Kiṣkindhā Kāṇḍa — The book of Kiṣkindhā

कुन्देन्दीवरसुन्दरावतिबलौ विज्ञानधामावुभौ

kundendīvarasundarāvatibalau vijñānadhāmāvubhau

शोभाढ्यौ वरधन्विनौ श्रुतिनुतौ गोविप्रवृन्दप्रियौ।

śobhāḍhyau varadhanvinau śrutinutau govipravṛndapriyau।

मायामानुषरूपिणौ रघुवरौ सद्धर्मवर्मौं हितौ

māyāmānuṣarūpiṇau raghuvarau saddharmavarmauṃ hitau

सीतान्वेषणतत्परौ पथिगतौ भक्तिप्रदौ तौ हि नः।।1।।

sītānveṣaṇatatparau pathigatau bhaktipradau tau hi naḥ॥1॥

ब्रह्माम्भोधिसमुद्भवं कलिमलप्रध्वंसनं चाव्ययं

brahmāmbhodhisamudbhavaṃ kalimalapradhvaṃsanaṃ cāvyayaṃ

श्रीमच्छम्भुमुखेन्दुसुन्दरवरे संशोभितं सर्वदा।

śrīmacchambhumukhendusundaravare saṃśobhitaṃ sarvadā।

संसारामयभेषजं सुखकरं श्रीजानकीजीवनं

saṃsārāmayabheṣajaṃ sukhakaraṃ śrījānakījīvanaṃ

धन्यास्ते कृतिनः पिबन्ति सततं श्रीरामनामामृतम्।।2।।

dhanyāste kṛtinaḥ pibanti satataṃ śrīrāmanāmāmṛtam॥2॥

मुक्ति जन्म महि जानि ग्यान खानि अघ हानि कर

mukti janma mahi jāni gyāna khāni agha hāni kara

जहँ बस संभु भवानि सो कासी सेइअ कस न।।

jaha~ basa saṃbhu bhavāni so kāsī seia kasa na॥

जरत सकल सुर बृंद बिषम गरल जेहिं पान किय।

jarata sakala sura bṛṃda biṣama garala jehiṃ pāna kiya।

तेहि न भजसि मन मंद को कृपाल संकर सरिस।।

tehi na bhajasi mana maṃda ko kṛpāla saṃkara sarisa॥

आगें चले बहुरि रघुराया। रिष्यमूक परवत निअराया।।

āgeṃ cale bahuri raghurāyā। riṣyamūka paravata niarāyā॥

तहँ रह सचिव सहित सुग्रीवा। आवत देखि अतुल बल सींवा।।

taha~ raha saciva sahita sugrīvā। āvata dekhi atula bala sīṃvā॥

अति सभीत कह सुनु हनुमाना। पुरुष जुगल बल रूप निधाना।।

ati sabhīta kaha sunu hanumānā। puruṣa jugala bala rūpa nidhānā॥

धरि बटु रूप देखु तैं जाई। कहेसु जानि जियँ सयन बुझाई।।

dhari baṭu rūpa dekhu taiṃ jāī। kahesu jāni jiya~ sayana bujhāī॥

पठए बालि होहिं मन मैला। भागौं तुरत तजौं यह सैला।।

paṭhae bāli hohiṃ mana mailā। bhāgauṃ turata tajauṃ yaha sailā॥

बिप्र रूप धरि कपि तहँ गयऊ। माथ नाइ पूछत अस भयऊ।।

bipra rūpa dhari kapi taha~ gayaū। mātha nāi pūchata asa bhayaū॥

को तुम्ह स्यामल गौर सरीरा। छत्री रूप फिरहु बन बीरा।।

ko tumha syāmala gaura sarīrā। chatrī rūpa phirahu bana bīrā॥

कठिन भूमि कोमल पद गामी। कवन हेतु बिचरहु बन स्वामी।।

kaṭhina bhūmi komala pada gāmī। kavana hetu bicarahu bana svāmī॥

मृदुल मनोहर सुंदर गाता। सहत दुसह बन आतप बाता।।

mṛdula manohara suṃdara gātā। sahata dusaha bana ātapa bātā॥

की तुम्ह तीनि देव महँ कोऊ। नर नारायन की तुम्ह दोऊ।।

kī tumha tīni deva maha~ koū। nara nārāyana kī tumha doū॥

जग कारन तारन भव भंजन धरनी भार।

jaga kārana tārana bhava bhaṃjana dharanī bhāra।

की तुम्ह अकिल भुवन पति लीन्ह मनुज अवतार।।1।।

kī tumha akila bhuvana pati līnha manuja avatāra॥1॥

कोसलेस दसरथ के जाए । हम पितु बचन मानि बन आए।।

kosalesa dasaratha ke jāe । hama pitu bacana māni bana āe॥

नाम राम लछिमन दौउ भाई। संग नारि सुकुमारि सुहाई।।

nāma rāma lachimana dauu bhāī। saṃga nāri sukumāri suhāī॥

इहाँ हरि निसिचर बैदेही। बिप्र फिरहिं हम खोजत तेही।।

ihā~ hari nisicara baidehī। bipra phirahiṃ hama khojata tehī॥

आपन चरित कहा हम गाई। कहहु बिप्र निज कथा बुझाई।।

āpana carita kahā hama gāī। kahahu bipra nija kathā bujhāī॥

प्रभु पहिचानि परेउ गहि चरना। सो सुख उमा नहिं बरना।।

prabhu pahicāni pareu gahi caranā। so sukha umā nahiṃ baranā॥

पुलकित तन मुख आव न बचना। देखत रुचिर बेष कै रचना।।

pulakita tana mukha āva na bacanā। dekhata rucira beṣa kai racanā॥

पुनि धीरजु धरि अस्तुति कीन्ही। हरष हृदयँ निज नाथहि चीन्ही।।

puni dhīraju dhari astuti kīnhī। haraṣa hṛdaya~ nija nāthahi cīnhī॥

मोर न्याउ मैं पूछा साईं। तुम्ह पूछहु कस नर की नाईं।।

mora nyāu maiṃ pūchā sāīṃ। tumha pūchahu kasa nara kī nāīṃ॥

तव माया बस फिरउँ भुलाना। ता ते मैं नहिं प्रभु पहिचाना।।

tava māyā basa phirau~ bhulānā। tā te maiṃ nahiṃ prabhu pahicānā॥

एकु मैं मंद मोहबस कुटिल हृदय अग्यान।

eku maiṃ maṃda mohabasa kuṭila hṛdaya agyāna।

पुनि प्रभु मोहि बिसारेउ दीनबंधु भगवान।।2।।

puni prabhu mohi bisāreu dīnabaṃdhu bhagavāna॥2॥

जदपि नाथ बहु अवगुन मोरें। सेवक प्रभुहि परै जनि भोरें।।

jadapi nātha bahu avaguna moreṃ। sevaka prabhuhi parai jani bhoreṃ॥

नाथ जीव तव मायाँ मोहा। सो निस्तरइ तुम्हारेहिं छोहा।।

nātha jīva tava māyā~ mohā। so nistarai tumhārehiṃ chohā॥

ता पर मैं रघुबीर दोहाई। जानउँ नहिं कछु भजन उपाई।।

tā para maiṃ raghubīra dohāī। jānau~ nahiṃ kachu bhajana upāī॥

सेवक सुत पति मातु भरोसें। रहइ असोच बनइ प्रभु पोसें।।

sevaka suta pati mātu bharoseṃ। rahai asoca banai prabhu poseṃ॥

अस कहि परेउ चरन अकुलाई। निज तनु प्रगटि प्रीति उर छाई।।

asa kahi pareu carana akulāī। nija tanu pragaṭi prīti ura chāī॥

तब रघुपति उठाइ उर लावा। निज लोचन जल सींचि जुड़ावा।।

taba raghupati uṭhāi ura lāvā। nija locana jala sīṃci jur̤āvā॥

सुनु कपि जियँ मानसि जनि ऊना। तैं मम प्रिय लछिमन ते दूना।।

sunu kapi jiya~ mānasi jani ūnā। taiṃ mama priya lachimana te dūnā॥

समदरसी मोहि कह सब कोऊ। सेवक प्रिय अनन्यगति सोऊ।।

samadarasī mohi kaha saba koū। sevaka priya ananyagati soū॥

सो अनन्य जाकें असि मति न टरइ हनुमंत।

so ananya jākeṃ asi mati na ṭarai hanumaṃta।

मैं सेवक सचराचर रूप स्वामि भगवंत।।3।।

maiṃ sevaka sacarācara rūpa svāmi bhagavaṃta॥3॥

देखि पवन सुत पति अनुकूला। हृदयँ हरष बीती सब सूला।।

dekhi pavana suta pati anukūlā। hṛdaya~ haraṣa bītī saba sūlā॥

नाथ सैल पर कपिपति रहई। सो सुग्रीव दास तव अहई।।

nātha saila para kapipati rahaī। so sugrīva dāsa tava ahaī॥

तेहि सन नाथ मयत्री कीजे। दीन जानि तेहि अभय करीजे।।

tehi sana nātha mayatrī kīje। dīna jāni tehi abhaya karīje॥

सो सीता कर खोज कराइहि। जहँ तहँ मरकट कोटि पठाइहि।।

so sītā kara khoja karāihi। jaha~ taha~ marakaṭa koṭi paṭhāihi॥

एहि बिधि सकल कथा समुझाई। लिए दुऔ जन पीठि चढ़ाई।।

ehi bidhi sakala kathā samujhāī। lie duau jana pīṭhi car̤hāī॥

जब सुग्रीवँ राम कहुँ देखा। अतिसय जन्म धन्य करि लेखा।।

jaba sugrīva~ rāma kahu~ dekhā। atisaya janma dhanya kari lekhā॥

सादर मिलेउ नाइ पद माथा। भैंटेउ अनुज सहित रघुनाथा।।

sādara mileu nāi pada māthā। bhaiṃṭeu anuja sahita raghunāthā॥

कपि कर मन बिचार एहि रीती। करिहहिं बिधि मो सन ए प्रीती।।

kapi kara mana bicāra ehi rītī। karihahiṃ bidhi mo sana e prītī॥

तब हनुमंत उभय दिसि की सब कथा सुनाइ।।

taba hanumaṃta ubhaya disi kī saba kathā sunāi॥

पावक साखी देइ करि जोरी प्रीती दृढ़ाइ।।4।।

pāvaka sākhī dei kari jorī prītī dṛr̤hāi॥4॥

कीन्ही प्रीति कछु बीच न राखा। लछमिन राम चरित सब भाषा।।

kīnhī prīti kachu bīca na rākhā। lachamina rāma carita saba bhāṣā॥

कह सुग्रीव नयन भरि बारी। मिलिहि नाथ मिथिलेसकुमारी।।

kaha sugrīva nayana bhari bārī। milihi nātha mithilesakumārī॥

मंत्रिन्ह सहित इहाँ एक बारा। बैठ रहेउँ मैं करत बिचारा।।

maṃtrinha sahita ihā~ eka bārā। baiṭha raheu~ maiṃ karata bicārā॥

गगन पंथ देखी मैं जाता। परबस परी बहुत बिलपाता।।

gagana paṃtha dekhī maiṃ jātā। parabasa parī bahuta bilapātā॥

राम राम हा राम पुकारी। हमहि देखि दीन्हेउ पट डारी।।

rāma rāma hā rāma pukārī। hamahi dekhi dīnheu paṭa ḍārī॥

मागा राम तुरत तेहिं दीन्हा। पट उर लाइ सोच अति कीन्हा।।

māgā rāma turata tehiṃ dīnhā। paṭa ura lāi soca ati kīnhā॥

कह सुग्रीव सुनहु रघुबीरा। तजहु सोच मन आनहु धीरा।।

kaha sugrīva sunahu raghubīrā। tajahu soca mana ānahu dhīrā॥

सब प्रकार करिहउँ सेवकाई। जेहि बिधि मिलिहि जानकी आई।।

saba prakāra karihau~ sevakāī। jehi bidhi milihi jānakī āī॥

सखा बचन सुनि हरषे कृपासिधु बलसींव।

sakhā bacana suni haraṣe kṛpāsidhu balasīṃva।

कारन कवन बसहु बन मोहि कहहु सुग्रीव ।।5।।

kārana kavana basahu bana mohi kahahu sugrīva ॥5॥

नात बालि अरु मैं द्वौ भाई। प्रीति रही कछु बरनि न जाई।।

nāta bāli aru maiṃ dvau bhāī। prīti rahī kachu barani na jāī॥

मय सुत मायावी तेहि नाऊँ। आवा सो प्रभु हमरें गाऊँ।।

maya suta māyāvī tehi nāū~। āvā so prabhu hamareṃ gāū~॥

अर्ध राति पुर द्वार पुकारा। बाली रिपु बल सहै न पारा।।

ardha rāti pura dvāra pukārā। bālī ripu bala sahai na pārā॥

धावा बालि देखि सो भागा। मैं पुनि गयउँ बंधु सँग लागा।।

dhāvā bāli dekhi so bhāgā। maiṃ puni gayau~ baṃdhu sa~ga lāgā॥

गिरिबर गुहाँ पैठ सो जाई। तब बालीं मोहि कहा बुझाई।।

giribara guhā~ paiṭha so jāī। taba bālīṃ mohi kahā bujhāī॥

परिखेसु मोहि एक पखवारा। नहिं आवौं तब जानेसु मारा।।

parikhesu mohi eka pakhavārā। nahiṃ āvauṃ taba jānesu mārā॥

मास दिवस तहँ रहेउँ खरारी। निसरी रुधिर धार तहँ भारी।।

māsa divasa taha~ raheu~ kharārī। nisarī rudhira dhāra taha~ bhārī॥

बालि हतेसि मोहि मारिहि आई। सिला देइ तहँ चलेउँ पराई।।

bāli hatesi mohi mārihi āī। silā dei taha~ caleu~ parāī॥

मंत्रिन्ह पुर देखा बिनु साईं। दीन्हेउ मोहि राज बरिआई।।

maṃtrinha pura dekhā binu sāīṃ। dīnheu mohi rāja bariāī॥

बालि ताहि मारि गृह आवा। देखि मोहि जियँ भेद बढ़ावा।।

bāli tāhi māri gṛha āvā। dekhi mohi jiya~ bheda bar̤hāvā॥

रिपु सम मोहि मारेसि अति भारी। हरि लीन्हेसि सर्बसु अरु नारी।।

ripu sama mohi māresi ati bhārī। hari līnhesi sarbasu aru nārī॥

ताकें भय रघुबीर कृपाला। सकल भुवन मैं फिरेउँ बिहाला।।

tākeṃ bhaya raghubīra kṛpālā। sakala bhuvana maiṃ phireu~ bihālā॥

इहाँ साप बस आवत नाहीं। तदपि सभीत रहउँ मन माहीं।।

ihā~ sāpa basa āvata nāhīṃ। tadapi sabhīta rahau~ mana māhīṃ॥

सुनि सेवक दुख दीनदयाला। फरकि उठीं द्वै भुजा बिसाला।।

suni sevaka dukha dīnadayālā। pharaki uṭhīṃ dvai bhujā bisālā॥

सुनु सुग्रीव मारिहउँ बालिहि एकहिं बान।

sunu sugrīva mārihau~ bālihi ekahiṃ bāna।

ब्रम्ह रुद्र सरनागत गएँ न उबरिहिं प्रान।।6।।

bramha rudra saranāgata gae~ na ubarihiṃ prāna॥6॥

जे न मित्र दुख होहिं दुखारी। तिन्हहि बिलोकत पातक भारी।।

je na mitra dukha hohiṃ dukhārī। tinhahi bilokata pātaka bhārī॥

निज दुख गिरि सम रज करि जाना। मित्रक दुख रज मेरु समाना।।

nija dukha giri sama raja kari jānā। mitraka dukha raja meru samānā॥

जिन्ह कें असि मति सहज न आई। ते सठ कत हठि करत मिताई।।

jinha keṃ asi mati sahaja na āī। te saṭha kata haṭhi karata mitāī॥

कुपथ निवारि सुपंथ चलावा। गुन प्रगटे अवगुनन्हि दुरावा।।

kupatha nivāri supaṃtha calāvā। guna pragaṭe avagunanhi durāvā॥

देत लेत मन संक न धरई। बल अनुमान सदा हित करई।।

deta leta mana saṃka na dharaī। bala anumāna sadā hita karaī॥

बिपति काल कर सतगुन नेहा। श्रुति कह संत मित्र गुन एहा।।

bipati kāla kara sataguna nehā। śruti kaha saṃta mitra guna ehā॥

आगें कह मृदु बचन बनाई। पाछें अनहित मन कुटिलाई।।

āgeṃ kaha mṛdu bacana banāī। pācheṃ anahita mana kuṭilāī॥

जा कर चित अहि गति सम भाई। अस कुमित्र परिहरेहि भलाई।।

jā kara cita ahi gati sama bhāī। asa kumitra pariharehi bhalāī॥

सेवक सठ नृप कृपन कुनारी। कपटी मित्र सूल सम चारी।।

sevaka saṭha nṛpa kṛpana kunārī। kapaṭī mitra sūla sama cārī॥

सखा सोच त्यागहु बल मोरें। सब बिधि घटब काज मैं तोरें।।

sakhā soca tyāgahu bala moreṃ। saba bidhi ghaṭaba kāja maiṃ toreṃ॥

कह सुग्रीव सुनहु रघुबीरा। बालि महाबल अति रनधीरा।।

kaha sugrīva sunahu raghubīrā। bāli mahābala ati ranadhīrā॥

दुंदुभी अस्थि ताल देखराए। बिनु प्रयास रघुनाथ ढहाए।।

duṃdubhī asthi tāla dekharāe। binu prayāsa raghunātha ḍhahāe॥

देखि अमित बल बाढ़ी प्रीती। बालि बधब इन्ह भइ परतीती।।

dekhi amita bala bār̤hī prītī। bāli badhaba inha bhai paratītī॥

बार बार नावइ पद सीसा। प्रभुहि जानि मन हरष कपीसा।।

bāra bāra nāvai pada sīsā। prabhuhi jāni mana haraṣa kapīsā॥

उपजा ग्यान बचन तब बोला। नाथ कृपाँ मन भयउ अलोला।।

upajā gyāna bacana taba bolā। nātha kṛpā~ mana bhayau alolā॥

सुख संपति परिवार बड़ाई। सब परिहरि करिहउँ सेवकाई।।

sukha saṃpati parivāra bar̤āī। saba parihari karihau~ sevakāī॥

ए सब रामभगति के बाधक। कहहिं संत तब पद अवराधक।।

e saba rāmabhagati ke bādhaka। kahahiṃ saṃta taba pada avarādhaka॥

सत्रु मित्र सुख दुख जग माहीं। माया कृत परमारथ नाहीं।।

satru mitra sukha dukha jaga māhīṃ। māyā kṛta paramāratha nāhīṃ॥

बालि परम हित जासु प्रसादा। मिलेहु राम तुम्ह समन बिषादा।।

bāli parama hita jāsu prasādā। milehu rāma tumha samana biṣādā॥

सपनें जेहि सन होइ लराई। जागें समुझत मन सकुचाई।।

sapaneṃ jehi sana hoi larāī। jāgeṃ samujhata mana sakucāī॥

अब प्रभु कृपा करहु एहि भाँती। सब तजि भजनु करौं दिन राती।।

aba prabhu kṛpā karahu ehi bhā~tī। saba taji bhajanu karauṃ dina rātī॥

सुनि बिराग संजुत कपि बानी। बोले बिहँसि रामु धनुपानी।।

suni birāga saṃjuta kapi bānī। bole biha~si rāmu dhanupānī॥

जो कछु कहेहु सत्य सब सोई। सखा बचन मम मृषा न होई।।

jo kachu kahehu satya saba soī। sakhā bacana mama mṛṣā na hoī॥

नट मरकट इव सबहि नचावत। रामु खगेस बेद अस गावत।।

naṭa marakaṭa iva sabahi nacāvata। rāmu khagesa beda asa gāvata॥

लै सुग्रीव संग रघुनाथा। चले चाप सायक गहि हाथा।।

lai sugrīva saṃga raghunāthā। cale cāpa sāyaka gahi hāthā॥

तब रघुपति सुग्रीव पठावा। गर्जेसि जाइ निकट बल पावा।।

taba raghupati sugrīva paṭhāvā। garjesi jāi nikaṭa bala pāvā॥

सुनत बालि क्रोधातुर धावा। गहि कर चरन नारि समुझावा।।

sunata bāli krodhātura dhāvā। gahi kara carana nāri samujhāvā॥

सुनु पति जिन्हहि मिलेउ सुग्रीवा। ते द्वौ बंधु तेज बल सींवा।।

sunu pati jinhahi mileu sugrīvā। te dvau baṃdhu teja bala sīṃvā॥

कोसलेस सुत लछिमन रामा। कालहु जीति सकहिं संग्रामा।।

kosalesa suta lachimana rāmā। kālahu jīti sakahiṃ saṃgrāmā॥

कह बालि सुनु भीरु प्रिय समदरसी रघुनाथ।

kaha bāli sunu bhīru priya samadarasī raghunātha।

जौं कदाचि मोहि मारहिं तौ पुनि होउँ सनाथ।।7।।

jauṃ kadāci mohi mārahiṃ tau puni hou~ sanātha॥7॥

अस कहि चला महा अभिमानी। तृन समान सुग्रीवहि जानी।।

asa kahi calā mahā abhimānī। tṛna samāna sugrīvahi jānī॥

भिरे उभौ बाली अति तर्जा । मुठिका मारि महाधुनि गर्जा।।

bhire ubhau bālī ati tarjā । muṭhikā māri mahādhuni garjā॥

तब सुग्रीव बिकल होइ भागा। मुष्टि प्रहार बज्र सम लागा।।

taba sugrīva bikala hoi bhāgā। muṣṭi prahāra bajra sama lāgā॥

मैं जो कहा रघुबीर कृपाला। बंधु न होइ मोर यह काला।।

maiṃ jo kahā raghubīra kṛpālā। baṃdhu na hoi mora yaha kālā॥

एकरूप तुम्ह भ्राता दोऊ। तेहि भ्रम तें नहिं मारेउँ सोऊ।।

ekarūpa tumha bhrātā doū। tehi bhrama teṃ nahiṃ māreu~ soū॥

कर परसा सुग्रीव सरीरा। तनु भा कुलिस गई सब पीरा।।

kara parasā sugrīva sarīrā। tanu bhā kulisa gaī saba pīrā॥

मेली कंठ सुमन कै माला। पठवा पुनि बल देइ बिसाला।।

melī kaṃṭha sumana kai mālā। paṭhavā puni bala dei bisālā॥

पुनि नाना बिधि भई लराई। बिटप ओट देखहिं रघुराई।।

puni nānā bidhi bhaī larāī। biṭapa oṭa dekhahiṃ raghurāī॥

बहु छल बल सुग्रीव कर हियँ हारा भय मानि।

bahu chala bala sugrīva kara hiya~ hārā bhaya māni।

मारा बालि राम तब हृदय माझ सर तानि।।8।।

mārā bāli rāma taba hṛdaya mājha sara tāni॥8॥

परा बिकल महि सर के लागें। पुनि उठि बैठ देखि प्रभु आगें।।

parā bikala mahi sara ke lāgeṃ। puni uṭhi baiṭha dekhi prabhu āgeṃ॥

स्याम गात सिर जटा बनाएँ। अरुन नयन सर चाप चढ़ाएँ।।

syāma gāta sira jaṭā banāe~। aruna nayana sara cāpa car̤hāe~॥

पुनि पुनि चितइ चरन चित दीन्हा। सुफल जन्म माना प्रभु चीन्हा।।

puni puni citai carana cita dīnhā। suphala janma mānā prabhu cīnhā॥

हृदयँ प्रीति मुख बचन कठोरा। बोला चितइ राम की ओरा।।

hṛdaya~ prīti mukha bacana kaṭhorā। bolā citai rāma kī orā॥

धर्म हेतु अवतरेहु गोसाई। मारेहु मोहि ब्याध की नाई।।

dharma hetu avatarehu gosāī। mārehu mohi byādha kī nāī॥

मैं बैरी सुग्रीव पिआरा। अवगुन कबन नाथ मोहि मारा।।

maiṃ bairī sugrīva piārā। avaguna kabana nātha mohi mārā॥

अनुज बधू भगिनी सुत नारी। सुनु सठ कन्या सम ए चारी।।

anuja badhū bhaginī suta nārī। sunu saṭha kanyā sama e cārī॥

इन्हहि कुद्दष्टि बिलोकइ जोई। ताहि बधें कछु पाप न होई।।

inhahi kuddaṣṭi bilokai joī। tāhi badheṃ kachu pāpa na hoī॥

मुढ़ तोहि अतिसय अभिमाना। नारि सिखावन करसि न काना।।

mur̤ha tohi atisaya abhimānā। nāri sikhāvana karasi na kānā॥

मम भुज बल आश्रित तेहि जानी। मारा चहसि अधम अभिमानी।।

mama bhuja bala āśrita tehi jānī। mārā cahasi adhama abhimānī॥

सुनहु राम स्वामी सन चल न चातुरी मोरि।

sunahu rāma svāmī sana cala na cāturī mori।

प्रभु अजहूँ मैं पापी अंतकाल गति तोरि।।9।।

prabhu ajahū~ maiṃ pāpī aṃtakāla gati tori॥9॥

सुनत राम अति कोमल बानी। बालि सीस परसेउ निज पानी।।

sunata rāma ati komala bānī। bāli sīsa paraseu nija pānī॥

अचल करौं तनु राखहु प्राना। बालि कहा सुनु कृपानिधाना।।

acala karauṃ tanu rākhahu prānā। bāli kahā sunu kṛpānidhānā॥

जन्म जन्म मुनि जतनु कराहीं। अंत राम कहि आवत नाहीं।।

janma janma muni jatanu karāhīṃ। aṃta rāma kahi āvata nāhīṃ॥

जासु नाम बल संकर कासी। देत सबहि सम गति अविनासी।।

jāsu nāma bala saṃkara kāsī। deta sabahi sama gati avināsī॥

मम लोचन गोचर सोइ आवा। बहुरि कि प्रभु अस बनिहि बनावा।।

mama locana gocara soi āvā। bahuri ki prabhu asa banihi banāvā॥

सो नयन गोचर जासु गुन नित नेति कहि श्रुति गावहीं।

so nayana gocara jāsu guna nita neti kahi śruti gāvahīṃ।

जिति पवन मन गो निरस करि मुनि ध्यान कबहुँक पावहीं।।

jiti pavana mana go nirasa kari muni dhyāna kabahu~ka pāvahīṃ॥

मोहि जानि अति अभिमान बस प्रभु कहेउ राखु सरीरही।

mohi jāni ati abhimāna basa prabhu kaheu rākhu sarīrahī।

अस कवन सठ हठि काटि सुरतरु बारि करिहि बबूरही।।1।।

asa kavana saṭha haṭhi kāṭi surataru bāri karihi babūrahī॥1॥

अब नाथ करि करुना बिलोकहु देहु जो बर मागऊँ।

aba nātha kari karunā bilokahu dehu jo bara māgaū~।

जेहिं जोनि जन्मौं कर्म बस तहँ राम पद अनुरागऊँ।।

jehiṃ joni janmauṃ karma basa taha~ rāma pada anurāgaū~॥

यह तनय मम सम बिनय बल कल्यानप्रद प्रभु लीजिऐ।

yaha tanaya mama sama binaya bala kalyānaprada prabhu lījiai।

गहि बाहँ सुर नर नाह आपन दास अंगद कीजिऐ।।2।।

gahi bāha~ sura nara nāha āpana dāsa aṃgada kījiai॥2॥

राम चरन दृढ़ प्रीति करि बालि कीन्ह तनु त्याग।

rāma carana dṛr̤ha prīti kari bāli kīnha tanu tyāga।

सुमन माल जिमि कंठ ते गिरत न जानइ नाग।।10।।

sumana māla jimi kaṃṭha te girata na jānai nāga॥10॥

राम बालि निज धाम पठावा। नगर लोग सब ब्याकुल धावा।।

rāma bāli nija dhāma paṭhāvā। nagara loga saba byākula dhāvā॥

नाना बिधि बिलाप कर तारा। छूटे केस न देह सँभारा।।

nānā bidhi bilāpa kara tārā। chūṭe kesa na deha sa~bhārā॥

तारा बिकल देखि रघुराया । दीन्ह ग्यान हरि लीन्ही माया।।

tārā bikala dekhi raghurāyā । dīnha gyāna hari līnhī māyā॥

छिति जल पावक गगन समीरा। पंच रचित अति अधम सरीरा।।

chiti jala pāvaka gagana samīrā। paṃca racita ati adhama sarīrā॥

प्रगट सो तनु तव आगें सोवा। जीव नित्य केहि लगि तुम्ह रोवा।।

pragaṭa so tanu tava āgeṃ sovā। jīva nitya kehi lagi tumha rovā॥

उपजा ग्यान चरन तब लागी। लीन्हेसि परम भगति बर मागी।।

upajā gyāna carana taba lāgī। līnhesi parama bhagati bara māgī॥

उमा दारु जोषित की नाई। सबहि नचावत रामु गोसाई।।

umā dāru joṣita kī nāī। sabahi nacāvata rāmu gosāī॥

तब सुग्रीवहि आयसु दीन्हा। मृतक कर्म बिधिबत सब कीन्हा।।

taba sugrīvahi āyasu dīnhā। mṛtaka karma bidhibata saba kīnhā॥

राम कहा अनुजहि समुझाई। राज देहु सुग्रीवहि जाई।।

rāma kahā anujahi samujhāī। rāja dehu sugrīvahi jāī॥

रघुपति चरन नाइ करि माथा। चले सकल प्रेरित रघुनाथा।।

raghupati carana nāi kari māthā। cale sakala prerita raghunāthā॥

लछिमन तुरत बोलाए पुरजन बिप्र समाज।

lachimana turata bolāe purajana bipra samāja।

राजु दीन्ह सुग्रीव कहँ अंगद कहँ जुबराज।।11।।

rāju dīnha sugrīva kaha~ aṃgada kaha~ jubarāja॥11॥

उमा राम सम हित जग माहीं। गुरु पितु मातु बंधु प्रभु नाहीं।।

umā rāma sama hita jaga māhīṃ। guru pitu mātu baṃdhu prabhu nāhīṃ॥

सुर नर मुनि सब कै यह रीती। स्वारथ लागि करहिं सब प्रीती।।

sura nara muni saba kai yaha rītī। svāratha lāgi karahiṃ saba prītī॥

बालि त्रास ब्याकुल दिन राती। तन बहु ब्रन चिंताँ जर छाती।।

bāli trāsa byākula dina rātī। tana bahu brana ciṃtā~ jara chātī॥

सोइ सुग्रीव कीन्ह कपिराऊ। अति कृपाल रघुबीर सुभाऊ।।

soi sugrīva kīnha kapirāū। ati kṛpāla raghubīra subhāū॥

जानतहुँ अस प्रभु परिहरहीं। काहे न बिपति जाल नर परहीं।।

jānatahu~ asa prabhu pariharahīṃ। kāhe na bipati jāla nara parahīṃ॥

पुनि सुग्रीवहि लीन्ह बोलाई। बहु प्रकार नृपनीति सिखाई।।

puni sugrīvahi līnha bolāī। bahu prakāra nṛpanīti sikhāī॥

कह प्रभु सुनु सुग्रीव हरीसा। पुर न जाउँ दस चारि बरीसा।।

kaha prabhu sunu sugrīva harīsā। pura na jāu~ dasa cāri barīsā॥

गत ग्रीषम बरषा रितु आई। रहिहउँ निकट सैल पर छाई।।

gata grīṣama baraṣā ritu āī। rahihau~ nikaṭa saila para chāī॥

अंगद सहित करहु तुम्ह राजू। संतत हृदय धरेहु मम काजू।।

aṃgada sahita karahu tumha rājū। saṃtata hṛdaya dharehu mama kājū॥

जब सुग्रीव भवन फिरि आए। रामु प्रबरषन गिरि पर छाए।।

jaba sugrīva bhavana phiri āe। rāmu prabaraṣana giri para chāe॥

प्रथमहिं देवन्ह गिरि गुहा राखेउ रुचिर बनाइ।

prathamahiṃ devanha giri guhā rākheu rucira banāi।

राम कृपानिधि कछु दिन बास करहिंगे आइ।।12।।

rāma kṛpānidhi kachu dina bāsa karahiṃge āi॥12॥

सुंदर बन कुसुमित अति सोभा। गुंजत मधुप निकर मधु लोभा।।

suṃdara bana kusumita ati sobhā। guṃjata madhupa nikara madhu lobhā॥

कंद मूल फल पत्र सुहाए। भए बहुत जब ते प्रभु आए ।।

kaṃda mūla phala patra suhāe। bhae bahuta jaba te prabhu āe ॥

देखि मनोहर सैल अनूपा। रहे तहँ अनुज सहित सुरभूपा।।

dekhi manohara saila anūpā। rahe taha~ anuja sahita surabhūpā॥

मधुकर खग मृग तनु धरि देवा। करहिं सिद्ध मुनि प्रभु कै सेवा।।

madhukara khaga mṛga tanu dhari devā। karahiṃ siddha muni prabhu kai sevā॥

मंगलरुप भयउ बन तब ते । कीन्ह निवास रमापति जब ते।।

maṃgalarupa bhayau bana taba te । kīnha nivāsa ramāpati jaba te॥

फटिक सिला अति सुभ्र सुहाई। सुख आसीन तहाँ द्वौ भाई।।

phaṭika silā ati subhra suhāī। sukha āsīna tahā~ dvau bhāī॥

कहत अनुज सन कथा अनेका। भगति बिरति नृपनीति बिबेका।।

kahata anuja sana kathā anekā। bhagati birati nṛpanīti bibekā॥

बरषा काल मेघ नभ छाए। गरजत लागत परम सुहाए।।

baraṣā kāla megha nabha chāe। garajata lāgata parama suhāe॥

लछिमन देखु मोर गन नाचत बारिद पैखि।

lachimana dekhu mora gana nācata bārida paikhi।

गृही बिरति रत हरष जस बिष्नु भगत कहुँ देखि।।13।।

gṛhī birati rata haraṣa jasa biṣnu bhagata kahu~ dekhi॥13॥

घन घमंड नभ गरजत घोरा। प्रिया हीन डरपत मन मोरा।।

ghana ghamaṃḍa nabha garajata ghorā। priyā hīna ḍarapata mana morā॥

दामिनि दमक रह न घन माहीं। खल कै प्रीति जथा थिर नाहीं।।

dāmini damaka raha na ghana māhīṃ। khala kai prīti jathā thira nāhīṃ॥

बरषहिं जलद भूमि निअराएँ। जथा नवहिं बुध बिद्या पाएँ।।

baraṣahiṃ jalada bhūmi niarāe~। jathā navahiṃ budha bidyā pāe~॥

बूँद अघात सहहिं गिरि कैंसें । खल के बचन संत सह जैसें।।

bū~da aghāta sahahiṃ giri kaiṃseṃ । khala ke bacana saṃta saha jaiseṃ॥

छुद्र नदीं भरि चलीं तोराई। जस थोरेहुँ धन खल इतराई।।

chudra nadīṃ bhari calīṃ torāī। jasa thorehu~ dhana khala itarāī॥

भूमि परत भा ढाबर पानी। जनु जीवहि माया लपटानी।।

bhūmi parata bhā ḍhābara pānī। janu jīvahi māyā lapaṭānī॥

समिटि समिटि जल भरहिं तलावा। जिमि सदगुन सज्जन पहिं आवा।।

samiṭi samiṭi jala bharahiṃ talāvā। jimi sadaguna sajjana pahiṃ āvā॥

सरिता जल जलनिधि महुँ जाई। होई अचल जिमि जिव हरि पाई।।

saritā jala jalanidhi mahu~ jāī। hoī acala jimi jiva hari pāī॥

हरित भूमि तृन संकुल समुझि परहिं नहिं पंथ।

harita bhūmi tṛna saṃkula samujhi parahiṃ nahiṃ paṃtha।

जिमि पाखंड बाद तें गुप्त होहिं सदग्रंथ।।14।।

jimi pākhaṃḍa bāda teṃ gupta hohiṃ sadagraṃtha॥14॥

दादुर धुनि चहु दिसा सुहाई। बेद पढ़हिं जनु बटु समुदाई।।

dādura dhuni cahu disā suhāī। beda par̤hahiṃ janu baṭu samudāī॥

नव पल्लव भए बिटप अनेका। साधक मन जस मिलें बिबेका।।

nava pallava bhae biṭapa anekā। sādhaka mana jasa mileṃ bibekā॥

अर्क जबास पात बिनु भयऊ। जस सुराज खल उद्यम गयऊ।।

arka jabāsa pāta binu bhayaū। jasa surāja khala udyama gayaū॥

खोजत कतहुँ मिलइ नहिं धूरी। करइ क्रोध जिमि धरमहि दूरी।।

khojata katahu~ milai nahiṃ dhūrī। karai krodha jimi dharamahi dūrī॥

ससि संपन्न सोह महि कैसी। उपकारी कै संपति जैसी।।

sasi saṃpanna soha mahi kaisī। upakārī kai saṃpati jaisī॥

निसि तम घन खद्योत बिराजा। जनु दंभिन्ह कर मिला समाजा।।

nisi tama ghana khadyota birājā। janu daṃbhinha kara milā samājā॥

महाबृष्टि चलि फूटि किआरीं । जिमि सुतंत्र भएँ बिगरहिं नारीं।।

mahābṛṣṭi cali phūṭi kiārīṃ । jimi sutaṃtra bhae~ bigarahiṃ nārīṃ॥

कृषी निरावहिं चतुर किसाना। जिमि बुध तजहिं मोह मद माना।।

kṛṣī nirāvahiṃ catura kisānā। jimi budha tajahiṃ moha mada mānā॥

देखिअत चक्रबाक खग नाहीं। कलिहि पाइ जिमि धर्म पराहीं।।

dekhiata cakrabāka khaga nāhīṃ। kalihi pāi jimi dharma parāhīṃ॥

ऊषर बरषइ तृन नहिं जामा। जिमि हरिजन हियँ उपज न कामा।।

ūṣara baraṣai tṛna nahiṃ jāmā। jimi harijana hiya~ upaja na kāmā॥

बिबिध जंतु संकुल महि भ्राजा। प्रजा बाढ़ जिमि पाइ सुराजा।।

bibidha jaṃtu saṃkula mahi bhrājā। prajā bār̤ha jimi pāi surājā॥

जहँ तहँ रहे पथिक थकि नाना। जिमि इंद्रिय गन उपजें ग्याना।।

jaha~ taha~ rahe pathika thaki nānā। jimi iṃdriya gana upajeṃ gyānā॥

कबहुँ प्रबल बह मारुत जहँ तहँ मेघ बिलाहिं।

kabahu~ prabala baha māruta jaha~ taha~ megha bilāhiṃ।

जिमि कपूत के उपजें कुल सद्धर्म नसाहिं।।15(क)।।

jimi kapūta ke upajeṃ kula saddharma nasāhiṃ॥15(ka)॥

कबहुँ दिवस महँ निबिड़ तम कबहुँक प्रगट पतंग।

kabahu~ divasa maha~ nibir̤a tama kabahu~ka pragaṭa pataṃga।

बिनसइ उपजइ ग्यान जिमि पाइ कुसंग सुसंग।।15(ख)।।

binasai upajai gyāna jimi pāi kusaṃga susaṃga॥15(kha)॥

बरषा बिगत सरद रितु आई। लछिमन देखहु परम सुहाई।।

baraṣā bigata sarada ritu āī। lachimana dekhahu parama suhāī॥

फूलें कास सकल महि छाई। जनु बरषाँ कृत प्रगट बुढ़ाई।।

phūleṃ kāsa sakala mahi chāī। janu baraṣā~ kṛta pragaṭa bur̤hāī॥

उदित अगस्ति पंथ जल सोषा। जिमि लोभहि सोषइ संतोषा।।

udita agasti paṃtha jala soṣā। jimi lobhahi soṣai saṃtoṣā॥

सरिता सर निर्मल जल सोहा। संत हृदय जस गत मद मोहा।।

saritā sara nirmala jala sohā। saṃta hṛdaya jasa gata mada mohā॥

रस रस सूख सरित सर पानी। ममता त्याग करहिं जिमि ग्यानी।।

rasa rasa sūkha sarita sara pānī। mamatā tyāga karahiṃ jimi gyānī॥

जानि सरद रितु खंजन आए। पाइ समय जिमि सुकृत सुहाए।।

jāni sarada ritu khaṃjana āe। pāi samaya jimi sukṛta suhāe॥

पंक न रेनु सोह असि धरनी। नीति निपुन नृप कै जसि करनी।।

paṃka na renu soha asi dharanī। nīti nipuna nṛpa kai jasi karanī॥

जल संकोच बिकल भइँ मीना। अबुध कुटुंबी जिमि धनहीना।।

jala saṃkoca bikala bhai~ mīnā। abudha kuṭuṃbī jimi dhanahīnā॥

बिनु धन निर्मल सोह अकासा। हरिजन इव परिहरि सब आसा।।

binu dhana nirmala soha akāsā। harijana iva parihari saba āsā॥

कहुँ कहुँ बृष्टि सारदी थोरी। कोउ एक पाव भगति जिमि मोरी।।

kahu~ kahu~ bṛṣṭi sāradī thorī। kou eka pāva bhagati jimi morī॥

चले हरषि तजि नगर नृप तापस बनिक भिखारि।

cale haraṣi taji nagara nṛpa tāpasa banika bhikhāri।

जिमि हरिभगत पाइ श्रम तजहि आश्रमी चारि।।16।।

jimi haribhagata pāi śrama tajahi āśramī cāri॥16॥

सुखी मीन जे नीर अगाधा। जिमि हरि सरन न एकउ बाधा।।

sukhī mīna je nīra agādhā। jimi hari sarana na ekau bādhā॥

फूलें कमल सोह सर कैसा। निर्गुन ब्रम्ह सगुन भएँ जैसा।।

phūleṃ kamala soha sara kaisā। nirguna bramha saguna bhae~ jaisā॥

गुंजत मधुकर मुखर अनूपा। सुंदर खग रव नाना रूपा।।

guṃjata madhukara mukhara anūpā। suṃdara khaga rava nānā rūpā॥

चक्रबाक मन दुख निसि पैखी। जिमि दुर्जन पर संपति देखी।।

cakrabāka mana dukha nisi paikhī। jimi durjana para saṃpati dekhī॥

चातक रटत तृषा अति ओही। जिमि सुख लहइ न संकरद्रोही।।

cātaka raṭata tṛṣā ati ohī। jimi sukha lahai na saṃkaradrohī॥

सरदातप निसि ससि अपहरई। संत दरस जिमि पातक टरई।।

saradātapa nisi sasi apaharaī। saṃta darasa jimi pātaka ṭaraī॥

देखि इंदु चकोर समुदाई। चितवतहिं जिमि हरिजन हरि पाई।।

dekhi iṃdu cakora samudāī। citavatahiṃ jimi harijana hari pāī॥

मसक दंस बीते हिम त्रासा। जिमि द्विज द्रोह किएँ कुल नासा।।

masaka daṃsa bīte hima trāsā। jimi dvija droha kie~ kula nāsā॥

भूमि जीव संकुल रहे गए सरद रितु पाइ।

bhūmi jīva saṃkula rahe gae sarada ritu pāi।

सदगुर मिले जाहिं जिमि संसय भ्रम समुदाइ।।17।।

sadagura mile jāhiṃ jimi saṃsaya bhrama samudāi॥17॥

बरषा गत निर्मल रितु आई। सुधि न तात सीता कै पाई।।

baraṣā gata nirmala ritu āī। sudhi na tāta sītā kai pāī॥

एक बार कैसेहुँ सुधि जानौं। कालहु जीत निमिष महुँ आनौं।।

eka bāra kaisehu~ sudhi jānauṃ। kālahu jīta nimiṣa mahu~ ānauṃ॥

कतहुँ रहउ जौं जीवति होई। तात जतन करि आनेउँ सोई।।

katahu~ rahau jauṃ jīvati hoī। tāta jatana kari āneu~ soī॥

सुग्रीवहुँ सुधि मोरि बिसारी। पावा राज कोस पुर नारी।।

sugrīvahu~ sudhi mori bisārī। pāvā rāja kosa pura nārī॥

जेहिं सायक मारा मैं बाली। तेहिं सर हतौं मूढ़ कहँ काली।।

jehiṃ sāyaka mārā maiṃ bālī। tehiṃ sara hatauṃ mūr̤ha kaha~ kālī॥

जासु कृपाँ छूटहीं मद मोहा। ता कहुँ उमा कि सपनेहुँ कोहा।।

jāsu kṛpā~ chūṭahīṃ mada mohā। tā kahu~ umā ki sapanehu~ kohā॥

जानहिं यह चरित्र मुनि ग्यानी। जिन्ह रघुबीर चरन रति मानी।।

jānahiṃ yaha caritra muni gyānī। jinha raghubīra carana rati mānī॥

लछिमन क्रोधवंत प्रभु जाना। धनुष चढ़ाइ गहे कर बाना।।

lachimana krodhavaṃta prabhu jānā। dhanuṣa car̤hāi gahe kara bānā॥

तब अनुजहि समुझावा रघुपति करुना सींव।।

taba anujahi samujhāvā raghupati karunā sīṃva॥

भय देखाइ लै आवहु तात सखा सुग्रीव।।18।।

bhaya dekhāi lai āvahu tāta sakhā sugrīva॥18॥

इहाँ पवनसुत हृदयँ बिचारा। राम काजु सुग्रीवँ बिसारा।।

ihā~ pavanasuta hṛdaya~ bicārā। rāma kāju sugrīva~ bisārā॥

निकट जाइ चरनन्हि सिरु नावा। चारिहु बिधि तेहि कहि समुझावा।।

nikaṭa jāi carananhi siru nāvā। cārihu bidhi tehi kahi samujhāvā॥

सुनि सुग्रीवँ परम भय माना। बिषयँ मोर हरि लीन्हेउ ग्याना।।

suni sugrīva~ parama bhaya mānā। biṣaya~ mora hari līnheu gyānā॥

अब मारुतसुत दूत समूहा। पठवहु जहँ तहँ बानर जूहा।।

aba mārutasuta dūta samūhā। paṭhavahu jaha~ taha~ bānara jūhā॥

कहहु पाख महुँ आव न जोई। मोरें कर ता कर बध होई।।

kahahu pākha mahu~ āva na joī। moreṃ kara tā kara badha hoī॥

तब हनुमंत बोलाए दूता। सब कर करि सनमान बहूता।।

taba hanumaṃta bolāe dūtā। saba kara kari sanamāna bahūtā॥

भय अरु प्रीति नीति देखाई। चले सकल चरनन्हि सिर नाई।।

bhaya aru prīti nīti dekhāī। cale sakala carananhi sira nāī॥

एहि अवसर लछिमन पुर आए। क्रोध देखि जहँ तहँ कपि धाए।।

ehi avasara lachimana pura āe। krodha dekhi jaha~ taha~ kapi dhāe॥

धनुष चढ़ाइ कहा तब जारि करउँ पुर छार।

dhanuṣa car̤hāi kahā taba jāri karau~ pura chāra।

ब्याकुल नगर देखि तब आयउ बालिकुमार।।19।।

byākula nagara dekhi taba āyau bālikumāra॥19॥

चरन नाइ सिरु बिनती कीन्ही। लछिमन अभय बाँह तेहि दीन्ही।।

carana nāi siru binatī kīnhī। lachimana abhaya bā~ha tehi dīnhī॥

क्रोधवंत लछिमन सुनि काना। कह कपीस अति भयँ अकुलाना।।

krodhavaṃta lachimana suni kānā। kaha kapīsa ati bhaya~ akulānā॥

सुनु हनुमंत संग लै तारा। करि बिनती समुझाउ कुमारा।।

sunu hanumaṃta saṃga lai tārā। kari binatī samujhāu kumārā॥

तारा सहित जाइ हनुमाना। चरन बंदि प्रभु सुजस बखाना।।

tārā sahita jāi hanumānā। carana baṃdi prabhu sujasa bakhānā॥

करि बिनती मंदिर लै आए। चरन पखारि पलँग बैठाए।।

kari binatī maṃdira lai āe। carana pakhāri pala~ga baiṭhāe॥

तब कपीस चरनन्हि सिरु नावा। गहि भुज लछिमन कंठ लगावा।।

taba kapīsa carananhi siru nāvā। gahi bhuja lachimana kaṃṭha lagāvā॥

नाथ बिषय सम मद कछु नाहीं। मुनि मन मोह करइ छन माहीं।।

nātha biṣaya sama mada kachu nāhīṃ। muni mana moha karai chana māhīṃ॥

सुनत बिनीत बचन सुख पावा। लछिमन तेहि बहु बिधि समुझावा।।

sunata binīta bacana sukha pāvā। lachimana tehi bahu bidhi samujhāvā॥

पवन तनय सब कथा सुनाई। जेहि बिधि गए दूत समुदाई।।

pavana tanaya saba kathā sunāī। jehi bidhi gae dūta samudāī॥

हरषि चले सुग्रीव तब अंगदादि कपि साथ।

haraṣi cale sugrīva taba aṃgadādi kapi sātha।

रामानुज आगें करि आए जहँ रघुनाथ।।20।।

rāmānuja āgeṃ kari āe jaha~ raghunātha॥20॥

नाइ चरन सिरु कह कर जोरी। नाथ मोहि कछु नाहिन खोरी।।

nāi carana siru kaha kara jorī। nātha mohi kachu nāhina khorī॥

अतिसय प्रबल देव तब माया। छूटइ राम करहु जौं दाया।।

atisaya prabala deva taba māyā। chūṭai rāma karahu jauṃ dāyā॥

बिषय बस्य सुर नर मुनि स्वामी। मैं पावँर पसु कपि अति कामी।।

biṣaya basya sura nara muni svāmī। maiṃ pāva~ra pasu kapi ati kāmī॥

नारि नयन सर जाहि न लागा। घोर क्रोध तम निसि जो जागा।।

nāri nayana sara jāhi na lāgā। ghora krodha tama nisi jo jāgā॥

लोभ पाँस जेहिं गर न बँधाया। सो नर तुम्ह समान रघुराया।।

lobha pā~sa jehiṃ gara na ba~dhāyā। so nara tumha samāna raghurāyā॥

यह गुन साधन तें नहिं होई। तुम्हरी कृपाँ पाव कोइ कोई।।

yaha guna sādhana teṃ nahiṃ hoī। tumharī kṛpā~ pāva koi koī॥

तब रघुपति बोले मुसकाई। तुम्ह प्रिय मोहि भरत जिमि भाई।।

taba raghupati bole musakāī। tumha priya mohi bharata jimi bhāī॥

अब सोइ जतनु करहु मन लाई। जेहि बिधि सीता कै सुधि पाई।।

aba soi jatanu karahu mana lāī। jehi bidhi sītā kai sudhi pāī॥

एहि बिधि होत बतकही आए बानर जूथ।

ehi bidhi hota batakahī āe bānara jūtha।

नाना बरन सकल दिसि देखिअ कीस बरुथ।।21।।

nānā barana sakala disi dekhia kīsa barutha॥21॥

बानर कटक उमा में देखा। सो मूरुख जो करन चह लेखा।।

bānara kaṭaka umā meṃ dekhā। so mūrukha jo karana caha lekhā॥

आइ राम पद नावहिं माथा। निरखि बदनु सब होहिं सनाथा।।

āi rāma pada nāvahiṃ māthā। nirakhi badanu saba hohiṃ sanāthā॥

अस कपि एक न सेना माहीं। राम कुसल जेहि पूछी नाहीं।।

asa kapi eka na senā māhīṃ। rāma kusala jehi pūchī nāhīṃ॥

यह कछु नहिं प्रभु कइ अधिकाई। बिस्वरूप ब्यापक रघुराई।।

yaha kachu nahiṃ prabhu kai adhikāī। bisvarūpa byāpaka raghurāī॥

ठाढ़े जहँ तहँ आयसु पाई। कह सुग्रीव सबहि समुझाई।।

ṭhār̤he jaha~ taha~ āyasu pāī। kaha sugrīva sabahi samujhāī॥

राम काजु अरु मोर निहोरा। बानर जूथ जाहु चहुँ ओरा।।

rāma kāju aru mora nihorā। bānara jūtha jāhu cahu~ orā॥

जनकसुता कहुँ खोजहु जाई। मास दिवस महँ आएहु भाई।।

janakasutā kahu~ khojahu jāī। māsa divasa maha~ āehu bhāī॥

अवधि मेटि जो बिनु सुधि पाएँ। आवइ बनिहि सो मोहि मराएँ।।

avadhi meṭi jo binu sudhi pāe~। āvai banihi so mohi marāe~॥

बचन सुनत सब बानर जहँ तहँ चले तुरंत ।

bacana sunata saba bānara jaha~ taha~ cale turaṃta ।

तब सुग्रीवँ बोलाए अंगद नल हनुमंत।।22।।

taba sugrīva~ bolāe aṃgada nala hanumaṃta॥22॥

सुनहु नील अंगद हनुमाना। जामवंत मतिधीर सुजाना।।

sunahu nīla aṃgada hanumānā। jāmavaṃta matidhīra sujānā॥

सकल सुभट मिलि दच्छिन जाहू। सीता सुधि पूँछेउ सब काहू।।

sakala subhaṭa mili dacchina jāhū। sītā sudhi pū~cheu saba kāhū॥

मन क्रम बचन सो जतन बिचारेहु। रामचंद्र कर काजु सँवारेहु।।

mana krama bacana so jatana bicārehu। rāmacaṃdra kara kāju sa~vārehu॥

भानु पीठि सेइअ उर आगी। स्वामिहि सर्ब भाव छल त्यागी।।

bhānu pīṭhi seia ura āgī। svāmihi sarba bhāva chala tyāgī॥

तजि माया सेइअ परलोका। मिटहिं सकल भव संभव सोका।।

taji māyā seia paralokā। miṭahiṃ sakala bhava saṃbhava sokā॥

देह धरे कर यह फलु भाई। भजिअ राम सब काम बिहाई।।

deha dhare kara yaha phalu bhāī। bhajia rāma saba kāma bihāī॥

सोइ गुनग्य सोई बड़भागी । जो रघुबीर चरन अनुरागी।।

soi gunagya soī bar̤abhāgī । jo raghubīra carana anurāgī॥

आयसु मागि चरन सिरु नाई। चले हरषि सुमिरत रघुराई।।

āyasu māgi carana siru nāī। cale haraṣi sumirata raghurāī॥

पाछें पवन तनय सिरु नावा। जानि काज प्रभु निकट बोलावा।।

pācheṃ pavana tanaya siru nāvā। jāni kāja prabhu nikaṭa bolāvā॥

परसा सीस सरोरुह पानी। करमुद्रिका दीन्हि जन जानी।।

parasā sīsa saroruha pānī। karamudrikā dīnhi jana jānī॥

बहु प्रकार सीतहि समुझाएहु। कहि बल बिरह बेगि तुम्ह आएहु।।

bahu prakāra sītahi samujhāehu। kahi bala biraha begi tumha āehu॥

हनुमत जन्म सुफल करि माना। चलेउ हृदयँ धरि कृपानिधाना।।

hanumata janma suphala kari mānā। caleu hṛdaya~ dhari kṛpānidhānā॥

जद्यपि प्रभु जानत सब बाता। राजनीति राखत सुरत्राता।।

jadyapi prabhu jānata saba bātā। rājanīti rākhata suratrātā॥

चले सकल बन खोजत सरिता सर गिरि खोह।

cale sakala bana khojata saritā sara giri khoha।

राम काज लयलीन मन बिसरा तन कर छोह।।23।।

rāma kāja layalīna mana bisarā tana kara choha॥23॥

कतहुँ होइ निसिचर सैं भेटा। प्रान लेहिं एक एक चपेटा।।

katahu~ hoi nisicara saiṃ bheṭā। prāna lehiṃ eka eka capeṭā॥

बहु प्रकार गिरि कानन हेरहिं। कोउ मुनि मिलत ताहि सब घेरहिं।।

bahu prakāra giri kānana herahiṃ। kou muni milata tāhi saba gherahiṃ॥

लागि तृषा अतिसय अकुलाने। मिलइ न जल घन गहन भुलाने।।

lāgi tṛṣā atisaya akulāne। milai na jala ghana gahana bhulāne॥

मन हनुमान कीन्ह अनुमाना। मरन चहत सब बिनु जल पाना।।

mana hanumāna kīnha anumānā। marana cahata saba binu jala pānā॥

चढ़ि गिरि सिखर चहूँ दिसि देखा। भूमि बिबिर एक कौतुक पेखा।।

car̤hi giri sikhara cahū~ disi dekhā। bhūmi bibira eka kautuka pekhā॥

चक्रबाक बक हंस उड़ाहीं। बहुतक खग प्रबिसहिं तेहि माहीं।।

cakrabāka baka haṃsa ur̤āhīṃ। bahutaka khaga prabisahiṃ tehi māhīṃ॥

गिरि ते उतरि पवनसुत आवा। सब कहुँ लै सोइ बिबर देखावा।।

giri te utari pavanasuta āvā। saba kahu~ lai soi bibara dekhāvā॥

आगें कै हनुमंतहि लीन्हा। पैठे बिबर बिलंबु न कीन्हा।।

āgeṃ kai hanumaṃtahi līnhā। paiṭhe bibara bilaṃbu na kīnhā॥

दीख जाइ उपवन बर सर बिगसित बहु कंज।

dīkha jāi upavana bara sara bigasita bahu kaṃja।

मंदिर एक रुचिर तहँ बैठि नारि तप पुंज।।24।।

maṃdira eka rucira taha~ baiṭhi nāri tapa puṃja॥24॥

दूरि ते ताहि सबन्हि सिर नावा। पूछें निज बृत्तांत सुनावा।।

dūri te tāhi sabanhi sira nāvā। pūcheṃ nija bṛttāṃta sunāvā॥

तेहिं तब कहा करहु जल पाना। खाहु सुरस सुंदर फल नाना।।

tehiṃ taba kahā karahu jala pānā। khāhu surasa suṃdara phala nānā॥

मज्जनु कीन्ह मधुर फल खाए। तासु निकट पुनि सब चलि आए।।

majjanu kīnha madhura phala khāe। tāsu nikaṭa puni saba cali āe॥

तेहिं सब आपनि कथा सुनाई। मैं अब जाब जहाँ रघुराई।।

tehiṃ saba āpani kathā sunāī। maiṃ aba jāba jahā~ raghurāī॥

मूदहु नयन बिबर तजि जाहू। पैहहु सीतहि जनि पछिताहू।।

mūdahu nayana bibara taji jāhū। paihahu sītahi jani pachitāhū॥

नयन मूदि पुनि देखहिं बीरा। ठाढ़े सकल सिंधु कें तीरा।।

nayana mūdi puni dekhahiṃ bīrā। ṭhār̤he sakala siṃdhu keṃ tīrā॥

सो पुनि गई जहाँ रघुनाथा। जाइ कमल पद नाएसि माथा।।

so puni gaī jahā~ raghunāthā। jāi kamala pada nāesi māthā॥

नाना भाँति बिनय तेहिं कीन्ही। अनपायनी भगति प्रभु दीन्ही।।

nānā bhā~ti binaya tehiṃ kīnhī। anapāyanī bhagati prabhu dīnhī॥

बदरीबन कहुँ सो गई प्रभु अग्या धरि सीस ।

badarībana kahu~ so gaī prabhu agyā dhari sīsa ।

उर धरि राम चरन जुग जे बंदत अज ईस।।25।।

ura dhari rāma carana juga je baṃdata aja īsa॥25॥

इहाँ बिचारहिं कपि मन माहीं। बीती अवधि काज कछु नाहीं।।

ihā~ bicārahiṃ kapi mana māhīṃ। bītī avadhi kāja kachu nāhīṃ॥

सब मिलि कहहिं परस्पर बाता। बिनु सुधि लएँ करब का भ्राता।।

saba mili kahahiṃ paraspara bātā। binu sudhi lae~ karaba kā bhrātā॥

कह अंगद लोचन भरि बारी। दुहुँ प्रकार भइ मृत्यु हमारी।।

kaha aṃgada locana bhari bārī। duhu~ prakāra bhai mṛtyu hamārī॥

इहाँ न सुधि सीता कै पाई। उहाँ गएँ मारिहि कपिराई।।

ihā~ na sudhi sītā kai pāī। uhā~ gae~ mārihi kapirāī॥

पिता बधे पर मारत मोही। राखा राम निहोर न ओही।।

pitā badhe para mārata mohī। rākhā rāma nihora na ohī॥

पुनि पुनि अंगद कह सब पाहीं। मरन भयउ कछु संसय नाहीं।।

puni puni aṃgada kaha saba pāhīṃ। marana bhayau kachu saṃsaya nāhīṃ॥

अंगद बचन सुनत कपि बीरा। बोलि न सकहिं नयन बह नीरा।।

aṃgada bacana sunata kapi bīrā। boli na sakahiṃ nayana baha nīrā॥

छन एक सोच मगन होइ रहे। पुनि अस वचन कहत सब भए।।

chana eka soca magana hoi rahe। puni asa vacana kahata saba bhae॥

हम सीता कै सुधि लिन्हें बिना। नहिं जैंहैं जुबराज प्रबीना।।

hama sītā kai sudhi linheṃ binā। nahiṃ jaiṃhaiṃ jubarāja prabīnā॥

अस कहि लवन सिंधु तट जाई। बैठे कपि सब दर्भ डसाई।।

asa kahi lavana siṃdhu taṭa jāī। baiṭhe kapi saba darbha ḍasāī॥

जामवंत अंगद दुख देखी। कहिं कथा उपदेस बिसेषी।।

jāmavaṃta aṃgada dukha dekhī। kahiṃ kathā upadesa biseṣī॥

तात राम कहुँ नर जनि मानहु। निर्गुन ब्रम्ह अजित अज जानहु।।

tāta rāma kahu~ nara jani mānahu। nirguna bramha ajita aja jānahu॥

हम सब सेवक अति बड़भागी। संतत सगुन ब्रह्म अनुरागी।।

hama saba sevaka ati bar̤abhāgī। saṃtata saguna brahma anurāgī॥

निज इच्छा प्रभु अवतरइ सुर महि गो द्विज लागि।

nija icchā prabhu avatarai sura mahi go dvija lāgi।

सगुन उपासक संग तहँ रहहिं मोच्छ सब त्यागि।।26।।

saguna upāsaka saṃga taha~ rahahiṃ moccha saba tyāgi॥26॥

एहि बिधि कथा कहहि बहु भाँती गिरि कंदराँ सुनी संपाती।।

ehi bidhi kathā kahahi bahu bhā~tī giri kaṃdarā~ sunī saṃpātī॥

बाहेर होइ देखि बहु कीसा। मोहि अहार दीन्ह जगदीसा।।

bāhera hoi dekhi bahu kīsā। mohi ahāra dīnha jagadīsā॥

आजु सबहि कहँ भच्छन करऊँ। दिन बहु चले अहार बिनु मरऊँ।।

āju sabahi kaha~ bhacchana karaū~। dina bahu cale ahāra binu maraū~॥

कबहुँ न मिल भरि उदर अहारा। आजु दीन्ह बिधि एकहिं बारा।।

kabahu~ na mila bhari udara ahārā। āju dīnha bidhi ekahiṃ bārā॥

डरपे गीध बचन सुनि काना। अब भा मरन सत्य हम जाना।।

ḍarape gīdha bacana suni kānā। aba bhā marana satya hama jānā॥

कपि सब उठे गीध कहँ देखी। जामवंत मन सोच बिसेषी।।

kapi saba uṭhe gīdha kaha~ dekhī। jāmavaṃta mana soca biseṣī॥

कह अंगद बिचारि मन माहीं। धन्य जटायू सम कोउ नाहीं।।

kaha aṃgada bicāri mana māhīṃ। dhanya jaṭāyū sama kou nāhīṃ॥

राम काज कारन तनु त्यागी । हरि पुर गयउ परम बड़ भागी।।

rāma kāja kārana tanu tyāgī । hari pura gayau parama bar̤a bhāgī॥

सुनि खग हरष सोक जुत बानी । आवा निकट कपिन्ह भय मानी।।

suni khaga haraṣa soka juta bānī । āvā nikaṭa kapinha bhaya mānī॥

तिन्हहि अभय करि पूछेसि जाई। कथा सकल तिन्ह ताहि सुनाई।।

tinhahi abhaya kari pūchesi jāī। kathā sakala tinha tāhi sunāī॥

सुनि संपाति बंधु कै करनी। रघुपति महिमा बधुबिधि बरनी।।

suni saṃpāti baṃdhu kai karanī। raghupati mahimā badhubidhi baranī॥

मोहि लै जाहु सिंधुतट देउँ तिलांजलि ताहि ।

mohi lai jāhu siṃdhutaṭa deu~ tilāṃjali tāhi ।

बचन सहाइ करवि मैं पैहहु खोजहु जाहि ।।27।।

bacana sahāi karavi maiṃ paihahu khojahu jāhi ॥27॥

अनुज क्रिया करि सागर तीरा। कहि निज कथा सुनहु कपि बीरा।।

anuja kriyā kari sāgara tīrā। kahi nija kathā sunahu kapi bīrā॥

हम द्वौ बंधु प्रथम तरुनाई । गगन गए रबि निकट उडाई।।

hama dvau baṃdhu prathama tarunāī । gagana gae rabi nikaṭa uḍāī॥

तेज न सहि सक सो फिरि आवा । मै अभिमानी रबि निअरावा ।।

teja na sahi saka so phiri āvā । mai abhimānī rabi niarāvā ॥

जरे पंख अति तेज अपारा । परेउँ भूमि करि घोर चिकारा ।।

jare paṃkha ati teja apārā । pareu~ bhūmi kari ghora cikārā ॥

मुनि एक नाम चंद्रमा ओही। लागी दया देखी करि मोही।।

muni eka nāma caṃdramā ohī। lāgī dayā dekhī kari mohī॥

बहु प्रकार तेंहि ग्यान सुनावा । देहि जनित अभिमानी छड़ावा ।।

bahu prakāra teṃhi gyāna sunāvā । dehi janita abhimānī char̤āvā ॥

त्रेताँ ब्रह्म मनुज तनु धरिही। तासु नारि निसिचर पति हरिही।।

tretā~ brahma manuja tanu dharihī। tāsu nāri nisicara pati harihī॥

तासु खोज पठइहि प्रभू दूता। तिन्हहि मिलें तैं होब पुनीता।।

tāsu khoja paṭhaihi prabhū dūtā। tinhahi mileṃ taiṃ hoba punītā॥

जमिहहिं पंख करसि जनि चिंता । तिन्हहि देखाइ देहेसु तैं सीता।।

jamihahiṃ paṃkha karasi jani ciṃtā । tinhahi dekhāi dehesu taiṃ sītā॥

मुनि कइ गिरा सत्य भइ आजू । सुनि मम बचन करहु प्रभु काजू।।

muni kai girā satya bhai ājū । suni mama bacana karahu prabhu kājū॥

गिरि त्रिकूट ऊपर बस लंका । तहँ रह रावन सहज असंका ।।

giri trikūṭa ūpara basa laṃkā । taha~ raha rāvana sahaja asaṃkā ॥

तहँ असोक उपबन जहँ रहई ।। सीता बैठि सोच रत अहई।।

taha~ asoka upabana jaha~ rahaī ॥ sītā baiṭhi soca rata ahaī॥

मैं देखउँ तुम्ह नाहि गीघहि दष्टि अपार।।

maiṃ dekhau~ tumha nāhi gīghahi daṣṭi apāra॥

बूढ भयउँ न त करतेउँ कछुक सहाय तुम्हार।।28।।

būḍha bhayau~ na ta karateu~ kachuka sahāya tumhāra॥28॥

जो नाघइ सत जोजन सागर । करइ सो राम काज मति आगर ।।

jo nāghai sata jojana sāgara । karai so rāma kāja mati āgara ॥

मोहि बिलोकि धरहु मन धीरा । राम कृपाँ कस भयउ सरीरा।।

mohi biloki dharahu mana dhīrā । rāma kṛpā~ kasa bhayau sarīrā॥

पापिउ जा कर नाम सुमिरहीं। अति अपार भवसागर तरहीं।।

pāpiu jā kara nāma sumirahīṃ। ati apāra bhavasāgara tarahīṃ॥

तासु दूत तुम्ह तजि कदराई। राम हृदयँ धरि करहु उपाई।।

tāsu dūta tumha taji kadarāī। rāma hṛdaya~ dhari karahu upāī॥

अस कहि गरुड़ गीध जब गयऊ। तिन्ह कें मन अति बिसमय भयऊ।।

asa kahi garur̤a gīdha jaba gayaū। tinha keṃ mana ati bisamaya bhayaū॥

निज निज बल सब काहूँ भाषा। पार जाइ कर संसय राखा।।

nija nija bala saba kāhū~ bhāṣā। pāra jāi kara saṃsaya rākhā॥

जरठ भयउँ अब कहइ रिछेसा। नहिं तन रहा प्रथम बल लेसा।।

jaraṭha bhayau~ aba kahai richesā। nahiṃ tana rahā prathama bala lesā॥

जबहिं त्रिबिक्रम भए खरारी। तब मैं तरुन रहेउँ बल भारी।।

jabahiṃ tribikrama bhae kharārī। taba maiṃ taruna raheu~ bala bhārī॥

बलि बाँधत प्रभु बाढेउ सो तनु बरनि न जाई।

bali bā~dhata prabhu bāḍheu so tanu barani na jāī।

उभय धरी महँ दीन्ही सात प्रदच्छिन धाइ।।29।।

ubhaya dharī maha~ dīnhī sāta pradacchina dhāi॥29॥