Ayodhyā Kāṇḍa — The book of Ayodhyā

यस्याङ्के च विभाति भूधरसुता देवापगा मस्तके

yasyāṅke ca vibhāti bhūdharasutā devāpagā mastake

भाले बालविधुर्गले च गरलं यस्योरसि व्यालराट्।

bhāle bālavidhurgale ca garalaṃ yasyorasi vyālarāṭ।

सोऽयं भूतिविभूषणः सुरवरः सर्वाधिपः सर्वदा

so'yaṃ bhūtivibhūṣaṇaḥ suravaraḥ sarvādhipaḥ sarvadā

शर्वः सर्वगतः शिवः शशिनिभः श्रीशङ्करः पातु माम्।।1।।

śarvaḥ sarvagataḥ śivaḥ śaśinibhaḥ śrīśaṅkaraḥ pātu mām॥1॥

प्रसन्नतां या न गताभिषेकतस्तथा न मम्ले वनवासदुःखतः।

prasannatāṃ yā na gatābhiṣekatastathā na mamle vanavāsaduḥkhataḥ।

मुखाम्बुजश्री रघुनन्दनस्य मे सदास्तु सा मञ्जुलमंगलप्रदा।।2।।

mukhāmbujaśrī raghunandanasya me sadāstu sā mañjulamaṃgalapradā॥2॥

नीलाम्बुजश्यामलकोमलाङ्गं सीतासमारोपितवामभागम्।

nīlāmbujaśyāmalakomalāṅgaṃ sītāsamāropitavāmabhāgam।

पाणौ महासायकचारुचापं नमामि रामं रघुवंशनाथम्।।3।।

pāṇau mahāsāyakacārucāpaṃ namāmi rāmaṃ raghuvaṃśanātham॥3॥

श्रीगुरु चरन सरोज रज निज मनु मुकुरु सुधारि।

śrīguru carana saroja raja nija manu mukuru sudhāri।

बरनउँ रघुबर बिमल जसु जो दायकु फल चारि।।

baranau~ raghubara bimala jasu jo dāyaku phala cāri॥

जब तें रामु ब्याहि घर आए। नित नव मंगल मोद बधाए।।

jaba teṃ rāmu byāhi ghara āe। nita nava maṃgala moda badhāe॥

भुवन चारिदस भूधर भारी। सुकृत मेघ बरषहि सुख बारी।।

bhuvana cāridasa bhūdhara bhārī। sukṛta megha baraṣahi sukha bārī॥

रिधि सिधि संपति नदीं सुहाई। उमगि अवध अंबुधि कहुँ आई।।

ridhi sidhi saṃpati nadīṃ suhāī। umagi avadha aṃbudhi kahu~ āī॥

मनिगन पुर नर नारि सुजाती। सुचि अमोल सुंदर सब भाँती।।

manigana pura nara nāri sujātī। suci amola suṃdara saba bhā~tī॥

कहि न जाइ कछु नगर बिभूती। जनु एतनिअ बिरंचि करतूती।।

kahi na jāi kachu nagara bibhūtī। janu etania biraṃci karatūtī॥

सब बिधि सब पुर लोग सुखारी। रामचंद मुख चंदु निहारी।।

saba bidhi saba pura loga sukhārī। rāmacaṃda mukha caṃdu nihārī॥

मुदित मातु सब सखीं सहेली। फलित बिलोकि मनोरथ बेली।।

mudita mātu saba sakhīṃ sahelī। phalita biloki manoratha belī॥

राम रूपु गुनसीलु सुभाऊ। प्रमुदित होइ देखि सुनि राऊ।।

rāma rūpu gunasīlu subhāū। pramudita hoi dekhi suni rāū॥

सब कें उर अभिलाषु अस कहहिं मनाइ महेसु।

saba keṃ ura abhilāṣu asa kahahiṃ manāi mahesu।

आप अछत जुबराज पद रामहि देउ नरेसु।।1।।

āpa achata jubarāja pada rāmahi deu naresu॥1॥

एक समय सब सहित समाजा। राजसभाँ रघुराजु बिराजा।।

eka samaya saba sahita samājā। rājasabhā~ raghurāju birājā॥

सकल सुकृत मूरति नरनाहू। राम सुजसु सुनि अतिहि उछाहू।।

sakala sukṛta mūrati naranāhū। rāma sujasu suni atihi uchāhū॥

नृप सब रहहिं कृपा अभिलाषें। लोकप करहिं प्रीति रुख राखें।।

nṛpa saba rahahiṃ kṛpā abhilāṣeṃ। lokapa karahiṃ prīti rukha rākheṃ॥

तिभुवन तीनि काल जग माहीं। भूरि भाग दसरथ सम नाहीं।।

tibhuvana tīni kāla jaga māhīṃ। bhūri bhāga dasaratha sama nāhīṃ॥

मंगलमूल रामु सुत जासू। जो कछु कहिज थोर सबु तासू।।

maṃgalamūla rāmu suta jāsū। jo kachu kahija thora sabu tāsū॥

रायँ सुभायँ मुकुरु कर लीन्हा। बदनु बिलोकि मुकुट सम कीन्हा।।

rāya~ subhāya~ mukuru kara līnhā। badanu biloki mukuṭa sama kīnhā॥

श्रवन समीप भए सित केसा। मनहुँ जरठपनु अस उपदेसा।।

śravana samīpa bhae sita kesā। manahu~ jaraṭhapanu asa upadesā॥

नृप जुबराज राम कहुँ देहू। जीवन जनम लाहु किन लेहू।।

nṛpa jubarāja rāma kahu~ dehū। jīvana janama lāhu kina lehū॥

यह बिचारु उर आनि नृप सुदिनु सुअवसरु पाइ।

yaha bicāru ura āni nṛpa sudinu suavasaru pāi।

प्रेम पुलकि तन मुदित मन गुरहि सुनायउ जाइ।।2।।

prema pulaki tana mudita mana gurahi sunāyau jāi॥2॥

कहइ भुआलु सुनिअ मुनिनायक। भए राम सब बिधि सब लायक।।

kahai bhuālu sunia munināyaka। bhae rāma saba bidhi saba lāyaka॥

सेवक सचिव सकल पुरबासी। जे हमारे अरि मित्र उदासी।।

sevaka saciva sakala purabāsī। je hamāre ari mitra udāsī॥

सबहि रामु प्रिय जेहि बिधि मोही। प्रभु असीस जनु तनु धरि सोही।।

sabahi rāmu priya jehi bidhi mohī। prabhu asīsa janu tanu dhari sohī॥

बिप्र सहित परिवार गोसाईं। करहिं छोहु सब रौरिहि नाई।।

bipra sahita parivāra gosāīṃ। karahiṃ chohu saba raurihi nāī॥

जे गुर चरन रेनु सिर धरहीं। ते जनु सकल बिभव बस करहीं।।

je gura carana renu sira dharahīṃ। te janu sakala bibhava basa karahīṃ॥

मोहि सम यहु अनुभयउ न दूजें। सबु पायउँ रज पावनि पूजें।।

mohi sama yahu anubhayau na dūjeṃ। sabu pāyau~ raja pāvani pūjeṃ॥

अब अभिलाषु एकु मन मोरें। पूजहि नाथ अनुग्रह तोरें।।

aba abhilāṣu eku mana moreṃ। pūjahi nātha anugraha toreṃ॥

मुनि प्रसन्न लखि सहज सनेहू। कहेउ नरेस रजायसु देहू।।

muni prasanna lakhi sahaja sanehū। kaheu naresa rajāyasu dehū॥

राजन राउर नामु जसु सब अभिमत दातार।

rājana rāura nāmu jasu saba abhimata dātāra।

फल अनुगामी महिप मनि मन अभिलाषु तुम्हार।।3।।

phala anugāmī mahipa mani mana abhilāṣu tumhāra॥3॥

सब बिधि गुरु प्रसन्न जियँ जानी। बोलेउ राउ रहँसि मृदु बानी।।

saba bidhi guru prasanna jiya~ jānī। boleu rāu raha~si mṛdu bānī॥

नाथ रामु करिअहिं जुबराजू। कहिअ कृपा करि करिअ समाजू।।

nātha rāmu kariahiṃ jubarājū। kahia kṛpā kari karia samājū॥

मोहि अछत यहु होइ उछाहू। लहहिं लोग सब लोचन लाहू।।

mohi achata yahu hoi uchāhū। lahahiṃ loga saba locana lāhū॥

प्रभु प्रसाद सिव सबइ निबाहीं। यह लालसा एक मन माहीं।।

prabhu prasāda siva sabai nibāhīṃ। yaha lālasā eka mana māhīṃ॥

पुनि न सोच तनु रहउ कि जाऊ। जेहिं न होइ पाछें पछिताऊ।।

puni na soca tanu rahau ki jāū। jehiṃ na hoi pācheṃ pachitāū॥

सुनि मुनि दसरथ बचन सुहाए। मंगल मोद मूल मन भाए।।

suni muni dasaratha bacana suhāe। maṃgala moda mūla mana bhāe॥

सुनु नृप जासु बिमुख पछिताहीं। जासु भजन बिनु जरनि न जाहीं।।

sunu nṛpa jāsu bimukha pachitāhīṃ। jāsu bhajana binu jarani na jāhīṃ॥

भयउ तुम्हार तनय सोइ स्वामी। रामु पुनीत प्रेम अनुगामी।।

bhayau tumhāra tanaya soi svāmī। rāmu punīta prema anugāmī॥

बेगि बिलंबु न करिअ नृप साजिअ सबुइ समाजु।

begi bilaṃbu na karia nṛpa sājia sabui samāju।

सुदिन सुमंगलु तबहिं जब रामु होहिं जुबराजु।।4।।

sudina sumaṃgalu tabahiṃ jaba rāmu hohiṃ jubarāju॥4॥

मुदित महिपति मंदिर आए। सेवक सचिव सुमंत्रु बोलाए।।

mudita mahipati maṃdira āe। sevaka saciva sumaṃtru bolāe॥

कहि जयजीव सीस तिन्ह नाए। भूप सुमंगल बचन सुनाए।।

kahi jayajīva sīsa tinha nāe। bhūpa sumaṃgala bacana sunāe॥

जौं पाँचहि मत लागै नीका। करहु हरषि हियँ रामहि टीका।।

jauṃ pā~cahi mata lāgai nīkā। karahu haraṣi hiya~ rāmahi ṭīkā॥

मंत्री मुदित सुनत प्रिय बानी। अभिमत बिरवँ परेउ जनु पानी।।

maṃtrī mudita sunata priya bānī। abhimata birava~ pareu janu pānī॥

बिनती सचिव करहि कर जोरी। जिअहु जगतपति बरिस करोरी।।

binatī saciva karahi kara jorī। jiahu jagatapati barisa karorī॥

जग मंगल भल काजु बिचारा। बेगिअ नाथ न लाइअ बारा।।

jaga maṃgala bhala kāju bicārā। begia nātha na lāia bārā॥

नृपहि मोदु सुनि सचिव सुभाषा। बढ़त बौंड़ जनु लही सुसाखा।।

nṛpahi modu suni saciva subhāṣā। bar̤hata bauṃr̤a janu lahī susākhā॥

कहेउ भूप मुनिराज कर जोइ जोइ आयसु होइ।

kaheu bhūpa munirāja kara joi joi āyasu hoi।

राम राज अभिषेक हित बेगि करहु सोइ सोइ।।5।।

rāma rāja abhiṣeka hita begi karahu soi soi॥5॥

हरषि मुनीस कहेउ मृदु बानी। आनहु सकल सुतीरथ पानी।।

haraṣi munīsa kaheu mṛdu bānī। ānahu sakala sutīratha pānī॥

औषध मूल फूल फल पाना। कहे नाम गनि मंगल नाना।।

auṣadha mūla phūla phala pānā। kahe nāma gani maṃgala nānā॥

चामर चरम बसन बहु भाँती। रोम पाट पट अगनित जाती।।

cāmara carama basana bahu bhā~tī। roma pāṭa paṭa aganita jātī॥

मनिगन मंगल बस्तु अनेका। जो जग जोगु भूप अभिषेका।।

manigana maṃgala bastu anekā। jo jaga jogu bhūpa abhiṣekā॥

बेद बिदित कहि सकल बिधाना। कहेउ रचहु पुर बिबिध बिताना।।

beda bidita kahi sakala bidhānā। kaheu racahu pura bibidha bitānā॥

सफल रसाल पूगफल केरा। रोपहु बीथिन्ह पुर चहुँ फेरा।।

saphala rasāla pūgaphala kerā। ropahu bīthinha pura cahu~ pherā॥

रचहु मंजु मनि चौकें चारू। कहहु बनावन बेगि बजारू।।

racahu maṃju mani caukeṃ cārū। kahahu banāvana begi bajārū॥

पूजहु गनपति गुर कुलदेवा। सब बिधि करहु भूमिसुर सेवा।।

pūjahu ganapati gura kuladevā। saba bidhi karahu bhūmisura sevā॥

ध्वज पताक तोरन कलस सजहु तुरग रथ नाग।

dhvaja patāka torana kalasa sajahu turaga ratha nāga।

सिर धरि मुनिबर बचन सबु निज निज काजहिं लाग।।6।।

sira dhari munibara bacana sabu nija nija kājahiṃ lāga॥6॥

जो मुनीस जेहि आयसु दीन्हा। सो तेहिं काजु प्रथम जनु कीन्हा।।

jo munīsa jehi āyasu dīnhā। so tehiṃ kāju prathama janu kīnhā॥

बिप्र साधु सुर पूजत राजा। करत राम हित मंगल काजा।।

bipra sādhu sura pūjata rājā। karata rāma hita maṃgala kājā॥

सुनत राम अभिषेक सुहावा। बाज गहागह अवध बधावा।।

sunata rāma abhiṣeka suhāvā। bāja gahāgaha avadha badhāvā॥

राम सीय तन सगुन जनाए। फरकहिं मंगल अंग सुहाए।।

rāma sīya tana saguna janāe। pharakahiṃ maṃgala aṃga suhāe॥

पुलकि सप्रेम परसपर कहहीं। भरत आगमनु सूचक अहहीं।।

pulaki saprema parasapara kahahīṃ। bharata āgamanu sūcaka ahahīṃ॥

भए बहुत दिन अति अवसेरी। सगुन प्रतीति भेंट प्रिय केरी।।

bhae bahuta dina ati avaserī। saguna pratīti bheṃṭa priya kerī॥

भरत सरिस प्रिय को जग माहीं। इहइ सगुन फलु दूसर नाहीं।।

bharata sarisa priya ko jaga māhīṃ। ihai saguna phalu dūsara nāhīṃ॥

रामहि बंधु सोच दिन राती। अंडन्हि कमठ ह्रदउ जेहि भाँती।।

rāmahi baṃdhu soca dina rātī। aṃḍanhi kamaṭha hradau jehi bhā~tī॥

एहि अवसर मंगलु परम सुनि रहँसेउ रनिवासु।

ehi avasara maṃgalu parama suni raha~seu ranivāsu।

सोभत लखि बिधु बढ़त जनु बारिधि बीचि बिलासु।।7।।

sobhata lakhi bidhu bar̤hata janu bāridhi bīci bilāsu॥7॥

प्रथम जाइ जिन्ह बचन सुनाए। भूषन बसन भूरि तिन्ह पाए।।

prathama jāi jinha bacana sunāe। bhūṣana basana bhūri tinha pāe॥

प्रेम पुलकि तन मन अनुरागीं। मंगल कलस सजन सब लागीं।।

prema pulaki tana mana anurāgīṃ। maṃgala kalasa sajana saba lāgīṃ॥

चौकें चारु सुमित्राँ पुरी। मनिमय बिबिध भाँति अति रुरी।।

caukeṃ cāru sumitrā~ purī। manimaya bibidha bhā~ti ati rurī॥

आनँद मगन राम महतारी। दिए दान बहु बिप्र हँकारी।।

āna~da magana rāma mahatārī। die dāna bahu bipra ha~kārī॥

पूजीं ग्रामदेबि सुर नागा। कहेउ बहोरि देन बलिभागा।।

pūjīṃ grāmadebi sura nāgā। kaheu bahori dena balibhāgā॥

जेहि बिधि होइ राम कल्यानू। देहु दया करि सो बरदानू।।

jehi bidhi hoi rāma kalyānū। dehu dayā kari so baradānū॥

गावहिं मंगल कोकिलबयनीं। बिधुबदनीं मृगसावकनयनीं।।

gāvahiṃ maṃgala kokilabayanīṃ। bidhubadanīṃ mṛgasāvakanayanīṃ॥

राम राज अभिषेकु सुनि हियँ हरषे नर नारि।

rāma rāja abhiṣeku suni hiya~ haraṣe nara nāri।

लगे सुमंगल सजन सब बिधि अनुकूल बिचारि।।8।।

lage sumaṃgala sajana saba bidhi anukūla bicāri॥8॥

तब नरनाहँ बसिष्ठु बोलाए। रामधाम सिख देन पठाए।।

taba naranāha~ basiṣṭhu bolāe। rāmadhāma sikha dena paṭhāe॥

गुर आगमनु सुनत रघुनाथा। द्वार आइ पद नायउ माथा।।

gura āgamanu sunata raghunāthā। dvāra āi pada nāyau māthā॥

सादर अरघ देइ घर आने। सोरह भाँति पूजि सनमाने।।

sādara aragha dei ghara āne। soraha bhā~ti pūji sanamāne॥

गहे चरन सिय सहित बहोरी। बोले रामु कमल कर जोरी।।

gahe carana siya sahita bahorī। bole rāmu kamala kara jorī॥

सेवक सदन स्वामि आगमनू। मंगल मूल अमंगल दमनू।।

sevaka sadana svāmi āgamanū। maṃgala mūla amaṃgala damanū॥

तदपि उचित जनु बोलि सप्रीती। पठइअ काज नाथ असि नीती।।

tadapi ucita janu boli saprītī। paṭhaia kāja nātha asi nītī॥

प्रभुता तजि प्रभु कीन्ह सनेहू। भयउ पुनीत आजु यहु गेहू।।

prabhutā taji prabhu kīnha sanehū। bhayau punīta āju yahu gehū॥

आयसु होइ सो करौं गोसाई। सेवक लहइ स्वामि सेवकाई।।

āyasu hoi so karauṃ gosāī। sevaka lahai svāmi sevakāī॥

सुनि सनेह साने बचन मुनि रघुबरहि प्रसंस।

suni saneha sāne bacana muni raghubarahi prasaṃsa।

राम कस न तुम्ह कहहु अस हंस बंस अवतंस।।9।।

rāma kasa na tumha kahahu asa haṃsa baṃsa avataṃsa॥9॥

बरनि राम गुन सीलु सुभाऊ। बोले प्रेम पुलकि मुनिराऊ।।

barani rāma guna sīlu subhāū। bole prema pulaki munirāū॥

भूप सजेउ अभिषेक समाजू। चाहत देन तुम्हहि जुबराजू।।

bhūpa sajeu abhiṣeka samājū। cāhata dena tumhahi jubarājū॥

राम करहु सब संजम आजू। जौं बिधि कुसल निबाहै काजू।।

rāma karahu saba saṃjama ājū। jauṃ bidhi kusala nibāhai kājū॥

गुरु सिख देइ राय पहिं गयउ। राम हृदयँ अस बिसमउ भयऊ।।

guru sikha dei rāya pahiṃ gayau। rāma hṛdaya~ asa bisamau bhayaū॥

जनमे एक संग सब भाई। भोजन सयन केलि लरिकाई।।

janame eka saṃga saba bhāī। bhojana sayana keli larikāī॥

करनबेध उपबीत बिआहा। संग संग सब भए उछाहा।।

karanabedha upabīta biāhā। saṃga saṃga saba bhae uchāhā॥

बिमल बंस यहु अनुचित एकू। बंधु बिहाइ बड़ेहि अभिषेकू।।

bimala baṃsa yahu anucita ekū। baṃdhu bihāi bar̤ehi abhiṣekū॥

प्रभु सप्रेम पछितानि सुहाई। हरउ भगत मन कै कुटिलाई।।

prabhu saprema pachitāni suhāī। harau bhagata mana kai kuṭilāī॥

तेहि अवसर आए लखन मगन प्रेम आनंद।

tehi avasara āe lakhana magana prema ānaṃda।

सनमाने प्रिय बचन कहि रघुकुल कैरव चंद।।10।।

sanamāne priya bacana kahi raghukula kairava caṃda॥10॥

बाजहिं बाजने बिबिध बिधाना। पुर प्रमोदु नहिं जाइ बखाना।।

bājahiṃ bājane bibidha bidhānā। pura pramodu nahiṃ jāi bakhānā॥

भरत आगमनु सकल मनावहिं। आवहुँ बेगि नयन फलु पावहिं।।

bharata āgamanu sakala manāvahiṃ। āvahu~ begi nayana phalu pāvahiṃ॥

हाट बाट घर गलीं अथाई। कहहिं परसपर लोग लोगाई।।

hāṭa bāṭa ghara galīṃ athāī। kahahiṃ parasapara loga logāī॥

कालि लगन भलि केतिक बारा। पूजिहि बिधि अभिलाषु हमारा।।

kāli lagana bhali ketika bārā। pūjihi bidhi abhilāṣu hamārā॥

कनक सिंघासन सीय समेता। बैठहिं रामु होइ चित चेता।।

kanaka siṃghāsana sīya sametā। baiṭhahiṃ rāmu hoi cita cetā॥

सकल कहहिं कब होइहि काली। बिघन मनावहिं देव कुचाली।।

sakala kahahiṃ kaba hoihi kālī। bighana manāvahiṃ deva kucālī॥

तिन्हहि सोहाइ न अवध बधावा। चोरहि चंदिनि राति न भावा।।

tinhahi sohāi na avadha badhāvā। corahi caṃdini rāti na bhāvā॥

सारद बोलि बिनय सुर करहीं। बारहिं बार पाय लै परहीं।।

sārada boli binaya sura karahīṃ। bārahiṃ bāra pāya lai parahīṃ॥

बिपति हमारि बिलोकि बड़ि मातु करिअ सोइ आजु।

bipati hamāri biloki bar̤i mātu karia soi āju।

रामु जाहिं बन राजु तजि होइ सकल सुरकाजु।।11।।

rāmu jāhiṃ bana rāju taji hoi sakala surakāju॥11॥

सुनि सुर बिनय ठाढ़ि पछिताती। भइउँ सरोज बिपिन हिमराती।।

suni sura binaya ṭhār̤hi pachitātī। bhaiu~ saroja bipina himarātī॥

देखि देव पुनि कहहिं निहोरी। मातु तोहि नहिं थोरिउ खोरी।।

dekhi deva puni kahahiṃ nihorī। mātu tohi nahiṃ thoriu khorī॥

बिसमय हरष रहित रघुराऊ। तुम्ह जानहु सब राम प्रभाऊ।।

bisamaya haraṣa rahita raghurāū। tumha jānahu saba rāma prabhāū॥

जीव करम बस सुख दुख भागी। जाइअ अवध देव हित लागी।।

jīva karama basa sukha dukha bhāgī। jāia avadha deva hita lāgī॥

बार बार गहि चरन सँकोचौ। चली बिचारि बिबुध मति पोची।।

bāra bāra gahi carana sa~kocau। calī bicāri bibudha mati pocī॥

ऊँच निवासु नीचि करतूती। देखि न सकहिं पराइ बिभूती।।

ū~ca nivāsu nīci karatūtī। dekhi na sakahiṃ parāi bibhūtī॥

आगिल काजु बिचारि बहोरी। करहहिं चाह कुसल कबि मोरी।।

āgila kāju bicāri bahorī। karahahiṃ cāha kusala kabi morī॥

हरषि हृदयँ दसरथ पुर आई। जनु ग्रह दसा दुसह दुखदाई।।

haraṣi hṛdaya~ dasaratha pura āī। janu graha dasā dusaha dukhadāī॥

नामु मंथरा मंदमति चेरी कैकेइ केरि।

nāmu maṃtharā maṃdamati cerī kaikei keri।

अजस पेटारी ताहि करि गई गिरा मति फेरि।।12।।

ajasa peṭārī tāhi kari gaī girā mati pheri॥12॥

दीख मंथरा नगरु बनावा। मंजुल मंगल बाज बधावा।।

dīkha maṃtharā nagaru banāvā। maṃjula maṃgala bāja badhāvā॥

पूछेसि लोगन्ह काह उछाहू। राम तिलकु सुनि भा उर दाहू।।

pūchesi loganha kāha uchāhū। rāma tilaku suni bhā ura dāhū॥

करइ बिचारु कुबुद्धि कुजाती। होइ अकाजु कवनि बिधि राती।।

karai bicāru kubuddhi kujātī। hoi akāju kavani bidhi rātī॥

देखि लागि मधु कुटिल किराती। जिमि गवँ तकइ लेउँ केहि भाँती।।

dekhi lāgi madhu kuṭila kirātī। jimi gava~ takai leu~ kehi bhā~tī॥

भरत मातु पहिं गइ बिलखानी। का अनमनि हसि कह हँसि रानी।।

bharata mātu pahiṃ gai bilakhānī। kā anamani hasi kaha ha~si rānī॥

ऊतरु देइ न लेइ उसासू। नारि चरित करि ढारइ आँसू।।

ūtaru dei na lei usāsū। nāri carita kari ḍhārai ā~sū॥

हँसि कह रानि गालु बड़ तोरें। दीन्ह लखन सिख अस मन मोरें।।

ha~si kaha rāni gālu bar̤a toreṃ। dīnha lakhana sikha asa mana moreṃ॥

तबहुँ न बोल चेरि बड़ि पापिनि। छाड़इ स्वास कारि जनु साँपिनि।।

tabahu~ na bola ceri bar̤i pāpini। chār̤ai svāsa kāri janu sā~pini॥

सभय रानि कह कहसि किन कुसल रामु महिपालु।

sabhaya rāni kaha kahasi kina kusala rāmu mahipālu।

लखनु भरतु रिपुदमनु सुनि भा कुबरी उर सालु।।13।।

lakhanu bharatu ripudamanu suni bhā kubarī ura sālu॥13॥

कत सिख देइ हमहि कोउ माई। गालु करब केहि कर बलु पाई।।

kata sikha dei hamahi kou māī। gālu karaba kehi kara balu pāī॥

रामहि छाड़ि कुसल केहि आजू। जेहि जनेसु देइ जुबराजू।।

rāmahi chār̤i kusala kehi ājū। jehi janesu dei jubarājū॥

भयउ कौसिलहि बिधि अति दाहिन। देखत गरब रहत उर नाहिन।।

bhayau kausilahi bidhi ati dāhina। dekhata garaba rahata ura nāhina॥

देखेहु कस न जाइ सब सोभा। जो अवलोकि मोर मनु छोभा।।

dekhehu kasa na jāi saba sobhā। jo avaloki mora manu chobhā॥

पूतु बिदेस न सोचु तुम्हारें। जानति हहु बस नाहु हमारें।।

pūtu bidesa na socu tumhāreṃ। jānati hahu basa nāhu hamāreṃ॥

नीद बहुत प्रिय सेज तुराई। लखहु न भूप कपट चतुराई।।

nīda bahuta priya seja turāī। lakhahu na bhūpa kapaṭa caturāī॥

सुनि प्रिय बचन मलिन मनु जानी। झुकी रानि अब रहु अरगानी।।

suni priya bacana malina manu jānī। jhukī rāni aba rahu aragānī॥

पुनि अस कबहुँ कहसि घरफोरी। तब धरि जीभ कढ़ावउँ तोरी।।

puni asa kabahu~ kahasi gharaphorī। taba dhari jībha kar̤hāvau~ torī॥

काने खोरे कूबरे कुटिल कुचाली जानि।

kāne khore kūbare kuṭila kucālī jāni।

तिय बिसेषि पुनि चेरि कहि भरतमातु मुसुकानि।।14।।

tiya biseṣi puni ceri kahi bharatamātu musukāni॥14॥

प्रियबादिनि सिख दीन्हिउँ तोही। सपनेहुँ तो पर कोपु न मोही।।

priyabādini sikha dīnhiu~ tohī। sapanehu~ to para kopu na mohī॥

सुदिनु सुमंगल दायकु सोई। तोर कहा फुर जेहि दिन होई।।

sudinu sumaṃgala dāyaku soī। tora kahā phura jehi dina hoī॥

जेठ स्वामि सेवक लघु भाई। यह दिनकर कुल रीति सुहाई।।

jeṭha svāmi sevaka laghu bhāī। yaha dinakara kula rīti suhāī॥

राम तिलकु जौं साँचेहुँ काली। देउँ मागु मन भावत आली।।

rāma tilaku jauṃ sā~cehu~ kālī। deu~ māgu mana bhāvata ālī॥

कौसल्या सम सब महतारी। रामहि सहज सुभायँ पिआरी।।

kausalyā sama saba mahatārī। rāmahi sahaja subhāya~ piārī॥

मो पर करहिं सनेहु बिसेषी। मैं करि प्रीति परीछा देखी।।

mo para karahiṃ sanehu biseṣī। maiṃ kari prīti parīchā dekhī॥

जौं बिधि जनमु देइ करि छोहू। होहुँ राम सिय पूत पुतोहू।।

jauṃ bidhi janamu dei kari chohū। hohu~ rāma siya pūta putohū॥

प्रान तें अधिक रामु प्रिय मोरें। तिन्ह कें तिलक छोभु कस तोरें।।

prāna teṃ adhika rāmu priya moreṃ। tinha keṃ tilaka chobhu kasa toreṃ॥

भरत सपथ तोहि सत्य कहु परिहरि कपट दुराउ।

bharata sapatha tohi satya kahu parihari kapaṭa durāu।

हरष समय बिसमउ करसि कारन मोहि सुनाउ।।15।।

haraṣa samaya bisamau karasi kārana mohi sunāu॥15॥

एकहिं बार आस सब पूजी। अब कछु कहब जीभ करि दूजी।।

ekahiṃ bāra āsa saba pūjī। aba kachu kahaba jībha kari dūjī॥

फोरै जोगु कपारु अभागा। भलेउ कहत दुख रउरेहि लागा।।

phorai jogu kapāru abhāgā। bhaleu kahata dukha raurehi lāgā॥

कहहिं झूठि फुरि बात बनाई। ते प्रिय तुम्हहि करुइ मैं माई।।

kahahiṃ jhūṭhi phuri bāta banāī। te priya tumhahi karui maiṃ māī॥

हमहुँ कहबि अब ठकुरसोहाती। नाहिं त मौन रहब दिनु राती।।

hamahu~ kahabi aba ṭhakurasohātī। nāhiṃ ta mauna rahaba dinu rātī॥

करि कुरूप बिधि परबस कीन्हा। बवा सो लुनिअ लहिअ जो दीन्हा।।

kari kurūpa bidhi parabasa kīnhā। bavā so lunia lahia jo dīnhā॥

कोउ नृप होउ हमहि का हानी। चेरि छाड़ि अब होब कि रानी।।

kou nṛpa hou hamahi kā hānī। ceri chār̤i aba hoba ki rānī॥

जारै जोगु सुभाउ हमारा। अनभल देखि न जाइ तुम्हारा।।

jārai jogu subhāu hamārā। anabhala dekhi na jāi tumhārā॥

तातें कछुक बात अनुसारी। छमिअ देबि बड़ि चूक हमारी।।

tāteṃ kachuka bāta anusārī। chamia debi bar̤i cūka hamārī॥

गूढ़ कपट प्रिय बचन सुनि तीय अधरबुधि रानि।

gūr̤ha kapaṭa priya bacana suni tīya adharabudhi rāni।

सुरमाया बस बैरिनिहि सुह्द जानि पतिआनि।।16।।

suramāyā basa bairinihi suhda jāni patiāni॥16॥

सादर पुनि पुनि पूँछति ओही। सबरी गान मृगी जनु मोही।।

sādara puni puni pū~chati ohī। sabarī gāna mṛgī janu mohī॥

तसि मति फिरी अहइ जसि भाबी। रहसी चेरि घात जनु फाबी।।

tasi mati phirī ahai jasi bhābī। rahasī ceri ghāta janu phābī॥

तुम्ह पूँछहु मैं कहत डेराऊँ। धरेउ मोर घरफोरी नाऊँ।।

tumha pū~chahu maiṃ kahata ḍerāū~। dhareu mora gharaphorī nāū~॥

सजि प्रतीति बहुबिधि गढ़ि छोली। अवध साढ़साती तब बोली।।

saji pratīti bahubidhi gar̤hi cholī। avadha sār̤hasātī taba bolī॥

प्रिय सिय रामु कहा तुम्ह रानी। रामहि तुम्ह प्रिय सो फुरि बानी।।

priya siya rāmu kahā tumha rānī। rāmahi tumha priya so phuri bānī॥

रहा प्रथम अब ते दिन बीते। समउ फिरें रिपु होहिं पिंरीते।।

rahā prathama aba te dina bīte। samau phireṃ ripu hohiṃ piṃrīte॥

भानु कमल कुल पोषनिहारा। बिनु जल जारि करइ सोइ छारा।।

bhānu kamala kula poṣanihārā। binu jala jāri karai soi chārā॥

जरि तुम्हारि चह सवति उखारी। रूँधहु करि उपाउ बर बारी।।

jari tumhāri caha savati ukhārī। rū~dhahu kari upāu bara bārī॥

तुम्हहि न सोचु सोहाग बल निज बस जानहु राउ।

tumhahi na socu sohāga bala nija basa jānahu rāu।

मन मलीन मुह मीठ नृप राउर सरल सुभाउ।।17।।

mana malīna muha mīṭha nṛpa rāura sarala subhāu॥17॥

चतुर गँभीर राम महतारी। बीचु पाइ निज बात सँवारी।।

catura ga~bhīra rāma mahatārī। bīcu pāi nija bāta sa~vārī॥

पठए भरतु भूप ननिअउरें। राम मातु मत जानव रउरें।।

paṭhae bharatu bhūpa naniaureṃ। rāma mātu mata jānava raureṃ॥

सेवहिं सकल सवति मोहि नीकें। गरबित भरत मातु बल पी कें।।

sevahiṃ sakala savati mohi nīkeṃ। garabita bharata mātu bala pī keṃ॥

सालु तुम्हार कौसिलहि माई। कपट चतुर नहिं होइ जनाई।।

sālu tumhāra kausilahi māī। kapaṭa catura nahiṃ hoi janāī॥

राजहि तुम्ह पर प्रेमु बिसेषी। सवति सुभाउ सकइ नहिं देखी।।

rājahi tumha para premu biseṣī। savati subhāu sakai nahiṃ dekhī॥

रची प्रंपचु भूपहि अपनाई। राम तिलक हित लगन धराई।।

racī praṃpacu bhūpahi apanāī। rāma tilaka hita lagana dharāī॥

यह कुल उचित राम कहुँ टीका। सबहि सोहाइ मोहि सुठि नीका।।

yaha kula ucita rāma kahu~ ṭīkā। sabahi sohāi mohi suṭhi nīkā॥

आगिलि बात समुझि डरु मोही। देउ दैउ फिरि सो फलु ओही।।

āgili bāta samujhi ḍaru mohī। deu daiu phiri so phalu ohī॥

रचि पचि कोटिक कुटिलपन कीन्हेसि कपट प्रबोधु।।

raci paci koṭika kuṭilapana kīnhesi kapaṭa prabodhu॥

कहिसि कथा सत सवति कै जेहि बिधि बाढ़ बिरोधु।।18।।

kahisi kathā sata savati kai jehi bidhi bār̤ha birodhu॥18॥

भावी बस प्रतीति उर आई। पूँछ रानि पुनि सपथ देवाई।।

bhāvī basa pratīti ura āī। pū~cha rāni puni sapatha devāī॥

का पूछहुँ तुम्ह अबहुँ न जाना। निज हित अनहित पसु पहिचाना।।

kā pūchahu~ tumha abahu~ na jānā। nija hita anahita pasu pahicānā॥

भयउ पाखु दिन सजत समाजू। तुम्ह पाई सुधि मोहि सन आजू।।

bhayau pākhu dina sajata samājū। tumha pāī sudhi mohi sana ājū॥

खाइअ पहिरिअ राज तुम्हारें। सत्य कहें नहिं दोषु हमारें।।

khāia pahiria rāja tumhāreṃ। satya kaheṃ nahiṃ doṣu hamāreṃ॥

जौं असत्य कछु कहब बनाई। तौ बिधि देइहि हमहि सजाई।।

jauṃ asatya kachu kahaba banāī। tau bidhi deihi hamahi sajāī॥

रामहि तिलक कालि जौं भयऊ। तुम्ह कहुँ बिपति बीजु बिधि बयऊ।।

rāmahi tilaka kāli jauṃ bhayaū। tumha kahu~ bipati bīju bidhi bayaū॥

रेख खँचाइ कहउँ बलु भाषी। भामिनि भइहु दूध कइ माखी।।

rekha kha~cāi kahau~ balu bhāṣī। bhāmini bhaihu dūdha kai mākhī॥

जौं सुत सहित करहु सेवकाई। तौ घर रहहु न आन उपाई।।

jauṃ suta sahita karahu sevakāī। tau ghara rahahu na āna upāī॥

कद्रूँ बिनतहि दीन्ह दुखु तुम्हहि कौसिलाँ देब।

kadrū~ binatahi dīnha dukhu tumhahi kausilā~ deba।

भरतु बंदिगृह सेइहहिं लखनु राम के नेब।।19।।

bharatu baṃdigṛha seihahiṃ lakhanu rāma ke neba॥19॥

कैकयसुता सुनत कटु बानी। कहि न सकइ कछु सहमि सुखानी।।

kaikayasutā sunata kaṭu bānī। kahi na sakai kachu sahami sukhānī॥

तन पसेउ कदली जिमि काँपी। कुबरीं दसन जीभ तब चाँपी।।

tana paseu kadalī jimi kā~pī। kubarīṃ dasana jībha taba cā~pī॥

कहि कहि कोटिक कपट कहानी। धीरजु धरहु प्रबोधिसि रानी।।

kahi kahi koṭika kapaṭa kahānī। dhīraju dharahu prabodhisi rānī॥

फिरा करमु प्रिय लागि कुचाली। बकिहि सराहइ मानि मराली।।

phirā karamu priya lāgi kucālī। bakihi sarāhai māni marālī॥

सुनु मंथरा बात फुरि तोरी। दहिनि आँखि नित फरकइ मोरी।।

sunu maṃtharā bāta phuri torī। dahini ā~khi nita pharakai morī॥

दिन प्रति देखउँ राति कुसपने। कहउँ न तोहि मोह बस अपने।।

dina prati dekhau~ rāti kusapane। kahau~ na tohi moha basa apane॥

काह करौ सखि सूध सुभाऊ। दाहिन बाम न जानउँ काऊ।।

kāha karau sakhi sūdha subhāū। dāhina bāma na jānau~ kāū॥

अपने चलत न आजु लगि अनभल काहुक कीन्ह।

apane calata na āju lagi anabhala kāhuka kīnha।

केहिं अघ एकहि बार मोहि दैअँ दुसह दुखु दीन्ह।।20।।

kehiṃ agha ekahi bāra mohi daia~ dusaha dukhu dīnha॥20॥

नैहर जनमु भरब बरु जाइ। जिअत न करबि सवति सेवकाई।।

naihara janamu bharaba baru jāi। jiata na karabi savati sevakāī॥

अरि बस दैउ जिआवत जाही। मरनु नीक तेहि जीवन चाही।।

ari basa daiu jiāvata jāhī। maranu nīka tehi jīvana cāhī॥

दीन बचन कह बहुबिधि रानी। सुनि कुबरीं तियमाया ठानी।।

dīna bacana kaha bahubidhi rānī। suni kubarīṃ tiyamāyā ṭhānī॥

अस कस कहहु मानि मन ऊना। सुखु सोहागु तुम्ह कहुँ दिन दूना।।

asa kasa kahahu māni mana ūnā। sukhu sohāgu tumha kahu~ dina dūnā॥

जेहिं राउर अति अनभल ताका। सोइ पाइहि यहु फलु परिपाका।।

jehiṃ rāura ati anabhala tākā। soi pāihi yahu phalu paripākā॥

जब तें कुमत सुना मैं स्वामिनि। भूख न बासर नींद न जामिनि।।

jaba teṃ kumata sunā maiṃ svāmini। bhūkha na bāsara nīṃda na jāmini॥

पूँछेउ गुनिन्ह रेख तिन्ह खाँची। भरत भुआल होहिं यह साँची।।

pū~cheu guninha rekha tinha khā~cī। bharata bhuāla hohiṃ yaha sā~cī॥

भामिनि करहु त कहौं उपाऊ। है तुम्हरीं सेवा बस राऊ।।

bhāmini karahu ta kahauṃ upāū। hai tumharīṃ sevā basa rāū॥

परउँ कूप तुअ बचन पर सकउँ पूत पति त्यागि।

parau~ kūpa tua bacana para sakau~ pūta pati tyāgi।

कहसि मोर दुखु देखि बड़ कस न करब हित लागि।।21।।

kahasi mora dukhu dekhi bar̤a kasa na karaba hita lāgi॥21॥

कुबरीं करि कबुली कैकेई। कपट छुरी उर पाहन टेई।।

kubarīṃ kari kabulī kaikeī। kapaṭa churī ura pāhana ṭeī॥

लखइ न रानि निकट दुखु कैंसे। चरइ हरित तिन बलिपसु जैसें।।

lakhai na rāni nikaṭa dukhu kaiṃse। carai harita tina balipasu jaiseṃ॥

सुनत बात मृदु अंत कठोरी। देति मनहुँ मधु माहुर घोरी।।

sunata bāta mṛdu aṃta kaṭhorī। deti manahu~ madhu māhura ghorī॥

कहइ चेरि सुधि अहइ कि नाही। स्वामिनि कहिहु कथा मोहि पाहीं।।

kahai ceri sudhi ahai ki nāhī। svāmini kahihu kathā mohi pāhīṃ॥

दुइ बरदान भूप सन थाती। मागहु आजु जुड़ावहु छाती।।

dui baradāna bhūpa sana thātī। māgahu āju jur̤āvahu chātī॥

सुतहि राजु रामहि बनवासू। देहु लेहु सब सवति हुलासु।।

sutahi rāju rāmahi banavāsū। dehu lehu saba savati hulāsu॥

भूपति राम सपथ जब करई। तब मागेहु जेहिं बचनु न टरई।।

bhūpati rāma sapatha jaba karaī। taba māgehu jehiṃ bacanu na ṭaraī॥

होइ अकाजु आजु निसि बीतें। बचनु मोर प्रिय मानेहु जी तें।।

hoi akāju āju nisi bīteṃ। bacanu mora priya mānehu jī teṃ॥

बड़ कुघातु करि पातकिनि कहेसि कोपगृहँ जाहु।

bar̤a kughātu kari pātakini kahesi kopagṛha~ jāhu।

काजु सँवारेहु सजग सबु सहसा जनि पतिआहु।।22।।

kāju sa~vārehu sajaga sabu sahasā jani patiāhu॥22॥

कुबरिहि रानि प्रानप्रिय जानी। बार बार बड़ि बुद्धि बखानी।।

kubarihi rāni prānapriya jānī। bāra bāra bar̤i buddhi bakhānī॥

तोहि सम हित न मोर संसारा। बहे जात कइ भइसि अधारा।।

tohi sama hita na mora saṃsārā। bahe jāta kai bhaisi adhārā॥

जौं बिधि पुरब मनोरथु काली। करौं तोहि चख पूतरि आली।।

jauṃ bidhi puraba manorathu kālī। karauṃ tohi cakha pūtari ālī॥

बहुबिधि चेरिहि आदरु देई। कोपभवन गवनि कैकेई।।

bahubidhi cerihi ādaru deī। kopabhavana gavani kaikeī॥

बिपति बीजु बरषा रितु चेरी। भुइँ भइ कुमति कैकेई केरी।।

bipati bīju baraṣā ritu cerī। bhui~ bhai kumati kaikeī kerī॥

पाइ कपट जलु अंकुर जामा। बर दोउ दल दुख फल परिनामा।।

pāi kapaṭa jalu aṃkura jāmā। bara dou dala dukha phala parināmā॥

कोप समाजु साजि सबु सोई। राजु करत निज कुमति बिगोई।।

kopa samāju sāji sabu soī। rāju karata nija kumati bigoī॥

राउर नगर कोलाहलु होई। यह कुचालि कछु जान न कोई।।

rāura nagara kolāhalu hoī। yaha kucāli kachu jāna na koī॥

प्रमुदित पुर नर नारि। सब सजहिं सुमंगलचार।

pramudita pura nara nāri। saba sajahiṃ sumaṃgalacāra।

एक प्रबिसहिं एक निर्गमहिं भीर भूप दरबार।।23।।

eka prabisahiṃ eka nirgamahiṃ bhīra bhūpa darabāra॥23॥

बाल सखा सुन हियँ हरषाहीं। मिलि दस पाँच राम पहिं जाहीं।।

bāla sakhā suna hiya~ haraṣāhīṃ। mili dasa pā~ca rāma pahiṃ jāhīṃ॥

प्रभु आदरहिं प्रेमु पहिचानी। पूँछहिं कुसल खेम मृदु बानी।।

prabhu ādarahiṃ premu pahicānī। pū~chahiṃ kusala khema mṛdu bānī॥

फिरहिं भवन प्रिय आयसु पाई। करत परसपर राम बड़ाई।।

phirahiṃ bhavana priya āyasu pāī। karata parasapara rāma bar̤āī॥

को रघुबीर सरिस संसारा। सीलु सनेह निबाहनिहारा।

ko raghubīra sarisa saṃsārā। sīlu saneha nibāhanihārā।

जेंहि जेंहि जोनि करम बस भ्रमहीं। तहँ तहँ ईसु देउ यह हमहीं।।

jeṃhi jeṃhi joni karama basa bhramahīṃ। taha~ taha~ īsu deu yaha hamahīṃ॥

सेवक हम स्वामी सियनाहू। होउ नात यह ओर निबाहू।।

sevaka hama svāmī siyanāhū। hou nāta yaha ora nibāhū॥

अस अभिलाषु नगर सब काहू। कैकयसुता ह्दयँ अति दाहू।।

asa abhilāṣu nagara saba kāhū। kaikayasutā hdaya~ ati dāhū॥

को न कुसंगति पाइ नसाई। रहइ न नीच मतें चतुराई।।

ko na kusaṃgati pāi nasāī। rahai na nīca mateṃ caturāī॥

साँस समय सानंद नृपु गयउ कैकेई गेहँ।

sā~sa samaya sānaṃda nṛpu gayau kaikeī geha~।

गवनु निठुरता निकट किय जनु धरि देह सनेहँ।।24।।

gavanu niṭhuratā nikaṭa kiya janu dhari deha saneha~॥24॥

कोपभवन सुनि सकुचेउ राउ। भय बस अगहुड़ परइ न पाऊ।।

kopabhavana suni sakuceu rāu। bhaya basa agahur̤a parai na pāū॥

सुरपति बसइ बाहँबल जाके। नरपति सकल रहहिं रुख ताकें।।

surapati basai bāha~bala jāke। narapati sakala rahahiṃ rukha tākeṃ॥

सो सुनि तिय रिस गयउ सुखाई। देखहु काम प्रताप बड़ाई।।

so suni tiya risa gayau sukhāī। dekhahu kāma pratāpa bar̤āī॥

सूल कुलिस असि अँगवनिहारे। ते रतिनाथ सुमन सर मारे।।

sūla kulisa asi a~gavanihāre। te ratinātha sumana sara māre॥

सभय नरेसु प्रिया पहिं गयऊ। देखि दसा दुखु दारुन भयऊ।।

sabhaya naresu priyā pahiṃ gayaū। dekhi dasā dukhu dāruna bhayaū॥

भूमि सयन पटु मोट पुराना। दिए डारि तन भूषण नाना।।

bhūmi sayana paṭu moṭa purānā। die ḍāri tana bhūṣaṇa nānā॥

कुमतिहि कसि कुबेषता फाबी। अन अहिवातु सूच जनु भाबी।।

kumatihi kasi kubeṣatā phābī। ana ahivātu sūca janu bhābī॥

जाइ निकट नृपु कह मृदु बानी। प्रानप्रिया केहि हेतु रिसानी।।

jāi nikaṭa nṛpu kaha mṛdu bānī। prānapriyā kehi hetu risānī॥

केहि हेतु रानि रिसानि परसत पानि पतिहि नेवारई।

kehi hetu rāni risāni parasata pāni patihi nevāraī।

मानहुँ सरोष भुअंग भामिनि बिषम भाँति निहारई।।

mānahu~ saroṣa bhuaṃga bhāmini biṣama bhā~ti nihāraī॥

दोउ बासना रसना दसन बर मरम ठाहरु देखई।

dou bāsanā rasanā dasana bara marama ṭhāharu dekhaī।

तुलसी नृपति भवतब्यता बस काम कौतुक लेखई।।

tulasī nṛpati bhavatabyatā basa kāma kautuka lekhaī॥

बार बार कह राउ सुमुखि सुलोचिनि पिकबचनि।

bāra bāra kaha rāu sumukhi sulocini pikabacani।

कारन मोहि सुनाउ गजगामिनि निज कोप कर।।25।।

kārana mohi sunāu gajagāmini nija kopa kara॥25॥

अनहित तोर प्रिया केइँ कीन्हा। केहि दुइ सिर केहि जमु चह लीन्हा।।

anahita tora priyā kei~ kīnhā। kehi dui sira kehi jamu caha līnhā॥

कहु केहि रंकहि करौ नरेसू। कहु केहि नृपहि निकासौं देसू।।

kahu kehi raṃkahi karau naresū। kahu kehi nṛpahi nikāsauṃ desū॥

सकउँ तोर अरि अमरउ मारी। काह कीट बपुरे नर नारी।।

sakau~ tora ari amarau mārī। kāha kīṭa bapure nara nārī॥

जानसि मोर सुभाउ बरोरू। मनु तव आनन चंद चकोरू।।

jānasi mora subhāu barorū। manu tava ānana caṃda cakorū॥

प्रिया प्रान सुत सरबसु मोरें। परिजन प्रजा सकल बस तोरें।।

priyā prāna suta sarabasu moreṃ। parijana prajā sakala basa toreṃ॥

जौं कछु कहौ कपटु करि तोही। भामिनि राम सपथ सत मोही।।

jauṃ kachu kahau kapaṭu kari tohī। bhāmini rāma sapatha sata mohī॥

बिहसि मागु मनभावति बाता। भूषन सजहि मनोहर गाता।।

bihasi māgu manabhāvati bātā। bhūṣana sajahi manohara gātā॥

घरी कुघरी समुझि जियँ देखू। बेगि प्रिया परिहरहि कुबेषू।।

gharī kugharī samujhi jiya~ dekhū। begi priyā pariharahi kubeṣū॥

यह सुनि मन गुनि सपथ बड़ि बिहसि उठी मतिमंद।

yaha suni mana guni sapatha bar̤i bihasi uṭhī matimaṃda।

भूषन सजति बिलोकि मृगु मनहुँ किरातिनि फंद।।26।।

bhūṣana sajati biloki mṛgu manahu~ kirātini phaṃda॥26॥

पुनि कह राउ सुह्रद जियँ जानी। प्रेम पुलकि मृदु मंजुल बानी।।

puni kaha rāu suhrada jiya~ jānī। prema pulaki mṛdu maṃjula bānī॥

भामिनि भयउ तोर मनभावा। घर घर नगर अनंद बधावा।।

bhāmini bhayau tora manabhāvā। ghara ghara nagara anaṃda badhāvā॥

रामहि देउँ कालि जुबराजू। सजहि सुलोचनि मंगल साजू।।

rāmahi deu~ kāli jubarājū। sajahi sulocani maṃgala sājū॥

दलकि उठेउ सुनि ह्रदउ कठोरू। जनु छुइ गयउ पाक बरतोरू।।

dalaki uṭheu suni hradau kaṭhorū। janu chui gayau pāka baratorū॥

ऐसिउ पीर बिहसि तेहि गोई। चोर नारि जिमि प्रगटि न रोई।।

aisiu pīra bihasi tehi goī। cora nāri jimi pragaṭi na roī॥

लखहिं न भूप कपट चतुराई। कोटि कुटिल मनि गुरू पढ़ाई।।

lakhahiṃ na bhūpa kapaṭa caturāī। koṭi kuṭila mani gurū par̤hāī॥

जद्यपि नीति निपुन नरनाहू। नारिचरित जलनिधि अवगाहू।।

jadyapi nīti nipuna naranāhū। nāricarita jalanidhi avagāhū॥

कपट सनेहु बढ़ाइ बहोरी। बोली बिहसि नयन मुहु मोरी।।

kapaṭa sanehu bar̤hāi bahorī। bolī bihasi nayana muhu morī॥

मागु मागु पै कहहु पिय कबहुँ न देहु न लेहु।

māgu māgu pai kahahu piya kabahu~ na dehu na lehu।

देन कहेहु बरदान दुइ तेउ पावत संदेहु।।27।।

dena kahehu baradāna dui teu pāvata saṃdehu॥27॥

जानेउँ मरमु राउ हँसि कहई। तुम्हहि कोहाब परम प्रिय अहई।।

jāneu~ maramu rāu ha~si kahaī। tumhahi kohāba parama priya ahaī॥

थाति राखि न मागिहु काऊ। बिसरि गयउ मोहि भोर सुभाऊ।।

thāti rākhi na māgihu kāū। bisari gayau mohi bhora subhāū॥

झूठेहुँ हमहि दोषु जनि देहू। दुइ कै चारि मागि मकु लेहू।।

jhūṭhehu~ hamahi doṣu jani dehū। dui kai cāri māgi maku lehū॥

रघुकुल रीति सदा चलि आई। प्रान जाहुँ बरु बचनु न जाई।।

raghukula rīti sadā cali āī। prāna jāhu~ baru bacanu na jāī॥

नहिं असत्य सम पातक पुंजा। गिरि सम होहिं कि कोटिक गुंजा।।

nahiṃ asatya sama pātaka puṃjā। giri sama hohiṃ ki koṭika guṃjā॥

सत्यमूल सब सुकृत सुहाए। बेद पुरान बिदित मनु गाए।।

satyamūla saba sukṛta suhāe। beda purāna bidita manu gāe॥

तेहि पर राम सपथ करि आई। सुकृत सनेह अवधि रघुराई।।

tehi para rāma sapatha kari āī। sukṛta saneha avadhi raghurāī॥

बात दृढ़ाइ कुमति हँसि बोली। कुमत कुबिहग कुलह जनु खोली।।

bāta dṛr̤hāi kumati ha~si bolī। kumata kubihaga kulaha janu kholī॥

भूप मनोरथ सुभग बनु सुख सुबिहंग समाजु।

bhūpa manoratha subhaga banu sukha subihaṃga samāju।

भिल्लनि जिमि छाड़न चहति बचनु भयंकरु बाजु।।28।।

bhillani jimi chār̤ana cahati bacanu bhayaṃkaru bāju॥28॥

सुनहु प्रानप्रिय भावत जी का। देहु एक बर भरतहि टीका।।

sunahu prānapriya bhāvata jī kā। dehu eka bara bharatahi ṭīkā॥

मागउँ दूसर बर कर जोरी। पुरवहु नाथ मनोरथ मोरी।।

māgau~ dūsara bara kara jorī। puravahu nātha manoratha morī॥

तापस बेष बिसेषि उदासी। चौदह बरिस रामु बनबासी।।

tāpasa beṣa biseṣi udāsī। caudaha barisa rāmu banabāsī॥

सुनि मृदु बचन भूप हियँ सोकू। ससि कर छुअत बिकल जिमि कोकू।।

suni mṛdu bacana bhūpa hiya~ sokū। sasi kara chuata bikala jimi kokū॥

गयउ सहमि नहिं कछु कहि आवा। जनु सचान बन झपटेउ लावा।।

gayau sahami nahiṃ kachu kahi āvā। janu sacāna bana jhapaṭeu lāvā॥

बिबरन भयउ निपट नरपालू। दामिनि हनेउ मनहुँ तरु तालू।।

bibarana bhayau nipaṭa narapālū। dāmini haneu manahu~ taru tālū॥

माथे हाथ मूदि दोउ लोचन। तनु धरि सोचु लाग जनु सोचन।।

māthe hātha mūdi dou locana। tanu dhari socu lāga janu socana॥

मोर मनोरथु सुरतरु फूला। फरत करिनि जिमि हतेउ समूला।।

mora manorathu surataru phūlā। pharata karini jimi hateu samūlā॥

अवध उजारि कीन्हि कैकेईं। दीन्हसि अचल बिपति कै नेईं।।

avadha ujāri kīnhi kaikeīṃ। dīnhasi acala bipati kai neīṃ॥

कवनें अवसर का भयउ गयउँ नारि बिस्वास।

kavaneṃ avasara kā bhayau gayau~ nāri bisvāsa।

जोग सिद्धि फल समय जिमि जतिहि अबिद्या नास।।29।।

joga siddhi phala samaya jimi jatihi abidyā nāsa॥29॥

एहि बिधि राउ मनहिं मन झाँखा। देखि कुभाँति कुमति मन माखा।।

ehi bidhi rāu manahiṃ mana jhā~khā। dekhi kubhā~ti kumati mana mākhā॥

भरतु कि राउर पूत न होहीं। आनेहु मोल बेसाहि कि मोही।।

bharatu ki rāura pūta na hohīṃ। ānehu mola besāhi ki mohī॥

जो सुनि सरु अस लाग तुम्हारें। काहे न बोलहु बचनु सँभारे।।

jo suni saru asa lāga tumhāreṃ। kāhe na bolahu bacanu sa~bhāre॥

देहु उतरु अनु करहु कि नाहीं। सत्यसंध तुम्ह रघुकुल माहीं।।

dehu utaru anu karahu ki nāhīṃ। satyasaṃdha tumha raghukula māhīṃ॥

देन कहेहु अब जनि बरु देहू। तजहुँ सत्य जग अपजसु लेहू।।

dena kahehu aba jani baru dehū। tajahu~ satya jaga apajasu lehū॥

सत्य सराहि कहेहु बरु देना। जानेहु लेइहि मागि चबेना।।

satya sarāhi kahehu baru denā। jānehu leihi māgi cabenā॥

सिबि दधीचि बलि जो कछु भाषा। तनु धनु तजेउ बचन पनु राखा।।

sibi dadhīci bali jo kachu bhāṣā। tanu dhanu tajeu bacana panu rākhā॥

अति कटु बचन कहति कैकेई। मानहुँ लोन जरे पर देई।।

ati kaṭu bacana kahati kaikeī। mānahu~ lona jare para deī॥

धरम धुरंधर धीर धरि नयन उघारे रायँ।

dharama dhuraṃdhara dhīra dhari nayana ughāre rāya~।

सिरु धुनि लीन्हि उसास असि मारेसि मोहि कुठायँ।।30।।

siru dhuni līnhi usāsa asi māresi mohi kuṭhāya~॥30॥

आगें दीखि जरत रिस भारी। मनहुँ रोष तरवारि उघारी।।

āgeṃ dīkhi jarata risa bhārī। manahu~ roṣa taravāri ughārī॥

मूठि कुबुद्धि धार निठुराई। धरी कूबरीं सान बनाई।।

mūṭhi kubuddhi dhāra niṭhurāī। dharī kūbarīṃ sāna banāī॥

लखी महीप कराल कठोरा। सत्य कि जीवनु लेइहि मोरा।।

lakhī mahīpa karāla kaṭhorā। satya ki jīvanu leihi morā॥

बोले राउ कठिन करि छाती। बानी सबिनय तासु सोहाती।।

bole rāu kaṭhina kari chātī। bānī sabinaya tāsu sohātī॥

प्रिया बचन कस कहसि कुभाँती। भीर प्रतीति प्रीति करि हाँती।।

priyā bacana kasa kahasi kubhā~tī। bhīra pratīti prīti kari hā~tī॥

मोरें भरतु रामु दुइ आँखी। सत्य कहउँ करि संकरू साखी।।

moreṃ bharatu rāmu dui ā~khī। satya kahau~ kari saṃkarū sākhī॥

अवसि दूतु मैं पठइब प्राता। ऐहहिं बेगि सुनत दोउ भ्राता।।

avasi dūtu maiṃ paṭhaiba prātā। aihahiṃ begi sunata dou bhrātā॥

सुदिन सोधि सबु साजु सजाई। देउँ भरत कहुँ राजु बजाई।।

sudina sodhi sabu sāju sajāī। deu~ bharata kahu~ rāju bajāī॥

लोभु न रामहि राजु कर बहुत भरत पर प्रीति।

lobhu na rāmahi rāju kara bahuta bharata para prīti।

मैं बड़ छोट बिचारि जियँ करत रहेउँ नृपनीति।।31।।

maiṃ bar̤a choṭa bicāri jiya~ karata raheu~ nṛpanīti॥31॥

राम सपथ सत कहुउँ सुभाऊ। राममातु कछु कहेउ न काऊ।।

rāma sapatha sata kahuu~ subhāū। rāmamātu kachu kaheu na kāū॥

मैं सबु कीन्ह तोहि बिनु पूँछें। तेहि तें परेउ मनोरथु छूछें।।

maiṃ sabu kīnha tohi binu pū~cheṃ। tehi teṃ pareu manorathu chūcheṃ॥

रिस परिहरू अब मंगल साजू। कछु दिन गएँ भरत जुबराजू।।

risa pariharū aba maṃgala sājū। kachu dina gae~ bharata jubarājū॥

एकहि बात मोहि दुखु लागा। बर दूसर असमंजस मागा।।

ekahi bāta mohi dukhu lāgā। bara dūsara asamaṃjasa māgā॥

अजहुँ हृदय जरत तेहि आँचा। रिस परिहास कि साँचेहुँ साँचा।।

ajahu~ hṛdaya jarata tehi ā~cā। risa parihāsa ki sā~cehu~ sā~cā॥

कहु तजि रोषु राम अपराधू। सबु कोउ कहइ रामु सुठि साधू।।

kahu taji roṣu rāma aparādhū। sabu kou kahai rāmu suṭhi sādhū॥

तुहूँ सराहसि करसि सनेहू। अब सुनि मोहि भयउ संदेहू।।

tuhū~ sarāhasi karasi sanehū। aba suni mohi bhayau saṃdehū॥

जासु सुभाउ अरिहि अनुकूला। सो किमि करिहि मातु प्रतिकूला।।

jāsu subhāu arihi anukūlā। so kimi karihi mātu pratikūlā॥

प्रिया हास रिस परिहरहि मागु बिचारि बिबेकु।

priyā hāsa risa pariharahi māgu bicāri bibeku।

जेहिं देखाँ अब नयन भरि भरत राज अभिषेकु।।32।।

jehiṃ dekhā~ aba nayana bhari bharata rāja abhiṣeku॥32॥

जिऐ मीन बरू बारि बिहीना। मनि बिनु फनिकु जिऐ दुख दीना।।

jiai mīna barū bāri bihīnā। mani binu phaniku jiai dukha dīnā॥

कहउँ सुभाउ न छलु मन माहीं। जीवनु मोर राम बिनु नाहीं।।

kahau~ subhāu na chalu mana māhīṃ। jīvanu mora rāma binu nāhīṃ॥

समुझि देखु जियँ प्रिया प्रबीना। जीवनु राम दरस आधीना।।

samujhi dekhu jiya~ priyā prabīnā। jīvanu rāma darasa ādhīnā॥

सुनि म्रदु बचन कुमति अति जरई। मनहुँ अनल आहुति घृत परई।।

suni mradu bacana kumati ati jaraī। manahu~ anala āhuti ghṛta paraī॥

कहइ करहु किन कोटि उपाया। इहाँ न लागिहि राउरि माया।।

kahai karahu kina koṭi upāyā। ihā~ na lāgihi rāuri māyā॥

देहु कि लेहु अजसु करि नाहीं। मोहि न बहुत प्रपंच सोहाहीं।

dehu ki lehu ajasu kari nāhīṃ। mohi na bahuta prapaṃca sohāhīṃ।

रामु साधु तुम्ह साधु सयाने। राममातु भलि सब पहिचाने।।

rāmu sādhu tumha sādhu sayāne। rāmamātu bhali saba pahicāne॥

जस कौसिलाँ मोर भल ताका। तस फलु उन्हहि देउँ करि साका।।

jasa kausilā~ mora bhala tākā। tasa phalu unhahi deu~ kari sākā॥

होत प्रात मुनिबेष धरि जौं न रामु बन जाहिं।

hota prāta munibeṣa dhari jauṃ na rāmu bana jāhiṃ।

मोर मरनु राउर अजस नृप समुझिअ मन माहिं।।33।।

mora maranu rāura ajasa nṛpa samujhia mana māhiṃ॥33॥

अस कहि कुटिल भई उठि ठाढ़ी। मानहुँ रोष तरंगिनि बाढ़ी।।

asa kahi kuṭila bhaī uṭhi ṭhār̤hī। mānahu~ roṣa taraṃgini bār̤hī॥

पाप पहार प्रगट भइ सोई। भरी क्रोध जल जाइ न जोई।।

pāpa pahāra pragaṭa bhai soī। bharī krodha jala jāi na joī॥

दोउ बर कूल कठिन हठ धारा। भवँर कूबरी बचन प्रचारा।।

dou bara kūla kaṭhina haṭha dhārā। bhava~ra kūbarī bacana pracārā॥

ढाहत भूपरूप तरु मूला। चली बिपति बारिधि अनुकूला।।

ḍhāhata bhūparūpa taru mūlā। calī bipati bāridhi anukūlā॥

लखी नरेस बात फुरि साँची। तिय मिस मीचु सीस पर नाची।।

lakhī naresa bāta phuri sā~cī। tiya misa mīcu sīsa para nācī॥

गहि पद बिनय कीन्ह बैठारी। जनि दिनकर कुल होसि कुठारी।।

gahi pada binaya kīnha baiṭhārī। jani dinakara kula hosi kuṭhārī॥

मागु माथ अबहीं देउँ तोही। राम बिरहँ जनि मारसि मोही।।

māgu mātha abahīṃ deu~ tohī। rāma biraha~ jani mārasi mohī॥

राखु राम कहुँ जेहि तेहि भाँती। नाहिं त जरिहि जनम भरि छाती।।

rākhu rāma kahu~ jehi tehi bhā~tī। nāhiṃ ta jarihi janama bhari chātī॥

देखी ब्याधि असाध नृपु परेउ धरनि धुनि माथ।

dekhī byādhi asādha nṛpu pareu dharani dhuni mātha।

कहत परम आरत बचन राम राम रघुनाथ।।34।।

kahata parama ārata bacana rāma rāma raghunātha॥34॥

ब्याकुल राउ सिथिल सब गाता। करिनि कलपतरु मनहुँ निपाता।।

byākula rāu sithila saba gātā। karini kalapataru manahu~ nipātā॥

कंठु सूख मुख आव न बानी। जनु पाठीनु दीन बिनु पानी।।

kaṃṭhu sūkha mukha āva na bānī। janu pāṭhīnu dīna binu pānī॥

पुनि कह कटु कठोर कैकेई। मनहुँ घाय महुँ माहुर देई।।

puni kaha kaṭu kaṭhora kaikeī। manahu~ ghāya mahu~ māhura deī॥

जौं अंतहुँ अस करतबु रहेऊ। मागु मागु तुम्ह केहिं बल कहेऊ।।

jauṃ aṃtahu~ asa karatabu raheū। māgu māgu tumha kehiṃ bala kaheū॥

दुइ कि होइ एक समय भुआला। हँसब ठठाइ फुलाउब गाला।।

dui ki hoi eka samaya bhuālā। ha~saba ṭhaṭhāi phulāuba gālā॥

दानि कहाउब अरु कृपनाई। होइ कि खेम कुसल रौताई।।

dāni kahāuba aru kṛpanāī। hoi ki khema kusala rautāī॥

छाड़हु बचनु कि धीरजु धरहू। जनि अबला जिमि करुना करहू।।

chār̤ahu bacanu ki dhīraju dharahū। jani abalā jimi karunā karahū॥

तनु तिय तनय धामु धनु धरनी। सत्यसंध कहुँ तृन सम बरनी।।

tanu tiya tanaya dhāmu dhanu dharanī। satyasaṃdha kahu~ tṛna sama baranī॥

मरम बचन सुनि राउ कह कहु कछु दोषु न तोर।

marama bacana suni rāu kaha kahu kachu doṣu na tora।

लागेउ तोहि पिसाच जिमि कालु कहावत मोर।।35।।

lāgeu tohi pisāca jimi kālu kahāvata mora॥35॥

चहत न भरत भूपतहि भोरें। बिधि बस कुमति बसी जिय तोरें।।

cahata na bharata bhūpatahi bhoreṃ। bidhi basa kumati basī jiya toreṃ॥

सो सबु मोर पाप परिनामू। भयउ कुठाहर जेहिं बिधि बामू।।

so sabu mora pāpa parināmū। bhayau kuṭhāhara jehiṃ bidhi bāmū॥

सुबस बसिहि फिरि अवध सुहाई। सब गुन धाम राम प्रभुताई।।

subasa basihi phiri avadha suhāī। saba guna dhāma rāma prabhutāī॥

करिहहिं भाइ सकल सेवकाई। होइहि तिहुँ पुर राम बड़ाई।।

karihahiṃ bhāi sakala sevakāī। hoihi tihu~ pura rāma bar̤āī॥

तोर कलंकु मोर पछिताऊ। मुएहुँ न मिटहि न जाइहि काऊ।।

tora kalaṃku mora pachitāū। muehu~ na miṭahi na jāihi kāū॥

अब तोहि नीक लाग करु सोई। लोचन ओट बैठु मुहु गोई।।

aba tohi nīka lāga karu soī। locana oṭa baiṭhu muhu goī॥

जब लगि जिऔं कहउँ कर जोरी। तब लगि जनि कछु कहसि बहोरी।।

jaba lagi jiauṃ kahau~ kara jorī। taba lagi jani kachu kahasi bahorī॥

फिरि पछितैहसि अंत अभागी। मारसि गाइ नहारु लागी।।

phiri pachitaihasi aṃta abhāgī। mārasi gāi nahāru lāgī॥

परेउ राउ कहि कोटि बिधि काहे करसि निदानु।

pareu rāu kahi koṭi bidhi kāhe karasi nidānu।

कपट सयानि न कहति कछु जागति मनहुँ मसानु।।36।।

kapaṭa sayāni na kahati kachu jāgati manahu~ masānu॥36॥

राम राम रट बिकल भुआलू। जनु बिनु पंख बिहंग बेहालू।।

rāma rāma raṭa bikala bhuālū। janu binu paṃkha bihaṃga behālū॥

हृदयँ मनाव भोरु जनि होई। रामहि जाइ कहै जनि कोई।।

hṛdaya~ manāva bhoru jani hoī। rāmahi jāi kahai jani koī॥

उदउ करहु जनि रबि रघुकुल गुर। अवध बिलोकि सूल होइहि उर।।

udau karahu jani rabi raghukula gura। avadha biloki sūla hoihi ura॥

भूप प्रीति कैकइ कठिनाई। उभय अवधि बिधि रची बनाई।।

bhūpa prīti kaikai kaṭhināī। ubhaya avadhi bidhi racī banāī॥

बिलपत नृपहि भयउ भिनुसारा। बीना बेनु संख धुनि द्वारा।।

bilapata nṛpahi bhayau bhinusārā। bīnā benu saṃkha dhuni dvārā॥

पढ़हिं भाट गुन गावहिं गायक। सुनत नृपहि जनु लागहिं सायक।।

par̤hahiṃ bhāṭa guna gāvahiṃ gāyaka। sunata nṛpahi janu lāgahiṃ sāyaka॥

मंगल सकल सोहाहिं न कैसें। सहगामिनिहि बिभूषन जैसें।।

maṃgala sakala sohāhiṃ na kaiseṃ। sahagāminihi bibhūṣana jaiseṃ॥

तेहिं निसि नीद परी नहि काहू। राम दरस लालसा उछाहू।।

tehiṃ nisi nīda parī nahi kāhū। rāma darasa lālasā uchāhū॥

द्वार भीर सेवक सचिव कहहिं उदित रबि देखि।

dvāra bhīra sevaka saciva kahahiṃ udita rabi dekhi।

जागेउ अजहुँ न अवधपति कारनु कवनु बिसेषि।।37।।

jāgeu ajahu~ na avadhapati kāranu kavanu biseṣi॥37॥

पछिले पहर भूपु नित जागा। आजु हमहि बड़ अचरजु लागा।।

pachile pahara bhūpu nita jāgā। āju hamahi bar̤a acaraju lāgā॥

जाहु सुमंत्र जगावहु जाई। कीजिअ काजु रजायसु पाई।।

jāhu sumaṃtra jagāvahu jāī। kījia kāju rajāyasu pāī॥

गए सुमंत्रु तब राउर माही। देखि भयावन जात डेराहीं।।

gae sumaṃtru taba rāura māhī। dekhi bhayāvana jāta ḍerāhīṃ॥

धाइ खाइ जनु जाइ न हेरा। मानहुँ बिपति बिषाद बसेरा।।

dhāi khāi janu jāi na herā। mānahu~ bipati biṣāda baserā॥

पूछें कोउ न ऊतरु देई। गए जेंहिं भवन भूप कैकैई।।

pūcheṃ kou na ūtaru deī। gae jeṃhiṃ bhavana bhūpa kaikaiī॥

कहि जयजीव बैठ सिरु नाई। दैखि भूप गति गयउ सुखाई।।

kahi jayajīva baiṭha siru nāī। daikhi bhūpa gati gayau sukhāī॥

सोच बिकल बिबरन महि परेऊ। मानहुँ कमल मूलु परिहरेऊ।।

soca bikala bibarana mahi pareū। mānahu~ kamala mūlu parihareū॥

सचिउ सभीत सकइ नहिं पूँछी। बोली असुभ भरी सुभ छूछी।।

saciu sabhīta sakai nahiṃ pū~chī। bolī asubha bharī subha chūchī॥

परी न राजहि नीद निसि हेतु जान जगदीसु।

parī na rājahi nīda nisi hetu jāna jagadīsu।

रामु रामु रटि भोरु किय कहइ न मरमु महीसु।।38।।

rāmu rāmu raṭi bhoru kiya kahai na maramu mahīsu॥38॥

आनहु रामहि बेगि बोलाई। समाचार तब पूँछेहु आई।।

ānahu rāmahi begi bolāī। samācāra taba pū~chehu āī॥

चलेउ सुमंत्र राय रूख जानी। लखी कुचालि कीन्हि कछु रानी।।

caleu sumaṃtra rāya rūkha jānī। lakhī kucāli kīnhi kachu rānī॥

सोच बिकल मग परइ न पाऊ। रामहि बोलि कहिहि का राऊ।।

soca bikala maga parai na pāū। rāmahi boli kahihi kā rāū॥

उर धरि धीरजु गयउ दुआरें। पूछँहिं सकल देखि मनु मारें।।

ura dhari dhīraju gayau duāreṃ। pūcha~hiṃ sakala dekhi manu māreṃ॥

समाधानु करि सो सबही का। गयउ जहाँ दिनकर कुल टीका।।

samādhānu kari so sabahī kā। gayau jahā~ dinakara kula ṭīkā॥

रामु सुमंत्रहि आवत देखा। आदरु कीन्ह पिता सम लेखा।।

rāmu sumaṃtrahi āvata dekhā। ādaru kīnha pitā sama lekhā॥

निरखि बदनु कहि भूप रजाई। रघुकुलदीपहि चलेउ लेवाई।।

nirakhi badanu kahi bhūpa rajāī। raghukuladīpahi caleu levāī॥

रामु कुभाँति सचिव सँग जाहीं। देखि लोग जहँ तहँ बिलखाहीं।।

rāmu kubhā~ti saciva sa~ga jāhīṃ। dekhi loga jaha~ taha~ bilakhāhīṃ॥

जाइ दीख रघुबंसमनि नरपति निपट कुसाजु।।

jāi dīkha raghubaṃsamani narapati nipaṭa kusāju॥

सहमि परेउ लखि सिंघिनिहि मनहुँ बृद्ध गजराजु।।39।।

sahami pareu lakhi siṃghinihi manahu~ bṛddha gajarāju॥39॥

सूखहिं अधर जरइ सबु अंगू। मनहुँ दीन मनिहीन भुअंगू।।

sūkhahiṃ adhara jarai sabu aṃgū। manahu~ dīna manihīna bhuaṃgū॥

सरुष समीप दीखि कैकेई। मानहुँ मीचु घरी गनि लेई।।

saruṣa samīpa dīkhi kaikeī। mānahu~ mīcu gharī gani leī॥

करुनामय मृदु राम सुभाऊ। प्रथम दीख दुखु सुना न काऊ।।

karunāmaya mṛdu rāma subhāū। prathama dīkha dukhu sunā na kāū॥

तदपि धीर धरि समउ बिचारी। पूँछी मधुर बचन महतारी।।

tadapi dhīra dhari samau bicārī। pū~chī madhura bacana mahatārī॥

मोहि कहु मातु तात दुख कारन। करिअ जतन जेहिं होइ निवारन।।

mohi kahu mātu tāta dukha kārana। karia jatana jehiṃ hoi nivārana॥

सुनहु राम सबु कारन एहू। राजहि तुम पर बहुत सनेहू।।

sunahu rāma sabu kārana ehū। rājahi tuma para bahuta sanehū॥

देन कहेन्हि मोहि दुइ बरदाना। मागेउँ जो कछु मोहि सोहाना।

dena kahenhi mohi dui baradānā। māgeu~ jo kachu mohi sohānā।

सो सुनि भयउ भूप उर सोचू। छाड़ि न सकहिं तुम्हार सँकोचू।।

so suni bhayau bhūpa ura socū। chār̤i na sakahiṃ tumhāra sa~kocū॥

सुत सनेह इत बचनु उत संकट परेउ नरेसु।

suta saneha ita bacanu uta saṃkaṭa pareu naresu।

सकहु न आयसु धरहु सिर मेटहु कठिन कलेसु।।40।।

sakahu na āyasu dharahu sira meṭahu kaṭhina kalesu॥40॥

निधरक बैठि कहइ कटु बानी। सुनत कठिनता अति अकुलानी।।

nidharaka baiṭhi kahai kaṭu bānī। sunata kaṭhinatā ati akulānī॥

जीभ कमान बचन सर नाना। मनहुँ महिप मृदु लच्छ समाना।।

jībha kamāna bacana sara nānā। manahu~ mahipa mṛdu laccha samānā॥

जनु कठोरपनु धरें सरीरू। सिखइ धनुषबिद्या बर बीरू।।

janu kaṭhorapanu dhareṃ sarīrū। sikhai dhanuṣabidyā bara bīrū॥

सब प्रसंगु रघुपतिहि सुनाई। बैठि मनहुँ तनु धरि निठुराई।।

saba prasaṃgu raghupatihi sunāī। baiṭhi manahu~ tanu dhari niṭhurāī॥

मन मुसकाइ भानुकुल भानु। रामु सहज आनंद निधानू।।

mana musakāi bhānukula bhānu। rāmu sahaja ānaṃda nidhānū॥

बोले बचन बिगत सब दूषन। मृदु मंजुल जनु बाग बिभूषन।।

bole bacana bigata saba dūṣana। mṛdu maṃjula janu bāga bibhūṣana॥

सुनु जननी सोइ सुतु बड़भागी। जो पितु मातु बचन अनुरागी।।

sunu jananī soi sutu bar̤abhāgī। jo pitu mātu bacana anurāgī॥

तनय मातु पितु तोषनिहारा। दुर्लभ जननि सकल संसारा।।

tanaya mātu pitu toṣanihārā। durlabha janani sakala saṃsārā॥

मुनिगन मिलनु बिसेषि बन सबहि भाँति हित मोर।

munigana milanu biseṣi bana sabahi bhā~ti hita mora।

तेहि महँ पितु आयसु बहुरि संमत जननी तोर।।41।।

tehi maha~ pitu āyasu bahuri saṃmata jananī tora॥41॥

भरत प्रानप्रिय पावहिं राजू। बिधि सब बिधि मोहि सनमुख आजु।

bharata prānapriya pāvahiṃ rājū। bidhi saba bidhi mohi sanamukha āju।

जों न जाउँ बन ऐसेहु काजा। प्रथम गनिअ मोहि मूढ़ समाजा।।

joṃ na jāu~ bana aisehu kājā। prathama gania mohi mūr̤ha samājā॥

सेवहिं अरँडु कलपतरु त्यागी। परिहरि अमृत लेहिं बिषु मागी।।

sevahiṃ ara~ḍu kalapataru tyāgī। parihari amṛta lehiṃ biṣu māgī॥

तेउ न पाइ अस समउ चुकाहीं। देखु बिचारि मातु मन माहीं।।

teu na pāi asa samau cukāhīṃ। dekhu bicāri mātu mana māhīṃ॥

अंब एक दुखु मोहि बिसेषी। निपट बिकल नरनायकु देखी।।

aṃba eka dukhu mohi biseṣī। nipaṭa bikala naranāyaku dekhī॥

थोरिहिं बात पितहि दुख भारी। होति प्रतीति न मोहि महतारी।।

thorihiṃ bāta pitahi dukha bhārī। hoti pratīti na mohi mahatārī॥

राउ धीर गुन उदधि अगाधू। भा मोहि ते कछु बड़ अपराधू।।

rāu dhīra guna udadhi agādhū। bhā mohi te kachu bar̤a aparādhū॥

जातें मोहि न कहत कछु राऊ। मोरि सपथ तोहि कहु सतिभाऊ।।

jāteṃ mohi na kahata kachu rāū। mori sapatha tohi kahu satibhāū॥

सहज सरल रघुबर बचन कुमति कुटिल करि जान।

sahaja sarala raghubara bacana kumati kuṭila kari jāna।

चलइ जोंक जल बक्रगति जद्यपि सलिलु समान।।42।।

calai joṃka jala bakragati jadyapi salilu samāna॥42॥

रहसी रानि राम रुख पाई। बोली कपट सनेहु जनाई।।

rahasī rāni rāma rukha pāī। bolī kapaṭa sanehu janāī॥

सपथ तुम्हार भरत कै आना। हेतु न दूसर मै कछु जाना।।

sapatha tumhāra bharata kai ānā। hetu na dūsara mai kachu jānā॥

तुम्ह अपराध जोगु नहिं ताता। जननी जनक बंधु सुखदाता।।

tumha aparādha jogu nahiṃ tātā। jananī janaka baṃdhu sukhadātā॥

राम सत्य सबु जो कछु कहहू। तुम्ह पितु मातु बचन रत अहहू।।

rāma satya sabu jo kachu kahahū। tumha pitu mātu bacana rata ahahū॥

पितहि बुझाइ कहहु बलि सोई। चौथेंपन जेहिं अजसु न होई।।

pitahi bujhāi kahahu bali soī। cautheṃpana jehiṃ ajasu na hoī॥

तुम्ह सम सुअन सुकृत जेहिं दीन्हे। उचित न तासु निरादरु कीन्हे।।

tumha sama suana sukṛta jehiṃ dīnhe। ucita na tāsu nirādaru kīnhe॥

लागहिं कुमुख बचन सुभ कैसे। मगहँ गयादिक तीरथ जैसे।।

lāgahiṃ kumukha bacana subha kaise। magaha~ gayādika tīratha jaise॥

रामहि मातु बचन सब भाए। जिमि सुरसरि गत सलिल सुहाए।।

rāmahi mātu bacana saba bhāe। jimi surasari gata salila suhāe॥

गइ मुरुछा रामहि सुमिरि नृप फिरि करवट लीन्ह।

gai muruchā rāmahi sumiri nṛpa phiri karavaṭa līnha।

सचिव राम आगमन कहि बिनय समय सम कीन्ह।।43।।

saciva rāma āgamana kahi binaya samaya sama kīnha॥43॥

अवनिप अकनि रामु पगु धारे। धरि धीरजु तब नयन उघारे।।

avanipa akani rāmu pagu dhāre। dhari dhīraju taba nayana ughāre॥

सचिवँ सँभारि राउ बैठारे। चरन परत नृप रामु निहारे।।

saciva~ sa~bhāri rāu baiṭhāre। carana parata nṛpa rāmu nihāre॥

लिए सनेह बिकल उर लाई। गै मनि मनहुँ फनिक फिरि पाई।।

lie saneha bikala ura lāī। gai mani manahu~ phanika phiri pāī॥

रामहि चितइ रहेउ नरनाहू। चला बिलोचन बारि प्रबाहू।।

rāmahi citai raheu naranāhū। calā bilocana bāri prabāhū॥

सोक बिबस कछु कहै न पारा। हृदयँ लगावत बारहिं बारा।।

soka bibasa kachu kahai na pārā। hṛdaya~ lagāvata bārahiṃ bārā॥

बिधिहि मनाव राउ मन माहीं। जेहिं रघुनाथ न कानन जाहीं।।

bidhihi manāva rāu mana māhīṃ। jehiṃ raghunātha na kānana jāhīṃ॥

सुमिरि महेसहि कहइ निहोरी। बिनती सुनहु सदासिव मोरी।।

sumiri mahesahi kahai nihorī। binatī sunahu sadāsiva morī॥

आसुतोष तुम्ह अवढर दानी। आरति हरहु दीन जनु जानी।।

āsutoṣa tumha avaḍhara dānī। ārati harahu dīna janu jānī॥

तुम्ह प्रेरक सब के हृदयँ सो मति रामहि देहु।

tumha preraka saba ke hṛdaya~ so mati rāmahi dehu।

बचनु मोर तजि रहहि घर परिहरि सीलु सनेहु।।44।।

bacanu mora taji rahahi ghara parihari sīlu sanehu॥44॥

अजसु होउ जग सुजसु नसाऊ। नरक परौ बरु सुरपुरु जाऊ।।

ajasu hou jaga sujasu nasāū। naraka parau baru surapuru jāū॥

सब दुख दुसह सहावहु मोही। लोचन ओट रामु जनि होंही।।

saba dukha dusaha sahāvahu mohī। locana oṭa rāmu jani hoṃhī॥

अस मन गुनइ राउ नहिं बोला। पीपर पात सरिस मनु डोला।।

asa mana gunai rāu nahiṃ bolā। pīpara pāta sarisa manu ḍolā॥

रघुपति पितहि प्रेमबस जानी। पुनि कछु कहिहि मातु अनुमानी।।

raghupati pitahi premabasa jānī। puni kachu kahihi mātu anumānī॥

देस काल अवसर अनुसारी। बोले बचन बिनीत बिचारी।।

desa kāla avasara anusārī। bole bacana binīta bicārī॥

तात कहउँ कछु करउँ ढिठाई। अनुचितु छमब जानि लरिकाई।।

tāta kahau~ kachu karau~ ḍhiṭhāī। anucitu chamaba jāni larikāī॥

अति लघु बात लागि दुखु पावा। काहुँ न मोहि कहि प्रथम जनावा।।

ati laghu bāta lāgi dukhu pāvā। kāhu~ na mohi kahi prathama janāvā॥

देखि गोसाइँहि पूँछिउँ माता। सुनि प्रसंगु भए सीतल गाता।।

dekhi gosāi~hi pū~chiu~ mātā। suni prasaṃgu bhae sītala gātā॥

मंगल समय सनेह बस सोच परिहरिअ तात।

maṃgala samaya saneha basa soca pariharia tāta।

आयसु देइअ हरषि हियँ कहि पुलके प्रभु गात।।45।।

āyasu deia haraṣi hiya~ kahi pulake prabhu gāta॥45॥

धन्य जनमु जगतीतल तासू। पितहि प्रमोदु चरित सुनि जासू।।

dhanya janamu jagatītala tāsū। pitahi pramodu carita suni jāsū॥

चारि पदारथ करतल ताकें। प्रिय पितु मातु प्रान सम जाकें।।

cāri padāratha karatala tākeṃ। priya pitu mātu prāna sama jākeṃ॥

आयसु पालि जनम फलु पाई। ऐहउँ बेगिहिं होउ रजाई।।

āyasu pāli janama phalu pāī। aihau~ begihiṃ hou rajāī॥

बिदा मातु सन आवउँ मागी। चलिहउँ बनहि बहुरि पग लागी।।

bidā mātu sana āvau~ māgī। calihau~ banahi bahuri paga lāgī॥

अस कहि राम गवनु तब कीन्हा। भूप सोक बसु उतरु न दीन्हा।।

asa kahi rāma gavanu taba kīnhā। bhūpa soka basu utaru na dīnhā॥

नगर ब्यापि गइ बात सुतीछी। छुअत चढ़ी जनु सब तन बीछी।।

nagara byāpi gai bāta sutīchī। chuata car̤hī janu saba tana bīchī॥

सुनि भए बिकल सकल नर नारी। बेलि बिटप जिमि देखि दवारी।।

suni bhae bikala sakala nara nārī। beli biṭapa jimi dekhi davārī॥

जो जहँ सुनइ धुनइ सिरु सोई। बड़ बिषादु नहिं धीरजु होई।।

jo jaha~ sunai dhunai siru soī। bar̤a biṣādu nahiṃ dhīraju hoī॥

मुख सुखाहिं लोचन स्त्रवहि सोकु न हृदयँ समाइ।

mukha sukhāhiṃ locana stravahi soku na hṛdaya~ samāi।

मनहुँ करुन रस कटकई उतरी अवध बजाइ।।46।।

manahu~ karuna rasa kaṭakaī utarī avadha bajāi॥46॥

मिलेहि माझ बिधि बात बेगारी। जहँ तहँ देहिं कैकेइहि गारी।।

milehi mājha bidhi bāta begārī। jaha~ taha~ dehiṃ kaikeihi gārī॥

एहि पापिनिहि बूझि का परेऊ। छाइ भवन पर पावकु धरेऊ।।

ehi pāpinihi būjhi kā pareū। chāi bhavana para pāvaku dhareū॥

निज कर नयन काढ़ि चह दीखा। डारि सुधा बिषु चाहत चीखा।।

nija kara nayana kār̤hi caha dīkhā। ḍāri sudhā biṣu cāhata cīkhā॥

कुटिल कठोर कुबुद्धि अभागी। भइ रघुबंस बेनु बन आगी।।

kuṭila kaṭhora kubuddhi abhāgī। bhai raghubaṃsa benu bana āgī॥

पालव बैठि पेड़ु एहिं काटा। सुख महुँ सोक ठाटु धरि ठाटा।।

pālava baiṭhi per̤u ehiṃ kāṭā। sukha mahu~ soka ṭhāṭu dhari ṭhāṭā॥

सदा रामु एहि प्रान समाना। कारन कवन कुटिलपनु ठाना।।

sadā rāmu ehi prāna samānā। kārana kavana kuṭilapanu ṭhānā॥

सत्य कहहिं कबि नारि सुभाऊ। सब बिधि अगहु अगाध दुराऊ।।

satya kahahiṃ kabi nāri subhāū। saba bidhi agahu agādha durāū॥

निज प्रतिबिंबु बरुकु गहि जाई। जानि न जाइ नारि गति भाई।।

nija pratibiṃbu baruku gahi jāī। jāni na jāi nāri gati bhāī॥

काह न पावकु जारि सक का न समुद्र समाइ।

kāha na pāvaku jāri saka kā na samudra samāi।

का न करै अबला प्रबल केहि जग कालु न खाइ।।47।।

kā na karai abalā prabala kehi jaga kālu na khāi॥47॥

का सुनाइ बिधि काह सुनावा। का देखाइ चह काह देखावा।।

kā sunāi bidhi kāha sunāvā। kā dekhāi caha kāha dekhāvā॥

एक कहहिं भल भूप न कीन्हा। बरु बिचारि नहिं कुमतिहि दीन्हा।।

eka kahahiṃ bhala bhūpa na kīnhā। baru bicāri nahiṃ kumatihi dīnhā॥

जो हठि भयउ सकल दुख भाजनु। अबला बिबस ग्यानु गुनु गा जनु।।

jo haṭhi bhayau sakala dukha bhājanu। abalā bibasa gyānu gunu gā janu॥

एक धरम परमिति पहिचाने। नृपहि दोसु नहिं देहिं सयाने।।

eka dharama paramiti pahicāne। nṛpahi dosu nahiṃ dehiṃ sayāne॥

सिबि दधीचि हरिचंद कहानी। एक एक सन कहहिं बखानी।।

sibi dadhīci haricaṃda kahānī। eka eka sana kahahiṃ bakhānī॥

एक भरत कर संमत कहहीं। एक उदास भायँ सुनि रहहीं।।

eka bharata kara saṃmata kahahīṃ। eka udāsa bhāya~ suni rahahīṃ॥

कान मूदि कर रद गहि जीहा। एक कहहिं यह बात अलीहा।।

kāna mūdi kara rada gahi jīhā। eka kahahiṃ yaha bāta alīhā॥

सुकृत जाहिं अस कहत तुम्हारे। रामु भरत कहुँ प्रानपिआरे।।

sukṛta jāhiṃ asa kahata tumhāre। rāmu bharata kahu~ prānapiāre॥

चंदु चवै बरु अनल कन सुधा होइ बिषतूल।

caṃdu cavai baru anala kana sudhā hoi biṣatūla।

सपनेहुँ कबहुँ न करहिं किछु भरतु राम प्रतिकूल।।48।।

sapanehu~ kabahu~ na karahiṃ kichu bharatu rāma pratikūla॥48॥

एक बिधातहिं दूषनु देंहीं। सुधा देखाइ दीन्ह बिषु जेहीं।।

eka bidhātahiṃ dūṣanu deṃhīṃ। sudhā dekhāi dīnha biṣu jehīṃ॥

खरभरु नगर सोचु सब काहू। दुसह दाहु उर मिटा उछाहू।।

kharabharu nagara socu saba kāhū। dusaha dāhu ura miṭā uchāhū॥

बिप्रबधू कुलमान्य जठेरी। जे प्रिय परम कैकेई केरी।।

biprabadhū kulamānya jaṭherī। je priya parama kaikeī kerī॥

लगीं देन सिख सीलु सराही। बचन बानसम लागहिं ताही।।

lagīṃ dena sikha sīlu sarāhī। bacana bānasama lāgahiṃ tāhī॥

भरतु न मोहि प्रिय राम समाना। सदा कहहु यहु सबु जगु जाना।।

bharatu na mohi priya rāma samānā। sadā kahahu yahu sabu jagu jānā॥

करहु राम पर सहज सनेहू। केहिं अपराध आजु बनु देहू।।

karahu rāma para sahaja sanehū। kehiṃ aparādha āju banu dehū॥

कबहुँ न कियहु सवति आरेसू। प्रीति प्रतीति जान सबु देसू।।

kabahu~ na kiyahu savati āresū। prīti pratīti jāna sabu desū॥

कौसल्याँ अब काह बिगारा। तुम्ह जेहि लागि बज्र पुर पारा।।

kausalyā~ aba kāha bigārā। tumha jehi lāgi bajra pura pārā॥

सीय कि पिय सँगु परिहरिहि लखनु कि रहिहहिं धाम।

sīya ki piya sa~gu pariharihi lakhanu ki rahihahiṃ dhāma।

राजु कि भूँजब भरत पुर नृपु कि जिइहि बिनु राम।।49।।

rāju ki bhū~jaba bharata pura nṛpu ki jiihi binu rāma॥49॥

अस बिचारि उर छाड़हु कोहू। सोक कलंक कोठि जनि होहू।।

asa bicāri ura chār̤ahu kohū। soka kalaṃka koṭhi jani hohū॥

भरतहि अवसि देहु जुबराजू। कानन काह राम कर काजू।।

bharatahi avasi dehu jubarājū। kānana kāha rāma kara kājū॥

नाहिन रामु राज के भूखे। धरम धुरीन बिषय रस रूखे।।

nāhina rāmu rāja ke bhūkhe। dharama dhurīna biṣaya rasa rūkhe॥

गुर गृह बसहुँ रामु तजि गेहू। नृप सन अस बरु दूसर लेहू।।

gura gṛha basahu~ rāmu taji gehū। nṛpa sana asa baru dūsara lehū॥

जौं नहिं लगिहहु कहें हमारे। नहिं लागिहि कछु हाथ तुम्हारे।।

jauṃ nahiṃ lagihahu kaheṃ hamāre। nahiṃ lāgihi kachu hātha tumhāre॥

जौं परिहास कीन्हि कछु होई। तौ कहि प्रगट जनावहु सोई।।

jauṃ parihāsa kīnhi kachu hoī। tau kahi pragaṭa janāvahu soī॥

राम सरिस सुत कानन जोगू। काह कहिहि सुनि तुम्ह कहुँ लोगू।।

rāma sarisa suta kānana jogū। kāha kahihi suni tumha kahu~ logū॥

उठहु बेगि सोइ करहु उपाई। जेहि बिधि सोकु कलंकु नसाई।।

uṭhahu begi soi karahu upāī। jehi bidhi soku kalaṃku nasāī॥

जेहि भाँति सोकु कलंकु जाइ उपाय करि कुल पालही।

jehi bhā~ti soku kalaṃku jāi upāya kari kula pālahī।

हठि फेरु रामहि जात बन जनि बात दूसरि चालही।।

haṭhi pheru rāmahi jāta bana jani bāta dūsari cālahī॥

जिमि भानु बिनु दिनु प्रान बिनु तनु चंद बिनु जिमि जामिनी।

jimi bhānu binu dinu prāna binu tanu caṃda binu jimi jāminī।

तिमि अवध तुलसीदास प्रभु बिनु समुझि धौं जियँ भामिनी।।

timi avadha tulasīdāsa prabhu binu samujhi dhauṃ jiya~ bhāminī॥

सखिन्ह सिखावनु दीन्ह सुनत मधुर परिनाम हित।

sakhinha sikhāvanu dīnha sunata madhura parināma hita।

तेइँ कछु कान न कीन्ह कुटिल प्रबोधी कूबरी।।50।।

tei~ kachu kāna na kīnha kuṭila prabodhī kūbarī॥50॥

उतरु न देइ दुसह रिस रूखी। मृगिन्ह चितव जनु बाघिनि भूखी।।

utaru na dei dusaha risa rūkhī। mṛginha citava janu bāghini bhūkhī॥

ब्याधि असाधि जानि तिन्ह त्यागी। चलीं कहत मतिमंद अभागी।।

byādhi asādhi jāni tinha tyāgī। calīṃ kahata matimaṃda abhāgī॥

राजु करत यह दैअँ बिगोई। कीन्हेसि अस जस करइ न कोई।।

rāju karata yaha daia~ bigoī। kīnhesi asa jasa karai na koī॥

एहि बिधि बिलपहिं पुर नर नारीं। देहिं कुचालिहि कोटिक गारीं।।

ehi bidhi bilapahiṃ pura nara nārīṃ। dehiṃ kucālihi koṭika gārīṃ॥

जरहिं बिषम जर लेहिं उसासा। कवनि राम बिनु जीवन आसा।।

jarahiṃ biṣama jara lehiṃ usāsā। kavani rāma binu jīvana āsā॥

बिपुल बियोग प्रजा अकुलानी। जनु जलचर गन सूखत पानी।।

bipula biyoga prajā akulānī। janu jalacara gana sūkhata pānī॥

अति बिषाद बस लोग लोगाई। गए मातु पहिं रामु गोसाई।।

ati biṣāda basa loga logāī। gae mātu pahiṃ rāmu gosāī॥

मुख प्रसन्न चित चौगुन चाऊ। मिटा सोचु जनि राखै राऊ।।

mukha prasanna cita cauguna cāū। miṭā socu jani rākhai rāū॥

नव गयंदु रघुबीर मनु राजु अलान समान।

nava gayaṃdu raghubīra manu rāju alāna samāna।

छूट जानि बन गवनु सुनि उर अनंदु अधिकान।।51।।

chūṭa jāni bana gavanu suni ura anaṃdu adhikāna॥51॥

रघुकुलतिलक जोरि दोउ हाथा। मुदित मातु पद नायउ माथा।।

raghukulatilaka jori dou hāthā। mudita mātu pada nāyau māthā॥

दीन्हि असीस लाइ उर लीन्हे। भूषन बसन निछावरि कीन्हे।।

dīnhi asīsa lāi ura līnhe। bhūṣana basana nichāvari kīnhe॥

बार बार मुख चुंबति माता। नयन नेह जलु पुलकित गाता।।

bāra bāra mukha cuṃbati mātā। nayana neha jalu pulakita gātā॥

गोद राखि पुनि हृदयँ लगाए। स्त्रवत प्रेनरस पयद सुहाए।।

goda rākhi puni hṛdaya~ lagāe। stravata prenarasa payada suhāe॥

प्रेमु प्रमोदु न कछु कहि जाई। रंक धनद पदबी जनु पाई।।

premu pramodu na kachu kahi jāī। raṃka dhanada padabī janu pāī॥

सादर सुंदर बदनु निहारी। बोली मधुर बचन महतारी।।

sādara suṃdara badanu nihārī। bolī madhura bacana mahatārī॥

कहहु तात जननी बलिहारी। कबहिं लगन मुद मंगलकारी।।

kahahu tāta jananī balihārī। kabahiṃ lagana muda maṃgalakārī॥

सुकृत सील सुख सीवँ सुहाई। जनम लाभ कइ अवधि अघाई।।

sukṛta sīla sukha sīva~ suhāī। janama lābha kai avadhi aghāī॥

जेहि चाहत नर नारि सब अति आरत एहि भाँति।

jehi cāhata nara nāri saba ati ārata ehi bhā~ti।

जिमि चातक चातकि तृषित बृष्टि सरद रितु स्वाति।।52।।

jimi cātaka cātaki tṛṣita bṛṣṭi sarada ritu svāti॥52॥

तात जाउँ बलि बेगि नहाहू। जो मन भाव मधुर कछु खाहू।।

tāta jāu~ bali begi nahāhū। jo mana bhāva madhura kachu khāhū॥

पितु समीप तब जाएहु भैआ। भइ बड़ि बार जाइ बलि मैआ।।

pitu samīpa taba jāehu bhaiā। bhai bar̤i bāra jāi bali maiā॥

मातु बचन सुनि अति अनुकूला। जनु सनेह सुरतरु के फूला।।

mātu bacana suni ati anukūlā। janu saneha surataru ke phūlā॥

सुख मकरंद भरे श्रियमूला। निरखि राम मनु भवरुँ न भूला।।

sukha makaraṃda bhare śriyamūlā। nirakhi rāma manu bhavaru~ na bhūlā॥

धरम धुरीन धरम गति जानी। कहेउ मातु सन अति मृदु बानी।।

dharama dhurīna dharama gati jānī। kaheu mātu sana ati mṛdu bānī॥

पिताँ दीन्ह मोहि कानन राजू। जहँ सब भाँति मोर बड़ काजू।।

pitā~ dīnha mohi kānana rājū। jaha~ saba bhā~ti mora bar̤a kājū॥

आयसु देहि मुदित मन माता। जेहिं मुद मंगल कानन जाता।।

āyasu dehi mudita mana mātā। jehiṃ muda maṃgala kānana jātā॥

जनि सनेह बस डरपसि भोरें। आनँदु अंब अनुग्रह तोरें।।

jani saneha basa ḍarapasi bhoreṃ। āna~du aṃba anugraha toreṃ॥

बरष चारिदस बिपिन बसि करि पितु बचन प्रमान।

baraṣa cāridasa bipina basi kari pitu bacana pramāna।

आइ पाय पुनि देखिहउँ मनु जनि करसि मलान।।53।।

āi pāya puni dekhihau~ manu jani karasi malāna॥53॥

बचन बिनीत मधुर रघुबर के। सर सम लगे मातु उर करके।।

bacana binīta madhura raghubara ke। sara sama lage mātu ura karake॥

सहमि सूखि सुनि सीतलि बानी। जिमि जवास परें पावस पानी।।

sahami sūkhi suni sītali bānī। jimi javāsa pareṃ pāvasa pānī॥

कहि न जाइ कछु हृदय बिषादू। मनहुँ मृगी सुनि केहरि नादू।।

kahi na jāi kachu hṛdaya biṣādū। manahu~ mṛgī suni kehari nādū॥

नयन सजल तन थर थर काँपी। माजहि खाइ मीन जनु मापी।।

nayana sajala tana thara thara kā~pī। mājahi khāi mīna janu māpī॥

धरि धीरजु सुत बदनु निहारी। गदगद बचन कहति महतारी।।

dhari dhīraju suta badanu nihārī। gadagada bacana kahati mahatārī॥

तात पितहि तुम्ह प्रानपिआरे। देखि मुदित नित चरित तुम्हारे।।

tāta pitahi tumha prānapiāre। dekhi mudita nita carita tumhāre॥

राजु देन कहुँ सुभ दिन साधा। कहेउ जान बन केहिं अपराधा।।

rāju dena kahu~ subha dina sādhā। kaheu jāna bana kehiṃ aparādhā॥

तात सुनावहु मोहि निदानू। को दिनकर कुल भयउ कृसानू।।

tāta sunāvahu mohi nidānū। ko dinakara kula bhayau kṛsānū॥

निरखि राम रुख सचिवसुत कारनु कहेउ बुझाइ।

nirakhi rāma rukha sacivasuta kāranu kaheu bujhāi।

सुनि प्रसंगु रहि मूक जिमि दसा बरनि नहिं जाइ।।54।।

suni prasaṃgu rahi mūka jimi dasā barani nahiṃ jāi॥54॥

राखि न सकइ न कहि सक जाहू। दुहूँ भाँति उर दारुन दाहू।।

rākhi na sakai na kahi saka jāhū। duhū~ bhā~ti ura dāruna dāhū॥

लिखत सुधाकर गा लिखि राहू। बिधि गति बाम सदा सब काहू।।

likhata sudhākara gā likhi rāhū। bidhi gati bāma sadā saba kāhū॥

धरम सनेह उभयँ मति घेरी। भइ गति साँप छुछुंदरि केरी।।

dharama saneha ubhaya~ mati gherī। bhai gati sā~pa chuchuṃdari kerī॥

राखउँ सुतहि करउँ अनुरोधू। धरमु जाइ अरु बंधु बिरोधू।।

rākhau~ sutahi karau~ anurodhū। dharamu jāi aru baṃdhu birodhū॥

कहउँ जान बन तौ बड़ि हानी। संकट सोच बिबस भइ रानी।।

kahau~ jāna bana tau bar̤i hānī। saṃkaṭa soca bibasa bhai rānī॥

बहुरि समुझि तिय धरमु सयानी। रामु भरतु दोउ सुत सम जानी।।

bahuri samujhi tiya dharamu sayānī। rāmu bharatu dou suta sama jānī॥

सरल सुभाउ राम महतारी। बोली बचन धीर धरि भारी।।

sarala subhāu rāma mahatārī। bolī bacana dhīra dhari bhārī॥

तात जाउँ बलि कीन्हेहु नीका। पितु आयसु सब धरमक टीका।।

tāta jāu~ bali kīnhehu nīkā। pitu āyasu saba dharamaka ṭīkā॥

राजु देन कहि दीन्ह बनु मोहि न सो दुख लेसु।

rāju dena kahi dīnha banu mohi na so dukha lesu।

तुम्ह बिनु भरतहि भूपतिहि प्रजहि प्रचंड कलेसु।।55।।

tumha binu bharatahi bhūpatihi prajahi pracaṃḍa kalesu॥55॥

जौं केवल पितु आयसु ताता। तौ जनि जाहु जानि बड़ि माता।।

jauṃ kevala pitu āyasu tātā। tau jani jāhu jāni bar̤i mātā॥

जौं पितु मातु कहेउ बन जाना। तौं कानन सत अवध समाना।।

jauṃ pitu mātu kaheu bana jānā। tauṃ kānana sata avadha samānā॥

पितु बनदेव मातु बनदेवी। खग मृग चरन सरोरुह सेवी।।

pitu banadeva mātu banadevī। khaga mṛga carana saroruha sevī॥

अंतहुँ उचित नृपहि बनबासू। बय बिलोकि हियँ होइ हराँसू।।

aṃtahu~ ucita nṛpahi banabāsū। baya biloki hiya~ hoi harā~sū॥

बड़भागी बनु अवध अभागी। जो रघुबंसतिलक तुम्ह त्यागी।।

bar̤abhāgī banu avadha abhāgī। jo raghubaṃsatilaka tumha tyāgī॥

जौं सुत कहौ संग मोहि लेहू। तुम्हरे हृदयँ होइ संदेहू।।

jauṃ suta kahau saṃga mohi lehū। tumhare hṛdaya~ hoi saṃdehū॥

पूत परम प्रिय तुम्ह सबही के। प्रान प्रान के जीवन जी के।।

pūta parama priya tumha sabahī ke। prāna prāna ke jīvana jī ke॥

ते तुम्ह कहहु मातु बन जाऊँ। मैं सुनि बचन बैठि पछिताऊँ।।

te tumha kahahu mātu bana jāū~। maiṃ suni bacana baiṭhi pachitāū~॥

यह बिचारि नहिं करउँ हठ झूठ सनेहु बढ़ाइ।

yaha bicāri nahiṃ karau~ haṭha jhūṭha sanehu bar̤hāi।

मानि मातु कर नात बलि सुरति बिसरि जनि जाइ।।56।।

māni mātu kara nāta bali surati bisari jani jāi॥56॥

देव पितर सब तुन्हहि गोसाई। राखहुँ पलक नयन की नाई।।

deva pitara saba tunhahi gosāī। rākhahu~ palaka nayana kī nāī॥

अवधि अंबु प्रिय परिजन मीना। तुम्ह करुनाकर धरम धुरीना।।

avadhi aṃbu priya parijana mīnā। tumha karunākara dharama dhurīnā॥

अस बिचारि सोइ करहु उपाई। सबहि जिअत जेहिं भेंटेहु आई।।

asa bicāri soi karahu upāī। sabahi jiata jehiṃ bheṃṭehu āī॥

जाहु सुखेन बनहि बलि जाऊँ। करि अनाथ जन परिजन गाऊँ।।

jāhu sukhena banahi bali jāū~। kari anātha jana parijana gāū~॥

सब कर आजु सुकृत फल बीता। भयउ कराल कालु बिपरीता।।

saba kara āju sukṛta phala bītā। bhayau karāla kālu biparītā॥

बहुबिधि बिलपि चरन लपटानी। परम अभागिनि आपुहि जानी।।

bahubidhi bilapi carana lapaṭānī। parama abhāgini āpuhi jānī॥

दारुन दुसह दाहु उर ब्यापा। बरनि न जाहिं बिलाप कलापा।।

dāruna dusaha dāhu ura byāpā। barani na jāhiṃ bilāpa kalāpā॥

राम उठाइ मातु उर लाई। कहि मृदु बचन बहुरि समुझाई।।

rāma uṭhāi mātu ura lāī। kahi mṛdu bacana bahuri samujhāī॥

समाचार तेहि समय सुनि सीय उठी अकुलाइ।

samācāra tehi samaya suni sīya uṭhī akulāi।

जाइ सासु पद कमल जुग बंदि बैठि सिरु नाइ।।57।।

jāi sāsu pada kamala juga baṃdi baiṭhi siru nāi॥57॥

दीन्हि असीस सासु मृदु बानी। अति सुकुमारि देखि अकुलानी।।

dīnhi asīsa sāsu mṛdu bānī। ati sukumāri dekhi akulānī॥

बैठि नमितमुख सोचति सीता। रूप रासि पति प्रेम पुनीता।।

baiṭhi namitamukha socati sītā। rūpa rāsi pati prema punītā॥

चलन चहत बन जीवननाथू। केहि सुकृती सन होइहि साथू।।

calana cahata bana jīvananāthū। kehi sukṛtī sana hoihi sāthū॥

की तनु प्रान कि केवल प्राना। बिधि करतबु कछु जाइ न जाना।।

kī tanu prāna ki kevala prānā। bidhi karatabu kachu jāi na jānā॥

चारु चरन नख लेखति धरनी। नूपुर मुखर मधुर कबि बरनी।।

cāru carana nakha lekhati dharanī। nūpura mukhara madhura kabi baranī॥

मनहुँ प्रेम बस बिनती करहीं। हमहि सीय पद जनि परिहरहीं।।

manahu~ prema basa binatī karahīṃ। hamahi sīya pada jani pariharahīṃ॥

मंजु बिलोचन मोचति बारी। बोली देखि राम महतारी।।

maṃju bilocana mocati bārī। bolī dekhi rāma mahatārī॥

तात सुनहु सिय अति सुकुमारी। सासु ससुर परिजनहि पिआरी।।

tāta sunahu siya ati sukumārī। sāsu sasura parijanahi piārī॥

पिता जनक भूपाल मनि ससुर भानुकुल भानु।

pitā janaka bhūpāla mani sasura bhānukula bhānu।

पति रबिकुल कैरव बिपिन बिधु गुन रूप निधानु।।58।।

pati rabikula kairava bipina bidhu guna rūpa nidhānu॥58॥

मैं पुनि पुत्रबधू प्रिय पाई। रूप रासि गुन सील सुहाई।।

maiṃ puni putrabadhū priya pāī। rūpa rāsi guna sīla suhāī॥

नयन पुतरि करि प्रीति बढ़ाई। राखेउँ प्रान जानिकिहिं लाई।।

nayana putari kari prīti bar̤hāī। rākheu~ prāna jānikihiṃ lāī॥

कलपबेलि जिमि बहुबिधि लाली। सींचि सनेह सलिल प्रतिपाली।।

kalapabeli jimi bahubidhi lālī। sīṃci saneha salila pratipālī॥

फूलत फलत भयउ बिधि बामा। जानि न जाइ काह परिनामा।।

phūlata phalata bhayau bidhi bāmā। jāni na jāi kāha parināmā॥

पलँग पीठ तजि गोद हिंड़ोरा। सियँ न दीन्ह पगु अवनि कठोरा।।

pala~ga pīṭha taji goda hiṃr̤orā। siya~ na dīnha pagu avani kaṭhorā॥

जिअनमूरि जिमि जोगवत रहऊँ। दीप बाति नहिं टारन कहऊँ।।

jianamūri jimi jogavata rahaū~। dīpa bāti nahiṃ ṭārana kahaū~॥

सोइ सिय चलन चहति बन साथा। आयसु काह होइ रघुनाथा।

soi siya calana cahati bana sāthā। āyasu kāha hoi raghunāthā।

चंद किरन रस रसिक चकोरी। रबि रुख नयन सकइ किमि जोरी।।

caṃda kirana rasa rasika cakorī। rabi rukha nayana sakai kimi jorī॥

करि केहरि निसिचर चरहिं दुष्ट जंतु बन भूरि।

kari kehari nisicara carahiṃ duṣṭa jaṃtu bana bhūri।

बिष बाटिकाँ कि सोह सुत सुभग सजीवनि मूरि।।59।।

biṣa bāṭikā~ ki soha suta subhaga sajīvani mūri॥59॥

बन हित कोल किरात किसोरी। रचीं बिरंचि बिषय सुख भोरी।।

bana hita kola kirāta kisorī। racīṃ biraṃci biṣaya sukha bhorī॥

पाइन कृमि जिमि कठिन सुभाऊ। तिन्हहि कलेसु न कानन काऊ।।

pāina kṛmi jimi kaṭhina subhāū। tinhahi kalesu na kānana kāū॥

कै तापस तिय कानन जोगू। जिन्ह तप हेतु तजा सब भोगू।।

kai tāpasa tiya kānana jogū। jinha tapa hetu tajā saba bhogū॥

सिय बन बसिहि तात केहि भाँती। चित्रलिखित कपि देखि डेराती।।

siya bana basihi tāta kehi bhā~tī। citralikhita kapi dekhi ḍerātī॥

सुरसर सुभग बनज बन चारी। डाबर जोगु कि हंसकुमारी।।

surasara subhaga banaja bana cārī। ḍābara jogu ki haṃsakumārī॥

अस बिचारि जस आयसु होई। मैं सिख देउँ जानकिहि सोई।।

asa bicāri jasa āyasu hoī। maiṃ sikha deu~ jānakihi soī॥

जौं सिय भवन रहै कह अंबा। मोहि कहँ होइ बहुत अवलंबा।।

jauṃ siya bhavana rahai kaha aṃbā। mohi kaha~ hoi bahuta avalaṃbā॥

सुनि रघुबीर मातु प्रिय बानी। सील सनेह सुधाँ जनु सानी।।

suni raghubīra mātu priya bānī। sīla saneha sudhā~ janu sānī॥

कहि प्रिय बचन बिबेकमय कीन्हि मातु परितोष।

kahi priya bacana bibekamaya kīnhi mātu paritoṣa।

लगे प्रबोधन जानकिहि प्रगटि बिपिन गुन दोष।।60।।

lage prabodhana jānakihi pragaṭi bipina guna doṣa॥60॥

मातु समीप कहत सकुचाहीं। बोले समउ समुझि मन माहीं।।

mātu samīpa kahata sakucāhīṃ। bole samau samujhi mana māhīṃ॥

राजकुमारि सिखावन सुनहू। आन भाँति जियँ जनि कछु गुनहू।।

rājakumāri sikhāvana sunahū। āna bhā~ti jiya~ jani kachu gunahū॥

आपन मोर नीक जौं चहहू। बचनु हमार मानि गृह रहहू।।

āpana mora nīka jauṃ cahahū। bacanu hamāra māni gṛha rahahū॥

आयसु मोर सासु सेवकाई। सब बिधि भामिनि भवन भलाई।।

āyasu mora sāsu sevakāī। saba bidhi bhāmini bhavana bhalāī॥

एहि ते अधिक धरमु नहिं दूजा। सादर सासु ससुर पद पूजा।।

ehi te adhika dharamu nahiṃ dūjā। sādara sāsu sasura pada pūjā॥

जब जब मातु करिहि सुधि मोरी। होइहि प्रेम बिकल मति भोरी।।

jaba jaba mātu karihi sudhi morī। hoihi prema bikala mati bhorī॥

तब तब तुम्ह कहि कथा पुरानी। सुंदरि समुझाएहु मृदु बानी।।

taba taba tumha kahi kathā purānī। suṃdari samujhāehu mṛdu bānī॥

कहउँ सुभायँ सपथ सत मोही। सुमुखि मातु हित राखउँ तोही।।

kahau~ subhāya~ sapatha sata mohī। sumukhi mātu hita rākhau~ tohī॥

गुर श्रुति संमत धरम फलु पाइअ बिनहिं कलेस।

gura śruti saṃmata dharama phalu pāia binahiṃ kalesa।

हठ बस सब संकट सहे गालव नहुष नरेस।।61।।

haṭha basa saba saṃkaṭa sahe gālava nahuṣa naresa॥61॥

मैं पुनि करि प्रवान पितु बानी। बेगि फिरब सुनु सुमुखि सयानी।।

maiṃ puni kari pravāna pitu bānī। begi phiraba sunu sumukhi sayānī॥

दिवस जात नहिं लागिहि बारा। सुंदरि सिखवनु सुनहु हमारा।।

divasa jāta nahiṃ lāgihi bārā। suṃdari sikhavanu sunahu hamārā॥

जौ हठ करहु प्रेम बस बामा। तौ तुम्ह दुखु पाउब परिनामा।।

jau haṭha karahu prema basa bāmā। tau tumha dukhu pāuba parināmā॥

काननु कठिन भयंकरु भारी। घोर घामु हिम बारि बयारी।।

kānanu kaṭhina bhayaṃkaru bhārī। ghora ghāmu hima bāri bayārī॥

कुस कंटक मग काँकर नाना। चलब पयादेहिं बिनु पदत्राना।।

kusa kaṃṭaka maga kā~kara nānā। calaba payādehiṃ binu padatrānā॥

चरन कमल मुदु मंजु तुम्हारे। मारग अगम भूमिधर भारे।।

carana kamala mudu maṃju tumhāre। māraga agama bhūmidhara bhāre॥

कंदर खोह नदीं नद नारे। अगम अगाध न जाहिं निहारे।।

kaṃdara khoha nadīṃ nada nāre। agama agādha na jāhiṃ nihāre॥

भालु बाघ बृक केहरि नागा। करहिं नाद सुनि धीरजु भागा।।

bhālu bāgha bṛka kehari nāgā। karahiṃ nāda suni dhīraju bhāgā॥

भूमि सयन बलकल बसन असनु कंद फल मूल।

bhūmi sayana balakala basana asanu kaṃda phala mūla।

ते कि सदा सब दिन मिलिहिं सबुइ समय अनुकूल।।62।।

te ki sadā saba dina milihiṃ sabui samaya anukūla॥62॥

नर अहार रजनीचर चरहीं। कपट बेष बिधि कोटिक करहीं।।

nara ahāra rajanīcara carahīṃ। kapaṭa beṣa bidhi koṭika karahīṃ॥

लागइ अति पहार कर पानी। बिपिन बिपति नहिं जाइ बखानी।।

lāgai ati pahāra kara pānī। bipina bipati nahiṃ jāi bakhānī॥

ब्याल कराल बिहग बन घोरा। निसिचर निकर नारि नर चोरा।।

byāla karāla bihaga bana ghorā। nisicara nikara nāri nara corā॥

डरपहिं धीर गहन सुधि आएँ। मृगलोचनि तुम्ह भीरु सुभाएँ।।

ḍarapahiṃ dhīra gahana sudhi āe~। mṛgalocani tumha bhīru subhāe~॥

हंसगवनि तुम्ह नहिं बन जोगू। सुनि अपजसु मोहि देइहि लोगू।।

haṃsagavani tumha nahiṃ bana jogū। suni apajasu mohi deihi logū॥

मानस सलिल सुधाँ प्रतिपाली। जिअइ कि लवन पयोधि मराली।।

mānasa salila sudhā~ pratipālī। jiai ki lavana payodhi marālī॥

नव रसाल बन बिहरनसीला। सोह कि कोकिल बिपिन करीला।।

nava rasāla bana biharanasīlā। soha ki kokila bipina karīlā॥

रहहु भवन अस हृदयँ बिचारी। चंदबदनि दुखु कानन भारी।।

rahahu bhavana asa hṛdaya~ bicārī। caṃdabadani dukhu kānana bhārī॥

सहज सुह्द गुर स्वामि सिख जो न करइ सिर मानि।।

sahaja suhda gura svāmi sikha jo na karai sira māni॥

सो पछिताइ अघाइ उर अवसि होइ हित हानि।।63।।

so pachitāi aghāi ura avasi hoi hita hāni॥63॥

सुनि मृदु बचन मनोहर पिय के। लोचन ललित भरे जल सिय के।।

suni mṛdu bacana manohara piya ke। locana lalita bhare jala siya ke॥

सीतल सिख दाहक भइ कैंसें। चकइहि सरद चंद निसि जैंसें।।

sītala sikha dāhaka bhai kaiṃseṃ। cakaihi sarada caṃda nisi jaiṃseṃ॥

उतरु न आव बिकल बैदेही। तजन चहत सुचि स्वामि सनेही।।

utaru na āva bikala baidehī। tajana cahata suci svāmi sanehī॥

बरबस रोकि बिलोचन बारी। धरि धीरजु उर अवनिकुमारी।।

barabasa roki bilocana bārī। dhari dhīraju ura avanikumārī॥

लागि सासु पग कह कर जोरी। छमबि देबि बड़ि अबिनय मोरी।।

lāgi sāsu paga kaha kara jorī। chamabi debi bar̤i abinaya morī॥

दीन्हि प्रानपति मोहि सिख सोई। जेहि बिधि मोर परम हित होई।।

dīnhi prānapati mohi sikha soī। jehi bidhi mora parama hita hoī॥

मैं पुनि समुझि दीखि मन माहीं। पिय बियोग सम दुखु जग नाहीं।।

maiṃ puni samujhi dīkhi mana māhīṃ। piya biyoga sama dukhu jaga nāhīṃ॥

प्राननाथ करुनायतन सुंदर सुखद सुजान।

prānanātha karunāyatana suṃdara sukhada sujāna।

तुम्ह बिनु रघुकुल कुमुद बिधु सुरपुर नरक समान।।64।।

tumha binu raghukula kumuda bidhu surapura naraka samāna॥64॥

मातु पिता भगिनी प्रिय भाई। प्रिय परिवारु सुह्रद समुदाई।।

mātu pitā bhaginī priya bhāī। priya parivāru suhrada samudāī॥

सासु ससुर गुर सजन सहाई। सुत सुंदर सुसील सुखदाई।।

sāsu sasura gura sajana sahāī। suta suṃdara susīla sukhadāī॥

जहँ लगि नाथ नेह अरु नाते। पिय बिनु तियहि तरनिहु ते ताते।।

jaha~ lagi nātha neha aru nāte। piya binu tiyahi taranihu te tāte॥

तनु धनु धामु धरनि पुर राजू। पति बिहीन सबु सोक समाजू।।

tanu dhanu dhāmu dharani pura rājū। pati bihīna sabu soka samājū॥

भोग रोगसम भूषन भारू। जम जातना सरिस संसारू।।

bhoga rogasama bhūṣana bhārū। jama jātanā sarisa saṃsārū॥

प्राननाथ तुम्ह बिनु जग माहीं। मो कहुँ सुखद कतहुँ कछु नाहीं।।

prānanātha tumha binu jaga māhīṃ। mo kahu~ sukhada katahu~ kachu nāhīṃ॥

जिय बिनु देह नदी बिनु बारी। तैसिअ नाथ पुरुष बिनु नारी।।

jiya binu deha nadī binu bārī। taisia nātha puruṣa binu nārī॥

नाथ सकल सुख साथ तुम्हारें। सरद बिमल बिधु बदनु निहारें।।

nātha sakala sukha sātha tumhāreṃ। sarada bimala bidhu badanu nihāreṃ॥

खग मृग परिजन नगरु बनु बलकल बिमल दुकूल।

khaga mṛga parijana nagaru banu balakala bimala dukūla।

नाथ साथ सुरसदन सम परनसाल सुख मूल।।65।।

nātha sātha surasadana sama paranasāla sukha mūla॥65॥

बनदेवीं बनदेव उदारा। करिहहिं सासु ससुर सम सारा।।

banadevīṃ banadeva udārā। karihahiṃ sāsu sasura sama sārā॥

कुस किसलय साथरी सुहाई। प्रभु सँग मंजु मनोज तुराई।।

kusa kisalaya sātharī suhāī। prabhu sa~ga maṃju manoja turāī॥

कंद मूल फल अमिअ अहारू। अवध सौध सत सरिस पहारू।।

kaṃda mūla phala amia ahārū। avadha saudha sata sarisa pahārū॥

छिनु छिनु प्रभु पद कमल बिलोकि। रहिहउँ मुदित दिवस जिमि कोकी।।

chinu chinu prabhu pada kamala biloki। rahihau~ mudita divasa jimi kokī॥

बन दुख नाथ कहे बहुतेरे। भय बिषाद परिताप घनेरे।।

bana dukha nātha kahe bahutere। bhaya biṣāda paritāpa ghanere॥

प्रभु बियोग लवलेस समाना। सब मिलि होहिं न कृपानिधाना।।

prabhu biyoga lavalesa samānā। saba mili hohiṃ na kṛpānidhānā॥

अस जियँ जानि सुजान सिरोमनि। लेइअ संग मोहि छाड़िअ जनि।।

asa jiya~ jāni sujāna siromani। leia saṃga mohi chār̤ia jani॥

बिनती बहुत करौं का स्वामी। करुनामय उर अंतरजामी।।

binatī bahuta karauṃ kā svāmī। karunāmaya ura aṃtarajāmī॥

राखिअ अवध जो अवधि लगि रहत न जनिअहिं प्रान।

rākhia avadha jo avadhi lagi rahata na janiahiṃ prāna।

दीनबंधु संदर सुखद सील सनेह निधान।।66।।

dīnabaṃdhu saṃdara sukhada sīla saneha nidhāna॥66॥

मोहि मग चलत न होइहि हारी। छिनु छिनु चरन सरोज निहारी।।

mohi maga calata na hoihi hārī। chinu chinu carana saroja nihārī॥

सबहि भाँति पिय सेवा करिहौं। मारग जनित सकल श्रम हरिहौं।।

sabahi bhā~ti piya sevā karihauṃ। māraga janita sakala śrama harihauṃ॥

पाय पखारी बैठि तरु छाहीं। करिहउँ बाउ मुदित मन माहीं।।

pāya pakhārī baiṭhi taru chāhīṃ। karihau~ bāu mudita mana māhīṃ॥

श्रम कन सहित स्याम तनु देखें। कहँ दुख समउ प्रानपति पेखें।।

śrama kana sahita syāma tanu dekheṃ। kaha~ dukha samau prānapati pekheṃ॥

सम महि तृन तरुपल्लव डासी। पाग पलोटिहि सब निसि दासी।।

sama mahi tṛna tarupallava ḍāsī। pāga paloṭihi saba nisi dāsī॥

बारबार मृदु मूरति जोही। लागहि तात बयारि न मोही।

bārabāra mṛdu mūrati johī। lāgahi tāta bayāri na mohī।

को प्रभु सँग मोहि चितवनिहारा। सिंघबधुहि जिमि ससक सिआरा।।

ko prabhu sa~ga mohi citavanihārā। siṃghabadhuhi jimi sasaka siārā॥

मैं सुकुमारि नाथ बन जोगू। तुम्हहि उचित तप मो कहुँ भोगू।।

maiṃ sukumāri nātha bana jogū। tumhahi ucita tapa mo kahu~ bhogū॥

ऐसेउ बचन कठोर सुनि जौं न ह्रदउ बिलगान।

aiseu bacana kaṭhora suni jauṃ na hradau bilagāna।

तौ प्रभु बिषम बियोग दुख सहिहहिं पावँर प्रान।।67।।

tau prabhu biṣama biyoga dukha sahihahiṃ pāva~ra prāna॥67॥

अस कहि सीय बिकल भइ भारी। बचन बियोगु न सकी सँभारी।।

asa kahi sīya bikala bhai bhārī। bacana biyogu na sakī sa~bhārī॥

देखि दसा रघुपति जियँ जाना। हठि राखें नहिं राखिहि प्राना।।

dekhi dasā raghupati jiya~ jānā। haṭhi rākheṃ nahiṃ rākhihi prānā॥

कहेउ कृपाल भानुकुलनाथा। परिहरि सोचु चलहु बन साथा।।

kaheu kṛpāla bhānukulanāthā। parihari socu calahu bana sāthā॥

नहिं बिषाद कर अवसरु आजू। बेगि करहु बन गवन समाजू।।

nahiṃ biṣāda kara avasaru ājū। begi karahu bana gavana samājū॥

कहि प्रिय बचन प्रिया समुझाई। लगे मातु पद आसिष पाई।।

kahi priya bacana priyā samujhāī। lage mātu pada āsiṣa pāī॥

बेगि प्रजा दुख मेटब आई। जननी निठुर बिसरि जनि जाई।।

begi prajā dukha meṭaba āī। jananī niṭhura bisari jani jāī॥

फिरहि दसा बिधि बहुरि कि मोरी। देखिहउँ नयन मनोहर जोरी।।

phirahi dasā bidhi bahuri ki morī। dekhihau~ nayana manohara jorī॥

सुदिन सुघरी तात कब होइहि। जननी जिअत बदन बिधु जोइहि।।

sudina sugharī tāta kaba hoihi। jananī jiata badana bidhu joihi॥

बहुरि बच्छ कहि लालु कहि रघुपति रघुबर तात।

bahuri baccha kahi lālu kahi raghupati raghubara tāta।

कबहिं बोलाइ लगाइ हियँ हरषि निरखिहउँ गात।।68।।

kabahiṃ bolāi lagāi hiya~ haraṣi nirakhihau~ gāta॥68॥

लखि सनेह कातरि महतारी। बचनु न आव बिकल भइ भारी।।

lakhi saneha kātari mahatārī। bacanu na āva bikala bhai bhārī॥

राम प्रबोधु कीन्ह बिधि नाना। समउ सनेहु न जाइ बखाना।।

rāma prabodhu kīnha bidhi nānā। samau sanehu na jāi bakhānā॥

तब जानकी सासु पग लागी। सुनिअ माय मैं परम अभागी।।

taba jānakī sāsu paga lāgī। sunia māya maiṃ parama abhāgī॥

सेवा समय दैअँ बनु दीन्हा। मोर मनोरथु सफल न कीन्हा।।

sevā samaya daia~ banu dīnhā। mora manorathu saphala na kīnhā॥

तजब छोभु जनि छाड़िअ छोहू। करमु कठिन कछु दोसु न मोहू।।

tajaba chobhu jani chār̤ia chohū। karamu kaṭhina kachu dosu na mohū॥

सुनि सिय बचन सासु अकुलानी। दसा कवनि बिधि कहौं बखानी।।

suni siya bacana sāsu akulānī। dasā kavani bidhi kahauṃ bakhānī॥

बारहि बार लाइ उर लीन्ही। धरि धीरजु सिख आसिष दीन्ही।।

bārahi bāra lāi ura līnhī। dhari dhīraju sikha āsiṣa dīnhī॥

अचल होउ अहिवातु तुम्हारा। जब लगि गंग जमुन जल धारा।।

acala hou ahivātu tumhārā। jaba lagi gaṃga jamuna jala dhārā॥

सीतहि सासु असीस सिख दीन्हि अनेक प्रकार।

sītahi sāsu asīsa sikha dīnhi aneka prakāra।

चली नाइ पद पदुम सिरु अति हित बारहिं बार।।69।।

calī nāi pada paduma siru ati hita bārahiṃ bāra॥69॥

समाचार जब लछिमन पाए। ब्याकुल बिलख बदन उठि धाए।।

samācāra jaba lachimana pāe। byākula bilakha badana uṭhi dhāe॥

कंप पुलक तन नयन सनीरा। गहे चरन अति प्रेम अधीरा।।

kaṃpa pulaka tana nayana sanīrā। gahe carana ati prema adhīrā॥

कहि न सकत कछु चितवत ठाढ़े। मीनु दीन जनु जल तें काढ़े।।

kahi na sakata kachu citavata ṭhār̤he। mīnu dīna janu jala teṃ kār̤he॥

सोचु हृदयँ बिधि का होनिहारा। सबु सुखु सुकृत सिरान हमारा।।

socu hṛdaya~ bidhi kā honihārā। sabu sukhu sukṛta sirāna hamārā॥

मो कहुँ काह कहब रघुनाथा। रखिहहिं भवन कि लेहहिं साथा।।

mo kahu~ kāha kahaba raghunāthā। rakhihahiṃ bhavana ki lehahiṃ sāthā॥

राम बिलोकि बंधु कर जोरें। देह गेह सब सन तृनु तोरें।।

rāma biloki baṃdhu kara joreṃ। deha geha saba sana tṛnu toreṃ॥

बोले बचनु राम नय नागर। सील सनेह सरल सुख सागर।।

bole bacanu rāma naya nāgara। sīla saneha sarala sukha sāgara॥

तात प्रेम बस जनि कदराहू। समुझि हृदयँ परिनाम उछाहू।।

tāta prema basa jani kadarāhū। samujhi hṛdaya~ parināma uchāhū॥

मातु पिता गुरु स्वामि सिख सिर धरि करहि सुभायँ।

mātu pitā guru svāmi sikha sira dhari karahi subhāya~।

लहेउ लाभु तिन्ह जनम कर नतरु जनमु जग जायँ।।70।।

laheu lābhu tinha janama kara nataru janamu jaga jāya~॥70॥

अस जियँ जानि सुनहु सिख भाई। करहु मातु पितु पद सेवकाई।।

asa jiya~ jāni sunahu sikha bhāī। karahu mātu pitu pada sevakāī॥

भवन भरतु रिपुसूदन नाहीं। राउ बृद्ध मम दुखु मन माहीं।।

bhavana bharatu ripusūdana nāhīṃ। rāu bṛddha mama dukhu mana māhīṃ॥

मैं बन जाउँ तुम्हहि लेइ साथा। होइ सबहि बिधि अवध अनाथा।।

maiṃ bana jāu~ tumhahi lei sāthā। hoi sabahi bidhi avadha anāthā॥

गुरु पितु मातु प्रजा परिवारू। सब कहुँ परइ दुसह दुख भारू।।

guru pitu mātu prajā parivārū। saba kahu~ parai dusaha dukha bhārū॥

रहहु करहु सब कर परितोषू। नतरु तात होइहि बड़ दोषू।।

rahahu karahu saba kara paritoṣū। nataru tāta hoihi bar̤a doṣū॥

जासु राज प्रिय प्रजा दुखारी। सो नृपु अवसि नरक अधिकारी।।

jāsu rāja priya prajā dukhārī। so nṛpu avasi naraka adhikārī॥

रहहु तात असि नीति बिचारी। सुनत लखनु भए ब्याकुल भारी।।

rahahu tāta asi nīti bicārī। sunata lakhanu bhae byākula bhārī॥

सिअरें बचन सूखि गए कैंसें। परसत तुहिन तामरसु जैसें।।

siareṃ bacana sūkhi gae kaiṃseṃ। parasata tuhina tāmarasu jaiseṃ॥

उतरु न आवत प्रेम बस गहे चरन अकुलाइ।

utaru na āvata prema basa gahe carana akulāi।

नाथ दासु मैं स्वामि तुम्ह तजहु त काह बसाइ।।71।।

nātha dāsu maiṃ svāmi tumha tajahu ta kāha basāi॥71॥

दीन्हि मोहि सिख नीकि गोसाईं। लागि अगम अपनी कदराईं।।

dīnhi mohi sikha nīki gosāīṃ। lāgi agama apanī kadarāīṃ॥

नरबर धीर धरम धुर धारी। निगम नीति कहुँ ते अधिकारी।।

narabara dhīra dharama dhura dhārī। nigama nīti kahu~ te adhikārī॥

मैं सिसु प्रभु सनेहँ प्रतिपाला। मंदरु मेरु कि लेहिं मराला।।

maiṃ sisu prabhu saneha~ pratipālā। maṃdaru meru ki lehiṃ marālā॥

गुर पितु मातु न जानउँ काहू। कहउँ सुभाउ नाथ पतिआहू।।

gura pitu mātu na jānau~ kāhū। kahau~ subhāu nātha patiāhū॥

जहँ लगि जगत सनेह सगाई। प्रीति प्रतीति निगम निजु गाई।।

jaha~ lagi jagata saneha sagāī। prīti pratīti nigama niju gāī॥

मोरें सबइ एक तुम्ह स्वामी। दीनबंधु उर अंतरजामी।।

moreṃ sabai eka tumha svāmī। dīnabaṃdhu ura aṃtarajāmī॥

धरम नीति उपदेसिअ ताही। कीरति भूति सुगति प्रिय जाही।।

dharama nīti upadesia tāhī। kīrati bhūti sugati priya jāhī॥

मन क्रम बचन चरन रत होई। कृपासिंधु परिहरिअ कि सोई।।

mana krama bacana carana rata hoī। kṛpāsiṃdhu pariharia ki soī॥

करुनासिंधु सुबंध के सुनि मृदु बचन बिनीत।

karunāsiṃdhu subaṃdha ke suni mṛdu bacana binīta।

समुझाए उर लाइ प्रभु जानि सनेहँ सभीत।।72।।

samujhāe ura lāi prabhu jāni saneha~ sabhīta॥72॥

मागहु बिदा मातु सन जाई। आवहु बेगि चलहु बन भाई।।

māgahu bidā mātu sana jāī। āvahu begi calahu bana bhāī॥

मुदित भए सुनि रघुबर बानी। भयउ लाभ बड़ गइ बड़ि हानी।।

mudita bhae suni raghubara bānī। bhayau lābha bar̤a gai bar̤i hānī॥

हरषित ह्दयँ मातु पहिं आए। मनहुँ अंध फिरि लोचन पाए।

haraṣita hdaya~ mātu pahiṃ āe। manahu~ aṃdha phiri locana pāe।

जाइ जननि पग नायउ माथा। मनु रघुनंदन जानकि साथा।।

jāi janani paga nāyau māthā। manu raghunaṃdana jānaki sāthā॥

पूँछे मातु मलिन मन देखी। लखन कही सब कथा बिसेषी।।

pū~che mātu malina mana dekhī। lakhana kahī saba kathā biseṣī॥

गई सहमि सुनि बचन कठोरा। मृगी देखि दव जनु चहु ओरा।।

gaī sahami suni bacana kaṭhorā। mṛgī dekhi dava janu cahu orā॥

लखन लखेउ भा अनरथ आजू। एहिं सनेह बस करब अकाजू।।

lakhana lakheu bhā anaratha ājū। ehiṃ saneha basa karaba akājū॥

मागत बिदा सभय सकुचाहीं। जाइ संग बिधि कहिहि कि नाही।।

māgata bidā sabhaya sakucāhīṃ। jāi saṃga bidhi kahihi ki nāhī॥

समुझि सुमित्राँ राम सिय रूप सुसीलु सुभाउ।

samujhi sumitrā~ rāma siya rūpa susīlu subhāu।

नृप सनेहु लखि धुनेउ सिरु पापिनि दीन्ह कुदाउ।।73।।

nṛpa sanehu lakhi dhuneu siru pāpini dīnha kudāu॥73॥

धीरजु धरेउ कुअवसर जानी। सहज सुह्द बोली मृदु बानी।।

dhīraju dhareu kuavasara jānī। sahaja suhda bolī mṛdu bānī॥

तात तुम्हारि मातु बैदेही। पिता रामु सब भाँति सनेही।।

tāta tumhāri mātu baidehī। pitā rāmu saba bhā~ti sanehī॥

अवध तहाँ जहँ राम निवासू। तहँइँ दिवसु जहँ भानु प्रकासू।।

avadha tahā~ jaha~ rāma nivāsū। taha~i~ divasu jaha~ bhānu prakāsū॥

जौ पै सीय रामु बन जाहीं। अवध तुम्हार काजु कछु नाहिं।।

jau pai sīya rāmu bana jāhīṃ। avadha tumhāra kāju kachu nāhiṃ॥

गुर पितु मातु बंधु सुर साई। सेइअहिं सकल प्रान की नाईं।।

gura pitu mātu baṃdhu sura sāī। seiahiṃ sakala prāna kī nāīṃ॥

रामु प्रानप्रिय जीवन जी के। स्वारथ रहित सखा सबही कै।।

rāmu prānapriya jīvana jī ke। svāratha rahita sakhā sabahī kai॥

पूजनीय प्रिय परम जहाँ तें। सब मानिअहिं राम के नातें।।

pūjanīya priya parama jahā~ teṃ। saba māniahiṃ rāma ke nāteṃ॥

अस जियँ जानि संग बन जाहू। लेहु तात जग जीवन लाहू।।

asa jiya~ jāni saṃga bana jāhū। lehu tāta jaga jīvana lāhū॥

भूरि भाग भाजनु भयहु मोहि समेत बलि जाउँ।

bhūri bhāga bhājanu bhayahu mohi sameta bali jāu~।

जौम तुम्हरें मन छाड़ि छलु कीन्ह राम पद ठाउँ।।74।।

jauma tumhareṃ mana chār̤i chalu kīnha rāma pada ṭhāu~॥74॥

पुत्रवती जुबती जग सोई। रघुपति भगतु जासु सुतु होई।।

putravatī jubatī jaga soī। raghupati bhagatu jāsu sutu hoī॥

नतरु बाँझ भलि बादि बिआनी। राम बिमुख सुत तें हित जानी।।

nataru bā~jha bhali bādi biānī। rāma bimukha suta teṃ hita jānī॥

तुम्हरेहिं भाग रामु बन जाहीं। दूसर हेतु तात कछु नाहीं।।

tumharehiṃ bhāga rāmu bana jāhīṃ। dūsara hetu tāta kachu nāhīṃ॥

सकल सुकृत कर बड़ फलु एहू। राम सीय पद सहज सनेहू।।

sakala sukṛta kara bar̤a phalu ehū। rāma sīya pada sahaja sanehū॥

राग रोषु इरिषा मदु मोहू। जनि सपनेहुँ इन्ह के बस होहू।।

rāga roṣu iriṣā madu mohū। jani sapanehu~ inha ke basa hohū॥

सकल प्रकार बिकार बिहाई। मन क्रम बचन करेहु सेवकाई।।

sakala prakāra bikāra bihāī। mana krama bacana karehu sevakāī॥

तुम्ह कहुँ बन सब भाँति सुपासू। सँग पितु मातु रामु सिय जासू।।

tumha kahu~ bana saba bhā~ti supāsū। sa~ga pitu mātu rāmu siya jāsū॥

जेहिं न रामु बन लहहिं कलेसू। सुत सोइ करेहु इहइ उपदेसू।।

jehiṃ na rāmu bana lahahiṃ kalesū। suta soi karehu ihai upadesū॥

उपदेसु यहु जेहिं तात तुम्हरे राम सिय सुख पावहीं।

upadesu yahu jehiṃ tāta tumhare rāma siya sukha pāvahīṃ।

पितु मातु प्रिय परिवार पुर सुख सुरति बन बिसरावहीं।।

pitu mātu priya parivāra pura sukha surati bana bisarāvahīṃ॥

तुलसी प्रभुहि सिख देइ आयसु दीन्ह पुनि आसिष दई।

tulasī prabhuhi sikha dei āyasu dīnha puni āsiṣa daī।

रति होउ अबिरल अमल सिय रघुबीर पद नित नित नई।।

rati hou abirala amala siya raghubīra pada nita nita naī॥

मातु चरन सिरु नाइ चले तुरत संकित हृदयँ।

mātu carana siru nāi cale turata saṃkita hṛdaya~।

बागुर बिषम तोराइ मनहुँ भाग मृगु भाग बस।।75।।

bāgura biṣama torāi manahu~ bhāga mṛgu bhāga basa॥75॥

गए लखनु जहँ जानकिनाथू। भे मन मुदित पाइ प्रिय साथू।।

gae lakhanu jaha~ jānakināthū। bhe mana mudita pāi priya sāthū॥

बंदि राम सिय चरन सुहाए। चले संग नृपमंदिर आए।।

baṃdi rāma siya carana suhāe। cale saṃga nṛpamaṃdira āe॥

कहहिं परसपर पुर नर नारी। भलि बनाइ बिधि बात बिगारी।।

kahahiṃ parasapara pura nara nārī। bhali banāi bidhi bāta bigārī॥

तन कृस दुखु बदन मलीने। बिकल मनहुँ माखी मधु छीने।।

tana kṛsa dukhu badana malīne। bikala manahu~ mākhī madhu chīne॥

कर मीजहिं सिरु धुनि पछिताहीं। जनु बिन पंख बिहग अकुलाहीं।।

kara mījahiṃ siru dhuni pachitāhīṃ। janu bina paṃkha bihaga akulāhīṃ॥

भइ बड़ि भीर भूप दरबारा। बरनि न जाइ बिषादु अपारा।।

bhai bar̤i bhīra bhūpa darabārā। barani na jāi biṣādu apārā॥

सचिवँ उठाइ राउ बैठारे। कहि प्रिय बचन रामु पगु धारे।।

saciva~ uṭhāi rāu baiṭhāre। kahi priya bacana rāmu pagu dhāre॥

सिय समेत दोउ तनय निहारी। ब्याकुल भयउ भूमिपति भारी।।

siya sameta dou tanaya nihārī। byākula bhayau bhūmipati bhārī॥

सीय सहित सुत सुभग दोउ देखि देखि अकुलाइ।

sīya sahita suta subhaga dou dekhi dekhi akulāi।

बारहिं बार सनेह बस राउ लेइ उर लाइ।।76।।

bārahiṃ bāra saneha basa rāu lei ura lāi॥76॥

सकइ न बोलि बिकल नरनाहू। सोक जनित उर दारुन दाहू।।

sakai na boli bikala naranāhū। soka janita ura dāruna dāhū॥

नाइ सीसु पद अति अनुरागा। उठि रघुबीर बिदा तब मागा।।

nāi sīsu pada ati anurāgā। uṭhi raghubīra bidā taba māgā॥

पितु असीस आयसु मोहि दीजै। हरष समय बिसमउ कत कीजै।।

pitu asīsa āyasu mohi dījai। haraṣa samaya bisamau kata kījai॥

तात किएँ प्रिय प्रेम प्रमादू। जसु जग जाइ होइ अपबादू।।

tāta kie~ priya prema pramādū। jasu jaga jāi hoi apabādū॥

सुनि सनेह बस उठि नरनाहाँ। बैठारे रघुपति गहि बाहाँ।।

suni saneha basa uṭhi naranāhā~। baiṭhāre raghupati gahi bāhā~॥

सुनहु तात तुम्ह कहुँ मुनि कहहीं। रामु चराचर नायक अहहीं।।

sunahu tāta tumha kahu~ muni kahahīṃ। rāmu carācara nāyaka ahahīṃ॥

सुभ अरु असुभ करम अनुहारी। ईस देइ फलु ह्दयँ बिचारी।।

subha aru asubha karama anuhārī। īsa dei phalu hdaya~ bicārī॥

करइ जो करम पाव फल सोई। निगम नीति असि कह सबु कोई।।

karai jo karama pāva phala soī। nigama nīti asi kaha sabu koī॥

औरु करै अपराधु कोउ और पाव फल भोगु।

auru karai aparādhu kou aura pāva phala bhogu।

अति बिचित्र भगवंत गति को जग जानै जोगु।।77।।

ati bicitra bhagavaṃta gati ko jaga jānai jogu॥77॥

रायँ राम राखन हित लागी। बहुत उपाय किए छलु त्यागी।।

rāya~ rāma rākhana hita lāgī। bahuta upāya kie chalu tyāgī॥

लखी राम रुख रहत न जाने। धरम धुरंधर धीर सयाने।।

lakhī rāma rukha rahata na jāne। dharama dhuraṃdhara dhīra sayāne॥

तब नृप सीय लाइ उर लीन्ही। अति हित बहुत भाँति सिख दीन्ही।।

taba nṛpa sīya lāi ura līnhī। ati hita bahuta bhā~ti sikha dīnhī॥

कहि बन के दुख दुसह सुनाए। सासु ससुर पितु सुख समुझाए।।

kahi bana ke dukha dusaha sunāe। sāsu sasura pitu sukha samujhāe॥

सिय मनु राम चरन अनुरागा। घरु न सुगमु बनु बिषमु न लागा।।

siya manu rāma carana anurāgā। gharu na sugamu banu biṣamu na lāgā॥

औरउ सबहिं सीय समुझाई। कहि कहि बिपिन बिपति अधिकाई।।

aurau sabahiṃ sīya samujhāī। kahi kahi bipina bipati adhikāī॥

सचिव नारि गुर नारि सयानी। सहित सनेह कहहिं मृदु बानी।।

saciva nāri gura nāri sayānī। sahita saneha kahahiṃ mṛdu bānī॥

तुम्ह कहुँ तौ न दीन्ह बनबासू। करहु जो कहहिं ससुर गुर सासू।।

tumha kahu~ tau na dīnha banabāsū। karahu jo kahahiṃ sasura gura sāsū॥

-सिख सीतलि हित मधुर मृदु सुनि सीतहि न सोहानि।

-sikha sītali hita madhura mṛdu suni sītahi na sohāni।

सरद चंद चंदनि लगत जनु चकई अकुलानि।।78।।

sarada caṃda caṃdani lagata janu cakaī akulāni॥78॥

सीय सकुच बस उतरु न देई। सो सुनि तमकि उठी कैकेई।।

sīya sakuca basa utaru na deī। so suni tamaki uṭhī kaikeī॥

मुनि पट भूषन भाजन आनी। आगें धरि बोली मृदु बानी।।

muni paṭa bhūṣana bhājana ānī। āgeṃ dhari bolī mṛdu bānī॥

नृपहि प्रान प्रिय तुम्ह रघुबीरा। सील सनेह न छाड़िहि भीरा।।

nṛpahi prāna priya tumha raghubīrā। sīla saneha na chār̤ihi bhīrā॥

सुकृत सुजसु परलोकु नसाऊ। तुम्हहि जान बन कहिहि न काऊ।।

sukṛta sujasu paraloku nasāū। tumhahi jāna bana kahihi na kāū॥

अस बिचारि सोइ करहु जो भावा। राम जननि सिख सुनि सुखु पावा।।

asa bicāri soi karahu jo bhāvā। rāma janani sikha suni sukhu pāvā॥

भूपहि बचन बानसम लागे। करहिं न प्रान पयान अभागे।।

bhūpahi bacana bānasama lāge। karahiṃ na prāna payāna abhāge॥

लोग बिकल मुरुछित नरनाहू। काह करिअ कछु सूझ न काहू।।

loga bikala muruchita naranāhū। kāha karia kachu sūjha na kāhū॥

रामु तुरत मुनि बेषु बनाई। चले जनक जननिहि सिरु नाई।।

rāmu turata muni beṣu banāī। cale janaka jananihi siru nāī॥

सजि बन साजु समाजु सबु बनिता बंधु समेत।

saji bana sāju samāju sabu banitā baṃdhu sameta।

बंदि बिप्र गुर चरन प्रभु चले करि सबहि अचेत।।79।।

baṃdi bipra gura carana prabhu cale kari sabahi aceta॥79॥

निकसि बसिष्ठ द्वार भए ठाढ़े। देखे लोग बिरह दव दाढ़े।।

nikasi basiṣṭha dvāra bhae ṭhār̤he। dekhe loga biraha dava dār̤he॥

कहि प्रिय बचन सकल समुझाए। बिप्र बृंद रघुबीर बोलाए।।

kahi priya bacana sakala samujhāe। bipra bṛṃda raghubīra bolāe॥

गुर सन कहि बरषासन दीन्हे। आदर दान बिनय बस कीन्हे।।

gura sana kahi baraṣāsana dīnhe। ādara dāna binaya basa kīnhe॥

जाचक दान मान संतोषे। मीत पुनीत प्रेम परितोषे।।

jācaka dāna māna saṃtoṣe। mīta punīta prema paritoṣe॥

दासीं दास बोलाइ बहोरी। गुरहि सौंपि बोले कर जोरी।।

dāsīṃ dāsa bolāi bahorī। gurahi sauṃpi bole kara jorī॥

सब कै सार सँभार गोसाईं। करबि जनक जननी की नाई।।

saba kai sāra sa~bhāra gosāīṃ। karabi janaka jananī kī nāī॥

बारहिं बार जोरि जुग पानी। कहत रामु सब सन मृदु बानी।।

bārahiṃ bāra jori juga pānī। kahata rāmu saba sana mṛdu bānī॥

सोइ सब भाँति मोर हितकारी। जेहि तें रहै भुआल सुखारी।।

soi saba bhā~ti mora hitakārī। jehi teṃ rahai bhuāla sukhārī॥

मातु सकल मोरे बिरहँ जेहिं न होहिं दुख दीन।

mātu sakala more biraha~ jehiṃ na hohiṃ dukha dīna।

सोइ उपाउ तुम्ह करेहु सब पुर जन परम प्रबीन।।80।।

soi upāu tumha karehu saba pura jana parama prabīna॥80॥

एहि बिधि राम सबहि समुझावा। गुर पद पदुम हरषि सिरु नावा।

ehi bidhi rāma sabahi samujhāvā। gura pada paduma haraṣi siru nāvā।

गनपती गौरि गिरीसु मनाई। चले असीस पाइ रघुराई।।

ganapatī gauri girīsu manāī। cale asīsa pāi raghurāī॥

राम चलत अति भयउ बिषादू। सुनि न जाइ पुर आरत नादू।।

rāma calata ati bhayau biṣādū। suni na jāi pura ārata nādū॥

कुसगुन लंक अवध अति सोकू। हहरष बिषाद बिबस सुरलोकू।।

kusaguna laṃka avadha ati sokū। haharaṣa biṣāda bibasa suralokū॥

गइ मुरुछा तब भूपति जागे। बोलि सुमंत्रु कहन अस लागे।।

gai muruchā taba bhūpati jāge। boli sumaṃtru kahana asa lāge॥

रामु चले बन प्रान न जाहीं। केहि सुख लागि रहत तन माहीं।

rāmu cale bana prāna na jāhīṃ। kehi sukha lāgi rahata tana māhīṃ।

एहि तें कवन ब्यथा बलवाना। जो दुखु पाइ तजहिं तनु प्राना।।

ehi teṃ kavana byathā balavānā। jo dukhu pāi tajahiṃ tanu prānā॥

पुनि धरि धीर कहइ नरनाहू। लै रथु संग सखा तुम्ह जाहू।।

puni dhari dhīra kahai naranāhū। lai rathu saṃga sakhā tumha jāhū॥

-सुठि सुकुमार कुमार दोउ जनकसुता सुकुमारि।

-suṭhi sukumāra kumāra dou janakasutā sukumāri।

रथ चढ़ाइ देखराइ बनु फिरेहु गएँ दिन चारि।।81।।

ratha car̤hāi dekharāi banu phirehu gae~ dina cāri॥81॥

जौ नहिं फिरहिं धीर दोउ भाई। सत्यसंध दृढ़ब्रत रघुराई।।

jau nahiṃ phirahiṃ dhīra dou bhāī। satyasaṃdha dṛr̤habrata raghurāī॥

तौ तुम्ह बिनय करेहु कर जोरी। फेरिअ प्रभु मिथिलेसकिसोरी।।

tau tumha binaya karehu kara jorī। pheria prabhu mithilesakisorī॥

जब सिय कानन देखि डेराई। कहेहु मोरि सिख अवसरु पाई।।

jaba siya kānana dekhi ḍerāī। kahehu mori sikha avasaru pāī॥

सासु ससुर अस कहेउ सँदेसू। पुत्रि फिरिअ बन बहुत कलेसू।।

sāsu sasura asa kaheu sa~desū। putri phiria bana bahuta kalesū॥

पितृगृह कबहुँ कबहुँ ससुरारी। रहेहु जहाँ रुचि होइ तुम्हारी।।

pitṛgṛha kabahu~ kabahu~ sasurārī। rahehu jahā~ ruci hoi tumhārī॥

एहि बिधि करेहु उपाय कदंबा। फिरइ त होइ प्रान अवलंबा।।

ehi bidhi karehu upāya kadaṃbā। phirai ta hoi prāna avalaṃbā॥

नाहिं त मोर मरनु परिनामा। कछु न बसाइ भएँ बिधि बामा।।

nāhiṃ ta mora maranu parināmā। kachu na basāi bhae~ bidhi bāmā॥

अस कहि मुरुछि परा महि राऊ। रामु लखनु सिय आनि देखाऊ।।

asa kahi muruchi parā mahi rāū। rāmu lakhanu siya āni dekhāū॥

-पाइ रजायसु नाइ सिरु रथु अति बेग बनाइ।

-pāi rajāyasu nāi siru rathu ati bega banāi।

गयउ जहाँ बाहेर नगर सीय सहित दोउ भाइ।।82।।

gayau jahā~ bāhera nagara sīya sahita dou bhāi॥82॥

तब सुमंत्र नृप बचन सुनाए। करि बिनती रथ रामु चढ़ाए।।

taba sumaṃtra nṛpa bacana sunāe। kari binatī ratha rāmu car̤hāe॥

चढ़ि रथ सीय सहित दोउ भाई। चले हृदयँ अवधहि सिरु नाई।।

car̤hi ratha sīya sahita dou bhāī। cale hṛdaya~ avadhahi siru nāī॥

चलत रामु लखि अवध अनाथा। बिकल लोग सब लागे साथा।।

calata rāmu lakhi avadha anāthā। bikala loga saba lāge sāthā॥

कृपासिंधु बहुबिधि समुझावहिं। फिरहिं प्रेम बस पुनि फिरि आवहिं।।

kṛpāsiṃdhu bahubidhi samujhāvahiṃ। phirahiṃ prema basa puni phiri āvahiṃ॥

लागति अवध भयावनि भारी। मानहुँ कालराति अँधिआरी।।

lāgati avadha bhayāvani bhārī। mānahu~ kālarāti a~dhiārī॥

घोर जंतु सम पुर नर नारी। डरपहिं एकहि एक निहारी।।

ghora jaṃtu sama pura nara nārī। ḍarapahiṃ ekahi eka nihārī॥

घर मसान परिजन जनु भूता। सुत हित मीत मनहुँ जमदूता।।

ghara masāna parijana janu bhūtā। suta hita mīta manahu~ jamadūtā॥

बागन्ह बिटप बेलि कुम्हिलाहीं। सरित सरोवर देखि न जाहीं।।

bāganha biṭapa beli kumhilāhīṃ। sarita sarovara dekhi na jāhīṃ॥

हय गय कोटिन्ह केलिमृग पुरपसु चातक मोर।

haya gaya koṭinha kelimṛga purapasu cātaka mora।

पिक रथांग सुक सारिका सारस हंस चकोर।।83।।

pika rathāṃga suka sārikā sārasa haṃsa cakora॥83॥

राम बियोग बिकल सब ठाढ़े। जहँ तहँ मनहुँ चित्र लिखि काढ़े।।

rāma biyoga bikala saba ṭhār̤he। jaha~ taha~ manahu~ citra likhi kār̤he॥

नगरु सफल बनु गहबर भारी। खग मृग बिपुल सकल नर नारी।।

nagaru saphala banu gahabara bhārī। khaga mṛga bipula sakala nara nārī॥

बिधि कैकेई किरातिनि कीन्ही। जेंहि दव दुसह दसहुँ दिसि दीन्ही।।

bidhi kaikeī kirātini kīnhī। jeṃhi dava dusaha dasahu~ disi dīnhī॥

सहि न सके रघुबर बिरहागी। चले लोग सब ब्याकुल भागी।।

sahi na sake raghubara birahāgī। cale loga saba byākula bhāgī॥

सबहिं बिचार कीन्ह मन माहीं। राम लखन सिय बिनु सुखु नाहीं।।

sabahiṃ bicāra kīnha mana māhīṃ। rāma lakhana siya binu sukhu nāhīṃ॥

जहाँ रामु तहँ सबुइ समाजू। बिनु रघुबीर अवध नहिं काजू।।

jahā~ rāmu taha~ sabui samājū। binu raghubīra avadha nahiṃ kājū॥

चले साथ अस मंत्रु दृढ़ाई। सुर दुर्लभ सुख सदन बिहाई।।

cale sātha asa maṃtru dṛr̤hāī। sura durlabha sukha sadana bihāī॥

राम चरन पंकज प्रिय जिन्हही। बिषय भोग बस करहिं कि तिन्हही।।

rāma carana paṃkaja priya jinhahī। biṣaya bhoga basa karahiṃ ki tinhahī॥

बालक बृद्ध बिहाइ गृँह लगे लोग सब साथ।

bālaka bṛddha bihāi gṛ~ha lage loga saba sātha।

तमसा तीर निवासु किय प्रथम दिवस रघुनाथ।।84।।

tamasā tīra nivāsu kiya prathama divasa raghunātha॥84॥

रघुपति प्रजा प्रेमबस देखी। सदय हृदयँ दुखु भयउ बिसेषी।।

raghupati prajā premabasa dekhī। sadaya hṛdaya~ dukhu bhayau biseṣī॥

करुनामय रघुनाथ गोसाँई। बेगि पाइअहिं पीर पराई।।

karunāmaya raghunātha gosā~ī। begi pāiahiṃ pīra parāī॥

कहि सप्रेम मृदु बचन सुहाए। बहुबिधि राम लोग समुझाए।।

kahi saprema mṛdu bacana suhāe। bahubidhi rāma loga samujhāe॥

किए धरम उपदेस घनेरे। लोग प्रेम बस फिरहिं न फेरे।।

kie dharama upadesa ghanere। loga prema basa phirahiṃ na phere॥

सीलु सनेहु छाड़ि नहिं जाई। असमंजस बस भे रघुराई।।

sīlu sanehu chār̤i nahiṃ jāī। asamaṃjasa basa bhe raghurāī॥

लोग सोग श्रम बस गए सोई। कछुक देवमायाँ मति मोई।।

loga soga śrama basa gae soī। kachuka devamāyā~ mati moī॥

जबहिं जाम जुग जामिनि बीती। राम सचिव सन कहेउ सप्रीती।।

jabahiṃ jāma juga jāmini bītī। rāma saciva sana kaheu saprītī॥

खोज मारि रथु हाँकहु ताता। आन उपायँ बनिहि नहिं बाता।।

khoja māri rathu hā~kahu tātā। āna upāya~ banihi nahiṃ bātā॥

राम लखन सुय जान चढ़ि संभु चरन सिरु नाइ।।

rāma lakhana suya jāna car̤hi saṃbhu carana siru nāi॥

सचिवँ चलायउ तुरत रथु इत उत खोज दुराइ।।85।।

saciva~ calāyau turata rathu ita uta khoja durāi॥85॥

जागे सकल लोग भएँ भोरू। गे रघुनाथ भयउ अति सोरू।।

jāge sakala loga bhae~ bhorū। ge raghunātha bhayau ati sorū॥

रथ कर खोज कतहहुँ नहिं पावहिं। राम राम कहि चहु दिसि धावहिं।।

ratha kara khoja katahahu~ nahiṃ pāvahiṃ। rāma rāma kahi cahu disi dhāvahiṃ॥

मनहुँ बारिनिधि बूड़ जहाजू। भयउ बिकल बड़ बनिक समाजू।।

manahu~ bārinidhi būr̤a jahājū। bhayau bikala bar̤a banika samājū॥

एकहि एक देंहिं उपदेसू। तजे राम हम जानि कलेसू।।

ekahi eka deṃhiṃ upadesū। taje rāma hama jāni kalesū॥

निंदहिं आपु सराहहिं मीना। धिग जीवनु रघुबीर बिहीना।।

niṃdahiṃ āpu sarāhahiṃ mīnā। dhiga jīvanu raghubīra bihīnā॥

जौं पै प्रिय बियोगु बिधि कीन्हा। तौ कस मरनु न मागें दीन्हा।।

jauṃ pai priya biyogu bidhi kīnhā। tau kasa maranu na māgeṃ dīnhā॥

एहि बिधि करत प्रलाप कलापा। आए अवध भरे परितापा।।

ehi bidhi karata pralāpa kalāpā। āe avadha bhare paritāpā॥

बिषम बियोगु न जाइ बखाना। अवधि आस सब राखहिं प्राना।।

biṣama biyogu na jāi bakhānā। avadhi āsa saba rākhahiṃ prānā॥

राम दरस हित नेम ब्रत लगे करन नर नारि।

rāma darasa hita nema brata lage karana nara nāri।

मनहुँ कोक कोकी कमल दीन बिहीन तमारि।।86।।

manahu~ koka kokī kamala dīna bihīna tamāri॥86॥

सीता सचिव सहित दोउ भाई। सृंगबेरपुर पहुँचे जाई।।

sītā saciva sahita dou bhāī। sṛṃgaberapura pahu~ce jāī॥

उतरे राम देवसरि देखी। कीन्ह दंडवत हरषु बिसेषी।।

utare rāma devasari dekhī। kīnha daṃḍavata haraṣu biseṣī॥

लखन सचिवँ सियँ किए प्रनामा। सबहि सहित सुखु पायउ रामा।।

lakhana saciva~ siya~ kie pranāmā। sabahi sahita sukhu pāyau rāmā॥

गंग सकल मुद मंगल मूला। सब सुख करनि हरनि सब सूला।।

gaṃga sakala muda maṃgala mūlā। saba sukha karani harani saba sūlā॥

कहि कहि कोटिक कथा प्रसंगा। रामु बिलोकहिं गंग तरंगा।।

kahi kahi koṭika kathā prasaṃgā। rāmu bilokahiṃ gaṃga taraṃgā॥

सचिवहि अनुजहि प्रियहि सुनाई। बिबुध नदी महिमा अधिकाई।।

sacivahi anujahi priyahi sunāī। bibudha nadī mahimā adhikāī॥

मज्जनु कीन्ह पंथ श्रम गयऊ। सुचि जलु पिअत मुदित मन भयऊ।।

majjanu kīnha paṃtha śrama gayaū। suci jalu piata mudita mana bhayaū॥

सुमिरत जाहि मिटइ श्रम भारू। तेहि श्रम यह लौकिक ब्यवहारू।।

sumirata jāhi miṭai śrama bhārū। tehi śrama yaha laukika byavahārū॥

सुध्द सचिदानंदमय कंद भानुकुल केतु।

sudhda sacidānaṃdamaya kaṃda bhānukula ketu।

चरित करत नर अनुहरत संसृति सागर सेतु।।87।।

carita karata nara anuharata saṃsṛti sāgara setu॥87॥

यह सुधि गुहँ निषाद जब पाई। मुदित लिए प्रिय बंधु बोलाई।।

yaha sudhi guha~ niṣāda jaba pāī। mudita lie priya baṃdhu bolāī॥

लिए फल मूल भेंट भरि भारा। मिलन चलेउ हिंयँ हरषु अपारा।।

lie phala mūla bheṃṭa bhari bhārā। milana caleu hiṃya~ haraṣu apārā॥

करि दंडवत भेंट धरि आगें। प्रभुहि बिलोकत अति अनुरागें।।

kari daṃḍavata bheṃṭa dhari āgeṃ। prabhuhi bilokata ati anurāgeṃ॥

सहज सनेह बिबस रघुराई। पूँछी कुसल निकट बैठाई।।

sahaja saneha bibasa raghurāī। pū~chī kusala nikaṭa baiṭhāī॥

नाथ कुसल पद पंकज देखें। भयउँ भागभाजन जन लेखें।।

nātha kusala pada paṃkaja dekheṃ। bhayau~ bhāgabhājana jana lekheṃ॥

देव धरनि धनु धामु तुम्हारा। मैं जनु नीचु सहित परिवारा।।

deva dharani dhanu dhāmu tumhārā। maiṃ janu nīcu sahita parivārā॥

कृपा करिअ पुर धारिअ पाऊ। थापिय जनु सबु लोगु सिहाऊ।।

kṛpā karia pura dhāria pāū। thāpiya janu sabu logu sihāū॥

कहेहु सत्य सबु सखा सुजाना। मोहि दीन्ह पितु आयसु आना।।

kahehu satya sabu sakhā sujānā। mohi dīnha pitu āyasu ānā॥

बरष चारिदस बासु बन मुनि ब्रत बेषु अहारु।

baraṣa cāridasa bāsu bana muni brata beṣu ahāru।

ग्राम बासु नहिं उचित सुनि गुहहि भयउ दुखु भारु।।88।।

grāma bāsu nahiṃ ucita suni guhahi bhayau dukhu bhāru॥88॥

राम लखन सिय रूप निहारी। कहहिं सप्रेम ग्राम नर नारी।।

rāma lakhana siya rūpa nihārī। kahahiṃ saprema grāma nara nārī॥

ते पितु मातु कहहु सखि कैसे। जिन्ह पठए बन बालक ऐसे।।

te pitu mātu kahahu sakhi kaise। jinha paṭhae bana bālaka aise॥

एक कहहिं भल भूपति कीन्हा। लोयन लाहु हमहि बिधि दीन्हा।।

eka kahahiṃ bhala bhūpati kīnhā। loyana lāhu hamahi bidhi dīnhā॥

तब निषादपति उर अनुमाना। तरु सिंसुपा मनोहर जाना।।

taba niṣādapati ura anumānā। taru siṃsupā manohara jānā॥

लै रघुनाथहि ठाउँ देखावा। कहेउ राम सब भाँति सुहावा।।

lai raghunāthahi ṭhāu~ dekhāvā। kaheu rāma saba bhā~ti suhāvā॥

पुरजन करि जोहारु घर आए। रघुबर संध्या करन सिधाए।।

purajana kari johāru ghara āe। raghubara saṃdhyā karana sidhāe॥

गुहँ सँवारि साँथरी डसाई। कुस किसलयमय मृदुल सुहाई।।

guha~ sa~vāri sā~tharī ḍasāī। kusa kisalayamaya mṛdula suhāī॥

सुचि फल मूल मधुर मृदु जानी। दोना भरि भरि राखेसि पानी।।

suci phala mūla madhura mṛdu jānī। donā bhari bhari rākhesi pānī॥

सिय सुमंत्र भ्राता सहित कंद मूल फल खाइ।

siya sumaṃtra bhrātā sahita kaṃda mūla phala khāi।

सयन कीन्ह रघुबंसमनि पाय पलोटत भाइ।।89।।

sayana kīnha raghubaṃsamani pāya paloṭata bhāi॥89॥

उठे लखनु प्रभु सोवत जानी। कहि सचिवहि सोवन मृदु बानी।।

uṭhe lakhanu prabhu sovata jānī। kahi sacivahi sovana mṛdu bānī॥

कछुक दूर सजि बान सरासन। जागन लगे बैठि बीरासन।।

kachuka dūra saji bāna sarāsana। jāgana lage baiṭhi bīrāsana॥

गुँह बोलाइ पाहरू प्रतीती। ठावँ ठाँव राखे अति प्रीती।।

gu~ha bolāi pāharū pratītī। ṭhāva~ ṭhā~va rākhe ati prītī॥

आपु लखन पहिं बैठेउ जाई। कटि भाथी सर चाप चढ़ाई।।

āpu lakhana pahiṃ baiṭheu jāī। kaṭi bhāthī sara cāpa car̤hāī॥

सोवत प्रभुहि निहारि निषादू। भयउ प्रेम बस ह्दयँ बिषादू।।

sovata prabhuhi nihāri niṣādū। bhayau prema basa hdaya~ biṣādū॥

तनु पुलकित जलु लोचन बहई। बचन सप्रेम लखन सन कहई।।

tanu pulakita jalu locana bahaī। bacana saprema lakhana sana kahaī॥

भूपति भवन सुभायँ सुहावा। सुरपति सदनु न पटतर पावा।।

bhūpati bhavana subhāya~ suhāvā। surapati sadanu na paṭatara pāvā॥

मनिमय रचित चारु चौबारे। जनु रतिपति निज हाथ सँवारे।।

manimaya racita cāru caubāre। janu ratipati nija hātha sa~vāre॥

सुचि सुबिचित्र सुभोगमय सुमन सुगंध सुबास।

suci subicitra subhogamaya sumana sugaṃdha subāsa।

पलँग मंजु मनिदीप जहँ सब बिधि सकल सुपास।।90।।

pala~ga maṃju manidīpa jaha~ saba bidhi sakala supāsa॥90॥

बिबिध बसन उपधान तुराई। छीर फेन मृदु बिसद सुहाई।।

bibidha basana upadhāna turāī। chīra phena mṛdu bisada suhāī॥

तहँ सिय रामु सयन निसि करहीं। निज छबि रति मनोज मदु हरहीं।।

taha~ siya rāmu sayana nisi karahīṃ। nija chabi rati manoja madu harahīṃ॥

ते सिय रामु साथरीं सोए। श्रमित बसन बिनु जाहिं न जोए।।

te siya rāmu sātharīṃ soe। śramita basana binu jāhiṃ na joe॥

मातु पिता परिजन पुरबासी। सखा सुसील दास अरु दासी।।

mātu pitā parijana purabāsī। sakhā susīla dāsa aru dāsī॥

जोगवहिं जिन्हहि प्रान की नाई। महि सोवत तेइ राम गोसाईं।।

jogavahiṃ jinhahi prāna kī nāī। mahi sovata tei rāma gosāīṃ॥

पिता जनक जग बिदित प्रभाऊ। ससुर सुरेस सखा रघुराऊ।।

pitā janaka jaga bidita prabhāū। sasura suresa sakhā raghurāū॥

रामचंदु पति सो बैदेही। सोवत महि बिधि बाम न केही।।

rāmacaṃdu pati so baidehī। sovata mahi bidhi bāma na kehī॥

सिय रघुबीर कि कानन जोगू। करम प्रधान सत्य कह लोगू।।

siya raghubīra ki kānana jogū। karama pradhāna satya kaha logū॥

कैकयनंदिनि मंदमति कठिन कुटिलपनु कीन्ह।

kaikayanaṃdini maṃdamati kaṭhina kuṭilapanu kīnha।

जेहीं रघुनंदन जानकिहि सुख अवसर दुखु दीन्ह।।91।।

jehīṃ raghunaṃdana jānakihi sukha avasara dukhu dīnha॥91॥

भइ दिनकर कुल बिटप कुठारी। कुमति कीन्ह सब बिस्व दुखारी।।

bhai dinakara kula biṭapa kuṭhārī। kumati kīnha saba bisva dukhārī॥

भयउ बिषादु निषादहि भारी। राम सीय महि सयन निहारी।।

bhayau biṣādu niṣādahi bhārī। rāma sīya mahi sayana nihārī॥

बोले लखन मधुर मृदु बानी। ग्यान बिराग भगति रस सानी।।

bole lakhana madhura mṛdu bānī। gyāna birāga bhagati rasa sānī॥

काहु न कोउ सुख दुख कर दाता। निज कृत करम भोग सबु भ्राता।।

kāhu na kou sukha dukha kara dātā। nija kṛta karama bhoga sabu bhrātā॥

जोग बियोग भोग भल मंदा। हित अनहित मध्यम भ्रम फंदा।।

joga biyoga bhoga bhala maṃdā। hita anahita madhyama bhrama phaṃdā॥

जनमु मरनु जहँ लगि जग जालू। संपती बिपति करमु अरु कालू।।

janamu maranu jaha~ lagi jaga jālū। saṃpatī bipati karamu aru kālū॥

धरनि धामु धनु पुर परिवारू। सरगु नरकु जहँ लगि ब्यवहारू।।

dharani dhāmu dhanu pura parivārū। saragu naraku jaha~ lagi byavahārū॥

देखिअ सुनिअ गुनिअ मन माहीं। मोह मूल परमारथु नाहीं।।

dekhia sunia gunia mana māhīṃ। moha mūla paramārathu nāhīṃ॥

सपनें होइ भिखारि नृप रंकु नाकपति होइ।

sapaneṃ hoi bhikhāri nṛpa raṃku nākapati hoi।

जागें लाभु न हानि कछु तिमि प्रपंच जियँ जोइ।।92।।

jāgeṃ lābhu na hāni kachu timi prapaṃca jiya~ joi॥92॥

अस बिचारि नहिं कीजअ रोसू। काहुहि बादि न देइअ दोसू।।

asa bicāri nahiṃ kījaa rosū। kāhuhi bādi na deia dosū॥

मोह निसाँ सबु सोवनिहारा। देखिअ सपन अनेक प्रकारा।।

moha nisā~ sabu sovanihārā। dekhia sapana aneka prakārā॥

एहिं जग जामिनि जागहिं जोगी। परमारथी प्रपंच बियोगी।।

ehiṃ jaga jāmini jāgahiṃ jogī। paramārathī prapaṃca biyogī॥

जानिअ तबहिं जीव जग जागा। जब जब बिषय बिलास बिरागा।।

jānia tabahiṃ jīva jaga jāgā। jaba jaba biṣaya bilāsa birāgā॥

होइ बिबेकु मोह भ्रम भागा। तब रघुनाथ चरन अनुरागा।।

hoi bibeku moha bhrama bhāgā। taba raghunātha carana anurāgā॥

सखा परम परमारथु एहू। मन क्रम बचन राम पद नेहू।।

sakhā parama paramārathu ehū। mana krama bacana rāma pada nehū॥

राम ब्रह्म परमारथ रूपा। अबिगत अलख अनादि अनूपा।।

rāma brahma paramāratha rūpā। abigata alakha anādi anūpā॥

सकल बिकार रहित गतभेदा। कहि नित नेति निरूपहिं बेदा।

sakala bikāra rahita gatabhedā। kahi nita neti nirūpahiṃ bedā।

भगत भूमि भूसुर सुरभि सुर हित लागि कृपाल।

bhagata bhūmi bhūsura surabhi sura hita lāgi kṛpāla।

करत चरित धरि मनुज तनु सुनत मिटहि जग जाल।।93।।

karata carita dhari manuja tanu sunata miṭahi jaga jāla॥93॥

सखा समुझि अस परिहरि मोहु। सिय रघुबीर चरन रत होहू।।

sakhā samujhi asa parihari mohu। siya raghubīra carana rata hohū॥

कहत राम गुन भा भिनुसारा। जागे जग मंगल सुखदारा।।

kahata rāma guna bhā bhinusārā। jāge jaga maṃgala sukhadārā॥

सकल सोच करि राम नहावा। सुचि सुजान बट छीर मगावा।।

sakala soca kari rāma nahāvā। suci sujāna baṭa chīra magāvā॥

अनुज सहित सिर जटा बनाए। देखि सुमंत्र नयन जल छाए।।

anuja sahita sira jaṭā banāe। dekhi sumaṃtra nayana jala chāe॥

हृदयँ दाहु अति बदन मलीना। कह कर जोरि बचन अति दीना।।

hṛdaya~ dāhu ati badana malīnā। kaha kara jori bacana ati dīnā॥

नाथ कहेउ अस कोसलनाथा। लै रथु जाहु राम कें साथा।।

nātha kaheu asa kosalanāthā। lai rathu jāhu rāma keṃ sāthā॥

बनु देखाइ सुरसरि अन्हवाई। आनेहु फेरि बेगि दोउ भाई।।

banu dekhāi surasari anhavāī। ānehu pheri begi dou bhāī॥

लखनु रामु सिय आनेहु फेरी। संसय सकल सँकोच निबेरी।।

lakhanu rāmu siya ānehu pherī। saṃsaya sakala sa~koca niberī॥

नृप अस कहेउ गोसाईं जस कहइ करौं बलि सोइ।

nṛpa asa kaheu gosāīṃ jasa kahai karauṃ bali soi।

करि बिनती पायन्ह परेउ दीन्ह बाल जिमि रोइ।।94।।

kari binatī pāyanha pareu dīnha bāla jimi roi॥94॥

तात कृपा करि कीजिअ सोई। जातें अवध अनाथ न होई।।

tāta kṛpā kari kījia soī। jāteṃ avadha anātha na hoī॥

मंत्रहि राम उठाइ प्रबोधा। तात धरम मतु तुम्ह सबु सोधा।।

maṃtrahi rāma uṭhāi prabodhā। tāta dharama matu tumha sabu sodhā॥

सिबि दधीचि हरिचंद नरेसा। सहे धरम हित कोटि कलेसा।।

sibi dadhīci haricaṃda naresā। sahe dharama hita koṭi kalesā॥

रंतिदेव बलि भूप सुजाना। धरमु धरेउ सहि संकट नाना।।

raṃtideva bali bhūpa sujānā। dharamu dhareu sahi saṃkaṭa nānā॥

धरमु न दूसर सत्य समाना। आगम निगम पुरान बखाना।।

dharamu na dūsara satya samānā। āgama nigama purāna bakhānā॥

मैं सोइ धरमु सुलभ करि पावा। तजें तिहूँ पुर अपजसु छावा।।

maiṃ soi dharamu sulabha kari pāvā। tajeṃ tihū~ pura apajasu chāvā॥

संभावित कहुँ अपजस लाहू। मरन कोटि सम दारुन दाहू।।

saṃbhāvita kahu~ apajasa lāhū। marana koṭi sama dāruna dāhū॥

तुम्ह सन तात बहुत का कहऊँ। दिएँ उतरु फिरि पातकु लहऊँ।।

tumha sana tāta bahuta kā kahaū~। die~ utaru phiri pātaku lahaū~॥

पितु पद गहि कहि कोटि नति बिनय करब कर जोरि।

pitu pada gahi kahi koṭi nati binaya karaba kara jori।

चिंता कवनिहु बात कै तात करिअ जनि मोरि।।95।।

ciṃtā kavanihu bāta kai tāta karia jani mori॥95॥

तुम्ह पुनि पितु सम अति हित मोरें। बिनती करउँ तात कर जोरें।।

tumha puni pitu sama ati hita moreṃ। binatī karau~ tāta kara joreṃ॥

सब बिधि सोइ करतब्य तुम्हारें। दुख न पाव पितु सोच हमारें।।

saba bidhi soi karatabya tumhāreṃ। dukha na pāva pitu soca hamāreṃ॥

सुनि रघुनाथ सचिव संबादू। भयउ सपरिजन बिकल निषादू।।

suni raghunātha saciva saṃbādū। bhayau saparijana bikala niṣādū॥

पुनि कछु लखन कही कटु बानी। प्रभु बरजे बड़ अनुचित जानी।।

puni kachu lakhana kahī kaṭu bānī। prabhu baraje bar̤a anucita jānī॥

सकुचि राम निज सपथ देवाई। लखन सँदेसु कहिअ जनि जाई।।

sakuci rāma nija sapatha devāī। lakhana sa~desu kahia jani jāī॥

कह सुमंत्रु पुनि भूप सँदेसू। सहि न सकिहि सिय बिपिन कलेसू।।

kaha sumaṃtru puni bhūpa sa~desū। sahi na sakihi siya bipina kalesū॥

जेहि बिधि अवध आव फिरि सीया। सोइ रघुबरहि तुम्हहि करनीया।।

jehi bidhi avadha āva phiri sīyā। soi raghubarahi tumhahi karanīyā॥

नतरु निपट अवलंब बिहीना। मैं न जिअब जिमि जल बिनु मीना।।

nataru nipaṭa avalaṃba bihīnā। maiṃ na jiaba jimi jala binu mīnā॥

मइकें ससरें सकल सुख जबहिं जहाँ मनु मान।।

maikeṃ sasareṃ sakala sukha jabahiṃ jahā~ manu māna॥

तँह तब रहिहि सुखेन सिय जब लगि बिपति बिहान।।96।।

ta~ha taba rahihi sukhena siya jaba lagi bipati bihāna॥96॥

बिनती भूप कीन्ह जेहि भाँती। आरति प्रीति न सो कहि जाती।।

binatī bhūpa kīnha jehi bhā~tī। ārati prīti na so kahi jātī॥

पितु सँदेसु सुनि कृपानिधाना। सियहि दीन्ह सिख कोटि बिधाना।।

pitu sa~desu suni kṛpānidhānā। siyahi dīnha sikha koṭi bidhānā॥

सासु ससुर गुर प्रिय परिवारू। फिरतु त सब कर मिटै खभारू।।

sāsu sasura gura priya parivārū। phiratu ta saba kara miṭai khabhārū॥

सुनि पति बचन कहति बैदेही। सुनहु प्रानपति परम सनेही।।

suni pati bacana kahati baidehī। sunahu prānapati parama sanehī॥

प्रभु करुनामय परम बिबेकी। तनु तजि रहति छाँह किमि छेंकी।।

prabhu karunāmaya parama bibekī। tanu taji rahati chā~ha kimi cheṃkī॥

प्रभा जाइ कहँ भानु बिहाई। कहँ चंद्रिका चंदु तजि जाई।।

prabhā jāi kaha~ bhānu bihāī। kaha~ caṃdrikā caṃdu taji jāī॥

पतिहि प्रेममय बिनय सुनाई। कहति सचिव सन गिरा सुहाई।।

patihi premamaya binaya sunāī। kahati saciva sana girā suhāī॥

तुम्ह पितु ससुर सरिस हितकारी। उतरु देउँ फिरि अनुचित भारी।।

tumha pitu sasura sarisa hitakārī। utaru deu~ phiri anucita bhārī॥

आरति बस सनमुख भइउँ बिलगु न मानब तात।

ārati basa sanamukha bhaiu~ bilagu na mānaba tāta।

आरजसुत पद कमल बिनु बादि जहाँ लगि नात।।97।।

ārajasuta pada kamala binu bādi jahā~ lagi nāta॥97॥

पितु बैभव बिलास मैं डीठा। नृप मनि मुकुट मिलित पद पीठा।।

pitu baibhava bilāsa maiṃ ḍīṭhā। nṛpa mani mukuṭa milita pada pīṭhā॥

सुखनिधान अस पितु गृह मोरें। पिय बिहीन मन भाव न भोरें।।

sukhanidhāna asa pitu gṛha moreṃ। piya bihīna mana bhāva na bhoreṃ॥

ससुर चक्कवइ कोसलराऊ। भुवन चारिदस प्रगट प्रभाऊ।।

sasura cakkavai kosalarāū। bhuvana cāridasa pragaṭa prabhāū॥

आगें होइ जेहि सुरपति लेई। अरध सिंघासन आसनु देई।।

āgeṃ hoi jehi surapati leī। aradha siṃghāsana āsanu deī॥

ससुरु एतादृस अवध निवासू। प्रिय परिवारु मातु सम सासू।।

sasuru etādṛsa avadha nivāsū। priya parivāru mātu sama sāsū॥

बिनु रघुपति पद पदुम परागा। मोहि केउ सपनेहुँ सुखद न लागा।।

binu raghupati pada paduma parāgā। mohi keu sapanehu~ sukhada na lāgā॥

अगम पंथ बनभूमि पहारा। करि केहरि सर सरित अपारा।।

agama paṃtha banabhūmi pahārā। kari kehari sara sarita apārā॥

कोल किरात कुरंग बिहंगा। मोहि सब सुखद प्रानपति संगा।।

kola kirāta kuraṃga bihaṃgā। mohi saba sukhada prānapati saṃgā॥

सासु ससुर सन मोरि हुँति बिनय करबि परि पायँ।।

sāsu sasura sana mori hu~ti binaya karabi pari pāya~॥

मोर सोचु जनि करिअ कछु मैं बन सुखी सुभायँ।।98।।

mora socu jani karia kachu maiṃ bana sukhī subhāya~॥98॥

प्राननाथ प्रिय देवर साथा। बीर धुरीन धरें धनु भाथा।।

prānanātha priya devara sāthā। bīra dhurīna dhareṃ dhanu bhāthā॥

नहिं मग श्रमु भ्रमु दुख मन मोरें। मोहि लगि सोचु करिअ जनि भोरें।।

nahiṃ maga śramu bhramu dukha mana moreṃ। mohi lagi socu karia jani bhoreṃ॥

सुनि सुमंत्रु सिय सीतलि बानी। भयउ बिकल जनु फनि मनि हानी।।

suni sumaṃtru siya sītali bānī। bhayau bikala janu phani mani hānī॥

नयन सूझ नहिं सुनइ न काना। कहि न सकइ कछु अति अकुलाना।।

nayana sūjha nahiṃ sunai na kānā। kahi na sakai kachu ati akulānā॥

राम प्रबोधु कीन्ह बहु भाँति। तदपि होति नहिं सीतलि छाती।।

rāma prabodhu kīnha bahu bhā~ti। tadapi hoti nahiṃ sītali chātī॥

जतन अनेक साथ हित कीन्हे। उचित उतर रघुनंदन दीन्हे।।

jatana aneka sātha hita kīnhe। ucita utara raghunaṃdana dīnhe॥

मेटि जाइ नहिं राम रजाई। कठिन करम गति कछु न बसाई।।

meṭi jāi nahiṃ rāma rajāī। kaṭhina karama gati kachu na basāī॥

राम लखन सिय पद सिरु नाई। फिरेउ बनिक जिमि मूर गवाँई।।

rāma lakhana siya pada siru nāī। phireu banika jimi mūra gavā~ī॥

-रथ हाँकेउ हय राम तन हेरि हेरि हिहिनाहिं।

-ratha hā~keu haya rāma tana heri heri hihināhiṃ।

देखि निषाद बिषादबस धुनहिं सीस पछिताहिं।।99।।

dekhi niṣāda biṣādabasa dhunahiṃ sīsa pachitāhiṃ॥99॥

जासु बियोग बिकल पसु ऐसे। प्रजा मातु पितु जिइहहिं कैसें।।

jāsu biyoga bikala pasu aise। prajā mātu pitu jiihahiṃ kaiseṃ॥

बरबस राम सुमंत्रु पठाए। सुरसरि तीर आपु तब आए।।

barabasa rāma sumaṃtru paṭhāe। surasari tīra āpu taba āe॥

मागी नाव न केवटु आना। कहइ तुम्हार मरमु मैं जाना।।

māgī nāva na kevaṭu ānā। kahai tumhāra maramu maiṃ jānā॥

चरन कमल रज कहुँ सबु कहई। मानुष करनि मूरि कछु अहई।।

carana kamala raja kahu~ sabu kahaī। mānuṣa karani mūri kachu ahaī॥

छुअत सिला भइ नारि सुहाई। पाहन तें न काठ कठिनाई।।

chuata silā bhai nāri suhāī। pāhana teṃ na kāṭha kaṭhināī॥

तरनिउ मुनि घरिनि होइ जाई। बाट परइ मोरि नाव उड़ाई।।

taraniu muni gharini hoi jāī। bāṭa parai mori nāva ur̤āī॥

एहिं प्रतिपालउँ सबु परिवारू। नहिं जानउँ कछु अउर कबारू।।

ehiṃ pratipālau~ sabu parivārū। nahiṃ jānau~ kachu aura kabārū॥

जौ प्रभु पार अवसि गा चहहू। मोहि पद पदुम पखारन कहहू।।

jau prabhu pāra avasi gā cahahū। mohi pada paduma pakhārana kahahū॥

पद कमल धोइ चढ़ाइ नाव न नाथ उतराई चहौं।

pada kamala dhoi car̤hāi nāva na nātha utarāī cahauṃ।

मोहि राम राउरि आन दसरथ सपथ सब साची कहौं।।

mohi rāma rāuri āna dasaratha sapatha saba sācī kahauṃ॥

बरु तीर मारहुँ लखनु पै जब लगि न पाय पखारिहौं।

baru tīra mārahu~ lakhanu pai jaba lagi na pāya pakhārihauṃ।

तब लगि न तुलसीदास नाथ कृपाल पारु उतारिहौं।।

taba lagi na tulasīdāsa nātha kṛpāla pāru utārihauṃ॥

सुनि केबट के बैन प्रेम लपेटे अटपटे।

suni kebaṭa ke baina prema lapeṭe aṭapaṭe।

बिहसे करुनाऐन चितइ जानकी लखन तन।।100।।

bihase karunāaina citai jānakī lakhana tana॥100॥

कृपासिंधु बोले मुसुकाई। सोइ करु जेंहि तव नाव न जाई।।

kṛpāsiṃdhu bole musukāī। soi karu jeṃhi tava nāva na jāī॥

वेगि आनु जल पाय पखारू। होत बिलंबु उतारहि पारू।।

vegi ānu jala pāya pakhārū। hota bilaṃbu utārahi pārū॥

जासु नाम सुमरत एक बारा। उतरहिं नर भवसिंधु अपारा।।

jāsu nāma sumarata eka bārā। utarahiṃ nara bhavasiṃdhu apārā॥

सोइ कृपालु केवटहि निहोरा। जेहिं जगु किय तिहु पगहु ते थोरा।।

soi kṛpālu kevaṭahi nihorā। jehiṃ jagu kiya tihu pagahu te thorā॥

पद नख निरखि देवसरि हरषी। सुनि प्रभु बचन मोहँ मति करषी।।

pada nakha nirakhi devasari haraṣī। suni prabhu bacana moha~ mati karaṣī॥

केवट राम रजायसु पावा। पानि कठवता भरि लेइ आवा।।

kevaṭa rāma rajāyasu pāvā। pāni kaṭhavatā bhari lei āvā॥

अति आनंद उमगि अनुरागा। चरन सरोज पखारन लागा।।

ati ānaṃda umagi anurāgā। carana saroja pakhārana lāgā॥

बरषि सुमन सुर सकल सिहाहीं। एहि सम पुन्यपुंज कोउ नाहीं।।

baraṣi sumana sura sakala sihāhīṃ। ehi sama punyapuṃja kou nāhīṃ॥

पद पखारि जलु पान करि आपु सहित परिवार।

pada pakhāri jalu pāna kari āpu sahita parivāra।

पितर पारु करि प्रभुहि पुनि मुदित गयउ लेइ पार।।101।।

pitara pāru kari prabhuhi puni mudita gayau lei pāra॥101॥

उतरि ठाड़ भए सुरसरि रेता। सीयराम गुह लखन समेता।।

utari ṭhār̤a bhae surasari retā। sīyarāma guha lakhana sametā॥

केवट उतरि दंडवत कीन्हा। प्रभुहि सकुच एहि नहिं कछु दीन्हा।।

kevaṭa utari daṃḍavata kīnhā। prabhuhi sakuca ehi nahiṃ kachu dīnhā॥

पिय हिय की सिय जाननिहारी। मनि मुदरी मन मुदित उतारी।।

piya hiya kī siya jānanihārī। mani mudarī mana mudita utārī॥

कहेउ कृपाल लेहि उतराई। केवट चरन गहे अकुलाई।।

kaheu kṛpāla lehi utarāī। kevaṭa carana gahe akulāī॥

नाथ आजु मैं काह न पावा। मिटे दोष दुख दारिद दावा।।

nātha āju maiṃ kāha na pāvā। miṭe doṣa dukha dārida dāvā॥

बहुत काल मैं कीन्हि मजूरी। आजु दीन्ह बिधि बनि भलि भूरी।।

bahuta kāla maiṃ kīnhi majūrī। āju dīnha bidhi bani bhali bhūrī॥

अब कछु नाथ न चाहिअ मोरें। दीनदयाल अनुग्रह तोरें।।

aba kachu nātha na cāhia moreṃ। dīnadayāla anugraha toreṃ॥

फिरती बार मोहि जे देबा। सो प्रसादु मैं सिर धरि लेबा।।

phiratī bāra mohi je debā। so prasādu maiṃ sira dhari lebā॥

बहुत कीन्ह प्रभु लखन सियँ नहिं कछु केवटु लेइ।

bahuta kīnha prabhu lakhana siya~ nahiṃ kachu kevaṭu lei।

बिदा कीन्ह करुनायतन भगति बिमल बरु देइ।।102।।

bidā kīnha karunāyatana bhagati bimala baru dei॥102॥

तब मज्जनु करि रघुकुलनाथा। पूजि पारथिव नायउ माथा।।

taba majjanu kari raghukulanāthā। pūji pārathiva nāyau māthā॥

सियँ सुरसरिहि कहेउ कर जोरी। मातु मनोरथ पुरउबि मोरी।।

siya~ surasarihi kaheu kara jorī। mātu manoratha puraubi morī॥

पति देवर संग कुसल बहोरी। आइ करौं जेहिं पूजा तोरी।।

pati devara saṃga kusala bahorī। āi karauṃ jehiṃ pūjā torī॥

सुनि सिय बिनय प्रेम रस सानी। भइ तब बिमल बारि बर बानी।।

suni siya binaya prema rasa sānī। bhai taba bimala bāri bara bānī॥

सुनु रघुबीर प्रिया बैदेही। तव प्रभाउ जग बिदित न केही।।

sunu raghubīra priyā baidehī। tava prabhāu jaga bidita na kehī॥

लोकप होहिं बिलोकत तोरें। तोहि सेवहिं सब सिधि कर जोरें।।

lokapa hohiṃ bilokata toreṃ। tohi sevahiṃ saba sidhi kara joreṃ॥

तुम्ह जो हमहि बड़ि बिनय सुनाई। कृपा कीन्हि मोहि दीन्हि बड़ाई।।

tumha jo hamahi bar̤i binaya sunāī। kṛpā kīnhi mohi dīnhi bar̤āī॥

तदपि देबि मैं देबि असीसा। सफल होपन हित निज बागीसा।।

tadapi debi maiṃ debi asīsā। saphala hopana hita nija bāgīsā॥

प्राननाथ देवर सहित कुसल कोसला आइ।

prānanātha devara sahita kusala kosalā āi।

पूजहि सब मनकामना सुजसु रहिहि जग छाइ।।103।।

pūjahi saba manakāmanā sujasu rahihi jaga chāi॥103॥

गंग बचन सुनि मंगल मूला। मुदित सीय सुरसरि अनुकुला।।

gaṃga bacana suni maṃgala mūlā। mudita sīya surasari anukulā॥

तब प्रभु गुहहि कहेउ घर जाहू। सुनत सूख मुखु भा उर दाहू।।

taba prabhu guhahi kaheu ghara jāhū। sunata sūkha mukhu bhā ura dāhū॥

दीन बचन गुह कह कर जोरी। बिनय सुनहु रघुकुलमनि मोरी।।

dīna bacana guha kaha kara jorī। binaya sunahu raghukulamani morī॥

नाथ साथ रहि पंथु देखाई। करि दिन चारि चरन सेवकाई।।

nātha sātha rahi paṃthu dekhāī। kari dina cāri carana sevakāī॥

जेहिं बन जाइ रहब रघुराई। परनकुटी मैं करबि सुहाई।।

jehiṃ bana jāi rahaba raghurāī। paranakuṭī maiṃ karabi suhāī॥

तब मोहि कहँ जसि देब रजाई। सोइ करिहउँ रघुबीर दोहाई।।

taba mohi kaha~ jasi deba rajāī। soi karihau~ raghubīra dohāī॥

सहज सनेह राम लखि तासु। संग लीन्ह गुह हृदय हुलासू।।

sahaja saneha rāma lakhi tāsu। saṃga līnha guha hṛdaya hulāsū॥

पुनि गुहँ ग्याति बोलि सब लीन्हे। करि परितोषु बिदा तब कीन्हे।।

puni guha~ gyāti boli saba līnhe। kari paritoṣu bidā taba kīnhe॥

तब गनपति सिव सुमिरि प्रभु नाइ सुरसरिहि माथ।

taba ganapati siva sumiri prabhu nāi surasarihi mātha।

सखा अनुज सिया सहित बन गवनु कीन्ह रधुनाथ।।104।।

sakhā anuja siyā sahita bana gavanu kīnha radhunātha॥104॥

तेहि दिन भयउ बिटप तर बासू। लखन सखाँ सब कीन्ह सुपासू।।

tehi dina bhayau biṭapa tara bāsū। lakhana sakhā~ saba kīnha supāsū॥

प्रात प्रातकृत करि रधुसाई। तीरथराजु दीख प्रभु जाई।।

prāta prātakṛta kari radhusāī। tīratharāju dīkha prabhu jāī॥

सचिव सत्य श्रध्दा प्रिय नारी। माधव सरिस मीतु हितकारी।।

saciva satya śradhdā priya nārī। mādhava sarisa mītu hitakārī॥

चारि पदारथ भरा भँडारु। पुन्य प्रदेस देस अति चारु।।

cāri padāratha bharā bha~ḍāru। punya pradesa desa ati cāru॥

छेत्र अगम गढ़ु गाढ़ सुहावा। सपनेहुँ नहिं प्रतिपच्छिन्ह पावा।।

chetra agama gar̤hu gār̤ha suhāvā। sapanehu~ nahiṃ pratipacchinha pāvā॥

सेन सकल तीरथ बर बीरा। कलुष अनीक दलन रनधीरा।।

sena sakala tīratha bara bīrā। kaluṣa anīka dalana ranadhīrā॥

संगमु सिंहासनु सुठि सोहा। छत्रु अखयबटु मुनि मनु मोहा।।

saṃgamu siṃhāsanu suṭhi sohā। chatru akhayabaṭu muni manu mohā॥

चवँर जमुन अरु गंग तरंगा। देखि होहिं दुख दारिद भंगा।।

cava~ra jamuna aru gaṃga taraṃgā। dekhi hohiṃ dukha dārida bhaṃgā॥

सेवहिं सुकृति साधु सुचि पावहिं सब मनकाम।

sevahiṃ sukṛti sādhu suci pāvahiṃ saba manakāma।

बंदी बेद पुरान गन कहहिं बिमल गुन ग्राम।।105।।

baṃdī beda purāna gana kahahiṃ bimala guna grāma॥105॥

को कहि सकइ प्रयाग प्रभाऊ। कलुष पुंज कुंजर मृगराऊ।।

ko kahi sakai prayāga prabhāū। kaluṣa puṃja kuṃjara mṛgarāū॥

अस तीरथपति देखि सुहावा। सुख सागर रघुबर सुखु पावा।।

asa tīrathapati dekhi suhāvā। sukha sāgara raghubara sukhu pāvā॥

कहि सिय लखनहि सखहि सुनाई। श्रीमुख तीरथराज बड़ाई।।

kahi siya lakhanahi sakhahi sunāī। śrīmukha tīratharāja bar̤āī॥

करि प्रनामु देखत बन बागा। कहत महातम अति अनुरागा।।

kari pranāmu dekhata bana bāgā। kahata mahātama ati anurāgā॥

एहि बिधि आइ बिलोकी बेनी। सुमिरत सकल सुमंगल देनी।।

ehi bidhi āi bilokī benī। sumirata sakala sumaṃgala denī॥

मुदित नहाइ कीन्हि सिव सेवा। पुजि जथाबिधि तीरथ देवा।।

mudita nahāi kīnhi siva sevā। puji jathābidhi tīratha devā॥

तब प्रभु भरद्वाज पहिं आए। करत दंडवत मुनि उर लाए।।

taba prabhu bharadvāja pahiṃ āe। karata daṃḍavata muni ura lāe॥

मुनि मन मोद न कछु कहि जाइ। ब्रह्मानंद रासि जनु पाई।।

muni mana moda na kachu kahi jāi। brahmānaṃda rāsi janu pāī॥

दीन्हि असीस मुनीस उर अति अनंदु अस जानि।

dīnhi asīsa munīsa ura ati anaṃdu asa jāni।

लोचन गोचर सुकृत फल मनहुँ किए बिधि आनि।।106।।

locana gocara sukṛta phala manahu~ kie bidhi āni॥106॥

कुसल प्रस्न करि आसन दीन्हे। पूजि प्रेम परिपूरन कीन्हे।।

kusala prasna kari āsana dīnhe। pūji prema paripūrana kīnhe॥

कंद मूल फल अंकुर नीके। दिए आनि मुनि मनहुँ अमी के।।

kaṃda mūla phala aṃkura nīke। die āni muni manahu~ amī ke॥

सीय लखन जन सहित सुहाए। अति रुचि राम मूल फल खाए।।

sīya lakhana jana sahita suhāe। ati ruci rāma mūla phala khāe॥

भए बिगतश्रम रामु सुखारे। भरव्दाज मृदु बचन उचारे।।

bhae bigataśrama rāmu sukhāre। bharavdāja mṛdu bacana ucāre॥

आजु सुफल तपु तीरथ त्यागू। आजु सुफल जप जोग बिरागू।।

āju suphala tapu tīratha tyāgū। āju suphala japa joga birāgū॥

सफल सकल सुभ साधन साजू। राम तुम्हहि अवलोकत आजू।।

saphala sakala subha sādhana sājū। rāma tumhahi avalokata ājū॥

लाभ अवधि सुख अवधि न दूजी। तुम्हारें दरस आस सब पूजी।।

lābha avadhi sukha avadhi na dūjī। tumhāreṃ darasa āsa saba pūjī॥

अब करि कृपा देहु बर एहू। निज पद सरसिज सहज सनेहू।।

aba kari kṛpā dehu bara ehū। nija pada sarasija sahaja sanehū॥

करम बचन मन छाड़ि छलु जब लगि जनु न तुम्हार।

karama bacana mana chār̤i chalu jaba lagi janu na tumhāra।

तब लगि सुखु सपनेहुँ नहीं किएँ कोटि उपचार।।

taba lagi sukhu sapanehu~ nahīṃ kie~ koṭi upacāra॥

सुनि मुनि बचन रामु सकुचाने। भाव भगति आनंद अघाने।।

suni muni bacana rāmu sakucāne। bhāva bhagati ānaṃda aghāne॥

तब रघुबर मुनि सुजसु सुहावा। कोटि भाँति कहि सबहि सुनावा।।

taba raghubara muni sujasu suhāvā। koṭi bhā~ti kahi sabahi sunāvā॥

सो बड सो सब गुन गन गेहू। जेहि मुनीस तुम्ह आदर देहू।।

so baḍa so saba guna gana gehū। jehi munīsa tumha ādara dehū॥

मुनि रघुबीर परसपर नवहीं। बचन अगोचर सुखु अनुभवहीं।।

muni raghubīra parasapara navahīṃ। bacana agocara sukhu anubhavahīṃ॥

यह सुधि पाइ प्रयाग निवासी। बटु तापस मुनि सिद्ध उदासी।।

yaha sudhi pāi prayāga nivāsī। baṭu tāpasa muni siddha udāsī॥

भरद्वाज आश्रम सब आए। देखन दसरथ सुअन सुहाए।।

bharadvāja āśrama saba āe। dekhana dasaratha suana suhāe॥

राम प्रनाम कीन्ह सब काहू। मुदित भए लहि लोयन लाहू।।

rāma pranāma kīnha saba kāhū। mudita bhae lahi loyana lāhū॥

देहिं असीस परम सुखु पाई। फिरे सराहत सुंदरताई।।

dehiṃ asīsa parama sukhu pāī। phire sarāhata suṃdaratāī॥

राम कीन्ह बिश्राम निसि प्रात प्रयाग नहाइ।

rāma kīnha biśrāma nisi prāta prayāga nahāi।

चले सहित सिय लखन जन मुददित मुनिहि सिरु नाइ।।108।।

cale sahita siya lakhana jana mudadita munihi siru nāi॥108॥

राम सप्रेम कहेउ मुनि पाहीं। नाथ कहिअ हम केहि मग जाहीं।।

rāma saprema kaheu muni pāhīṃ। nātha kahia hama kehi maga jāhīṃ॥

मुनि मन बिहसि राम सन कहहीं। सुगम सकल मग तुम्ह कहुँ अहहीं।।

muni mana bihasi rāma sana kahahīṃ। sugama sakala maga tumha kahu~ ahahīṃ॥

साथ लागि मुनि सिष्य बोलाए। सुनि मन मुदित पचासक आए।।

sātha lāgi muni siṣya bolāe। suni mana mudita pacāsaka āe॥

सबन्हि राम पर प्रेम अपारा। सकल कहहि मगु दीख हमारा।।

sabanhi rāma para prema apārā। sakala kahahi magu dīkha hamārā॥

मुनि बटु चारि संग तब दीन्हे। जिन्ह बहु जनम सुकृत सब कीन्हे।।

muni baṭu cāri saṃga taba dīnhe। jinha bahu janama sukṛta saba kīnhe॥

करि प्रनामु रिषि आयसु पाई। प्रमुदित हृदयँ चले रघुराई।।

kari pranāmu riṣi āyasu pāī। pramudita hṛdaya~ cale raghurāī॥

ग्राम निकट जब निकसहि जाई। देखहि दरसु नारि नर धाई।।

grāma nikaṭa jaba nikasahi jāī। dekhahi darasu nāri nara dhāī॥

होहि सनाथ जनम फलु पाई। फिरहि दुखित मनु संग पठाई।।

hohi sanātha janama phalu pāī। phirahi dukhita manu saṃga paṭhāī॥

बिदा किए बटु बिनय करि फिरे पाइ मन काम।

bidā kie baṭu binaya kari phire pāi mana kāma।

उतरि नहाए जमुन जल जो सरीर सम स्याम।।109।।

utari nahāe jamuna jala jo sarīra sama syāma॥109॥

सुनत तीरवासी नर नारी। धाए निज निज काज बिसारी।।

sunata tīravāsī nara nārī। dhāe nija nija kāja bisārī॥

लखन राम सिय सुन्दरताई। देखि करहिं निज भाग्य बड़ाई।।

lakhana rāma siya sundaratāī। dekhi karahiṃ nija bhāgya bar̤āī॥

अति लालसा बसहिं मन माहीं। नाउँ गाउँ बूझत सकुचाहीं।।

ati lālasā basahiṃ mana māhīṃ। nāu~ gāu~ būjhata sakucāhīṃ॥

जे तिन्ह महुँ बयबिरिध सयाने। तिन्ह करि जुगुति रामु पहिचाने।।

je tinha mahu~ bayabiridha sayāne। tinha kari juguti rāmu pahicāne॥

सकल कथा तिन्ह सबहि सुनाई। बनहि चले पितु आयसु पाई।।

sakala kathā tinha sabahi sunāī। banahi cale pitu āyasu pāī॥

सुनि सबिषाद सकल पछिताहीं। रानी रायँ कीन्ह भल नाहीं।।

suni sabiṣāda sakala pachitāhīṃ। rānī rāya~ kīnha bhala nāhīṃ॥

तेहि अवसर एक तापसु आवा। तेजपुंज लघुबयस सुहावा।।

tehi avasara eka tāpasu āvā। tejapuṃja laghubayasa suhāvā॥

कवि अलखित गति बेषु बिरागी। मन क्रम बचन राम अनुरागी।।

kavi alakhita gati beṣu birāgī। mana krama bacana rāma anurāgī॥

सजल नयन तन पुलकि निज इष्टदेउ पहिचानि।

sajala nayana tana pulaki nija iṣṭadeu pahicāni।

परेउ दंड जिमि धरनितल दसा न जाइ बखानि।।110।।

pareu daṃḍa jimi dharanitala dasā na jāi bakhāni॥110॥

राम सप्रेम पुलकि उर लावा। परम रंक जनु पारसु पावा।।

rāma saprema pulaki ura lāvā। parama raṃka janu pārasu pāvā॥

मनहुँ प्रेमु परमारथु दोऊ। मिलत धरे तन कह सबु कोऊ।।

manahu~ premu paramārathu doū। milata dhare tana kaha sabu koū॥

बहुरि लखन पायन्ह सोइ लागा। लीन्ह उठाइ उमगि अनुरागा।।

bahuri lakhana pāyanha soi lāgā। līnha uṭhāi umagi anurāgā॥

पुनि सिय चरन धूरि धरि सीसा। जननि जानि सिसु दीन्हि असीसा।।

puni siya carana dhūri dhari sīsā। janani jāni sisu dīnhi asīsā॥

कीन्ह निषाद दंडवत तेही। मिलेउ मुदित लखि राम सनेही।।

kīnha niṣāda daṃḍavata tehī। mileu mudita lakhi rāma sanehī॥

पिअत नयन पुट रूपु पियूषा। मुदित सुअसनु पाइ जिमि भूखा।।

piata nayana puṭa rūpu piyūṣā। mudita suasanu pāi jimi bhūkhā॥

ते पितु मातु कहहु सखि कैसे। जिन्ह पठए बन बालक ऐसे।।

te pitu mātu kahahu sakhi kaise। jinha paṭhae bana bālaka aise॥

राम लखन सिय रूपु निहारी। होहिं सनेह बिकल नर नारी।।

rāma lakhana siya rūpu nihārī। hohiṃ saneha bikala nara nārī॥

तब रघुबीर अनेक बिधि सखहि सिखावनु दीन्ह।

taba raghubīra aneka bidhi sakhahi sikhāvanu dīnha।

राम रजायसु सीस धरि भवन गवनु तेंइँ कीन्ह।।111।।

rāma rajāyasu sīsa dhari bhavana gavanu teṃi~ kīnha॥111॥

पुनि सियँ राम लखन कर जोरी। जमुनहि कीन्ह प्रनामु बहोरी।।

puni siya~ rāma lakhana kara jorī। jamunahi kīnha pranāmu bahorī॥

चले ससीय मुदित दोउ भाई। रबितनुजा कइ करत बड़ाई।।

cale sasīya mudita dou bhāī। rabitanujā kai karata bar̤āī॥

पथिक अनेक मिलहिं मग जाता। कहहिं सप्रेम देखि दोउ भ्राता।।

pathika aneka milahiṃ maga jātā। kahahiṃ saprema dekhi dou bhrātā॥

राज लखन सब अंग तुम्हारें। देखि सोचु अति हृदय हमारें।।

rāja lakhana saba aṃga tumhāreṃ। dekhi socu ati hṛdaya hamāreṃ॥

मारग चलहु पयादेहि पाएँ। ज्योतिषु झूठ हमारें भाएँ।।

māraga calahu payādehi pāe~। jyotiṣu jhūṭha hamāreṃ bhāe~॥

अगमु पंथ गिरि कानन भारी। तेहि महँ साथ नारि सुकुमारी।।

agamu paṃtha giri kānana bhārī। tehi maha~ sātha nāri sukumārī॥

करि केहरि बन जाइ न जोई। हम सँग चलहि जो आयसु होई।।

kari kehari bana jāi na joī। hama sa~ga calahi jo āyasu hoī॥

जाब जहाँ लगि तहँ पहुँचाई। फिरब बहोरि तुम्हहि सिरु नाई।।

jāba jahā~ lagi taha~ pahu~cāī। phiraba bahori tumhahi siru nāī॥

एहि बिधि पूँछहिं प्रेम बस पुलक गात जलु नैन।

ehi bidhi pū~chahiṃ prema basa pulaka gāta jalu naina।

कृपासिंधु फेरहि तिन्हहि कहि बिनीत मृदु बैन।।112।।

kṛpāsiṃdhu pherahi tinhahi kahi binīta mṛdu baina॥112॥

जे पुर गाँव बसहिं मग माहीं। तिन्हहि नाग सुर नगर सिहाहीं।।

je pura gā~va basahiṃ maga māhīṃ। tinhahi nāga sura nagara sihāhīṃ॥

केहि सुकृतीं केहि घरीं बसाए। धन्य पुन्यमय परम सुहाए।।

kehi sukṛtīṃ kehi gharīṃ basāe। dhanya punyamaya parama suhāe॥

जहँ जहँ राम चरन चलि जाहीं। तिन्ह समान अमरावति नाहीं।।

jaha~ jaha~ rāma carana cali jāhīṃ। tinha samāna amarāvati nāhīṃ॥

पुन्यपुंज मग निकट निवासी। तिन्हहि सराहहिं सुरपुरबासी।।

punyapuṃja maga nikaṭa nivāsī। tinhahi sarāhahiṃ surapurabāsī॥

जे भरि नयन बिलोकहिं रामहि। सीता लखन सहित घनस्यामहि।।

je bhari nayana bilokahiṃ rāmahi। sītā lakhana sahita ghanasyāmahi॥

जे सर सरित राम अवगाहहिं। तिन्हहि देव सर सरित सराहहिं।।

je sara sarita rāma avagāhahiṃ। tinhahi deva sara sarita sarāhahiṃ॥

जेहि तरु तर प्रभु बैठहिं जाई। करहिं कलपतरु तासु बड़ाई।।

jehi taru tara prabhu baiṭhahiṃ jāī। karahiṃ kalapataru tāsu bar̤āī॥

परसि राम पद पदुम परागा। मानति भूमि भूरि निज भागा।।

parasi rāma pada paduma parāgā। mānati bhūmi bhūri nija bhāgā॥

छाँह करहि घन बिबुधगन बरषहि सुमन सिहाहिं।

chā~ha karahi ghana bibudhagana baraṣahi sumana sihāhiṃ।

देखत गिरि बन बिहग मृग रामु चले मग जाहिं।।113।।

dekhata giri bana bihaga mṛga rāmu cale maga jāhiṃ॥113॥

सीता लखन सहित रघुराई। गाँव निकट जब निकसहिं जाई।।

sītā lakhana sahita raghurāī। gā~va nikaṭa jaba nikasahiṃ jāī॥

सुनि सब बाल बृद्ध नर नारी। चलहिं तुरत गृहकाजु बिसारी।।

suni saba bāla bṛddha nara nārī। calahiṃ turata gṛhakāju bisārī॥

राम लखन सिय रूप निहारी। पाइ नयनफलु होहिं सुखारी।।

rāma lakhana siya rūpa nihārī। pāi nayanaphalu hohiṃ sukhārī॥

सजल बिलोचन पुलक सरीरा। सब भए मगन देखि दोउ बीरा।।

sajala bilocana pulaka sarīrā। saba bhae magana dekhi dou bīrā॥

बरनि न जाइ दसा तिन्ह केरी। लहि जनु रंकन्ह सुरमनि ढेरी।।

barani na jāi dasā tinha kerī। lahi janu raṃkanha suramani ḍherī॥

एकन्ह एक बोलि सिख देहीं। लोचन लाहु लेहु छन एहीं।।

ekanha eka boli sikha dehīṃ। locana lāhu lehu chana ehīṃ॥

रामहि देखि एक अनुरागे। चितवत चले जाहिं सँग लागे।।

rāmahi dekhi eka anurāge। citavata cale jāhiṃ sa~ga lāge॥

एक नयन मग छबि उर आनी। होहिं सिथिल तन मन बर बानी।।

eka nayana maga chabi ura ānī। hohiṃ sithila tana mana bara bānī॥

एक देखिं बट छाँह भलि डासि मृदुल तृन पात।

eka dekhiṃ baṭa chā~ha bhali ḍāsi mṛdula tṛna pāta।

कहहिं गवाँइअ छिनुकु श्रमु गवनब अबहिं कि प्रात।।114।।

kahahiṃ gavā~ia chinuku śramu gavanaba abahiṃ ki prāta॥114॥

एक कलस भरि आनहिं पानी। अँचइअ नाथ कहहिं मृदु बानी।।

eka kalasa bhari ānahiṃ pānī। a~caia nātha kahahiṃ mṛdu bānī॥

सुनि प्रिय बचन प्रीति अति देखी। राम कृपाल सुसील बिसेषी।।

suni priya bacana prīti ati dekhī। rāma kṛpāla susīla biseṣī॥

जानी श्रमित सीय मन माहीं। घरिक बिलंबु कीन्ह बट छाहीं।।

jānī śramita sīya mana māhīṃ। gharika bilaṃbu kīnha baṭa chāhīṃ॥

मुदित नारि नर देखहिं सोभा। रूप अनूप नयन मनु लोभा।।

mudita nāri nara dekhahiṃ sobhā। rūpa anūpa nayana manu lobhā॥

एकटक सब सोहहिं चहुँ ओरा। रामचंद्र मुख चंद चकोरा।।

ekaṭaka saba sohahiṃ cahu~ orā। rāmacaṃdra mukha caṃda cakorā॥

तरुन तमाल बरन तनु सोहा। देखत कोटि मदन मनु मोहा।।

taruna tamāla barana tanu sohā। dekhata koṭi madana manu mohā॥

दामिनि बरन लखन सुठि नीके। नख सिख सुभग भावते जी के।।

dāmini barana lakhana suṭhi nīke। nakha sikha subhaga bhāvate jī ke॥

मुनिपट कटिन्ह कसें तूनीरा। सोहहिं कर कमलिनि धनु तीरा।।

munipaṭa kaṭinha kaseṃ tūnīrā। sohahiṃ kara kamalini dhanu tīrā॥

जटा मुकुट सीसनि सुभग उर भुज नयन बिसाल।

jaṭā mukuṭa sīsani subhaga ura bhuja nayana bisāla।

सरद परब बिधु बदन बर लसत स्वेद कन जाल।।115।।

sarada paraba bidhu badana bara lasata sveda kana jāla॥115॥

बरनि न जाइ मनोहर जोरी। सोभा बहुत थोरि मति मोरी।।

barani na jāi manohara jorī। sobhā bahuta thori mati morī॥

राम लखन सिय सुंदरताई। सब चितवहिं चित मन मति लाई।।

rāma lakhana siya suṃdaratāī। saba citavahiṃ cita mana mati lāī॥

थके नारि नर प्रेम पिआसे। मनहुँ मृगी मृग देखि दिआ से।।

thake nāri nara prema piāse। manahu~ mṛgī mṛga dekhi diā se॥

सीय समीप ग्रामतिय जाहीं। पूँछत अति सनेहँ सकुचाहीं।।

sīya samīpa grāmatiya jāhīṃ। pū~chata ati saneha~ sakucāhīṃ॥

बार बार सब लागहिं पाएँ। कहहिं बचन मृदु सरल सुभाएँ।।

bāra bāra saba lāgahiṃ pāe~। kahahiṃ bacana mṛdu sarala subhāe~॥

राजकुमारि बिनय हम करहीं। तिय सुभायँ कछु पूँछत डरहीं।

rājakumāri binaya hama karahīṃ। tiya subhāya~ kachu pū~chata ḍarahīṃ।

स्वामिनि अबिनय छमबि हमारी। बिलगु न मानब जानि गवाँरी।।

svāmini abinaya chamabi hamārī। bilagu na mānaba jāni gavā~rī॥

राजकुअँर दोउ सहज सलोने। इन्ह तें लही दुति मरकत सोने।।

rājakua~ra dou sahaja salone। inha teṃ lahī duti marakata sone॥

स्यामल गौर किसोर बर सुंदर सुषमा ऐन।

syāmala gaura kisora bara suṃdara suṣamā aina।

सरद सर्बरीनाथ मुखु सरद सरोरुह नैन।।116।।

sarada sarbarīnātha mukhu sarada saroruha naina॥116॥

कोटि मनोज लजावनिहारे। सुमुखि कहहु को आहिं तुम्हारे।।

koṭi manoja lajāvanihāre। sumukhi kahahu ko āhiṃ tumhāre॥

सुनि सनेहमय मंजुल बानी। सकुची सिय मन महुँ मुसुकानी।।

suni sanehamaya maṃjula bānī। sakucī siya mana mahu~ musukānī॥

तिन्हहि बिलोकि बिलोकति धरनी। दुहुँ सकोच सकुचित बरबरनी।।

tinhahi biloki bilokati dharanī। duhu~ sakoca sakucita barabaranī॥

सकुचि सप्रेम बाल मृग नयनी। बोली मधुर बचन पिकबयनी।।

sakuci saprema bāla mṛga nayanī। bolī madhura bacana pikabayanī॥

सहज सुभाय सुभग तन गोरे। नामु लखनु लघु देवर मोरे।।

sahaja subhāya subhaga tana gore। nāmu lakhanu laghu devara more॥

बहुरि बदनु बिधु अंचल ढाँकी। पिय तन चितइ भौंह करि बाँकी।।

bahuri badanu bidhu aṃcala ḍhā~kī। piya tana citai bhauṃha kari bā~kī॥

खंजन मंजु तिरीछे नयननि। निज पति कहेउ तिन्हहि सियँ सयननि।।

khaṃjana maṃju tirīche nayanani। nija pati kaheu tinhahi siya~ sayanani॥

भइ मुदित सब ग्रामबधूटीं। रंकन्ह राय रासि जनु लूटीं।।

bhai mudita saba grāmabadhūṭīṃ। raṃkanha rāya rāsi janu lūṭīṃ॥

अति सप्रेम सिय पायँ परि बहुबिधि देहिं असीस।

ati saprema siya pāya~ pari bahubidhi dehiṃ asīsa।

सदा सोहागिनि होहु तुम्ह जब लगि महि अहि सीस।।117।।

sadā sohāgini hohu tumha jaba lagi mahi ahi sīsa॥117॥

पारबती सम पतिप्रिय होहू। देबि न हम पर छाड़ब छोहू।।

pārabatī sama patipriya hohū। debi na hama para chār̤aba chohū॥

पुनि पुनि बिनय करिअ कर जोरी। जौं एहि मारग फिरिअ बहोरी।।

puni puni binaya karia kara jorī। jauṃ ehi māraga phiria bahorī॥

दरसनु देब जानि निज दासी। लखीं सीयँ सब प्रेम पिआसी।।

darasanu deba jāni nija dāsī। lakhīṃ sīya~ saba prema piāsī॥

मधुर बचन कहि कहि परितोषीं। जनु कुमुदिनीं कौमुदीं पोषीं।।

madhura bacana kahi kahi paritoṣīṃ। janu kumudinīṃ kaumudīṃ poṣīṃ॥

तबहिं लखन रघुबर रुख जानी। पूँछेउ मगु लोगन्हि मृदु बानी।।

tabahiṃ lakhana raghubara rukha jānī। pū~cheu magu loganhi mṛdu bānī॥

सुनत नारि नर भए दुखारी। पुलकित गात बिलोचन बारी।।

sunata nāri nara bhae dukhārī। pulakita gāta bilocana bārī॥

मिटा मोदु मन भए मलीने। बिधि निधि दीन्ह लेत जनु छीने।।

miṭā modu mana bhae malīne। bidhi nidhi dīnha leta janu chīne॥

समुझि करम गति धीरजु कीन्हा। सोधि सुगम मगु तिन्ह कहि दीन्हा।।

samujhi karama gati dhīraju kīnhā। sodhi sugama magu tinha kahi dīnhā॥

लखन जानकी सहित तब गवनु कीन्ह रघुनाथ।

lakhana jānakī sahita taba gavanu kīnha raghunātha।

फेरे सब प्रिय बचन कहि लिए लाइ मन साथ।।118।।

phere saba priya bacana kahi lie lāi mana sātha॥118॥

फिरत नारि नर अति पछिताहीं। देअहि दोषु देहिं मन माहीं।।

phirata nāri nara ati pachitāhīṃ। deahi doṣu dehiṃ mana māhīṃ॥

सहित बिषाद परसपर कहहीं। बिधि करतब उलटे सब अहहीं।।

sahita biṣāda parasapara kahahīṃ। bidhi karataba ulaṭe saba ahahīṃ॥

निपट निरंकुस निठुर निसंकू। जेहिं ससि कीन्ह सरुज सकलंकू।।

nipaṭa niraṃkusa niṭhura nisaṃkū। jehiṃ sasi kīnha saruja sakalaṃkū॥

रूख कलपतरु सागरु खारा। तेहिं पठए बन राजकुमारा।।

rūkha kalapataru sāgaru khārā। tehiṃ paṭhae bana rājakumārā॥

जौं पे इन्हहि दीन्ह बनबासू। कीन्ह बादि बिधि भोग बिलासू।।

jauṃ pe inhahi dīnha banabāsū। kīnha bādi bidhi bhoga bilāsū॥

ए बिचरहिं मग बिनु पदत्राना। रचे बादि बिधि बाहन नाना।।

e bicarahiṃ maga binu padatrānā। race bādi bidhi bāhana nānā॥

ए महि परहिं डासि कुस पाता। सुभग सेज कत सृजत बिधाता।।

e mahi parahiṃ ḍāsi kusa pātā। subhaga seja kata sṛjata bidhātā॥

तरुबर बास इन्हहि बिधि दीन्हा। धवल धाम रचि रचि श्रमु कीन्हा।।

tarubara bāsa inhahi bidhi dīnhā। dhavala dhāma raci raci śramu kīnhā॥

जौं ए मुनि पट धर जटिल सुंदर सुठि सुकुमार।

jauṃ e muni paṭa dhara jaṭila suṃdara suṭhi sukumāra।

बिबिध भाँति भूषन बसन बादि किए करतार।।119।।

bibidha bhā~ti bhūṣana basana bādi kie karatāra॥119॥

जौं ए कंद मूल फल खाहीं। बादि सुधादि असन जग माहीं।।

jauṃ e kaṃda mūla phala khāhīṃ। bādi sudhādi asana jaga māhīṃ॥

एक कहहिं ए सहज सुहाए। आपु प्रगट भए बिधि न बनाए।।

eka kahahiṃ e sahaja suhāe। āpu pragaṭa bhae bidhi na banāe॥

जहँ लगि बेद कही बिधि करनी। श्रवन नयन मन गोचर बरनी।।

jaha~ lagi beda kahī bidhi karanī। śravana nayana mana gocara baranī॥

देखहु खोजि भुअन दस चारी। कहँ अस पुरुष कहाँ असि नारी।।

dekhahu khoji bhuana dasa cārī। kaha~ asa puruṣa kahā~ asi nārī॥

इन्हहि देखि बिधि मनु अनुरागा। पटतर जोग बनावै लागा।।

inhahi dekhi bidhi manu anurāgā। paṭatara joga banāvai lāgā॥

कीन्ह बहुत श्रम ऐक न आए। तेहिं इरिषा बन आनि दुराए।।

kīnha bahuta śrama aika na āe। tehiṃ iriṣā bana āni durāe॥

एक कहहिं हम बहुत न जानहिं। आपुहि परम धन्य करि मानहिं।।

eka kahahiṃ hama bahuta na jānahiṃ। āpuhi parama dhanya kari mānahiṃ॥

ते पुनि पुन्यपुंज हम लेखे। जे देखहिं देखिहहिं जिन्ह देखे।।

te puni punyapuṃja hama lekhe। je dekhahiṃ dekhihahiṃ jinha dekhe॥

एहि बिधि कहि कहि बचन प्रिय लेहिं नयन भरि नीर।

ehi bidhi kahi kahi bacana priya lehiṃ nayana bhari nīra।

किमि चलिहहि मारग अगम सुठि सुकुमार सरीर।।120।।

kimi calihahi māraga agama suṭhi sukumāra sarīra॥120॥

नारि सनेह बिकल बस होहीं। चकई साँझ समय जनु सोहीं।।

nāri saneha bikala basa hohīṃ। cakaī sā~jha samaya janu sohīṃ॥

मृदु पद कमल कठिन मगु जानी। गहबरि हृदयँ कहहिं बर बानी।।

mṛdu pada kamala kaṭhina magu jānī। gahabari hṛdaya~ kahahiṃ bara bānī॥

परसत मृदुल चरन अरुनारे। सकुचति महि जिमि हृदय हमारे।।

parasata mṛdula carana arunāre। sakucati mahi jimi hṛdaya hamāre॥

जौं जगदीस इन्हहि बनु दीन्हा। कस न सुमनमय मारगु कीन्हा।।

jauṃ jagadīsa inhahi banu dīnhā। kasa na sumanamaya māragu kīnhā॥

जौं मागा पाइअ बिधि पाहीं। ए रखिअहिं सखि आँखिन्ह माहीं।।

jauṃ māgā pāia bidhi pāhīṃ। e rakhiahiṃ sakhi ā~khinha māhīṃ॥

जे नर नारि न अवसर आए। तिन्ह सिय रामु न देखन पाए।।

je nara nāri na avasara āe। tinha siya rāmu na dekhana pāe॥

सुनि सुरुप बूझहिं अकुलाई। अब लगि गए कहाँ लगि भाई।।

suni surupa būjhahiṃ akulāī। aba lagi gae kahā~ lagi bhāī॥

समरथ धाइ बिलोकहिं जाई। प्रमुदित फिरहिं जनमफलु पाई।।

samaratha dhāi bilokahiṃ jāī। pramudita phirahiṃ janamaphalu pāī॥

अबला बालक बृद्ध जन कर मीजहिं पछिताहिं।।

abalā bālaka bṛddha jana kara mījahiṃ pachitāhiṃ॥

होहिं प्रेमबस लोग इमि रामु जहाँ जहँ जाहिं।।121।।

hohiṃ premabasa loga imi rāmu jahā~ jaha~ jāhiṃ॥121॥

गाँव गाँव अस होइ अनंदू। देखि भानुकुल कैरव चंदू।।

gā~va gā~va asa hoi anaṃdū। dekhi bhānukula kairava caṃdū॥

जे कछु समाचार सुनि पावहिं। ते नृप रानिहि दोसु लगावहिं।।

je kachu samācāra suni pāvahiṃ। te nṛpa rānihi dosu lagāvahiṃ॥

कहहिं एक अति भल नरनाहू। दीन्ह हमहि जोइ लोचन लाहू।।

kahahiṃ eka ati bhala naranāhū। dīnha hamahi joi locana lāhū॥

कहहिं परस्पर लोग लोगाईं। बातें सरल सनेह सुहाईं।।

kahahiṃ paraspara loga logāīṃ। bāteṃ sarala saneha suhāīṃ॥

ते पितु मातु धन्य जिन्ह जाए। धन्य सो नगरु जहाँ तें आए।।

te pitu mātu dhanya jinha jāe। dhanya so nagaru jahā~ teṃ āe॥

धन्य सो देसु सैलु बन गाऊँ। जहँ जहँ जाहिं धन्य सोइ ठाऊँ।।

dhanya so desu sailu bana gāū~। jaha~ jaha~ jāhiṃ dhanya soi ṭhāū~॥

सुख पायउ बिरंचि रचि तेही। ए जेहि के सब भाँति सनेही।।

sukha pāyau biraṃci raci tehī। e jehi ke saba bhā~ti sanehī॥

राम लखन पथि कथा सुहाई। रही सकल मग कानन छाई।।

rāma lakhana pathi kathā suhāī। rahī sakala maga kānana chāī॥

एहि बिधि रघुकुल कमल रबि मग लोगन्ह सुख देत।

ehi bidhi raghukula kamala rabi maga loganha sukha deta।

जाहिं चले देखत बिपिन सिय सौमित्रि समेत।।122।।

jāhiṃ cale dekhata bipina siya saumitri sameta॥122॥

आगे रामु लखनु बने पाछें। तापस बेष बिराजत काछें।।

āge rāmu lakhanu bane pācheṃ। tāpasa beṣa birājata kācheṃ॥

उभय बीच सिय सोहति कैसे। ब्रह्म जीव बिच माया जैसे।।

ubhaya bīca siya sohati kaise। brahma jīva bica māyā jaise॥

बहुरि कहउँ छबि जसि मन बसई। जनु मधु मदन मध्य रति लसई।।

bahuri kahau~ chabi jasi mana basaī। janu madhu madana madhya rati lasaī॥

उपमा बहुरि कहउँ जियँ जोही। जनु बुध बिधु बिच रोहिनि सोही।।

upamā bahuri kahau~ jiya~ johī। janu budha bidhu bica rohini sohī॥

प्रभु पद रेख बीच बिच सीता। धरति चरन मग चलति सभीता।।

prabhu pada rekha bīca bica sītā। dharati carana maga calati sabhītā॥

सीय राम पद अंक बराएँ। लखन चलहिं मगु दाहिन लाएँ।।

sīya rāma pada aṃka barāe~। lakhana calahiṃ magu dāhina lāe~॥

राम लखन सिय प्रीति सुहाई। बचन अगोचर किमि कहि जाई।।

rāma lakhana siya prīti suhāī। bacana agocara kimi kahi jāī॥

खग मृग मगन देखि छबि होहीं। लिए चोरि चित राम बटोहीं।।

khaga mṛga magana dekhi chabi hohīṃ। lie cori cita rāma baṭohīṃ॥

जिन्ह जिन्ह देखे पथिक प्रिय सिय समेत दोउ भाइ।

jinha jinha dekhe pathika priya siya sameta dou bhāi।

भव मगु अगमु अनंदु तेइ बिनु श्रम रहे सिराइ।।123।।

bhava magu agamu anaṃdu tei binu śrama rahe sirāi॥123॥

अजहुँ जासु उर सपनेहुँ काऊ। बसहुँ लखनु सिय रामु बटाऊ।।

ajahu~ jāsu ura sapanehu~ kāū। basahu~ lakhanu siya rāmu baṭāū॥

राम धाम पथ पाइहि सोई। जो पथ पाव कबहुँ मुनि कोई।।

rāma dhāma patha pāihi soī। jo patha pāva kabahu~ muni koī॥

तब रघुबीर श्रमित सिय जानी। देखि निकट बटु सीतल पानी।।

taba raghubīra śramita siya jānī। dekhi nikaṭa baṭu sītala pānī॥

तहँ बसि कंद मूल फल खाई। प्रात नहाइ चले रघुराई।।

taha~ basi kaṃda mūla phala khāī। prāta nahāi cale raghurāī॥

देखत बन सर सैल सुहाए। बालमीकि आश्रम प्रभु आए।।

dekhata bana sara saila suhāe। bālamīki āśrama prabhu āe॥

राम दीख मुनि बासु सुहावन। सुंदर गिरि काननु जलु पावन।।

rāma dīkha muni bāsu suhāvana। suṃdara giri kānanu jalu pāvana॥

सरनि सरोज बिटप बन फूले। गुंजत मंजु मधुप रस भूले।।

sarani saroja biṭapa bana phūle। guṃjata maṃju madhupa rasa bhūle॥

खग मृग बिपुल कोलाहल करहीं। बिरहित बैर मुदित मन चरहीं।।

khaga mṛga bipula kolāhala karahīṃ। birahita baira mudita mana carahīṃ॥

सुचि सुंदर आश्रमु निरखि हरषे राजिवनेन।

suci suṃdara āśramu nirakhi haraṣe rājivanena।

सुनि रघुबर आगमनु मुनि आगें आयउ लेन।।124।।

suni raghubara āgamanu muni āgeṃ āyau lena॥124॥

मुनि कहुँ राम दंडवत कीन्हा। आसिरबादु बिप्रबर दीन्हा।।

muni kahu~ rāma daṃḍavata kīnhā। āsirabādu biprabara dīnhā॥

देखि राम छबि नयन जुड़ाने। करि सनमानु आश्रमहिं आने।।

dekhi rāma chabi nayana jur̤āne। kari sanamānu āśramahiṃ āne॥

मुनिबर अतिथि प्रानप्रिय पाए। कंद मूल फल मधुर मगाए।।

munibara atithi prānapriya pāe। kaṃda mūla phala madhura magāe॥

सिय सौमित्रि राम फल खाए। तब मुनि आश्रम दिए सुहाए।।

siya saumitri rāma phala khāe। taba muni āśrama die suhāe॥

बालमीकि मन आनँदु भारी। मंगल मूरति नयन निहारी।।

bālamīki mana āna~du bhārī। maṃgala mūrati nayana nihārī॥

तब कर कमल जोरि रघुराई। बोले बचन श्रवन सुखदाई।।

taba kara kamala jori raghurāī। bole bacana śravana sukhadāī॥

तुम्ह त्रिकाल दरसी मुनिनाथा। बिस्व बदर जिमि तुम्हरें हाथा।।

tumha trikāla darasī munināthā। bisva badara jimi tumhareṃ hāthā॥

अस कहि प्रभु सब कथा बखानी। जेहि जेहि भाँति दीन्ह बनु रानी।।

asa kahi prabhu saba kathā bakhānī। jehi jehi bhā~ti dīnha banu rānī॥

तात बचन पुनि मातु हित भाइ भरत अस राउ।

tāta bacana puni mātu hita bhāi bharata asa rāu।

मो कहुँ दरस तुम्हार प्रभु सबु मम पुन्य प्रभाउ।।125।।

mo kahu~ darasa tumhāra prabhu sabu mama punya prabhāu॥125॥

देखि पाय मुनिराय तुम्हारे। भए सुकृत सब सुफल हमारे।।

dekhi pāya munirāya tumhāre। bhae sukṛta saba suphala hamāre॥

अब जहँ राउर आयसु होई। मुनि उदबेगु न पावै कोई।।

aba jaha~ rāura āyasu hoī। muni udabegu na pāvai koī॥

मुनि तापस जिन्ह तें दुखु लहहीं। ते नरेस बिनु पावक दहहीं।।

muni tāpasa jinha teṃ dukhu lahahīṃ। te naresa binu pāvaka dahahīṃ॥

मंगल मूल बिप्र परितोषू। दहइ कोटि कुल भूसुर रोषू।।

maṃgala mūla bipra paritoṣū। dahai koṭi kula bhūsura roṣū॥

अस जियँ जानि कहिअ सोइ ठाऊँ। सिय सौमित्रि सहित जहँ जाऊँ।।

asa jiya~ jāni kahia soi ṭhāū~। siya saumitri sahita jaha~ jāū~॥

तहँ रचि रुचिर परन तृन साला। बासु करौ कछु काल कृपाला।।

taha~ raci rucira parana tṛna sālā। bāsu karau kachu kāla kṛpālā॥

सहज सरल सुनि रघुबर बानी। साधु साधु बोले मुनि ग्यानी।।

sahaja sarala suni raghubara bānī। sādhu sādhu bole muni gyānī॥

कस न कहहु अस रघुकुलकेतू। तुम्ह पालक संतत श्रुति सेतू।।

kasa na kahahu asa raghukulaketū। tumha pālaka saṃtata śruti setū॥

श्रुति सेतु पालक राम तुम्ह जगदीस माया जानकी।

śruti setu pālaka rāma tumha jagadīsa māyā jānakī।

जो सृजति जगु पालति हरति रूख पाइ कृपानिधान की।।

jo sṛjati jagu pālati harati rūkha pāi kṛpānidhāna kī॥

जो सहससीसु अहीसु महिधरु लखनु सचराचर धनी।

jo sahasasīsu ahīsu mahidharu lakhanu sacarācara dhanī।

सुर काज धरि नरराज तनु चले दलन खल निसिचर अनी।।

sura kāja dhari nararāja tanu cale dalana khala nisicara anī॥

राम सरुप तुम्हार बचन अगोचर बुद्धिपर।

rāma sarupa tumhāra bacana agocara buddhipara।

अबिगत अकथ अपार नेति नित निगम कह।।126।।

abigata akatha apāra neti nita nigama kaha॥126॥

जगु पेखन तुम्ह देखनिहारे। बिधि हरि संभु नचावनिहारे।।

jagu pekhana tumha dekhanihāre। bidhi hari saṃbhu nacāvanihāre॥

तेउ न जानहिं मरमु तुम्हारा। औरु तुम्हहि को जाननिहारा।।

teu na jānahiṃ maramu tumhārā। auru tumhahi ko jānanihārā॥

सोइ जानइ जेहि देहु जनाई। जानत तुम्हहि तुम्हइ होइ जाई।।

soi jānai jehi dehu janāī। jānata tumhahi tumhai hoi jāī॥

तुम्हरिहि कृपाँ तुम्हहि रघुनंदन। जानहिं भगत भगत उर चंदन।।

tumharihi kṛpā~ tumhahi raghunaṃdana। jānahiṃ bhagata bhagata ura caṃdana॥

चिदानंदमय देह तुम्हारी। बिगत बिकार जान अधिकारी।।

cidānaṃdamaya deha tumhārī। bigata bikāra jāna adhikārī॥

नर तनु धरेहु संत सुर काजा। कहहु करहु जस प्राकृत राजा।।

nara tanu dharehu saṃta sura kājā। kahahu karahu jasa prākṛta rājā॥

राम देखि सुनि चरित तुम्हारे। जड़ मोहहिं बुध होहिं सुखारे।।

rāma dekhi suni carita tumhāre। jar̤a mohahiṃ budha hohiṃ sukhāre॥

तुम्ह जो कहहु करहु सबु साँचा। जस काछिअ तस चाहिअ नाचा।।

tumha jo kahahu karahu sabu sā~cā। jasa kāchia tasa cāhia nācā॥

पूँछेहु मोहि कि रहौं कहँ मैं पूँछत सकुचाउँ।

pū~chehu mohi ki rahauṃ kaha~ maiṃ pū~chata sakucāu~।

जहँ न होहु तहँ देहु कहि तुम्हहि देखावौं ठाउँ।।127।।

jaha~ na hohu taha~ dehu kahi tumhahi dekhāvauṃ ṭhāu~॥127॥

सुनि मुनि बचन प्रेम रस साने। सकुचि राम मन महुँ मुसुकाने।।

suni muni bacana prema rasa sāne। sakuci rāma mana mahu~ musukāne॥

बालमीकि हँसि कहहिं बहोरी। बानी मधुर अमिअ रस बोरी।।

bālamīki ha~si kahahiṃ bahorī। bānī madhura amia rasa borī॥

सुनहु राम अब कहउँ निकेता। जहाँ बसहु सिय लखन समेता।।

sunahu rāma aba kahau~ niketā। jahā~ basahu siya lakhana sametā॥

जिन्ह के श्रवन समुद्र समाना। कथा तुम्हारि सुभग सरि नाना।।

jinha ke śravana samudra samānā। kathā tumhāri subhaga sari nānā॥

भरहिं निरंतर होहिं न पूरे। तिन्ह के हिय तुम्ह कहुँ गृह रूरे।।

bharahiṃ niraṃtara hohiṃ na pūre। tinha ke hiya tumha kahu~ gṛha rūre॥

लोचन चातक जिन्ह करि राखे। रहहिं दरस जलधर अभिलाषे।।

locana cātaka jinha kari rākhe। rahahiṃ darasa jaladhara abhilāṣe॥

निदरहिं सरित सिंधु सर भारी। रूप बिंदु जल होहिं सुखारी।।

nidarahiṃ sarita siṃdhu sara bhārī। rūpa biṃdu jala hohiṃ sukhārī॥

तिन्ह के हृदय सदन सुखदायक। बसहु बंधु सिय सह रघुनायक।।

tinha ke hṛdaya sadana sukhadāyaka। basahu baṃdhu siya saha raghunāyaka॥

जसु तुम्हार मानस बिमल हंसिनि जीहा जासु।

jasu tumhāra mānasa bimala haṃsini jīhā jāsu।

मुकुताहल गुन गन चुनइ राम बसहु हियँ तासु।।128।।

mukutāhala guna gana cunai rāma basahu hiya~ tāsu॥128॥

प्रभु प्रसाद सुचि सुभग सुबासा। सादर जासु लहइ नित नासा।।

prabhu prasāda suci subhaga subāsā। sādara jāsu lahai nita nāsā॥

तुम्हहि निबेदित भोजन करहीं। प्रभु प्रसाद पट भूषन धरहीं।।

tumhahi nibedita bhojana karahīṃ। prabhu prasāda paṭa bhūṣana dharahīṃ॥

सीस नवहिं सुर गुरु द्विज देखी। प्रीति सहित करि बिनय बिसेषी।।

sīsa navahiṃ sura guru dvija dekhī। prīti sahita kari binaya biseṣī॥

कर नित करहिं राम पद पूजा। राम भरोस हृदयँ नहि दूजा।।

kara nita karahiṃ rāma pada pūjā। rāma bharosa hṛdaya~ nahi dūjā॥

चरन राम तीरथ चलि जाहीं। राम बसहु तिन्ह के मन माहीं।।

carana rāma tīratha cali jāhīṃ। rāma basahu tinha ke mana māhīṃ॥

मंत्रराजु नित जपहिं तुम्हारा। पूजहिं तुम्हहि सहित परिवारा।।

maṃtrarāju nita japahiṃ tumhārā। pūjahiṃ tumhahi sahita parivārā॥

तरपन होम करहिं बिधि नाना। बिप्र जेवाँइ देहिं बहु दाना।।

tarapana homa karahiṃ bidhi nānā। bipra jevā~i dehiṃ bahu dānā॥

तुम्ह तें अधिक गुरहि जियँ जानी। सकल भायँ सेवहिं सनमानी।।

tumha teṃ adhika gurahi jiya~ jānī। sakala bhāya~ sevahiṃ sanamānī॥

सबु करि मागहिं एक फलु राम चरन रति होउ।

sabu kari māgahiṃ eka phalu rāma carana rati hou।

तिन्ह कें मन मंदिर बसहु सिय रघुनंदन दोउ।।129।।

tinha keṃ mana maṃdira basahu siya raghunaṃdana dou॥129॥

काम कोह मद मान न मोहा। लोभ न छोभ न राग न द्रोहा।।

kāma koha mada māna na mohā। lobha na chobha na rāga na drohā॥

जिन्ह कें कपट दंभ नहिं माया। तिन्ह कें हृदय बसहु रघुराया।।

jinha keṃ kapaṭa daṃbha nahiṃ māyā। tinha keṃ hṛdaya basahu raghurāyā॥

सब के प्रिय सब के हितकारी। दुख सुख सरिस प्रसंसा गारी।।

saba ke priya saba ke hitakārī। dukha sukha sarisa prasaṃsā gārī॥

कहहिं सत्य प्रिय बचन बिचारी। जागत सोवत सरन तुम्हारी।।

kahahiṃ satya priya bacana bicārī। jāgata sovata sarana tumhārī॥

तुम्हहि छाड़ि गति दूसरि नाहीं। राम बसहु तिन्ह के मन माहीं।।

tumhahi chār̤i gati dūsari nāhīṃ। rāma basahu tinha ke mana māhīṃ॥

जननी सम जानहिं परनारी। धनु पराव बिष तें बिष भारी।।

jananī sama jānahiṃ paranārī। dhanu parāva biṣa teṃ biṣa bhārī॥

जे हरषहिं पर संपति देखी। दुखित होहिं पर बिपति बिसेषी।।

je haraṣahiṃ para saṃpati dekhī। dukhita hohiṃ para bipati biseṣī॥

जिन्हहि राम तुम्ह प्रानपिआरे। तिन्ह के मन सुभ सदन तुम्हारे।।

jinhahi rāma tumha prānapiāre। tinha ke mana subha sadana tumhāre॥

स्वामि सखा पितु मातु गुर जिन्ह के सब तुम्ह तात।

svāmi sakhā pitu mātu gura jinha ke saba tumha tāta।

मन मंदिर तिन्ह कें बसहु सीय सहित दोउ भ्रात।।130।।

mana maṃdira tinha keṃ basahu sīya sahita dou bhrāta॥130॥

अवगुन तजि सब के गुन गहहीं। बिप्र धेनु हित संकट सहहीं।।

avaguna taji saba ke guna gahahīṃ। bipra dhenu hita saṃkaṭa sahahīṃ॥

नीति निपुन जिन्ह कइ जग लीका। घर तुम्हार तिन्ह कर मनु नीका।।

nīti nipuna jinha kai jaga līkā। ghara tumhāra tinha kara manu nīkā॥

गुन तुम्हार समुझइ निज दोसा। जेहि सब भाँति तुम्हार भरोसा।।

guna tumhāra samujhai nija dosā। jehi saba bhā~ti tumhāra bharosā॥

राम भगत प्रिय लागहिं जेही। तेहि उर बसहु सहित बैदेही।।

rāma bhagata priya lāgahiṃ jehī। tehi ura basahu sahita baidehī॥

जाति पाँति धनु धरम बड़ाई। प्रिय परिवार सदन सुखदाई।।

jāti pā~ti dhanu dharama bar̤āī। priya parivāra sadana sukhadāī॥

सब तजि तुम्हहि रहइ उर लाई। तेहि के हृदयँ रहहु रघुराई।।

saba taji tumhahi rahai ura lāī। tehi ke hṛdaya~ rahahu raghurāī॥

सरगु नरकु अपबरगु समाना। जहँ तहँ देख धरें धनु बाना।।

saragu naraku apabaragu samānā। jaha~ taha~ dekha dhareṃ dhanu bānā॥

करम बचन मन राउर चेरा। राम करहु तेहि कें उर डेरा।।

karama bacana mana rāura cerā। rāma karahu tehi keṃ ura ḍerā॥

जाहि न चाहिअ कबहुँ कछु तुम्ह सन सहज सनेहु।

jāhi na cāhia kabahu~ kachu tumha sana sahaja sanehu।

बसहु निरंतर तासु मन सो राउर निज गेहु।।131।।

basahu niraṃtara tāsu mana so rāura nija gehu॥131॥

एहि बिधि मुनिबर भवन देखाए। बचन सप्रेम राम मन भाए।।

ehi bidhi munibara bhavana dekhāe। bacana saprema rāma mana bhāe॥

कह मुनि सुनहु भानुकुलनायक। आश्रम कहउँ समय सुखदायक।।

kaha muni sunahu bhānukulanāyaka। āśrama kahau~ samaya sukhadāyaka॥

चित्रकूट गिरि करहु निवासू। तहँ तुम्हार सब भाँति सुपासू।।

citrakūṭa giri karahu nivāsū। taha~ tumhāra saba bhā~ti supāsū॥

सैलु सुहावन कानन चारू। करि केहरि मृग बिहग बिहारू।।

sailu suhāvana kānana cārū। kari kehari mṛga bihaga bihārū॥

नदी पुनीत पुरान बखानी। अत्रिप्रिया निज तपबल आनी।।

nadī punīta purāna bakhānī। atripriyā nija tapabala ānī॥

सुरसरि धार नाउँ मंदाकिनि। जो सब पातक पोतक डाकिनि।।

surasari dhāra nāu~ maṃdākini। jo saba pātaka potaka ḍākini॥

अत्रि आदि मुनिबर बहु बसहीं। करहिं जोग जप तप तन कसहीं।।

atri ādi munibara bahu basahīṃ। karahiṃ joga japa tapa tana kasahīṃ॥

चलहु सफल श्रम सब कर करहू। राम देहु गौरव गिरिबरहू।।

calahu saphala śrama saba kara karahū। rāma dehu gaurava giribarahū॥

चित्रकूट महिमा अमित कहीं महामुनि गाइ।

citrakūṭa mahimā amita kahīṃ mahāmuni gāi।

आए नहाए सरित बर सिय समेत दोउ भाइ।।132।।

āe nahāe sarita bara siya sameta dou bhāi॥132॥

रघुबर कहेउ लखन भल घाटू। करहु कतहुँ अब ठाहर ठाटू।।

raghubara kaheu lakhana bhala ghāṭū। karahu katahu~ aba ṭhāhara ṭhāṭū॥

लखन दीख पय उतर करारा। चहुँ दिसि फिरेउ धनुष जिमि नारा।।

lakhana dīkha paya utara karārā। cahu~ disi phireu dhanuṣa jimi nārā॥

नदी पनच सर सम दम दाना। सकल कलुष कलि साउज नाना।।

nadī panaca sara sama dama dānā। sakala kaluṣa kali sāuja nānā॥

चित्रकूट जनु अचल अहेरी। चुकइ न घात मार मुठभेरी।।

citrakūṭa janu acala aherī। cukai na ghāta māra muṭhabherī॥

अस कहि लखन ठाउँ देखरावा। थलु बिलोकि रघुबर सुखु पावा।।

asa kahi lakhana ṭhāu~ dekharāvā। thalu biloki raghubara sukhu pāvā॥

रमेउ राम मनु देवन्ह जाना। चले सहित सुर थपति प्रधाना।।

rameu rāma manu devanha jānā। cale sahita sura thapati pradhānā॥

कोल किरात बेष सब आए। रचे परन तृन सदन सुहाए।।

kola kirāta beṣa saba āe। race parana tṛna sadana suhāe॥

बरनि न जाहि मंजु दुइ साला। एक ललित लघु एक बिसाला।।

barani na jāhi maṃju dui sālā। eka lalita laghu eka bisālā॥

लखन जानकी सहित प्रभु राजत रुचिर निकेत।

lakhana jānakī sahita prabhu rājata rucira niketa।

सोह मदनु मुनि बेष जनु रति रितुराज समेत।।133।।

soha madanu muni beṣa janu rati riturāja sameta॥133॥

अमर नाग किंनर दिसिपाला। चित्रकूट आए तेहि काला।।

amara nāga kiṃnara disipālā। citrakūṭa āe tehi kālā॥

राम प्रनामु कीन्ह सब काहू। मुदित देव लहि लोचन लाहू।।

rāma pranāmu kīnha saba kāhū। mudita deva lahi locana lāhū॥

बरषि सुमन कह देव समाजू। नाथ सनाथ भए हम आजू।।

baraṣi sumana kaha deva samājū। nātha sanātha bhae hama ājū॥

करि बिनती दुख दुसह सुनाए। हरषित निज निज सदन सिधाए।।

kari binatī dukha dusaha sunāe। haraṣita nija nija sadana sidhāe॥

चित्रकूट रघुनंदनु छाए। समाचार सुनि सुनि मुनि आए।।

citrakūṭa raghunaṃdanu chāe। samācāra suni suni muni āe॥

आवत देखि मुदित मुनिबृंदा। कीन्ह दंडवत रघुकुल चंदा।।

āvata dekhi mudita munibṛṃdā। kīnha daṃḍavata raghukula caṃdā॥

मुनि रघुबरहि लाइ उर लेहीं। सुफल होन हित आसिष देहीं।।

muni raghubarahi lāi ura lehīṃ। suphala hona hita āsiṣa dehīṃ॥

सिय सौमित्र राम छबि देखहिं। साधन सकल सफल करि लेखहिं।।

siya saumitra rāma chabi dekhahiṃ। sādhana sakala saphala kari lekhahiṃ॥

जथाजोग सनमानि प्रभु बिदा किए मुनिबृंद।

jathājoga sanamāni prabhu bidā kie munibṛṃda।

करहि जोग जप जाग तप निज आश्रमन्हि सुछंद।।134।।

karahi joga japa jāga tapa nija āśramanhi suchaṃda॥134॥

यह सुधि कोल किरातन्ह पाई। हरषे जनु नव निधि घर आई।।

yaha sudhi kola kirātanha pāī। haraṣe janu nava nidhi ghara āī॥

कंद मूल फल भरि भरि दोना। चले रंक जनु लूटन सोना।।

kaṃda mūla phala bhari bhari donā। cale raṃka janu lūṭana sonā॥

तिन्ह महँ जिन्ह देखे दोउ भ्राता। अपर तिन्हहि पूँछहि मगु जाता।।

tinha maha~ jinha dekhe dou bhrātā। apara tinhahi pū~chahi magu jātā॥

कहत सुनत रघुबीर निकाई। आइ सबन्हि देखे रघुराई।।

kahata sunata raghubīra nikāī। āi sabanhi dekhe raghurāī॥

करहिं जोहारु भेंट धरि आगे। प्रभुहि बिलोकहिं अति अनुरागे।।

karahiṃ johāru bheṃṭa dhari āge। prabhuhi bilokahiṃ ati anurāge॥

चित्र लिखे जनु जहँ तहँ ठाढ़े। पुलक सरीर नयन जल बाढ़े।।

citra likhe janu jaha~ taha~ ṭhār̤he। pulaka sarīra nayana jala bār̤he॥

राम सनेह मगन सब जाने। कहि प्रिय बचन सकल सनमाने।।

rāma saneha magana saba jāne। kahi priya bacana sakala sanamāne॥

प्रभुहि जोहारि बहोरि बहोरी। बचन बिनीत कहहिं कर जोरी।।

prabhuhi johāri bahori bahorī। bacana binīta kahahiṃ kara jorī॥

अब हम नाथ सनाथ सब भए देखि प्रभु पाय।

aba hama nātha sanātha saba bhae dekhi prabhu pāya।

भाग हमारे आगमनु राउर कोसलराय।।135।।

bhāga hamāre āgamanu rāura kosalarāya॥135॥

धन्य भूमि बन पंथ पहारा। जहँ जहँ नाथ पाउ तुम्ह धारा।।

dhanya bhūmi bana paṃtha pahārā। jaha~ jaha~ nātha pāu tumha dhārā॥

धन्य बिहग मृग काननचारी। सफल जनम भए तुम्हहि निहारी।।

dhanya bihaga mṛga kānanacārī। saphala janama bhae tumhahi nihārī॥

हम सब धन्य सहित परिवारा। दीख दरसु भरि नयन तुम्हारा।।

hama saba dhanya sahita parivārā। dīkha darasu bhari nayana tumhārā॥

कीन्ह बासु भल ठाउँ बिचारी। इहाँ सकल रितु रहब सुखारी।।

kīnha bāsu bhala ṭhāu~ bicārī। ihā~ sakala ritu rahaba sukhārī॥

हम सब भाँति करब सेवकाई। करि केहरि अहि बाघ बराई।।

hama saba bhā~ti karaba sevakāī। kari kehari ahi bāgha barāī॥

बन बेहड़ गिरि कंदर खोहा। सब हमार प्रभु पग पग जोहा।।

bana behar̤a giri kaṃdara khohā। saba hamāra prabhu paga paga johā॥

तहँ तहँ तुम्हहि अहेर खेलाउब। सर निरझर जलठाउँ देखाउब।।

taha~ taha~ tumhahi ahera khelāuba। sara nirajhara jalaṭhāu~ dekhāuba॥

हम सेवक परिवार समेता। नाथ न सकुचब आयसु देता।।

hama sevaka parivāra sametā। nātha na sakucaba āyasu detā॥

बेद बचन मुनि मन अगम ते प्रभु करुना ऐन।

beda bacana muni mana agama te prabhu karunā aina।

बचन किरातन्ह के सुनत जिमि पितु बालक बैन।।136।।

bacana kirātanha ke sunata jimi pitu bālaka baina॥136॥

रामहि केवल प्रेमु पिआरा। जानि लेउ जो जाननिहारा।।

rāmahi kevala premu piārā। jāni leu jo jānanihārā॥

राम सकल बनचर तब तोषे। कहि मृदु बचन प्रेम परिपोषे।।

rāma sakala banacara taba toṣe। kahi mṛdu bacana prema paripoṣe॥

बिदा किए सिर नाइ सिधाए। प्रभु गुन कहत सुनत घर आए।।

bidā kie sira nāi sidhāe। prabhu guna kahata sunata ghara āe॥

एहि बिधि सिय समेत दोउ भाई। बसहिं बिपिन सुर मुनि सुखदाई।।

ehi bidhi siya sameta dou bhāī। basahiṃ bipina sura muni sukhadāī॥

जब ते आइ रहे रघुनायकु। तब तें भयउ बनु मंगलदायकु।।

jaba te āi rahe raghunāyaku। taba teṃ bhayau banu maṃgaladāyaku॥

फूलहिं फलहिं बिटप बिधि नाना।।मंजु बलित बर बेलि बिताना।।

phūlahiṃ phalahiṃ biṭapa bidhi nānā॥maṃju balita bara beli bitānā॥

सुरतरु सरिस सुभायँ सुहाए। मनहुँ बिबुध बन परिहरि आए।।

surataru sarisa subhāya~ suhāe। manahu~ bibudha bana parihari āe॥

गंज मंजुतर मधुकर श्रेनी। त्रिबिध बयारि बहइ सुख देनी।।

gaṃja maṃjutara madhukara śrenī। tribidha bayāri bahai sukha denī॥

नीलकंठ कलकंठ सुक चातक चक्क चकोर।

nīlakaṃṭha kalakaṃṭha suka cātaka cakka cakora।

भाँति भाँति बोलहिं बिहग श्रवन सुखद चित चोर।।137।।

bhā~ti bhā~ti bolahiṃ bihaga śravana sukhada cita cora॥137॥

केरि केहरि कपि कोल कुरंगा। बिगतबैर बिचरहिं सब संगा।।

keri kehari kapi kola kuraṃgā। bigatabaira bicarahiṃ saba saṃgā॥

फिरत अहेर राम छबि देखी। होहिं मुदित मृगबंद बिसेषी।।

phirata ahera rāma chabi dekhī। hohiṃ mudita mṛgabaṃda biseṣī॥

बिबुध बिपिन जहँ लगि जग माहीं। देखि राम बनु सकल सिहाहीं।।

bibudha bipina jaha~ lagi jaga māhīṃ। dekhi rāma banu sakala sihāhīṃ॥

सुरसरि सरसइ दिनकर कन्या। मेकलसुता गोदावरि धन्या।।

surasari sarasai dinakara kanyā। mekalasutā godāvari dhanyā॥

सब सर सिंधु नदी नद नाना। मंदाकिनि कर करहिं बखाना।।

saba sara siṃdhu nadī nada nānā। maṃdākini kara karahiṃ bakhānā॥

उदय अस्त गिरि अरु कैलासू। मंदर मेरु सकल सुरबासू।।

udaya asta giri aru kailāsū। maṃdara meru sakala surabāsū॥

सैल हिमाचल आदिक जेते। चित्रकूट जसु गावहिं तेते।।

saila himācala ādika jete। citrakūṭa jasu gāvahiṃ tete॥

बिंधि मुदित मन सुखु न समाई। श्रम बिनु बिपुल बड़ाई पाई।।

biṃdhi mudita mana sukhu na samāī। śrama binu bipula bar̤āī pāī॥

चित्रकूट के बिहग मृग बेलि बिटप तृन जाति।

citrakūṭa ke bihaga mṛga beli biṭapa tṛna jāti।

पुन्य पुंज सब धन्य अस कहहिं देव दिन राति।।138।।

punya puṃja saba dhanya asa kahahiṃ deva dina rāti॥138॥

नयनवंत रघुबरहि बिलोकी। पाइ जनम फल होहिं बिसोकी।।

nayanavaṃta raghubarahi bilokī। pāi janama phala hohiṃ bisokī॥

परसि चरन रज अचर सुखारी। भए परम पद के अधिकारी।।

parasi carana raja acara sukhārī। bhae parama pada ke adhikārī॥

सो बनु सैलु सुभायँ सुहावन। मंगलमय अति पावन पावन।।

so banu sailu subhāya~ suhāvana। maṃgalamaya ati pāvana pāvana॥

महिमा कहिअ कवनि बिधि तासू। सुखसागर जहँ कीन्ह निवासू।।

mahimā kahia kavani bidhi tāsū। sukhasāgara jaha~ kīnha nivāsū॥

पय पयोधि तजि अवध बिहाई। जहँ सिय लखनु रामु रहे आई।।

paya payodhi taji avadha bihāī। jaha~ siya lakhanu rāmu rahe āī॥

कहि न सकहिं सुषमा जसि कानन। जौं सत सहस होंहिं सहसानन।।

kahi na sakahiṃ suṣamā jasi kānana। jauṃ sata sahasa hoṃhiṃ sahasānana॥

सो मैं बरनि कहौं बिधि केहीं। डाबर कमठ कि मंदर लेहीं।।

so maiṃ barani kahauṃ bidhi kehīṃ। ḍābara kamaṭha ki maṃdara lehīṃ॥

सेवहिं लखनु करम मन बानी। जाइ न सीलु सनेहु बखानी।।

sevahiṃ lakhanu karama mana bānī। jāi na sīlu sanehu bakhānī॥

-छिनु छिनु लखि सिय राम पद जानि आपु पर नेहु।

-chinu chinu lakhi siya rāma pada jāni āpu para nehu।

करत न सपनेहुँ लखनु चितु बंधु मातु पितु गेहु।।139।।

karata na sapanehu~ lakhanu citu baṃdhu mātu pitu gehu॥139॥

राम संग सिय रहति सुखारी। पुर परिजन गृह सुरति बिसारी।।

rāma saṃga siya rahati sukhārī। pura parijana gṛha surati bisārī॥

छिनु छिनु पिय बिधु बदनु निहारी। प्रमुदित मनहुँ चकोरकुमारी।।

chinu chinu piya bidhu badanu nihārī। pramudita manahu~ cakorakumārī॥

नाह नेहु नित बढ़त बिलोकी। हरषित रहति दिवस जिमि कोकी।।

nāha nehu nita bar̤hata bilokī। haraṣita rahati divasa jimi kokī॥

सिय मनु राम चरन अनुरागा। अवध सहस सम बनु प्रिय लागा।।

siya manu rāma carana anurāgā। avadha sahasa sama banu priya lāgā॥

परनकुटी प्रिय प्रियतम संगा। प्रिय परिवारु कुरंग बिहंगा।।

paranakuṭī priya priyatama saṃgā। priya parivāru kuraṃga bihaṃgā॥

सासु ससुर सम मुनितिय मुनिबर। असनु अमिअ सम कंद मूल फर।।

sāsu sasura sama munitiya munibara। asanu amia sama kaṃda mūla phara॥

नाथ साथ साँथरी सुहाई। मयन सयन सय सम सुखदाई।।

nātha sātha sā~tharī suhāī। mayana sayana saya sama sukhadāī॥

लोकप होहिं बिलोकत जासू। तेहि कि मोहि सक बिषय बिलासू।।

lokapa hohiṃ bilokata jāsū। tehi ki mohi saka biṣaya bilāsū॥

-सुमिरत रामहि तजहिं जन तृन सम बिषय बिलासु।

-sumirata rāmahi tajahiṃ jana tṛna sama biṣaya bilāsu।

रामप्रिया जग जननि सिय कछु न आचरजु तासु।।140।।

rāmapriyā jaga janani siya kachu na ācaraju tāsu॥140॥

सीय लखन जेहि बिधि सुखु लहहीं। सोइ रघुनाथ करहि सोइ कहहीं।।

sīya lakhana jehi bidhi sukhu lahahīṃ। soi raghunātha karahi soi kahahīṃ॥

कहहिं पुरातन कथा कहानी। सुनहिं लखनु सिय अति सुखु मानी।

kahahiṃ purātana kathā kahānī। sunahiṃ lakhanu siya ati sukhu mānī।

जब जब रामु अवध सुधि करहीं। तब तब बारि बिलोचन भरहीं।।

jaba jaba rāmu avadha sudhi karahīṃ। taba taba bāri bilocana bharahīṃ॥

सुमिरि मातु पितु परिजन भाई। भरत सनेहु सीलु सेवकाई।।

sumiri mātu pitu parijana bhāī। bharata sanehu sīlu sevakāī॥

कृपासिंधु प्रभु होहिं दुखारी। धीरजु धरहिं कुसमउ बिचारी।।

kṛpāsiṃdhu prabhu hohiṃ dukhārī। dhīraju dharahiṃ kusamau bicārī॥

लखि सिय लखनु बिकल होइ जाहीं। जिमि पुरुषहि अनुसर परिछाहीं।।

lakhi siya lakhanu bikala hoi jāhīṃ। jimi puruṣahi anusara parichāhīṃ॥

प्रिया बंधु गति लखि रघुनंदनु। धीर कृपाल भगत उर चंदनु।।

priyā baṃdhu gati lakhi raghunaṃdanu। dhīra kṛpāla bhagata ura caṃdanu॥

लगे कहन कछु कथा पुनीता। सुनि सुखु लहहिं लखनु अरु सीता।।

lage kahana kachu kathā punītā। suni sukhu lahahiṃ lakhanu aru sītā॥

रामु लखन सीता सहित सोहत परन निकेत।

rāmu lakhana sītā sahita sohata parana niketa।

जिमि बासव बस अमरपुर सची जयंत समेत।।141।।

jimi bāsava basa amarapura sacī jayaṃta sameta॥141॥

जोगवहिं प्रभु सिय लखनहिं कैसें। पलक बिलोचन गोलक जैसें।।

jogavahiṃ prabhu siya lakhanahiṃ kaiseṃ। palaka bilocana golaka jaiseṃ॥

सेवहिं लखनु सीय रघुबीरहि। जिमि अबिबेकी पुरुष सरीरहि।।

sevahiṃ lakhanu sīya raghubīrahi। jimi abibekī puruṣa sarīrahi॥

एहि बिधि प्रभु बन बसहिं सुखारी। खग मृग सुर तापस हितकारी।।

ehi bidhi prabhu bana basahiṃ sukhārī। khaga mṛga sura tāpasa hitakārī॥

कहेउँ राम बन गवनु सुहावा। सुनहु सुमंत्र अवध जिमि आवा।।

kaheu~ rāma bana gavanu suhāvā। sunahu sumaṃtra avadha jimi āvā॥

फिरेउ निषादु प्रभुहि पहुँचाई। सचिव सहित रथ देखेसि आई।।

phireu niṣādu prabhuhi pahu~cāī। saciva sahita ratha dekhesi āī॥

मंत्री बिकल बिलोकि निषादू। कहि न जाइ जस भयउ बिषादू।।

maṃtrī bikala biloki niṣādū। kahi na jāi jasa bhayau biṣādū॥

राम राम सिय लखन पुकारी। परेउ धरनितल ब्याकुल भारी।।

rāma rāma siya lakhana pukārī। pareu dharanitala byākula bhārī॥

देखि दखिन दिसि हय हिहिनाहीं। जनु बिनु पंख बिहग अकुलाहीं।।

dekhi dakhina disi haya hihināhīṃ। janu binu paṃkha bihaga akulāhīṃ॥

नहिं तृन चरहिं पिअहिं जलु मोचहिं लोचन बारि।

nahiṃ tṛna carahiṃ piahiṃ jalu mocahiṃ locana bāri।

ब्याकुल भए निषाद सब रघुबर बाजि निहारि।।142।।

byākula bhae niṣāda saba raghubara bāji nihāri॥142॥

धरि धीरज तब कहइ निषादू। अब सुमंत्र परिहरहु बिषादू।।

dhari dhīraja taba kahai niṣādū। aba sumaṃtra pariharahu biṣādū॥

तुम्ह पंडित परमारथ ग्याता। धरहु धीर लखि बिमुख बिधाता

tumha paṃḍita paramāratha gyātā। dharahu dhīra lakhi bimukha bidhātā

बिबिध कथा कहि कहि मृदु बानी। रथ बैठारेउ बरबस आनी।।

bibidha kathā kahi kahi mṛdu bānī। ratha baiṭhāreu barabasa ānī॥

सोक सिथिल रथ सकइ न हाँकी। रघुबर बिरह पीर उर बाँकी।।

soka sithila ratha sakai na hā~kī। raghubara biraha pīra ura bā~kī॥

चरफराहिं मग चलहिं न घोरे। बन मृग मनहुँ आनि रथ जोरे।।

carapharāhiṃ maga calahiṃ na ghore। bana mṛga manahu~ āni ratha jore॥

अढ़ुकि परहिं फिरि हेरहिं पीछें। राम बियोगि बिकल दुख तीछें।।

ar̤huki parahiṃ phiri herahiṃ pīcheṃ। rāma biyogi bikala dukha tīcheṃ॥

जो कह रामु लखनु बैदेही। हिंकरि हिंकरि हित हेरहिं तेही।।

jo kaha rāmu lakhanu baidehī। hiṃkari hiṃkari hita herahiṃ tehī॥

बाजि बिरह गति कहि किमि जाती। बिनु मनि फनिक बिकल जेहि भाँती।।

bāji biraha gati kahi kimi jātī। binu mani phanika bikala jehi bhā~tī॥

भयउ निषाद बिषादबस देखत सचिव तुरंग।

bhayau niṣāda biṣādabasa dekhata saciva turaṃga।

बोलि सुसेवक चारि तब दिए सारथी संग।।143।।

boli susevaka cāri taba die sārathī saṃga॥143॥

गुह सारथिहि फिरेउ पहुँचाई। बिरहु बिषादु बरनि नहिं जाई।।

guha sārathihi phireu pahu~cāī। birahu biṣādu barani nahiṃ jāī॥

चले अवध लेइ रथहि निषादा। होहि छनहिं छन मगन बिषादा।।

cale avadha lei rathahi niṣādā। hohi chanahiṃ chana magana biṣādā॥

सोच सुमंत्र बिकल दुख दीना। धिग जीवन रघुबीर बिहीना।।

soca sumaṃtra bikala dukha dīnā। dhiga jīvana raghubīra bihīnā॥

रहिहि न अंतहुँ अधम सरीरू। जसु न लहेउ बिछुरत रघुबीरू।।

rahihi na aṃtahu~ adhama sarīrū। jasu na laheu bichurata raghubīrū॥

भए अजस अघ भाजन प्राना। कवन हेतु नहिं करत पयाना।।

bhae ajasa agha bhājana prānā। kavana hetu nahiṃ karata payānā॥

अहह मंद मनु अवसर चूका। अजहुँ न हृदय होत दुइ टूका।।

ahaha maṃda manu avasara cūkā। ajahu~ na hṛdaya hota dui ṭūkā॥

मीजि हाथ सिरु धुनि पछिताई। मनहँ कृपन धन रासि गवाँई।।

mīji hātha siru dhuni pachitāī। manaha~ kṛpana dhana rāsi gavā~ī॥

बिरिद बाँधि बर बीरु कहाई। चलेउ समर जनु सुभट पराई।।

birida bā~dhi bara bīru kahāī। caleu samara janu subhaṭa parāī॥

बिप्र बिबेकी बेदबिद संमत साधु सुजाति।

bipra bibekī bedabida saṃmata sādhu sujāti।

जिमि धोखें मदपान कर सचिव सोच तेहि भाँति।।144।।

jimi dhokheṃ madapāna kara saciva soca tehi bhā~ti॥144॥

जिमि कुलीन तिय साधु सयानी। पतिदेवता करम मन बानी।।

jimi kulīna tiya sādhu sayānī। patidevatā karama mana bānī॥

रहै करम बस परिहरि नाहू। सचिव हृदयँ तिमि दारुन दाहु।।

rahai karama basa parihari nāhū। saciva hṛdaya~ timi dāruna dāhu॥

लोचन सजल डीठि भइ थोरी। सुनइ न श्रवन बिकल मति भोरी।।

locana sajala ḍīṭhi bhai thorī। sunai na śravana bikala mati bhorī॥

सूखहिं अधर लागि मुहँ लाटी। जिउ न जाइ उर अवधि कपाटी।।

sūkhahiṃ adhara lāgi muha~ lāṭī। jiu na jāi ura avadhi kapāṭī॥

बिबरन भयउ न जाइ निहारी। मारेसि मनहुँ पिता महतारी।।

bibarana bhayau na jāi nihārī। māresi manahu~ pitā mahatārī॥

हानि गलानि बिपुल मन ब्यापी। जमपुर पंथ सोच जिमि पापी।।

hāni galāni bipula mana byāpī। jamapura paṃtha soca jimi pāpī॥

बचनु न आव हृदयँ पछिताई। अवध काह मैं देखब जाई।।

bacanu na āva hṛdaya~ pachitāī। avadha kāha maiṃ dekhaba jāī॥

राम रहित रथ देखिहि जोई। सकुचिहि मोहि बिलोकत सोई।।

rāma rahita ratha dekhihi joī। sakucihi mohi bilokata soī॥

-धाइ पूँछिहहिं मोहि जब बिकल नगर नर नारि।

-dhāi pū~chihahiṃ mohi jaba bikala nagara nara nāri।

उतरु देब मैं सबहि तब हृदयँ बज्रु बैठारि।।145।।

utaru deba maiṃ sabahi taba hṛdaya~ bajru baiṭhāri॥145॥

पुछिहहिं दीन दुखित सब माता। कहब काह मैं तिन्हहि बिधाता।।

puchihahiṃ dīna dukhita saba mātā। kahaba kāha maiṃ tinhahi bidhātā॥

पूछिहि जबहिं लखन महतारी। कहिहउँ कवन सँदेस सुखारी।।

pūchihi jabahiṃ lakhana mahatārī। kahihau~ kavana sa~desa sukhārī॥

राम जननि जब आइहि धाई। सुमिरि बच्छु जिमि धेनु लवाई।।

rāma janani jaba āihi dhāī। sumiri bacchu jimi dhenu lavāī॥

पूँछत उतरु देब मैं तेही। गे बनु राम लखनु बैदेही।।

pū~chata utaru deba maiṃ tehī। ge banu rāma lakhanu baidehī॥

जोइ पूँछिहि तेहि ऊतरु देबा।जाइ अवध अब यहु सुखु लेबा।।

joi pū~chihi tehi ūtaru debā।jāi avadha aba yahu sukhu lebā॥

पूँछिहि जबहिं राउ दुख दीना। जिवनु जासु रघुनाथ अधीना।।

pū~chihi jabahiṃ rāu dukha dīnā। jivanu jāsu raghunātha adhīnā॥

देहउँ उतरु कौनु मुहु लाई। आयउँ कुसल कुअँर पहुँचाई।।

dehau~ utaru kaunu muhu lāī। āyau~ kusala kua~ra pahu~cāī॥

सुनत लखन सिय राम सँदेसू। तृन जिमि तनु परिहरिहि नरेसू।।

sunata lakhana siya rāma sa~desū। tṛna jimi tanu pariharihi naresū॥

-ह्रदउ न बिदरेउ पंक जिमि बिछुरत प्रीतमु नीरु।।

-hradau na bidareu paṃka jimi bichurata prītamu nīru॥

जानत हौं मोहि दीन्ह बिधि यहु जातना सरीरु।।146।।

jānata hauṃ mohi dīnha bidhi yahu jātanā sarīru॥146॥

एहि बिधि करत पंथ पछितावा। तमसा तीर तुरत रथु आवा।।

ehi bidhi karata paṃtha pachitāvā। tamasā tīra turata rathu āvā॥

बिदा किए करि बिनय निषादा। फिरे पायँ परि बिकल बिषादा।।

bidā kie kari binaya niṣādā। phire pāya~ pari bikala biṣādā॥

पैठत नगर सचिव सकुचाई। जनु मारेसि गुर बाँभन गाई।।

paiṭhata nagara saciva sakucāī। janu māresi gura bā~bhana gāī॥

बैठि बिटप तर दिवसु गवाँवा। साँझ समय तब अवसरु पावा।।

baiṭhi biṭapa tara divasu gavā~vā। sā~jha samaya taba avasaru pāvā॥

अवध प्रबेसु कीन्ह अँधिआरें। पैठ भवन रथु राखि दुआरें।।

avadha prabesu kīnha a~dhiāreṃ। paiṭha bhavana rathu rākhi duāreṃ॥

जिन्ह जिन्ह समाचार सुनि पाए। भूप द्वार रथु देखन आए।।

jinha jinha samācāra suni pāe। bhūpa dvāra rathu dekhana āe॥

रथु पहिचानि बिकल लखि घोरे। गरहिं गात जिमि आतप ओरे।।

rathu pahicāni bikala lakhi ghore। garahiṃ gāta jimi ātapa ore॥

नगर नारि नर ब्याकुल कैंसें। निघटत नीर मीनगन जैंसें।।

nagara nāri nara byākula kaiṃseṃ। nighaṭata nīra mīnagana jaiṃseṃ॥

-सचिव आगमनु सुनत सबु बिकल भयउ रनिवासु।

-saciva āgamanu sunata sabu bikala bhayau ranivāsu।

भवन भयंकरु लाग तेहि मानहुँ प्रेत निवासु।।147।।

bhavana bhayaṃkaru lāga tehi mānahu~ preta nivāsu॥147॥

अति आरति सब पूँछहिं रानी। उतरु न आव बिकल भइ बानी।।

ati ārati saba pū~chahiṃ rānī। utaru na āva bikala bhai bānī॥

सुनइ न श्रवन नयन नहिं सूझा। कहहु कहाँ नृप तेहि तेहि बूझा।।

sunai na śravana nayana nahiṃ sūjhā। kahahu kahā~ nṛpa tehi tehi būjhā॥

दासिन्ह दीख सचिव बिकलाई। कौसल्या गृहँ गईं लवाई।।

dāsinha dīkha saciva bikalāī। kausalyā gṛha~ gaīṃ lavāī॥

जाइ सुमंत्र दीख कस राजा। अमिअ रहित जनु चंदु बिराजा।।

jāi sumaṃtra dīkha kasa rājā। amia rahita janu caṃdu birājā॥

आसन सयन बिभूषन हीना। परेउ भूमितल निपट मलीना।।

āsana sayana bibhūṣana hīnā। pareu bhūmitala nipaṭa malīnā॥

लेइ उसासु सोच एहि भाँती। सुरपुर तें जनु खँसेउ जजाती।।

lei usāsu soca ehi bhā~tī। surapura teṃ janu kha~seu jajātī॥

लेत सोच भरि छिनु छिनु छाती। जनु जरि पंख परेउ संपाती।।

leta soca bhari chinu chinu chātī। janu jari paṃkha pareu saṃpātī॥

राम राम कह राम सनेही। पुनि कह राम लखन बैदेही।।

rāma rāma kaha rāma sanehī। puni kaha rāma lakhana baidehī॥

देखि सचिवँ जय जीव कहि कीन्हेउ दंड प्रनामु।

dekhi saciva~ jaya jīva kahi kīnheu daṃḍa pranāmu।

सुनत उठेउ ब्याकुल नृपति कहु सुमंत्र कहँ रामु।।148।।

sunata uṭheu byākula nṛpati kahu sumaṃtra kaha~ rāmu॥148॥

भूप सुमंत्रु लीन्ह उर लाई। बूड़त कछु अधार जनु पाई।।

bhūpa sumaṃtru līnha ura lāī। būr̤ata kachu adhāra janu pāī॥

सहित सनेह निकट बैठारी। पूँछत राउ नयन भरि बारी।।

sahita saneha nikaṭa baiṭhārī। pū~chata rāu nayana bhari bārī॥

राम कुसल कहु सखा सनेही। कहँ रघुनाथु लखनु बैदेही।।

rāma kusala kahu sakhā sanehī। kaha~ raghunāthu lakhanu baidehī॥

आने फेरि कि बनहि सिधाए। सुनत सचिव लोचन जल छाए।।

āne pheri ki banahi sidhāe। sunata saciva locana jala chāe॥

सोक बिकल पुनि पूँछ नरेसू। कहु सिय राम लखन संदेसू।।

soka bikala puni pū~cha naresū। kahu siya rāma lakhana saṃdesū॥

राम रूप गुन सील सुभाऊ। सुमिरि सुमिरि उर सोचत राऊ।।

rāma rūpa guna sīla subhāū। sumiri sumiri ura socata rāū॥

राउ सुनाइ दीन्ह बनबासू। सुनि मन भयउ न हरषु हराँसू।।

rāu sunāi dīnha banabāsū। suni mana bhayau na haraṣu harā~sū॥

सो सुत बिछुरत गए न प्राना। को पापी बड़ मोहि समाना।।

so suta bichurata gae na prānā। ko pāpī bar̤a mohi samānā॥

सखा रामु सिय लखनु जहँ तहाँ मोहि पहुँचाउ।

sakhā rāmu siya lakhanu jaha~ tahā~ mohi pahu~cāu।

नाहिं त चाहत चलन अब प्रान कहउँ सतिभाउ।।149।।

nāhiṃ ta cāhata calana aba prāna kahau~ satibhāu॥149॥

पुनि पुनि पूँछत मंत्रहि राऊ। प्रियतम सुअन सँदेस सुनाऊ।।

puni puni pū~chata maṃtrahi rāū। priyatama suana sa~desa sunāū॥

करहि सखा सोइ बेगि उपाऊ। रामु लखनु सिय नयन देखाऊ।।

karahi sakhā soi begi upāū। rāmu lakhanu siya nayana dekhāū॥

सचिव धीर धरि कह मुदु बानी। महाराज तुम्ह पंडित ग्यानी।।

saciva dhīra dhari kaha mudu bānī। mahārāja tumha paṃḍita gyānī॥

बीर सुधीर धुरंधर देवा। साधु समाजु सदा तुम्ह सेवा।।

bīra sudhīra dhuraṃdhara devā। sādhu samāju sadā tumha sevā॥

जनम मरन सब दुख भोगा। हानि लाभ प्रिय मिलन बियोगा।।

janama marana saba dukha bhogā। hāni lābha priya milana biyogā॥

काल करम बस हौहिं गोसाईं। बरबस राति दिवस की नाईं।।

kāla karama basa hauhiṃ gosāīṃ। barabasa rāti divasa kī nāīṃ॥

सुख हरषहिं जड़ दुख बिलखाहीं। दोउ सम धीर धरहिं मन माहीं।।

sukha haraṣahiṃ jar̤a dukha bilakhāhīṃ। dou sama dhīra dharahiṃ mana māhīṃ॥

धीरज धरहु बिबेकु बिचारी। छाड़िअ सोच सकल हितकारी।।

dhīraja dharahu bibeku bicārī। chār̤ia soca sakala hitakārī॥

प्रथम बासु तमसा भयउ दूसर सुरसरि तीर।

prathama bāsu tamasā bhayau dūsara surasari tīra।

न्हाई रहे जलपानु करि सिय समेत दोउ बीर।।150।।

nhāī rahe jalapānu kari siya sameta dou bīra॥150॥

केवट कीन्हि बहुत सेवकाई। सो जामिनि सिंगरौर गवाँई।।

kevaṭa kīnhi bahuta sevakāī। so jāmini siṃgaraura gavā~ī॥

होत प्रात बट छीरु मगावा। जटा मुकुट निज सीस बनावा।।

hota prāta baṭa chīru magāvā। jaṭā mukuṭa nija sīsa banāvā॥

राम सखाँ तब नाव मगाई। प्रिया चढ़ाइ चढ़े रघुराई।।

rāma sakhā~ taba nāva magāī। priyā car̤hāi car̤he raghurāī॥

लखन बान धनु धरे बनाई। आपु चढ़े प्रभु आयसु पाई।।

lakhana bāna dhanu dhare banāī। āpu car̤he prabhu āyasu pāī॥

बिकल बिलोकि मोहि रघुबीरा। बोले मधुर बचन धरि धीरा।।

bikala biloki mohi raghubīrā। bole madhura bacana dhari dhīrā॥

तात प्रनामु तात सन कहेहु। बार बार पद पंकज गहेहू।।

tāta pranāmu tāta sana kahehu। bāra bāra pada paṃkaja gahehū॥

करबि पायँ परि बिनय बहोरी। तात करिअ जनि चिंता मोरी।।

karabi pāya~ pari binaya bahorī। tāta karia jani ciṃtā morī॥

बन मग मंगल कुसल हमारें। कृपा अनुग्रह पुन्य तुम्हारें।।

bana maga maṃgala kusala hamāreṃ। kṛpā anugraha punya tumhāreṃ॥

तुम्हरे अनुग्रह तात कानन जात सब सुखु पाइहौं।

tumhare anugraha tāta kānana jāta saba sukhu pāihauṃ।

प्रतिपालि आयसु कुसल देखन पाय पुनि फिरि आइहौं।।

pratipāli āyasu kusala dekhana pāya puni phiri āihauṃ॥

जननीं सकल परितोषि परि परि पायँ करि बिनती घनी।

jananīṃ sakala paritoṣi pari pari pāya~ kari binatī ghanī।

तुलसी करेहु सोइ जतनु जेहिं कुसली रहहिं कोसल धनी।।

tulasī karehu soi jatanu jehiṃ kusalī rahahiṃ kosala dhanī॥

गुर सन कहब सँदेसु बार बार पद पदुम गहि।

gura sana kahaba sa~desu bāra bāra pada paduma gahi।

करब सोइ उपदेसु जेहिं न सोच मोहि अवधपति।।151।।

karaba soi upadesu jehiṃ na soca mohi avadhapati॥151॥

पुरजन परिजन सकल निहोरी। तात सुनाएहु बिनती मोरी।।

purajana parijana sakala nihorī। tāta sunāehu binatī morī॥

सोइ सब भाँति मोर हितकारी। जातें रह नरनाहु सुखारी।।

soi saba bhā~ti mora hitakārī। jāteṃ raha naranāhu sukhārī॥

कहब सँदेसु भरत के आएँ। नीति न तजिअ राजपदु पाएँ।।

kahaba sa~desu bharata ke āe~। nīti na tajia rājapadu pāe~॥

पालेहु प्रजहि करम मन बानी। सेएहु मातु सकल सम जानी।।

pālehu prajahi karama mana bānī। seehu mātu sakala sama jānī॥

ओर निबाहेहु भायप भाई। करि पितु मातु सुजन सेवकाई।।

ora nibāhehu bhāyapa bhāī। kari pitu mātu sujana sevakāī॥

तात भाँति तेहि राखब राऊ। सोच मोर जेहिं करै न काऊ।।

tāta bhā~ti tehi rākhaba rāū। soca mora jehiṃ karai na kāū॥

लखन कहे कछु बचन कठोरा। बरजि राम पुनि मोहि निहोरा।।

lakhana kahe kachu bacana kaṭhorā। baraji rāma puni mohi nihorā॥

बार बार निज सपथ देवाई। कहबि न तात लखन लरिकाई।।

bāra bāra nija sapatha devāī। kahabi na tāta lakhana larikāī॥

कहि प्रनाम कछु कहन लिय सिय भइ सिथिल सनेह।

kahi pranāma kachu kahana liya siya bhai sithila saneha।

थकित बचन लोचन सजल पुलक पल्लवित देह।।152।।

thakita bacana locana sajala pulaka pallavita deha॥152॥

तेहि अवसर रघुबर रूख पाई। केवट पारहि नाव चलाई।।

tehi avasara raghubara rūkha pāī। kevaṭa pārahi nāva calāī॥

रघुकुलतिलक चले एहि भाँती। देखउँ ठाढ़ कुलिस धरि छाती।।

raghukulatilaka cale ehi bhā~tī। dekhau~ ṭhār̤ha kulisa dhari chātī॥

मैं आपन किमि कहौं कलेसू। जिअत फिरेउँ लेइ राम सँदेसू।।

maiṃ āpana kimi kahauṃ kalesū। jiata phireu~ lei rāma sa~desū॥

अस कहि सचिव बचन रहि गयऊ। हानि गलानि सोच बस भयऊ।।

asa kahi saciva bacana rahi gayaū। hāni galāni soca basa bhayaū॥

सुत बचन सुनतहिं नरनाहू। परेउ धरनि उर दारुन दाहू।।

suta bacana sunatahiṃ naranāhū। pareu dharani ura dāruna dāhū॥

तलफत बिषम मोह मन मापा। माजा मनहुँ मीन कहुँ ब्यापा।।

talaphata biṣama moha mana māpā। mājā manahu~ mīna kahu~ byāpā॥

करि बिलाप सब रोवहिं रानी। महा बिपति किमि जाइ बखानी।।

kari bilāpa saba rovahiṃ rānī। mahā bipati kimi jāi bakhānī॥

सुनि बिलाप दुखहू दुखु लागा। धीरजहू कर धीरजु भागा।।

suni bilāpa dukhahū dukhu lāgā। dhīrajahū kara dhīraju bhāgā॥

भयउ कोलाहलु अवध अति सुनि नृप राउर सोरु।

bhayau kolāhalu avadha ati suni nṛpa rāura soru।

बिपुल बिहग बन परेउ निसि मानहुँ कुलिस कठोरु।।153।।

bipula bihaga bana pareu nisi mānahu~ kulisa kaṭhoru॥153॥

प्रान कंठगत भयउ भुआलू। मनि बिहीन जनु ब्याकुल ब्यालू।।

prāna kaṃṭhagata bhayau bhuālū। mani bihīna janu byākula byālū॥

इद्रीं सकल बिकल भइँ भारी। जनु सर सरसिज बनु बिनु बारी।।

idrīṃ sakala bikala bhai~ bhārī। janu sara sarasija banu binu bārī॥

कौसल्याँ नृपु दीख मलाना। रबिकुल रबि अँथयउ जियँ जाना।

kausalyā~ nṛpu dīkha malānā। rabikula rabi a~thayau jiya~ jānā।

उर धरि धीर राम महतारी। बोली बचन समय अनुसारी।।

ura dhari dhīra rāma mahatārī। bolī bacana samaya anusārī॥

नाथ समुझि मन करिअ बिचारू। राम बियोग पयोधि अपारू।।

nātha samujhi mana karia bicārū। rāma biyoga payodhi apārū॥

करनधार तुम्ह अवध जहाजू। चढ़ेउ सकल प्रिय पथिक समाजू।।

karanadhāra tumha avadha jahājū। car̤heu sakala priya pathika samājū॥

धीरजु धरिअ त पाइअ पारू। नाहिं त बूड़िहि सबु परिवारू।।

dhīraju dharia ta pāia pārū। nāhiṃ ta būr̤ihi sabu parivārū॥

जौं जियँ धरिअ बिनय पिय मोरी। रामु लखनु सिय मिलहिं बहोरी।।

jauṃ jiya~ dharia binaya piya morī। rāmu lakhanu siya milahiṃ bahorī॥

प्रिया बचन मृदु सुनत नृपु चितयउ आँखि उघारि।

priyā bacana mṛdu sunata nṛpu citayau ā~khi ughāri।

तलफत मीन मलीन जनु सींचत सीतल बारि।।154।।

talaphata mīna malīna janu sīṃcata sītala bāri॥154॥

धरि धीरजु उठी बैठ भुआलू। कहु सुमंत्र कहँ राम कृपालू।।

dhari dhīraju uṭhī baiṭha bhuālū। kahu sumaṃtra kaha~ rāma kṛpālū॥

कहाँ लखनु कहँ रामु सनेही। कहँ प्रिय पुत्रबधू बैदेही।।

kahā~ lakhanu kaha~ rāmu sanehī। kaha~ priya putrabadhū baidehī॥

बिलपत राउ बिकल बहु भाँती। भइ जुग सरिस सिराति न राती।।

bilapata rāu bikala bahu bhā~tī। bhai juga sarisa sirāti na rātī॥

तापस अंध साप सुधि आई। कौसल्यहि सब कथा सुनाई।।

tāpasa aṃdha sāpa sudhi āī। kausalyahi saba kathā sunāī॥

भयउ बिकल बरनत इतिहासा। राम रहित धिग जीवन आसा।।

bhayau bikala baranata itihāsā। rāma rahita dhiga jīvana āsā॥

सो तनु राखि करब मैं काहा। जेंहि न प्रेम पनु मोर निबाहा।।

so tanu rākhi karaba maiṃ kāhā। jeṃhi na prema panu mora nibāhā॥

हा रघुनंदन प्रान पिरीते। तुम्ह बिनु जिअत बहुत दिन बीते।।

hā raghunaṃdana prāna pirīte। tumha binu jiata bahuta dina bīte॥

हा जानकी लखन हा रघुबर। हा पितु हित चित चातक जलधर।

hā jānakī lakhana hā raghubara। hā pitu hita cita cātaka jaladhara।

राम राम कहि राम कहि राम राम कहि राम।

rāma rāma kahi rāma kahi rāma rāma kahi rāma।

तनु परिहरि रघुबर बिरहँ राउ गयउ सुरधाम।।155।।

tanu parihari raghubara biraha~ rāu gayau suradhāma॥155॥

जिअन मरन फलु दसरथ पावा। अंड अनेक अमल जसु छावा।।

jiana marana phalu dasaratha pāvā। aṃḍa aneka amala jasu chāvā॥

जिअत राम बिधु बदनु निहारा। राम बिरह करि मरनु सँवारा।।

jiata rāma bidhu badanu nihārā। rāma biraha kari maranu sa~vārā॥

सोक बिकल सब रोवहिं रानी। रूपु सील बलु तेजु बखानी।।

soka bikala saba rovahiṃ rānī। rūpu sīla balu teju bakhānī॥

करहिं बिलाप अनेक प्रकारा। परहीं भूमितल बारहिं बारा।।

karahiṃ bilāpa aneka prakārā। parahīṃ bhūmitala bārahiṃ bārā॥

बिलपहिं बिकल दास अरु दासी। घर घर रुदनु करहिं पुरबासी।।

bilapahiṃ bikala dāsa aru dāsī। ghara ghara rudanu karahiṃ purabāsī॥

अँथयउ आजु भानुकुल भानू। धरम अवधि गुन रूप निधानू।।

a~thayau āju bhānukula bhānū। dharama avadhi guna rūpa nidhānū॥

गारीं सकल कैकइहि देहीं। नयन बिहीन कीन्ह जग जेहीं।।

gārīṃ sakala kaikaihi dehīṃ। nayana bihīna kīnha jaga jehīṃ॥

एहि बिधि बिलपत रैनि बिहानी। आए सकल महामुनि ग्यानी।।

ehi bidhi bilapata raini bihānī। āe sakala mahāmuni gyānī॥

तब बसिष्ठ मुनि समय सम कहि अनेक इतिहास।

taba basiṣṭha muni samaya sama kahi aneka itihāsa।

सोक नेवारेउ सबहि कर निज बिग्यान प्रकास।।156।।

soka nevāreu sabahi kara nija bigyāna prakāsa॥156॥

तेल नाँव भरि नृप तनु राखा। दूत बोलाइ बहुरि अस भाषा।।

tela nā~va bhari nṛpa tanu rākhā। dūta bolāi bahuri asa bhāṣā॥

धावहु बेगि भरत पहिं जाहू। नृप सुधि कतहुँ कहहु जनि काहू।।

dhāvahu begi bharata pahiṃ jāhū। nṛpa sudhi katahu~ kahahu jani kāhū॥

एतनेइ कहेहु भरत सन जाई। गुर बोलाई पठयउ दोउ भाई।।

etanei kahehu bharata sana jāī। gura bolāī paṭhayau dou bhāī॥

सुनि मुनि आयसु धावन धाए। चले बेग बर बाजि लजाए।।

suni muni āyasu dhāvana dhāe। cale bega bara bāji lajāe॥

अनरथु अवध अरंभेउ जब तें। कुसगुन होहिं भरत कहुँ तब तें।।

anarathu avadha araṃbheu jaba teṃ। kusaguna hohiṃ bharata kahu~ taba teṃ॥

देखहिं राति भयानक सपना। जागि करहिं कटु कोटि कलपना।।

dekhahiṃ rāti bhayānaka sapanā। jāgi karahiṃ kaṭu koṭi kalapanā॥

बिप्र जेवाँइ देहिं दिन दाना। सिव अभिषेक करहिं बिधि नाना।।

bipra jevā~i dehiṃ dina dānā। siva abhiṣeka karahiṃ bidhi nānā॥

मागहिं हृदयँ महेस मनाई। कुसल मातु पितु परिजन भाई।।

māgahiṃ hṛdaya~ mahesa manāī। kusala mātu pitu parijana bhāī॥

एहि बिधि सोचत भरत मन धावन पहुँचे आइ।

ehi bidhi socata bharata mana dhāvana pahu~ce āi।

गुर अनुसासन श्रवन सुनि चले गनेसु मनाइ।।157।।

gura anusāsana śravana suni cale ganesu manāi॥157॥

चले समीर बेग हय हाँके। नाघत सरित सैल बन बाँके।।

cale samīra bega haya hā~ke। nāghata sarita saila bana bā~ke॥

हृदयँ सोचु बड़ कछु न सोहाई। अस जानहिं जियँ जाउँ उड़ाई।।

hṛdaya~ socu bar̤a kachu na sohāī। asa jānahiṃ jiya~ jāu~ ur̤āī॥

एक निमेष बरस सम जाई। एहि बिधि भरत नगर निअराई।।

eka nimeṣa barasa sama jāī। ehi bidhi bharata nagara niarāī॥

असगुन होहिं नगर पैठारा। रटहिं कुभाँति कुखेत करारा।।

asaguna hohiṃ nagara paiṭhārā। raṭahiṃ kubhā~ti kukheta karārā॥

खर सिआर बोलहिं प्रतिकूला। सुनि सुनि होइ भरत मन सूला।।

khara siāra bolahiṃ pratikūlā। suni suni hoi bharata mana sūlā॥

श्रीहत सर सरिता बन बागा। नगरु बिसेषि भयावनु लागा।।

śrīhata sara saritā bana bāgā। nagaru biseṣi bhayāvanu lāgā॥

खग मृग हय गय जाहिं न जोए। राम बियोग कुरोग बिगोए।।

khaga mṛga haya gaya jāhiṃ na joe। rāma biyoga kuroga bigoe॥

नगर नारि नर निपट दुखारी। मनहुँ सबन्हि सब संपति हारी।।

nagara nāri nara nipaṭa dukhārī। manahu~ sabanhi saba saṃpati hārī॥

पुरजन मिलिहिं न कहहिं कछु गवँहिं जोहारहिं जाहिं।

purajana milihiṃ na kahahiṃ kachu gava~hiṃ johārahiṃ jāhiṃ।

भरत कुसल पूँछि न सकहिं भय बिषाद मन माहिं।।158।।

bharata kusala pū~chi na sakahiṃ bhaya biṣāda mana māhiṃ॥158॥

हाट बाट नहिं जाइ निहारी। जनु पुर दहँ दिसि लागि दवारी।।

hāṭa bāṭa nahiṃ jāi nihārī। janu pura daha~ disi lāgi davārī॥

आवत सुत सुनि कैकयनंदिनि। हरषी रबिकुल जलरुह चंदिनि।।

āvata suta suni kaikayanaṃdini। haraṣī rabikula jalaruha caṃdini॥

सजि आरती मुदित उठि धाई। द्वारेहिं भेंटि भवन लेइ आई।।

saji āratī mudita uṭhi dhāī। dvārehiṃ bheṃṭi bhavana lei āī॥

भरत दुखित परिवारु निहारा। मानहुँ तुहिन बनज बनु मारा।।

bharata dukhita parivāru nihārā। mānahu~ tuhina banaja banu mārā॥

कैकेई हरषित एहि भाँति। मनहुँ मुदित दव लाइ किराती।।

kaikeī haraṣita ehi bhā~ti। manahu~ mudita dava lāi kirātī॥

सुतहि ससोच देखि मनु मारें। पूँछति नैहर कुसल हमारें।।

sutahi sasoca dekhi manu māreṃ। pū~chati naihara kusala hamāreṃ॥

सकल कुसल कहि भरत सुनाई। पूँछी निज कुल कुसल भलाई।।

sakala kusala kahi bharata sunāī। pū~chī nija kula kusala bhalāī॥

कहु कहँ तात कहाँ सब माता। कहँ सिय राम लखन प्रिय भ्राता।।

kahu kaha~ tāta kahā~ saba mātā। kaha~ siya rāma lakhana priya bhrātā॥

सुनि सुत बचन सनेहमय कपट नीर भरि नैन।

suni suta bacana sanehamaya kapaṭa nīra bhari naina।

भरत श्रवन मन सूल सम पापिनि बोली बैन।।159।।

bharata śravana mana sūla sama pāpini bolī baina॥159॥

तात बात मैं सकल सँवारी। भै मंथरा सहाय बिचारी।।

tāta bāta maiṃ sakala sa~vārī। bhai maṃtharā sahāya bicārī॥

कछुक काज बिधि बीच बिगारेउ। भूपति सुरपति पुर पगु धारेउ।।

kachuka kāja bidhi bīca bigāreu। bhūpati surapati pura pagu dhāreu॥

सुनत भरतु भए बिबस बिषादा। जनु सहमेउ करि केहरि नादा।।

sunata bharatu bhae bibasa biṣādā। janu sahameu kari kehari nādā॥

तात तात हा तात पुकारी। परे भूमितल ब्याकुल भारी।।

tāta tāta hā tāta pukārī। pare bhūmitala byākula bhārī॥

चलत न देखन पायउँ तोही। तात न रामहि सौंपेहु मोही।।

calata na dekhana pāyau~ tohī। tāta na rāmahi sauṃpehu mohī॥

बहुरि धीर धरि उठे सँभारी। कहु पितु मरन हेतु महतारी।।

bahuri dhīra dhari uṭhe sa~bhārī। kahu pitu marana hetu mahatārī॥

सुनि सुत बचन कहति कैकेई। मरमु पाँछि जनु माहुर देई।।

suni suta bacana kahati kaikeī। maramu pā~chi janu māhura deī॥

आदिहु तें सब आपनि करनी। कुटिल कठोर मुदित मन बरनी।।

ādihu teṃ saba āpani karanī। kuṭila kaṭhora mudita mana baranī॥

भरतहि बिसरेउ पितु मरन सुनत राम बन गौनु।

bharatahi bisareu pitu marana sunata rāma bana gaunu।

हेतु अपनपउ जानि जियँ थकित रहे धरि मौनु।।160।।

hetu apanapau jāni jiya~ thakita rahe dhari maunu॥160॥

बिकल बिलोकि सुतहि समुझावति। मनहुँ जरे पर लोनु लगावति।।

bikala biloki sutahi samujhāvati। manahu~ jare para lonu lagāvati॥

तात राउ नहिं सोचे जोगू। बिढ़इ सुकृत जसु कीन्हेउ भोगू।।

tāta rāu nahiṃ soce jogū। bir̤hai sukṛta jasu kīnheu bhogū॥

जीवत सकल जनम फल पाए। अंत अमरपति सदन सिधाए।।

jīvata sakala janama phala pāe। aṃta amarapati sadana sidhāe॥

अस अनुमानि सोच परिहरहू। सहित समाज राज पुर करहू।।

asa anumāni soca pariharahū। sahita samāja rāja pura karahū॥

सुनि सुठि सहमेउ राजकुमारू। पाकें छत जनु लाग अँगारू।।

suni suṭhi sahameu rājakumārū। pākeṃ chata janu lāga a~gārū॥

धीरज धरि भरि लेहिं उसासा। पापनि सबहि भाँति कुल नासा।।

dhīraja dhari bhari lehiṃ usāsā। pāpani sabahi bhā~ti kula nāsā॥

जौं पै कुरुचि रही अति तोही। जनमत काहे न मारे मोही।।

jauṃ pai kuruci rahī ati tohī। janamata kāhe na māre mohī॥

पेड़ काटि तैं पालउ सींचा। मीन जिअन निति बारि उलीचा।।

per̤a kāṭi taiṃ pālau sīṃcā। mīna jiana niti bāri ulīcā॥

हंसबंसु दसरथु जनकु राम लखन से भाइ।

haṃsabaṃsu dasarathu janaku rāma lakhana se bhāi।

जननी तूँ जननी भई बिधि सन कछु न बसाइ।।161।।

jananī tū~ jananī bhaī bidhi sana kachu na basāi॥161॥

जब तैं कुमति कुमत जियँ ठयऊ। खंड खंड होइ ह्रदउ न गयऊ।।

jaba taiṃ kumati kumata jiya~ ṭhayaū। khaṃḍa khaṃḍa hoi hradau na gayaū॥

बर मागत मन भइ नहिं पीरा। गरि न जीह मुहँ परेउ न कीरा।।

bara māgata mana bhai nahiṃ pīrā। gari na jīha muha~ pareu na kīrā॥

भूपँ प्रतीत तोरि किमि कीन्ही। मरन काल बिधि मति हरि लीन्ही।।

bhūpa~ pratīta tori kimi kīnhī। marana kāla bidhi mati hari līnhī॥

बिधिहुँ न नारि हृदय गति जानी। सकल कपट अघ अवगुन खानी।।

bidhihu~ na nāri hṛdaya gati jānī। sakala kapaṭa agha avaguna khānī॥

सरल सुसील धरम रत राऊ। सो किमि जानै तीय सुभाऊ।।

sarala susīla dharama rata rāū। so kimi jānai tīya subhāū॥

अस को जीव जंतु जग माहीं। जेहि रघुनाथ प्रानप्रिय नाहीं।।

asa ko jīva jaṃtu jaga māhīṃ। jehi raghunātha prānapriya nāhīṃ॥

भे अति अहित रामु तेउ तोही। को तू अहसि सत्य कहु मोही।।

bhe ati ahita rāmu teu tohī। ko tū ahasi satya kahu mohī॥

जो हसि सो हसि मुहँ मसि लाई। आँखि ओट उठि बैठहिं जाई।।

jo hasi so hasi muha~ masi lāī। ā~khi oṭa uṭhi baiṭhahiṃ jāī॥

राम बिरोधी हृदय तें प्रगट कीन्ह बिधि मोहि।

rāma birodhī hṛdaya teṃ pragaṭa kīnha bidhi mohi।

मो समान को पातकी बादि कहउँ कछु तोहि।।162।।

mo samāna ko pātakī bādi kahau~ kachu tohi॥162॥

सुनि सत्रुघुन मातु कुटिलाई। जरहिं गात रिस कछु न बसाई।।

suni satrughuna mātu kuṭilāī। jarahiṃ gāta risa kachu na basāī॥

तेहि अवसर कुबरी तहँ आई। बसन बिभूषन बिबिध बनाई।।

tehi avasara kubarī taha~ āī। basana bibhūṣana bibidha banāī॥

लखि रिस भरेउ लखन लघु भाई। बरत अनल घृत आहुति पाई।।

lakhi risa bhareu lakhana laghu bhāī। barata anala ghṛta āhuti pāī॥

हुमगि लात तकि कूबर मारा। परि मुह भर महि करत पुकारा।।

humagi lāta taki kūbara mārā। pari muha bhara mahi karata pukārā॥

कूबर टूटेउ फूट कपारू। दलित दसन मुख रुधिर प्रचारू।।

kūbara ṭūṭeu phūṭa kapārū। dalita dasana mukha rudhira pracārū॥

आह दइअ मैं काह नसावा। करत नीक फलु अनइस पावा।।

āha daia maiṃ kāha nasāvā। karata nīka phalu anaisa pāvā॥

सुनि रिपुहन लखि नख सिख खोटी। लगे घसीटन धरि धरि झोंटी।।

suni ripuhana lakhi nakha sikha khoṭī। lage ghasīṭana dhari dhari jhoṃṭī॥

भरत दयानिधि दीन्हि छड़ाई। कौसल्या पहिं गे दोउ भाई।।

bharata dayānidhi dīnhi char̤āī। kausalyā pahiṃ ge dou bhāī॥

मलिन बसन बिबरन बिकल कृस सरीर दुख भार।

malina basana bibarana bikala kṛsa sarīra dukha bhāra।

कनक कलप बर बेलि बन मानहुँ हनी तुसार।।163।।

kanaka kalapa bara beli bana mānahu~ hanī tusāra॥163॥

भरतहि देखि मातु उठि धाई। मुरुछित अवनि परी झइँ आई।।

bharatahi dekhi mātu uṭhi dhāī। muruchita avani parī jhai~ āī॥

देखत भरतु बिकल भए भारी। परे चरन तन दसा बिसारी।।

dekhata bharatu bikala bhae bhārī। pare carana tana dasā bisārī॥

मातु तात कहँ देहि देखाई। कहँ सिय रामु लखनु दोउ भाई।।

mātu tāta kaha~ dehi dekhāī। kaha~ siya rāmu lakhanu dou bhāī॥

कैकइ कत जनमी जग माझा। जौं जनमि त भइ काहे न बाँझा।।

kaikai kata janamī jaga mājhā। jauṃ janami ta bhai kāhe na bā~jhā॥

कुल कलंकु जेहिं जनमेउ मोही। अपजस भाजन प्रियजन द्रोही।।

kula kalaṃku jehiṃ janameu mohī। apajasa bhājana priyajana drohī॥

को तिभुवन मोहि सरिस अभागी। गति असि तोरि मातु जेहि लागी।।

ko tibhuvana mohi sarisa abhāgī। gati asi tori mātu jehi lāgī॥

पितु सुरपुर बन रघुबर केतू। मैं केवल सब अनरथ हेतु।।

pitu surapura bana raghubara ketū। maiṃ kevala saba anaratha hetu॥

धिग मोहि भयउँ बेनु बन आगी। दुसह दाह दुख दूषन भागी।।

dhiga mohi bhayau~ benu bana āgī। dusaha dāha dukha dūṣana bhāgī॥

मातु भरत के बचन मृदु सुनि सुनि उठी सँभारि।।

mātu bharata ke bacana mṛdu suni suni uṭhī sa~bhāri॥

लिए उठाइ लगाइ उर लोचन मोचति बारि।।164।।

lie uṭhāi lagāi ura locana mocati bāri॥164॥

सरल सुभाय मायँ हियँ लाए। अति हित मनहुँ राम फिरि आए।।

sarala subhāya māya~ hiya~ lāe। ati hita manahu~ rāma phiri āe॥

भेंटेउ बहुरि लखन लघु भाई। सोकु सनेहु न हृदयँ समाई।।

bheṃṭeu bahuri lakhana laghu bhāī। soku sanehu na hṛdaya~ samāī॥

देखि सुभाउ कहत सबु कोई। राम मातु अस काहे न होई।।

dekhi subhāu kahata sabu koī। rāma mātu asa kāhe na hoī॥

माताँ भरतु गोद बैठारे। आँसु पौंछि मृदु बचन उचारे।।

mātā~ bharatu goda baiṭhāre। ā~su pauṃchi mṛdu bacana ucāre॥

अजहुँ बच्छ बलि धीरज धरहू। कुसमउ समुझि सोक परिहरहू।।

ajahu~ baccha bali dhīraja dharahū। kusamau samujhi soka pariharahū॥

जनि मानहु हियँ हानि गलानी। काल करम गति अघटित जानि।।

jani mānahu hiya~ hāni galānī। kāla karama gati aghaṭita jāni॥

काहुहि दोसु देहु जनि ताता। भा मोहि सब बिधि बाम बिधाता।।

kāhuhi dosu dehu jani tātā। bhā mohi saba bidhi bāma bidhātā॥

जो एतेहुँ दुख मोहि जिआवा। अजहुँ को जानइ का तेहि भावा।।

jo etehu~ dukha mohi jiāvā। ajahu~ ko jānai kā tehi bhāvā॥

पितु आयस भूषन बसन तात तजे रघुबीर।

pitu āyasa bhūṣana basana tāta taje raghubīra।

बिसमउ हरषु न हृदयँ कछु पहिरे बलकल चीर। 165।।

bisamau haraṣu na hṛdaya~ kachu pahire balakala cīra। 165॥

मुख प्रसन्न मन रंग न रोषू। सब कर सब बिधि करि परितोषू।।

mukha prasanna mana raṃga na roṣū। saba kara saba bidhi kari paritoṣū॥

चले बिपिन सुनि सिय सँग लागी। रहइ न राम चरन अनुरागी।।

cale bipina suni siya sa~ga lāgī। rahai na rāma carana anurāgī॥

सुनतहिं लखनु चले उठि साथा। रहहिं न जतन किए रघुनाथा।।

sunatahiṃ lakhanu cale uṭhi sāthā। rahahiṃ na jatana kie raghunāthā॥

तब रघुपति सबही सिरु नाई। चले संग सिय अरु लघु भाई।।

taba raghupati sabahī siru nāī। cale saṃga siya aru laghu bhāī॥

रामु लखनु सिय बनहि सिधाए। गइउँ न संग न प्रान पठाए।।

rāmu lakhanu siya banahi sidhāe। gaiu~ na saṃga na prāna paṭhāe॥

यहु सबु भा इन्ह आँखिन्ह आगें। तउ न तजा तनु जीव अभागें।।

yahu sabu bhā inha ā~khinha āgeṃ। tau na tajā tanu jīva abhāgeṃ॥

मोहि न लाज निज नेहु निहारी। राम सरिस सुत मैं महतारी।।

mohi na lāja nija nehu nihārī। rāma sarisa suta maiṃ mahatārī॥

जिऐ मरै भल भूपति जाना। मोर हृदय सत कुलिस समाना।।

jiai marai bhala bhūpati jānā। mora hṛdaya sata kulisa samānā॥

कौसल्या के बचन सुनि भरत सहित रनिवास।

kausalyā ke bacana suni bharata sahita ranivāsa।

ब्याकुल बिलपत राजगृह मानहुँ सोक नेवासु।।166।।

byākula bilapata rājagṛha mānahu~ soka nevāsu॥166॥

बिलपहिं बिकल भरत दोउ भाई। कौसल्याँ लिए हृदयँ लगाई।।

bilapahiṃ bikala bharata dou bhāī। kausalyā~ lie hṛdaya~ lagāī॥

भाँति अनेक भरतु समुझाए। कहि बिबेकमय बचन सुनाए।।

bhā~ti aneka bharatu samujhāe। kahi bibekamaya bacana sunāe॥

भरतहुँ मातु सकल समुझाईं। कहि पुरान श्रुति कथा सुहाईं।।

bharatahu~ mātu sakala samujhāīṃ। kahi purāna śruti kathā suhāīṃ॥

छल बिहीन सुचि सरल सुबानी। बोले भरत जोरि जुग पानी।।

chala bihīna suci sarala subānī। bole bharata jori juga pānī॥

जे अघ मातु पिता सुत मारें। गाइ गोठ महिसुर पुर जारें।।

je agha mātu pitā suta māreṃ। gāi goṭha mahisura pura jāreṃ॥

जे अघ तिय बालक बध कीन्हें। मीत महीपति माहुर दीन्हें।।

je agha tiya bālaka badha kīnheṃ। mīta mahīpati māhura dīnheṃ॥

जे पातक उपपातक अहहीं। करम बचन मन भव कबि कहहीं।।

je pātaka upapātaka ahahīṃ। karama bacana mana bhava kabi kahahīṃ॥

ते पातक मोहि होहुँ बिधाता। जौं यहु होइ मोर मत माता।।

te pātaka mohi hohu~ bidhātā। jauṃ yahu hoi mora mata mātā॥

जे परिहरि हरि हर चरन भजहिं भूतगन घोर।

je parihari hari hara carana bhajahiṃ bhūtagana ghora।

तेहि कइ गति मोहि देउ बिधि जौं जननी मत मोर।।167।।

tehi kai gati mohi deu bidhi jauṃ jananī mata mora॥167॥

बेचहिं बेदु धरमु दुहि लेहीं। पिसुन पराय पाप कहि देहीं।।

becahiṃ bedu dharamu duhi lehīṃ। pisuna parāya pāpa kahi dehīṃ॥

कपटी कुटिल कलहप्रिय क्रोधी। बेद बिदूषक बिस्व बिरोधी।।

kapaṭī kuṭila kalahapriya krodhī। beda bidūṣaka bisva birodhī॥

लोभी लंपट लोलुपचारा। जे ताकहिं परधनु परदारा।।

lobhī laṃpaṭa lolupacārā। je tākahiṃ paradhanu paradārā॥

पावौं मैं तिन्ह के गति घोरा। जौं जननी यहु संमत मोरा।।

pāvauṃ maiṃ tinha ke gati ghorā। jauṃ jananī yahu saṃmata morā॥

जे नहिं साधुसंग अनुरागे। परमारथ पथ बिमुख अभागे।।

je nahiṃ sādhusaṃga anurāge। paramāratha patha bimukha abhāge॥

जे न भजहिं हरि नरतनु पाई। जिन्हहि न हरि हर सुजसु सोहाई।।

je na bhajahiṃ hari naratanu pāī। jinhahi na hari hara sujasu sohāī॥

तजि श्रुतिपंथु बाम पथ चलहीं। बंचक बिरचि बेष जगु छलहीं।।

taji śrutipaṃthu bāma patha calahīṃ। baṃcaka biraci beṣa jagu chalahīṃ॥

तिन्ह कै गति मोहि संकर देऊ। जननी जौं यहु जानौं भेऊ।।

tinha kai gati mohi saṃkara deū। jananī jauṃ yahu jānauṃ bheū॥

मातु भरत के बचन सुनि साँचे सरल सुभायँ।

mātu bharata ke bacana suni sā~ce sarala subhāya~।

कहति राम प्रिय तात तुम्ह सदा बचन मन कायँ।।168।।

kahati rāma priya tāta tumha sadā bacana mana kāya~॥168॥

राम प्रानहु तें प्रान तुम्हारे। तुम्ह रघुपतिहि प्रानहु तें प्यारे।।

rāma prānahu teṃ prāna tumhāre। tumha raghupatihi prānahu teṃ pyāre॥

बिधु बिष चवै स्त्रवै हिमु आगी। होइ बारिचर बारि बिरागी।।

bidhu biṣa cavai stravai himu āgī। hoi bāricara bāri birāgī॥

भएँ ग्यानु बरु मिटै न मोहू। तुम्ह रामहि प्रतिकूल न होहू।।

bhae~ gyānu baru miṭai na mohū। tumha rāmahi pratikūla na hohū॥

मत तुम्हार यहु जो जग कहहीं। सो सपनेहुँ सुख सुगति न लहहीं।।

mata tumhāra yahu jo jaga kahahīṃ। so sapanehu~ sukha sugati na lahahīṃ॥

अस कहि मातु भरतु हियँ लाए। थन पय स्त्रवहिं नयन जल छाए।।

asa kahi mātu bharatu hiya~ lāe। thana paya stravahiṃ nayana jala chāe॥

करत बिलाप बहुत यहि भाँती। बैठेहिं बीति गइ सब राती।।

karata bilāpa bahuta yahi bhā~tī। baiṭhehiṃ bīti gai saba rātī॥

बामदेउ बसिष्ठ तब आए। सचिव महाजन सकल बोलाए।।

bāmadeu basiṣṭha taba āe। saciva mahājana sakala bolāe॥

मुनि बहु भाँति भरत उपदेसे। कहि परमारथ बचन सुदेसे।।

muni bahu bhā~ti bharata upadese। kahi paramāratha bacana sudese॥

तात हृदयँ धीरजु धरहु करहु जो अवसर आजु।

tāta hṛdaya~ dhīraju dharahu karahu jo avasara āju।

उठे भरत गुर बचन सुनि करन कहेउ सबु साजु।।169।।

uṭhe bharata gura bacana suni karana kaheu sabu sāju॥169॥

नृपतनु बेद बिदित अन्हवावा। परम बिचित्र बिमानु बनावा।।

nṛpatanu beda bidita anhavāvā। parama bicitra bimānu banāvā॥

गहि पद भरत मातु सब राखी। रहीं रानि दरसन अभिलाषी।।

gahi pada bharata mātu saba rākhī। rahīṃ rāni darasana abhilāṣī॥

चंदन अगर भार बहु आए। अमित अनेक सुगंध सुहाए।।

caṃdana agara bhāra bahu āe। amita aneka sugaṃdha suhāe॥

सरजु तीर रचि चिता बनाई। जनु सुरपुर सोपान सुहाई।।

saraju tīra raci citā banāī। janu surapura sopāna suhāī॥

एहि बिधि दाह क्रिया सब कीन्ही। बिधिवत न्हाइ तिलांजुलि दीन्ही।।

ehi bidhi dāha kriyā saba kīnhī। bidhivata nhāi tilāṃjuli dīnhī॥

सोधि सुमृति सब बेद पुराना। कीन्ह भरत दसगात बिधाना।।

sodhi sumṛti saba beda purānā। kīnha bharata dasagāta bidhānā॥

जहँ जस मुनिबर आयसु दीन्हा। तहँ तस सहस भाँति सबु कीन्हा।।

jaha~ jasa munibara āyasu dīnhā। taha~ tasa sahasa bhā~ti sabu kīnhā॥

भए बिसुद्ध दिए सब दाना। धेनु बाजि गज बाहन नाना।।

bhae bisuddha die saba dānā। dhenu bāji gaja bāhana nānā॥

सिंघासन भूषन बसन अन्न धरनि धन धाम।

siṃghāsana bhūṣana basana anna dharani dhana dhāma।

दिए भरत लहि भूमिसुर भे परिपूरन काम।।170।।

die bharata lahi bhūmisura bhe paripūrana kāma॥170॥

पितु हित भरत कीन्हि जसि करनी। सो मुख लाख जाइ नहिं बरनी।।

pitu hita bharata kīnhi jasi karanī। so mukha lākha jāi nahiṃ baranī॥

सुदिनु सोधि मुनिबर तब आए। सचिव महाजन सकल बोलाए।।

sudinu sodhi munibara taba āe। saciva mahājana sakala bolāe॥

बैठे राजसभाँ सब जाई। पठए बोलि भरत दोउ भाई।।

baiṭhe rājasabhā~ saba jāī। paṭhae boli bharata dou bhāī॥

भरतु बसिष्ठ निकट बैठारे। नीति धरममय बचन उचारे।।

bharatu basiṣṭha nikaṭa baiṭhāre। nīti dharamamaya bacana ucāre॥

प्रथम कथा सब मुनिबर बरनी। कैकइ कुटिल कीन्हि जसि करनी।।

prathama kathā saba munibara baranī। kaikai kuṭila kīnhi jasi karanī॥

भूप धरमब्रतु सत्य सराहा। जेहिं तनु परिहरि प्रेमु निबाहा।।

bhūpa dharamabratu satya sarāhā। jehiṃ tanu parihari premu nibāhā॥

कहत राम गुन सील सुभाऊ। सजल नयन पुलकेउ मुनिराऊ।।

kahata rāma guna sīla subhāū। sajala nayana pulakeu munirāū॥

बहुरि लखन सिय प्रीति बखानी। सोक सनेह मगन मुनि ग्यानी।।

bahuri lakhana siya prīti bakhānī। soka saneha magana muni gyānī॥

सुनहु भरत भावी प्रबल बिलखि कहेउ मुनिनाथ।

sunahu bharata bhāvī prabala bilakhi kaheu muninātha।

हानि लाभु जीवन मरनु जसु अपजसु बिधि हाथ।।171।।

hāni lābhu jīvana maranu jasu apajasu bidhi hātha॥171॥

अस बिचारि केहि देइअ दोसू। ब्यरथ काहि पर कीजिअ रोसू।।

asa bicāri kehi deia dosū। byaratha kāhi para kījia rosū॥

तात बिचारु केहि करहु मन माहीं। सोच जोगु दसरथु नृपु नाहीं।।

tāta bicāru kehi karahu mana māhīṃ। soca jogu dasarathu nṛpu nāhīṃ॥

सोचिअ बिप्र जो बेद बिहीना। तजि निज धरमु बिषय लयलीना।।

socia bipra jo beda bihīnā। taji nija dharamu biṣaya layalīnā॥

सोचिअ नृपति जो नीति न जाना। जेहि न प्रजा प्रिय प्रान समाना।।

socia nṛpati jo nīti na jānā। jehi na prajā priya prāna samānā॥

सोचिअ बयसु कृपन धनवानू। जो न अतिथि सिव भगति सुजानू।।

socia bayasu kṛpana dhanavānū। jo na atithi siva bhagati sujānū॥

सोचिअ सूद्रु बिप्र अवमानी। मुखर मानप्रिय ग्यान गुमानी।।

socia sūdru bipra avamānī। mukhara mānapriya gyāna gumānī॥

सोचिअ पुनि पति बंचक नारी। कुटिल कलहप्रिय इच्छाचारी।।

socia puni pati baṃcaka nārī। kuṭila kalahapriya icchācārī॥

सोचिअ बटु निज ब्रतु परिहरई। जो नहिं गुर आयसु अनुसरई।।

socia baṭu nija bratu pariharaī। jo nahiṃ gura āyasu anusaraī॥

सोचिअ गृही जो मोह बस करइ करम पथ त्याग।

socia gṛhī jo moha basa karai karama patha tyāga।

सोचिअ जति प्रंपच रत बिगत बिबेक बिराग।।172।।

socia jati praṃpaca rata bigata bibeka birāga॥172॥

बैखानस सोइ सोचै जोगु। तपु बिहाइ जेहि भावइ भोगू।।

baikhānasa soi socai jogu। tapu bihāi jehi bhāvai bhogū॥

सोचिअ पिसुन अकारन क्रोधी। जननि जनक गुर बंधु बिरोधी।।

socia pisuna akārana krodhī। janani janaka gura baṃdhu birodhī॥

सब बिधि सोचिअ पर अपकारी। निज तनु पोषक निरदय भारी।।

saba bidhi socia para apakārī। nija tanu poṣaka niradaya bhārī॥

सोचनीय सबहि बिधि सोई। जो न छाड़ि छलु हरि जन होई।।

socanīya sabahi bidhi soī। jo na chār̤i chalu hari jana hoī॥

सोचनीय नहिं कोसलराऊ। भुवन चारिदस प्रगट प्रभाऊ।।

socanīya nahiṃ kosalarāū। bhuvana cāridasa pragaṭa prabhāū॥

भयउ न अहइ न अब होनिहारा। भूप भरत जस पिता तुम्हारा।।

bhayau na ahai na aba honihārā। bhūpa bharata jasa pitā tumhārā॥

बिधि हरि हरु सुरपति दिसिनाथा। बरनहिं सब दसरथ गुन गाथा।।

bidhi hari haru surapati disināthā। baranahiṃ saba dasaratha guna gāthā॥

कहहु तात केहि भाँति कोउ करिहि बड़ाई तासु।

kahahu tāta kehi bhā~ti kou karihi bar̤āī tāsu।

राम लखन तुम्ह सत्रुहन सरिस सुअन सुचि जासु।।173।।

rāma lakhana tumha satruhana sarisa suana suci jāsu॥173॥

सब प्रकार भूपति बड़भागी। बादि बिषादु करिअ तेहि लागी।।

saba prakāra bhūpati bar̤abhāgī। bādi biṣādu karia tehi lāgī॥

यहु सुनि समुझि सोचु परिहरहू। सिर धरि राज रजायसु करहू।।

yahu suni samujhi socu pariharahū। sira dhari rāja rajāyasu karahū॥

राँय राजपदु तुम्ह कहुँ दीन्हा। पिता बचनु फुर चाहिअ कीन्हा।।

rā~ya rājapadu tumha kahu~ dīnhā। pitā bacanu phura cāhia kīnhā॥

तजे रामु जेहिं बचनहि लागी। तनु परिहरेउ राम बिरहागी।।

taje rāmu jehiṃ bacanahi lāgī। tanu parihareu rāma birahāgī॥

नृपहि बचन प्रिय नहिं प्रिय प्राना। करहु तात पितु बचन प्रवाना।।

nṛpahi bacana priya nahiṃ priya prānā। karahu tāta pitu bacana pravānā॥

करहु सीस धरि भूप रजाई। हइ तुम्ह कहँ सब भाँति भलाई।।

karahu sīsa dhari bhūpa rajāī। hai tumha kaha~ saba bhā~ti bhalāī॥

परसुराम पितु अग्या राखी। मारी मातु लोक सब साखी।।

parasurāma pitu agyā rākhī। mārī mātu loka saba sākhī॥

तनय जजातिहि जौबनु दयऊ। पितु अग्याँ अघ अजसु न भयऊ।।

tanaya jajātihi jaubanu dayaū। pitu agyā~ agha ajasu na bhayaū॥

अनुचित उचित बिचारु तजि जे पालहिं पितु बैन।

anucita ucita bicāru taji je pālahiṃ pitu baina।

ते भाजन सुख सुजस के बसहिं अमरपति ऐन।।174।।

te bhājana sukha sujasa ke basahiṃ amarapati aina॥174॥

अवसि नरेस बचन फुर करहू। पालहु प्रजा सोकु परिहरहू।।

avasi naresa bacana phura karahū। pālahu prajā soku pariharahū॥

सुरपुर नृप पाइहि परितोषू। तुम्ह कहुँ सुकृत सुजसु नहिं दोषू।।

surapura nṛpa pāihi paritoṣū। tumha kahu~ sukṛta sujasu nahiṃ doṣū॥

बेद बिदित संमत सबही का। जेहि पितु देइ सो पावइ टीका।।

beda bidita saṃmata sabahī kā। jehi pitu dei so pāvai ṭīkā॥

करहु राजु परिहरहु गलानी। मानहु मोर बचन हित जानी।।

karahu rāju pariharahu galānī। mānahu mora bacana hita jānī॥

सुनि सुखु लहब राम बैदेहीं। अनुचित कहब न पंडित केहीं।।

suni sukhu lahaba rāma baidehīṃ। anucita kahaba na paṃḍita kehīṃ॥

कौसल्यादि सकल महतारीं। तेउ प्रजा सुख होहिं सुखारीं।।

kausalyādi sakala mahatārīṃ। teu prajā sukha hohiṃ sukhārīṃ॥

परम तुम्हार राम कर जानिहि। सो सब बिधि तुम्ह सन भल मानिहि।।

parama tumhāra rāma kara jānihi। so saba bidhi tumha sana bhala mānihi॥

सौंपेहु राजु राम कै आएँ। सेवा करेहु सनेह सुहाएँ।।

sauṃpehu rāju rāma kai āe~। sevā karehu saneha suhāe~॥

कीजिअ गुर आयसु अवसि कहहिं सचिव कर जोरि।

kījia gura āyasu avasi kahahiṃ saciva kara jori।

रघुपति आएँ उचित जस तस तब करब बहोरि।।175।।

raghupati āe~ ucita jasa tasa taba karaba bahori॥175॥

कौसल्या धरि धीरजु कहई। पूत पथ्य गुर आयसु अहई।।

kausalyā dhari dhīraju kahaī। pūta pathya gura āyasu ahaī॥

सो आदरिअ करिअ हित मानी। तजिअ बिषादु काल गति जानी।।

so ādaria karia hita mānī। tajia biṣādu kāla gati jānī॥

बन रघुपति सुरपति नरनाहू। तुम्ह एहि भाँति तात कदराहू।।

bana raghupati surapati naranāhū। tumha ehi bhā~ti tāta kadarāhū॥

परिजन प्रजा सचिव सब अंबा। तुम्हही सुत सब कहँ अवलंबा।।

parijana prajā saciva saba aṃbā। tumhahī suta saba kaha~ avalaṃbā॥

लखि बिधि बाम कालु कठिनाई। धीरजु धरहु मातु बलि जाई।।

lakhi bidhi bāma kālu kaṭhināī। dhīraju dharahu mātu bali jāī॥

सिर धरि गुर आयसु अनुसरहू। प्रजा पालि परिजन दुखु हरहू।।

sira dhari gura āyasu anusarahū। prajā pāli parijana dukhu harahū॥

गुर के बचन सचिव अभिनंदनु। सुने भरत हिय हित जनु चंदनु।।

gura ke bacana saciva abhinaṃdanu। sune bharata hiya hita janu caṃdanu॥

सुनी बहोरि मातु मृदु बानी। सील सनेह सरल रस सानी।।

sunī bahori mātu mṛdu bānī। sīla saneha sarala rasa sānī॥

सानी सरल रस मातु बानी सुनि भरत ब्याकुल भए।

sānī sarala rasa mātu bānī suni bharata byākula bhae।

लोचन सरोरुह स्त्रवत सींचत बिरह उर अंकुर नए।।

locana saroruha stravata sīṃcata biraha ura aṃkura nae॥

सो दसा देखत समय तेहि बिसरी सबहि सुधि देह की।

so dasā dekhata samaya tehi bisarī sabahi sudhi deha kī।

तुलसी सराहत सकल सादर सीवँ सहज सनेह की।।

tulasī sarāhata sakala sādara sīva~ sahaja saneha kī॥

भरतु कमल कर जोरि धीर धुरंधर धीर धरि।

bharatu kamala kara jori dhīra dhuraṃdhara dhīra dhari।

बचन अमिअँ जनु बोरि देत उचित उत्तर सबहि।।176।।

bacana amia~ janu bori deta ucita uttara sabahi॥176॥

मोहि उपदेसु दीन्ह गुर नीका। प्रजा सचिव संमत सबही का।।

mohi upadesu dīnha gura nīkā। prajā saciva saṃmata sabahī kā॥

मातु उचित धरि आयसु दीन्हा। अवसि सीस धरि चाहउँ कीन्हा।।

mātu ucita dhari āyasu dīnhā। avasi sīsa dhari cāhau~ kīnhā॥

गुर पितु मातु स्वामि हित बानी। सुनि मन मुदित करिअ भलि जानी।।

gura pitu mātu svāmi hita bānī। suni mana mudita karia bhali jānī॥

उचित कि अनुचित किएँ बिचारू। धरमु जाइ सिर पातक भारू।।

ucita ki anucita kie~ bicārū। dharamu jāi sira pātaka bhārū॥

तुम्ह तौ देहु सरल सिख सोई। जो आचरत मोर भल होई।।

tumha tau dehu sarala sikha soī। jo ācarata mora bhala hoī॥

जद्यपि यह समुझत हउँ नीकें। तदपि होत परितोषु न जी कें।।

jadyapi yaha samujhata hau~ nīkeṃ। tadapi hota paritoṣu na jī keṃ॥

अब तुम्ह बिनय मोरि सुनि लेहू। मोहि अनुहरत सिखावनु देहू।।

aba tumha binaya mori suni lehū। mohi anuharata sikhāvanu dehū॥

ऊतरु देउँ छमब अपराधू। दुखित दोष गुन गनहिं न साधू।।

ūtaru deu~ chamaba aparādhū। dukhita doṣa guna ganahiṃ na sādhū॥

पितु सुरपुर सिय रामु बन करन कहहु मोहि राजु।

pitu surapura siya rāmu bana karana kahahu mohi rāju।

एहि तें जानहु मोर हित कै आपन बड़ काजु।।177।।

ehi teṃ jānahu mora hita kai āpana bar̤a kāju॥177॥

हित हमार सियपति सेवकाई। सो हरि लीन्ह मातु कुटिलाई।।

hita hamāra siyapati sevakāī। so hari līnha mātu kuṭilāī॥

मैं अनुमानि दीख मन माहीं। आन उपायँ मोर हित नाहीं।।

maiṃ anumāni dīkha mana māhīṃ। āna upāya~ mora hita nāhīṃ॥

सोक समाजु राजु केहि लेखें। लखन राम सिय बिनु पद देखें।।

soka samāju rāju kehi lekheṃ। lakhana rāma siya binu pada dekheṃ॥

बादि बसन बिनु भूषन भारू। बादि बिरति बिनु ब्रह्म बिचारू।।

bādi basana binu bhūṣana bhārū। bādi birati binu brahma bicārū॥

सरुज सरीर बादि बहु भोगा। बिनु हरिभगति जायँ जप जोगा।।

saruja sarīra bādi bahu bhogā। binu haribhagati jāya~ japa jogā॥

जायँ जीव बिनु देह सुहाई। बादि मोर सबु बिनु रघुराई।।

jāya~ jīva binu deha suhāī। bādi mora sabu binu raghurāī॥

जाउँ राम पहिं आयसु देहू। एकहिं आँक मोर हित एहू।।

jāu~ rāma pahiṃ āyasu dehū। ekahiṃ ā~ka mora hita ehū॥

मोहि नृप करि भल आपन चहहू। सोउ सनेह जड़ता बस कहहू।।

mohi nṛpa kari bhala āpana cahahū। sou saneha jar̤atā basa kahahū॥

कैकेई सुअ कुटिलमति राम बिमुख गतलाज।

kaikeī sua kuṭilamati rāma bimukha gatalāja।

तुम्ह चाहत सुखु मोहबस मोहि से अधम कें राज।।178।।

tumha cāhata sukhu mohabasa mohi se adhama keṃ rāja॥178॥

कहउँ साँचु सब सुनि पतिआहू। चाहिअ धरमसील नरनाहू।।

kahau~ sā~cu saba suni patiāhū। cāhia dharamasīla naranāhū॥

मोहि राजु हठि देइहहु जबहीं। रसा रसातल जाइहि तबहीं।।

mohi rāju haṭhi deihahu jabahīṃ। rasā rasātala jāihi tabahīṃ॥

मोहि समान को पाप निवासू। जेहि लगि सीय राम बनबासू।।

mohi samāna ko pāpa nivāsū। jehi lagi sīya rāma banabāsū॥

रायँ राम कहुँ काननु दीन्हा। बिछुरत गमनु अमरपुर कीन्हा।।

rāya~ rāma kahu~ kānanu dīnhā। bichurata gamanu amarapura kīnhā॥

मैं सठु सब अनरथ कर हेतू। बैठ बात सब सुनउँ सचेतू।।

maiṃ saṭhu saba anaratha kara hetū। baiṭha bāta saba sunau~ sacetū॥

बिनु रघुबीर बिलोकि अबासू। रहे प्रान सहि जग उपहासू।।

binu raghubīra biloki abāsū। rahe prāna sahi jaga upahāsū॥

राम पुनीत बिषय रस रूखे। लोलुप भूमि भोग के भूखे।।

rāma punīta biṣaya rasa rūkhe। lolupa bhūmi bhoga ke bhūkhe॥

कहँ लगि कहौं हृदय कठिनाई। निदरि कुलिसु जेहिं लही बड़ाई।।

kaha~ lagi kahauṃ hṛdaya kaṭhināī। nidari kulisu jehiṃ lahī bar̤āī॥

कारन तें कारजु कठिन होइ दोसु नहि मोर।

kārana teṃ kāraju kaṭhina hoi dosu nahi mora।

कुलिस अस्थि तें उपल तें लोह कराल कठोर।।179।।

kulisa asthi teṃ upala teṃ loha karāla kaṭhora॥179॥

कैकेई भव तनु अनुरागे। पाँवर प्रान अघाइ अभागे।।

kaikeī bhava tanu anurāge। pā~vara prāna aghāi abhāge॥

जौं प्रिय बिरहँ प्रान प्रिय लागे। देखब सुनब बहुत अब आगे।।

jauṃ priya biraha~ prāna priya lāge। dekhaba sunaba bahuta aba āge॥

लखन राम सिय कहुँ बनु दीन्हा। पठइ अमरपुर पति हित कीन्हा।।

lakhana rāma siya kahu~ banu dīnhā। paṭhai amarapura pati hita kīnhā॥

लीन्ह बिधवपन अपजसु आपू। दीन्हेउ प्रजहि सोकु संतापू।।

līnha bidhavapana apajasu āpū। dīnheu prajahi soku saṃtāpū॥

मोहि दीन्ह सुखु सुजसु सुराजू। कीन्ह कैकेईं सब कर काजू।।

mohi dīnha sukhu sujasu surājū। kīnha kaikeīṃ saba kara kājū॥

एहि तें मोर काह अब नीका। तेहि पर देन कहहु तुम्ह टीका।।

ehi teṃ mora kāha aba nīkā। tehi para dena kahahu tumha ṭīkā॥

कैकई जठर जनमि जग माहीं। यह मोहि कहँ कछु अनुचित नाहीं।।

kaikaī jaṭhara janami jaga māhīṃ। yaha mohi kaha~ kachu anucita nāhīṃ॥

मोरि बात सब बिधिहिं बनाई। प्रजा पाँच कत करहु सहाई।।

mori bāta saba bidhihiṃ banāī। prajā pā~ca kata karahu sahāī॥

ग्रह ग्रहीत पुनि बात बस तेहि पुनि बीछी मार।

graha grahīta puni bāta basa tehi puni bīchī māra।

तेहि पिआइअ बारुनी कहहु काह उपचार।।180।।

tehi piāia bārunī kahahu kāha upacāra॥180॥

कैकइ सुअन जोगु जग जोई। चतुर बिरंचि दीन्ह मोहि सोई।।

kaikai suana jogu jaga joī। catura biraṃci dīnha mohi soī॥

दसरथ तनय राम लघु भाई। दीन्हि मोहि बिधि बादि बड़ाई।।

dasaratha tanaya rāma laghu bhāī। dīnhi mohi bidhi bādi bar̤āī॥

तुम्ह सब कहहु कढ़ावन टीका। राय रजायसु सब कहँ नीका।।

tumha saba kahahu kar̤hāvana ṭīkā। rāya rajāyasu saba kaha~ nīkā॥

उतरु देउँ केहि बिधि केहि केही। कहहु सुखेन जथा रुचि जेही।।

utaru deu~ kehi bidhi kehi kehī। kahahu sukhena jathā ruci jehī॥

मोहि कुमातु समेत बिहाई। कहहु कहिहि के कीन्ह भलाई।।

mohi kumātu sameta bihāī। kahahu kahihi ke kīnha bhalāī॥

मो बिनु को सचराचर माहीं। जेहि सिय रामु प्रानप्रिय नाहीं।।

mo binu ko sacarācara māhīṃ। jehi siya rāmu prānapriya nāhīṃ॥

परम हानि सब कहँ बड़ लाहू। अदिनु मोर नहि दूषन काहू।।

parama hāni saba kaha~ bar̤a lāhū। adinu mora nahi dūṣana kāhū॥

संसय सील प्रेम बस अहहू। सबुइ उचित सब जो कछु कहहू।।

saṃsaya sīla prema basa ahahū। sabui ucita saba jo kachu kahahū॥

राम मातु सुठि सरलचित मो पर प्रेमु बिसेषि।

rāma mātu suṭhi saralacita mo para premu biseṣi।

कहइ सुभाय सनेह बस मोरि दीनता देखि।।181।

kahai subhāya saneha basa mori dīnatā dekhi॥181।

गुर बिबेक सागर जगु जाना। जिन्हहि बिस्व कर बदर समाना।।

gura bibeka sāgara jagu jānā। jinhahi bisva kara badara samānā॥

मो कहँ तिलक साज सज सोऊ। भएँ बिधि बिमुख बिमुख सबु कोऊ।।

mo kaha~ tilaka sāja saja soū। bhae~ bidhi bimukha bimukha sabu koū॥

परिहरि रामु सीय जग माहीं। कोउ न कहिहि मोर मत नाहीं।।

parihari rāmu sīya jaga māhīṃ। kou na kahihi mora mata nāhīṃ॥

सो मैं सुनब सहब सुखु मानी। अंतहुँ कीच तहाँ जहँ पानी।।

so maiṃ sunaba sahaba sukhu mānī। aṃtahu~ kīca tahā~ jaha~ pānī॥

डरु न मोहि जग कहिहि कि पोचू। परलोकहु कर नाहिन सोचू।।

ḍaru na mohi jaga kahihi ki pocū। paralokahu kara nāhina socū॥

एकइ उर बस दुसह दवारी। मोहि लगि भे सिय रामु दुखारी।।

ekai ura basa dusaha davārī। mohi lagi bhe siya rāmu dukhārī॥

जीवन लाहु लखन भल पावा। सबु तजि राम चरन मनु लावा।।

jīvana lāhu lakhana bhala pāvā। sabu taji rāma carana manu lāvā॥

मोर जनम रघुबर बन लागी। झूठ काह पछिताउँ अभागी।।

mora janama raghubara bana lāgī। jhūṭha kāha pachitāu~ abhāgī॥

आपनि दारुन दीनता कहउँ सबहि सिरु नाइ।

āpani dāruna dīnatā kahau~ sabahi siru nāi।

देखें बिनु रघुनाथ पद जिय कै जरनि न जाइ।।182।।

dekheṃ binu raghunātha pada jiya kai jarani na jāi॥182॥

आन उपाउ मोहि नहि सूझा। को जिय कै रघुबर बिनु बूझा।।

āna upāu mohi nahi sūjhā। ko jiya kai raghubara binu būjhā॥

एकहिं आँक इहइ मन माहीं। प्रातकाल चलिहउँ प्रभु पाहीं।।

ekahiṃ ā~ka ihai mana māhīṃ। prātakāla calihau~ prabhu pāhīṃ॥

जद्यपि मैं अनभल अपराधी। भै मोहि कारन सकल उपाधी।।

jadyapi maiṃ anabhala aparādhī। bhai mohi kārana sakala upādhī॥

तदपि सरन सनमुख मोहि देखी। छमि सब करिहहिं कृपा बिसेषी।।

tadapi sarana sanamukha mohi dekhī। chami saba karihahiṃ kṛpā biseṣī॥

सील सकुच सुठि सरल सुभाऊ। कृपा सनेह सदन रघुराऊ।।

sīla sakuca suṭhi sarala subhāū। kṛpā saneha sadana raghurāū॥

अरिहुक अनभल कीन्ह न रामा। मैं सिसु सेवक जद्यपि बामा।।

arihuka anabhala kīnha na rāmā। maiṃ sisu sevaka jadyapi bāmā॥

तुम्ह पै पाँच मोर भल मानी। आयसु आसिष देहु सुबानी।।

tumha pai pā~ca mora bhala mānī। āyasu āsiṣa dehu subānī॥

जेहिं सुनि बिनय मोहि जनु जानी। आवहिं बहुरि रामु रजधानी।।

jehiṃ suni binaya mohi janu jānī। āvahiṃ bahuri rāmu rajadhānī॥

जद्यपि जनमु कुमातु तें मैं सठु सदा सदोस।

jadyapi janamu kumātu teṃ maiṃ saṭhu sadā sadosa।

आपन जानि न त्यागिहहिं मोहि रघुबीर भरोस।।183।।

āpana jāni na tyāgihahiṃ mohi raghubīra bharosa॥183॥

भरत बचन सब कहँ प्रिय लागे। राम सनेह सुधाँ जनु पागे।।

bharata bacana saba kaha~ priya lāge। rāma saneha sudhā~ janu pāge॥

लोग बियोग बिषम बिष दागे। मंत्र सबीज सुनत जनु जागे।।

loga biyoga biṣama biṣa dāge। maṃtra sabīja sunata janu jāge॥

मातु सचिव गुर पुर नर नारी। सकल सनेहँ बिकल भए भारी।।

mātu saciva gura pura nara nārī। sakala saneha~ bikala bhae bhārī॥

भरतहि कहहि सराहि सराही। राम प्रेम मूरति तनु आही।।

bharatahi kahahi sarāhi sarāhī। rāma prema mūrati tanu āhī॥

तात भरत अस काहे न कहहू। प्रान समान राम प्रिय अहहू।।

tāta bharata asa kāhe na kahahū। prāna samāna rāma priya ahahū॥

जो पावँरु अपनी जड़ताई। तुम्हहि सुगाइ मातु कुटिलाई।।

jo pāva~ru apanī jar̤atāī। tumhahi sugāi mātu kuṭilāī॥

सो सठु कोटिक पुरुष समेता। बसिहि कलप सत नरक निकेता।।

so saṭhu koṭika puruṣa sametā। basihi kalapa sata naraka niketā॥

अहि अघ अवगुन नहि मनि गहई। हरइ गरल दुख दारिद दहई।।

ahi agha avaguna nahi mani gahaī। harai garala dukha dārida dahaī॥

अवसि चलिअ बन रामु जहँ भरत मंत्रु भल कीन्ह।

avasi calia bana rāmu jaha~ bharata maṃtru bhala kīnha।

सोक सिंधु बूड़त सबहि तुम्ह अवलंबनु दीन्ह।।184।।

soka siṃdhu būr̤ata sabahi tumha avalaṃbanu dīnha॥184॥

भा सब कें मन मोदु न थोरा। जनु घन धुनि सुनि चातक मोरा।।

bhā saba keṃ mana modu na thorā। janu ghana dhuni suni cātaka morā॥

चलत प्रात लखि निरनउ नीके। भरतु प्रानप्रिय भे सबही के।।

calata prāta lakhi niranau nīke। bharatu prānapriya bhe sabahī ke॥

मुनिहि बंदि भरतहि सिरु नाई। चले सकल घर बिदा कराई।।

munihi baṃdi bharatahi siru nāī। cale sakala ghara bidā karāī॥

धन्य भरत जीवनु जग माहीं। सीलु सनेहु सराहत जाहीं।।

dhanya bharata jīvanu jaga māhīṃ। sīlu sanehu sarāhata jāhīṃ॥

कहहि परसपर भा बड़ काजू। सकल चलै कर साजहिं साजू।।

kahahi parasapara bhā bar̤a kājū। sakala calai kara sājahiṃ sājū॥

जेहि राखहिं रहु घर रखवारी। सो जानइ जनु गरदनि मारी।।

jehi rākhahiṃ rahu ghara rakhavārī। so jānai janu garadani mārī॥

कोउ कह रहन कहिअ नहिं काहू। को न चहइ जग जीवन लाहू।।

kou kaha rahana kahia nahiṃ kāhū। ko na cahai jaga jīvana lāhū॥

जरउ सो संपति सदन सुखु सुहद मातु पितु भाइ।

jarau so saṃpati sadana sukhu suhada mātu pitu bhāi।

सनमुख होत जो राम पद करै न सहस सहाइ।।185।।

sanamukha hota jo rāma pada karai na sahasa sahāi॥185॥

घर घर साजहिं बाहन नाना। हरषु हृदयँ परभात पयाना।।

ghara ghara sājahiṃ bāhana nānā। haraṣu hṛdaya~ parabhāta payānā॥

भरत जाइ घर कीन्ह बिचारू। नगरु बाजि गज भवन भँडारू।।

bharata jāi ghara kīnha bicārū। nagaru bāji gaja bhavana bha~ḍārū॥

संपति सब रघुपति कै आही। जौ बिनु जतन चलौं तजि ताही।।

saṃpati saba raghupati kai āhī। jau binu jatana calauṃ taji tāhī॥

तौ परिनाम न मोरि भलाई। पाप सिरोमनि साइँ दोहाई।।

tau parināma na mori bhalāī। pāpa siromani sāi~ dohāī॥

करइ स्वामि हित सेवकु सोई। दूषन कोटि देइ किन कोई।।

karai svāmi hita sevaku soī। dūṣana koṭi dei kina koī॥

अस बिचारि सुचि सेवक बोले। जे सपनेहुँ निज धरम न डोले।।

asa bicāri suci sevaka bole। je sapanehu~ nija dharama na ḍole॥

कहि सबु मरमु धरमु भल भाषा। जो जेहि लायक सो तेहिं राखा।।

kahi sabu maramu dharamu bhala bhāṣā। jo jehi lāyaka so tehiṃ rākhā॥

करि सबु जतनु राखि रखवारे। राम मातु पहिं भरतु सिधारे।।

kari sabu jatanu rākhi rakhavāre। rāma mātu pahiṃ bharatu sidhāre॥

आरत जननी जानि सब भरत सनेह सुजान।

ārata jananī jāni saba bharata saneha sujāna।

कहेउ बनावन पालकीं सजन सुखासन जान।।186।।

kaheu banāvana pālakīṃ sajana sukhāsana jāna॥186॥

चक्क चक्कि जिमि पुर नर नारी। चहत प्रात उर आरत भारी।।

cakka cakki jimi pura nara nārī। cahata prāta ura ārata bhārī॥

जागत सब निसि भयउ बिहाना। भरत बोलाए सचिव सुजाना।।

jāgata saba nisi bhayau bihānā। bharata bolāe saciva sujānā॥

कहेउ लेहु सबु तिलक समाजू। बनहिं देब मुनि रामहिं राजू।।

kaheu lehu sabu tilaka samājū। banahiṃ deba muni rāmahiṃ rājū॥

बेगि चलहु सुनि सचिव जोहारे। तुरत तुरग रथ नाग सँवारे।।

begi calahu suni saciva johāre। turata turaga ratha nāga sa~vāre॥

अरुंधती अरु अगिनि समाऊ। रथ चढ़ि चले प्रथम मुनिराऊ।।

aruṃdhatī aru agini samāū। ratha car̤hi cale prathama munirāū॥

बिप्र बृंद चढ़ि बाहन नाना। चले सकल तप तेज निधाना।।

bipra bṛṃda car̤hi bāhana nānā। cale sakala tapa teja nidhānā॥

नगर लोग सब सजि सजि जाना। चित्रकूट कहँ कीन्ह पयाना।।

nagara loga saba saji saji jānā। citrakūṭa kaha~ kīnha payānā॥

सिबिका सुभग न जाहिं बखानी। चढ़ि चढ़ि चलत भई सब रानी।।

sibikā subhaga na jāhiṃ bakhānī। car̤hi car̤hi calata bhaī saba rānī॥

सौंपि नगर सुचि सेवकनि सादर सकल चलाइ।

sauṃpi nagara suci sevakani sādara sakala calāi।

सुमिरि राम सिय चरन तब चले भरत दोउ भाइ।।187।।

sumiri rāma siya carana taba cale bharata dou bhāi॥187॥

राम दरस बस सब नर नारी। जनु करि करिनि चले तकि बारी।।

rāma darasa basa saba nara nārī। janu kari karini cale taki bārī॥

बन सिय रामु समुझि मन माहीं। सानुज भरत पयादेहिं जाहीं।।

bana siya rāmu samujhi mana māhīṃ। sānuja bharata payādehiṃ jāhīṃ॥

देखि सनेहु लोग अनुरागे। उतरि चले हय गय रथ त्यागे।।

dekhi sanehu loga anurāge। utari cale haya gaya ratha tyāge॥

जाइ समीप राखि निज डोली। राम मातु मृदु बानी बोली।।

jāi samīpa rākhi nija ḍolī। rāma mātu mṛdu bānī bolī॥

तात चढ़हु रथ बलि महतारी। होइहि प्रिय परिवारु दुखारी।।

tāta car̤hahu ratha bali mahatārī। hoihi priya parivāru dukhārī॥

तुम्हरें चलत चलिहि सबु लोगू। सकल सोक कृस नहिं मग जोगू।।

tumhareṃ calata calihi sabu logū। sakala soka kṛsa nahiṃ maga jogū॥

सिर धरि बचन चरन सिरु नाई। रथ चढ़ि चलत भए दोउ भाई।।

sira dhari bacana carana siru nāī। ratha car̤hi calata bhae dou bhāī॥

तमसा प्रथम दिवस करि बासू। दूसर गोमति तीर निवासू।।

tamasā prathama divasa kari bāsū। dūsara gomati tīra nivāsū॥

पय अहार फल असन एक निसि भोजन एक लोग।

paya ahāra phala asana eka nisi bhojana eka loga।

करत राम हित नेम ब्रत परिहरि भूषन भोग।।188।।

karata rāma hita nema brata parihari bhūṣana bhoga॥188॥

सई तीर बसि चले बिहाने। सृंगबेरपुर सब निअराने।।

saī tīra basi cale bihāne। sṛṃgaberapura saba niarāne॥

समाचार सब सुने निषादा। हृदयँ बिचार करइ सबिषादा।।

samācāra saba sune niṣādā। hṛdaya~ bicāra karai sabiṣādā॥

कारन कवन भरतु बन जाहीं। है कछु कपट भाउ मन माहीं।।

kārana kavana bharatu bana jāhīṃ। hai kachu kapaṭa bhāu mana māhīṃ॥

जौं पै जियँ न होति कुटिलाई। तौ कत लीन्ह संग कटकाई।।

jauṃ pai jiya~ na hoti kuṭilāī। tau kata līnha saṃga kaṭakāī॥

जानहिं सानुज रामहि मारी। करउँ अकंटक राजु सुखारी।।

jānahiṃ sānuja rāmahi mārī। karau~ akaṃṭaka rāju sukhārī॥

भरत न राजनीति उर आनी। तब कलंकु अब जीवन हानी।।

bharata na rājanīti ura ānī। taba kalaṃku aba jīvana hānī॥

सकल सुरासुर जुरहिं जुझारा। रामहि समर न जीतनिहारा।।

sakala surāsura jurahiṃ jujhārā। rāmahi samara na jītanihārā॥

का आचरजु भरतु अस करहीं। नहिं बिष बेलि अमिअ फल फरहीं।।

kā ācaraju bharatu asa karahīṃ। nahiṃ biṣa beli amia phala pharahīṃ॥

अस बिचारि गुहँ ग्याति सन कहेउ सजग सब होहु।

asa bicāri guha~ gyāti sana kaheu sajaga saba hohu।

हथवाँसहु बोरहु तरनि कीजिअ घाटारोहु।।189।।

hathavā~sahu borahu tarani kījia ghāṭārohu॥189॥

होहु सँजोइल रोकहु घाटा। ठाटहु सकल मरै के ठाटा।।

hohu sa~joila rokahu ghāṭā। ṭhāṭahu sakala marai ke ṭhāṭā॥

सनमुख लोह भरत सन लेऊँ। जिअत न सुरसरि उतरन देऊँ।।

sanamukha loha bharata sana leū~। jiata na surasari utarana deū~॥

समर मरनु पुनि सुरसरि तीरा। राम काजु छनभंगु सरीरा।।

samara maranu puni surasari tīrā। rāma kāju chanabhaṃgu sarīrā॥

भरत भाइ नृपु मै जन नीचू। बड़ें भाग असि पाइअ मीचू।।

bharata bhāi nṛpu mai jana nīcū। bar̤eṃ bhāga asi pāia mīcū॥

स्वामि काज करिहउँ रन रारी। जस धवलिहउँ भुवन दस चारी।।

svāmi kāja karihau~ rana rārī। jasa dhavalihau~ bhuvana dasa cārī॥

तजउँ प्रान रघुनाथ निहोरें। दुहूँ हाथ मुद मोदक मोरें।।

tajau~ prāna raghunātha nihoreṃ। duhū~ hātha muda modaka moreṃ॥

साधु समाज न जाकर लेखा। राम भगत महुँ जासु न रेखा।।

sādhu samāja na jākara lekhā। rāma bhagata mahu~ jāsu na rekhā॥

जायँ जिअत जग सो महि भारू। जननी जौबन बिटप कुठारू।।

jāya~ jiata jaga so mahi bhārū। jananī jaubana biṭapa kuṭhārū॥

बिगत बिषाद निषादपति सबहि बढ़ाइ उछाहु।

bigata biṣāda niṣādapati sabahi bar̤hāi uchāhu।

सुमिरि राम मागेउ तुरत तरकस धनुष सनाहु।।190।।

sumiri rāma māgeu turata tarakasa dhanuṣa sanāhu॥190॥

बेगहु भाइहु सजहु सँजोऊ। सुनि रजाइ कदराइ न कोऊ।।

begahu bhāihu sajahu sa~joū। suni rajāi kadarāi na koū॥

भलेहिं नाथ सब कहहिं सहरषा। एकहिं एक बढ़ावइ करषा।।

bhalehiṃ nātha saba kahahiṃ saharaṣā। ekahiṃ eka bar̤hāvai karaṣā॥

चले निषाद जोहारि जोहारी। सूर सकल रन रूचइ रारी।।

cale niṣāda johāri johārī। sūra sakala rana rūcai rārī॥

सुमिरि राम पद पंकज पनहीं। भाथीं बाँधि चढ़ाइन्हि धनहीं।।

sumiri rāma pada paṃkaja panahīṃ। bhāthīṃ bā~dhi car̤hāinhi dhanahīṃ॥

अँगरी पहिरि कूँड़ि सिर धरहीं। फरसा बाँस सेल सम करहीं।।

a~garī pahiri kū~r̤i sira dharahīṃ। pharasā bā~sa sela sama karahīṃ॥

एक कुसल अति ओड़न खाँड़े। कूदहि गगन मनहुँ छिति छाँड़े।।

eka kusala ati or̤ana khā~r̤e। kūdahi gagana manahu~ chiti chā~r̤e॥

निज निज साजु समाजु बनाई। गुह राउतहि जोहारे जाई।।

nija nija sāju samāju banāī। guha rāutahi johāre jāī॥

देखि सुभट सब लायक जाने। लै लै नाम सकल सनमाने।।

dekhi subhaṭa saba lāyaka jāne। lai lai nāma sakala sanamāne॥

भाइहु लावहु धोख जनि आजु काज बड़ मोहि।

bhāihu lāvahu dhokha jani āju kāja bar̤a mohi।

सुनि सरोष बोले सुभट बीर अधीर न होहि।।191।।

suni saroṣa bole subhaṭa bīra adhīra na hohi॥191॥

राम प्रताप नाथ बल तोरे। करहिं कटकु बिनु भट बिनु घोरे।।

rāma pratāpa nātha bala tore। karahiṃ kaṭaku binu bhaṭa binu ghore॥

जीवत पाउ न पाछें धरहीं। रुंड मुंडमय मेदिनि करहीं।।

jīvata pāu na pācheṃ dharahīṃ। ruṃḍa muṃḍamaya medini karahīṃ॥

दीख निषादनाथ भल टोलू। कहेउ बजाउ जुझाऊ ढोलू।।

dīkha niṣādanātha bhala ṭolū। kaheu bajāu jujhāū ḍholū॥

एतना कहत छींक भइ बाँए। कहेउ सगुनिअन्ह खेत सुहाए।।

etanā kahata chīṃka bhai bā~e। kaheu sagunianha kheta suhāe॥

बूढ़ु एकु कह सगुन बिचारी। भरतहि मिलिअ न होइहि रारी।।

būr̤hu eku kaha saguna bicārī। bharatahi milia na hoihi rārī॥

रामहि भरतु मनावन जाहीं। सगुन कहइ अस बिग्रहु नाहीं।।

rāmahi bharatu manāvana jāhīṃ। saguna kahai asa bigrahu nāhīṃ॥

सुनि गुह कहइ नीक कह बूढ़ा। सहसा करि पछिताहिं बिमूढ़ा।।

suni guha kahai nīka kaha būr̤hā। sahasā kari pachitāhiṃ bimūr̤hā॥

भरत सुभाउ सीलु बिनु बूझें। बड़ि हित हानि जानि बिनु जूझें।।

bharata subhāu sīlu binu būjheṃ। bar̤i hita hāni jāni binu jūjheṃ॥

गहहु घाट भट समिटि सब लेउँ मरम मिलि जाइ।

gahahu ghāṭa bhaṭa samiṭi saba leu~ marama mili jāi।

बूझि मित्र अरि मध्य गति तस तब करिहउँ आइ।।192।।

būjhi mitra ari madhya gati tasa taba karihau~ āi॥192॥

लखन सनेहु सुभायँ सुहाएँ। बैरु प्रीति नहिं दुरइँ दुराएँ।।

lakhana sanehu subhāya~ suhāe~। bairu prīti nahiṃ durai~ durāe~॥

अस कहि भेंट सँजोवन लागे। कंद मूल फल खग मृग मागे।।

asa kahi bheṃṭa sa~jovana lāge। kaṃda mūla phala khaga mṛga māge॥

मीन पीन पाठीन पुराने। भरि भरि भार कहारन्ह आने।।

mīna pīna pāṭhīna purāne। bhari bhari bhāra kahāranha āne॥

मिलन साजु सजि मिलन सिधाए। मंगल मूल सगुन सुभ पाए।।

milana sāju saji milana sidhāe। maṃgala mūla saguna subha pāe॥

देखि दूरि तें कहि निज नामू। कीन्ह मुनीसहि दंड प्रनामू।।

dekhi dūri teṃ kahi nija nāmū। kīnha munīsahi daṃḍa pranāmū॥

जानि रामप्रिय दीन्हि असीसा। भरतहि कहेउ बुझाइ मुनीसा।।

jāni rāmapriya dīnhi asīsā। bharatahi kaheu bujhāi munīsā॥

राम सखा सुनि संदनु त्यागा। चले उतरि उमगत अनुरागा।।

rāma sakhā suni saṃdanu tyāgā। cale utari umagata anurāgā॥

गाउँ जाति गुहँ नाउँ सुनाई। कीन्ह जोहारु माथ महि लाई।।

gāu~ jāti guha~ nāu~ sunāī। kīnha johāru mātha mahi lāī॥

करत दंडवत देखि तेहि भरत लीन्ह उर लाइ।

karata daṃḍavata dekhi tehi bharata līnha ura lāi।

मनहुँ लखन सन भेंट भइ प्रेम न हृदयँ समाइ।।193।।

manahu~ lakhana sana bheṃṭa bhai prema na hṛdaya~ samāi॥193॥

भेंटत भरतु ताहि अति प्रीती। लोग सिहाहिं प्रेम कै रीती।।

bheṃṭata bharatu tāhi ati prītī। loga sihāhiṃ prema kai rītī॥

धन्य धन्य धुनि मंगल मूला। सुर सराहि तेहि बरिसहिं फूला।।

dhanya dhanya dhuni maṃgala mūlā। sura sarāhi tehi barisahiṃ phūlā॥

लोक बेद सब भाँतिहिं नीचा। जासु छाँह छुइ लेइअ सींचा।।

loka beda saba bhā~tihiṃ nīcā। jāsu chā~ha chui leia sīṃcā॥

तेहि भरि अंक राम लघु भ्राता। मिलत पुलक परिपूरित गाता।।

tehi bhari aṃka rāma laghu bhrātā। milata pulaka paripūrita gātā॥

राम राम कहि जे जमुहाहीं। तिन्हहि न पाप पुंज समुहाहीं।।

rāma rāma kahi je jamuhāhīṃ। tinhahi na pāpa puṃja samuhāhīṃ॥

यह तौ राम लाइ उर लीन्हा। कुल समेत जगु पावन कीन्हा।।

yaha tau rāma lāi ura līnhā। kula sameta jagu pāvana kīnhā॥

करमनास जलु सुरसरि परई। तेहि को कहहु सीस नहिं धरई।।

karamanāsa jalu surasari paraī। tehi ko kahahu sīsa nahiṃ dharaī॥

उलटा नामु जपत जगु जाना। बालमीकि भए ब्रह्म समाना।।

ulaṭā nāmu japata jagu jānā। bālamīki bhae brahma samānā॥

स्वपच सबर खस जमन जड़ पावँर कोल किरात।

svapaca sabara khasa jamana jar̤a pāva~ra kola kirāta।

रामु कहत पावन परम होत भुवन बिख्यात।।194।।

rāmu kahata pāvana parama hota bhuvana bikhyāta॥194॥

नहिं अचिरजु जुग जुग चलि आई। केहि न दीन्हि रघुबीर बड़ाई।।

nahiṃ aciraju juga juga cali āī। kehi na dīnhi raghubīra bar̤āī॥

राम नाम महिमा सुर कहहीं। सुनि सुनि अवधलोग सुखु लहहीं।।

rāma nāma mahimā sura kahahīṃ। suni suni avadhaloga sukhu lahahīṃ॥

रामसखहि मिलि भरत सप्रेमा। पूँछी कुसल सुमंगल खेमा।।

rāmasakhahi mili bharata sapremā। pū~chī kusala sumaṃgala khemā॥

देखि भरत कर सील सनेहू। भा निषाद तेहि समय बिदेहू।।

dekhi bharata kara sīla sanehū। bhā niṣāda tehi samaya bidehū॥

सकुच सनेहु मोदु मन बाढ़ा। भरतहि चितवत एकटक ठाढ़ा।।

sakuca sanehu modu mana bār̤hā। bharatahi citavata ekaṭaka ṭhār̤hā॥

धरि धीरजु पद बंदि बहोरी। बिनय सप्रेम करत कर जोरी।।

dhari dhīraju pada baṃdi bahorī। binaya saprema karata kara jorī॥

कुसल मूल पद पंकज पेखी। मैं तिहुँ काल कुसल निज लेखी।।

kusala mūla pada paṃkaja pekhī। maiṃ tihu~ kāla kusala nija lekhī॥

अब प्रभु परम अनुग्रह तोरें। सहित कोटि कुल मंगल मोरें।।

aba prabhu parama anugraha toreṃ। sahita koṭi kula maṃgala moreṃ॥

समुझि मोरि करतूति कुलु प्रभु महिमा जियँ जोइ।

samujhi mori karatūti kulu prabhu mahimā jiya~ joi।

जो न भजइ रघुबीर पद जग बिधि बंचित सोइ।।195।।

jo na bhajai raghubīra pada jaga bidhi baṃcita soi॥195॥

कपटी कायर कुमति कुजाती। लोक बेद बाहेर सब भाँती।।

kapaṭī kāyara kumati kujātī। loka beda bāhera saba bhā~tī॥

राम कीन्ह आपन जबही तें। भयउँ भुवन भूषन तबही तें।।

rāma kīnha āpana jabahī teṃ। bhayau~ bhuvana bhūṣana tabahī teṃ॥

देखि प्रीति सुनि बिनय सुहाई। मिलेउ बहोरि भरत लघु भाई।।

dekhi prīti suni binaya suhāī। mileu bahori bharata laghu bhāī॥

कहि निषाद निज नाम सुबानीं। सादर सकल जोहारीं रानीं।।

kahi niṣāda nija nāma subānīṃ। sādara sakala johārīṃ rānīṃ॥

जानि लखन सम देहिं असीसा। जिअहु सुखी सय लाख बरीसा।।

jāni lakhana sama dehiṃ asīsā। jiahu sukhī saya lākha barīsā॥

निरखि निषादु नगर नर नारी। भए सुखी जनु लखनु निहारी।।

nirakhi niṣādu nagara nara nārī। bhae sukhī janu lakhanu nihārī॥

कहहिं लहेउ एहिं जीवन लाहू। भेंटेउ रामभद्र भरि बाहू।।

kahahiṃ laheu ehiṃ jīvana lāhū। bheṃṭeu rāmabhadra bhari bāhū॥

सुनि निषादु निज भाग बड़ाई। प्रमुदित मन लइ चलेउ लेवाई।।

suni niṣādu nija bhāga bar̤āī। pramudita mana lai caleu levāī॥

सनकारे सेवक सकल चले स्वामि रुख पाइ।

sanakāre sevaka sakala cale svāmi rukha pāi।

घर तरु तर सर बाग बन बास बनाएन्हि जाइ।।196।।