रिस बस भूप चलेउ संग लागा।।

pragaṭata durata jāi mṛga bhāgā। risa basa bhūpa caleu saṃga lāgā॥

गयउ दूरि घन गहन बराहू। जहँ नाहिन गज बाजि निबाहू।।

gayau dūri ghana gahana barāhū। jaha~ nāhina gaja bāji nibāhū॥

अति अकेल बन बिपुल कलेसू। तदपि न मृग मग तजइ नरेसू।।

ati akela bana bipula kalesū। tadapi na mṛga maga tajai naresū॥

कोल बिलोकि भूप बड़ धीरा। भागि पैठ गिरिगुहाँ गभीरा।।

kola biloki bhūpa bar̤a dhīrā। bhāgi paiṭha giriguhā~ gabhīrā॥

अगम देखि नृप अति पछिताई। फिरेउ महाबन परेउ भुलाई।।

agama dekhi nṛpa ati pachitāī। phireu mahābana pareu bhulāī॥

खेद खिन्न छुद्धित तृषित राजा बाजि समेत।

kheda khinna chuddhita tṛṣita rājā bāji sameta।

खोजत ब्याकुल सरित सर जल बिनु भयउ अचेत।।157।।

khojata byākula sarita sara jala binu bhayau aceta॥157॥

फिरत बिपिन आश्रम एक देखा। तहँ बस नृपति कपट मुनिबेषा।।

phirata bipina āśrama eka dekhā। taha~ basa nṛpati kapaṭa munibeṣā॥

जासु देस नृप लीन्ह छड़ाई। समर सेन तजि गयउ पराई।।

jāsu desa nṛpa līnha char̤āī। samara sena taji gayau parāī॥

समय प्रतापभानु कर जानी। आपन अति असमय अनुमानी।।

samaya pratāpabhānu kara jānī। āpana ati asamaya anumānī॥

गयउ न गृह मन बहुत गलानी। मिला न राजहि नृप अभिमानी।।

gayau na gṛha mana bahuta galānī। milā na rājahi nṛpa abhimānī॥

रिस उर मारि रंक जिमि राजा। बिपिन बसइ तापस कें साजा।।

risa ura māri raṃka jimi rājā। bipina basai tāpasa keṃ sājā॥

तासु समीप गवन नृप कीन्हा। यह प्रतापरबि तेहि तब चीन्हा।।

tāsu samīpa gavana nṛpa kīnhā। yaha pratāparabi tehi taba cīnhā॥

राउ तृषित नहि सो पहिचाना। देखि सुबेष महामुनि जाना।।

rāu tṛṣita nahi so pahicānā। dekhi subeṣa mahāmuni jānā॥

उतरि तुरग तें कीन्ह प्रनामा। परम चतुर न कहेउ निज नामा।।

utari turaga teṃ kīnha pranāmā। parama catura na kaheu nija nāmā॥

भूपति तृषित बिलोकि तेहिं सरबरु दीन्ह देखाइ।

bhūpati tṛṣita biloki tehiṃ sarabaru dīnha dekhāi।

मज्जन पान समेत हय कीन्ह नृपति हरषाइ।।158।।

majjana pāna sameta haya kīnha nṛpati haraṣāi॥158॥

गै श्रम सकल सुखी नृप भयऊ। निज आश्रम तापस लै गयऊ।।

gai śrama sakala sukhī nṛpa bhayaū। nija āśrama tāpasa lai gayaū॥

आसन दीन्ह अस्त रबि जानी। पुनि तापस बोलेउ मृदु बानी।।

āsana dīnha asta rabi jānī। puni tāpasa boleu mṛdu bānī॥

को तुम्ह कस बन फिरहु अकेलें। सुंदर जुबा जीव परहेलें।।

ko tumha kasa bana phirahu akeleṃ। suṃdara jubā jīva paraheleṃ॥

चक्रबर्ति के लच्छन तोरें। देखत दया लागि अति मोरें।।

cakrabarti ke lacchana toreṃ। dekhata dayā lāgi ati moreṃ॥

नाम प्रतापभानु अवनीसा। तासु सचिव मैं सुनहु मुनीसा।।

nāma pratāpabhānu avanīsā। tāsu saciva maiṃ sunahu munīsā॥

फिरत अहेरें परेउँ भुलाई। बडे भाग देखउँ पद आई।।

phirata ahereṃ pareu~ bhulāī। baḍe bhāga dekhau~ pada āī॥

हम कहँ दुर्लभ दरस तुम्हारा। जानत हौं कछु भल होनिहारा।।

hama kaha~ durlabha darasa tumhārā। jānata hauṃ kachu bhala honihārā॥

कह मुनि तात भयउ अँधियारा। जोजन सत्तरि नगरु तुम्हारा।।

kaha muni tāta bhayau a~dhiyārā। jojana sattari nagaru tumhārā॥

निसा घोर गम्भीर बन पंथ न सुनहु सुजान।

nisā ghora gambhīra bana paṃtha na sunahu sujāna।

बसहु आजु अस जानि तुम्ह जाएहु होत बिहान।।159(क)।।

basahu āju asa jāni tumha jāehu hota bihāna॥159(ka)॥

तुलसी जसि भवतब्यता तैसी मिलइ सहाइ।

tulasī jasi bhavatabyatā taisī milai sahāi।

आपुनु आवइ ताहि पहिं ताहि तहाँ लै जाइ।।159(ख)।।

āpunu āvai tāhi pahiṃ tāhi tahā~ lai jāi॥159(kha)॥

भलेहिं नाथ आयसु धरि सीसा। बाँधि तुरग तरु बैठ महीसा।।

bhalehiṃ nātha āyasu dhari sīsā। bā~dhi turaga taru baiṭha mahīsā॥

नृप बहु भाँती प्रसंसेउ ताही। चरन बंदी निज भाग्य सराही।।

nṛpa bahu bhā~tī prasaṃseu tāhī। carana baṃdī nija bhāgya sarāhī॥

पुनि बोले मृदु गिरा सुहाई। जानि पिता प्रभु करउँ ढिठाई।।

puni bole mṛdu girā suhāī। jāni pitā prabhu karau~ ḍhiṭhāī॥

मोहि मुनीस सुत सेवक जानी। नाथ नाम निज कहहु बखानी।।

mohi munīsa suta sevaka jānī। nātha nāma nija kahahu bakhānī॥

तेहि न जान नृप नृपहि सो जाना। भूप सुह्रद सो कपट सयाना।।

tehi na jāna nṛpa nṛpahi so jānā। bhūpa suhrada so kapaṭa sayānā॥

बैरी पुनि छत्री पुनि राजा। छल बल कीन्ह चहइ निज काजा।।

bairī puni chatrī puni rājā। chala bala kīnha cahai nija kājā॥

समुझि राजसुख दुखित अराती। अवाँ अनल इव सुलगइ छाती।।

samujhi rājasukha dukhita arātī। avā~ anala iva sulagai chātī॥

सरल बचन नृप के सुनि काना। बयर सँभारि हृदयँ हरषाना।।

sarala bacana nṛpa ke suni kānā। bayara sa~bhāri hṛdaya~ haraṣānā॥

कपट बोरि बानी मृदुल बोलेउ जुगुति समेत।

kapaṭa bori bānī mṛdula boleu juguti sameta।

नाम हमार भिखारि अब निर्धन रहित निकेति।।160।।

nāma hamāra bhikhāri aba nirdhana rahita niketi॥160॥

कह नृप जे बिग्यान निधाना। तुम्ह सारिखे गलित अभिमाना।।

kaha nṛpa je bigyāna nidhānā। tumha sārikhe galita abhimānā॥

सदा रहहि अपनपौ दुराएँ। सब बिधि कुसल कुबेष बनाएँ।।

sadā rahahi apanapau durāe~। saba bidhi kusala kubeṣa banāe~॥

तेहि तें कहहि संत श्रुति टेरें। परम अकिंचन प्रिय हरि केरें।।

tehi teṃ kahahi saṃta śruti ṭereṃ। parama akiṃcana priya hari kereṃ॥

तुम्ह सम अधन भिखारि अगेहा। होत बिरंचि सिवहि संदेहा।।

tumha sama adhana bhikhāri agehā। hota biraṃci sivahi saṃdehā॥

जोसि सोसि तव चरन नमामी। मो पर कृपा करिअ अब स्वामी।।

josi sosi tava carana namāmī। mo para kṛpā karia aba svāmī॥

सहज प्रीति भूपति कै देखी। आपु बिषय बिस्वास बिसेषी।।

sahaja prīti bhūpati kai dekhī। āpu biṣaya bisvāsa biseṣī॥

सब प्रकार राजहि अपनाई। बोलेउ अधिक सनेह जनाई।।

saba prakāra rājahi apanāī। boleu adhika saneha janāī॥

सुनु सतिभाउ कहउँ महिपाला। इहाँ बसत बीते बहु काला।।

sunu satibhāu kahau~ mahipālā। ihā~ basata bīte bahu kālā॥

अब लगि मोहि न मिलेउ कोउ मैं न जनावउँ काहु।

aba lagi mohi na mileu kou maiṃ na janāvau~ kāhu।

लोकमान्यता अनल सम कर तप कानन दाहु।।161(क)।।

lokamānyatā anala sama kara tapa kānana dāhu॥161(ka)॥

तुलसी देखि सुबेषु भूलहिं मूढ़ न चतुर नर।

tulasī dekhi subeṣu bhūlahiṃ mūr̤ha na catura nara।

सुंदर केकिहि पेखु बचन सुधा सम असन अहि।।161(ख)।।

suṃdara kekihi pekhu bacana sudhā sama asana ahi॥161(kha)॥

तातें गुपुत रहउँ जग माहीं। हरि तजि किमपि प्रयोजन नाहीं।।

tāteṃ guputa rahau~ jaga māhīṃ। hari taji kimapi prayojana nāhīṃ॥

प्रभु जानत सब बिनहिं जनाएँ। कहहु कवनि सिधि लोक रिझाएँ।।

prabhu jānata saba binahiṃ janāe~। kahahu kavani sidhi loka rijhāe~॥

तुम्ह सुचि सुमति परम प्रिय मोरें। प्रीति प्रतीति मोहि पर तोरें।।

tumha suci sumati parama priya moreṃ। prīti pratīti mohi para toreṃ॥

अब जौं तात दुरावउँ तोही। दारुन दोष घटइ अति मोही।।

aba jauṃ tāta durāvau~ tohī। dāruna doṣa ghaṭai ati mohī॥

जिमि जिमि तापसु कथइ उदासा। तिमि तिमि नृपहि उपज बिस्वासा।।

jimi jimi tāpasu kathai udāsā। timi timi nṛpahi upaja bisvāsā॥

देखा स्वबस कर्म मन बानी। तब बोला तापस बगध्यानी।।

dekhā svabasa karma mana bānī। taba bolā tāpasa bagadhyānī॥

नाम हमार एकतनु भाई। सुनि नृप बोले पुनि सिरु नाई।।

nāma hamāra ekatanu bhāī। suni nṛpa bole puni siru nāī॥

कहहु नाम कर अरथ बखानी। मोहि सेवक अति आपन जानी।।

kahahu nāma kara aratha bakhānī। mohi sevaka ati āpana jānī॥

आदिसृष्टि उपजी जबहिं तब उतपति भै मोरि।

ādisṛṣṭi upajī jabahiṃ taba utapati bhai mori।

नाम एकतनु हेतु तेहि देह न धरी बहोरि।।162।।

nāma ekatanu hetu tehi deha na dharī bahori॥162॥

जनि आचरुज करहु मन माहीं। सुत तप तें दुर्लभ कछु नाहीं।।

jani ācaruja karahu mana māhīṃ। suta tapa teṃ durlabha kachu nāhīṃ॥

तपबल तें जग सृजइ बिधाता। तपबल बिष्नु भए परित्राता।।

tapabala teṃ jaga sṛjai bidhātā। tapabala biṣnu bhae paritrātā॥

तपबल संभु करहिं संघारा। तप तें अगम न कछु संसारा।।

tapabala saṃbhu karahiṃ saṃghārā। tapa teṃ agama na kachu saṃsārā॥

भयउ नृपहि सुनि अति अनुरागा। कथा पुरातन कहै सो लागा।।

bhayau nṛpahi suni ati anurāgā। kathā purātana kahai so lāgā॥

करम धरम इतिहास अनेका। करइ निरूपन बिरति बिबेका।।

karama dharama itihāsa anekā। karai nirūpana birati bibekā॥

उदभव पालन प्रलय कहानी। कहेसि अमित आचरज बखानी।।

udabhava pālana pralaya kahānī। kahesi amita ācaraja bakhānī॥

सुनि महिप तापस बस भयऊ। आपन नाम कहत तब लयऊ।।

suni mahipa tāpasa basa bhayaū। āpana nāma kahata taba layaū॥

कह तापस नृप जानउँ तोही। कीन्हेहु कपट लाग भल मोही।।

kaha tāpasa nṛpa jānau~ tohī। kīnhehu kapaṭa lāga bhala mohī॥

सुनु महीस असि नीति जहँ तहँ नाम न कहहिं नृप।

sunu mahīsa asi nīti jaha~ taha~ nāma na kahahiṃ nṛpa।

मोहि तोहि पर अति प्रीति सोइ चतुरता बिचारि तव।।163।।

mohi tohi para ati prīti soi caturatā bicāri tava॥163॥

नाम तुम्हार प्रताप दिनेसा। सत्यकेतु तव पिता नरेसा।।

nāma tumhāra pratāpa dinesā। satyaketu tava pitā naresā॥

गुर प्रसाद सब जानिअ राजा। कहिअ न आपन जानि अकाजा।।

gura prasāda saba jānia rājā। kahia na āpana jāni akājā॥

देखि तात तव सहज सुधाई। प्रीति प्रतीति नीति निपुनाई।।

dekhi tāta tava sahaja sudhāī। prīti pratīti nīti nipunāī॥

उपजि परि ममता मन मोरें। कहउँ कथा निज पूछे तोरें।।

upaji pari mamatā mana moreṃ। kahau~ kathā nija pūche toreṃ॥

अब प्रसन्न मैं संसय नाहीं। मागु जो भूप भाव मन माहीं।।

aba prasanna maiṃ saṃsaya nāhīṃ। māgu jo bhūpa bhāva mana māhīṃ॥

सुनि सुबचन भूपति हरषाना। गहि पद बिनय कीन्हि बिधि नाना।।

suni subacana bhūpati haraṣānā। gahi pada binaya kīnhi bidhi nānā॥

कृपासिंधु मुनि दरसन तोरें। चारि पदारथ करतल मोरें।।

kṛpāsiṃdhu muni darasana toreṃ। cāri padāratha karatala moreṃ॥

प्रभुहि तथापि प्रसन्न बिलोकी। मागि अगम बर होउँ असोकी।।

prabhuhi tathāpi prasanna bilokī। māgi agama bara hou~ asokī॥

जरा मरन दुख रहित तनु समर जितै जनि कोउ।

jarā marana dukha rahita tanu samara jitai jani kou।

एकछत्र रिपुहीन महि राज कलप सत होउ।।164।।

ekachatra ripuhīna mahi rāja kalapa sata hou॥164॥

कह तापस नृप ऐसेइ होऊ। कारन एक कठिन सुनु सोऊ।।

kaha tāpasa nṛpa aisei hoū। kārana eka kaṭhina sunu soū॥

कालउ तुअ पद नाइहि सीसा। एक बिप्रकुल छाड़ि महीसा।।

kālau tua pada nāihi sīsā। eka biprakula chār̤i mahīsā॥

तपबल बिप्र सदा बरिआरा। तिन्ह के कोप न कोउ रखवारा।।

tapabala bipra sadā bariārā। tinha ke kopa na kou rakhavārā॥

जौं बिप्रन्ह सब करहु नरेसा। तौ तुअ बस बिधि बिष्नु महेसा।।

jauṃ bipranha saba karahu naresā। tau tua basa bidhi biṣnu mahesā॥

चल न ब्रह्मकुल सन बरिआई। सत्य कहउँ दोउ भुजा उठाई।।

cala na brahmakula sana bariāī। satya kahau~ dou bhujā uṭhāī॥

बिप्र श्राप बिनु सुनु महिपाला। तोर नास नहि कवनेहुँ काला।।

bipra śrāpa binu sunu mahipālā। tora nāsa nahi kavanehu~ kālā॥

हरषेउ राउ बचन सुनि तासू। नाथ न होइ मोर अब नासू।।

haraṣeu rāu bacana suni tāsū। nātha na hoi mora aba nāsū॥

तव प्रसाद प्रभु कृपानिधाना। मो कहुँ सर्ब काल कल्याना।।

tava prasāda prabhu kṛpānidhānā। mo kahu~ sarba kāla kalyānā॥

एवमस्तु कहि कपटमुनि बोला कुटिल बहोरि।

evamastu kahi kapaṭamuni bolā kuṭila bahori।

मिलब हमार भुलाब निज कहहु त हमहि न खोरि।।165।।

milaba hamāra bhulāba nija kahahu ta hamahi na khori॥165॥

तातें मै तोहि बरजउँ राजा। कहें कथा तव परम अकाजा।।

tāteṃ mai tohi barajau~ rājā। kaheṃ kathā tava parama akājā॥

छठें श्रवन यह परत कहानी। नास तुम्हार सत्य मम बानी।।

chaṭheṃ śravana yaha parata kahānī। nāsa tumhāra satya mama bānī॥

यह प्रगटें अथवा द्विजश्रापा। नास तोर सुनु भानुप्रतापा।।

yaha pragaṭeṃ athavā dvijaśrāpā। nāsa tora sunu bhānupratāpā॥

आन उपायँ निधन तव नाहीं। जौं हरि हर कोपहिं मन माहीं।।

āna upāya~ nidhana tava nāhīṃ। jauṃ hari hara kopahiṃ mana māhīṃ॥

सत्य नाथ पद गहि नृप भाषा। द्विज गुर कोप कहहु को राखा।।

satya nātha pada gahi nṛpa bhāṣā। dvija gura kopa kahahu ko rākhā॥

राखइ गुर जौं कोप बिधाता। गुर बिरोध नहिं कोउ जग त्राता।।

rākhai gura jauṃ kopa bidhātā। gura birodha nahiṃ kou jaga trātā॥

जौं न चलब हम कहे तुम्हारें। होउ नास नहिं सोच हमारें।।

jauṃ na calaba hama kahe tumhāreṃ। hou nāsa nahiṃ soca hamāreṃ॥

एकहिं डर डरपत मन मोरा। प्रभु महिदेव श्राप अति घोरा।।

ekahiṃ ḍara ḍarapata mana morā। prabhu mahideva śrāpa ati ghorā॥

होहिं बिप्र बस कवन बिधि कहहु कृपा करि सोउ।

hohiṃ bipra basa kavana bidhi kahahu kṛpā kari sou।

तुम्ह तजि दीनदयाल निज हितू न देखउँ कोउँ।।166।।

tumha taji dīnadayāla nija hitū na dekhau~ kou~॥166॥

सुनु नृप बिबिध जतन जग माहीं। कष्टसाध्य पुनि होहिं कि नाहीं।।

sunu nṛpa bibidha jatana jaga māhīṃ। kaṣṭasādhya puni hohiṃ ki nāhīṃ॥

अहइ एक अति सुगम उपाई। तहाँ परंतु एक कठिनाई।।

ahai eka ati sugama upāī। tahā~ paraṃtu eka kaṭhināī॥

मम आधीन जुगुति नृप सोई। मोर जाब तव नगर न होई।।

mama ādhīna juguti nṛpa soī। mora jāba tava nagara na hoī॥

आजु लगें अरु जब तें भयऊँ। काहू के गृह ग्राम न गयऊँ।।

āju lageṃ aru jaba teṃ bhayaū~। kāhū ke gṛha grāma na gayaū~॥

जौं न जाउँ तव होइ अकाजू। बना आइ असमंजस आजू।।

jauṃ na jāu~ tava hoi akājū। banā āi asamaṃjasa ājū॥

सुनि महीस बोलेउ मृदु बानी। नाथ निगम असि नीति बखानी।।

suni mahīsa boleu mṛdu bānī। nātha nigama asi nīti bakhānī॥

बड़े सनेह लघुन्ह पर करहीं। गिरि निज सिरनि सदा तृन धरहीं।।

bar̤e saneha laghunha para karahīṃ। giri nija sirani sadā tṛna dharahīṃ॥

जलधि अगाध मौलि बह फेनू। संतत धरनि धरत सिर रेनू।।

jaladhi agādha mauli baha phenū। saṃtata dharani dharata sira renū॥

अस कहि गहे नरेस पद स्वामी होहु कृपाल।

asa kahi gahe naresa pada svāmī hohu kṛpāla।

मोहि लागि दुख सहिअ प्रभु सज्जन दीनदयाल।।167।।

mohi lāgi dukha sahia prabhu sajjana dīnadayāla॥167॥

जानि नृपहि आपन आधीना। बोला तापस कपट प्रबीना।।

jāni nṛpahi āpana ādhīnā। bolā tāpasa kapaṭa prabīnā॥

सत्य कहउँ भूपति सुनु तोही। जग नाहिन दुर्लभ कछु मोही।।

satya kahau~ bhūpati sunu tohī। jaga nāhina durlabha kachu mohī॥

अवसि काज मैं करिहउँ तोरा। मन तन बचन भगत तैं मोरा।।

avasi kāja maiṃ karihau~ torā। mana tana bacana bhagata taiṃ morā॥

जोग जुगुति तप मंत्र प्रभाऊ। फलइ तबहिं जब करिअ दुराऊ।।

joga juguti tapa maṃtra prabhāū। phalai tabahiṃ jaba karia durāū॥

जौं नरेस मैं करौं रसोई। तुम्ह परुसहु मोहि जान न कोई।।

jauṃ naresa maiṃ karauṃ rasoī। tumha parusahu mohi jāna na koī॥

अन्न सो जोइ जोइ भोजन करई। सोइ सोइ तव आयसु अनुसरई।।

anna so joi joi bhojana karaī। soi soi tava āyasu anusaraī॥

पुनि तिन्ह के गृह जेवँइ जोऊ। तव बस होइ भूप सुनु सोऊ।।

puni tinha ke gṛha jeva~i joū। tava basa hoi bhūpa sunu soū॥

जाइ उपाय रचहु नृप एहू। संबत भरि संकलप करेहू।।

jāi upāya racahu nṛpa ehū। saṃbata bhari saṃkalapa karehū॥

नित नूतन द्विज सहस सत बरेहु सहित परिवार।

nita nūtana dvija sahasa sata barehu sahita parivāra।

मैं तुम्हरे संकलप लगि दिनहिंकरिब जेवनार।।168।।

maiṃ tumhare saṃkalapa lagi dinahiṃkariba jevanāra॥168॥

एहि बिधि भूप कष्ट अति थोरें। होइहहिं सकल बिप्र बस तोरें।।

ehi bidhi bhūpa kaṣṭa ati thoreṃ। hoihahiṃ sakala bipra basa toreṃ॥

करिहहिं बिप्र होम मख सेवा। तेहिं प्रसंग सहजेहिं बस देवा।।

karihahiṃ bipra homa makha sevā। tehiṃ prasaṃga sahajehiṃ basa devā॥

और एक तोहि कहऊँ लखाऊ। मैं एहि बेष न आउब काऊ।।

aura eka tohi kahaū~ lakhāū। maiṃ ehi beṣa na āuba kāū॥

तुम्हरे उपरोहित कहुँ राया। हरि आनब मैं करि निज माया।।

tumhare uparohita kahu~ rāyā। hari ānaba maiṃ kari nija māyā॥

तपबल तेहि करि आपु समाना। रखिहउँ इहाँ बरष परवाना।।

tapabala tehi kari āpu samānā। rakhihau~ ihā~ baraṣa paravānā॥

मैं धरि तासु बेषु सुनु राजा। सब बिधि तोर सँवारब काजा।।

maiṃ dhari tāsu beṣu sunu rājā। saba bidhi tora sa~vāraba kājā॥

गै निसि बहुत सयन अब कीजे। मोहि तोहि भूप भेंट दिन तीजे।।

gai nisi bahuta sayana aba kīje। mohi tohi bhūpa bheṃṭa dina tīje॥

मैं तपबल तोहि तुरग समेता। पहुँचेहउँ सोवतहि निकेता।।

maiṃ tapabala tohi turaga sametā। pahu~cehau~ sovatahi niketā॥

मैं आउब सोइ बेषु धरि पहिचानेहु तब मोहि।

maiṃ āuba soi beṣu dhari pahicānehu taba mohi।

जब एकांत बोलाइ सब कथा सुनावौं तोहि।।169।।

jaba ekāṃta bolāi saba kathā sunāvauṃ tohi॥169॥

सयन कीन्ह नृप आयसु मानी। आसन जाइ बैठ छलग्यानी।।

sayana kīnha nṛpa āyasu mānī। āsana jāi baiṭha chalagyānī॥

श्रमित भूप निद्रा अति आई। सो किमि सोव सोच अधिकाई।।

śramita bhūpa nidrā ati āī। so kimi sova soca adhikāī॥

कालकेतु निसिचर तहँ आवा। जेहिं सूकर होइ नृपहि भुलावा।।

kālaketu nisicara taha~ āvā। jehiṃ sūkara hoi nṛpahi bhulāvā॥

परम मित्र तापस नृप केरा। जानइ सो अति कपट घनेरा।।

parama mitra tāpasa nṛpa kerā। jānai so ati kapaṭa ghanerā॥

तेहि के सत सुत अरु दस भाई। खल अति अजय देव दुखदाई।।

tehi ke sata suta aru dasa bhāī। khala ati ajaya deva dukhadāī॥

प्रथमहि भूप समर सब मारे। बिप्र संत सुर देखि दुखारे।।

prathamahi bhūpa samara saba māre। bipra saṃta sura dekhi dukhāre॥

तेहिं खल पाछिल बयरु सँभरा। तापस नृप मिलि मंत्र बिचारा।।

tehiṃ khala pāchila bayaru sa~bharā। tāpasa nṛpa mili maṃtra bicārā॥

जेहि रिपु छय सोइ रचेन्हि उपाऊ। भावी बस न जान कछु राऊ।।

jehi ripu chaya soi racenhi upāū। bhāvī basa na jāna kachu rāū॥

रिपु तेजसी अकेल अपि लघु करि गनिअ न ताहु।

ripu tejasī akela api laghu kari gania na tāhu।

अजहुँ देत दुख रबि ससिहि सिर अवसेषित राहु।।170।।

ajahu~ deta dukha rabi sasihi sira avaseṣita rāhu॥170॥

तापस नृप निज सखहि निहारी। हरषि मिलेउ उठि भयउ सुखारी।।

tāpasa nṛpa nija sakhahi nihārī। haraṣi mileu uṭhi bhayau sukhārī॥

मित्रहि कहि सब कथा सुनाई। जातुधान बोला सुख पाई।।

mitrahi kahi saba kathā sunāī। jātudhāna bolā sukha pāī॥

अब साधेउँ रिपु सुनहु नरेसा। जौं तुम्ह कीन्ह मोर उपदेसा।।

aba sādheu~ ripu sunahu naresā। jauṃ tumha kīnha mora upadesā॥

परिहरि सोच रहहु तुम्ह सोई। बिनु औषध बिआधि बिधि खोई।।

parihari soca rahahu tumha soī। binu auṣadha biādhi bidhi khoī॥

कुल समेत रिपु मूल बहाई। चौथे दिवस मिलब मैं आई।।

kula sameta ripu mūla bahāī। cauthe divasa milaba maiṃ āī॥

तापस नृपहि बहुत परितोषी। चला महाकपटी अतिरोषी।।

tāpasa nṛpahi bahuta paritoṣī। calā mahākapaṭī atiroṣī॥

भानुप्रतापहि बाजि समेता। पहुँचाएसि छन माझ निकेता।।

bhānupratāpahi bāji sametā। pahu~cāesi chana mājha niketā॥

नृपहि नारि पहिं सयन कराई। हयगृहँ बाँधेसि बाजि बनाई।।

nṛpahi nāri pahiṃ sayana karāī। hayagṛha~ bā~dhesi bāji banāī॥

राजा के उपरोहितहि हरि लै गयउ बहोरि।

rājā ke uparohitahi hari lai gayau bahori।

लै राखेसि गिरि खोह महुँ मायाँ करि मति भोरि।।171।।

lai rākhesi giri khoha mahu~ māyā~ kari mati bhori॥171॥

आपु बिरचि उपरोहित रूपा। परेउ जाइ तेहि सेज अनूपा।।

āpu biraci uparohita rūpā। pareu jāi tehi seja anūpā॥

जागेउ नृप अनभएँ बिहाना। देखि भवन अति अचरजु माना।।

jāgeu nṛpa anabhae~ bihānā। dekhi bhavana ati acaraju mānā॥

मुनि महिमा मन महुँ अनुमानी। उठेउ गवँहि जेहि जान न रानी।।

muni mahimā mana mahu~ anumānī। uṭheu gava~hi jehi jāna na rānī॥

कानन गयउ बाजि चढ़ि तेहीं। पुर नर नारि न जानेउ केहीं।।

kānana gayau bāji car̤hi tehīṃ। pura nara nāri na jāneu kehīṃ॥

गएँ जाम जुग भूपति आवा। घर घर उत्सव बाज बधावा।।

gae~ jāma juga bhūpati āvā। ghara ghara utsava bāja badhāvā॥

उपरोहितहि देख जब राजा। चकित बिलोकि सुमिरि सोइ काजा।।

uparohitahi dekha jaba rājā। cakita biloki sumiri soi kājā॥

जुग सम नृपहि गए दिन तीनी। कपटी मुनि पद रह मति लीनी।।

juga sama nṛpahi gae dina tīnī। kapaṭī muni pada raha mati līnī॥

समय जानि उपरोहित आवा। नृपहि मते सब कहि समुझावा।।

samaya jāni uparohita āvā। nṛpahi mate saba kahi samujhāvā॥

नृप हरषेउ पहिचानि गुरु भ्रम बस रहा न चेत।

nṛpa haraṣeu pahicāni guru bhrama basa rahā na ceta।

बरे तुरत सत सहस बर बिप्र कुटुंब समेत।।172।।

bare turata sata sahasa bara bipra kuṭuṃba sameta॥172॥

उपरोहित जेवनार बनाई। छरस चारि बिधि जसि श्रुति गाई।।

uparohita jevanāra banāī। charasa cāri bidhi jasi śruti gāī॥

मायामय तेहिं कीन्ह रसोई। बिंजन बहु गनि सकइ न कोई।।

māyāmaya tehiṃ kīnha rasoī। biṃjana bahu gani sakai na koī॥

बिबिध मृगन्ह कर आमिष राँधा। तेहि महुँ बिप्र माँसु खल साँधा।।

bibidha mṛganha kara āmiṣa rā~dhā। tehi mahu~ bipra mā~su khala sā~dhā॥

भोजन कहुँ सब बिप्र बोलाए। पद पखारि सादर बैठाए।।

bhojana kahu~ saba bipra bolāe। pada pakhāri sādara baiṭhāe॥

परुसन जबहिं लाग महिपाला। भै अकासबानी तेहि काला।।

parusana jabahiṃ lāga mahipālā। bhai akāsabānī tehi kālā॥

बिप्रबृंद उठि उठि गृह जाहू। है बड़ि हानि अन्न जनि खाहू।।

biprabṛṃda uṭhi uṭhi gṛha jāhū। hai bar̤i hāni anna jani khāhū॥

भयउ रसोईं भूसुर माँसू। सब द्विज उठे मानि बिस्वासू।।

bhayau rasoīṃ bhūsura mā~sū। saba dvija uṭhe māni bisvāsū॥

भूप बिकल मति मोहँ भुलानी। भावी बस आव मुख बानी।।

bhūpa bikala mati moha~ bhulānī। bhāvī basa āva mukha bānī॥

बोले बिप्र सकोप तब नहिं कछु कीन्ह बिचार।

bole bipra sakopa taba nahiṃ kachu kīnha bicāra।

जाइ निसाचर होहु नृप मूढ़ सहित परिवार।।173।।

jāi nisācara hohu nṛpa mūr̤ha sahita parivāra॥173॥

छत्रबंधु तैं बिप्र बोलाई। घालै लिए सहित समुदाई।।

chatrabaṃdhu taiṃ bipra bolāī। ghālai lie sahita samudāī॥

ईस्वर राखा धरम हमारा। जैहसि तैं समेत परिवारा।।

īsvara rākhā dharama hamārā। jaihasi taiṃ sameta parivārā॥

संबत मध्य नास तव होऊ। जलदाता न रहिहि कुल कोऊ।।

saṃbata madhya nāsa tava hoū। jaladātā na rahihi kula koū॥

नृप सुनि श्राप बिकल अति त्रासा। भै बहोरि बर गिरा अकासा।।

nṛpa suni śrāpa bikala ati trāsā। bhai bahori bara girā akāsā॥

बिप्रहु श्राप बिचारि न दीन्हा। नहिं अपराध भूप कछु कीन्हा।।

biprahu śrāpa bicāri na dīnhā। nahiṃ aparādha bhūpa kachu kīnhā॥

चकित बिप्र सब सुनि नभबानी। भूप गयउ जहँ भोजन खानी।।

cakita bipra saba suni nabhabānī। bhūpa gayau jaha~ bhojana khānī॥

तहँ न असन नहिं बिप्र सुआरा। फिरेउ राउ मन सोच अपारा।।

taha~ na asana nahiṃ bipra suārā। phireu rāu mana soca apārā॥

सब प्रसंग महिसुरन्ह सुनाई। त्रसित परेउ अवनीं अकुलाई।।

saba prasaṃga mahisuranha sunāī। trasita pareu avanīṃ akulāī॥

भूपति भावी मिटइ नहिं जदपि न दूषन तोर।

bhūpati bhāvī miṭai nahiṃ jadapi na dūṣana tora।

किएँ अन्यथा होइ नहिं बिप्रश्राप अति घोर।।174।।

kie~ anyathā hoi nahiṃ bipraśrāpa ati ghora॥174॥

अस कहि सब महिदेव सिधाए। समाचार पुरलोगन्ह पाए।।

asa kahi saba mahideva sidhāe। samācāra puraloganha pāe॥

सोचहिं दूषन दैवहि देहीं। बिचरत हंस काग किय जेहीं।।

socahiṃ dūṣana daivahi dehīṃ। bicarata haṃsa kāga kiya jehīṃ॥

उपरोहितहि भवन पहुँचाई। असुर तापसहि खबरि जनाई।।

uparohitahi bhavana pahu~cāī। asura tāpasahi khabari janāī॥

तेहिं खल जहँ तहँ पत्र पठाए। सजि सजि सेन भूप सब धाए।।

tehiṃ khala jaha~ taha~ patra paṭhāe। saji saji sena bhūpa saba dhāe॥

घेरेन्हि नगर निसान बजाई। बिबिध भाँति नित होई लराई।।

gherenhi nagara nisāna bajāī। bibidha bhā~ti nita hoī larāī॥

जूझे सकल सुभट करि करनी। बंधु समेत परेउ नृप धरनी।।

jūjhe sakala subhaṭa kari karanī। baṃdhu sameta pareu nṛpa dharanī॥

सत्यकेतु कुल कोउ नहिं बाँचा। बिप्रश्राप किमि होइ असाँचा।।

satyaketu kula kou nahiṃ bā~cā। bipraśrāpa kimi hoi asā~cā॥

रिपु जिति सब नृप नगर बसाई। निज पुर गवने जय जसु पाई।।

ripu jiti saba nṛpa nagara basāī। nija pura gavane jaya jasu pāī॥

भरद्वाज सुनु जाहि जब होइ बिधाता बाम।

bharadvāja sunu jāhi jaba hoi bidhātā bāma।

धूरि मेरुसम जनक जम ताहि ब्यालसम दाम।।।175।।

dhūri merusama janaka jama tāhi byālasama dāma॥।175॥

काल पाइ मुनि सुनु सोइ राजा। भयउ निसाचर सहित समाजा।।

kāla pāi muni sunu soi rājā। bhayau nisācara sahita samājā॥

दस सिर ताहि बीस भुजदंडा। रावन नाम बीर बरिबंडा।।

dasa sira tāhi bīsa bhujadaṃḍā। rāvana nāma bīra baribaṃḍā॥

भूप अनुज अरिमर्दन नामा। भयउ सो कुंभकरन बलधामा।।

bhūpa anuja arimardana nāmā। bhayau so kuṃbhakarana baladhāmā॥

सचिव जो रहा धरमरुचि जासू। भयउ बिमात्र बंधु लघु तासू।।

saciva jo rahā dharamaruci jāsū। bhayau bimātra baṃdhu laghu tāsū॥

नाम बिभीषन जेहि जग जाना। बिष्नुभगत बिग्यान निधाना।।

nāma bibhīṣana jehi jaga jānā। biṣnubhagata bigyāna nidhānā॥

रहे जे सुत सेवक नृप केरे। भए निसाचर घोर घनेरे।।

rahe je suta sevaka nṛpa kere। bhae nisācara ghora ghanere॥

कामरूप खल जिनस अनेका। कुटिल भयंकर बिगत बिबेका।।

kāmarūpa khala jinasa anekā। kuṭila bhayaṃkara bigata bibekā॥

कृपा रहित हिंसक सब पापी। बरनि न जाहिं बिस्व परितापी।।

kṛpā rahita hiṃsaka saba pāpī। barani na jāhiṃ bisva paritāpī॥

उपजे जदपि पुलस्त्यकुल पावन अमल अनूप।

upaje jadapi pulastyakula pāvana amala anūpa।

तदपि महीसुर श्राप बस भए सकल अघरूप।।176।।

tadapi mahīsura śrāpa basa bhae sakala agharūpa॥176॥

कीन्ह बिबिध तप तीनिहुँ भाई। परम उग्र नहिं बरनि सो जाई।।

kīnha bibidha tapa tīnihu~ bhāī। parama ugra nahiṃ barani so jāī॥

गयउ निकट तप देखि बिधाता। मागहु बर प्रसन्न मैं ताता।।

gayau nikaṭa tapa dekhi bidhātā। māgahu bara prasanna maiṃ tātā॥

करि बिनती पद गहि दससीसा। बोलेउ बचन सुनहु जगदीसा।।

kari binatī pada gahi dasasīsā। boleu bacana sunahu jagadīsā॥

हम काहू के मरहिं न मारें। बानर मनुज जाति दुइ बारें।।

hama kāhū ke marahiṃ na māreṃ। bānara manuja jāti dui bāreṃ॥

एवमस्तु तुम्ह बड़ तप कीन्हा। मैं ब्रह्माँ मिलि तेहि बर दीन्हा।।

evamastu tumha bar̤a tapa kīnhā। maiṃ brahmā~ mili tehi bara dīnhā॥

पुनि प्रभु कुंभकरन पहिं गयऊ। तेहि बिलोकि मन बिसमय भयऊ।।

puni prabhu kuṃbhakarana pahiṃ gayaū। tehi biloki mana bisamaya bhayaū॥

जौं एहिं खल नित करब अहारू। होइहि सब उजारि संसारू।।

jauṃ ehiṃ khala nita karaba ahārū। hoihi saba ujāri saṃsārū॥

सारद प्रेरि तासु मति फेरी। मागेसि नीद मास षट केरी।।

sārada preri tāsu mati pherī। māgesi nīda māsa ṣaṭa kerī॥

गए बिभीषन पास पुनि कहेउ पुत्र बर मागु।

gae bibhīṣana pāsa puni kaheu putra bara māgu।

तेहिं मागेउ भगवंत पद कमल अमल अनुरागु।।177।।

tehiṃ māgeu bhagavaṃta pada kamala amala anurāgu॥177॥

तिन्हि देइ बर ब्रह्म सिधाए। हरषित ते अपने गृह आए।।

tinhi dei bara brahma sidhāe। haraṣita te apane gṛha āe॥

मय तनुजा मंदोदरि नामा। परम सुंदरी नारि ललामा।।

maya tanujā maṃdodari nāmā। parama suṃdarī nāri lalāmā॥

सोइ मयँ दीन्हि रावनहि आनी। होइहि जातुधानपति जानी।।

soi maya~ dīnhi rāvanahi ānī। hoihi jātudhānapati jānī॥

हरषित भयउ नारि भलि पाई। पुनि दोउ बंधु बिआहेसि जाई।।

haraṣita bhayau nāri bhali pāī। puni dou baṃdhu biāhesi jāī॥

गिरि त्रिकूट एक सिंधु मझारी। बिधि निर्मित दुर्गम अति भारी।।

giri trikūṭa eka siṃdhu majhārī। bidhi nirmita durgama ati bhārī॥

सोइ मय दानवँ बहुरि सँवारा। कनक रचित मनिभवन अपारा।।

soi maya dānava~ bahuri sa~vārā। kanaka racita manibhavana apārā॥

भोगावति जसि अहिकुल बासा। अमरावति जसि सक्रनिवासा।।

bhogāvati jasi ahikula bāsā। amarāvati jasi sakranivāsā॥

तिन्ह तें अधिक रम्य अति बंका। जग बिख्यात नाम तेहि लंका।।

tinha teṃ adhika ramya ati baṃkā। jaga bikhyāta nāma tehi laṃkā॥

खाईं सिंधु गभीर अति चारिहुँ दिसि फिरि आव।

khāīṃ siṃdhu gabhīra ati cārihu~ disi phiri āva।

कनक कोट मनि खचित दृढ़ बरनि न जाइ बनाव।।178(क)।।

kanaka koṭa mani khacita dṛr̤ha barani na jāi banāva॥178(ka)॥

हरिप्रेरित जेहिं कलप जोइ जातुधानपति होइ।

hariprerita jehiṃ kalapa joi jātudhānapati hoi।

सूर प्रतापी अतुलबल दल समेत बस सोइ।।178(ख)।।

sūra pratāpī atulabala dala sameta basa soi॥178(kha)॥

रहे तहाँ निसिचर भट भारे। ते सब सुरन्ह समर संघारे।।

rahe tahā~ nisicara bhaṭa bhāre। te saba suranha samara saṃghāre॥

अब तहँ रहहिं सक्र के प्रेरे। रच्छक कोटि जच्छपति केरे।।

aba taha~ rahahiṃ sakra ke prere। racchaka koṭi jacchapati kere॥

दसमुख कतहुँ खबरि असि पाई। सेन साजि गढ़ घेरेसि जाई।।

dasamukha katahu~ khabari asi pāī। sena sāji gar̤ha gheresi jāī॥

देखि बिकट भट बड़ि कटकाई। जच्छ जीव लै गए पराई।।

dekhi bikaṭa bhaṭa bar̤i kaṭakāī। jaccha jīva lai gae parāī॥

फिरि सब नगर दसानन देखा। गयउ सोच सुख भयउ बिसेषा।।

phiri saba nagara dasānana dekhā। gayau soca sukha bhayau biseṣā॥

सुंदर सहज अगम अनुमानी। कीन्हि तहाँ रावन रजधानी।।

suṃdara sahaja agama anumānī। kīnhi tahā~ rāvana rajadhānī॥

जेहि जस जोग बाँटि गृह दीन्हे। सुखी सकल रजनीचर कीन्हे।।

jehi jasa joga bā~ṭi gṛha dīnhe। sukhī sakala rajanīcara kīnhe॥

एक बार कुबेर पर धावा। पुष्पक जान जीति लै आवा।।

eka bāra kubera para dhāvā। puṣpaka jāna jīti lai āvā॥

कौतुकहीं कैलास पुनि लीन्हेसि जाइ उठाइ।

kautukahīṃ kailāsa puni līnhesi jāi uṭhāi।

मनहुँ तौलि निज बाहुबल चला बहुत सुख पाइ।।179।।

manahu~ tauli nija bāhubala calā bahuta sukha pāi॥179॥

सुख संपति सुत सेन सहाई। जय प्रताप बल बुद्धि बड़ाई।।

sukha saṃpati suta sena sahāī। jaya pratāpa bala buddhi bar̤āī॥

नित नूतन सब बाढ़त जाई। जिमि प्रतिलाभ लोभ अधिकाई।।

nita nūtana saba bār̤hata jāī। jimi pratilābha lobha adhikāī॥

अतिबल कुंभकरन अस भ्राता। जेहि कहुँ नहिं प्रतिभट जग जाता।।

atibala kuṃbhakarana asa bhrātā। jehi kahu~ nahiṃ pratibhaṭa jaga jātā॥

करइ पान सोवइ षट मासा। जागत होइ तिहुँ पुर त्रासा।।

karai pāna sovai ṣaṭa māsā। jāgata hoi tihu~ pura trāsā॥

जौं दिन प्रति अहार कर सोई। बिस्व बेगि सब चौपट होई।।

jauṃ dina prati ahāra kara soī। bisva begi saba caupaṭa hoī॥

समर धीर नहिं जाइ बखाना। तेहि सम अमित बीर बलवाना।।

samara dhīra nahiṃ jāi bakhānā। tehi sama amita bīra balavānā॥

बारिदनाद जेठ सुत तासू। भट महुँ प्रथम लीक जग जासू।।

bāridanāda jeṭha suta tāsū। bhaṭa mahu~ prathama līka jaga jāsū॥

जेहि न होइ रन सनमुख कोई। सुरपुर नितहिं परावन होई।।

jehi na hoi rana sanamukha koī। surapura nitahiṃ parāvana hoī॥

कुमुख अकंपन कुलिसरद धूमकेतु अतिकाय।

kumukha akaṃpana kulisarada dhūmaketu atikāya।

एक एक जग जीति सक ऐसे सुभट निकाय।।180।।

eka eka jaga jīti saka aise subhaṭa nikāya॥180॥

कामरूप जानहिं सब माया। सपनेहुँ जिन्ह कें धरम न दाया।।

kāmarūpa jānahiṃ saba māyā। sapanehu~ jinha keṃ dharama na dāyā॥

दसमुख बैठ सभाँ एक बारा। देखि अमित आपन परिवारा।।