Sundara Kāṇḍa — The beautiful book

शान्तं शाश्वतमप्रमेयमनघं निर्वाणशान्तिप्रदं

śāntaṃ śāśvatamaprameyamanaghaṃ nirvāṇaśāntipradaṃ

ब्रह्माशम्भुफणीन्द्रसेव्यमनिशं वेदान्तवेद्यं विभुम् ।

brahmāśambhuphaṇīndrasevyamaniśaṃ vedāntavedyaṃ vibhum ।

रामाख्यं जगदीश्वरं सुरगुरुं मायामनुष्यं हरिं

rāmākhyaṃ jagadīśvaraṃ suraguruṃ māyāmanuṣyaṃ hariṃ

वन्देऽहं करुणाकरं रघुवरं भूपालचूड़ामणिम्।।1।।

vande'haṃ karuṇākaraṃ raghuvaraṃ bhūpālacūr̤āmaṇim॥1॥

नान्या स्पृहा रघुपते हृदयेऽस्मदीये

nānyā spṛhā raghupate hṛdaye'smadīye

सत्यं वदामि च भवानखिलान्तरात्मा।

satyaṃ vadāmi ca bhavānakhilāntarātmā।

भक्तिं प्रयच्छ रघुपुङ्गव निर्भरां मे

bhaktiṃ prayaccha raghupuṅgava nirbharāṃ me

कामादिदोषरहितं कुरु मानसं च।।2।।

kāmādidoṣarahitaṃ kuru mānasaṃ ca॥2॥

अतुलितबलधामं हेमशैलाभदेहं

atulitabaladhāmaṃ hemaśailābhadehaṃ

दनुजवनकृशानुं ज्ञानिनामग्रगण्यम्।

danujavanakṛśānuṃ jñānināmagragaṇyam।

सकलगुणनिधानं वानराणामधीशं

sakalaguṇanidhānaṃ vānarāṇāmadhīśaṃ

रघुपतिप्रियभक्तं वातजातं नमामि।।3।।

raghupatipriyabhaktaṃ vātajātaṃ namāmi॥3॥

जामवंत के बचन सुहाए। सुनि हनुमंत हृदय अति भाए।।

jāmavaṃta ke bacana suhāe। suni hanumaṃta hṛdaya ati bhāe॥

तब लगि मोहि परिखेहु तुम्ह भाई। सहि दुख कंद मूल फल खाई।।

taba lagi mohi parikhehu tumha bhāī। sahi dukha kaṃda mūla phala khāī॥

जब लगि आवौं सीतहि देखी। होइहि काजु मोहि हरष बिसेषी।।

jaba lagi āvauṃ sītahi dekhī। hoihi kāju mohi haraṣa biseṣī॥

यह कहि नाइ सबन्हि कहुँ माथा। चलेउ हरषि हियँ धरि रघुनाथा।।

yaha kahi nāi sabanhi kahu~ māthā। caleu haraṣi hiya~ dhari raghunāthā॥

सिंधु तीर एक भूधर सुंदर। कौतुक कूदि चढ़ेउ ता ऊपर।।

siṃdhu tīra eka bhūdhara suṃdara। kautuka kūdi car̤heu tā ūpara॥

बार बार रघुबीर सँभारी। तरकेउ पवनतनय बल भारी।।

bāra bāra raghubīra sa~bhārī। tarakeu pavanatanaya bala bhārī॥

जेहिं गिरि चरन देइ हनुमंता। चलेउ सो गा पाताल तुरंता।।

jehiṃ giri carana dei hanumaṃtā। caleu so gā pātāla turaṃtā॥

जिमि अमोघ रघुपति कर बाना। एही भाँति चलेउ हनुमाना।।

jimi amogha raghupati kara bānā। ehī bhā~ti caleu hanumānā॥

जलनिधि रघुपति दूत बिचारी। तैं मैनाक होहि श्रमहारी।।

jalanidhi raghupati dūta bicārī। taiṃ maināka hohi śramahārī॥

हनूमान तेहि परसा कर पुनि कीन्ह प्रनाम।

hanūmāna tehi parasā kara puni kīnha pranāma।

राम काजु कीन्हें बिनु मोहि कहाँ बिश्राम।।1।।

rāma kāju kīnheṃ binu mohi kahā~ biśrāma॥1॥

जात पवनसुत देवन्ह देखा। जानैं कहुँ बल बुद्धि बिसेषा।।

jāta pavanasuta devanha dekhā। jānaiṃ kahu~ bala buddhi biseṣā॥

सुरसा नाम अहिन्ह कै माता। पठइन्हि आइ कही तेहिं बाता।।

surasā nāma ahinha kai mātā। paṭhainhi āi kahī tehiṃ bātā॥

आजु सुरन्ह मोहि दीन्ह अहारा। सुनत बचन कह पवनकुमारा।।

āju suranha mohi dīnha ahārā। sunata bacana kaha pavanakumārā॥

राम काजु करि फिरि मैं आवौं। सीता कइ सुधि प्रभुहि सुनावौं।।

rāma kāju kari phiri maiṃ āvauṃ। sītā kai sudhi prabhuhi sunāvauṃ॥

तब तव बदन पैठिहउँ आई। सत्य कहउँ मोहि जान दे माई।।

taba tava badana paiṭhihau~ āī। satya kahau~ mohi jāna de māī॥

कबनेहुँ जतन देइ नहिं जाना। ग्रससि न मोहि कहेउ हनुमाना।।

kabanehu~ jatana dei nahiṃ jānā। grasasi na mohi kaheu hanumānā॥

जोजन भरि तेहिं बदनु पसारा। कपि तनु कीन्ह दुगुन बिस्तारा।।

jojana bhari tehiṃ badanu pasārā। kapi tanu kīnha duguna bistārā॥

सोरह जोजन मुख तेहिं ठयऊ। तुरत पवनसुत बत्तिस भयऊ।।

soraha jojana mukha tehiṃ ṭhayaū। turata pavanasuta battisa bhayaū॥

जस जस सुरसा बदनु बढ़ावा। तासु दून कपि रूप देखावा।।

jasa jasa surasā badanu bar̤hāvā। tāsu dūna kapi rūpa dekhāvā॥

सत जोजन तेहिं आनन कीन्हा। अति लघु रूप पवनसुत लीन्हा।।

sata jojana tehiṃ ānana kīnhā। ati laghu rūpa pavanasuta līnhā॥

बदन पइठि पुनि बाहेर आवा। मागा बिदा ताहि सिरु नावा।।

badana paiṭhi puni bāhera āvā। māgā bidā tāhi siru nāvā॥

मोहि सुरन्ह जेहि लागि पठावा। बुधि बल मरमु तोर मै पावा।।

mohi suranha jehi lāgi paṭhāvā। budhi bala maramu tora mai pāvā॥

राम काजु सबु करिहहु तुम्ह बल बुद्धि निधान।

rāma kāju sabu karihahu tumha bala buddhi nidhāna।

आसिष देह गई सो हरषि चलेउ हनुमान।।2।।

āsiṣa deha gaī so haraṣi caleu hanumāna॥2॥

निसिचरि एक सिंधु महुँ रहई। करि माया नभु के खग गहई।।

nisicari eka siṃdhu mahu~ rahaī। kari māyā nabhu ke khaga gahaī॥

जीव जंतु जे गगन उड़ाहीं। जल बिलोकि तिन्ह कै परिछाहीं।।

jīva jaṃtu je gagana ur̤āhīṃ। jala biloki tinha kai parichāhīṃ॥

गहइ छाहँ सक सो न उड़ाई। एहि बिधि सदा गगनचर खाई।।

gahai chāha~ saka so na ur̤āī। ehi bidhi sadā gaganacara khāī॥

सोइ छल हनूमान कहँ कीन्हा। तासु कपटु कपि तुरतहिं चीन्हा।।

soi chala hanūmāna kaha~ kīnhā। tāsu kapaṭu kapi turatahiṃ cīnhā॥

ताहि मारि मारुतसुत बीरा। बारिधि पार गयउ मतिधीरा।।

tāhi māri mārutasuta bīrā। bāridhi pāra gayau matidhīrā॥

तहाँ जाइ देखी बन सोभा। गुंजत चंचरीक मधु लोभा।।

tahā~ jāi dekhī bana sobhā। guṃjata caṃcarīka madhu lobhā॥

नाना तरु फल फूल सुहाए। खग मृग बृंद देखि मन भाए।।

nānā taru phala phūla suhāe। khaga mṛga bṛṃda dekhi mana bhāe॥

सैल बिसाल देखि एक आगें। ता पर धाइ चढेउ भय त्यागें।।

saila bisāla dekhi eka āgeṃ। tā para dhāi caḍheu bhaya tyāgeṃ॥

उमा न कछु कपि कै अधिकाई। प्रभु प्रताप जो कालहि खाई।।

umā na kachu kapi kai adhikāī। prabhu pratāpa jo kālahi khāī॥

गिरि पर चढि लंका तेहिं देखी। कहि न जाइ अति दुर्ग बिसेषी।।

giri para caḍhi laṃkā tehiṃ dekhī। kahi na jāi ati durga biseṣī॥

अति उतंग जलनिधि चहु पासा। कनक कोट कर परम प्रकासा।।

ati utaṃga jalanidhi cahu pāsā। kanaka koṭa kara parama prakāsā॥

कनक कोट बिचित्र मनि कृत सुंदरायतना घना।

kanaka koṭa bicitra mani kṛta suṃdarāyatanā ghanā।

चउहट्ट हट्ट सुबट्ट बीथीं चारु पुर बहु बिधि बना।।

cauhaṭṭa haṭṭa subaṭṭa bīthīṃ cāru pura bahu bidhi banā॥

गज बाजि खच्चर निकर पदचर रथ बरूथिन्ह को गनै।।

gaja bāji khaccara nikara padacara ratha barūthinha ko ganai॥

बहुरूप निसिचर जूथ अतिबल सेन बरनत नहिं बनै।।

bahurūpa nisicara jūtha atibala sena baranata nahiṃ banai॥

बन बाग उपबन बाटिका सर कूप बापीं सोहहीं।

bana bāga upabana bāṭikā sara kūpa bāpīṃ sohahīṃ।

नर नाग सुर गंधर्ब कन्या रूप मुनि मन मोहहीं।।

nara nāga sura gaṃdharba kanyā rūpa muni mana mohahīṃ॥

कहुँ माल देह बिसाल सैल समान अतिबल गर्जहीं।

kahu~ māla deha bisāla saila samāna atibala garjahīṃ।

नाना अखारेन्ह भिरहिं बहु बिधि एक एकन्ह तर्जहीं।।

nānā akhārenha bhirahiṃ bahu bidhi eka ekanha tarjahīṃ॥

करि जतन भट कोटिन्ह बिकट तन नगर चहुँ दिसि रच्छहीं।

kari jatana bhaṭa koṭinha bikaṭa tana nagara cahu~ disi racchahīṃ।

कहुँ महिष मानषु धेनु खर अज खल निसाचर भच्छहीं।।

kahu~ mahiṣa mānaṣu dhenu khara aja khala nisācara bhacchahīṃ॥

एहि लागि तुलसीदास इन्ह की कथा कछु एक है कही।

ehi lāgi tulasīdāsa inha kī kathā kachu eka hai kahī।

रघुबीर सर तीरथ सरीरन्हि त्यागि गति पैहहिं सही।।

raghubīra sara tīratha sarīranhi tyāgi gati paihahiṃ sahī॥

पुर रखवारे देखि बहु कपि मन कीन्ह बिचार।

pura rakhavāre dekhi bahu kapi mana kīnha bicāra।

अति लघु रूप धरौं निसि नगर करौं पइसार।।3।।

ati laghu rūpa dharauṃ nisi nagara karauṃ paisāra॥3॥

मसक समान रूप कपि धरी। लंकहि चलेउ सुमिरि नरहरी।।

masaka samāna rūpa kapi dharī। laṃkahi caleu sumiri naraharī॥

नाम लंकिनी एक निसिचरी। सो कह चलेसि मोहि निंदरी।।

nāma laṃkinī eka nisicarī। so kaha calesi mohi niṃdarī॥

जानेहि नहीं मरमु सठ मोरा। मोर अहार जहाँ लगि चोरा।।

jānehi nahīṃ maramu saṭha morā। mora ahāra jahā~ lagi corā॥

मुठिका एक महा कपि हनी। रुधिर बमत धरनीं ढनमनी।।

muṭhikā eka mahā kapi hanī। rudhira bamata dharanīṃ ḍhanamanī॥

पुनि संभारि उठि सो लंका। जोरि पानि कर बिनय संसका।।

puni saṃbhāri uṭhi so laṃkā। jori pāni kara binaya saṃsakā॥

जब रावनहि ब्रह्म बर दीन्हा। चलत बिरंचि कहा मोहि चीन्हा।।

jaba rāvanahi brahma bara dīnhā। calata biraṃci kahā mohi cīnhā॥

बिकल होसि तैं कपि कें मारे। तब जानेसु निसिचर संघारे।।

bikala hosi taiṃ kapi keṃ māre। taba jānesu nisicara saṃghāre॥

तात मोर अति पुन्य बहूता। देखेउँ नयन राम कर दूता।।

tāta mora ati punya bahūtā। dekheu~ nayana rāma kara dūtā॥

तात स्वर्ग अपबर्ग सुख धरिअ तुला एक अंग।

tāta svarga apabarga sukha dharia tulā eka aṃga।

तूल न ताहि सकल मिलि जो सुख लव सतसंग।।4।।

tūla na tāhi sakala mili jo sukha lava satasaṃga॥4॥

प्रबिसि नगर कीजे सब काजा। हृदयँ राखि कौसलपुर राजा।।

prabisi nagara kīje saba kājā। hṛdaya~ rākhi kausalapura rājā॥

गरल सुधा रिपु करहिं मिताई। गोपद सिंधु अनल सितलाई।।

garala sudhā ripu karahiṃ mitāī। gopada siṃdhu anala sitalāī॥

गरुड़ सुमेरु रेनू सम ताही। राम कृपा करि चितवा जाही।।

garur̤a sumeru renū sama tāhī। rāma kṛpā kari citavā jāhī॥

अति लघु रूप धरेउ हनुमाना। पैठा नगर सुमिरि भगवाना।।

ati laghu rūpa dhareu hanumānā। paiṭhā nagara sumiri bhagavānā॥

मंदिर मंदिर प्रति करि सोधा। देखे जहँ तहँ अगनित जोधा।।

maṃdira maṃdira prati kari sodhā। dekhe jaha~ taha~ aganita jodhā॥

गयउ दसानन मंदिर माहीं। अति बिचित्र कहि जात सो नाहीं।।

gayau dasānana maṃdira māhīṃ। ati bicitra kahi jāta so nāhīṃ॥

सयन किए देखा कपि तेही। मंदिर महुँ न दीखि बैदेही।।

sayana kie dekhā kapi tehī। maṃdira mahu~ na dīkhi baidehī॥

भवन एक पुनि दीख सुहावा। हरि मंदिर तहँ भिन्न बनावा।।

bhavana eka puni dīkha suhāvā। hari maṃdira taha~ bhinna banāvā॥

रामायुध अंकित गृह सोभा बरनि न जाइ।

rāmāyudha aṃkita gṛha sobhā barani na jāi।

नव तुलसिका बृंद तहँ देखि हरषि कपिराइ।।5।।

nava tulasikā bṛṃda taha~ dekhi haraṣi kapirāi॥5॥

लंका निसिचर निकर निवासा। इहाँ कहाँ सज्जन कर बासा।।

laṃkā nisicara nikara nivāsā। ihā~ kahā~ sajjana kara bāsā॥

मन महुँ तरक करै कपि लागा। तेहीं समय बिभीषनु जागा।।

mana mahu~ taraka karai kapi lāgā। tehīṃ samaya bibhīṣanu jāgā॥

राम राम तेहिं सुमिरन कीन्हा। हृदयँ हरष कपि सज्जन चीन्हा।।

rāma rāma tehiṃ sumirana kīnhā। hṛdaya~ haraṣa kapi sajjana cīnhā॥

एहि सन हठि करिहउँ पहिचानी। साधु ते होइ न कारज हानी।।

ehi sana haṭhi karihau~ pahicānī। sādhu te hoi na kāraja hānī॥

बिप्र रुप धरि बचन सुनाए। सुनत बिभीषण उठि तहँ आए।।

bipra rupa dhari bacana sunāe। sunata bibhīṣaṇa uṭhi taha~ āe॥

करि प्रनाम पूँछी कुसलाई। बिप्र कहहु निज कथा बुझाई।।

kari pranāma pū~chī kusalāī। bipra kahahu nija kathā bujhāī॥

की तुम्ह हरि दासन्ह महँ कोई। मोरें हृदय प्रीति अति होई।।

kī tumha hari dāsanha maha~ koī। moreṃ hṛdaya prīti ati hoī॥

की तुम्ह रामु दीन अनुरागी। आयहु मोहि करन बड़भागी।।

kī tumha rāmu dīna anurāgī। āyahu mohi karana bar̤abhāgī॥

तब हनुमंत कही सब राम कथा निज नाम।

taba hanumaṃta kahī saba rāma kathā nija nāma।

सुनत जुगल तन पुलक मन मगन सुमिरि गुन ग्राम।।6।।

sunata jugala tana pulaka mana magana sumiri guna grāma॥6॥

सुनहु पवनसुत रहनि हमारी। जिमि दसनन्हि महुँ जीभ बिचारी।।

sunahu pavanasuta rahani hamārī। jimi dasananhi mahu~ jībha bicārī॥

तात कबहुँ मोहि जानि अनाथा। करिहहिं कृपा भानुकुल नाथा।।

tāta kabahu~ mohi jāni anāthā। karihahiṃ kṛpā bhānukula nāthā॥

तामस तनु कछु साधन नाहीं। प्रीति न पद सरोज मन माहीं।।

tāmasa tanu kachu sādhana nāhīṃ। prīti na pada saroja mana māhīṃ॥

अब मोहि भा भरोस हनुमंता। बिनु हरिकृपा मिलहिं नहिं संता।।

aba mohi bhā bharosa hanumaṃtā। binu harikṛpā milahiṃ nahiṃ saṃtā॥

जौ रघुबीर अनुग्रह कीन्हा। तौ तुम्ह मोहि दरसु हठि दीन्हा।।

jau raghubīra anugraha kīnhā। tau tumha mohi darasu haṭhi dīnhā॥

सुनहु बिभीषन प्रभु कै रीती। करहिं सदा सेवक पर प्रीती।।

sunahu bibhīṣana prabhu kai rītī। karahiṃ sadā sevaka para prītī॥

कहहु कवन मैं परम कुलीना। कपि चंचल सबहीं बिधि हीना।।

kahahu kavana maiṃ parama kulīnā। kapi caṃcala sabahīṃ bidhi hīnā॥

प्रात लेइ जो नाम हमारा। तेहि दिन ताहि न मिलै अहारा।।

prāta lei jo nāma hamārā। tehi dina tāhi na milai ahārā॥

अस मैं अधम सखा सुनु मोहू पर रघुबीर।

asa maiṃ adhama sakhā sunu mohū para raghubīra।

कीन्ही कृपा सुमिरि गुन भरे बिलोचन नीर।।7।।

kīnhī kṛpā sumiri guna bhare bilocana nīra॥7॥

जानतहूँ अस स्वामि बिसारी। फिरहिं ते काहे न होहिं दुखारी।।

jānatahū~ asa svāmi bisārī। phirahiṃ te kāhe na hohiṃ dukhārī॥

एहि बिधि कहत राम गुन ग्रामा। पावा अनिर्बाच्य बिश्रामा।।

ehi bidhi kahata rāma guna grāmā। pāvā anirbācya biśrāmā॥

पुनि सब कथा बिभीषन कही। जेहि बिधि जनकसुता तहँ रही।।

puni saba kathā bibhīṣana kahī। jehi bidhi janakasutā taha~ rahī॥

तब हनुमंत कहा सुनु भ्राता। देखी चहउँ जानकी माता।।

taba hanumaṃta kahā sunu bhrātā। dekhī cahau~ jānakī mātā॥

जुगुति बिभीषन सकल सुनाई। चलेउ पवनसुत बिदा कराई।।

juguti bibhīṣana sakala sunāī। caleu pavanasuta bidā karāī॥

करि सोइ रूप गयउ पुनि तहवाँ। बन असोक सीता रह जहवाँ।।

kari soi rūpa gayau puni tahavā~। bana asoka sītā raha jahavā~॥

देखि मनहि महुँ कीन्ह प्रनामा। बैठेहिं बीति जात निसि जामा।।

dekhi manahi mahu~ kīnha pranāmā। baiṭhehiṃ bīti jāta nisi jāmā॥

कृस तन सीस जटा एक बेनी। जपति हृदयँ रघुपति गुन श्रेनी।।

kṛsa tana sīsa jaṭā eka benī। japati hṛdaya~ raghupati guna śrenī॥

निज पद नयन दिएँ मन राम पद कमल लीन।

nija pada nayana die~ mana rāma pada kamala līna।

परम दुखी भा पवनसुत देखि जानकी दीन।।8।।

parama dukhī bhā pavanasuta dekhi jānakī dīna॥8॥

तरु पल्लव महुँ रहा लुकाई। करइ बिचार करौं का भाई।।

taru pallava mahu~ rahā lukāī। karai bicāra karauṃ kā bhāī॥

तेहि अवसर रावनु तहँ आवा। संग नारि बहु किएँ बनावा।।

tehi avasara rāvanu taha~ āvā। saṃga nāri bahu kie~ banāvā॥

बहु बिधि खल सीतहि समुझावा। साम दान भय भेद देखावा।।

bahu bidhi khala sītahi samujhāvā। sāma dāna bhaya bheda dekhāvā॥

कह रावनु सुनु सुमुखि सयानी। मंदोदरी आदि सब रानी।।

kaha rāvanu sunu sumukhi sayānī। maṃdodarī ādi saba rānī॥

तव अनुचरीं करउँ पन मोरा। एक बार बिलोकु मम ओरा।।

tava anucarīṃ karau~ pana morā। eka bāra biloku mama orā॥

तृन धरि ओट कहति बैदेही। सुमिरि अवधपति परम सनेही।।

tṛna dhari oṭa kahati baidehī। sumiri avadhapati parama sanehī॥

सुनु दसमुख खद्योत प्रकासा। कबहुँ कि नलिनी करइ बिकासा।।

sunu dasamukha khadyota prakāsā। kabahu~ ki nalinī karai bikāsā॥

अस मन समुझु कहति जानकी। खल सुधि नहिं रघुबीर बान की।।

asa mana samujhu kahati jānakī। khala sudhi nahiṃ raghubīra bāna kī॥

सठ सूने हरि आनेहि मोहि। अधम निलज्ज लाज नहिं तोही।।

saṭha sūne hari ānehi mohi। adhama nilajja lāja nahiṃ tohī॥

आपुहि सुनि खद्योत सम रामहि भानु समान।

āpuhi suni khadyota sama rāmahi bhānu samāna।

परुष बचन सुनि काढ़ि असि बोला अति खिसिआन।।9।।

paruṣa bacana suni kār̤hi asi bolā ati khisiāna॥9॥

सीता तैं मम कृत अपमाना। कटिहउँ तव सिर कठिन कृपाना।।

sītā taiṃ mama kṛta apamānā। kaṭihau~ tava sira kaṭhina kṛpānā॥

नाहिं त सपदि मानु मम बानी। सुमुखि होति न त जीवन हानी।।

nāhiṃ ta sapadi mānu mama bānī। sumukhi hoti na ta jīvana hānī॥

स्याम सरोज दाम सम सुंदर। प्रभु भुज करि कर सम दसकंधर।।

syāma saroja dāma sama suṃdara। prabhu bhuja kari kara sama dasakaṃdhara॥

सो भुज कंठ कि तव असि घोरा। सुनु सठ अस प्रवान पन मोरा।।

so bhuja kaṃṭha ki tava asi ghorā। sunu saṭha asa pravāna pana morā॥

चंद्रहास हरु मम परितापं। रघुपति बिरह अनल संजातं।।

caṃdrahāsa haru mama paritāpaṃ। raghupati biraha anala saṃjātaṃ॥

सीतल निसित बहसि बर धारा। कह सीता हरु मम दुख भारा।।

sītala nisita bahasi bara dhārā। kaha sītā haru mama dukha bhārā॥

सुनत बचन पुनि मारन धावा। मयतनयाँ कहि नीति बुझावा।।

sunata bacana puni mārana dhāvā। mayatanayā~ kahi nīti bujhāvā॥

कहेसि सकल निसिचरिन्ह बोलाई। सीतहि बहु बिधि त्रासहु जाई।।

kahesi sakala nisicarinha bolāī। sītahi bahu bidhi trāsahu jāī॥

मास दिवस महुँ कहा न माना। तौ मैं मारबि काढ़ि कृपाना।।

māsa divasa mahu~ kahā na mānā। tau maiṃ mārabi kār̤hi kṛpānā॥

भवन गयउ दसकंधर इहाँ पिसाचिनि बृंद।

bhavana gayau dasakaṃdhara ihā~ pisācini bṛṃda।

सीतहि त्रास देखावहि धरहिं रूप बहु मंद।।10।।

sītahi trāsa dekhāvahi dharahiṃ rūpa bahu maṃda॥10॥

त्रिजटा नाम राच्छसी एका। राम चरन रति निपुन बिबेका।।

trijaṭā nāma rācchasī ekā। rāma carana rati nipuna bibekā॥

सबन्हौ बोलि सुनाएसि सपना। सीतहि सेइ करहु हित अपना।।

sabanhau boli sunāesi sapanā। sītahi sei karahu hita apanā॥

सपनें बानर लंका जारी। जातुधान सेना सब मारी।।

sapaneṃ bānara laṃkā jārī। jātudhāna senā saba mārī॥

खर आरूढ़ नगन दससीसा। मुंडित सिर खंडित भुज बीसा।।

khara ārūr̤ha nagana dasasīsā। muṃḍita sira khaṃḍita bhuja bīsā॥

एहि बिधि सो दच्छिन दिसि जाई। लंका मनहुँ बिभीषन पाई।।

ehi bidhi so dacchina disi jāī। laṃkā manahu~ bibhīṣana pāī॥

नगर फिरी रघुबीर दोहाई। तब प्रभु सीता बोलि पठाई।।

nagara phirī raghubīra dohāī। taba prabhu sītā boli paṭhāī॥

यह सपना में कहउँ पुकारी। होइहि सत्य गएँ दिन चारी।।

yaha sapanā meṃ kahau~ pukārī। hoihi satya gae~ dina cārī॥

तासु बचन सुनि ते सब डरीं। जनकसुता के चरनन्हि परीं।।

tāsu bacana suni te saba ḍarīṃ। janakasutā ke carananhi parīṃ॥

जहँ तहँ गईं सकल तब सीता कर मन सोच।

jaha~ taha~ gaīṃ sakala taba sītā kara mana soca।

मास दिवस बीतें मोहि मारिहि निसिचर पोच।।11।।

māsa divasa bīteṃ mohi mārihi nisicara poca॥11॥

त्रिजटा सन बोली कर जोरी। मातु बिपति संगिनि तैं मोरी।।

trijaṭā sana bolī kara jorī। mātu bipati saṃgini taiṃ morī॥

तजौं देह करु बेगि उपाई। दुसहु बिरहु अब नहिं सहि जाई।।

tajauṃ deha karu begi upāī। dusahu birahu aba nahiṃ sahi jāī॥

आनि काठ रचु चिता बनाई। मातु अनल पुनि देहि लगाई।।

āni kāṭha racu citā banāī। mātu anala puni dehi lagāī॥

सत्य करहि मम प्रीति सयानी। सुनै को श्रवन सूल सम बानी।।

satya karahi mama prīti sayānī। sunai ko śravana sūla sama bānī॥

सुनत बचन पद गहि समुझाएसि। प्रभु प्रताप बल सुजसु सुनाएसि।।

sunata bacana pada gahi samujhāesi। prabhu pratāpa bala sujasu sunāesi॥

निसि न अनल मिल सुनु सुकुमारी। अस कहि सो निज भवन सिधारी।।

nisi na anala mila sunu sukumārī। asa kahi so nija bhavana sidhārī॥

कह सीता बिधि भा प्रतिकूला। मिलहि न पावक मिटिहि न सूला।।

kaha sītā bidhi bhā pratikūlā। milahi na pāvaka miṭihi na sūlā॥

देखिअत प्रगट गगन अंगारा। अवनि न आवत एकउ तारा।।

dekhiata pragaṭa gagana aṃgārā। avani na āvata ekau tārā॥

पावकमय ससि स्त्रवत न आगी। मानहुँ मोहि जानि हतभागी।।

pāvakamaya sasi stravata na āgī। mānahu~ mohi jāni hatabhāgī॥

सुनहि बिनय मम बिटप असोका। सत्य नाम करु हरु मम सोका।।

sunahi binaya mama biṭapa asokā। satya nāma karu haru mama sokā॥

नूतन किसलय अनल समाना। देहि अगिनि जनि करहि निदाना।।

nūtana kisalaya anala samānā। dehi agini jani karahi nidānā॥

देखि परम बिरहाकुल सीता। सो छन कपिहि कलप सम बीता।।

dekhi parama birahākula sītā। so chana kapihi kalapa sama bītā॥

कपि करि हृदयँ बिचार दीन्हि मुद्रिका डारी तब।

kapi kari hṛdaya~ bicāra dīnhi mudrikā ḍārī taba।

जनु असोक अंगार दीन्हि हरषि उठि कर गहेउ।।12।।

janu asoka aṃgāra dīnhi haraṣi uṭhi kara gaheu॥12॥

तब देखी मुद्रिका मनोहर। राम नाम अंकित अति सुंदर।।

taba dekhī mudrikā manohara। rāma nāma aṃkita ati suṃdara॥

चकित चितव मुदरी पहिचानी। हरष बिषाद हृदयँ अकुलानी।।

cakita citava mudarī pahicānī। haraṣa biṣāda hṛdaya~ akulānī॥

जीति को सकइ अजय रघुराई। माया तें असि रचि नहिं जाई।।

jīti ko sakai ajaya raghurāī। māyā teṃ asi raci nahiṃ jāī॥

सीता मन बिचार कर नाना। मधुर बचन बोलेउ हनुमाना।।

sītā mana bicāra kara nānā। madhura bacana boleu hanumānā॥

रामचंद्र गुन बरनैं लागा। सुनतहिं सीता कर दुख भागा।।

rāmacaṃdra guna baranaiṃ lāgā। sunatahiṃ sītā kara dukha bhāgā॥

लागीं सुनैं श्रवन मन लाई। आदिहु तें सब कथा सुनाई।।

lāgīṃ sunaiṃ śravana mana lāī। ādihu teṃ saba kathā sunāī॥

श्रवनामृत जेहिं कथा सुहाई। कहि सो प्रगट होति किन भाई।।

śravanāmṛta jehiṃ kathā suhāī। kahi so pragaṭa hoti kina bhāī॥

तब हनुमंत निकट चलि गयऊ। फिरि बैंठीं मन बिसमय भयऊ।।

taba hanumaṃta nikaṭa cali gayaū। phiri baiṃṭhīṃ mana bisamaya bhayaū॥

राम दूत मैं मातु जानकी। सत्य सपथ करुनानिधान की।।

rāma dūta maiṃ mātu jānakī। satya sapatha karunānidhāna kī॥

यह मुद्रिका मातु मैं आनी। दीन्हि राम तुम्ह कहँ सहिदानी।।

yaha mudrikā mātu maiṃ ānī। dīnhi rāma tumha kaha~ sahidānī॥

नर बानरहि संग कहु कैसें। कहि कथा भइ संगति जैसें।।

nara bānarahi saṃga kahu kaiseṃ। kahi kathā bhai saṃgati jaiseṃ॥

कपि के बचन सप्रेम सुनि उपजा मन बिस्वास।।

kapi ke bacana saprema suni upajā mana bisvāsa॥

जाना मन क्रम बचन यह कृपासिंधु कर दास।।13।।

jānā mana krama bacana yaha kṛpāsiṃdhu kara dāsa॥13॥

हरिजन जानि प्रीति अति गाढ़ी। सजल नयन पुलकावलि बाढ़ी।।

harijana jāni prīti ati gār̤hī। sajala nayana pulakāvali bār̤hī॥

बूड़त बिरह जलधि हनुमाना। भयउ तात मों कहुँ जलजाना।।

būr̤ata biraha jaladhi hanumānā। bhayau tāta moṃ kahu~ jalajānā॥

अब कहु कुसल जाउँ बलिहारी। अनुज सहित सुख भवन खरारी।।

aba kahu kusala jāu~ balihārī। anuja sahita sukha bhavana kharārī॥

कोमलचित कृपाल रघुराई। कपि केहि हेतु धरी निठुराई।।

komalacita kṛpāla raghurāī। kapi kehi hetu dharī niṭhurāī॥

सहज बानि सेवक सुख दायक। कबहुँक सुरति करत रघुनायक।।

sahaja bāni sevaka sukha dāyaka। kabahu~ka surati karata raghunāyaka॥

कबहुँ नयन मम सीतल ताता। होइहहि निरखि स्याम मृदु गाता।।

kabahu~ nayana mama sītala tātā। hoihahi nirakhi syāma mṛdu gātā॥

बचनु न आव नयन भरे बारी। अहह नाथ हौं निपट बिसारी।।

bacanu na āva nayana bhare bārī। ahaha nātha hauṃ nipaṭa bisārī॥

देखि परम बिरहाकुल सीता। बोला कपि मृदु बचन बिनीता।।

dekhi parama birahākula sītā। bolā kapi mṛdu bacana binītā॥

मातु कुसल प्रभु अनुज समेता। तव दुख दुखी सुकृपा निकेता।।

mātu kusala prabhu anuja sametā। tava dukha dukhī sukṛpā niketā॥

जनि जननी मानहु जियँ ऊना। तुम्ह ते प्रेमु राम कें दूना।।

jani jananī mānahu jiya~ ūnā। tumha te premu rāma keṃ dūnā॥

रघुपति कर संदेसु अब सुनु जननी धरि धीर।

raghupati kara saṃdesu aba sunu jananī dhari dhīra।

अस कहि कपि गद गद भयउ भरे बिलोचन नीर।।14।।

asa kahi kapi gada gada bhayau bhare bilocana nīra॥14॥

कहेउ राम बियोग तव सीता। मो कहुँ सकल भए बिपरीता।।

kaheu rāma biyoga tava sītā। mo kahu~ sakala bhae biparītā॥

नव तरु किसलय मनहुँ कृसानू। कालनिसा सम निसि ससि भानू।।

nava taru kisalaya manahu~ kṛsānū। kālanisā sama nisi sasi bhānū॥

कुबलय बिपिन कुंत बन सरिसा। बारिद तपत तेल जनु बरिसा।।

kubalaya bipina kuṃta bana sarisā। bārida tapata tela janu barisā॥

जे हित रहे करत तेइ पीरा। उरग स्वास सम त्रिबिध समीरा।।

je hita rahe karata tei pīrā। uraga svāsa sama tribidha samīrā॥

कहेहू तें कछु दुख घटि होई। काहि कहौं यह जान न कोई।।

kahehū teṃ kachu dukha ghaṭi hoī। kāhi kahauṃ yaha jāna na koī॥

तत्व प्रेम कर मम अरु तोरा। जानत प्रिया एकु मनु मोरा।।

tatva prema kara mama aru torā। jānata priyā eku manu morā॥

सो मनु सदा रहत तोहि पाहीं। जानु प्रीति रसु एतेनहि माहीं।।

so manu sadā rahata tohi pāhīṃ। jānu prīti rasu etenahi māhīṃ॥

प्रभु संदेसु सुनत बैदेही। मगन प्रेम तन सुधि नहिं तेही।।

prabhu saṃdesu sunata baidehī। magana prema tana sudhi nahiṃ tehī॥

कह कपि हृदयँ धीर धरु माता। सुमिरु राम सेवक सुखदाता।।

kaha kapi hṛdaya~ dhīra dharu mātā। sumiru rāma sevaka sukhadātā॥

उर आनहु रघुपति प्रभुताई। सुनि मम बचन तजहु कदराई।।

ura ānahu raghupati prabhutāī। suni mama bacana tajahu kadarāī॥

निसिचर निकर पतंग सम रघुपति बान कृसानु।

nisicara nikara pataṃga sama raghupati bāna kṛsānu।

जननी हृदयँ धीर धरु जरे निसाचर जानु।।15।।

jananī hṛdaya~ dhīra dharu jare nisācara jānu॥15॥

जौं रघुबीर होति सुधि पाई। करते नहिं बिलंबु रघुराई।।

jauṃ raghubīra hoti sudhi pāī। karate nahiṃ bilaṃbu raghurāī॥

रामबान रबि उएँ जानकी। तम बरूथ कहँ जातुधान की।।

rāmabāna rabi ue~ jānakī। tama barūtha kaha~ jātudhāna kī॥

अबहिं मातु मैं जाउँ लवाई। प्रभु आयसु नहिं राम दोहाई।।

abahiṃ mātu maiṃ jāu~ lavāī। prabhu āyasu nahiṃ rāma dohāī॥

कछुक दिवस जननी धरु धीरा। कपिन्ह सहित अइहहिं रघुबीरा।।

kachuka divasa jananī dharu dhīrā। kapinha sahita aihahiṃ raghubīrā॥

निसिचर मारि तोहि लै जैहहिं। तिहुँ पुर नारदादि जसु गैहहिं।।

nisicara māri tohi lai jaihahiṃ। tihu~ pura nāradādi jasu gaihahiṃ॥

हैं सुत कपि सब तुम्हहि समाना। जातुधान अति भट बलवाना।।

haiṃ suta kapi saba tumhahi samānā। jātudhāna ati bhaṭa balavānā॥

मोरें हृदय परम संदेहा। सुनि कपि प्रगट कीन्ह निज देहा।।

moreṃ hṛdaya parama saṃdehā। suni kapi pragaṭa kīnha nija dehā॥

कनक भूधराकार सरीरा। समर भयंकर अतिबल बीरा।।

kanaka bhūdharākāra sarīrā। samara bhayaṃkara atibala bīrā॥

सीता मन भरोस तब भयऊ। पुनि लघु रूप पवनसुत लयऊ।।

sītā mana bharosa taba bhayaū। puni laghu rūpa pavanasuta layaū॥

सुनु माता साखामृग नहिं बल बुद्धि बिसाल।

sunu mātā sākhāmṛga nahiṃ bala buddhi bisāla।

प्रभु प्रताप तें गरुड़हि खाइ परम लघु ब्याल।।16।।

prabhu pratāpa teṃ garur̤ahi khāi parama laghu byāla॥16॥

मन संतोष सुनत कपि बानी। भगति प्रताप तेज बल सानी।।

mana saṃtoṣa sunata kapi bānī। bhagati pratāpa teja bala sānī॥

आसिष दीन्हि रामप्रिय जाना। होहु तात बल सील निधाना।।

āsiṣa dīnhi rāmapriya jānā। hohu tāta bala sīla nidhānā॥

अजर अमर गुननिधि सुत होहू। करहुँ बहुत रघुनायक छोहू।।

ajara amara gunanidhi suta hohū। karahu~ bahuta raghunāyaka chohū॥

करहुँ कृपा प्रभु अस सुनि काना। निर्भर प्रेम मगन हनुमाना।।

karahu~ kṛpā prabhu asa suni kānā। nirbhara prema magana hanumānā॥

बार बार नाएसि पद सीसा। बोला बचन जोरि कर कीसा।।

bāra bāra nāesi pada sīsā। bolā bacana jori kara kīsā॥

अब कृतकृत्य भयउँ मैं माता। आसिष तव अमोघ बिख्याता।।

aba kṛtakṛtya bhayau~ maiṃ mātā। āsiṣa tava amogha bikhyātā॥

सुनहु मातु मोहि अतिसय भूखा। लागि देखि सुंदर फल रूखा।।

sunahu mātu mohi atisaya bhūkhā। lāgi dekhi suṃdara phala rūkhā॥

सुनु सुत करहिं बिपिन रखवारी। परम सुभट रजनीचर भारी।।

sunu suta karahiṃ bipina rakhavārī। parama subhaṭa rajanīcara bhārī॥

तिन्ह कर भय माता मोहि नाहीं। जौं तुम्ह सुख मानहु मन माहीं।।

tinha kara bhaya mātā mohi nāhīṃ। jauṃ tumha sukha mānahu mana māhīṃ॥

देखि बुद्धि बल निपुन कपि कहेउ जानकीं जाहु।

dekhi buddhi bala nipuna kapi kaheu jānakīṃ jāhu।

रघुपति चरन हृदयँ धरि तात मधुर फल खाहु।।17।।

raghupati carana hṛdaya~ dhari tāta madhura phala khāhu॥17॥

चलेउ नाइ सिरु पैठेउ बागा। फल खाएसि तरु तोरैं लागा।।

caleu nāi siru paiṭheu bāgā। phala khāesi taru toraiṃ lāgā॥

रहे तहाँ बहु भट रखवारे। कछु मारेसि कछु जाइ पुकारे।।

rahe tahā~ bahu bhaṭa rakhavāre। kachu māresi kachu jāi pukāre॥

नाथ एक आवा कपि भारी। तेहिं असोक बाटिका उजारी।।

nātha eka āvā kapi bhārī। tehiṃ asoka bāṭikā ujārī॥

खाएसि फल अरु बिटप उपारे। रच्छक मर्दि मर्दि महि डारे।।

khāesi phala aru biṭapa upāre। racchaka mardi mardi mahi ḍāre॥

सुनि रावन पठए भट नाना। तिन्हहि देखि गर्जेउ हनुमाना।।

suni rāvana paṭhae bhaṭa nānā। tinhahi dekhi garjeu hanumānā॥

सब रजनीचर कपि संघारे। गए पुकारत कछु अधमारे।।

saba rajanīcara kapi saṃghāre। gae pukārata kachu adhamāre॥

पुनि पठयउ तेहिं अच्छकुमारा। चला संग लै सुभट अपारा।।

puni paṭhayau tehiṃ acchakumārā। calā saṃga lai subhaṭa apārā॥

आवत देखि बिटप गहि तर्जा। ताहि निपाति महाधुनि गर्जा।।

āvata dekhi biṭapa gahi tarjā। tāhi nipāti mahādhuni garjā॥

कछु मारेसि कछु मर्देसि कछु मिलएसि धरि धूरि।

kachu māresi kachu mardesi kachu milaesi dhari dhūri।

कछु पुनि जाइ पुकारे प्रभु मर्कट बल भूरि।।18।।

kachu puni jāi pukāre prabhu markaṭa bala bhūri॥18॥

सुनि सुत बध लंकेस रिसाना। पठएसि मेघनाद बलवाना।।

suni suta badha laṃkesa risānā। paṭhaesi meghanāda balavānā॥

मारसि जनि सुत बांधेसु ताही। देखिअ कपिहि कहाँ कर आही।।

mārasi jani suta bāṃdhesu tāhī। dekhia kapihi kahā~ kara āhī॥

चला इंद्रजित अतुलित जोधा। बंधु निधन सुनि उपजा क्रोधा।।

calā iṃdrajita atulita jodhā। baṃdhu nidhana suni upajā krodhā॥

कपि देखा दारुन भट आवा। कटकटाइ गर्जा अरु धावा।।

kapi dekhā dāruna bhaṭa āvā। kaṭakaṭāi garjā aru dhāvā॥

अति बिसाल तरु एक उपारा। बिरथ कीन्ह लंकेस कुमारा।।

ati bisāla taru eka upārā। biratha kīnha laṃkesa kumārā॥

रहे महाभट ताके संगा। गहि गहि कपि मर्दइ निज अंगा।।

rahe mahābhaṭa tāke saṃgā। gahi gahi kapi mardai nija aṃgā॥

तिन्हहि निपाति ताहि सन बाजा। भिरे जुगल मानहुँ गजराजा।

tinhahi nipāti tāhi sana bājā। bhire jugala mānahu~ gajarājā।

मुठिका मारि चढ़ा तरु जाई। ताहि एक छन मुरुछा आई।।

muṭhikā māri car̤hā taru jāī। tāhi eka chana muruchā āī॥

उठि बहोरि कीन्हिसि बहु माया। जीति न जाइ प्रभंजन जाया।।

uṭhi bahori kīnhisi bahu māyā। jīti na jāi prabhaṃjana jāyā॥

ब्रह्म अस्त्र तेहिं साँधा कपि मन कीन्ह बिचार।

brahma astra tehiṃ sā~dhā kapi mana kīnha bicāra।

जौं न ब्रह्मसर मानउँ महिमा मिटइ अपार।।19।।

jauṃ na brahmasara mānau~ mahimā miṭai apāra॥19॥

ब्रह्मबान कपि कहुँ तेहि मारा। परतिहुँ बार कटकु संघारा।।

brahmabāna kapi kahu~ tehi mārā। paratihu~ bāra kaṭaku saṃghārā॥

तेहि देखा कपि मुरुछित भयऊ। नागपास बाँधेसि लै गयऊ।।

tehi dekhā kapi muruchita bhayaū। nāgapāsa bā~dhesi lai gayaū॥

जासु नाम जपि सुनहु भवानी। भव बंधन काटहिं नर ग्यानी।।

jāsu nāma japi sunahu bhavānī। bhava baṃdhana kāṭahiṃ nara gyānī॥

तासु दूत कि बंध तरु आवा। प्रभु कारज लगि कपिहिं बँधावा।।

tāsu dūta ki baṃdha taru āvā। prabhu kāraja lagi kapihiṃ ba~dhāvā॥

कपि बंधन सुनि निसिचर धाए। कौतुक लागि सभाँ सब आए।।

kapi baṃdhana suni nisicara dhāe। kautuka lāgi sabhā~ saba āe॥

दसमुख सभा दीखि कपि जाई। कहि न जाइ कछु अति प्रभुताई।।

dasamukha sabhā dīkhi kapi jāī। kahi na jāi kachu ati prabhutāī॥

कर जोरें सुर दिसिप बिनीता। भृकुटि बिलोकत सकल सभीता।।

kara joreṃ sura disipa binītā। bhṛkuṭi bilokata sakala sabhītā॥

देखि प्रताप न कपि मन संका। जिमि अहिगन महुँ गरुड़ असंका।।

dekhi pratāpa na kapi mana saṃkā। jimi ahigana mahu~ garur̤a asaṃkā॥

कपिहि बिलोकि दसानन बिहसा कहि दुर्बाद।

kapihi biloki dasānana bihasā kahi durbāda।

सुत बध सुरति कीन्हि पुनि उपजा हृदयँ बिषाद।।20।।

suta badha surati kīnhi puni upajā hṛdaya~ biṣāda॥20॥

कह लंकेस कवन तैं कीसा। केहिं के बल घालेहि बन खीसा।।

kaha laṃkesa kavana taiṃ kīsā। kehiṃ ke bala ghālehi bana khīsā॥

की धौं श्रवन सुनेहि नहिं मोही। देखउँ अति असंक सठ तोही।।

kī dhauṃ śravana sunehi nahiṃ mohī। dekhau~ ati asaṃka saṭha tohī॥

मारे निसिचर केहिं अपराधा। कहु सठ तोहि न प्रान कइ बाधा।।

māre nisicara kehiṃ aparādhā। kahu saṭha tohi na prāna kai bādhā॥

सुन रावन ब्रह्मांड निकाया। पाइ जासु बल बिरचित माया।।

suna rāvana brahmāṃḍa nikāyā। pāi jāsu bala biracita māyā॥

जाकें बल बिरंचि हरि ईसा। पालत सृजत हरत दससीसा।

jākeṃ bala biraṃci hari īsā। pālata sṛjata harata dasasīsā।

जा बल सीस धरत सहसानन। अंडकोस समेत गिरि कानन।।

jā bala sīsa dharata sahasānana। aṃḍakosa sameta giri kānana॥

धरइ जो बिबिध देह सुरत्राता। तुम्ह ते सठन्ह सिखावनु दाता।

dharai jo bibidha deha suratrātā। tumha te saṭhanha sikhāvanu dātā।

हर कोदंड कठिन जेहि भंजा। तेहि समेत नृप दल मद गंजा।।

hara kodaṃḍa kaṭhina jehi bhaṃjā। tehi sameta nṛpa dala mada gaṃjā॥

खर दूषन त्रिसिरा अरु बाली। बधे सकल अतुलित बलसाली।।

khara dūṣana trisirā aru bālī। badhe sakala atulita balasālī॥

जाके बल लवलेस तें जितेहु चराचर झारि।

jāke bala lavalesa teṃ jitehu carācara jhāri।

तासु दूत मैं जा करि हरि आनेहु प्रिय नारि।।21।।

tāsu dūta maiṃ jā kari hari ānehu priya nāri॥21॥

जानउँ मैं तुम्हारि प्रभुताई। सहसबाहु सन परी लराई।।

jānau~ maiṃ tumhāri prabhutāī। sahasabāhu sana parī larāī॥

समर बालि सन करि जसु पावा। सुनि कपि बचन बिहसि बिहरावा।।

samara bāli sana kari jasu pāvā। suni kapi bacana bihasi biharāvā॥

खायउँ फल प्रभु लागी भूँखा। कपि सुभाव तें तोरेउँ रूखा।।

khāyau~ phala prabhu lāgī bhū~khā। kapi subhāva teṃ toreu~ rūkhā॥

सब कें देह परम प्रिय स्वामी। मारहिं मोहि कुमारग गामी।।

saba keṃ deha parama priya svāmī। mārahiṃ mohi kumāraga gāmī॥

जिन्ह मोहि मारा ते मैं मारे। तेहि पर बाँधेउ तनयँ तुम्हारे।।

jinha mohi mārā te maiṃ māre। tehi para bā~dheu tanaya~ tumhāre॥

मोहि न कछु बाँधे कइ लाजा। कीन्ह चहउँ निज प्रभु कर काजा।।

mohi na kachu bā~dhe kai lājā। kīnha cahau~ nija prabhu kara kājā॥

बिनती करउँ जोरि कर रावन। सुनहु मान तजि मोर सिखावन।।

binatī karau~ jori kara rāvana। sunahu māna taji mora sikhāvana॥

देखहु तुम्ह निज कुलहि बिचारी। भ्रम तजि भजहु भगत भय हारी।।

dekhahu tumha nija kulahi bicārī। bhrama taji bhajahu bhagata bhaya hārī॥

जाकें डर अति काल डेराई। जो सुर असुर चराचर खाई।।

jākeṃ ḍara ati kāla ḍerāī। jo sura asura carācara khāī॥

तासों बयरु कबहुँ नहिं कीजै। मोरे कहें जानकी दीजै।।

tāsoṃ bayaru kabahu~ nahiṃ kījai। more kaheṃ jānakī dījai॥

प्रनतपाल रघुनायक करुना सिंधु खरारि।

pranatapāla raghunāyaka karunā siṃdhu kharāri।

गएँ सरन प्रभु राखिहैं तव अपराध बिसारि।।22।।

gae~ sarana prabhu rākhihaiṃ tava aparādha bisāri॥22॥

राम चरन पंकज उर धरहू। लंका अचल राज तुम्ह करहू।।

rāma carana paṃkaja ura dharahū। laṃkā acala rāja tumha karahū॥

रिषि पुलिस्त जसु बिमल मंयका। तेहि ससि महुँ जनि होहु कलंका।।

riṣi pulista jasu bimala maṃyakā। tehi sasi mahu~ jani hohu kalaṃkā॥

राम नाम बिनु गिरा न सोहा। देखु बिचारि त्यागि मद मोहा।।

rāma nāma binu girā na sohā। dekhu bicāri tyāgi mada mohā॥

बसन हीन नहिं सोह सुरारी। सब भूषण भूषित बर नारी।।

basana hīna nahiṃ soha surārī। saba bhūṣaṇa bhūṣita bara nārī॥

राम बिमुख संपति प्रभुताई। जाइ रही पाई बिनु पाई।।

rāma bimukha saṃpati prabhutāī। jāi rahī pāī binu pāī॥

सजल मूल जिन्ह सरितन्ह नाहीं। बरषि गए पुनि तबहिं सुखाहीं।।

sajala mūla jinha saritanha nāhīṃ। baraṣi gae puni tabahiṃ sukhāhīṃ॥

सुनु दसकंठ कहउँ पन रोपी। बिमुख राम त्राता नहिं कोपी।।

sunu dasakaṃṭha kahau~ pana ropī। bimukha rāma trātā nahiṃ kopī॥

संकर सहस बिष्नु अज तोही। सकहिं न राखि राम कर द्रोही।।

saṃkara sahasa biṣnu aja tohī। sakahiṃ na rākhi rāma kara drohī॥

मोहमूल बहु सूल प्रद त्यागहु तम अभिमान।

mohamūla bahu sūla prada tyāgahu tama abhimāna।

भजहु राम रघुनायक कृपा सिंधु भगवान।।23।।

bhajahu rāma raghunāyaka kṛpā siṃdhu bhagavāna॥23॥

जदपि कहि कपि अति हित बानी। भगति बिबेक बिरति नय सानी।।

jadapi kahi kapi ati hita bānī। bhagati bibeka birati naya sānī॥

बोला बिहसि महा अभिमानी। मिला हमहि कपि गुर बड़ ग्यानी।।

bolā bihasi mahā abhimānī। milā hamahi kapi gura bar̤a gyānī॥

मृत्यु निकट आई खल तोही। लागेसि अधम सिखावन मोही।।

mṛtyu nikaṭa āī khala tohī। lāgesi adhama sikhāvana mohī॥

उलटा होइहि कह हनुमाना। मतिभ्रम तोर प्रगट मैं जाना।।

ulaṭā hoihi kaha hanumānā। matibhrama tora pragaṭa maiṃ jānā॥

सुनि कपि बचन बहुत खिसिआना। बेगि न हरहुँ मूढ़ कर प्राना।।

suni kapi bacana bahuta khisiānā। begi na harahu~ mūr̤ha kara prānā॥

सुनत निसाचर मारन धाए। सचिवन्ह सहित बिभीषनु आए।

sunata nisācara mārana dhāe। sacivanha sahita bibhīṣanu āe।

नाइ सीस करि बिनय बहूता। नीति बिरोध न मारिअ दूता।।

nāi sīsa kari binaya bahūtā। nīti birodha na māria dūtā॥

आन दंड कछु करिअ गोसाँई। सबहीं कहा मंत्र भल भाई।।

āna daṃḍa kachu karia gosā~ī। sabahīṃ kahā maṃtra bhala bhāī॥

सुनत बिहसि बोला दसकंधर। अंग भंग करि पठइअ बंदर।।

sunata bihasi bolā dasakaṃdhara। aṃga bhaṃga kari paṭhaia baṃdara॥

कपि कें ममता पूँछ पर सबहि कहउँ समुझाइ।

kapi keṃ mamatā pū~cha para sabahi kahau~ samujhāi।

तेल बोरि पट बाँधि पुनि पावक देहु लगाइ।।24।।

tela bori paṭa bā~dhi puni pāvaka dehu lagāi॥24॥

पूँछहीन बानर तहँ जाइहि। तब सठ निज नाथहि लइ आइहि।।

pū~chahīna bānara taha~ jāihi। taba saṭha nija nāthahi lai āihi॥

जिन्ह कै कीन्हसि बहुत बड़ाई। देखेउँमैं तिन्ह कै प्रभुताई।।

jinha kai kīnhasi bahuta bar̤āī। dekheu~maiṃ tinha kai prabhutāī॥

बचन सुनत कपि मन मुसुकाना। भइ सहाय सारद मैं जाना।।

bacana sunata kapi mana musukānā। bhai sahāya sārada maiṃ jānā॥

जातुधान सुनि रावन बचना। लागे रचैं मूढ़ सोइ रचना।।

jātudhāna suni rāvana bacanā। lāge racaiṃ mūr̤ha soi racanā॥

रहा न नगर बसन घृत तेला। बाढ़ी पूँछ कीन्ह कपि खेला।।

rahā na nagara basana ghṛta telā। bār̤hī pū~cha kīnha kapi khelā॥

कौतुक कहँ आए पुरबासी। मारहिं चरन करहिं बहु हाँसी।।

kautuka kaha~ āe purabāsī। mārahiṃ carana karahiṃ bahu hā~sī॥

बाजहिं ढोल देहिं सब तारी। नगर फेरि पुनि पूँछ प्रजारी।।

bājahiṃ ḍhola dehiṃ saba tārī। nagara pheri puni pū~cha prajārī॥

पावक जरत देखि हनुमंता। भयउ परम लघु रुप तुरंता।।

pāvaka jarata dekhi hanumaṃtā। bhayau parama laghu rupa turaṃtā॥

निबुकि चढ़ेउ कपि कनक अटारीं। भई सभीत निसाचर नारीं।।

nibuki car̤heu kapi kanaka aṭārīṃ। bhaī sabhīta nisācara nārīṃ॥

हरि प्रेरित तेहि अवसर चले मरुत उनचास।

hari prerita tehi avasara cale maruta unacāsa।

अट्टहास करि गर्ज़ा कपि बढ़ि लाग अकास।।25।।

aṭṭahāsa kari garzā kapi bar̤hi lāga akāsa॥25॥

देह बिसाल परम हरुआई। मंदिर तें मंदिर चढ़ धाई।।

deha bisāla parama haruāī। maṃdira teṃ maṃdira car̤ha dhāī॥

जरइ नगर भा लोग बिहाला। झपट लपट बहु कोटि कराला।।

jarai nagara bhā loga bihālā। jhapaṭa lapaṭa bahu koṭi karālā॥

तात मातु हा सुनिअ पुकारा। एहि अवसर को हमहि उबारा।।

tāta mātu hā sunia pukārā। ehi avasara ko hamahi ubārā॥

हम जो कहा यह कपि नहिं होई। बानर रूप धरें सुर कोई।।

hama jo kahā yaha kapi nahiṃ hoī। bānara rūpa dhareṃ sura koī॥

साधु अवग्या कर फलु ऐसा। जरइ नगर अनाथ कर जैसा।।

sādhu avagyā kara phalu aisā। jarai nagara anātha kara jaisā॥

जारा नगरु निमिष एक माहीं। एक बिभीषन कर गृह नाहीं।।

jārā nagaru nimiṣa eka māhīṃ। eka bibhīṣana kara gṛha nāhīṃ॥

ता कर दूत अनल जेहिं सिरिजा। जरा न सो तेहि कारन गिरिजा।।

tā kara dūta anala jehiṃ sirijā। jarā na so tehi kārana girijā॥

उलटि पलटि लंका सब जारी। कूदि परा पुनि सिंधु मझारी।।

ulaṭi palaṭi laṃkā saba jārī। kūdi parā puni siṃdhu majhārī॥

पूँछ बुझाइ खोइ श्रम धरि लघु रूप बहोरि।

pū~cha bujhāi khoi śrama dhari laghu rūpa bahori।

जनकसुता के आगें ठाढ़ भयउ कर जोरि।।26।।

janakasutā ke āgeṃ ṭhār̤ha bhayau kara jori॥26॥

मातु मोहि दीजे कछु चीन्हा। जैसें रघुनायक मोहि दीन्हा।।

mātu mohi dīje kachu cīnhā। jaiseṃ raghunāyaka mohi dīnhā॥

चूड़ामनि उतारि तब दयऊ। हरष समेत पवनसुत लयऊ।।

cūr̤āmani utāri taba dayaū। haraṣa sameta pavanasuta layaū॥

कहेहु तात अस मोर प्रनामा। सब प्रकार प्रभु पूरनकामा।।

kahehu tāta asa mora pranāmā। saba prakāra prabhu pūranakāmā॥

दीन दयाल बिरिदु संभारी। हरहु नाथ मम संकट भारी।।

dīna dayāla biridu saṃbhārī। harahu nātha mama saṃkaṭa bhārī॥

तात सक्रसुत कथा सुनाएहु। बान प्रताप प्रभुहि समुझाएहु।।

tāta sakrasuta kathā sunāehu। bāna pratāpa prabhuhi samujhāehu॥

मास दिवस महुँ नाथु न आवा। तौ पुनि मोहि जिअत नहिं पावा।।

māsa divasa mahu~ nāthu na āvā। tau puni mohi jiata nahiṃ pāvā॥

कहु कपि केहि बिधि राखौं प्राना। तुम्हहू तात कहत अब जाना।।

kahu kapi kehi bidhi rākhauṃ prānā। tumhahū tāta kahata aba jānā॥

तोहि देखि सीतलि भइ छाती। पुनि मो कहुँ सोइ दिनु सो राती।।

tohi dekhi sītali bhai chātī। puni mo kahu~ soi dinu so rātī॥

जनकसुतहि समुझाइ करि बहु बिधि धीरजु दीन्ह।

janakasutahi samujhāi kari bahu bidhi dhīraju dīnha।

चरन कमल सिरु नाइ कपि गवनु राम पहिं कीन्ह।।27।।

carana kamala siru nāi kapi gavanu rāma pahiṃ kīnha॥27॥

चलत महाधुनि गर्जेसि भारी। गर्भ स्त्रवहिं सुनि निसिचर नारी।।

calata mahādhuni garjesi bhārī। garbha stravahiṃ suni nisicara nārī॥

नाघि सिंधु एहि पारहि आवा। सबद किलकिला कपिन्ह सुनावा।।

nāghi siṃdhu ehi pārahi āvā। sabada kilakilā kapinha sunāvā॥

हरषे सब बिलोकि हनुमाना। नूतन जन्म कपिन्ह तब जाना।।

haraṣe saba biloki hanumānā। nūtana janma kapinha taba jānā॥

मुख प्रसन्न तन तेज बिराजा। कीन्हेसि रामचन्द्र कर काजा।।

mukha prasanna tana teja birājā। kīnhesi rāmacandra kara kājā॥

मिले सकल अति भए सुखारी। तलफत मीन पाव जिमि बारी।।

mile sakala ati bhae sukhārī। talaphata mīna pāva jimi bārī॥

चले हरषि रघुनायक पासा। पूँछत कहत नवल इतिहासा।।

cale haraṣi raghunāyaka pāsā। pū~chata kahata navala itihāsā॥

तब मधुबन भीतर सब आए। अंगद संमत मधु फल खाए।।

taba madhubana bhītara saba āe। aṃgada saṃmata madhu phala khāe॥

रखवारे जब बरजन लागे। मुष्टि प्रहार हनत सब भागे।।

rakhavāre jaba barajana lāge। muṣṭi prahāra hanata saba bhāge॥

जाइ पुकारे ते सब बन उजार जुबराज।

jāi pukāre te saba bana ujāra jubarāja।

सुनि सुग्रीव हरष कपि करि आए प्रभु काज।।28।।

suni sugrīva haraṣa kapi kari āe prabhu kāja॥28॥

जौं न होति सीता सुधि पाई। मधुबन के फल सकहिं कि खाई।।

jauṃ na hoti sītā sudhi pāī। madhubana ke phala sakahiṃ ki khāī॥

एहि बिधि मन बिचार कर राजा। आइ गए कपि सहित समाजा।।

ehi bidhi mana bicāra kara rājā। āi gae kapi sahita samājā॥

आइ सबन्हि नावा पद सीसा। मिलेउ सबन्हि अति प्रेम कपीसा।।

āi sabanhi nāvā pada sīsā। mileu sabanhi ati prema kapīsā॥

पूँछी कुसल कुसल पद देखी। राम कृपाँ भा काजु बिसेषी।।

pū~chī kusala kusala pada dekhī। rāma kṛpā~ bhā kāju biseṣī॥

नाथ काजु कीन्हेउ हनुमाना। राखे सकल कपिन्ह के प्राना।।

nātha kāju kīnheu hanumānā। rākhe sakala kapinha ke prānā॥

सुनि सुग्रीव बहुरि तेहि मिलेऊ। कपिन्ह सहित रघुपति पहिं चलेऊ।

suni sugrīva bahuri tehi mileū। kapinha sahita raghupati pahiṃ caleū।

राम कपिन्ह जब आवत देखा। किएँ काजु मन हरष बिसेषा।।

rāma kapinha jaba āvata dekhā। kie~ kāju mana haraṣa biseṣā॥

फटिक सिला बैठे द्वौ भाई। परे सकल कपि चरनन्हि जाई।।

phaṭika silā baiṭhe dvau bhāī। pare sakala kapi carananhi jāī॥

प्रीति सहित सब भेटे रघुपति करुना पुंज।

prīti sahita saba bheṭe raghupati karunā puṃja।

पूँछी कुसल नाथ अब कुसल देखि पद कंज।।29।।

pū~chī kusala nātha aba kusala dekhi pada kaṃja॥29॥

जामवंत कह सुनु रघुराया। जा पर नाथ करहु तुम्ह दाया।।

jāmavaṃta kaha sunu raghurāyā। jā para nātha karahu tumha dāyā॥

ताहि सदा सुभ कुसल निरंतर। सुर नर मुनि प्रसन्न ता ऊपर।।

tāhi sadā subha kusala niraṃtara। sura nara muni prasanna tā ūpara॥

सोइ बिजई बिनई गुन सागर। तासु सुजसु त्रेलोक उजागर।।

soi bijaī binaī guna sāgara। tāsu sujasu treloka ujāgara॥

प्रभु कीं कृपा भयउ सबु काजू। जन्म हमार सुफल भा आजू।।

prabhu kīṃ kṛpā bhayau sabu kājū। janma hamāra suphala bhā ājū॥

नाथ पवनसुत कीन्हि जो करनी। सहसहुँ मुख न जाइ सो बरनी।।

nātha pavanasuta kīnhi jo karanī। sahasahu~ mukha na jāi so baranī॥

पवनतनय के चरित सुहाए। जामवंत रघुपतिहि सुनाए।।

pavanatanaya ke carita suhāe। jāmavaṃta raghupatihi sunāe॥

सुनत कृपानिधि मन अति भाए। पुनि हनुमान हरषि हियँ लाए।।

sunata kṛpānidhi mana ati bhāe। puni hanumāna haraṣi hiya~ lāe॥

कहहु तात केहि भाँति जानकी। रहति करति रच्छा स्वप्रान की।।

kahahu tāta kehi bhā~ti jānakī। rahati karati racchā svaprāna kī॥

नाम पाहरु दिवस निसि ध्यान तुम्हार कपाट।

nāma pāharu divasa nisi dhyāna tumhāra kapāṭa।

लोचन निज पद जंत्रित जाहिं प्रान केहिं बाट।।30।।

locana nija pada jaṃtrita jāhiṃ prāna kehiṃ bāṭa॥30॥

चलत मोहि चूड़ामनि दीन्ही। रघुपति हृदयँ लाइ सोइ लीन्ही।।

calata mohi cūr̤āmani dīnhī। raghupati hṛdaya~ lāi soi līnhī॥

नाथ जुगल लोचन भरि बारी। बचन कहे कछु जनककुमारी।।

nātha jugala locana bhari bārī। bacana kahe kachu janakakumārī॥

अनुज समेत गहेहु प्रभु चरना। दीन बंधु प्रनतारति हरना।।

anuja sameta gahehu prabhu caranā। dīna baṃdhu pranatārati haranā॥

मन क्रम बचन चरन अनुरागी। केहि अपराध नाथ हौं त्यागी।।

mana krama bacana carana anurāgī। kehi aparādha nātha hauṃ tyāgī॥

अवगुन एक मोर मैं माना। बिछुरत प्रान न कीन्ह पयाना।।

avaguna eka mora maiṃ mānā। bichurata prāna na kīnha payānā॥

नाथ सो नयनन्हि को अपराधा। निसरत प्रान करिहिं हठि बाधा।।

nātha so nayananhi ko aparādhā। nisarata prāna karihiṃ haṭhi bādhā॥

बिरह अगिनि तनु तूल समीरा। स्वास जरइ छन माहिं सरीरा।।

biraha agini tanu tūla samīrā। svāsa jarai chana māhiṃ sarīrā॥

नयन स्त्रवहि जलु निज हित लागी। जरैं न पाव देह बिरहागी।

nayana stravahi jalu nija hita lāgī। jaraiṃ na pāva deha birahāgī।

सीता के अति बिपति बिसाला। बिनहिं कहें भलि दीनदयाला।।

sītā ke ati bipati bisālā। binahiṃ kaheṃ bhali dīnadayālā॥

निमिष निमिष करुनानिधि जाहिं कलप सम बीति।

nimiṣa nimiṣa karunānidhi jāhiṃ kalapa sama bīti।

बेगि चलिय प्रभु आनिअ भुज बल खल दल जीति।।31।।

begi caliya prabhu ānia bhuja bala khala dala jīti॥31॥

सुनि सीता दुख प्रभु सुख अयना। भरि आए जल राजिव नयना।।

suni sītā dukha prabhu sukha ayanā। bhari āe jala rājiva nayanā॥

बचन काँय मन मम गति जाही। सपनेहुँ बूझिअ बिपति कि ताही।।

bacana kā~ya mana mama gati jāhī। sapanehu~ būjhia bipati ki tāhī॥

कह हनुमंत बिपति प्रभु सोई। जब तव सुमिरन भजन न होई।।

kaha hanumaṃta bipati prabhu soī। jaba tava sumirana bhajana na hoī॥

केतिक बात प्रभु जातुधान की। रिपुहि जीति आनिबी जानकी।।

ketika bāta prabhu jātudhāna kī। ripuhi jīti ānibī jānakī॥

सुनु कपि तोहि समान उपकारी। नहिं कोउ सुर नर मुनि तनुधारी।।

sunu kapi tohi samāna upakārī। nahiṃ kou sura nara muni tanudhārī॥

प्रति उपकार करौं का तोरा। सनमुख होइ न सकत मन मोरा।।

prati upakāra karauṃ kā torā। sanamukha hoi na sakata mana morā॥

सुनु सुत उरिन मैं नाहीं। देखेउँ करि बिचार मन माहीं।।

sunu suta urina maiṃ nāhīṃ। dekheu~ kari bicāra mana māhīṃ॥

पुनि पुनि कपिहि चितव सुरत्राता। लोचन नीर पुलक अति गाता।।

puni puni kapihi citava suratrātā। locana nīra pulaka ati gātā॥

सुनि प्रभु बचन बिलोकि मुख गात हरषि हनुमंत।

suni prabhu bacana biloki mukha gāta haraṣi hanumaṃta।

चरन परेउ प्रेमाकुल त्राहि त्राहि भगवंत।।32।।

carana pareu premākula trāhi trāhi bhagavaṃta॥32॥

बार बार प्रभु चहइ उठावा। प्रेम मगन तेहि उठब न भावा।।

bāra bāra prabhu cahai uṭhāvā। prema magana tehi uṭhaba na bhāvā॥

प्रभु कर पंकज कपि कें सीसा। सुमिरि सो दसा मगन गौरीसा।।

prabhu kara paṃkaja kapi keṃ sīsā। sumiri so dasā magana gaurīsā॥

सावधान मन करि पुनि संकर। लागे कहन कथा अति सुंदर।।

sāvadhāna mana kari puni saṃkara। lāge kahana kathā ati suṃdara॥

कपि उठाइ प्रभु हृदयँ लगावा। कर गहि परम निकट बैठावा।।

kapi uṭhāi prabhu hṛdaya~ lagāvā। kara gahi parama nikaṭa baiṭhāvā॥

कहु कपि रावन पालित लंका। केहि बिधि दहेउ दुर्ग अति बंका।।

kahu kapi rāvana pālita laṃkā। kehi bidhi daheu durga ati baṃkā॥

प्रभु प्रसन्न जाना हनुमाना। बोला बचन बिगत अभिमाना।।

prabhu prasanna jānā hanumānā। bolā bacana bigata abhimānā॥

साखामृग के बड़ि मनुसाई। साखा तें साखा पर जाई।।

sākhāmṛga ke bar̤i manusāī। sākhā teṃ sākhā para jāī॥

नाघि सिंधु हाटकपुर जारा। निसिचर गन बिधि बिपिन उजारा।

nāghi siṃdhu hāṭakapura jārā। nisicara gana bidhi bipina ujārā।

सो सब तव प्रताप रघुराई। नाथ न कछू मोरि प्रभुताई।।

so saba tava pratāpa raghurāī। nātha na kachū mori prabhutāī॥

ता कहुँ प्रभु कछु अगम नहिं जा पर तुम्ह अनुकुल।

tā kahu~ prabhu kachu agama nahiṃ jā para tumha anukula।

तब प्रभावँ बड़वानलहिं जारि सकइ खलु तूल।।33।।

taba prabhāva~ bar̤avānalahiṃ jāri sakai khalu tūla॥33॥

नाथ भगति अति सुखदायनी। देहु कृपा करि अनपायनी।।

nātha bhagati ati sukhadāyanī। dehu kṛpā kari anapāyanī॥

सुनि प्रभु परम सरल कपि बानी। एवमस्तु तब कहेउ भवानी।।

suni prabhu parama sarala kapi bānī। evamastu taba kaheu bhavānī॥

उमा राम सुभाउ जेहिं जाना। ताहि भजनु तजि भाव न आना।।

umā rāma subhāu jehiṃ jānā। tāhi bhajanu taji bhāva na ānā॥

यह संवाद जासु उर आवा। रघुपति चरन भगति सोइ पावा।।

yaha saṃvāda jāsu ura āvā। raghupati carana bhagati soi pāvā॥

सुनि प्रभु बचन कहहिं कपिबृंदा। जय जय जय कृपाल सुखकंदा।।

suni prabhu bacana kahahiṃ kapibṛṃdā। jaya jaya jaya kṛpāla sukhakaṃdā॥

तब रघुपति कपिपतिहि बोलावा। कहा चलैं कर करहु बनावा।।

taba raghupati kapipatihi bolāvā। kahā calaiṃ kara karahu banāvā॥

अब बिलंबु केहि कारन कीजे। तुरत कपिन्ह कहुँ आयसु दीजे।।

aba bilaṃbu kehi kārana kīje। turata kapinha kahu~ āyasu dīje॥

कौतुक देखि सुमन बहु बरषी। नभ तें भवन चले सुर हरषी।।

kautuka dekhi sumana bahu baraṣī। nabha teṃ bhavana cale sura haraṣī॥

कपिपति बेगि बोलाए आए जूथप जूथ।

kapipati begi bolāe āe jūthapa jūtha।

नाना बरन अतुल बल बानर भालु बरूथ।।34।।

nānā barana atula bala bānara bhālu barūtha॥34॥

प्रभु पद पंकज नावहिं सीसा। गरजहिं भालु महाबल कीसा।।

prabhu pada paṃkaja nāvahiṃ sīsā। garajahiṃ bhālu mahābala kīsā॥

देखी राम सकल कपि सेना। चितइ कृपा करि राजिव नैना।।

dekhī rāma sakala kapi senā। citai kṛpā kari rājiva nainā॥

राम कृपा बल पाइ कपिंदा। भए पच्छजुत मनहुँ गिरिंदा।।

rāma kṛpā bala pāi kapiṃdā। bhae pacchajuta manahu~ giriṃdā॥

हरषि राम तब कीन्ह पयाना। सगुन भए सुंदर सुभ नाना।।

haraṣi rāma taba kīnha payānā। saguna bhae suṃdara subha nānā॥

जासु सकल मंगलमय कीती। तासु पयान सगुन यह नीती।।

jāsu sakala maṃgalamaya kītī। tāsu payāna saguna yaha nītī॥

प्रभु पयान जाना बैदेहीं। फरकि बाम अँग जनु कहि देहीं।।

prabhu payāna jānā baidehīṃ। pharaki bāma a~ga janu kahi dehīṃ॥

जोइ जोइ सगुन जानकिहि होई। असगुन भयउ रावनहि सोई।।

joi joi saguna jānakihi hoī। asaguna bhayau rāvanahi soī॥

चला कटकु को बरनैं पारा। गर्जहि बानर भालु अपारा।।

calā kaṭaku ko baranaiṃ pārā। garjahi bānara bhālu apārā॥

नख आयुध गिरि पादपधारी। चले गगन महि इच्छाचारी।।

nakha āyudha giri pādapadhārī। cale gagana mahi icchācārī॥

केहरिनाद भालु कपि करहीं। डगमगाहिं दिग्गज चिक्करहीं।।

keharināda bhālu kapi karahīṃ। ḍagamagāhiṃ diggaja cikkarahīṃ॥

चिक्करहिं दिग्गज डोल महि गिरि लोल सागर खरभरे।

cikkarahiṃ diggaja ḍola mahi giri lola sāgara kharabhare।

मन हरष सभ गंधर्ब सुर मुनि नाग किन्नर दुख टरे।।

mana haraṣa sabha gaṃdharba sura muni nāga kinnara dukha ṭare॥

कटकटहिं मर्कट बिकट भट बहु कोटि कोटिन्ह धावहीं।

kaṭakaṭahiṃ markaṭa bikaṭa bhaṭa bahu koṭi koṭinha dhāvahīṃ।

जय राम प्रबल प्रताप कोसलनाथ गुन गन गावहीं।।1।।

jaya rāma prabala pratāpa kosalanātha guna gana gāvahīṃ॥1॥

सहि सक न भार उदार अहिपति बार बारहिं मोहई।

sahi saka na bhāra udāra ahipati bāra bārahiṃ mohaī।

गह दसन पुनि पुनि कमठ पृष्ट कठोर सो किमि सोहई।।

gaha dasana puni puni kamaṭha pṛṣṭa kaṭhora so kimi sohaī॥

रघुबीर रुचिर प्रयान प्रस्थिति जानि परम सुहावनी।

raghubīra rucira prayāna prasthiti jāni parama suhāvanī।

जनु कमठ खर्पर सर्पराज सो लिखत अबिचल पावनी।।2।।

janu kamaṭha kharpara sarparāja so likhata abicala pāvanī॥2॥

एहि बिधि जाइ कृपानिधि उतरे सागर तीर।

ehi bidhi jāi kṛpānidhi utare sāgara tīra।

जहँ तहँ लागे खान फल भालु बिपुल कपि बीर।।35।।

jaha~ taha~ lāge khāna phala bhālu bipula kapi bīra॥35॥

उहाँ निसाचर रहहिं ससंका। जब ते जारि गयउ कपि लंका।।

uhā~ nisācara rahahiṃ sasaṃkā। jaba te jāri gayau kapi laṃkā॥

निज निज गृहँ सब करहिं बिचारा। नहिं निसिचर कुल केर उबारा।।

nija nija gṛha~ saba karahiṃ bicārā। nahiṃ nisicara kula kera ubārā॥

जासु दूत बल बरनि न जाई। तेहि आएँ पुर कवन भलाई।।

jāsu dūta bala barani na jāī। tehi āe~ pura kavana bhalāī॥

दूतन्हि सन सुनि पुरजन बानी। मंदोदरी अधिक अकुलानी।।

dūtanhi sana suni purajana bānī। maṃdodarī adhika akulānī॥

रहसि जोरि कर पति पग लागी। बोली बचन नीति रस पागी।।

rahasi jori kara pati paga lāgī। bolī bacana nīti rasa pāgī॥

कंत करष हरि सन परिहरहू। मोर कहा अति हित हियँ धरहु।।

kaṃta karaṣa hari sana pariharahū। mora kahā ati hita hiya~ dharahu॥

समुझत जासु दूत कइ करनी। स्त्रवहीं गर्भ रजनीचर धरनी।।

samujhata jāsu dūta kai karanī। stravahīṃ garbha rajanīcara dharanī॥

तासु नारि निज सचिव बोलाई। पठवहु कंत जो चहहु भलाई।।

tāsu nāri nija saciva bolāī। paṭhavahu kaṃta jo cahahu bhalāī॥

तब कुल कमल बिपिन दुखदाई। सीता सीत निसा सम आई।।

taba kula kamala bipina dukhadāī। sītā sīta nisā sama āī॥

सुनहु नाथ सीता बिनु दीन्हें। हित न तुम्हार संभु अज कीन्हें।।

sunahu nātha sītā binu dīnheṃ। hita na tumhāra saṃbhu aja kīnheṃ॥

-राम बान अहि गन सरिस निकर निसाचर भेक।

-rāma bāna ahi gana sarisa nikara nisācara bheka।

जब लगि ग्रसत न तब लगि जतनु करहु तजि टेक।।36।।

jaba lagi grasata na taba lagi jatanu karahu taji ṭeka॥36॥

श्रवन सुनी सठ ता करि बानी। बिहसा जगत बिदित अभिमानी।।

śravana sunī saṭha tā kari bānī। bihasā jagata bidita abhimānī॥

सभय सुभाउ नारि कर साचा। मंगल महुँ भय मन अति काचा।।

sabhaya subhāu nāri kara sācā। maṃgala mahu~ bhaya mana ati kācā॥

जौं आवइ मर्कट कटकाई। जिअहिं बिचारे निसिचर खाई।।

jauṃ āvai markaṭa kaṭakāī। jiahiṃ bicāre nisicara khāī॥

कंपहिं लोकप जाकी त्रासा। तासु नारि सभीत बड़ि हासा।।

kaṃpahiṃ lokapa jākī trāsā। tāsu nāri sabhīta bar̤i hāsā॥

अस कहि बिहसि ताहि उर लाई। चलेउ सभाँ ममता अधिकाई।।

asa kahi bihasi tāhi ura lāī। caleu sabhā~ mamatā adhikāī॥

मंदोदरी हृदयँ कर चिंता। भयउ कंत पर बिधि बिपरीता।।

maṃdodarī hṛdaya~ kara ciṃtā। bhayau kaṃta para bidhi biparītā॥

बैठेउ सभाँ खबरि असि पाई। सिंधु पार सेना सब आई।।

baiṭheu sabhā~ khabari asi pāī। siṃdhu pāra senā saba āī॥

बूझेसि सचिव उचित मत कहहू। ते सब हँसे मष्ट करि रहहू।।

būjhesi saciva ucita mata kahahū। te saba ha~se maṣṭa kari rahahū॥

जितेहु सुरासुर तब श्रम नाहीं। नर बानर केहि लेखे माही।।

jitehu surāsura taba śrama nāhīṃ। nara bānara kehi lekhe māhī॥

सचिव बैद गुर तीनि जौं प्रिय बोलहिं भय आस।

saciva baida gura tīni jauṃ priya bolahiṃ bhaya āsa।

राज धर्म तन तीनि कर होइ बेगिहीं नास।।37।।

rāja dharma tana tīni kara hoi begihīṃ nāsa॥37॥

सोइ रावन कहुँ बनि सहाई। अस्तुति करहिं सुनाइ सुनाई।।

soi rāvana kahu~ bani sahāī। astuti karahiṃ sunāi sunāī॥

अवसर जानि बिभीषनु आवा। भ्राता चरन सीसु तेहिं नावा।।

avasara jāni bibhīṣanu āvā। bhrātā carana sīsu tehiṃ nāvā॥

पुनि सिरु नाइ बैठ निज आसन। बोला बचन पाइ अनुसासन।।

puni siru nāi baiṭha nija āsana। bolā bacana pāi anusāsana॥

जौ कृपाल पूँछिहु मोहि बाता। मति अनुरुप कहउँ हित ताता।।

jau kṛpāla pū~chihu mohi bātā। mati anurupa kahau~ hita tātā॥

जो आपन चाहै कल्याना। सुजसु सुमति सुभ गति सुख नाना।।

jo āpana cāhai kalyānā। sujasu sumati subha gati sukha nānā॥

सो परनारि लिलार गोसाईं। तजउ चउथि के चंद कि नाई।।

so paranāri lilāra gosāīṃ। tajau cauthi ke caṃda ki nāī॥

चौदह भुवन एक पति होई। भूतद्रोह तिष्टइ नहिं सोई।।

caudaha bhuvana eka pati hoī। bhūtadroha tiṣṭai nahiṃ soī॥

गुन सागर नागर नर जोऊ। अलप लोभ भल कहइ न कोऊ।।

guna sāgara nāgara nara joū। alapa lobha bhala kahai na koū॥

काम क्रोध मद लोभ सब नाथ नरक के पंथ।

kāma krodha mada lobha saba nātha naraka ke paṃtha।

सब परिहरि रघुबीरहि भजहु भजहिं जेहि संत।।38।।

saba parihari raghubīrahi bhajahu bhajahiṃ jehi saṃta॥38॥

तात राम नहिं नर भूपाला। भुवनेस्वर कालहु कर काला।।

tāta rāma nahiṃ nara bhūpālā। bhuvanesvara kālahu kara kālā॥

ब्रह्म अनामय अज भगवंता। ब्यापक अजित अनादि अनंता।।

brahma anāmaya aja bhagavaṃtā। byāpaka ajita anādi anaṃtā॥

गो द्विज धेनु देव हितकारी। कृपासिंधु मानुष तनुधारी।।

go dvija dhenu deva hitakārī। kṛpāsiṃdhu mānuṣa tanudhārī॥

जन रंजन भंजन खल ब्राता। बेद धर्म रच्छक सुनु भ्राता।।

jana raṃjana bhaṃjana khala brātā। beda dharma racchaka sunu bhrātā॥

ताहि बयरु तजि नाइअ माथा। प्रनतारति भंजन रघुनाथा।।

tāhi bayaru taji nāia māthā। pranatārati bhaṃjana raghunāthā॥

देहु नाथ प्रभु कहुँ बैदेही। भजहु राम बिनु हेतु सनेही।।

dehu nātha prabhu kahu~ baidehī। bhajahu rāma binu hetu sanehī॥

सरन गएँ प्रभु ताहु न त्यागा। बिस्व द्रोह कृत अघ जेहि लागा।।

sarana gae~ prabhu tāhu na tyāgā। bisva droha kṛta agha jehi lāgā॥

जासु नाम त्रय ताप नसावन। सोइ प्रभु प्रगट समुझु जियँ रावन।।

jāsu nāma traya tāpa nasāvana। soi prabhu pragaṭa samujhu jiya~ rāvana॥

बार बार पद लागउँ बिनय करउँ दससीस।

bāra bāra pada lāgau~ binaya karau~ dasasīsa।

परिहरि मान मोह मद भजहु कोसलाधीस।।39(क)।।

parihari māna moha mada bhajahu kosalādhīsa॥39(ka)॥

मुनि पुलस्ति निज सिष्य सन कहि पठई यह बात।

muni pulasti nija siṣya sana kahi paṭhaī yaha bāta।

तुरत सो मैं प्रभु सन कही पाइ सुअवसरु तात।।39(ख)।।

turata so maiṃ prabhu sana kahī pāi suavasaru tāta॥39(kha)॥

माल्यवंत अति सचिव सयाना। तासु बचन सुनि अति सुख माना।।

mālyavaṃta ati saciva sayānā। tāsu bacana suni ati sukha mānā॥

तात अनुज तव नीति बिभूषन। सो उर धरहु जो कहत बिभीषन।।

tāta anuja tava nīti bibhūṣana। so ura dharahu jo kahata bibhīṣana॥

रिपु उतकरष कहत सठ दोऊ। दूरि न करहु इहाँ हइ कोऊ।।

ripu utakaraṣa kahata saṭha doū। dūri na karahu ihā~ hai koū॥

माल्यवंत गृह गयउ बहोरी। कहइ बिभीषनु पुनि कर जोरी।।

mālyavaṃta gṛha gayau bahorī। kahai bibhīṣanu puni kara jorī॥

सुमति कुमति सब कें उर रहहीं। नाथ पुरान निगम अस कहहीं।।

sumati kumati saba keṃ ura rahahīṃ। nātha purāna nigama asa kahahīṃ॥

जहाँ सुमति तहँ संपति नाना। जहाँ कुमति तहँ बिपति निदाना।।

jahā~ sumati taha~ saṃpati nānā। jahā~ kumati taha~ bipati nidānā॥

तव उर कुमति बसी बिपरीता। हित अनहित मानहु रिपु प्रीता।।

tava ura kumati basī biparītā। hita anahita mānahu ripu prītā॥

कालराति निसिचर कुल केरी। तेहि सीता पर प्रीति घनेरी।।

kālarāti nisicara kula kerī। tehi sītā para prīti ghanerī॥

तात चरन गहि मागउँ राखहु मोर दुलार।

tāta carana gahi māgau~ rākhahu mora dulāra।

सीत देहु राम कहुँ अहित न होइ तुम्हार।।40।।

sīta dehu rāma kahu~ ahita na hoi tumhāra॥40॥

बुध पुरान श्रुति संमत बानी। कही बिभीषन नीति बखानी।।

budha purāna śruti saṃmata bānī। kahī bibhīṣana nīti bakhānī॥

सुनत दसानन उठा रिसाई। खल तोहि निकट मुत्यु अब आई।।

sunata dasānana uṭhā risāī। khala tohi nikaṭa mutyu aba āī॥

जिअसि सदा सठ मोर जिआवा। रिपु कर पच्छ मूढ़ तोहि भावा।।

jiasi sadā saṭha mora jiāvā। ripu kara paccha mūr̤ha tohi bhāvā॥

कहसि न खल अस को जग माहीं। भुज बल जाहि जिता मैं नाही।।

kahasi na khala asa ko jaga māhīṃ। bhuja bala jāhi jitā maiṃ nāhī॥

मम पुर बसि तपसिन्ह पर प्रीती। सठ मिलु जाइ तिन्हहि कहु नीती।।

mama pura basi tapasinha para prītī। saṭha milu jāi tinhahi kahu nītī॥

अस कहि कीन्हेसि चरन प्रहारा। अनुज गहे पद बारहिं बारा।।

asa kahi kīnhesi carana prahārā। anuja gahe pada bārahiṃ bārā॥

उमा संत कइ इहइ बड़ाई। मंद करत जो करइ भलाई।।

umā saṃta kai ihai bar̤āī। maṃda karata jo karai bhalāī॥

तुम्ह पितु सरिस भलेहिं मोहि मारा। रामु भजें हित नाथ तुम्हारा।।

tumha pitu sarisa bhalehiṃ mohi mārā। rāmu bhajeṃ hita nātha tumhārā॥

सचिव संग लै नभ पथ गयऊ। सबहि सुनाइ कहत अस भयऊ।।

saciva saṃga lai nabha patha gayaū। sabahi sunāi kahata asa bhayaū॥

रामु सत्यसंकल्प प्रभु सभा कालबस तोरि।

rāmu satyasaṃkalpa prabhu sabhā kālabasa tori।

मै रघुबीर सरन अब जाउँ देहु जनि खोरि।।41।।

mai raghubīra sarana aba jāu~ dehu jani khori॥41॥

अस कहि चला बिभीषनु जबहीं। आयूहीन भए सब तबहीं।।

asa kahi calā bibhīṣanu jabahīṃ। āyūhīna bhae saba tabahīṃ॥

साधु अवग्या तुरत भवानी। कर कल्यान अखिल कै हानी।।

sādhu avagyā turata bhavānī। kara kalyāna akhila kai hānī॥

रावन जबहिं बिभीषन त्यागा। भयउ बिभव बिनु तबहिं अभागा।।

rāvana jabahiṃ bibhīṣana tyāgā। bhayau bibhava binu tabahiṃ abhāgā॥

चलेउ हरषि रघुनायक पाहीं। करत मनोरथ बहु मन माहीं।।

caleu haraṣi raghunāyaka pāhīṃ। karata manoratha bahu mana māhīṃ॥

देखिहउँ जाइ चरन जलजाता। अरुन मृदुल सेवक सुखदाता।।

dekhihau~ jāi carana jalajātā। aruna mṛdula sevaka sukhadātā॥

जे पद परसि तरी रिषिनारी। दंडक कानन पावनकारी।।

je pada parasi tarī riṣinārī। daṃḍaka kānana pāvanakārī॥

जे पद जनकसुताँ उर लाए। कपट कुरंग संग धर धाए।।

je pada janakasutā~ ura lāe। kapaṭa kuraṃga saṃga dhara dhāe॥

हर उर सर सरोज पद जेई। अहोभाग्य मै देखिहउँ तेई।।

hara ura sara saroja pada jeī। ahobhāgya mai dekhihau~ teī॥

जिन्ह पायन्ह के पादुकन्हि भरतु रहे मन लाइ।

jinha pāyanha ke pādukanhi bharatu rahe mana lāi।

ते पद आजु बिलोकिहउँ इन्ह नयनन्हि अब जाइ।।42।।

te pada āju bilokihau~ inha nayananhi aba jāi॥42॥

एहि बिधि करत सप्रेम बिचारा। आयउ सपदि सिंधु एहिं पारा।।

ehi bidhi karata saprema bicārā। āyau sapadi siṃdhu ehiṃ pārā॥

कपिन्ह बिभीषनु आवत देखा। जाना कोउ रिपु दूत बिसेषा।।

kapinha bibhīṣanu āvata dekhā। jānā kou ripu dūta biseṣā॥

ताहि राखि कपीस पहिं आए। समाचार सब ताहि सुनाए।।

tāhi rākhi kapīsa pahiṃ āe। samācāra saba tāhi sunāe॥

कह सुग्रीव सुनहु रघुराई। आवा मिलन दसानन भाई।।

kaha sugrīva sunahu raghurāī। āvā milana dasānana bhāī॥

कह प्रभु सखा बूझिऐ काहा। कहइ कपीस सुनहु नरनाहा।।

kaha prabhu sakhā būjhiai kāhā। kahai kapīsa sunahu naranāhā॥

जानि न जाइ निसाचर माया। कामरूप केहि कारन आया।।

jāni na jāi nisācara māyā। kāmarūpa kehi kārana āyā॥

भेद हमार लेन सठ आवा। राखिअ बाँधि मोहि अस भावा।।

bheda hamāra lena saṭha āvā। rākhia bā~dhi mohi asa bhāvā॥

सखा नीति तुम्ह नीकि बिचारी। मम पन सरनागत भयहारी।।

sakhā nīti tumha nīki bicārī। mama pana saranāgata bhayahārī॥

सुनि प्रभु बचन हरष हनुमाना। सरनागत बच्छल भगवाना।।

suni prabhu bacana haraṣa hanumānā। saranāgata bacchala bhagavānā॥

सरनागत कहुँ जे तजहिं निज अनहित अनुमानि।

saranāgata kahu~ je tajahiṃ nija anahita anumāni।

ते नर पावँर पापमय तिन्हहि बिलोकत हानि।।43।।

te nara pāva~ra pāpamaya tinhahi bilokata hāni॥43॥

कोटि बिप्र बध लागहिं जाहू। आएँ सरन तजउँ नहिं ताहू।।

koṭi bipra badha lāgahiṃ jāhū। āe~ sarana tajau~ nahiṃ tāhū॥

सनमुख होइ जीव मोहि जबहीं। जन्म कोटि अघ नासहिं तबहीं।।

sanamukha hoi jīva mohi jabahīṃ। janma koṭi agha nāsahiṃ tabahīṃ॥

पापवंत कर सहज सुभाऊ। भजनु मोर तेहि भाव न काऊ।।

pāpavaṃta kara sahaja subhāū। bhajanu mora tehi bhāva na kāū॥

जौं पै दुष्टहदय सोइ होई। मोरें सनमुख आव कि सोई।।

jauṃ pai duṣṭahadaya soi hoī। moreṃ sanamukha āva ki soī॥

निर्मल मन जन सो मोहि पावा। मोहि कपट छल छिद्र न भावा।।

nirmala mana jana so mohi pāvā। mohi kapaṭa chala chidra na bhāvā॥

भेद लेन पठवा दससीसा। तबहुँ न कछु भय हानि कपीसा।।

bheda lena paṭhavā dasasīsā। tabahu~ na kachu bhaya hāni kapīsā॥

जग महुँ सखा निसाचर जेते। लछिमनु हनइ निमिष महुँ तेते।।

jaga mahu~ sakhā nisācara jete। lachimanu hanai nimiṣa mahu~ tete॥

जौं सभीत आवा सरनाई। रखिहउँ ताहि प्रान की नाई।।

jauṃ sabhīta āvā saranāī। rakhihau~ tāhi prāna kī nāī॥

उभय भाँति तेहि आनहु हँसि कह कृपानिकेत।

ubhaya bhā~ti tehi ānahu ha~si kaha kṛpāniketa।

जय कृपाल कहि चले अंगद हनू समेत।।44।।

jaya kṛpāla kahi cale aṃgada hanū sameta॥44॥

सादर तेहि आगें करि बानर। चले जहाँ रघुपति करुनाकर।।

sādara tehi āgeṃ kari bānara। cale jahā~ raghupati karunākara॥

दूरिहि ते देखे द्वौ भ्राता। नयनानंद दान के दाता।।

dūrihi te dekhe dvau bhrātā। nayanānaṃda dāna ke dātā॥

बहुरि राम छबिधाम बिलोकी। रहेउ ठटुकि एकटक पल रोकी।।

bahuri rāma chabidhāma bilokī। raheu ṭhaṭuki ekaṭaka pala rokī॥

भुज प्रलंब कंजारुन लोचन। स्यामल गात प्रनत भय मोचन।।

bhuja pralaṃba kaṃjāruna locana। syāmala gāta pranata bhaya mocana॥

सिंघ कंध आयत उर सोहा। आनन अमित मदन मन मोहा।।

siṃgha kaṃdha āyata ura sohā। ānana amita madana mana mohā॥

नयन नीर पुलकित अति गाता। मन धरि धीर कही मृदु बाता।।

nayana nīra pulakita ati gātā। mana dhari dhīra kahī mṛdu bātā॥

नाथ दसानन कर मैं भ्राता। निसिचर बंस जनम सुरत्राता।।

nātha dasānana kara maiṃ bhrātā। nisicara baṃsa janama suratrātā॥

सहज पापप्रिय तामस देहा। जथा उलूकहि तम पर नेहा।।

sahaja pāpapriya tāmasa dehā। jathā ulūkahi tama para nehā॥

श्रवन सुजसु सुनि आयउँ प्रभु भंजन भव भीर।

śravana sujasu suni āyau~ prabhu bhaṃjana bhava bhīra।

त्राहि त्राहि आरति हरन सरन सुखद रघुबीर।।45।।

trāhi trāhi ārati harana sarana sukhada raghubīra॥45॥

अस कहि करत दंडवत देखा। तुरत उठे प्रभु हरष बिसेषा।।

asa kahi karata daṃḍavata dekhā। turata uṭhe prabhu haraṣa biseṣā॥

दीन बचन सुनि प्रभु मन भावा। भुज बिसाल गहि हृदयँ लगावा।।

dīna bacana suni prabhu mana bhāvā। bhuja bisāla gahi hṛdaya~ lagāvā॥

अनुज सहित मिलि ढिग बैठारी। बोले बचन भगत भयहारी।।

anuja sahita mili ḍhiga baiṭhārī। bole bacana bhagata bhayahārī॥

कहु लंकेस सहित परिवारा। कुसल कुठाहर बास तुम्हारा।।

kahu laṃkesa sahita parivārā। kusala kuṭhāhara bāsa tumhārā॥

खल मंडलीं बसहु दिनु राती। सखा धरम निबहइ केहि भाँती।।

khala maṃḍalīṃ basahu dinu rātī। sakhā dharama nibahai kehi bhā~tī॥

मैं जानउँ तुम्हारि सब रीती। अति नय निपुन न भाव अनीती।।

maiṃ jānau~ tumhāri saba rītī। ati naya nipuna na bhāva anītī॥

बरु भल बास नरक कर ताता। दुष्ट संग जनि देइ बिधाता।।

baru bhala bāsa naraka kara tātā। duṣṭa saṃga jani dei bidhātā॥

अब पद देखि कुसल रघुराया। जौं तुम्ह कीन्ह जानि जन दाया।।

aba pada dekhi kusala raghurāyā। jauṃ tumha kīnha jāni jana dāyā॥

तब लगि कुसल न जीव कहुँ सपनेहुँ मन बिश्राम।

taba lagi kusala na jīva kahu~ sapanehu~ mana biśrāma।

जब लगि भजत न राम कहुँ सोक धाम तजि काम।।46।।

jaba lagi bhajata na rāma kahu~ soka dhāma taji kāma॥46॥

तब लगि हृदयँ बसत खल नाना। लोभ मोह मच्छर मद माना।।

taba lagi hṛdaya~ basata khala nānā। lobha moha macchara mada mānā॥

जब लगि उर न बसत रघुनाथा। धरें चाप सायक कटि भाथा।।

jaba lagi ura na basata raghunāthā। dhareṃ cāpa sāyaka kaṭi bhāthā॥

ममता तरुन तमी अँधिआरी। राग द्वेष उलूक सुखकारी।।

mamatā taruna tamī a~dhiārī। rāga dveṣa ulūka sukhakārī॥

तब लगि बसति जीव मन माहीं। जब लगि प्रभु प्रताप रबि नाहीं।।

taba lagi basati jīva mana māhīṃ। jaba lagi prabhu pratāpa rabi nāhīṃ॥

अब मैं कुसल मिटे भय भारे। देखि राम पद कमल तुम्हारे।।

aba maiṃ kusala miṭe bhaya bhāre। dekhi rāma pada kamala tumhāre॥

तुम्ह कृपाल जा पर अनुकूला। ताहि न ब्याप त्रिबिध भव सूला।।

tumha kṛpāla jā para anukūlā। tāhi na byāpa tribidha bhava sūlā॥

मैं निसिचर अति अधम सुभाऊ। सुभ आचरनु कीन्ह नहिं काऊ।।

maiṃ nisicara ati adhama subhāū। subha ācaranu kīnha nahiṃ kāū॥

जासु रूप मुनि ध्यान न आवा। तेहिं प्रभु हरषि हृदयँ मोहि लावा।।

jāsu rūpa muni dhyāna na āvā। tehiṃ prabhu haraṣi hṛdaya~ mohi lāvā॥

-अहोभाग्य मम अमित अति राम कृपा सुख पुंज।

-ahobhāgya mama amita ati rāma kṛpā sukha puṃja।

देखेउँ नयन बिरंचि सिब सेब्य जुगल पद कंज।।47।।

dekheu~ nayana biraṃci siba sebya jugala pada kaṃja॥47॥

सुनहु सखा निज कहउँ सुभाऊ। जान भुसुंडि संभु गिरिजाऊ।।

sunahu sakhā nija kahau~ subhāū। jāna bhusuṃḍi saṃbhu girijāū॥

जौं नर होइ चराचर द्रोही। आवे सभय सरन तकि मोही।।

jauṃ nara hoi carācara drohī। āve sabhaya sarana taki mohī॥

तजि मद मोह कपट छल नाना। करउँ सद्य तेहि साधु समाना।।

taji mada moha kapaṭa chala nānā। karau~ sadya tehi sādhu samānā॥

जननी जनक बंधु सुत दारा। तनु धनु भवन सुह्रद परिवारा।।

jananī janaka baṃdhu suta dārā। tanu dhanu bhavana suhrada parivārā॥

सब कै ममता ताग बटोरी। मम पद मनहि बाँध बरि डोरी।।

saba kai mamatā tāga baṭorī। mama pada manahi bā~dha bari ḍorī॥

समदरसी इच्छा कछु नाहीं। हरष सोक भय नहिं मन माहीं।।

samadarasī icchā kachu nāhīṃ। haraṣa soka bhaya nahiṃ mana māhīṃ॥

अस सज्जन मम उर बस कैसें। लोभी हृदयँ बसइ धनु जैसें।।

asa sajjana mama ura basa kaiseṃ। lobhī hṛdaya~ basai dhanu jaiseṃ॥

तुम्ह सारिखे संत प्रिय मोरें। धरउँ देह नहिं आन निहोरें।।

tumha sārikhe saṃta priya moreṃ। dharau~ deha nahiṃ āna nihoreṃ॥

सगुन उपासक परहित निरत नीति दृढ़ नेम।

saguna upāsaka parahita nirata nīti dṛr̤ha nema।

ते नर प्रान समान मम जिन्ह कें द्विज पद प्रेम।।48।।

te nara prāna samāna mama jinha keṃ dvija pada prema॥48॥

सुनु लंकेस सकल गुन तोरें। तातें तुम्ह अतिसय प्रिय मोरें।।

sunu laṃkesa sakala guna toreṃ। tāteṃ tumha atisaya priya moreṃ॥

राम बचन सुनि बानर जूथा। सकल कहहिं जय कृपा बरूथा।।

rāma bacana suni bānara jūthā। sakala kahahiṃ jaya kṛpā barūthā॥

सुनत बिभीषनु प्रभु कै बानी। नहिं अघात श्रवनामृत जानी।।

sunata bibhīṣanu prabhu kai bānī। nahiṃ aghāta śravanāmṛta jānī॥

पद अंबुज गहि बारहिं बारा। हृदयँ समात न प्रेमु अपारा।।

pada aṃbuja gahi bārahiṃ bārā। hṛdaya~ samāta na premu apārā॥

सुनहु देव सचराचर स्वामी। प्रनतपाल उर अंतरजामी।।

sunahu deva sacarācara svāmī। pranatapāla ura aṃtarajāmī॥

उर कछु प्रथम बासना रही। प्रभु पद प्रीति सरित सो बही।।

ura kachu prathama bāsanā rahī। prabhu pada prīti sarita so bahī॥

अब कृपाल निज भगति पावनी। देहु सदा सिव मन भावनी।।

aba kṛpāla nija bhagati pāvanī। dehu sadā siva mana bhāvanī॥

एवमस्तु कहि प्रभु रनधीरा। मागा तुरत सिंधु कर नीरा।।

evamastu kahi prabhu ranadhīrā। māgā turata siṃdhu kara nīrā॥

जदपि सखा तव इच्छा नाहीं। मोर दरसु अमोघ जग माहीं।।

jadapi sakhā tava icchā nāhīṃ। mora darasu amogha jaga māhīṃ॥

अस कहि राम तिलक तेहि सारा। सुमन बृष्टि नभ भई अपारा।।

asa kahi rāma tilaka tehi sārā। sumana bṛṣṭi nabha bhaī apārā॥

रावन क्रोध अनल निज स्वास समीर प्रचंड।

rāvana krodha anala nija svāsa samīra pracaṃḍa।

जरत बिभीषनु राखेउ दीन्हेहु राजु अखंड।।49(क)।।

jarata bibhīṣanu rākheu dīnhehu rāju akhaṃḍa॥49(ka)॥

जो संपति सिव रावनहि दीन्हि दिएँ दस माथ।

jo saṃpati siva rāvanahi dīnhi die~ dasa mātha।

सोइ संपदा बिभीषनहि सकुचि दीन्ह रघुनाथ।।49(ख)।।

soi saṃpadā bibhīṣanahi sakuci dīnha raghunātha॥49(kha)॥

अस प्रभु छाड़ि भजहिं जे आना। ते नर पसु बिनु पूँछ बिषाना।।

asa prabhu chār̤i bhajahiṃ je ānā। te nara pasu binu pū~cha biṣānā॥

निज जन जानि ताहि अपनावा। प्रभु सुभाव कपि कुल मन भावा।।

nija jana jāni tāhi apanāvā। prabhu subhāva kapi kula mana bhāvā॥

पुनि सर्बग्य सर्ब उर बासी। सर्बरूप सब रहित उदासी।।

puni sarbagya sarba ura bāsī। sarbarūpa saba rahita udāsī॥

बोले बचन नीति प्रतिपालक। कारन मनुज दनुज कुल घालक।।

bole bacana nīti pratipālaka। kārana manuja danuja kula ghālaka॥

सुनु कपीस लंकापति बीरा। केहि बिधि तरिअ जलधि गंभीरा।।

sunu kapīsa laṃkāpati bīrā। kehi bidhi taria jaladhi gaṃbhīrā॥

संकुल मकर उरग झष जाती। अति अगाध दुस्तर सब भाँती।।

saṃkula makara uraga jhaṣa jātī। ati agādha dustara saba bhā~tī॥

कह लंकेस सुनहु रघुनायक। कोटि सिंधु सोषक तव सायक।।

kaha laṃkesa sunahu raghunāyaka। koṭi siṃdhu soṣaka tava sāyaka॥

जद्यपि तदपि नीति असि गाई। बिनय करिअ सागर सन जाई।।

jadyapi tadapi nīti asi gāī। binaya karia sāgara sana jāī॥

प्रभु तुम्हार कुलगुर जलधि कहिहि उपाय बिचारि।

prabhu tumhāra kulagura jaladhi kahihi upāya bicāri।

बिनु प्रयास सागर तरिहि सकल भालु कपि धारि।।50।।

binu prayāsa sāgara tarihi sakala bhālu kapi dhāri॥50॥

सखा कही तुम्ह नीकि उपाई। करिअ दैव जौं होइ सहाई।।

sakhā kahī tumha nīki upāī। karia daiva jauṃ hoi sahāī॥

मंत्र न यह लछिमन मन भावा। राम बचन सुनि अति दुख पावा।।

maṃtra na yaha lachimana mana bhāvā। rāma bacana suni ati dukha pāvā॥

नाथ दैव कर कवन भरोसा। सोषिअ सिंधु करिअ मन रोसा।।

nātha daiva kara kavana bharosā। soṣia siṃdhu karia mana rosā॥

कादर मन कहुँ एक अधारा। दैव दैव आलसी पुकारा।।

kādara mana kahu~ eka adhārā। daiva daiva ālasī pukārā॥

सुनत बिहसि बोले रघुबीरा। ऐसेहिं करब धरहु मन धीरा।।

sunata bihasi bole raghubīrā। aisehiṃ karaba dharahu mana dhīrā॥

अस कहि प्रभु अनुजहि समुझाई। सिंधु समीप गए रघुराई।।

asa kahi prabhu anujahi samujhāī। siṃdhu samīpa gae raghurāī॥

प्रथम प्रनाम कीन्ह सिरु नाई। बैठे पुनि तट दर्भ डसाई।।

prathama pranāma kīnha siru nāī। baiṭhe puni taṭa darbha ḍasāī॥

जबहिं बिभीषन प्रभु पहिं आए। पाछें रावन दूत पठाए।।

jabahiṃ bibhīṣana prabhu pahiṃ āe। pācheṃ rāvana dūta paṭhāe॥

सकल चरित तिन्ह देखे धरें कपट कपि देह।

sakala carita tinha dekhe dhareṃ kapaṭa kapi deha।

प्रभु गुन हृदयँ सराहहिं सरनागत पर नेह।।51।।

prabhu guna hṛdaya~ sarāhahiṃ saranāgata para neha॥51॥

प्रगट बखानहिं राम सुभाऊ। अति सप्रेम गा बिसरि दुराऊ।।

pragaṭa bakhānahiṃ rāma subhāū। ati saprema gā bisari durāū॥

रिपु के दूत कपिन्ह तब जाने। सकल बाँधि कपीस पहिं आने।।

ripu ke dūta kapinha taba jāne। sakala bā~dhi kapīsa pahiṃ āne॥

कह सुग्रीव सुनहु सब बानर। अंग भंग करि पठवहु निसिचर।।

kaha sugrīva sunahu saba bānara। aṃga bhaṃga kari paṭhavahu nisicara॥

सुनि सुग्रीव बचन कपि धाए। बाँधि कटक चहु पास फिराए।।

suni sugrīva bacana kapi dhāe। bā~dhi kaṭaka cahu pāsa phirāe॥

बहु प्रकार मारन कपि लागे। दीन पुकारत तदपि न त्यागे।।

bahu prakāra mārana kapi lāge। dīna pukārata tadapi na tyāge॥

जो हमार हर नासा काना। तेहि कोसलाधीस कै आना।।

jo hamāra hara nāsā kānā। tehi kosalādhīsa kai ānā॥

सुनि लछिमन सब निकट बोलाए। दया लागि हँसि तुरत छोडाए।।

suni lachimana saba nikaṭa bolāe। dayā lāgi ha~si turata choḍāe॥

रावन कर दीजहु यह पाती। लछिमन बचन बाचु कुलघाती।।

rāvana kara dījahu yaha pātī। lachimana bacana bācu kulaghātī॥

कहेहु मुखागर मूढ़ सन मम संदेसु उदार।

kahehu mukhāgara mūr̤ha sana mama saṃdesu udāra।

सीता देइ मिलेहु न त आवा काल तुम्हार।।52।।

sītā dei milehu na ta āvā kāla tumhāra॥52॥

तुरत नाइ लछिमन पद माथा। चले दूत बरनत गुन गाथा।।

turata nāi lachimana pada māthā। cale dūta baranata guna gāthā॥

कहत राम जसु लंकाँ आए। रावन चरन सीस तिन्ह नाए।।

kahata rāma jasu laṃkā~ āe। rāvana carana sīsa tinha nāe॥

बिहसि दसानन पूँछी बाता। कहसि न सुक आपनि कुसलाता।।

bihasi dasānana pū~chī bātā। kahasi na suka āpani kusalātā॥

पुनि कहु खबरि बिभीषन केरी। जाहि मृत्यु आई अति नेरी।।

puni kahu khabari bibhīṣana kerī। jāhi mṛtyu āī ati nerī॥

करत राज लंका सठ त्यागी। होइहि जब कर कीट अभागी।।

karata rāja laṃkā saṭha tyāgī। hoihi jaba kara kīṭa abhāgī॥

पुनि कहु भालु कीस कटकाई। कठिन काल प्रेरित चलि आई।।

puni kahu bhālu kīsa kaṭakāī। kaṭhina kāla prerita cali āī॥

जिन्ह के जीवन कर रखवारा। भयउ मृदुल चित सिंधु बिचारा।।

jinha ke jīvana kara rakhavārā। bhayau mṛdula cita siṃdhu bicārā॥

कहु तपसिन्ह कै बात बहोरी। जिन्ह के हृदयँ त्रास अति मोरी।।

kahu tapasinha kai bāta bahorī। jinha ke hṛdaya~ trāsa ati morī॥

-की भइ भेंट कि फिरि गए श्रवन सुजसु सुनि मोर।

-kī bhai bheṃṭa ki phiri gae śravana sujasu suni mora।

कहसि न रिपु दल तेज बल बहुत चकित चित तोर।।53।।

kahasi na ripu dala teja bala bahuta cakita cita tora॥53॥

नाथ कृपा करि पूँछेहु जैसें। मानहु कहा क्रोध तजि तैसें।।

nātha kṛpā kari pū~chehu jaiseṃ। mānahu kahā krodha taji taiseṃ॥

मिला जाइ जब अनुज तुम्हारा। जातहिं राम तिलक तेहि सारा।।

milā jāi jaba anuja tumhārā। jātahiṃ rāma tilaka tehi sārā॥

रावन दूत हमहि सुनि काना। कपिन्ह बाँधि दीन्हे दुख नाना।।

rāvana dūta hamahi suni kānā। kapinha bā~dhi dīnhe dukha nānā॥

श्रवन नासिका काटै लागे। राम सपथ दीन्हे हम त्यागे।।

śravana nāsikā kāṭai lāge। rāma sapatha dīnhe hama tyāge॥

पूँछिहु नाथ राम कटकाई। बदन कोटि सत बरनि न जाई।।

pū~chihu nātha rāma kaṭakāī। badana koṭi sata barani na jāī॥

नाना बरन भालु कपि धारी। बिकटानन बिसाल भयकारी।।

nānā barana bhālu kapi dhārī। bikaṭānana bisāla bhayakārī॥

जेहिं पुर दहेउ हतेउ सुत तोरा। सकल कपिन्ह महँ तेहि बलु थोरा।।

jehiṃ pura daheu hateu suta torā। sakala kapinha maha~ tehi balu thorā॥

अमित नाम भट कठिन कराला। अमित नाग बल बिपुल बिसाला।।

amita nāma bhaṭa kaṭhina karālā। amita nāga bala bipula bisālā॥

द्विबिद मयंद नील नल अंगद गद बिकटासि।

dvibida mayaṃda nīla nala aṃgada gada bikaṭāsi।

दधिमुख केहरि निसठ सठ जामवंत बलरासि।।54।।

dadhimukha kehari nisaṭha saṭha jāmavaṃta balarāsi॥54॥

ए कपि सब सुग्रीव समाना। इन्ह सम कोटिन्ह गनइ को नाना।।

e kapi saba sugrīva samānā। inha sama koṭinha ganai ko nānā॥

राम कृपाँ अतुलित बल तिन्हहीं। तृन समान त्रेलोकहि गनहीं।।

rāma kṛpā~ atulita bala tinhahīṃ। tṛna samāna trelokahi ganahīṃ॥

अस मैं सुना श्रवन दसकंधर। पदुम अठारह जूथप बंदर।।

asa maiṃ sunā śravana dasakaṃdhara। paduma aṭhāraha jūthapa baṃdara॥

नाथ कटक महँ सो कपि नाहीं। जो न तुम्हहि जीतै रन माहीं।।

nātha kaṭaka maha~ so kapi nāhīṃ। jo na tumhahi jītai rana māhīṃ॥

परम क्रोध मीजहिं सब हाथा। आयसु पै न देहिं रघुनाथा।।

parama krodha mījahiṃ saba hāthā। āyasu pai na dehiṃ raghunāthā॥

सोषहिं सिंधु सहित झष ब्याला। पूरहीं न त भरि कुधर बिसाला।।

soṣahiṃ siṃdhu sahita jhaṣa byālā। pūrahīṃ na ta bhari kudhara bisālā॥

मर्दि गर्द मिलवहिं दससीसा। ऐसेइ बचन कहहिं सब कीसा।।

mardi garda milavahiṃ dasasīsā। aisei bacana kahahiṃ saba kīsā॥

गर्जहिं तर्जहिं सहज असंका। मानहु ग्रसन चहत हहिं लंका।।

garjahiṃ tarjahiṃ sahaja asaṃkā। mānahu grasana cahata hahiṃ laṃkā॥

-सहज सूर कपि भालु सब पुनि सिर पर प्रभु राम।

-sahaja sūra kapi bhālu saba puni sira para prabhu rāma।

रावन काल कोटि कहु जीति सकहिं संग्राम।।55।।

rāvana kāla koṭi kahu jīti sakahiṃ saṃgrāma॥55॥

राम तेज बल बुधि बिपुलाई। सेष सहस सत सकहिं न गाई।।

rāma teja bala budhi bipulāī। seṣa sahasa sata sakahiṃ na gāī॥

सक सर एक सोषि सत सागर। तब भ्रातहि पूँछेउ नय नागर।।

saka sara eka soṣi sata sāgara। taba bhrātahi pū~cheu naya nāgara॥

तासु बचन सुनि सागर पाहीं। मागत पंथ कृपा मन माहीं।।

tāsu bacana suni sāgara pāhīṃ। māgata paṃtha kṛpā mana māhīṃ॥

सुनत बचन बिहसा दससीसा। जौं असि मति सहाय कृत कीसा।।

sunata bacana bihasā dasasīsā। jauṃ asi mati sahāya kṛta kīsā॥

सहज भीरु कर बचन दृढ़ाई। सागर सन ठानी मचलाई।।

sahaja bhīru kara bacana dṛr̤hāī। sāgara sana ṭhānī macalāī॥

मूढ़ मृषा का करसि बड़ाई। रिपु बल बुद्धि थाह मैं पाई।।

mūr̤ha mṛṣā kā karasi bar̤āī। ripu bala buddhi thāha maiṃ pāī॥

सचिव सभीत बिभीषन जाकें। बिजय बिभूति कहाँ जग ताकें।।

saciva sabhīta bibhīṣana jākeṃ। bijaya bibhūti kahā~ jaga tākeṃ॥

सुनि खल बचन दूत रिस बाढ़ी। समय बिचारि पत्रिका काढ़ी।।

suni khala bacana dūta risa bār̤hī। samaya bicāri patrikā kār̤hī॥

रामानुज दीन्ही यह पाती। नाथ बचाइ जुड़ावहु छाती।।

rāmānuja dīnhī yaha pātī। nātha bacāi jur̤āvahu chātī॥

बिहसि बाम कर लीन्ही रावन। सचिव बोलि सठ लाग बचावन।।

bihasi bāma kara līnhī rāvana। saciva boli saṭha lāga bacāvana॥

बातन्ह मनहि रिझाइ सठ जनि घालसि कुल खीस।

bātanha manahi rijhāi saṭha jani ghālasi kula khīsa।

राम बिरोध न उबरसि सरन बिष्नु अज ईस।।56(क)।।

rāma birodha na ubarasi sarana biṣnu aja īsa॥56(ka)॥

की तजि मान अनुज इव प्रभु पद पंकज भृंग।

kī taji māna anuja iva prabhu pada paṃkaja bhṛṃga।

होहि कि राम सरानल खल कुल सहित पतंग।।56(ख)।।

hohi ki rāma sarānala khala kula sahita pataṃga॥56(kha)॥

सुनत सभय मन मुख मुसुकाई। कहत दसानन सबहि सुनाई।।

sunata sabhaya mana mukha musukāī। kahata dasānana sabahi sunāī॥

भूमि परा कर गहत अकासा। लघु तापस कर बाग बिलासा।।

bhūmi parā kara gahata akāsā। laghu tāpasa kara bāga bilāsā॥

कह सुक नाथ सत्य सब बानी। समुझहु छाड़ि प्रकृति अभिमानी।।

kaha suka nātha satya saba bānī। samujhahu chār̤i prakṛti abhimānī॥

सुनहु बचन मम परिहरि क्रोधा। नाथ राम सन तजहु बिरोधा।।

sunahu bacana mama parihari krodhā। nātha rāma sana tajahu birodhā॥

अति कोमल रघुबीर सुभाऊ। जद्यपि अखिल लोक कर राऊ।।

ati komala raghubīra subhāū। jadyapi akhila loka kara rāū॥

मिलत कृपा तुम्ह पर प्रभु करिही। उर अपराध न एकउ धरिही।।

milata kṛpā tumha para prabhu karihī। ura aparādha na ekau dharihī॥

जनकसुता रघुनाथहि दीजे। एतना कहा मोर प्रभु कीजे।

janakasutā raghunāthahi dīje। etanā kahā mora prabhu kīje।

जब तेहिं कहा देन बैदेही। चरन प्रहार कीन्ह सठ तेही।।

jaba tehiṃ kahā dena baidehī। carana prahāra kīnha saṭha tehī॥

नाइ चरन सिरु चला सो तहाँ। कृपासिंधु रघुनायक जहाँ।।

nāi carana siru calā so tahā~। kṛpāsiṃdhu raghunāyaka jahā~॥

करि प्रनामु निज कथा सुनाई। राम कृपाँ आपनि गति पाई।।

kari pranāmu nija kathā sunāī। rāma kṛpā~ āpani gati pāī॥

रिषि अगस्ति कीं साप भवानी। राछस भयउ रहा मुनि ग्यानी।।

riṣi agasti kīṃ sāpa bhavānī। rāchasa bhayau rahā muni gyānī॥

बंदि राम पद बारहिं बारा। मुनि निज आश्रम कहुँ पगु धारा।।

baṃdi rāma pada bārahiṃ bārā। muni nija āśrama kahu~ pagu dhārā॥

बिनय न मानत जलधि जड़ गए तीन दिन बीति।

binaya na mānata jaladhi jar̤a gae tīna dina bīti।

बोले राम सकोप तब भय बिनु होइ न प्रीति।।57।।

bole rāma sakopa taba bhaya binu hoi na prīti॥57॥

लछिमन बान सरासन आनू। सोषौं बारिधि बिसिख कृसानू।।

lachimana bāna sarāsana ānū। soṣauṃ bāridhi bisikha kṛsānū॥

सठ सन बिनय कुटिल सन प्रीती। सहज कृपन सन सुंदर नीती।।

saṭha sana binaya kuṭila sana prītī। sahaja kṛpana sana suṃdara nītī॥

ममता रत सन ग्यान कहानी। अति लोभी सन बिरति बखानी।।

mamatā rata sana gyāna kahānī। ati lobhī sana birati bakhānī॥

क्रोधिहि सम कामिहि हरि कथा। ऊसर बीज बएँ फल जथा।।

krodhihi sama kāmihi hari kathā। ūsara bīja bae~ phala jathā॥

अस कहि रघुपति चाप चढ़ावा। यह मत लछिमन के मन भावा।।

asa kahi raghupati cāpa car̤hāvā। yaha mata lachimana ke mana bhāvā॥

संघानेउ प्रभु बिसिख कराला। उठी उदधि उर अंतर ज्वाला।।

saṃghāneu prabhu bisikha karālā। uṭhī udadhi ura aṃtara jvālā॥

मकर उरग झष गन अकुलाने। जरत जंतु जलनिधि जब जाने।।

makara uraga jhaṣa gana akulāne। jarata jaṃtu jalanidhi jaba jāne॥

कनक थार भरि मनि गन नाना। बिप्र रूप आयउ तजि माना।।

kanaka thāra bhari mani gana nānā। bipra rūpa āyau taji mānā॥

काटेहिं पइ कदरी फरइ कोटि जतन कोउ सींच।

kāṭehiṃ pai kadarī pharai koṭi jatana kou sīṃca।

बिनय न मान खगेस सुनु डाटेहिं पइ नव नीच।।58।।

binaya na māna khagesa sunu ḍāṭehiṃ pai nava nīca॥58॥

सभय सिंधु गहि पद प्रभु केरे। छमहु नाथ सब अवगुन मेरे।।

sabhaya siṃdhu gahi pada prabhu kere। chamahu nātha saba avaguna mere॥

गगन समीर अनल जल धरनी। इन्ह कइ नाथ सहज जड़ करनी।।

gagana samīra anala jala dharanī। inha kai nātha sahaja jar̤a karanī॥

तव प्रेरित मायाँ उपजाए। सृष्टि हेतु सब ग्रंथनि गाए।।

tava prerita māyā~ upajāe। sṛṣṭi hetu saba graṃthani gāe॥

प्रभु आयसु जेहि कहँ जस अहई। सो तेहि भाँति रहे सुख लहई।।

prabhu āyasu jehi kaha~ jasa ahaī। so tehi bhā~ti rahe sukha lahaī॥

प्रभु भल कीन्ही मोहि सिख दीन्ही। मरजादा पुनि तुम्हरी कीन्ही।।

prabhu bhala kīnhī mohi sikha dīnhī। marajādā puni tumharī kīnhī॥

ढोल गवाँर सूद्र पसु नारी। सकल ताड़ना के अधिकारी।।

ḍhola gavā~ra sūdra pasu nārī। sakala tār̤anā ke adhikārī॥

प्रभु प्रताप मैं जाब सुखाई। उतरिहि कटकु न मोरि बड़ाई।।

prabhu pratāpa maiṃ jāba sukhāī। utarihi kaṭaku na mori bar̤āī॥

प्रभु अग्या अपेल श्रुति गाई। करौं सो बेगि जौ तुम्हहि सोहाई।।

prabhu agyā apela śruti gāī। karauṃ so begi jau tumhahi sohāī॥

सुनत बिनीत बचन अति कह कृपाल मुसुकाइ।

sunata binīta bacana ati kaha kṛpāla musukāi।

जेहि बिधि उतरै कपि कटकु तात सो कहहु उपाइ।।59।।

jehi bidhi utarai kapi kaṭaku tāta so kahahu upāi॥59॥